فازل میرانێ، بەرپرسێ دەستەیا كارگێرییا مەكتەبا سیاسییا پارتی د دیدارەكێدا ل گەل كەنالێ كوردستان 24 راگەهاند: هەموو ئالی د ڤی وەلاتیدا هەڤپشكێن ئێكن هەروەسا دیاركر ژی دڤان هەلبژارتناندا پیلانا نەحەزێن مە ژ ئالیێ مللەتی ڤە هاتە تێكدان.
ل دۆر پرسا پێكئینانا شاندێ دانوستاندكارێ پارتی دیموكراتی كوردستان بۆ بابەتێ پێكئینانا كابینەیا نوو یا حوكمەتا هەرێمێ كو وی شاندی سەرەدانا هەر ئێك ژ ئێكگرتووی ئیسلامی و كۆمەلا دادگەری كریە، ئایا ناڤەرۆكا وان هەردو سەرەدانان چ بوو، فازل میرانی گۆت» ب بۆچوونا من هەلبژارتن بۆ سەركەفتنێ و هەژمارا كورسییان نینە، هەلبژارتن پڕۆسەیەكا دیموكراسییە بۆ براكتیزەكرنا وێ دناڤ مللەتێ خوە دا وەكو ئەزموونەك و سەركەفتن د هەلبژارتناندا ئانكو بەرپرسیارەتییا پاراستنا سەركەفتنێیە و پێدڤییا پاراستنا وێ سەركەفتنێ بەرپرسیارەتییا تە مەزنتر لێدكەت، وەكو پارتییەك ئەز سوپاسگوزارێ خەلكێ كوردستانێ مە ب هەموو جەماوەرێ ئالیێن سیاسی ڤە، ژ بەر كو من وەسا د دیت پیلانەكا مەزن ل سەر هەرێما كوردستانێ هەبوو كو ئاریشە بكەڤنە د هەلبژارتناندا یان هەرێمێ پارچە بكەن، ب بۆچوونا من خەلكێ هەرێمێ ب رێژەیا پشكدارییا خوە یا مەزن كو 72% بوو و ئەو رێژەیا پشكداریێ هەستەكا نیشتمانپەروەرانەبوو د ناڤ خەلكێ مە دا ب هەموو پێكهاتەیانڤە بەرسڤا وان بوو بۆ وێ پیلانێ كو پیلانا ناڤبری شكەستن ئینا، هەروەسا هەلبژارتنێن سەركەفتی بوون ژ بەر كو مەترسییەك ژ شێوەیێ پڕۆسەیێ و كونترۆلا وێ هەبوو و دیزاین ژی دەستەواژەیەك بوو كو نوكە هەموو حزب باسێ دیزاینێ دكەن و ب دیتنا من هەكە دیزاین ژی هەبیت سەرنەگرت یان د بنەڕەتدا دیزاین نەبوو (و الله أعلم) «.
فازل میرانی پرسیاركر» ئایا ئەم پتر حەز ژ وەلاتێ خوە یان هەژمارا كورسییان دكەین؟ بێگومان ئەم پتر حەز ژ وەلاتێ خوە دكەین و هەكە ئەڤ چەندە هەبیت ئانكو دڤێت هەموو تشتەكی رازی بكەی ژ پێخەمەت حەزا وەلاتی. باشە هەكە ڤێ چەندێ بكەینە كەلتوورەك، كو هەموو تشتەك ژ پێخەمەت نیشتمانێ مە، ئەڤجا كورسییەك كێم ببیت یان دەنگ زێدە ببن، هەر كەسەك دخوازیت ب سەركەڤیت بەلێ یا گرنگتر ژ مە هەموویان ئەوە مللەتێ مە و وەلاتێ مە ب سەركەڤیت، ب بۆچوونا من د ڤان هەلبژارتناندا ب وی شێوەیی بوو و پیلانا نەحەزێن مە ژ ئالیێ مللەتی ڤە هاتە تێكدان».
ل دۆر وێ چەندێ ئێكگرتوویا ئیسلامی بڕیاردایە پشكداریێ د كابینەیا نوو یا حوكمەتێدا نەكەت، هەروەسا كۆمەلا دادگەری ژی بڕیار یا دای پشكداریێ د پەرلەمانیدا نەكەت، ئایا د دەمێ دانوستاندناندا بەرسڤا ڤان هەردو ئالییان بۆ پارتی چ بوو؟ فازل میرانی گۆت» ل گەل هەموو ئالیێن سیاسی هەكە برا ژی نەبین، ئەم هەڤپشكێن هەڤدوینە و هەكە برا و هەڤپشك بین هێشتا باشترە، دڤێت مرۆڤ دیلێ دوهی نەبیت هەروەسا دیلێ ئاخڤتنەكا پێشوەخت ژی نەبیت. پرسیارەك دهێتە بەراهییا مە هەموویان ئایا ڤی وەلاتی بپارێزین و رێكبكەڤین یان هەر هوسا بهێلین ئەڤە ئالییەك، ئالییەكێ دی رێزبەندا لیستان یا هەی ئەوژی پارتی و ئێكەتی و نەوەی نوو و ئێكگرتوو، هندی زووتر دەزگەهێن ڤی وەلاتی پێكبینین بۆمە باشترە چونكە دۆست و نەحەز چاڤەڕێ دكەن، دۆست حەز دكەن ب لەز حوكمەت بهێتە پێكئینان و نەحەز ژی حەز دكەن د بنەرەتدا نەهێتە پێكئینان، ئایا ئەم وەكو پارتی دێ ب ئاخڤتنا كێ ژ وان كەین هەكە بنێرینە ئاخڤتنێن سەركردایەتییا خوە، د دوماهی پەیاما سەرۆك بارزانی دا ل یاریگەها نێڤدەولەتییا هەولێرێ بەری ئەنجامدانا هەلبژارتنان گۆت مە ڤیتۆ ل سەر كەسێ نینە و دەرگەهێ مە یێ ڤەكریە و دێ دەستێ خوە بۆ هەموو كەسان درێژ كەین و سەرۆكێ هەرێمێ ژی گۆت ئەم ژ قۆناغا بانگەشەیا هەلبژارتنان رزگار بووین و دڤێت ب زمانەكێ دی ل گەل هەڤدو باخڤین و سەرۆكێ حوكمەتا هەرێمێ ژی گۆت ئەڤ وەلاتە یێ هەموو پێكهاتەیانە و یێ مە هەموویانە، هەكە حزبێن سیاسی و راگەهاندكار ئاخڤتنێن سەرۆك بارزانی و سەرۆكێ هەرێمێ و سەرۆكێ حوكمەتا هەرێمێ لێكبدەن ئایا پارتی چ دڤێت؟ پارتی دخوازیت ئەڤ دەزگەهە بهێنە رێكخستن».
بەرپرسێ دەستەیا كارگێرییا مەكتەبا سیاسییا پارتی دیموكراتی كوردستان دیاركر ژی»پارتی دیلێ دیرۆك و جوگرافیایێیە و ئەڤە كێماسی ژ دیرۆكا خەلكەكی دی ب هیچ شێوەیەكی نینە وەكو دیرۆك هەموو د پشكدارن ب باشی و خرابیێن كوردان و ب سەركەفتنان و شكەستنان .. هتد، بەلێ دیرۆكا پارتی ل قۆناغەكا دوور و درێژ تنێ بەر ل سەر بەری یێ دانای هەتا دیوار بلندكری پاشی هاتە ژناڤبرن و جارەكادی هاتە ڤە ل گەل حزبێن دی ئاڤاهییەك دروستكر و پارتی یا نەچارە بەرگریێ ژ ڤی ئاڤاهی بكەت تاكو جارەكادی ئەڤ ئاڤاهییە تووشی ژناڤبرنێ نەبیت. ئەڤجا بەرپرسیارەتییا پارتی هەم بەرامبەر دیرۆكێ و هەم بەرامبەر جوگرافیایێ ژ بەرپرسیارەتییا خەلكەكێ دی پترە».
بەرپرسێ دەستەیا كارگێرییا مەكتەبا سیاسییا پارتی رۆهنكر ژی»خەلكەك دبێژیت حوكمەتا داهاتی د دەمێ سالەكێدا ژی ناهێتە دروستكرن، پێشبینی نە و هندەك ژی هیڤی نە، ئەڤجا وی خەلكی ل هەلبژارتنان دەنگ كێم یێن ئیناین و كورسی نەئیناینە یان د بنەرەتدا ناخوازن ئەڤ حوكمەتە بهێتە دروستكرن ئەڤە ژ ئالییەكی، ژ ئالییەكی دی، دڤێت خەلكەك هەبیت بێژیت نەخێر ئەم دشێین و وەكو سەرۆك بارزانی دبێژیت هەكە مە ئیرادە هەبیت دێ شێین رێكێ بینین، ئانكو دڤێت ئەڤ دەزگەهە بهێنە دروستكرن و ل هەموو جیهانێ رێككەفتن بێ هەبوونا نەرمیێ ناهێتە كرن تنێ د حالەتەكیدا ئێك یێ دی بشكێنیت، بەلێ ئەڤە دناڤ مەدا نینە و یا باش ژی نینە هەبیت، ئانكو دڤێت نەرمییەك هەبیت».
سەبارەت گرنگییا لەزكرنێ د پێكئینانا حوكمەتێدا، گۆت» هەكە ئەم خوە ڤێ پێنگاڤێ ل ناڤخوە نەراوەستینین كەس نەشێت ب راوەستینیت، هەكە دیرۆكا بزاڤا رزگاریخوازا كوردی بخوینین ئێك ژ ئەگەرێن هەرە سەرەكی هۆكارێ ناڤخوەیی بیت».
ل دۆر مەرجێن پارتی بۆ ئالیێن سیاسی بۆ وێ چەندێ پشكدار بن د كابینەیا نوو یا حوكمەتا هەرێما كوردستانێدا، فازل میرانی دیاركر» سەرۆك بارزانی ب ئاشكرا یا گۆتی مەرجێ مە ئەوە پاراستنا ڤێ ئەزموونێ و دەلیڤەنەدان ب هەبوونا دەستێوەردانێ و چاكسازی بهێتە كرن و كوردستان نەبیتە بنگەهەك بۆ كارێن نە قانوونی ئەڤەنە مەرجێن پارتی، مەرج نینە بهێتە گۆتن دڤێت ئەڤە وەزیر بیت و نابیت ئەڤە ببیتە سەرۆكێ وەزیران، دهێتە گوهێن مە كو حزبەك ژ حزبان دبێژیت نابیت كاك مەسرور سەرۆكێ وەزیران بیت، باشە پارتی زوورینەیە و پێدڤییە ل سەر وێ حوكمەتێ پێكبینیت پارتی كێ بەربژار بكەت ئەو بڕیارا وێ یە».
میرانی خویاكر ژی» هندەك حزب دبێژن ئەم ناچینە پەرلەمانی، باشە بۆچی ناهێیە پەرلەمانی، پەرلەمان دەزگەهەكێ وەلاتێ تەیە و خەلكەكی دەنگێ خوە یێ دایەتە و تە چەند كورسی ژی یێن هەین ئانكو خەلكەكی باوەرییا دایەتە ل پەرلەمانی بەرگریێ ژێ بكەی و رێزێ ل وان بگری یێن دەنگێن خوە داینەتە، لەوما هزركرنا نوكە ب دیتنا من هزركرنەكا كارڤەدانێیە و نابیت ئەم و ئێكەتی هەلویستی ل سەر ئاڤا بكەین بەلكو دەلیڤێ بدەین».
سەبارەت وێ چەندێ هەكە پێكئینانا كابینەیا نوو یا حوكمەتا هەرێما كوردستانێ گیرۆ بوو، پارتی دیموكراتی كوردستان دێ چ كەت؟ فازل میرانێ، بەرپرسێ دەستەیا كارگێرییا مەكتەبا سیاسیا پارتی د بەرسڤا دا گۆت» هەكە مە و ئێكەتیێ بڕیار دابیت هەڤپشكێن ئێك بین، ئەنجامێن هەلبژارتنان بناغەیەكا گرنگە بەلێ نابیت نەرمی ل سەر ئەنجامێن هەلبژارتنان ژی نەهێتە كرن چونكە بۆ نموونە هەكە تە 60 كورسی هەبن دڤێت 60% بۆ تەبیت، بەلكو د بەرژەوەندییا تە دایە ژ 60% یا خوە ئێكی بدەیە یێ دی تاكو ل گەل تە بمینیت ئەڤە زمانێ تێكگەهشتنێیە، ژ بلی پێكئینانا حوكمەتێ، پارتی هیچ بەدیلەكێ نینە و دڤێت زمانێ تێكگەهشتنێ هەبیت، چاوان ئەڤ حزبە دێ سەلمینن كو خزمەتكارێن مللەتێ خوەنە؟ دڤێت پشكەك ژ بەرژەوەندیێن خوە یێن حزبی بدەنە مللەتی و وەلاتی و هەردەم دبێژم ئەڤ مللەتە ب هەموو پێكهاتەیێن خوەڤە هیچ نەمایە پێشكێشی ڤان حزبان نەكربیت د هەموو كاوداناندا خوین ونان و دەنگ یێن پێشكێشكرین و سێدارە و دەربەدەری… هتد یا دیتی و نوكە دەم یێ هاتی ئەم مللەتی پاداشت و قەرەبوو بكەین و قەرەبوویا مە ئەوە بەرژەوەندی و سەقامگیرییا وان ل سەر بەرژەوەندیێن حزبی دا بن».
هەروەسا دیاركر» د شیاندایە ئالیێ كورسی بدەستڤەئیناین پشكداریێ د حوكمەتێدا نەكەت، بەلێ د پەرلەمانی دا بیت و هیچ حوكمڕانەك نابیت هزر د دروستكرنا ئۆپۆزسیۆنێ دا ب شێوەیەكێ دەستكرد بكەت، چونكە هەبوونا ئۆپۆزسیۆنەكا ئەرێنی خزمەتا حوكمڕانێی دكەت».
ل دۆر پەیوەندیێن وەلاتێن دەوروبەر ل گەل پارتی دیموكراتی كوردستان، فازل میرانی گۆت» پەیوەندیێن وەلاتێن دەوروبەر ل گەل پارتی كاریگەرییا هەی ل سەر ئیراقێ و ل سەر رەوشا كوردستانێ ژی ژ دو رێكاڤە ژ ئالییەكی ڤە كوردستانێ پەیوەندی هەبوو بەری ببیتە پشكەك ژ ئیراقێ نوكە ژی د چارچۆڤەیێ ئیراقێدا پەیوەندییا هەی ئانكو پەیوەندییەكا دو ئالییانەیە ئێك یا كەڤنە و نوكە یا نوویە و مادەم د كاریگەرن هەكە پەیوەندیێن وان د باش نەبن دڤێت بزاڤێ بكەی ئەو پەیوەندییە د باش بن».

دەم پارتی راگەهاند تورکیا نەچارە پرسا کوردی چارەسەر بکەت و ژ بۆ ئاشتیێ و چارەسەرکرنا پرسا کوردی ئەو بەرهەڤن یا ژ دەستێ وان دهێت ئەنجام بدەن و دڤێت دەستهەلاتا نها ژی دەست ژ سیاسەتا دانانا قەیوومان بەردەت، سیاسەتا قەیوومان دێ تورکیا تووشی ئاریشێن گەلەک مەزن کەت.

پارتا دەم سەبارەت ب رەوشا نها ل تورکیا و بزاڤێن بۆ ئاشتیێ و چارەسەرکرنا پرسا کوردی کۆمبوو و پشتی کۆمبوونێ ژی عایشەگۆل دۆغان پەیڤدارا دەم پارتی بۆ دەزگەهێن راگەهاندنێ دیار کر، تورکیا د قۆناغەکا گەلەک هەستیار دایە، چونکی نها ل جیهانێ و رۆژهەلاتا ناڤین گوهۆڕینێن گەلەک بلەز روو ددەن و هەکە تورکیا بڤێت ئالۆزیێن هەی مەزنتر لێ نەهێن و کاریگەریەکا خوە یا خراب ل سەر پاشەرۆژا وێ نەکەت دڤێت هەر زوو دەست ب قۆناغەکا نوو بکەت و گۆت: (بەرپرسێن تورکیا ژی باش دزانن نها پتر ژ هەر دەمەکێ پێدڤیا تورکیا ب قۆناغەکا نوو یا ئاشتیێ هەیە، دڤێت تورکیا پرسا کوردی چارەسەر بکەت، رەوشا نها د بەرژەوەندیا تورکیا دا نینە، مخابن بەرپرسێن تورکیا تنێ دبێژن ئاشتی و براتی و ژ بۆ ئاشتیێ و براتیێ و چارەسەرکرنا پرسا کوردی چو ناکەن).
ناڤهاتیێ ئەو یەک ژی دیار کر، ئەردۆغانی بەری دەمەکێ دیار کر کۆمارا تورکیا تنێ یا تورکان نینە و کۆمارا کوردانە ژی، هەکە کۆمار یا کوردانە بۆچی رێ نادەن کورد ب زمانێ خوە یێ دایکێ بئاخڤن؟ هەتا نها ب هزاران سیاسەتمەدارێن کورد ل زیندانان دانە، براتی وەسا نابیت، دڤێت دەستهەلاتا نها دەست ژ سیاسەتا خوە یا ل دژی گەلێ کورد بەردەت، زۆرداریەکا گەلەک مەزن ل گەلێ کورد دهێتە کرن و د رەوشەکا وەسا دا کەس نەشێت بەحسێ ئاشتیێ و ئازادیێ و براتیێ بکەت، دڤێت دەستهەلاتا نها هەلوەستێ خوە ل هەمبەر گەلێ کورد بگوهۆڕیت.
پەیڤدارا دەم پارتی سەبارەت ب دانانا قەیوومان ژی دیار کر، ئەو هەڤسەرۆکێن باژێرڤانیان یێن کو ب فەرمانا وەزارەتا ناڤخوە ژ کاری هاتینە دوورخستن، هەموو ب دەنگێ خەلکی هاتینە هەلبژارتن، نابیت دەستهەلاتا نها ب بەهانەیێن دوور ژ راستیێ بێ رێزیێ ل ئیرادە و دەنگێ خەلکی بکەت، ئەو یەک ب چو رەنگەکێ ناهێتە قەبوول کرن و گۆت: (سیاسەتا قەیوومان د چەندین سالێن بۆری دا زیانێن گەلەک مەزن گەهاندنە تورکیا، دڤێت دەستهەلاتا نها دەست ژ سیاسەتا قەیوومان بەردەت، وەکو دەم پارتی ئەم ژی بەرهەڤین د ڤێ قۆناغا هەستیار دا یا پێدڤی ژ بۆ ئاشتیێ و چارەسەرکرنا پرسا کوردی ئەنجام بدەین، بەری نها ژی مە دیار کریە هەکە براستی دەستهەلاتێ بڤێت پرسا کوردی چارەسەر کەت ئەم ژ بۆ چارەسەریێ بەرهەڤین و دڤێت دەولەت ژی پرۆژەیێ خوە بۆ رایا گشتی ئاشکرا بکەت).

عەزیز هەورامی:

ل كۆنگرەیێ نوشداریێ میزۆپۆتامیا ل باژێرێ هەولێرێ سەرۆك بارزانی راگەهاند: هەلبژارتن هاتنە ئەنجامدان و ئەنجام ژی هاتنە راگەهاندن، ئێدی دەمێ وێ چەندێیە دانوستاندن د ناڤبەرا هەموو ئالییاندا بهێنە كرن و پیڤەر ژی ئیستیحقاقا هەلبژارتنان بیت و ژ هەموویان
گرنگتر ئەوە حوكمەتا داهاتی یا هەرێما كوردستانێ و رەوشا هەرێمێ بۆ پاشەڕۆژێ دڤێت ل سەر ڤان بنەمایان بیت.
ئەبو بەكر عەلی سیاسەتمەدارێ كورد بۆ رۆژنامەیا (ئەڤرۆ) گۆت» پشتی هەلبژارتنان خەلك چاڤەڕێی وێ چەندێیە نەخشەیا سیاسی و دەستهەلات و حوكمڕانیێ بهێتە داڕێشتن، پێدڤییە پارتی و ئێكەتی ژی بەری دانوستاندنان بۆ پێكئینانا حوكمەتا نوو یا هەرێما كوردستانێ، چەندین كۆمبوونێن دەستپێكی و زەمینەسازی د ناڤبەرا خوەدا ئەنجام بدەن، ل سەر كێشەیێن د ناڤبەرا واندا و هەلسەنگاندنەكا رەخنەگرانە بۆ بۆریێ خوە و بۆچوونێن جودا و رەوشێن نوو گەنگەشە بكەن، بۆ وێ چەندێ ب كێمی تێكگەهشتنێ د ناڤبەرا خوە دا ب دەستڤەبینن، باوەرییا د ناڤبەرا خوە دا بزڤرینن، پێنگاڤا دویێ ل سەر كۆمەكا بنەما و پرەنسیپ و هێلێن گشتی رێكبكەڤن، پاشی لهەڤهاتنێ ل سەر بەرنامەیێ حوكمەتا داهاتییا هەرێما كوردستانێ بكەن، پاشی دەست ب دانوستاندنێن پێكئینانا كابینەیا دەهێ یا حوكمەتا هەرێمێ و بەلاڤكرنا پۆست و پلەیان بكەن».
ئەبو بەكر كاروانی گۆت ژی» تشتەكێ سروشتییە كو پشتی هەلبژارتنان و راگەهاندنا ئەنجامێن دووماهیێ، ئێدی قۆناغا دەستپێكرنا دانوستاندنێن پێكئینانا حوكمەتا نوو د ناڤبەرا ئالیێن سەركەفتی د هەلبژارتناندا دەستپێبكەن. بەلێ دڤێت ئاماژێ ب وێ چەندێ بكەین ئەركێ ل دەف مە ژ پرسا پێكئینانا حوكمەتێ گەلەك مەزنترە و تنێ پرسا پێكئینانا حوكمەتێ نینە، بەلێ ل گەل وێ ئەركەكێ نیشتمانیێ مەزنە كو ل دوبارە ئاڤاكرنا سیستەم و خەملاندنا پەیمانەكا سیاسی و جڤاكییا نوو و نەخشەرێكەكا لهەڤهاتن ل سەرهاتییە كرن ب مەبەستا ب دووماهئینانێ ب فرەدەستهەلاتیێ و فرەهێزیێ و بەلاڤكرنێ و بێسەروبەرییا سیاسی و ئیداری و دەركەفتن ژ وێ ئاستەنگا سیاسی و حوكمڕانی دێ بەرجەستە بیت كو ئەو واقعە ل 30 سالێن بۆری هاتییە دروستكرن. دڤێت هەر ئەوژی جەوهەرێ بەرنامەیێ حوكمەتا داهاتی پێكبینیت، ژ پێخەمەت ڤێ چەندێ ژی هەرێما كوردستانێ پێدڤی ب هەناسە و مەژی و فۆرمەكا نوو یا حوكمڕانیێ یا هەی، چەنكو ژ بلی وێ چەندێ نابیت ئێدی رەوشا دابەشبوونێ و فرەدەستهەلاتیێ و پەیوەندی و زۆنێن حزبی یا بەردەوام بیت، رۆژهەلاتا ناڤین ژی ل پێشبەری گوهۆڕینێن مەزن دایە كو د ئێك دەمدا هەلگرێن گەفایە و دەلیڤەیە نەكو بۆ مە ل باشووری بەلكو بۆ هەموو پرسا كوردستانێ ل سەر ئاستێ دەڤەرێ».
پتر گۆت» درووشمێ ئێك هەرێم، ئێك پەرلەمان، ئێك حوكمەت، ئێك هێزا پێشمەرگەی، كاك مەسعود بارزانی ئاماژە یا بۆ كری، ب باوەرییا من ئەڤە مەرجێن حزبی نینن، نابیت ب وی چاڤی ژی بهێنە سەحكرن، چونكە داخوازیێن نیشتمانی یێن گشتی نە، ئەو چارچۆڤەیێ نیشتمانی پێدڤییەكە و دڤێت د هەموو دانوستاندنێن پێكئینانا حوكمەتێ و بەری وان ژی رێككەفتن ل سەر بەرنامێ وێ د وی چارچۆڤەیدا بهێتە ئەنجامدان، یا ب ساناهی ژی نینە هێزەك هەبیت خوە ب نیشتمانی یان ژی دیموكراسی و چاكساز بنیاسیت و ل گەل ڤی چارچۆڤەیدا نەبیت و رەت بكەت، دشیاندایە د هووركارییان وچاوانییا ب دەستڤەئینانا ڤان درووشمێن نیشتمانی مە بۆچوونێن جودا هەبن و رێككەفتن ل سەر نەخشەرێكەكێ د وی واری دا بهێتە كرن، بەلێ رەتكرنا وان هیچ رامانەكێ بۆ هەلبژارتنان ژی ناهێلیت. ب حوكمێ وێ چەندێ ئەڤ پێنگاڤە چەندین سالان یا گیروبووی، هەر حوكمەتەكا دهێتە پێكئینان دێ بیتە هەلگرا هەمان كێشەیێن بۆری، هیچ چاكسازی و وەلاتسازی و باشتركرنا ژیارێ ژی ل بن سیبەرا دابەشبوونێ و زۆنێن حزبی و فرەدەستهەلاتیێ و نەبوونا دەستهەلاتەكا ناڤەندییا راستەقینە پەیدا نابیت، ب كورتی هەرێما كوردستانێ و باشوور ب گشتی پێدڤی ب وێ چەندێ نە ژ زڤرینێ د بازنەیا گرتییا دەهان سالێن بۆری بهێنە دەر و بكەڤنە د رەوشەكا ئاڤاكرن ؟؟ ب دیتنا من ئەڤ داخوازییە ل بەرنامەیێ هەموو حزبان یا نێزیكە، لەوما دەمێ وێ چەندێیە راستگۆبین د گەلدا، د ڤی بازنەیدا دڤێت ئۆپۆزسیۆن ژی ل سەر هێل بیت و فشارێ بكەت».
ل دووماهیێ گۆت» ل وەلاتەكێ دابەشكری و پڕناكۆكی و بزاڤكرن بۆ دوبارە ئاڤاكرنا كۆدەنگییا نیشتمانیو دەستكرن ب قۆناغەكا نوو ژ پێكڤەكاركرنێ و حوكمڕانیێ، نابیت تنێ دەنگ و كورسی ببنە پیڤەرێن پێكئینانا حوكمەتێ، بەلێ نابیت ژی رێژەیا دەنگان و كورسییان بهێتە پشت گوهـ هاڤێتن، لەوما یا دروست ئەوە هەڤسەنگی د ناڤبەرا رێژەیا دەنگیان و هەژمارا كورسییان و پێدڤییا لهەڤهاتنا نیشتمانی و دوبارە ئاڤەدانكرن و خەملاندنا پەیمانەكا سیاسی و جڤاكییا نوو ل هەرێما كوردستانێ بهێتە كرن».

بەرپرسێ لقێ 10 یێ پارتی دیموكراتی كوردستان ل سۆران راگەهاند: ئەو سۆزێن پارتی دیموكراتی كوردستان بەری هەلبژارتنان داینە خەلكێ هەرێما كوردستانێ دێ ل كابینەیا 10 یا حوكمەتا هەرێما كوردستانێ ب كریار ب جهئینیت.
د. رێبوار بابكەیی، بەرپرسێ لقێ 10 یێ پارتی دیموكراتی كوردستان ل سۆران گۆت» گومان د وێ چەندێ دا نینە كو پارتی دیموكراتی كوردستان حزبا كریارایە، ئەگەرێ سەركەفتنا بەردەوام یا پارتی د هەلبژارتناندا، سەرۆك بارزانی فاكتەرەكێ ب هێز و سەرەكییە بۆ هەموو سەركەفتنان، هەبوونا هەلوەستێ كوردانە و وێرەك یی پارتی ل سەر رێبازا بارزانی ل هەموو دەمان فاكتەرەكە كو دێ بیتە ئەگەرێ وێ چەندێ خەلك ب كۆم دەنگ ب پارتی بدەن، هەروەسا فاكتەرێ كریارێن پارتی ل كابینەیێن حوكمەتا هەرێما كوردستانێ و ل كابینەیا نەهێ یا حوكمەتا هەرێمێ ل سەر دەستێ مەسرور بارزانی، سەرۆكێ حوكمەتا هەرێما كوردستانێ رەنگڤەدا، ئەم وەكو پارتی هیچ سۆزەكێ نادەین هەكە مە ڤەكۆلین نەكربیت و پێرابوونێن ب جهئینانێ نەهاتبنە دانان، لەوما ئەو سۆزێن پارتی ل هەلبژارتنێن 20 ئۆكتۆبەرێ ب خەلكێ خوە دابوون ب پشتڕاستیڤە ل كابینەیا 10 یا حوكمەتێ دێ هێنە ب جهئینان».
د. رێبوار بابكەیی گۆت ژی» هەكە كێشەیێن تەكنیكی و نەخواندنا پەنجەمۆران و گرفتێن دی یێن تەكنیكی نەبان بێگومان رێژەیا دەنگێن پارتی د وان هەلبژارتناندا دا گەهیتە ملیۆن دەنگان، هیڤیدارین د هەلبژارتنێن جڤاتا نوونەرێن ئیراقێدا كۆمسیۆنا بلند یا سەربخوە یا هەلبژارتنان ل ئیراقێ كێشەیان چارەسەر بكەت، بۆ وێ چەندێ ئەو خەلكێ دچیتە سەر سندووقێن دەنگدانێ و دەنگی ب پارتی د دەن بشێن دەنگێ خوە بۆ هەلبژارتنێن جڤاتا نوونەرێن ئیراقێ بدەن و دەنگێن وان ب هەدەر نەچن، لەوما ل سنوورێ لقێ 10 یێ پارتی، ڤێجارێ مە سەركەفتنەكا دیرۆكی تۆماركر و 16 هزار دەنگێن مە هەمبەركرن ل گەل هەلبژارتنێن بۆری زێدەبوون، ب دەهان تەلەفۆن ژ ئەندام و لایەنگرێن پارتی بۆ من دهاتن، ب خەم ڤە دگۆت چاوان نەشێم دەنگی ب لیستا 190 یا پارتی بدەم؟ ئەو رۆحییەت و حەماسەتە ئێك ژ هێمایێن سەركەفتنێیە بۆ پاشەڕۆژێ و ئاماژەیەكا پێشوەختە ژی بۆ سەركەفتنێ د هەلبژارتنێن داهاتی یێن جڤاتا نوونەرێن ئیراقێ».

چاڤدێرێن سیاسی دبێنن كو سەركەفتنا پارتی دیموكراتی كوردستان ل هەلبژارتنێن خولا شەشێ یا پەرلەمانێ كوردستانێ، یا گرنگ بوو بۆ ناڤخوە و ئیراقێ و جیهانێ، و ئاماژێ دكەن كو هەرێما كوردستانێ جارەكادی كەفتە د دەستێ پارێزەرێن وەلاتی دا و دێ پێگەهێ كوردستانێ زێدەتر ب هێز و ئارام و ئاڤەدان بیت.
د. رێبین سەلام، چاڤدێرێ سیاسی بۆ رۆژنامەیا (ئەڤرۆ) گۆت» سەركەفتنا پارتی د هەلبژارتناندا جهێ دلخوەشییا مەزن بوو، چونكە بۆ یار و نەیاران دیاربوو كو خەلكێ كوردستانێ راستییان دبینن و ئەو هەرا و گۆتارا پۆپۆلیستی ل (سوشیال میدیایێ) دا هەی د (سوشیال واقع) دا ب وی شێوەی نینە و بۆچوونا راستەقینەیا خەلكێ كوردستانێ ل گەل وێ حزبا رەسەن یا كوردستانی و دیموكراتی و نەتەوەیی كو ناڤێ وێ پارتی دیموكراتی كوردستانە ب سەرۆكایەتییا سەرۆك مەسعود بارزانی».
گۆت ژی» پارتی ب تنێ و بێی بچیت د ناڤ هیچ هەڤپەیمانییەكێدا زێدەتر ژ هەموو حزب و بزاڤێن دی یێن سیاسی ل كوردستانێ جارەكادی باوەری و دەنگێ خەلكێ كوردستانێ ل هەلبژارتنێن 20 ئۆكتۆبەرا 2024 ب دەستڤەئینا و جارەكادی بۆ جهێ باوەریێ بۆ رزگاركرنا قەوارەیێ هەرێما كوردستانێ ب رێكا شەرعییەتدانێ ب دامودەزگەهێن فەرمی یێن هەرێما كوردستانێ پشتی كو ل 20 ئۆكتۆبەرا 2017 ل داستانا پردێ ب خوونا پێشمەرگێن پارتی ئەڤ قەوارەیە هاتییە پاراستن ڤێجارێ ب دەنگدان ب پارتی و خرڤەبوونا دەنگدەران ل سەر سندووقێن دەنگدانێ ئەڤ قەوارەیە هاتە رزگاركرن».
د. سەلام رێبین رۆهنكر ژی» بۆ هەموو حزب و ئالیێن ئیراقی جارەكادی دی هاتە سەلماندن كو ب دروستكرنا ئاستەنگان و پەیداكرنا چال و دۆل و خەندەكان د ناڤبەرا پارتی دیموكراتی كوردستان و خەلكێ كوردستانێ هیچ ب دەست وان ناكەڤیت بگرە پارتی و پشتەڤانییا خەلكی ل وێ زێدەتر و مەزن دبیت و بوویە حزبا ملیۆنی چونكە دەمەكی پارتی ل هەلبژارتنێن جڤاتێن پاریچزگەهان وەكو دووماهی هەلبژارتن 70 هزار دەنگێن پارێزگەها كەركووكێ و 130 هزار دەنگێن پارێزگەها نەینەوا ل گەل 810 هزار دەنگێن هەرێما كوردستانێ هەلبژارتنێن خولا شەشێ یا پەرلەمانێ كوردستانێ هەین ئانكو ئێكەمین حزبا ملیۆنی یا كوردستانییە و سەنگ و پێگەهێ كوردستانێ ل ڤێرێیە ل سەرێ بلند و دڤێت هەموو بەر ب وێرێ بچن».
وی چاڤدێرێ سیاسی ئاماژەكر» هەر ژ رۆژا ئێكێ ژ ئەنجامێن بەراهیێ قۆنسلخانەیێن وەلاتێن ب هێزێن جیهانێ وەكو بریتانیا و ئەمریكا و فرەنسا و ئەلمانیا و هولەندا پیرۆزباهی ل سەركەفتنا پارتی دیموكراتی كوردستان كر و هەموویان دەستەواژەیێ ( كوردستانەكا ئاڤەدان و ئارام و سەقامگیر و دیموكرات و خۆڕاگر) بكارئینا».
هەروەسا گۆت» ژبلی ڤێ چەندێ ئەو وەلاتێن زلهزێن خوە ب خودانێن دیموكراسیێ دزانن و گەلێن وان خوە ب دیموكراتیخواز دزانن چونكە خەلكێ وان ب رێكا سندووقێن دەنگدانێ كێشە و ململانێیێن خوە چارەسەر دكەن، ژ رێژەیا كێم یا پشكدارییا دەنگدەران دنالن كو گەلەك ب خوەشبەختانە ل دووماهی هەلبژارتنێن پەرلەمانێ كوردستانێ ل 20 ئۆكتۆبەرا بۆری رێژەیا 70% ژ دەنگدەران چوونە سەر سندووقێن دەنگدانێ ئەڤە ژی سەركەفتنەكا مەزن كێم وێنەیە بۆ هەرێما كوردستانێ و دەنگدەران و هەموو حزبێن كوردستانێ».

چەندین کۆمپانیێن راپرسیان ئەنجامێ راپرسیێن خوە بۆ رایا گشتی ئاشکرا کرن و راگەهاندن ئەنجامێن راپرسیان نیشا ددەن هەکە قۆناغا ئاشتیێ ل تورکیا ژناڤ بچیت ئەو یەک دێ بیتە ئەگەرێ شکەستنا ئاکپارتیێ و پارتا کۆماریا گەل دێ بیتە پارتا ئێکێ ل تورکیا.

چەندین کۆمپانیێن راپرسیان ل تورکیا دیار کرن، وان ل پرانیا باژێرێن تورکیا دەست ب راپرسیان کرینە و د ئەنجاما راپرسیێن وان دا دیار بوویە پتر ژ ٨٠٪ ژ خەلکێ تورکیا داخوازا ئاشتیێ و چارەسەرکرنا پرسا کوردی ل تورکیا دکەن و هەکە قۆناغا ئاشتیێ ژناڤ بچیت دێ تورکیا تووشی قەیرانەکا گەلەک مەزن بیت.
د ڤێ دەربارێ دا کۆمپانیا (هبس) یا راپرسیان دیار کریە، هەکە قۆناغا ئاشتیێ ل تورکیا نەمینیت و پاشی هەلبژارتنێن پەرلەمانێ تورکیا بهێنە کرن دێ پارتا کۆماریا گەل بیتە هێزا ئێکێ ل تورکیا، چونکی نها پرانیا وەلاتیێن تورکیا وەسا دبینن هەکە پرسا کوردی نەهێتە چارەسەرکرن دێ قەیرانا ئابووری ژی بەردەوام بیت و قەیرانا ئابووری کاریگەریا خوە یا گەلەک خراب ل ژیانا وەلاتیێن تورکیا کریە.
ل گۆر ئەنجامێن کۆمپانیێن راپرسیان ل تورکیا، هەکە قۆناغا ئاشتیێ یا بەردەوام بیت و کار بۆ چارەسەرکرنا پرسا کوردی بهێتە کرن دێ رێژەیا دەنگێن ئاکپارتیێ ل گۆر هەلبژارتنێن بۆری زێدەتر لێ هێت، چونکی گەلەک کەس وەسا دبینن تنێ هێزا نها بشێت ل تورکیا پرسا کوردی چارەسەر بکەت ئاکپارتیە و دڤێت ئاکپارتی بەردەوامیێ بدەتە قۆناغا ئاشتیێ و کار بۆ چارەسەرکرنا پرسا کوردی بکەت.
چاڤدێرێن سیاسی ل تورکیا و باکورێ کوردستانێ ژی وەسا دبینن، دانانا قەیوومان کارەکێ گەلەک شاش بوو و کاریگەریا خوە یا خراب ل سەر نێرینا وەلاتیان کریە، چونکی وەلاتیێن کورد ل باکورێ کوردستانێ وەسا باوەر دکرن دێ ڤێجارێ ئاکپارتی ب رەنگەکێ جدی کار بۆ چارەسەرکرنا پرسا کوردی کەت، لێ هەلوەستێ ڤێ دووماهیێ یێ ئاکپارتیێ و دانانا قەیوومان خەلک بێ هیڤی کریە و ژ بەر ڤێ یەکێ ژی هەکە نها هەلبژارتن ل تورکیا بهێنە کرن دێ رێژەیا دەنگێن ئاکپارتیێ گەلەک کێم بن.
ل گۆر باوەریا چاڤدێرێن سیاسی خەلک ئاکپارتیێ وەکو هێزا سەرەکی دبینن کو بوویە ئەگەرێ رەوشا خراب یا ئابووری ل تورکیا، چونکی بەردەوامیا شەڕی و ئۆپەراسیۆنێن سەربازی ل دەرڤەیی سنۆرێن تورکیا وەسا کریە ئابوورێ تورکیا گەلەک لاواز ببیت و هەتا نها ژی دەستهەلاتا ئەردۆغانی نەشیایە گوهۆڕینێن بەرچاڤ د کەرتێ ئابووری دا بکەت، هەکە رەوش وەسا بەردەوام بیت دێ قەیرانا ئابووری ل تورکیا مەزنتر لێ هێت و ژ بەر ڤێ یەکێ ژی ئێدی باوەریا خەلکی ب ئاکپارتیێ و گۆتنێن ئەردۆغانی نەماینە و هەکە نها هەلبژارتن بهێنە کرن رێژەیا دەنگێن ئاکپارتیێ دێ گەلەک کێم بن و شانسێ پارتا کۆماریا هەیە کو ببیتە پارتا ئێکێ ل تورکیا.

بارەگایێ بارزانی بەلاڤكر، ل رۆژا دوشەمبی 4/11/2024 سەرۆك مەسعود بارزانی ل سەلاحەدین پێشوازی ل ئەلینا رۆمانۆڤسكی، بالیۆزا ئەمریكا ل ئیراقێ كر.
د دیدارەكێدا، كو ستیڤ بیتنەر، قۆنسلێ گشتیێ ئەمریكا ل هەولێرێ بەرهەڤبووی، بالیۆزا ئەمریكا ل ئیراقێ» پیرۆزباهییا سەركەفتنا هەلبژارتنێن پەرلەمانێ كوردستانێ ل سەرۆك بارزانی كر و دوپاتی ل وێ چەندێ كر كو ئەنجامدانا هەلبژارتنێن پەرلەمانێ كوردستانێ د سەقایەكێ دیموكراسییانە و ئارامدا و د رەوشا ئالۆز یا دەڤەر تێدا دەرباز دبیت، وێنەیەكێ هەژی یێ هەرێما كوردستانێ نیشا هەموو ئالییەكی دا» .
هەر د دیدارێدا، سەرۆك بارزانی سوپاسییا جڤاكێ نێڤدەولەتی و كۆمسیۆنا بلند یا سەربخوە یا هەلبژارتنان ل ئیراقێ كر، كو سەرەرای هەبوونا كۆمەكا كێشەیێن تەكنیكی بەلێ رۆلەكێ بەرچاڤ د سەركەفاتنا هەلبژارتنێن پەرلەمانێ كوردستانێ دا هەبوو.
د پشكەكا دی یا وێ دیدارێدا باس ل پێنگاڤێن پێكئینانا حوكمەتا نوو یا هەرێما كوردستانێ و دانوستاندنێن د ناڤبەرا ئالیێن سیاسی دا هاتە كرن و سەرۆك بارزانی ئاماژە ب وێ چەندێ كر» پارتی تیمەك بۆ دانوستاندنێ ل گەل ئالییان ل سەر پێكئینانا حوكمەتا نوو یا هەرێمێ و ئەجیندایێن حوكمەتا داهاتی یا پێكئینای و پارتی ڤیتۆ ل سەر هیچ ئالییەكی نینە».
هەر د وێ كۆمبوونێدا بیر و بۆچوون ل دۆر رەوشا سیاسی و ئەمنی ل دەڤەرێ و دوماهی پێشهاتێن رۆژهەلاتا ناڤین و هەروەسا بیر را ل دۆر پڕۆسەیا سیاسی ل ئیراقێ و هەلبژارتنا سەرۆكێ نوو یێ جڤاتا نوونەرێن ئیراقێ هاتنە لێكگوهارتن.

دوهی دوشەمبی 4/11/2024، مەسرور بارزانی، سەرۆكێ حوكمەتا هەرێما كوردستانێ، پێشوازی ل ئەلینا رۆمانۆڤسكی، بالیۆزا ئەمریكا ل ئیراقێ كر.
د بەیاننامەیا حوكمەتا هەرێما كوردستانێ هاتییە» تەوەری سەرەكیێ دیدارێ یێ تایبەت بوو ب پێرابوون و بەرهەڤیێن پێكئینانا كابینەیا نوو یا حوكمەتا هەرێما كوردستانێ بوو».
بەیاننامەیا حوكمەتا هەرێمێ ئاماژەكر» هەردو د هەڤڕابوون ل سەر گرنگییا تێكگەهشتنا ئالیێن سیاسی بۆ پێكئینانا كابینەیا نوو یا حوكمەتا هەرێما كوردستانێ د زووترین دەمدا، بۆ وێ چەندێ درێژیێ ب كار و پڕۆژەیێن خوە یێن خزمەتگوزاری بدەت و خزمەتا هەموو هەڤوەلاتی و پێكهاتەیێن هەرێما كوردستانێ بكەت».
هەر د وێ دیدارێدا سەرۆكێ حوكمەتا هەرێما كوردستانێ دوپاتی ل وێ چەندێ كر» پێدڤییە پێكئینانا حوكمەتا نوو ل سەر بنەمایێ دەنگێن ئالیێن سیاسی و ئیستیحقاقا هەلبژارتنان بیت و حوكمەتەكا سەرانسەری و ب هێز و ئێكگرتی بیت».
د پشكەكا دی یا كۆمبوونێدا، بیر و بۆچوون ل دۆر شەڕ و ئالۆزیێن رۆژهەلاتا ناڤین هاتنە لێكگوهارتن و هەردو ئالی د هەڤڕابوون ل سەر پاراستنا ئاسایش و سەقامگیرییا دەڤەرێ و دوورئێخستنا دەرئەنجامێن وی شەڕی و ئالۆزیێ ل سەر ئیراقێ و هەرێما كوردستانێ».

بەرپرسێ مەكتەبا رێكخستنا پارتی دیموكراتی كوردستان راگەهاند كو دێ شاندەكی پێكئینین و دانوستاندنێ ل گەل هەموو ئالییان كەین، تاكو بشێین پێكڤە خۆڕاگر بین.
هێمن هەورامی، بەرپرسێ مەكتەبا رێكخستنا پارتی دیموكراتی كوردستان د كۆنگرەیەكێ رۆژنامەڤانیدا گۆت» دێ شاندەكێ دروست كەین ل سەر بنەمایێ وێ چەندێ مە ڤیتۆ ل سەر هیچ ئالییەكی نینە بۆ دانوستاندنان، هەروەسا دەرگەهێ مە ئالییان یێ ڤەكریە».
هێمن هەورامی گۆت ژی» ل قۆناغا پشتی هەلبژارتنان، پارتی دیموكراتی كوردستان یا پێگیرە ب درووشمێن خوە ئەوژی پەیداكرنا ئارامیێ و ئاڤەدانیێ و پێكڤەیییە تاكو بشێین پێكڤە د خۆڕاگر بین».
بەرپرسێ مەكتەبا رێكخستنا پارتی باس ل وێ چەندێ ژی كر» مە بەرنامەیەك راگەهاند وەكو بەرنامەیێ پارتی دیموكراتی كوردستان بۆ كابینەیا دەهێ یا حوكمەتا هەرێما كوردستانێ، د چارچۆڤەیێ درووشمێن پارتی».
هەروەسا خویاكر» ئالیێن دی ژی بەرنامە هەبوو لەوما خالێن هەڤپشك د ناڤبەرا بەرنامەیێن مە دا یێن هەین، ژ بەر وێ چەندێ گرنگە خالێن خوە یێ هەڤپشك ببینین».
رۆهنكر ژی» گەلەك یا گرنگە ب گیانەكێ كوردستانییانە بۆ ئێك هەرێم، ئێك حوكمەت، ئێك پەرلەمان، ئێك هێزا پێشمەرگەی بشێین بەرنامەیەكی بۆ چار سالێن داهاتی بدانین، هەروەسا هەڤپشكی نیڤا رێكا مە نەبیت، دێ ل گەل هەموو ئالییان دانوستاندنان كەین ل سەر وی بەرنامەیێ مە باس لێكری».

سكرتێرێ گشتیێ حزبا زەحمەتكێشێن كوردستانێ راگەهاند هەبوونا بنەمایێ ئێك ئیدارە و ئێك حوكمەت وپەرلەمان و هێزا پێشمەرگەی، باشترین بژاردەیە.
بەلێن عەبدوللا، سكرتێرێ گشتیێ حزبا زەحمەتكێشێن كوردستانێ گۆت» پشتی دەمەكێ درێژ ژ چاڤەڕێبوونێ، هەلبژارتنێن خولا شەشێ یا پەرلەمانێ كوردستانێ هاتنە ئەنجامدان و پشتی وێ چەندێ ژی بابەتێ تانا هات كو حەفتییەكێ دێ ڤەكێشیت، لەوما دڤێت خولا نوو یا پەرلەمانێ كوردستانێ ب زووترین دەم كۆمببیت و چەند ئەركێن بەراهیێ یێن هەین بۆ پەرلەمانێ كوردستانێ د خولا وی یا نوو دا».
بەلێن عەبدوللا گۆت ژی» ئەركێ ئێكێ یێ پەرلەمانێ، راسپاردنا ئالییانە بۆ پێكئینانا كابینەیا نوو یا حوكمەتا هەرێما كوردستانێیە، كو لیستا سەركەفتی دێ هێتە راسپاردن بۆ پێكئینانا حوكمەتێ، و ئەركێ دویێ دڤێت پەرلەمان پرسا دستوورێ هەرێما كوردستانێ بكەتە كارێ خوە یێ بەراهیێ و یێ سیێ ژی ئەم یێن د قۆناغەكا هەستییار دا چ ل ئیراقێ و چ ل هەرێما كوردستانێ، ب تایبەت ئەو بارگرژی و ئالۆزییا ل دەڤەرێ هەی، ژ مە دخوازیت ئالیێن سەركەفتی د هەلبژارتنێن پەرلەمانێ كوردستانێدا بهێنە سەر مێزا دانوستاندنان ود چارچۆڤەیێ بەرنامەیێ نیشتمانی كابینەیا دەهێ بهێتە راسپاردن، تاكو ئەركێ خوە ئەنجام بدەت و د چارچۆڤەیێ بەرنامەیەكێ نیشتمانیدا روو ب روویێ ئاستەنگان ببیت».
سكرتێرێ گشتیێ حزبا زەحمەتكێشێن كوردستانێ دیاركر ژی» خەلك چاڤەڕێی وێ چەندێ دكەن ئەو ناكۆكییا دروست بووی، د چارچۆڤەیێ بەرنامەیەكێ نیشتمانیدا بهێتە چارەسەركرن و دێ چەند ئەركێن گرنگ ل پێشبەری حوكمەتێ بن، ژ وان بابەتێ ئێكخستنا هێزا پێشمەرگەی و چاوانییا سەرەدەریكرنێ ل گەل ئیراقێ، كو ئالیێن سەركەفتی د هەلبژارتناندا دێ بەرپرسیار بن و دێ كەڤنە پێشبەری بەرپرسیارەتییا رەوشێ ل دەڤەرێ، ژ بلی وێ چەندێ ژی دڤێت كابینەیا نوو یا حوكمەتێ هەلسەنگاندنا خوە بكەت و یا بەرهەڤ بیت بۆ وان بابەتێن نوكە هەین وەكو سەرژمێرییا گشتییا ئاكننجییان».
ل دۆر داخوازییا سەرۆك بارزانی بۆ هەبوونا ئێك حوكمەت و ئێك ئیدارە و پەرلەمان و هێزا پێشمەرگەی، بەلێن عەبدوللا بەرچاڤكر» ئەڤە داخوازییەكا نیشتمانییە و داخوازییا هەموو ئالییایە، دڤێت كابینەیا دەهێ ڤێ چەندێ زوو چارەسەر بكەت، هەتا كەنگی دێ مە دو هێزێن پێشمەرگەی هەبن! هەتا كەنگی مە دو ئیدارە و دو سیستەم هەبن ! ئەو قۆناغە یا ب دوماهی هاتی و دڤێت ئێك حوكمەت هەبیت و بەرپرسیار بیت ل هەموو كوردستانێ و دەستهەلاتا وی ل سەر هەموو دەڤەرێن كوردستانێ هەبیت، چونكە نابیت قۆناغا بۆری یا بەردەوام بیت، دڤێت كابینەیا دەهێ یا حوكمەتا هەرێما كوردستانێ ل سەر بنەمایێ نیشتمانی بهێتە دامەزراندن و لەز د پێكئینانا وێ دا بهێتە كرن».