سەرۆكێ هەرێما كوردستانێ، نێچیرڤان بارزانی ل گەل سەرۆك و ئەندامێن جڤاتا كۆمسیارێن كۆمسیۆنا بلند یا هەلبژارتنان ل ئیراقێ كۆمبوو ب بەرهەڤبوونا جینین پلاسخارت، نوونەرا تایبەت یا سكرتێرێ گشتیێ UN. سەرۆكێ هەرێمێ د كۆمبوونێ دا ڕأگەهاند، پێدڤیە ب زووترین دەم پێنگاڤ بۆ ئەنجامدانا هەلبژارتنێن هەرێما كوردستانێ بهێنە هاڤێتن و بەرهەڤیا سەرۆكایەتیا هەرێمێ و حوكمەتا هەرێمێ و هەموو ئالیێن پەیوەندیدارێن هەرێمێ بۆ سەرئێخستنا پرۆسەیێ دیاركر و پلاسخارت و تیما یونامی پشتەڤانیا خوە بۆ پێنگاڤێن سەرۆكێ هەرێمێ دیاركر و بەرهەڤیا خوە بۆ پێشكێشكرنا هاریكاریێ بۆ ئەنجامدانا هەلبژارتنان دەربڕی. سەرۆكێ كۆمسیۆنا هەلبژارتنان ل ئیراقێ و جڤاتا كۆمسیاران، بەرهەڤیا خوە نیشادا ب گۆرەی قانوونێ و پشتی دەتبەركرنا پێدڤیان و ڕێككەفتن ل سەر ژڤانەكێ گونجای هەلبژارتنێن هەرێما كوردستانێ بڕێڤەببەن.

سەرۆكێ هەرێما كوردستانێ، د سەرەدانا خوە دا بۆ بەغدا ل گەل شێخ تەمیم بن حەمەد ئال سانی میرێ قەتەرێ كۆمبوو.
نێچیرڤان بارزانی، سەرۆكێ هەرێما كوردستانێ د پێگەهێ خوە دا ل سەر تۆرا جڤاكی یا فەیسبووكی بەلاڤكر: خوەشحالبووم ب دیدارا میرێ قەتەرێ بەرێز شێخ تەمیم بن حەمەد ئال سانی د چارچۆڤەیێ سەرەدانا وی دا بۆ بەغدا.
هەروەسا دیاركر، د دیدارەكێ دا ب هەڤالینیا سەرۆك وەزیرێن ئیراقێ محەمەد شیاع سۆدانی، سەرۆكێ جڤاتا نوونەرێن ئیراقێ محەمەد حەلبووسی و شێخ خەمیس خەنجەر، سەرۆكێ هەڤپەیمانیا سەروەری. باسێ ب هێزكرنا پەیوەندیێن هەرێما كوردستانێ و ئیراقێ ل گەل وەلاتێ قەتەر، پێشهاتێن دەڤەرێ وچەند پرسێن دی هاتنە باسكرن.

سەرۆكێ حوكمەتا هەرێما كوردستانێ، مەسرور بارزانی د ڕێوڕەسمێ ڤەكرنا بەنكا جیهان ل هەولێرێ د پەیڤەكێ دا ڕاگەهاند: سیستەمێ بەنكی ستوونا سەرەكی یا ب هێزكرنا ئابوورێ كوردستانێ یە و نابیت بەنك تنێ جهێ حەوالەكرنا پارەی بیت.
ئاماژەكر ژی» ئەم ل حوكمەتا هەرێمێ گەلەك د ڕژدین كو سیستەمێ بەنكی ل هەرێما كوردستانێ بهێتە ستانداردكرن بۆ وێ چەندێ ژی ل گەل بەنكا ناڤەندی یا ئیراقێ ژی د پەیوەندیێ داینە و ئەوژی هاریكارێن مە بوون و داخوازێ ژێ دكەم ئەو پڕۆسەیێن بۆ هاریكاریا سیستەمێ بەنكی ل هەرێما كوردستانێ بلەزتر بكەن» .
هەروەسا گوت» مە ل ڤێ كابینەیێ گرنگیەكا مەزن دایە ب وێ چەندێ كو بشێین ژێرخانەیا ئابووری یا هەرێما كوردستانێ ب هێز بكەین و ستوونا سەرەكی یا ب هێزكرنا ئابوورێ كوردستانێ ژی سیستەمێ بەنكی یە».
ڕۆهنكر ژی» گەلەك پێخوەشحالم كو دبینم بەنكا جیهان ژی ئێك ژ وان بەنكایە كو شیای خوە بگونجینیت ل گەل ستانداردێن جیهانی و د هەمان دەم دا پشكدار ژی ببیت د وی پڕۆژەیێ حوكمەتا هەرێمێ دا كو بانگەوازی بۆ كری بۆ وێ چەندێ پشكدار بن د پڕۆژەیێ (هەژمارا من) بەنكا جیهان ئێك بوو ژ وان».
زێدەتر گوت» نوكە ژی حەفت بەنكێن دی ژی بەرهەڤیا خوە دیاركریە پشكدار بن د وی پڕۆژەی دا كو ئەڤ پڕۆژەیە ب دیجیتالكرنا سیستەمێ وەرگرتنا مووچەیە، ژ دەستپێكێ، هەروەكو پێشتر ژی مە باسكربوو بۆ دو سالێن داهاتی هیڤیا مە ئەوە هەموو فەرمانبەرێن هەرێما كوردستانێ د وی سیستەمی دا بهێنە جهگیركرن، د هەمان دەم دا بۆ وێ چەندێ هەموو وەلاتی ژ دەرڤەی كەرتێ گشتی ژی بشێن د ڤی پڕۆسەیێ دا پشكدار بن و ببن خودانێن (هەژمارا من) ل بەنكێن كوردستانێ، كو بێگومان د وی دەمی دا پەیوەندیەكا ب هێزتر د ناڤبەرا وەلاتیان و بەنكێ دا دهێتە دروستكرن و نابیت بەنك تنێ جهێ حەوالەكرنا پارەی بیت، بەلكو دێ بیت دەزگەهەك هەم زێدەتر هاریكاریا وەلاتی بكەت و وەلاتی ژی بشێت مفای ژ وان هەموو شیان و مفایێن بەنكێ وەربگریت بۆ باشتركرنا ژیانا خوە».

پەیڤدارێ پارتی دیموكراتی كوردستان دبێژیت: قانوونا بودجەی ل جڤاتا نوونەرێن ئیراقێ ب وی شێوەیێ كو ڕێككەفتن ل سەر هاتیە كرن، نەهاتە پەسەندكرن. دیاركر ژی، بزاڤ بۆ ئەنجامدانا هەلبژارتنێن خولا شەشێ یا پەرلەمانێ كوردستانێ بوویە ئەركێ سەرۆكایەتیا هەرێما كوردستانێ.
مەحمود محەمەد، پەیڤدارێ پارتی دیموكراتی كوردستان گوت» قانوونا بودجەی ل جڤاتا نوونەرێن ئیراقێ ب وی شێوەیێ كو خواستا مە بوو و ڕێككەفتن ل سەر هاتبوو كرن، نەهاتە پەسەندكرن. هەر ل دەستپێكا دروستبوونا ئیراقێ ژی ئەو سۆزێن كو ژ ئالیێ حوكمەتێ ڤە دهێنە دان و ئەوا دكەت دوو تشتێن جودانە.
پشتی پێنج ڕۆژان ژ دانوستاندنێن بەردەوام، ل ڕۆژا 12 ڤێ مەهێ، جڤاتا نوونەرێن ئیراقێ دەنگ ب هەموو مادەیێن پڕۆژەیێ قانوونا بودجەیا گشتی یا ئیراقێ دا، گۆژمێ وی پارەیێ بۆ بودجێ هاتیە تەرخانكرن بۆ سالەكێ نێزیكی 199 ترلیۆن دینارانە كو 16 ترلیۆن پشكا هەرێما كوردستانێ نە».
پارتی ژ پشكەكا بڕگەیا هەشت ژ مادەیا 14 ژ قانوونا بودجەی یا ڕازی نینە، كو ل سەر داخوازا ئێكەتیێ، حوكمەتا هەرێما كوردستانێ پێگیر دكەت ب مەزاختنا شایستەیێن وەبەرئێنانا پارێزگەهان ب گۆرەی پیڤەرێن جهگیركری د ڤێ قانوونێ دا و بەروڤاژی ل سەر سەرۆكێ جڤاتا وەزیرێن فیدرالی یە پێرابوونێن پێدڤی وەرگریت بۆ بجهئینانا ڤان بابەتان و ژ وان ژی پارەداركرن، كو هندەك ئالیێن كوردستانی ڤێ چەندێ وەكو مەترسیەك بۆ سەر قەوارەیێ هەرێما كوردستانێ دزانن».
ب دیتنا پەیڤدارێ پارتی» وەسا ب ساناهی مەترسی ل سەر هەرێما كوردستانێ دروست نابیت، پێشتر ژی بزاڤێن ب ڤی شێوەی هەبوون، بەلێ كارەكێ ب ساناهی نینە كو بشێن كاریگەری ل سەر هەرێما كوردستانێ هەبیت».
مەحمود محەمەد دووپاتی ل وێ چەندێ كر، پەیداكرنا دەلیڤەیەكێ بۆ هەلبژارتنێن خولا شەشێ یا پەرلەمانێ كوردستانێ، بوویە ئەركێ سەرۆك و دەستەیا سەرۆكایەتیا هەرێما كوردستانێ و لڤینێن وان بۆ وێ چەندێ یە ل گەل كۆمسیۆنا هەلبژارتنێن ئیراقێ، دادگەها فیدرالی و ئالیێن پەیوەندیدار بزاڤ بهێتە كرن سەقایەك بۆ ئەنجامدانا هەلبژارتنان پەدا ببیت.
مەحمود محەمەد ئەوژی گوت» پارتی دیموكراتی كوردستان ژی بزاڤێ دكەت ب هەر شێوەیەكی بیت، هەلبژارتنێن خولا شەشی یا پەرلەمانێ كوردستانێ بهێنە ئەنجامدان ب شێوازەكی كو خەلكێ كوردستانێ ببیتە خودانێ پەرلەمانێ خوە».

محەمەد ئیسماعیل سکرتێرێ نوو یێ پارتی دیموکراتی کوردستان- سووریێ راگەهاند د کۆنگرێ ١٢ یێ پارتیا وان دا گەلەک گوهۆڕینێن باش هاتینە کرن و کۆمەکا گەنجان بووینە ئەندامێ سەرکردایەتیێ و هەروەسا بۆ جارا ئێکێ ژنەک بوویە ئەنداما مەکتەبا سیاسی و ئەو یەک ژی گوهۆڕینێن گەلەک باشن و وان دڤێت خوە بۆ قۆناغەکا نوو ل سووریێ و رۆژئاڤایێ کوردستانێ ئامادە بکەن.
ناڤهاتی ل دۆر پەیوەندیێن پارتیا وان ل گەل هێزێن دی یێن کوردی ل رۆژئاڤایێ کوردستانێ ژی راگەهاند، وان چو ئاریشە ل گەل هێزێن کوردی ل رۆژئاڤایێ کوردستانێ نینن و وان دڤێت ل گەل هەموو هێزێن کوردی دەست ب قۆناغەکا نوو بکەن، لێ تنێ ئاریشا وان ل گەل پەیەدێ هەیە، چونکی پەیەدێ دڤێت ب تنێ و وەکو وێ دڤێت رۆژئاڤایێ کوردستانێ برێڤە ببەت و ژ بەر هندێ ژی هەتا نها ئاریشێن گەلەک مەزن ل رۆژئاڤایێ کوردستانێ دروست بووینە، وەکو پارتی دیموکراتی کوردستان- سووریێ وان دڤێت دەست ب قۆناغەکا نوو ل رۆژئاڤایێ کوردستانێ بکەن.

سەرۆكێ هەرێما كوردستانێ د پەیامەكێ دا سەبارەت پەسەندكرنا بودجەیا گشتی یا ئیراقێ ڕاگەهاند: پێدڤیە پشت ڕاستیەكا تمام هەبیت كو شایستەیێن دارایی و مووچەیێ فەرمانبەرێن هەرێما كوردستانێ ژبەر هۆكارێن سیاسی ناهێنە گیروكرن و پشتگوهـ هاڤێتن.
نێچیرڤان بارزانی، سەرۆكێ هەرێما كوردستانێ د پەیاما خوە دا دبێژیت» پێدڤیە قانوونا بودجەی ب شێوەیەكێ دادپەروەرانە بهێتە بجهئینان و پێگەهێ هەرێما كوردستانێ وەكو قەوارەیەكێ سیاسی یێ دستووری و دەڤەرێن كێشە ل سەر ل بەرچاڤ بهێتە وەرگرتن و ماف و بەرژەوەندیێن وان بهێنە پاراستن».
سەرۆكێ هەرێما كوردستانێ د پەیاما خوە دا پێشوازی ل پەسەندكرنا بودجەیا سێ سالی یا ئیراقێ دكەت و دبێژیت» هیڤیدارین ببیتە نەخشەڕێیەكا باش بۆ پێشكەفتنا ئابووری و سەقامگیریا سیاسی و دەلیڤەیەكا باش یا وەبەرئێنانێ دروست بكەت و دەستخوەشیێ ل وان هەموو بەرێزان دكەین كو ب دلسۆزانە بۆ بەرژەوەندیا وەلاتیان و یەكسانیا خەلكێ ئیراقێ كاركری».
نێچیرڤان بارزانی دیاركر ژی» جهێ داخێ یە د دانوستاندنێن جڤاتا نوونەران دا، هندەك ژ پەرلەمانتاران ب شێوەیەكێ نەدروست ڕەفتار بەرانبەر مافێن هەرێما كوردستانێ و دەڤەرێن ناكۆكی ل سەر كر».
ب باوەریا سەرۆكێ هەرێما كوردستانێ ئەوا ل جڤاتا نوونەرێن ئیراقێ ڕوودای ل گەل بنەمایێن ڕێككەفتنا سیاسی یا هەڤپەیمانیا بڕێڤەبرنا دەولەتێ ناگونجیت و ئەو ئاراستە و شێوەیێ كاركرنێ، خزمەتا پرۆسەیا سیاسی و ڕەوش و پاشەڕۆژا ئیراقێ ناكەت.
نێچیرڤان بارزانی دیاركر ژی» ئەوا مە ل دەمێ دانوستاندنێن بودجەی دا دیتی، جهێ دلتەنگیەكا مەزنە و جارەكادی ئەو ڕاستیە سەلماند كو پەرت و بەلاڤبوونا ئالیێن كوردستانێ زیانێ دگەهینیتە هەرێما كوردستانێ» هەروەسا گوت» سەرەرای ڤێ چەندێ ب خواستا سیاسی یا هەڤپشك و ل بەرچاڤ وەرگرتنا بەرژەوەندیا گشتی، دشێین ڤێ بكەینە دەلیڤەیەك بۆ ب هێزكرنا باوەریێ د ناڤبەرا خوە دا، ڕێكخستنا باشتر یا ناڤمالا خوە، خاڤكرنا گرژیان و چارەسەریا كێشەیان بۆ ب هێزركنا زێدەتر یا ئیراقێ وهەرێما كوردستانێ».

جێگرێ سەرۆكێ جڤاتا نوونەرێن ئیراقێ دبێژیت: پارتی دیموكراتی كوردستان ژ بودجەیا گشتی یا ئیراقێ ئەوا هاتیە پەسەندكرن یا ڕازی نینە ژ ئەگەرێ وان دەستكاریێن تێدا هاتینە كرن، بەلێ مە دەنگ پێ دا بۆ وێ ئێكێ بزانین كا حوكمەتا ئیراقێ هەتا چەند پێگیری وێ چەندا هاتیە پەسەندكرن بیت. دیاركر ژی: دێ بەردەوام بین ل سەر وێ چەندێ كو پێدڤیە پاشئێخستیێ مووچەیێ فەرمانبەرێن هەرێما كوردستانێ ب ڕێژەیا 12% ژ پارێ زێدە یێ پەترۆلێ بهێتە دان.
شاخەوان عەبدوللا، جێگرێ سەرۆكێ جڤاتا نوونەرێن ئیراقێ گوت» پارتی دیموكراتی كوردستان یا ڕازی نینە ژ هەموو وان ڕێككەفتنێن هاتینە كرن ل دۆر پڕۆژەیێ قانوونا بودجەیا گشتی یا ئیراقێ، بەلێ مە وەكو پارتی دەنگ ب پڕۆژەیێ قانوونا بودجەیا گشتی یا ئیراقێ دا بۆ وێ ئێكێ تاكو بزانین كا حوكمەتا ئیراقێ هەتا چەند دێ پێگیری وێ بودجێ بیت كو ب شێوەیێ نوكە ژ ئالیێ جڤاتا نوونەران ڤە هاتیە پەسەندكرن».
شاخەوانی ئاماژەكر» سەرۆك مەسعود بارزانی د پەیاما خوە دا و هەم ژی پارتی دیموكراتی كوردستان هەلوەستێ خوە ڕاگەهاند و ئەڤە ژی بنەمایەكە بۆ هەلوەستێ فەرمی یێ مە ل دۆر پڕۆژەیێ قانوونا بودجەیا گشتی یا ئیراقێ».
شاخەوان عەبدولا ڕۆهنكر ژی» ئەم د پشت ڕاستین كو ئەو بڕگەیا تایبەت ب پاشئێخستیێ مووچەیێ فەرمانبەرێن هەرێمێ د ناڤ جڤاتا نوونەران دا دەنگ ئینایە ودێ بەردەوام بیت بۆ وێ ئێكێ ڤەگەراندنا پاشئێخستیێ مووچەیێ فەرمانبەرێن هەرێمێ ب ڕێژەیا 12% بهێتە جهگیركرن، كو هاتیە پێشنیازكرن ل هەر پارێزگەهەكێ بهایێ پەترۆلێ گەهشتە زێدەتر ژ 70 دۆلاران بۆ بابەتەكی بهێتە مەزاختن و مە ژی داخواز كریە ل هەرێما كوردستانێ بۆ دانا پاشئێخستیێ مووچەی بهێتە مەزاختن».
هەڤدەم ب دیتنا شاخەوان عەبدولای، پارتی دیموكراتی كوردستان گەلەك بزاڤكرن ئەو ڕێككەفتنا د ناڤبەرا هەردو حوكمەتێن هەرێما كوردستانێ و ئیراقێ دا هاتیە ئیمزاكرن ب وی شێوەی ل جڤاتا نوونەرێن ئیراقێ بهێتە پەسەندكرن، بەلێ هندەك ئالیان دەستكاری د پڕۆژەیێ قانوونا بودجەی دا كر و گوهۆڕین د هندەك بڕگە و مادەیان دا كر، كو پارتی دیموكراتی كوردستان و پشكەك ژ فراكسیۆنان ژی دژی ویان گوهۆڕینان بوو، بەلێ ل دووماهیێ هاتنە پەسەندكرن».

ئەندامەكێ لژنەیا دارایی ل جڤاتا نوونەرێن ئیراقێ ژ فراكسیۆنا پارتی دیموكراتی كوردستان ئاشكراكر كو پتریا مادەیێن پڕۆژەیێ بودجەیا گشتی یا ئیراقێ ئەو بووینە یێن ڕێككەفتن ل سەر هاتیەكرن، دیاكر ژی كو گەلەك جاران هەفپشكێن مە شەڤ و ڕۆژا نە ئێكن.
د.خەلیل غازی دۆسكی، ئەندامێ جڤاتا نوونەرێن ئیراقێ ژ فراكسیۆنا پارتی و ئەندامێ لژنەیا دارایی ل جڤاتا نوونەران بۆ ڕۆژنامەیا (ئەڤرۆ) گوت»پشتی پڕۆژەیێ قانوونا بودجەیا گشتی یا ئیراقێ دەنگ ل سەر هاتیەدان بوویە قانوون و دێ چیتە د بیاڤێ بجهئینانێ دا ئەڤە و پشتی هەردوو وەزارەتێن دارایی و نەخشەدانانێ ڕێنمایێن تایبەت ب ئەنجامدانا وێ دەردكەن و ئەڤە گەلەك دەمی ناكێشیت، چەند مەهێن كێم ماینە و ئەو پارە ناهێتە مەزاختن و تایبەت پارێزگەهێن باشوورێ ئیراقێ و نەچالاكن بەرۆڤاژی هەرێما كوردستانێ دشێت ددەمەكێ دیاریكری دا هەموو پڕۆژەیێن خوە ئەنجام بدەت، ڕێژەیا 75% پڕۆژەیێن (تشغیلی) نە و 25% پڕۆژەیێن وەبەرئێنانێ نە و پشكا هەرێما كوردستانێ ژ بودجەیا ئیراقێ دبیتە 12.67% لێ ئەڤ ڕێژە ناهێتە هەژمارتن بەلكو قەر و پارێن (حاكیمە) دهێنە بڕین دووڤ دا ڕێژەیا هەرێما كوردستانێ دهێتە هەژمارتن».
د.خەلیل غازی دۆسكی، گوت ژی» بودجا (تشغیلی) پێك دهێت ژ مووچەی و كڕینا كەلوپەلان و بودجەیا وەبەرئێنانێ نێزیكی ترلیۆنەك و 250 ملیار دینارانە، دیسا پشكا هەرێمێ ترلیۆنەك و 350 ملیار دینار ژ بودجا (حاكیمە) دهێت كو پارێ كڕینا گەنمی و ئاهێن خوارنێ و دەرمانایە، دیسا 300 ملیار دینار بۆ هێزێن پێشمەرگەی وەك مووچێ سالەكێ و د ناڤبەرا 400 بۆ 500 ملیار دیناران بۆ گەشەپێدانا هەرێمایە، تێچوویێ ڤەگوهاستنا پەترۆلی ئەو (سیادی) دهێتە هەژمارتن وئەم نەشێین پشكا هەرێمێ دیار بكەین».
ڕۆهنكر» گەلەك مادەیێن ناكۆكی ل سەر هەبوون نەكو ل سەر قەبارێ پاران بەلكو ل سەر قەبارێ دەستهەلاتێ و دەستوریەتا هەرێما كوردستانێ و مادەیێن ئێك و 116 و 117 هەموو ڤی بابەتی ئێكلا دكەن، بابەتێ گرنگ ئەوبوو ل خالا هەشت ژ مادەیا (14)ێ كو هاتیە پێشنیازكرن ژئالیێ ئێكەتیێ ڤە و لوبیەكێ شیعی و تایبەت یێن توندرەو ئارمانج ئەو بوو وی قەوارەیێ هەرێما كوردستانێ لاواز بكەن، لێ نەشیان ژبلی كو خالەك نەبیت ئەو ژی دبیت ب تانەكێ ئەڤ بابەتە بهێتە ڕاوستاندن، ئەنجامدانا وی ژی ژ ڕوویێ قانوونی ڤە نەیا دەستوری یە كو پتریا دەنگان هاتە سەپاندن و پشتڕاستم هەكە هەردوو حوكمەتێن هەرێما كوردستانێ و ئیراقێ كاربكەن دێ گەلەك مادە ژ بودجەی هێنە هەلگرتن چونكە مایتێكرن د كارێ حوكمەتێ و دانانا ئاستەنگان ل بەرامبەر كارێن حوكمەتێ دا تێدا هەیە، وەزیرا دارایی و سەرۆك وەزیران ژی گوتیە هەر خالەكا ڕێگریێ ل كارنامەیا حوكمەتێ بكەت دێ تانێ لێدەن».
د. خەلیل غازی ئاماژەكر» حوكمەتا هەرێما كوردستانێ چ بەهانە بۆ بەغدا نەهێلاینە و پەترۆلێ هەرێما كوردستانێ دێ ب ڕێكا (سۆمۆ) هێتە هنارتن و داهاتێ وێ دێ هێتە د بانكا ناڤەندی دا و ژ دەستهەلاتێن سەرۆكێ حوكمەتا هەرێما كوردستانێ یە ل دووڤ بۆدجا مەهانە پارەی ڤەكێشیت و ب مەزێخیت، ئەڤ جارە كەسەك نەشێت تۆمەتان ل دۆر ڤێ پرسێ بۆ هەرێمێ دروست بكەت».
ناڤبری ئەو ژی ئاشكراكر كو ڤێجارێ ڕێككەفتن د ناڤبەرا هەردوو حوكمەتان دا هاتیەكرن و چاوانیا سەردەریكرنا وان د بیاڤێ پەترۆل و بودجەی دا و هەكە ئەڤ ڕێككەفتنە نەبا، دبیت لژنەیا دارایی و دشرۆڤەكرنا پڕۆژەیێ قانوونا بودجەی دا گەلەك كێشەیان بۆمە دروستكەت».
هەوەرسا خویاكر» هەڤپشكێن مە یێن شیعی گەلەك جاران ب شەڤ و ڕۆژ نە ئێكن و گەلەك جاران خوە ڤەدكێشن، ژبلی خالا 14 ژ مادەیێ هەشت پتریا مادەیێن هاتینە پەسەندكرن وەكو ڕێككەفتنا هەرێمێ و بەغدا و مافێن هەرێمێ د پاراستی نە و تبێبینیا مە ل سەر خالا چاردێ ئەوە نەكو ببیتە عورفەك و بهێتە بكارئینان دژی هەرێمێ».

سەرۆك مەسعود بارزانی پەیامەك ل دۆر پەسەندكرنا بودجەیا گشتی و ڕەوشا سیاسی ل ئیراقێ بەلاڤكر و تێدا ڕاگەهاند: ل بەرانبەر هەر جۆرە بزاڤەك و دەستدرێژیەكێ بۆ تێكدان و نەهێلانا هەرێما كوردستانێ ب توندی دێ ڕاوەستین. هەروەسا دبێژیت: هەرێما كوردستانێ نە تنێ هێلا سورە، بەلكو هێلا مەرگێ یە و یان كوردستان یان نەمانە.

دەقێ پەیاما سەرۆك بارزانی:
ب مخابنیەكا مەزن ڤە ل چەند ڕۆژێن بۆری د ناڤ جڤاتا نوونەرێن ئیراقێ دا بزاڤەكا نەبەرپرسانە و بەرۆڤاژی دەستووری بۆ مەزنكرنا كێشەیان و پێشێلكرنا مافێن ڕەوا یێن گەلێ كوردستانێ هەبوو. هەموو ئالی د ئاگەهدارن كو پێشتر دانوستاندن و ڕێككەفتنا ئاڤاكەر د ناڤبەرا ئالیێن هەڤپەیمانیا ئیدارەیا دەولەتێ پێكئینای ب ئاراستەیا نەهێلانا كێشەیان هەبوو. هەروەسا حوكمەتا فیدرالی یا ئیراقی و حوكمەتا هەرێما كوردستانێ ژی گەهشتبوونە ئەنجام و ڕێككەفتنەكا گەلەك باش بۆ وێ چەندێ گرفت بهێنە چارەسەركرن و هەموو ئالیەك خزمەتا سەقامگیریا وەلاتی وژیارا خەلكی بكەت، بەلێ مخابن هندەك ئالیێن سیاسی ب هەناسەیەكا نەبەرپرسانە ب ڕێكا دەستكاریكرنا بڕگەیێن پڕۆژەیێ قانوونا بودجەی خواست وەبكەن هیچ ڕامانەك بۆ كیانێ هەرێما كوردستانێ نەمینیت. بەلێ ئەو بزاڤێن نەبەرپرس سەرنەگرتن و هاتنە ژناڤبرن. ڕوودانێن چەند ڕۆژێن بۆری یێن جڤاتا نوونەرێن ئیراقێ پەردە ل سەر ڕوویێ ڕاستەقینەیێ ئالیێن شۆڤینی و موزایدەچیان و هەروەسا هەموو ئەوان لادا كو نە ڕێزێ ل سۆز و ئیمزایێن خوە دگرن و نە ڕێزێ ل بنەمایێن دەستووری ژی دگرن. نوكە ژی كو پڕۆژەیێ قانوونا بودجەی ل جڤاتا نوونەرێن ئیراقێ هاتیە پەسەندكرن، هیڤیدارم ب نیەتەكا پاقژ بهێتە بجهئینان.
د گەل وێ چەندێ ژی دا دووپات دكەین كو هەرێما كوردستانێ، مولكێ گەلێ كوردستانێ و بەرهەمێ خوین و خەباتا گەلێ كوردستانێ یە.
ل بەرانبەر هەر جۆرە بزاڤ و دەستدرێژیەكێ بۆ تێكدان و نەهێلانا هەرێما كوردستانێ ب توندی دێ ڕاوەستین. ل دەف مە هەرێما كوردستانێ نەكو تنێ هێلا سۆرە بەلكو هێلا مەرگێ یە و یان كوردستان یان نەمانە.

مەسرور بارزانی، سەرۆكێ حوكمەتا هەرێما كوردستانێ ل گەل فیراس ئەلهەراوی، وەزیرێ ساخلەمیا ئوردن و شاندێ دگەلدا كۆمبوو.
د بەیاننامەیەكا حوكمەتا هەرێما كوردستانێ دا هاتیە» وەزیرێ ساخلەمیا ئوردن، سلاڤ و ڕێزێن شاه عەبدوللایێ دویێ، شاهێ ئوردن ب مەسرور بارزانی گەهاندن و بەرهەڤیا وەلاتێ خوە ژی بۆ هەموو هاریكاری و هەماهەنگیەكێ ل گەل حوكمەتا هەرێما كوردستانێ نیشادا.
ب گۆرەی وێ بەیاننامەیێ، د كۆمبوونەكێ دا هەردو ئالیان ئاماژە ب پەیوەندیێن دیرۆكی و تایبەت د ناڤبەرا هەرێما كوردستانێ و ئوردنێ دا، سەرۆكێ حوكمەتا هەرێما كوردستانێ سوپاسیا هەرێما كوردستانێ بۆ هاریكاری و پشتەڤانیا بەردەوام یا ئوردنێ و ب تایبەتی شاه عەبدوللایێ دوویێ ل هەرێما كوردستانێ دووپاتكر.
د وێ كۆمبوونێ دا، تەوەرەكێ سەرەكی یێ دانوستاندنان، پێشڤەبرنا پەیوەندیان بوو د بوارێ ساخلەمی و مفا وەرگرتن ژ ئەزموونا سەركەفتی یا وەلاتێ ئوردنێ د ڤی كەرتی دا.