ئەڤرۆ

جێگرێ سەرۆكێ پەرلەمانێ كوردستانێ ڕاگەهاند، هەلبژارتن مافەكێ گشتیێ خەلكێ كوردستانێ یە و پێدڤیە د دەمێ خوە یێ دیاركری دا بهێنە ئەنجامدان. هەروەسا دبێژیت: مە داخواز ژ یونامی كریە هاریكاری و چاڤدێریا هەلبژارتنێن كوردستانێ بكەن.

هێمن هەورامی، جێگرێ سەرۆكێ پەرلەمانێ كوردستانێ ل گەل ڕیكاردو رۆدریگێز، بەرپرسێ نڤیسینگەها یونامی ل هەرێما كوردستانێ و سیلڤی بلانشیە، بەرپرسێ هەلبژارتن ل نڤیسینگەها یونامی ل بەغدا و بەرپرسێ پشكا سیاسی ل نڤیسینگەها یونامی ل هەولێرێ كۆمبوو.

د دیدارەكێ دا دووماهی پێشهاتێن ڕەوشا سیاسی یا هەرێما كوردستانێ و ئیراقێ و پرسا ئەنجامدانا هەلبژارتنێن پەرلەمانێ كوردستانێ د كۆمبوونێ دا هاتنە كرن، جێگرێ سەرۆكێ پەرلەمانێ كوردستانێ ل دۆر وێ چەندێ ئاماژەكر» ب گرنگی ڤە مە باس ل ئەنجامدانا پرۆسەیا هەلبژارتنان كر و مە دووپاتكر كو هەلبژارتن مافەكێ گشتیێ خەلكێ كوردستانێ یە و پێدڤیە د دەمێ دیاركریێ خوە دا بهێنە ئەنجامدان».

هێمن هەورامی گوت ژی» مە دووپاتكر كو مە هەموو بزاڤێن خوە یێن ئێخستینە كار و ل گەل فراكسیۆنان چەندین كۆمبوون هاتینە ئەنجامدان و دەلیڤەیا زۆر ژی ب ئالیان هاتیە دان بۆ وێ چەندێ ڕێككەفتن ل سەر كاراكرنا كۆمسیۆنا بلند یا هەلبژارتن و ڕاپرسیان و ڕاستڤەكرنا قانوونا هەلبژارتنان بهێتە كرن» هەروەسا گوت ژی» هیڤیدارین هیچ بهانەیەك نەبیتە هۆكار بۆ ئەنجامنەدانا هەلبژارتنان د دەمێ دیاركریێ خوە دا».

جێگرێ سەرۆكێ پەرلەمانێ كوردستانێ دبێژیت» مە داخواز ژ یونامی و جڤاكێ نێڤدەولەتی كر كو چاڤدێر و هاریكار و هەماهەنگ بن بۆ ئەنجامدانا پرۆسەیا هەلبژارتنان و ژ نێزیك چاڤدێریا پرۆسەیێ بكەن».

بڕیاربوو ل ڕۆژا 1/10/2022 هەلبژارتنێن خۆلا شەشێ یا پەرلەمانێ كوردستانێ بهێنە ئەنجامدان، بەلێ ناكۆكیێن سیاسی د ناڤبەرا ئالیان دا ل سەر قانوونا هەلبژارتنان، پێكهاتەیا كۆمسیۆنا بلند یا هەلبژارتن و ڕاپرسیان و شێوازێ ئەنجامدانا هەلبژارتنان د ناڤبەرا ئێك بازنەیی و فرەبازنەیی، بوونە ئەگەرێ پاشئێخستنا هەلبژارتنان.

نێچیرڤان بارزانی، سەرۆكێ هەرێما كوردستانێ جارەكادی ڕۆژا 18/11/2023 وەكو ژڤانێ هەلبژارتنێن خۆلا شەشێ یا پەرلەمانێ كوردستانێ دیاركر، بەلێ بەری هەلبژارتن بهێنە ئەنجامدان، قانوونا هەلبژارتنان پێدڤی ب ڕاستڤەكرنێ یە و كۆمسیۆنا هەلبژارتنان ژی پێدڤی ب كاراكرنێ یە.

دووماهی كۆمبوونا پارتی و ئێكەتی ل سەر ئاستێ پشك و دەزگەهێ هەلبژارتن، ڕۆژا 5 نیسانا بۆری هاتە گرێدان و تێدا شاندێ یۆنامی پشكداریكر و بڕیاردا پێشنیازا خوە ل دۆر شێوازێ پشكداریا پێكهاتەیان د هەلبژارتنێن پەرلەمانێ كوردستانێ دا بدەتە پارتی و ئێكەتیێ.

ڕۆژا 9 نیسانا بۆری ،یونامی دو پێشنیاز ئاراستەی پارتی و ئێكەتیێ كرن، ئێك: پێكهاتە ب ئێك بازنە پشكداریێ د هەلبژارتنان دا بكەن، دو: هەكە ب ئێك بازنە پشكداریێ ناكەن, دو كورسیێن پێكهاتەیان بۆ سلێمانیێ بیت، كو ئێك بۆ مەسیحیان و ئێك ژی بۆ توركمانان بیت.

ئەڤرۆ

ئەندامەكێ شاندێ پشكا هەلبژارتن یا پارتی دیموكراتی كوردستان ڕادگەهینیت: د كۆمبوونێن بۆری ل گەل دەزگەهێ هەلبژارتن یێ ئێكەتی نیشتمانی كوردستان هەموو كێشە هاتینە چارەسەركرن و ئەوا هەی بهانە گرتنە، لەوما بۆ وێ چەندێ كو دشیان دابیت ئەو ئاستەنگە بهێنە چارەسەركرن، ڤێجارێ ل سەر ئاستێ بلند كۆمبوون بهێتە ئەنجامدان.

عەبدولسەلام بەرواری، ئەندامێ شاندێ پشكا هەلبژارتن یا پارتی دیموكراتی كوردستان گوت» پرسا هەلبژارتنان و ئەوێن گرێدای هەلبژارتنان هیچ گرفتەك نەما و پارتی هاتیە پێش و هەموو ئەو داخوازیێن وان بۆ وێ چەندێ هەلبژارتن بهێنە ئەنجامدان پارتی ڕازی بوو و هەژمارا كورسیێن بازنەیان و دەنگدانا نیڤ ل سەر بنەمایێ دەنگدانێ و نیڤ ژی ل سەر بنەمایێ لیستێ بیت، مە ئەو هەموو قبوول كرینە، ئەوا بوویە بەربەست ئەو كێشەنە یێن ئێكەتی دروست دكەت بۆ وێ چەندێ هەلبژارتن نەهێنە ئەنجدامدان، لەوما پێدڤیە كۆمبوون دناڤبەرا پارتی و ئێكەتیێ دا بهێتە كرن و پەیوەندی بهێنە ئاساییكرن و هەموو كێشە دێ چارەسەر بن».

عەبدولسەلام بەرواری زێدەتر گوت» پێدڤیە ڤێجاری دەمێ كۆمبوون د ناڤبەرا پارتی و ئێكەتیێ دا دهێتە كرن ل سەر ئاستێ دەزگەهێن هەلبژارتن نەبیت، چونكە مفایەكێ وەسا نابیت، لەوما پێدڤیە ڤێجارێ ل سەر ئاستێ بلند كۆمبوون بهێتە كرن، چونكە دیارە ئەو چارەسەریا بۆ كۆمسیۆنا بلند یا هەلبژارتن و ڕاپرسیان و قانوونا هەلبژارتنان دهێتە باسكرن بهانەیە، لەوما پێدڤیە ل سەر ئاستێ مەكتەبا سیاسی كۆمبوون بهێتە كرن و ڕوو ب ڕوو هەموو كێشە بهێنە چارەسەركرن».

ئەڤرۆ

عەزیز هەورامی:

ئەكرەم سالح، بەرپرسێ لقێ 22 یێ پارتی دیموكراتی كوردستان ل گەرمیان، ڕاگەهاند، ئێكڕێزیا ناڤمالا كوردی فاكتەرەكێ ب هێزە بۆ پێگەهێ كوردستانێ و هەر ناكۆكیەك ل هەرێما كوردستانێ دێ كاریگەریا نەرێنی هەبیت ل سەر پێگەهێ كوردان ل سەر ئاستێ ئیراقی و هەرێمایەتی و نێڤدەولەتی و گرنگە ئالیێن كوردستانێ ب گشتی هەست ب هەستیاریا ڕەوشا ڤێ قۆناغێ بكەن و ناكۆكی بهێنە چارەسەر كرن تاكو تاكو ژ ڤێ ڕەوشا ئیراق تێدا دەرباز دبیت و ئالیێن كوردستانێ ب كۆدەنگیێ ڕوو ب ڕوویێ ئاریشە و گرفتان بن.

ئەكرەم سالح، زێدەتر بۆ ڕۆژنامەیا (ئەڤرۆ) گوت» پرسا هەلبژارتنان بۆ دەمێ سالەكێ ژ ژڤانێ خوە هاتیە پاشئێخستن و هەتا نوكە قانوونا هەلبژارتنان نەهاتیە ڕاستڤەكرن و كۆمسیۆنا بلند یا هەلبژارتن و ڕاپرسیان ل هەرێمێ كوردستانێ نەهاتیە كاراكرن، هەكە هەلبژارتن ل ژڤانێ بۆ هاتیە دیاركرن نەهێنە ئەنجامدان دێ كاریگەریەكا خراب ل سەر ڕەوشا كوردستانێ هەبیت».

گوت ژی» ئەم وەكو پارتی ل دەف مە گرنگە هەلبژارتن د دەمێ خوە دا بهێنە ئەنجامدان، پرسا دیموكراسیێ و ئازادیێ و مافێن مرۆڤی بۆ كوردستانێ كاریگەریا گرنگ یا خوە هەیە ل ڕوانگەها دەولەتێن زلهێز و دۆست و هەڤپەیمانێن مە، هەموو ئالی هزر د بەرژەوەندیا تایبەت دا نەكەن، بەلكو بەرژەوەندیا گشتی و پاشەڕۆژا هەرێما كوردستانێ ل پێشتر بیت و بهانەیان نە ئینن ژبەر لاوازیا سیاسی تاكو هەلبژارتن نەهێنە ئەنجامدان، ژ بەر كو هەلبژارتن پرۆسەیەكا گرنگە و پێدڤیە د دەمێ خوە دا بهێنە ئەنجامدان».

هەروەسا گوت» پێدڤیە ل سەر هەموو ئالیان سەرۆكایەتیا هەرێما كوردستانێ و جڤاتا وەزیران بكەنە جهێ چارەسەركرنا كێشە و ئاریشەیێن كوردستانێ، نەكو سۆشیال میدیایێ و داخۆیانیێن لابەلا و پەنابرن بۆ نەحەزێن كوردستانێ، پێدڤیە كورد ل بەری هەموویان دۆستێن هەڤدو بن، نەكو چاڤەڕێی خەلكی دی بن چارەسەریێ بۆ بكەت».

خویاكر» هەموو دەمان دەرگەهێ پارتی یێ ڤەكری بوو بۆ دانوستاندنێ و چارەسەركرنا كێشەیان و چو جاران پارتی هۆكار نەبوو بۆ وێ چەندێ ڕەوشا سیاسی و حوكمڕانی ب وی ئاراستەیێ ئالۆز بچیت و مخابن ژ ئەگەرێ كۆمەكا گرفتان كو ل دەمێ بۆری دا رووداین و تیما ئێكەتیێ نەچوونە كۆمبوونێن جڤاتا وەزیران، پێدڤی بوو د چارچۆڤەیێ جڤاتا وەزیران دا كێشەیێن خوە چارەسەر كربان و داخوازیێن خوە بەرچاڤ كربان چونكە ئێكەتی ئالیەكێ سەرەكیێ حوكمەتا هەرێمێ یە، نوكە ژی دەلیڤە مایە و كێشە نەگەهشتینە وی ئاستی كو نەهێنە چارەسەركرن، نیەت پاكی و پێگیریكرن ب قانوون و بەرژەوەندیێن بلند یێ كوردستانێ وەدكەت كێشە ب شێوەیێ ئاسایی چارەسەر ببن».

ئاماژەكر» بزاڤ د بەردەوامن كو چارەسەری بۆ كێشەیان بهێنە دیتن و قۆناغا نوكە بهێتە دەربازكرن، بزاڤ ژی ل سەر ئاستێ هەڤپەیمان و ناڤخوە د بەردەوامن ب هیڤیا وێ چەندێ د دەمەكێ نێزیك دا كۆمبوونێن پارتی و ئێكەتیێ دەست پێ بكەن و بزاڤ بهێنە كرن چارەسەری بۆ وان خالێن بووینە جهێ ناكۆكیێ چارەسەریا گونجای بۆ بهێتە دیتن و هەلبژارتنێن پەرلەمانێ كوردستانێ بهێنە ئەنجامدان».

سەرۆك مەسعود بارزانی پێشوازی ل باربارا لیف هاریكارا وەزیرێ دەرڤەیێ ئەمریكا كر، د دیدارەكێ دا ب بەرهەڤبوونا ئەلینا ڕۆمانوسكی بالیۆزا ئەمریكا ل ئیراقێ و ئیرڤن هیكس قونسۆلێ گشتیێ ئەمریكا ل هەولێرێ، باس ل ڕەوشا گشتی یا ئیراقێ و دەڤەرێ هاتە كرن زێدەباری پەیوەندیێن د ناڤبەرا حوكمەتا هەرێما كوردستانێ و حوكمەتا ئیراقا فیدرال دا. ژئالیێ خوەڤە وەزارەتا دەرڤە یا ئەمریكا د تویتەكێ دا بەلاڤكر باربارا لیف پیرۆزباهیا سەرۆك بارزانی كر ب ڤەكرنا مۆزەخانا نەتەوی یا بارزانی كو بڕیارە ل دووماهیا ڤێ هەیڤێ بهێتە ڤەكرن و دیاركر ژی كو شانازیێ دكەین كو دەهان سالە ئەمریكا پشتەڤانیا هەرێما كوردستانێ دكەت.

سەرۆك مەسعود بارزانی ل سەلاحەدین، پێشوازی ل مارتین یێگەر بالیۆزێ ئەلمانیا ل ئیراقێ كر كو ب هەلكەفتا ب دووماهی هاتنا ئەركێن خوە و خاتر خواستنێ سەرەدانا سەرۆك بارزانی كربوو. د دیدارەكێ دا سەرۆك بارزانی سوپاسیا گەل و حوكمەتا ئەلمانیا كر كو ل قۆناغێن جودا جودا پشتەڤانێن گەلێ كوردستانێ بوون.

هەر د وێ دیدارێ دا ڕەوشا سیاسی یا ئیراقێ و پەیوەندیێن د ناڤبەرا حوكمەتا هەرێما كوردستانێ و حوكمەتا ئیراقا فیدرال هاتە باسكرن و دووپاتی ل پێشڤەبرنا پەیوەندیێن د ناڤبەرا هەردو ئالیا دا هاتە كرن.

سەرۆكێ هەرێما كوردستانێ، ڕادگەهینیت، كێشەیا سیاسی ل هەرێما كوردستانێ هەیە، بەلێ وەكو سەرۆكایەتیا هەرێما كرودستانێ بزاڤكریە كێشەیان چارەسەر بكەن و ببنە چەترەك بۆ كۆمكرنا ئالیێن سیاسی، دبێژیت ژی، بەغدا ل گەل حوكمەتا هەرێما كوردستانێ مامەلێ دكەت كو ژ پشكەكا زۆر یا حزبان پێكهاتیە.

نێچیرڤان بارزانی، سەرۆكێ هەرێما كوردستانێ ل دیدارا ئیراقێ ل بەغدا پشكداری د پەنەلێ (هەرێما كوردستانێ ئالیەكێ كارا د مەیدانا نیشتمانی دا) كر، ل دۆر هەلبژارتنێن پەرلەمانێ كوردستانێ، سەرۆكێ هەرێمێ گوت» من ئەركێ خوە بجهئینایە و من داخواز ژ ئالیێن سیاسی ژی كریە كو پێگیری وی ژڤانێ هاتیە دیاركرن ببن، هەموو بزاڤێن مە ل سەرۆكایەتیا هەرێما كوردستانێ ئەون كو ئەو هەلبژارتن زێدەتر نەهێنە پاشئێخستن».

سەرۆكێ هەرێما كوردستانێ د پشكەكا دی یا ئاخڤتنێن خوە دا باس ل كێشەیێن د ناڤبەرا حزبێن سیاسی یێن هەرێما كوردستانێ دا كر و گوت» كێشەیا سیاسی د ناڤبەرا ئالیێن سیاسی دا هەیە، بەلێ ل سەرۆكایەتیا هەرێما كوردستانێ هەموو بزاڤێن مە بۆ وێ چەندێ نە كو سەرۆكایەتیا هەرێمێ ببیتە چەترەك بۆ ئەوێن كێشە هەی ودێ بەردەوام بین ژی ل سەر وی ڕۆلێ خوە».

نێچیرڤان بارزانی د بەرسڤا پرسیارەكێ دا سەبارەت بایكۆتا كۆمبوونێن حوكمەتا هەرێما كوردستانێ ژ ئالیێ تیما ئێكەتیێ ڤە، گوت» دەركەفتنا تیما ئێكەتیێ ژ حوكمەتێ، پێنگاڤەكا ڕاست نەبوو، چونكە ئێكەتی پێكئێنەرێ سەرەكیێ ڤێ حوكمەتێ یە».

سەرۆكێ هەرێما كوردستانێ دووپاتی ل وێ چەندێ كر كو» مام جەلال و سەرۆك بارزانی پشتی ئاشتبوونێ، گەلەك پێنگاڤێن مەزن هاڤێتبوون». بەلێ ب دیتنا وی ئێكەتی ب دەركەفتنێ ژ حوكمەتێ نە خزمەتا ئێكەتیێ و نە خزمەتا گەلێ كوردستانێ كریە.

سەرۆكێ هەرێما كوردستانێ پێشتر داخوازا زڤرینا تیما ئێكەتیێ بۆ كۆمبوونێن حوكمەتێ كریە و سەرۆكێ حوكمەتا هەرێما كوردستانێ ژی چەندین جاران ئەو داخوازیە كریە. لەوما نێچیرڤان بارزانی دووبارە داخوازكر كو تیما ئێكەتیێ بزڤریت ناڤ كۆمبوونان و بۆ وێ چەندێ ژی داخوازكر محەمەد شیاع سودانی، سەرۆك وەزیرێن ئیراقێ ڕۆلێ خوە د چارەسەركرنا وێ كێشەیێ دا بگێریت.

د پشكەكا دی یا ئاخڤتنێن خودا، سەرۆكێ هەرێما كوردستانێ دووبارە پشتەڤانی ل سەرۆك وەزیرێن ئیراقێ كر و ڕاگەهاند، ئیراق دێ ب وێ چەندێ یا سەركەفتی بیت كو هەموو پێكهات ل وەلاتێ خوە ب خودانێن بڕیارێ بزانن و پێدڤیە هەموو پێكهات وێ بەرپرسیارەتیێ ڕاكەن، چونكە پشتی چەندین سالان، گەلێ ئیراقێ چاڤەڕێی وێ چەندێ یە كو خوەشگوزەرانیێ ببینیت.

نێچیرڤان بارزانی باس ل ڕێككەفتنا د ناڤبەرا بەغدا و هەولێرێ دا ژی كر و دیاركر كو یێ گەشبینە ب وێ چەندێ كو ئەو ڕێككەفتنە وەكو خوە بهێتە بجهئینان. باس ل وێ چەندێ ژی كر كو «ئیراق كویراتیا ستراتیژی یا هەرێما كوردستانێ یە و كێشەیێن مە ژی ل بەغدانە و ل هیچ جهەكێ دی نینن».

سەبارەت هنارتنا پەترۆلا هەرێما كوردستانێ ژی بۆ توركیا، سەرۆكێ هەرێما كوردستانێ گوت» تیمەكا هەڤپشك یا هەرێما كوردستانێ و ئیراقێ ل گەل توركیا ل سەر هێلێ نە و یێ گەشبینم كو ل ڤان نێزیكان دێ هنارتنا پەترۆلێ دەستپێكەت، ئەوژی پشتی چارەسەركرنا كێشەیێن تەكنیكی».

ب دیتنا نێچیرڤان بارزانی هیچ بڕیارەكا سیاسی نینە بۆ ڕێگریێ ل هنارتنا پەترۆلێ و گوت» هندەك بابەتێن تەكنیكی مینە و چاڤەڕێ دكەین ئەو بابەتە بهێنە ئێكلاكرن، لەوما یێ گەشبینم كو بەری دو حەفتیێن بهێت ئەو پرۆسەیە دەسپێبكەت». هەروەسا گوت» ڕاگرتنا هنارتنا پەترۆلێ تنێ پەیوەندی ب هەرێما كوردستانێ ڤە نینە، بەلكو پەیوەندی ب هەموو ئیراقێ ڤە هەیە».

سەرۆكێ هەرێما كوردستانێ دووپاتی ل وێ چەندێ كر كو پێدڤیە ئەو كێشەیە زوو بهێتە چارەسەركرن، چونكە مەهەكە پەترۆلا هەرێما كوردستانێ نەهاتیە هنارتن، ئەوژی كێشەیان بۆ بەلاڤكرنا مووچەی دروست دكەت و بارگرانیەكا زێدەتر دئێخیتە سەر ستوویێ حوكمەتا ئیراقێ، چونكە پێدڤیە ئیراق موچێ مووچەخۆرێن هەرێما كوردستانێ بهنێریت.

سەرۆك وەزیرێن ئیراقێ ڕادگەهینیت، مووچێ مووچەخۆران ئەركێ حوكمەتا ناڤەندی یە، ئەڤجا هەكە پەترۆل بهێتە هنارتن یان نە، مووچێ مووچەخۆرێن هەرێما كوردستانێ دێ دەن و ئەو ژێ بەرپرسن.

محەمەد شیاع سۆدانی، سەرۆك وەزیرێن ئیراقێ ل دیدارا ئیراقێ پشكداری د پەنەلەكی دا كر، ل دۆر حوكمەتا خوە ئاخڤت و گوت» د شەش مەهان دا مە سەلماند كو ئەڤ كابینەیە یا سەركەفتی یە» هەروەسا دبێژیت كو ل سەر وی شێوازێ چارەسەركرنا كێشەیان كو كار ل سەر كری دێ دبەردەوامبن.

د بەرسڤا پرسیارەكێ دا ل دۆر مووچێ مووچەخۆرێن هەرێما كوردستانێ، محەمەد شیاع سۆدانی، سەرۆك وەزیرێن ئیراقێ گوت» دابینكرنا مووچەیێ مووچەخۆرێن هەرێما كوردستانێ ئەركێ حوكمەتا ناڤەندی یە، ئەڤجا چ پەترۆل بهێتە هنارتن یان نە، هەروەكو چاوان مووچەیێ مووچەخۆرێن ئیراقێ دهێنە دان، ئەركێ حوكمەتا ناڤەندی یە مووچەیێ مووچەخۆرێن هەرێما كوردستانێ ژی بدەت».

سەرۆك وەزیرێن ئیراقێ باس ل وێ چەندێ ژی كر» مەهانە ڕاپۆرتەك ل سەر ئەنجامدانا كارێ حوكمەتێ ددەمە هەڤپەیمانیا بڕێڤەبرنا دەولەتی» كو ئەو هەڤپەیمانیە ژ وان ئالیان پێكهاتیە یێن حوكمەتا نوكە یا ئیراقێ پێكئینای.

محەمەد شیاع سۆدانی باس ل مووچەیێ مووچەخۆرێن هەرێما كوردستانێ كر و گۆت» پەترۆل بهێتە هنارتن یان نە، ئەم وەكو حوكمەت بەرپرسین ژ دابینكرنا مووچەیێ موچەخۆرێن هەرێما كوردستانێ».

هەولێر، قائید میرۆ

پەرلەمانتارەكێ پارتی دیموكراتی كوردستان هەلوەستێ حزبا خوە ل دۆر پرۆسەیا هەلبژارتنان دوپات دكەت و دبێژیت، پارتی ل سەر ئاستێن بلند یا ڕژدە ل سەر ئەنجامدانا پرۆسەیا هەلبژارتنان د ئەڤسالەدا و پێدڤیە هەردو دەزگەهێن هەلبژارتنێن پارتی و ئێكەتی بگەهنە ڕێككەفتنێ هەروەسا ئاشكراكر، هەكە ڕێككەفتن بهێتەكرن پەرلەمان یێ بەرهەڤە د چەند ڕۆژەكێن كێمدا ڕێكارێن قانوونی بجهبینیت.

وەیسی سەعید، ئەندامێ پەرلەمانێ كوردستانێ ژ فڕاكسیۆنا پارتی دیموكراتی كوردستان بۆ ڕۆژنامەیا (ئەڤرۆ) گوت» پارتی یا ڕژدە ل سەر بڕێڤەچوونا پرۆسەیا هەلبژارتنان د ئەڤسالەدا، بەری نوكە ژی چەندین كۆمبوونێن گرنگ د ناڤبەرا پشكا هەلبژارتنێن پارتی و دەزگەهێ هەلبژارتنێن ئێكەتیێ هاتینە ئەنجامدان، ل سەر هژمارەكا خالان گەهشتینە ڕێككەفتنێ و تنێ ل سەر كورسیێن پێكهاتەیان بۆچوونێن جودا هەنە، وەكو فڕاكسیۆنا پارتی دیموكراتی كوردستان بوچوونا مە ئەوە پێدڤیە پێكهاتە ب خوە بڕیارێ ل دۆر كورسیێن كۆتا بدەن، چونكە پێكهاتەیێن هەرێما كوردستانێ خەلكێ ڕەسەنێ كوردستانێ نە و دڤێت ڕێز ل بوچوون و بڕیارا وان بهێتە گرتن، هەر شێوازەكێ هەلبژارتنان پێكهاتە دیار بكەن ئەم ڕێگر نابین و هەروەسا نابیت چو ئالیێن دی ژی دژی بڕیارا پێكهاتەیان بن، هەكە پێكهاتە بڕیارا خوە بدەن ئەڤجا چ شێوازەك بۆ وان یێ گونجایە بلا ئەو شێواز بۆ هەلبژارتنا كورسیێن كۆتا بهێتە دانان ئێك بازنە بیت یان چەند بازنە بن یان ژی لیستا دەنگدەرێن وان یا جودابیت یان گشتی بیت، ئەڤە دمینیت ل سەر ئالیێن پێكهاتەیان نەكو ئالیێن كوردی، داخوازێ ژ هەموو ئالیێن دی ژی دكەین ب چو شێوەیەكی دەستێوەردانێ د بڕیارێن پێكهاتەیان دا نەكەن و ئاستەنگان بۆ پرۆسەیا هەلبژارتنان دروست نەكەن».

وەیسی سەعید ئاماژەكر» ئەم چاڤەڕێی كۆمبوونا هەردو پشكێن هەلبژارتنان یێن پارتی و ئێكەتیێ دكەین بگەهنە ڕێككەفتنا دووماهیێ ل دۆر ئەنجامدانا پرۆسەیا هەلبژارتنان، ژ بەر كو واقعەك ل هەرێما كوردستانێ هەیە ئەوژی ڕێككەفتنا ئالیێن سیاسیە ل دەرڤەی پەرلەمانی هەردەمێ ئالیێن سیاسی ل دەرڤەی پەرلەمانی بگەهنە ڕێككەفتنێ ئەڤە بێگومان د دەمێ چەند ڕۆژەكێن كێم دا پەرلەمانێ كوردستانێ دێ ڕێكارێن قانوونی بجهئینیت بۆ ڕاستڤەكرنا قانوونا هەلبژارتنان و كاراكرنا كۆمسیۆنا بلند یا سەربخوە یا هەلبژارتن و ڕاپرسیان ل هەرێما كوردستانێ».

ل دووماهیێ گوت» هەتا ئالیێن سیاسی نەگەهنە ڕێككەفتنێ، پەرلەمانێ كوردستانێ نەشێت چ پێنگاڤان پاڤێژیت، لەوڕا وەكو فڕاكسیۆنا پارتی دیموكراتی كوردستان گەلەك د ڕژدین ل سەر ئەنجامدانا هەلبژارتنان د دەمێ خوە یێ دیاركری دا و سیاسەتا پارتی ئەوە دخوازیت هەلبژارتن د ئەڤسالەدا بهێنە ئەنجامدان و هەرێما كوردستانێ نەكەڤیتە د چو ڤالاهیێن دەستووری و قانوونی دا، ب تایبەتی ل حەفتیا بۆری سەرۆك مەسعود بارزانی دووپاتی ل  سەر ئەنجامدانا هەلبژارتنان كر و گوت (بەرژەوەندیا كوردستانێ ل سەر هەموو بەرژەوەندیێن دی یە) ئانكو پارتی بۆ بەرژەوەندیا گشتی و پاراستن و بەر ب پێشڤەبرنا قەوارەیێ هەرێما كوردستانێ دخوازیت هەلبژارتن بهێتە ئەنجامدان.

ل هەولێرێ ڕێوڕەسمێن ڕۆژا نیشتمانی یا ئەمریكا بڕێڤەچوون و ئەو هەلكەفتە ب بەرهەڤبوونا نێچیرڤان بارزانی، سەرۆكێ هەرێما كوردستانێ بلند هاتە ڕاگرتن.

سەرۆكایەتیا هەرێما كوردستانێ د بەیاننامەیەكێ دا ئاماژەكر كو د وێ ڕێوڕەسمێ دا كو ل ئۆتێلا ڕۆتانا ل هەولێرێ هاتە گێران، هەر ئێك ژ باربارا لیف هاریكارا وەزیرێ دەرڤەیێ ئەمركا بۆ كاروبارێن ڕۆژهەلاتا نێزیك، فوئاد حسێن وەزیرێ دەرڤەیێ ئیراقێ، بالیۆزێ ئەمریكا ل ئیراقێ، قونسۆلێ گشتیێ ئەمریكا ل هەرێما كوردستانێ و هەژمارەكا بەرپرسێن هەرێما كوردستانێ و مێهڤان بەرهەڤ بوون.