سه‌ره‌كى نووترين نووچه

سه‌رۆكێن رووسيا وتوركيا وئيرانێ ل دۆر باژێرێ ئيدلب يێ سوورى كۆمبن

07/09/2018 15:06

ئه‌ڤرۆنيوز:

سه‌رۆكێن وه‌لاتێن رووسيا وتوركيا وئيرانێ ئه‌ڤرۆ ئه‌ينيێ 7/9/2018 دێ ته‌هران پايته‌ختێ ئيرانێ كۆمبن بۆ دانوستاندنێ ل سه‌ر ره‌وشا سووريێ.

دكۆمبوونا دناڤبه‌را فلاديمێر پۆتين، سه‌رۆكێ رووسيا وحه‌سه‌ن روحانى، سه‌رۆكێ ئيرانێ و ره‌جه‌ب ته‌يب ئه‌ردۆگان سه‌رۆكێ توركيا دێ به‌حسێ پرسا كونترۆلكرنا باژيرێ ئيدلب يێ سوورى وئۆپه‌راسيۆنێن له‌شكرێ سوورى هێته‌ كرن.

ژێده‌ره‌كێ له‌شكرى بۆ رۆژناما (كۆمێرسانت) يا رووسى گۆت” هوورده‌كاريێن ئۆپه‌راسيۆنا له‌شكرى يا سوورى دژى تيرۆرستان ل ئيدلبێ، پێدڤيه‌ سه‌رۆكێ رووسيا وتوركيا وئيرانێ ئه‌ڤرۆ ل سه‌ر رازى بن، پاشى ئۆپه‌راسيۆن ده‌ست پێ بكه‌ت”.

رۆژناما رووسى ئه‌وژى ئاشكراكر كو ئۆپه‌راسيۆنا له‌شكرێ سوورى بۆ كونترۆلكرنا ئيدلبێ دڤيا ل هه‌يڤا ته‌مووزا بۆرى هاتبا ئه‌نجامدان، به‌لێ ژبه‌ر نه‌رازيبوونا توركيا هاتبوو پاشخستن.

ده‌ڤه‌را كه‌سك ل به‌غدا هاته‌ توپ بارانكرن

07/09/2018 14:56

130

ئه‌ڤرۆنيوز:

ده‌زگه‌هێن راگه‌هاندنێ يێن عيراقى به‌لاڤكر، ل دره‌نگيا شه‌ڤا بۆرى ده‌ڤه‌را كه‌سك ل به‌غدا كو پتريا داموده‌زگه‌هێن حوكمه‌تا عيراقێ وباليۆزخانێن وه‌لاتان لێ هه‌نه‌، ب گۆلێن هاونان هاته‌ توپ بارانكرن.

دياركرن ژى كو وێ توپ بارانكرنێ چو زيان نه‌بوون وئه‌و گوله‌ هاونه‌ ژى ب به‌ر جهه‌كێ خالى كه‌فتن.

پلا گه‌رمێ ئه‌ڤرۆ وسوباهى ل پارێزگه‌ها دهۆكێ چه‌نده‌؟

07/09/2018 14:46

460

ئه‌ڤرۆنيوز:

رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ دياركر كو پلێن گه‌رمێ ل پارێزگه‌ها دهۆكێ ئه‌ڤرۆ وسوباهى دێ هێنه‌ خوار.

رێڤه‌به‌ريا ناڤبرى به‌لاڤكر” پلا گه‌رمێ ئه‌ڤرۆ ئه‌ينيێ ل پاريزگه‌ها دهۆكێ دێ 35 بيت”.

خوياكر ژى” پلا گه‌رمێ سوباهى شه‌مبيێ ل پارێزگه‌ها دهۆكێ دێ هه‌ر هه‌مان پله‌ بيت ئانكو 35″.

ب ڤیدیۆ – ئاگرەکێ مەزن بەربوویە ئاقارێ گوندێن سگێرێ وسه‌رگه‌لێ

07/09/2018 14:38

170

ئەڤرۆ نیوز ، نەوزاد هلوری:

دەمەکێ کێم بەری نوکە ژ ئەگەرەکێ نەدیار ئاگر بەربوو ئاقارێ گوندێ سگێرێ و گوندێ سەرگەلێ یا سەر ب قەزا ئامێدیێ و رێژەیەکا زور یا پوش و پاوانی سوتیە، کامیرا ئەڤرو نیوز ژی چەند دیمەنێن ئاگری وێنە دکەت.

هژماره‌كا خەلکێ گوندێ سگێرێ بۆ ئەڤرو نیوز دیارکر کو ئاگر ژ ئەگەرەكێ نەدیار بەربوویە ئاقاری وهەر چەنده‌ تیما ئاگر ڤەمراندنا دەڤەرێ بەرهەڤبوویە، بەلێ ل گەل ڤێ یەکێ ژی رێژەکا مه‌زن یا پيش و پاوانی هاتیە سوتن چونکی ترومبێلێن ئاگرڤه‌مراندنێ ناگه‌هنه‌ جهێ روودانێ.

نێزیکێ دەمژمێرەکێ یە ئاگر ب پيش و پاوانی ڤە و نێزیکە بەربیتە رەز و بیستانێن خەلکی.

كچه‌كێ خوه‌ كوشت

07/09/2018 14:21

2131

ئەڤرۆ نیوز، بارزان مزووری:

كاوە عیدو خەتاری،چالاكڤانێ‌ ئێزدی بو ئەڤرۆ نیوز ئاشكرا كر كو ئەڤرۆ ئه‌ينيێ 7/9/2018 كچەكا ئێزدی بناڤێ‌”ئارزین ئازاد ئیلیاس” ئاكنجیا گوندێ‌ بوزا ب ئەگەره‌كێ نەدیار خو دناڤ مالێ‌ دا كوشتیە.

ناڤبری دياركر كو ئارزین قوتابیا قوناغا 12 ئاماده‌يى بوو.

فه‌توايه‌كا سيستانى:نابيت بێ ده‌ستنڤێژ ده‌ست بكه‌نه‌ دراڤێ هزار دينارى

07/09/2018 14:15

751

ئه‌ڤرۆنيوز:

مه‌رجه‌عێ شيعى يێ بلند، ئايه‌تولا عه‌لى سيستانى فه‌توايه‌كا ل دۆر دراڤێ هزار دينارى يێ عيراقى ده‌ردكه‌ت.

مه‌رجه‌عێ شيعى يێ بلند ب رێيا پێگه‌هێ خوه‌ يێ ئه‌لكترۆنى فه‌توايه‌ك ده‌ركر كو نابيت بێ ده‌ستنڤێژ ده‌ست بكه‌نه‌ دراڤێ هزار دينارى ژبه‌ركو سوره‌تا ( الاخلاص) ل سه‌ر هاتيه‌ نڤيسين.

هەتا نوکە 10 خوەنیشاندەر ل بەسراهاتینە کوشتن

07/09/2018 11:32

ئەڤرۆ نیوز ، زنار تۆڤی:

ئەڤە ماوێ چەند رۆژانە خوەنیشاندان و ئالۆزی ل پارێزگەها بەسرا د بەردەوامن و لدووڤ دوماهی ئامار د ئەڤان هەر سێ رۆژێن بوری دا 10 خوەنیشاندەر ل بەسرا ھاتینە کوشتن و 146 دی ژی برینداربووینە.

ئەڤرۆ ئەینیێ 7.9.2018 کۆمسیۆنا مافێن مرۆڤی ل عیراقێ ئامار و زیانێن خوەنیشاندانێن پارێزگەھا بەسرا راگەھاندینه و تێدا دیارکریە، کو د هەرسێ رۆژێن بوری دا 10 خوەنیشاندەر ھاتینە کوشتن و 146 ژی بریندار بووینە.

هەروەسا کۆمسیۆنا مافێن مرۆڤی ل عیراقێ گۆتیە، کو حەفت خوەنیشاندەر ل سێشەمبیا بۆری ھاتینە کوشتن، دو یێن دیتر ل رۆژا چارشەمبی و ئێک ژی دوھی هاتیە کوشتن.
وەکو دیار خوەنیشاندانێن پارێزگەها بەسرا ئەڤە ماوێ پێنج رۆژانە د بەردەوامن و نوکە خوەنیشاندان دژوار بووینە و د ڤی ماوەی دا خوەنیشاندەران ئاڤاهیێن پارێزگەھا بەسرا و ھەروەسا یێ باژێرڤانیێ حەشدا شەعبی سوتینە، ئەڤرۆ ئەینیێ ژی خوەنیشاندان ل وی باژێری د بەردەوامن.

وه‌زيرێن ژ ده‌رڤه‌ يێن توركيا و ئيرانێ كۆمبوون

07/09/2018 10:29

گۆپيتكا سێ قولى يا رۆسيا، توركيا و ئيران ئه‌ڤرۆ دێ ل ته‌هران هێته‌ ئه‌نجام دان

ئه‌ڤرۆ نيوز:

هه‌ردو وه‌زێن ژ ده‌رڤه‌ يێ توركيا و ئيرانێ رۆژه‌كێ به‌رى گۆپيتكا سێقولى يا توركيا، ئيران و رۆسيا كۆمبوون.

د هژمارا تايبه‌تا خوه‌ يا تويته‌رى دا ل تۆڕا جڤاكيا تويته‌رى مه‌ولۆد چاوشئۆغلۆ وه‌زيرێ ده‌رڤه‌ يێ توركيا راگه‌هاند كو ل گه‌ل محه‌مه‌د جه‌وام زه‌ريف هه‌ڤپيشه‌يێ خوه‌ يێ ئيرانى ل ته‌هران به‌رى گۆپيتكێ سێ قولى يا توركيا، ئيران و رۆسيا كۆمبوو.

چاوشئۆغلۆ نڤيسيه‌: “پشكداريا سه‌رۆك كۆمارێ مه‌، ره‌جه‌ب ته‌يب ئه‌ردۆگان ل گۆتيكا سێ قولى يا ئيران، رۆسيا و توركيا ل دۆر پرسا سوريا سوبه‌هى دێ هێته‌ ئه‌نجام دان، ل باژێرێ ته‌هران و ل گه‌ل هه‌ڤپيشه‌يێ خوه‌ يێ ئيرانى محه‌مه‌د جه‌واد زه‌ريف كۆمبووم”.

گۆپيتكا ئێكێ يا سێقولى د ناڤبه‌را رۆسيا، توركيا و ئيرانێ دا ل 22ى چريا دويێ 2017 ل سوچى ب رێڤه‌ چوو. گۆپيتكا دويێ ل 4ى نيسانا 2018ێ ب رێڤه‌ چوو. گۆپيتكا سيێ ژى بڕياره‌ ئه‌ڤرۆ ل ته‌هران ب رێڤه‌ بچيت.

بڕيار بوو گۆپيتكا سيێ سه‌ركردێن وه‌لاتێن گره‌نتيكار ل ته‌برێز كو پارێزگه‌هه‌كا ئازه‌رى زمانێ ئيرانێ بهێته‌ ئه‌نجان دان، به‌لێ چه‌ند رۆژان به‌رى كۆمبوونێ بڕيار هاته‌ گوهۆڕين و كۆمبوون دێ ل ته‌هران هێته‌ ئه‌نجام دان.

ئامارا دووماهيێ يا جهێن ئه‌ڤ شه‌ڤه‌ ل به‌سرا هاتينه‌ سوتن

07/09/2018 00:09

378

ئه‌ڤرۆنيوز:

ژێده‌ره‌كێ رۆژنامه‌ڤانى ل پارێزگه‌ها به‌سرا راگه‌هاند، ئه‌ڤ شه‌ڤه‌ چه‌ندين باره‌گايێن حزبى وراگه‌هاندنێ وجهێن جودا جودا هاتينه‌ سوتن.

عه‌لى سارى بۆ ئه‌ڤرۆنيوز گۆت” باره‌گايێن حزبى يێن ڤان لايه‌نان يێن هاتينه‌ سوتن حزبا ده‌عوه‌ – رێكخراوا به‌در – عه‌سائب ئه‌هلولحه‌ق- جڤاتا بلند يا ئيسلامى- ئيراده‌ ( حه‌نان فه‌تلاوى) – حزبا فه‌زيله‌ – ئۆفيسا په‌رله‌مانتار فالح خه‌زعه‌لى”.

ئاماژه‌ دا” باره‌گايێن بزاڤا نوجه‌با وحزبوللا ژى هاتينه‌ سوتن”.

ناڤبرى دياركر كو كۆچكا مێهڤانداريێ يا پارێزگه‌رێ به‌سرا ئه‌سعه‌د ئه‌لعيدانى ژى هاتيه‌ سوتن.

ل دۆر باره‌گايێن ده‌زگه‌هێن راگه‌هاندنێ ئه‌وێن هاتينه‌ سوتن، عه‌لى سارى گۆت” باره‌گايێ ئوفيسا كه‌نالێ العراقيه‌ يا حكومى وكه‌نالێ الغدير يا رێكخراوا به‌در وراديوا نه‌خيل يا جڤاتا بلند يا ئيسلامى يێن هاتينه‌ سوتن”.

ئاشكراكر ژى” دو وه‌لاتيێن خوه‌نيشانده‌ر ل به‌رده‌م باره‌گايێ بزاڤا نوجه‌با هاتينه‌ كوشتن”.

دياركر ژى” پشتى به‌رزه‌بوونا پۆليسێن هاتنوچوونێ ونه‌مانا وان ل سه‌ر جاده‌يان، نوكه‌ وه‌لاتى ل شوينا وان هاتنوچوونا ترومبێلان ل سه‌ر جادێن گشتى رێك دئێخن”.