ئه‌ڤرۆ نيوز:

ب ئەگەرێ تێکچوونا رەوشا ئابووریا وەلاتێ ئیرانێ و سەپاندنا سزایێن ‏ئابووری ژلایێ ئەمریکاڤە رۆژێن بۆری ھژمارەکا زۆرا وەلاتیێن ئیرانی ب ‏مەرەما بدەستڤە ئینانا دەلیڤا کاری ھاتینە ھەرێما کوردستانێ ‏مامۆستایەکێ زانکۆیێ ژی دبێژیت، پێدڤیە حوکمەت باجەکا زێدەتر دانیت ‏سەر کرێکارێن بیانی و کاریگەریێ ل سەر دەلیڤا کاری بۆ خەلکێ ‏کوردستانێ نەبیت.‏

دکتۆر ئیدریس رەمەزان، بسپۆرێ ئابووری بۆ رۆژناما ئەڤرۆ گۆت” ب ‏ئەگەرێ سزایێن ئەمریکا بۆ سەر وەلاتێ ئیرانێ دەلیڤا کاری ل ئیرانێ ‏کێمتربوویە و ژبەر رەوشا تەنایا ھەرێما کوردستانێ و ھەبوونا دەلیڤا کاری ‏خەلکێ ئیرانێ ڤێ دوماھیێ زێدەتر تێنە ھەرێما کوردستانێ ب مەرەما ‏کارکرنێ، ئەگەرێ دویێ بھایێ دراڤێ ئیرانێ زۆر داکەتیە و ھەگەر ‏کرێکارەکێ ئیرانی ب بھایەکێ چەند کێمژی کار بکەت ل ھەرێما کوردستانێ ‏ئەڤە بێگومان بۆ وەلاتێ ئیران زۆر دکەت، نوکە ئەمریکا باجێن زۆر داناینە ‏سەر ئیرانێ، ل وەلاتێ ئیرانێ دەمێ کەسەک کار دکەت رێژەیەکا زۆرا باجێ ‏ژلایێ دەولەتێ تێتە وەرگرتن، بەرۆڤاژی کەسەک ل ھەرێما کوردستانێ کار ‏بکەت کێمترین باج لسەرە ئەڤێ چەندێ ژی کاریگەریێن تەمام کرینە سەر ‏ھاتنا کرێکارێن بیانی.‏

دکتۆر ئیدریس رەمەزان دیارکر” راستە ھاتنا کرێکارێ بیانی دەلیڤا کاری ‏بۆ خەلکێ مە کێم دکەت، بەلێ ئاریشە دڤێ چەندێ دایە خەلکێ مە بڤی ‏بھایێ ئەو کار دکەن کار ناکەن، چونکە بۆ وان چەندی بھایەکێ کێم کار ‏بکەن، بەلێ دەمێ پارێ مە یێ عێراقی دکەنە تمەنێ ئیرانی زۆر دکەت، ‏پێدڤیە دەمێ حوکمەتا ھەرێما کوردستانێ دەلیڤا کاری دەتە خەلکێ بیانی ‏رێژەیەکا باجا زێدەتر وەربگریت ھەتا کاریگەریێن کێمتر ھەبن لسەر دەستێ ‏کارێ نافخۆیی و نەبیتە ئەگەرێ ڤێ چەندێ کو دەلیڤا کاری بۆ وەلاتیێن ‏ھەرێما کوردستانێ نەمینیت و خەلک ل وەلاتێن تورکیا و ئیرانێ بھێتە ڤێرە ‏کار بکەت و خەلکێ مەژی بێکار بن.‏

ئەڤرۆ نيوز:‏

ل گۆر راپۆرتەکا ئاژانسا سپۆتینگ یا روسیا ھەتا نھا ژی حوکمەتا سووریێ چو سۆز بۆ فیدراسیۆنێ ‏یان ژی ھەرێمەکا ئۆتۆنۆمی نەداینە کوردان و تشتێن ل راگەھاندنێن ژی بەلاڤ دبن نێرینێن ھندەک ‏کەسانە و وەکو دەولەت ھەتا نھا سووریێ چو سۆز نەدایە کوردان، چونکو نھا رژێما بەشاری ھەست ‏دکەت کو رۆژ ب رۆژێ بھێز دکەڤیت و ھەکە پێگەھێ بەشاری بھێز بیت رەنگە رازی نەبیت کورد ل ‏سووریێ کیانەکێ بۆ خوە ئاڤا بکەن.‏

د بەردەوامیا راپۆرتێ دا ئەو یەک ژی ھاتیە دیار کرن کو یێن بەری نھا دژبەریا بەشاری دکرن و ‏دگۆتن دڤێت بەشار ئەسەد ژ دەستھەلاتێ بھێتە دوورخستن نھا ل ھەمبەر بەشاری بێدەنگن و ل ‏دژی دوورخستنا وی نینن، ژ بەر ھندێ ژی بەشار ھەست دکەت کو پێگەھێ وی نھا بھێزە و نەچار ‏نینە ھەرێمەکا کوردی ل سووریێ ئاڤا بکەت یان ژی رێ بۆ کارەکێ وەسا بدەت.‏

چاڤدێرێن سیاسی ژی دیار دکەن کو ھەکە رژێما بەشاری بشێت ب ھاریکاریا روسیا ئدلبێ ژ دەستێ ‏گرۆپێن چەکدار دەرخینیت و بکەتە ژێر کۆنترۆلا خوە دێ گەلەک ھەڤسەنگی ھێنە گوھۆڕین، ‏چونکو تنێ تشتێ بۆ پاشەرۆژا سووریێ دھێتە دیتن ئەڤە کو ب رێیا ئامادەکرنا دستوورەکێ نوو ‏سیستەمێ سیاسی بھێتە گوھۆڕین، لێ تورکیا و ئیران کو دو وەلاتێن کاریگەرن ل سووریێ ناخوازن ‏کورد ل سووریێ بگەھنە مافێن خوە و وەکو کوردێن عیراقێ ببنە پشکەک ژ دەستھەلاتێ، ژ بەر ‏ھندێ ژی ھەر تشتەکێ ل دژی کوردان دکەن و تورکیا وەکو بەرێ دژبەریا بەشاری ژی ناکەت و ئەو ‏یەک دێ کاریگەریا خوە ل پاشەرۆژا سووریێ و پرسا کوردی ل وی وەلاتی کەت.‏

ل ئالیێ دی بسپۆرێن سیاسی یێن ئورۆپی و ئەمریکی ژی دیار دکەن کو ھەتا کورد ل سووریێ ‏نەگەھنە مافێن خوە رەوشا وی وەلاتی ئارام نابیت، چونکو بێی کوردان دێ قەیرانا نھا یا سووریێ ‏بەردەوام بیت و دەستھەلاتدارێن شامێ ژی دزانن نھا نەشێن شەرێ کوردان بکەن.‏