بەربژارێ هەژمار 49 ل سەر لیستا 197 یا پارتی دیموكراتی كوردستان بۆ هەلبژارتنێن جڤاتا پارێزگەها نەینەوا ڕاگەهاند: ل جڤاتا پارێزگەها نەینەوا دێ كاركەین بۆ بجهئینانا ڕێككەفتنا شنگالێ و زڤرینا ئێدارا شەرعی و ئاوارەیان بۆ قەزا شنگالێ‌ كو هەر جهـ و دەڤەرەكا پارتی تێدا بیت ل وی جهی و دەڤەرێ‌ ئارامی وئاڤەدانی هەیە ژبەر ڤی چەندی ژی خەلكێ‌ شنگالێ دێ‌ دەنگ ب لیستا 197 یا پارتی دیموكراتی كوردستان دەت «.
محسن نایف سلۆ، بەربژارێ هەژمار 49 ل سەر لیستا 197 یا پارتی دیموكراتی كوردستان بۆ هەلبژارتنێن جڤاتا پارێزگەها نەینەوا گۆت» پارتی بێ‌ جوداهی خزمەتا هەموو دەڤەران دكەت وبۆ چار سالێن بهێت پارتی بەرنامەیەك گەلەك مەزن بۆ هەموو دەڤەرێن سەر ب پارێزگەها نەینەوا ڤە هەیە ودێ‌ خزمەتەكا مەزن پێشكیشی وەلاتیان كەت كو هەر جه و دەڤەرەكا پارتی تێدا بیت ل وی جهی و دەڤەرێ‌ ئارامی وئاڤەدانی هەیە ژبەر ڤی چەندی ژی خەلكێ‌ شنگالێ دێ‌ دەنگ ب لیستا 197 یا پارتی دیموكراتی كوردستان دەت داكو ئارامی وئاڤەدانی ل شنگالێ‌ پەیدابیت وئاوارە بڤرنە سەر مالێن خوە وئەم دێ‌ ب ڕێكا جڤاتا پارێزگەها نەینەوا كاركەین هەموو خزمەتگوزارێ‌ بۆ شنگالێ بهێنە دابینكرن وشەرعیەت و قانوون بزڤڕنە شنگالێ‌ «.
محسن نایف سلۆ ، بەربژارێ هەژمار 49 ل سەر لیستا 197 پارتی بۆ هەلبژارتنێن جڤاتا پارێزگەها نەینەوا ، گوت ژی» هەلبژارتنێن جڤاتا پارێزگەها نەینەوا بۆ خەلكێ‌ شنگالێ‌ چارەنڤیسازن، ژبەركو ئەڤە نەهـ سالن خەلكێ‌ شنگالێ‌ ئاوارە وهێشتا بەغدا نەشیایە ڕەوشا شنگالێ باش بكەت و ڕێككەفتنا شنگالێ‌ بجهبینیت وئەم دێ‌ ل جڤاتا پارێزگەها نەینەوا كاركەین بۆ بجهئینانا ڕێككەفتنا شنگالێ وقەرەبووكرنا خەلكێ‌ شنگالێ‌ «.
محسن نایف سلۆ، ڕۆهنكر» خەلكێ‌ شنگالێ ل سالا 2014ێ‌ تووشی كارەساتەكا مەزن بوون ل سەر دەستێن تیرۆرستێن داعشێ و هەتا نوكە ژی شنگال یا وێرانكریە وخانیێن وێ د خرابوینە وژێرخانەیا شنگالێ هاتیە وێرانكرن ئەم دێ‌ ل جڤاتا پارێزگەها نەینەوا كاركەین بۆ ئاڤەدانیا شنگالێ وئەنجامدانا پڕۆژەیێن گرنگ وەكو ئاڤاكرنا نەخوەشخانە و قوتابخانە و پڕۆژەیێن كارەبی وئاڤی ودابینكرنا دەلیڤەیێن كاركرنێ‌ بۆ گەنجان ب ڕێكا پرۆژەیێن چاندنی».

شارەزایەكێ قانوونی ئاماژە ب وێ چەندێ دكەت ئاریشەیا دادگەها فیدڕالی ل ئیراقێ چەند ئاریشەیا عەقلیەتا شیعایە هند ژی ئاریشەیا خراب بكار ئینانا قانوونێ یە و پێدڤیە پڕۆژەیەكێ نیشتیمانی دژی وان كەسان ژی هەبیت یێن ل بەغدا ئاڤێ دكەنە ئاشێ نەیارێن كوردان و كار بۆ پڕۆژەیێ دژایەتیا هەرێمێ دكەن.
جەواد مستەفا ستۆپەیی، شارەزایێ قانوونی بۆ ڕۆژنامەیا (ئەڤرۆ) گوت « پشتی ژناڤچوونا ڕژێما بەعس ل سالا ٢٠٠٣ێ و نڤیسینا دەستوورێ ئیراقێ ل سالا ٢٠٠٥ێ و گۆهۆڕین ب سەر سیستەمێ سیاسی ل ئیراقێ هاتی ب گوڕەی مادێ ئێكێ یێ دەستووری بۆ سیستەمێ فیدڕالی پێنگاڤەك و گۆهۆڕینەكا بنەرەتی بوو ل دیرۆكا حوكمڕانیێ ل ئیراقێ ودەستكەفتەكێ مەزن بوو هەم بۆ ئیراقێ هەم ژی بۆ هەرێما كوردستانێ، ئەڤەژی بۆ ئێكڕێزیا كوردان ڤەدگەڕیت، مخابن پشتی ئەوان دیتی گەلەك مافێن كوردان دناڤا دەستووری دا هاتینە جهگیركرن، هند پێنەچوو ل ڕاگەهاندنێ هندەك ئالی و كەسایەتیێن ئیراقێ نەڕازیبوونا خوە دیاركر ل دۆر مافێن كوردان دناڤا دەستووری دا، بەلێ وان هزر دوێ چەندێ نەكر كو دهەر وەلاتەكی دا سیستەمێ فیدڕالی دبیتە ئەگەرێ پێشكەفتنا ئەوی وەلاتی، مخابن پێكهاتەیا شیعی ل ئیراقێ ب ڕێكێن جودا پێداگیری ل سەر دژایەتیا هەرێما كوردستانێ كر و هەر ل جهنەئینانا مادەیێ ١٤٠ هەتا دگەهیتە بڕینا پشكا بودجە و مووچەیێن فەرمانبەرێن هەرێما كوردستانێ، د دووڤدا ب گۆڕی قانوونێن وان ڤیاین چەندین هێزێن حەشدا شەعبی هاتنە پێكئینان و نوكە یێ ڕكمانیا وەزارەتا بەرگریا ئیراقێ دكەن، كار گەهشتە وێ چەندێ قانوون كرە بەهانەیەك بۆ دژایەتی و لاوازكرنا هەرێما كوردستانێ ئەوژی ب ڕێكا بكارئینانا زۆرینەیا پەرلەمانی و پشتگوهـ هاڤێتنا سیستەمێ لهەڤهاتنێ ئەوا ئیراقا نوو ل سەر هاتیە ئاڤاكرن».
جەواد مستەفا ستۆپەیی گوت ژی» پێدڤیە گەرەنتیەك هەبایە بۆ هەردو ئەندامێن كورد ل دادگەها فیدرالی یا ئیراقی ل هەمبەر هەر دژایەتیەكا بۆ هەرێما كوردستانێ دهێتەكرن، دگەل ئەوان بزاڤێن ژئالیێ هندەك ئالیێن شیعی ڤە دژی هەرێما كوردستانێ دهێنەكرن، هندەك پەرلەمانتار و ئالیێن كوردی ژی كار بۆ بەرژەوەندیێن سیاسەتا دژایەتیا هەرێمێ دكەن و ئاڤێ دكەنە ئاشێ پڕۆژەیێ شیعەگەریێ ل ئیراقێ».
ئاماژەكر» پێدڤیە هەرێما كوردستانێ پڕۆژەیەكی نیشتیمانی هەبیت و هەموو ئالیێن سیاسی تێدا پشكدار بن بۆ بەرهنگاربوونا وان پیلانێن دژی هەرێما كوردستانێ هەین, هەتا كەسێن دژایەتیا هەرێمێ دكەن بهێنە دادگەهكرن ژی، هەكە پێنگاڤەكا ب ڤی شێوەی نەهێتە هاڤێتن ڕۆژ بۆ ڕۆژێ ئەو ئالیێن دژایەتیا هەرێما كوردستانێ دكەن دێ قانوونێ هەمبەری كوردان بكارئینن بۆ لاوازكرنا هەرێما كوردستانێ».

سەرۆکێ گشتی یێ پارتا سوسیالیست یا کوردستانێ راگەهاند، هەلبژارتنێن باژێرڤانیان بۆ کوردان گەلەک گرنگن، ژ بەر ڤێ یەکێ ژی دڤێت هەموو هێزێن سیاسی یێن کوردی ل تورکیا و باکورێ کوردستانێ پێکڤە کار بۆ ئاڤاکرنا هەڤپەیمانیەکا نوو بکەن، چونکی هەتا کورد ل تورکیا و باکورێ کوردستانێ ئێکگرتی و بهێز نەبن نەشێن بگەهنە مافێن خوە.

بایرام بۆزیەل سەرۆکێ گشتی یێ پارتا سوسیالیست یا کوردستانێ(PSK) راگەهاند، هەلبژارتنێن ٣١ ئادارا سالا ٢٠٢٤ یێن باژێرڤانیان ل تورکیا و باکورێ کوردستانێ گرنگیا خوە یا تایبەت بۆ کوردان هەیە، چونکی هەتا نها ژی زۆرداریا ل سەر گەلێ کورد ل تورکیا بەردەوامە و دانپێدان ب مافێن رەوا و سەرەکی یێن گەلێ کورد نەهاتیە کرن، ژ بەر ڤێ یەکێ ژی گەلەک گرنگە ژ بۆ ڤان هەلبژارتنان هەموو هێزێن کوردی هەست ب بەرپرسیاریا خوە یا دیرۆکی بکەن، ئاڤاکرنا هەڤپەیمانیەکا بهێز د ناڤبەرا هەموو هێزێن کوردی دا دێ بیتە ئەگەرێ دەستپێکرنا قۆناغەکا نوو د سیاسەتا کوردی ل تورکیا دا، ژ بەر ڤێ یەکێ وەکو پارتا سوسیالیست یا کوردستانێ ئەم داخواز ژ هەموو هێزێن دی یێن کوردستانی دکەین کار بۆ ئاڤاکرنا هەڤپەیمانیەکا نوو بکەن.
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، د چارچۆڤێ بدەستڤەئینانا مافێن رەوا و دیموکراتی یێن گەلێ کورد ل تورکیا دا دڤێت ئەم هەموو پێکڤە کار بکەین، دڤێت هەر دەلیڤەیەک هاتە پێش وەکو هێزێن کوردی ئەم مفایێ ژێ وەربگرین و کار بۆ خزمەتا خەلکێ خوە بکەین، راستە گەلەک ئاستەنگی هەنە و زۆرداریا ل سەر گەلێ کورد ژی بەردەوام دکەت، لێ دیسان ژی هندەک دەلیڤە هەنە و گۆت: (ئەم وەکو پارتا سوسیالیست هەلبژارتنێن ئادارا ٢٠٢٤ یێن باژێرڤانیان ل تورکیا و باکورێ کوردستان گەلەک گرنگ دبینین، کورد دشێن د چارچۆڤێ هەڤپەیمانیەکا نوو و بهێز دا پێکڤە کار بکەن، دڤێت ڤێجارێ هێزێن کوردستانی وەسا بکەن دا بشێن دەنگێ هەموو وەلاتیێن کورد ل تورکیا بدەستڤە بینن، ئەو یەک دێ کاریگەریەکا خوە یا مەزن ل سەر سیاسەتا تورکیا یا ل هەمبەر کوردان ژی کەت، ئانکۆ بهێزبوونا کوردان ل تورکیا دێ بیتە ئەگەرێ دەستپێکرنا قۆناغەکا نوو، ژ بەر ڤێ یەکێ ژی وەکو پارتا سوسیالیست یا کوردستانێ ئەم داخواز ژ هەموو هێزێن سیاسی یێن کوردی ل تورکیا دکەین بلا کار بۆ ئاڤاکرنا هەڤپەیمانیا کوردستانی بکەن).
هەژی ئاماژەپێدانێ یە، کو ل رۆژا ٣١ ئادارا ٢٠٢٤ دێ هەلبژارتنێن باژێرڤانیان ل تورکیا و باکورێ کوردستانێ هێنە کرن، هەر ژ نها ڤە هەموو پارتێن سیاسی ل تورکیا خوە بۆ ڤان هەلبژارتنان بەرهەڤ دکەن و بەرپرسێن هەدەپێ ژی دبێژن ئەو بەرهەڤن ژ بۆ باژێرێن مەزن یێن تورکیا دانوستاندنان ل گەل ئاکپارتیێ و پارتا کۆماری بکەن و هەر ئالیەک پشتەڤانیێ ل مافێن کوردان بکەت ئەو دشێن د هەلبژارتنان دا پشتەڤانیێ ل بەربژارێن وان بکەن.

سەرۆك مەسعود بارزانی ل سەلاحەددین پێشوازی ل خەمیس خەنجەر، سەرۆكێ هەڤپەیمانیا سیادە كر.
د دیدارەكێ باس ل دووماهی پێشهاتێن دەڤەرێ و ڕەوشا سیاسی یا ئیراقێ و پەیوەندیێن د ناڤبەرا هەرێما كوردستانێ و ئیراقا فیدرال هاتە كرن.

سەرۆك مەسعود بارزانی ل سەلاحەددین پێشزاڤی ل یان برێم، قونسلێ گشتیێ نوو یێ وەلاتێ فڕەنسا ل هەولێرێ كر.
د دیدارەكێ دا سەرۆك بارزانی ب هەلكەفتا دەستبكاربوونێ پیرۆزباهی ل یان بریم كر و هیڤیا سەركەفتنێ بۆ خواست
هەر د وێ دیدارێ دا باس ل دۆستایەتیا د ناڤبەرا گەلێ كوردستانێ و گەلێ فڕەنسا هاتە كرن و دوپاتی ل پێشڤەبرن و ب هێزكرنا پەیوەندیان د ناڤبەرا هەردو ئالیان دا هاتە كرن.

سەرۆكێ هەرێما كوردستانێ، نێچیرڤان بارزانی د پەیامەكێ دا سەرەخوەشی ل كەسوكارێن قوربانیێن هێرشا دیالا دكەت و دبێژیت» ب توندی وێ هێرشا تیرۆرستی شەمزار دكەین كو ب بۆمبەكا چاندی دەستدرێژی ل دەڤەرا عومرانیە ل قەزا شارەبان ل پارێزگەها دیالا هاتیە ئەنجامدان و بوویە ئەگەرێ شەهیدبوون و برینداربوونا چەندین وەلاتیان».
گوت ژی» ئەو هێرشێن تیرۆرستی، مەترسیێ ل سەر ئاسایش و سەقامگیریا وەلاتی دروست دكەن و وێ ڕاستیێ د سەلمینن كو تیرۆر هێشتا گەف و ئاستەنگەگا جدی یە و پێدڤیە ب هەموو هێز و شیانان و ب هاریكاریا و هەماهەنگیا زێدەتر یا لەشكرێ ئیراقێ و پێشمەرگەی و ب پشتەڤانیا هەڤپەیمانیا نێڤدەولەتی، بەهنگاریا وان ببین».

كۆپیتكا جیهانی یا 28 ل دۆر سەقای ل وەلاتێ ئیمارات دەست ب كارێن خوە كر كو ئێكە ژ مەزنترین دیدار و چالاكیێن سالانە یێن ڕێكخراوا نەتەوەیێن ئێكگرتی و
سەرۆكێ هەرێما كوردستانێ و سەرۆكێ حوكمەتا هەرێما كوردستانێ ل گەل سەرۆك و سەركردەیێن جیهانێ د وێ كۆپیتكا جیهانی دا د پشكدارن.
ل ڕۆژا ئەینیێ 1/12/2023 كۆپیتكا جیهانی یا سەقای ل دوبەی ل وەلاتێ ئیمارات ب بەرهەڤبوونا سەرۆك، شاه و سەركردەیێن جیهانێ دەستپێكر، كو هەر ئێك ژ نێچیرڤان بارزانی، سەرۆكێ هەرێما كوردستانێ و مەسرۆر بارزانی، سەرۆكێ حوكمەتا هەرێما كوردستانێ ل دووڤ داخوازنامەیەكا فەرمی یا وەلاتێ ئیماراتێ د پشكدارن.
هەر د چارچۆڤەیێ وێ هەلكەفتا نێڤدەولەتی كو یا هەڤدەمە ل گەل ڕۆژا نیشتمانی یا وەلاتێ ئیماراتێ، نێچیرڤان بارزانی، سەرۆكێ هەرێما كوردستانێ و مەسرۆر بارزانی، سەرۆكێ حوكمەتا هەرێما كوردستانێ ل باژێرێ دوبەی پشكداری د ڕێوڕەسمێ بەلاڤكرنا خەلاتێ زاید بۆ بەردەوامیێ (جائزە زاید للاستدامە‌)كر. هەروەسا د چارچۆڤەیێ وێ كۆپیتكێ دا سەرۆكێ هەرێمێ و سەرۆكێ حوكمەتا هەرێمێ چەندین دیدار ل گەل سەرۆكێن وەلاتان و سەركردەیێن جیهانێ ئەنجامدان.
سەرۆكێ هەرێمێ و سەرۆكێ حوكمەتا هەرێمێ ل گەل سەركردەیێن جیهانێ و كەسایەتیێن نێڤدەولەتی یێن پشكدار د كۆپیتكا جیهانێ یا سەقای دا دانوستاندن و دیدارێن گرنگ هەنە و دێ دوپاتیێ ل گرنگیا ڕۆلێ هەرێما كوردستانێ ل دەڤەرێ ود پرسێن جیهانی دا كەن، ژ وان ژی گوهۆڕینا سەقای.
سەرۆكێ هەرێما كوردستانێ د پۆستەكی دا ل تۆرا جڤاكی یا ئێكس (تویتەرا بەرێ) ڕاگەهاند» دلخوەشم كو بۆ ڕێوڕەسمێ ڤەكرنا كۆپیتكا جیهانی یا سەقای ل دوبەی مە، بزاڤێن ئێكگرتن و پێكڤەكاركرنا جیهانێ گەلەك د گرنگن بۆ پاراستنا هەساران».
پشتی گەهشتنا وی بۆ وەلاتێ ئیماراتێ، سەرۆكێ حوكمەتا هەرێما كوردستانێ ل پێگەهێ خوە ل سەر تۆرا جڤاكی یا ئێكس (تویتەرا بەرێ) ڕاگەهاند» خوەشحالم كو ل وەلاتێ ئیماراتێ مە بۆ پشكداریكرنێ د دانوستاندنان د كۆپیتكا جیهانی یا سەقای دا، پشتگوه هاڤێتنا مەترسیێن گوهۆڕینا سەقای بژاردە نینە و وەكو مللەتەك و پشكەك ژ دەڤەرێ پێدڤیە مە ڕۆلەكێ كارا هەبیت».

سەرۆكێ حوكمەتا هەرێما كوردستانێ ڕادگەهینیت: هەمەجۆركرنا ئابۆری و پشتەڤانیكرنا جۆتیاران، ئەز سۆزن كو دێ بجهئینین.
مەسرۆر بارزانی، سەرۆكێ حوكمەتا هەرێما كوردستانێ د پێگەهێ خوە یێ تایبەت دا ل سەر تۆرا جڤاكی یا فەیسبووكی بەلاڤكر» هەمەجۆركرنا ئابۆری و پشتەڤانیكرنا جۆتیاران و ب هێزكرنا كەرتێ تایبەت، ئەو سۆزن كو دێ بجهئینین».
هەروەسا دیاركر» هنگڤین پشكەكا گرنگ یا بەرهەمێ نیشتمانی یە، خوەشحالم كو ژ ئەڤرۆ هنگڤینێ ب تام و كوالێتیا بلند یێ كوردستانی ل بازارێن دەولەتا قەتەر یێ بەردەستە و زێدەتر ژ دو تەنێن هنگڤینی ب سەركەفتیانە ب ڕێكا ئەسمانی هاتنە هنارتن».
سەرۆكێ حوكمەتا هەرێما كوردستاانێ گوت ژی» زێدەتر ژ 200 هنگەڤانان د پشكدارن د هەوا هنارتنا هنگڤینی دا».
ئەوژی بەرچاڤكر» حوكمەتا هەرێما كوردستانێ كاری بۆ ڤەدیتنا بازارێ ناڤخوەیی ل هەرێما كوردستانێ و ئیراقێ دكەت و هەتا نوكە پتر ژ ئێك تەنا هنگڤینی هاتیە فرۆتن».
حوكمەتا هەرێما كوردستانێ بەلاڤكربوو: د چارچۆڤەیێ بجهئینانا كارنامەیا كابینەیا نەهێ یا حوكمەتا هەرێما كوردستانێ بۆ هەمەچۆكرنا ئابۆری و پشتەڤانیكرنا جۆتیاران و ب هێزكرنا كەرتێ تایبەت، دو تەنێن هنگڤینێ كوالێتیا بلند یێ كوردستانێ ب ڕێكا ئەسمانی گەهشتنە دەولەتا قەتەرێ.

د بەرسڤا داخۆیانیەكا سەرۆكێ ڕەوتێ حیكمە یێ نیشتمانی، پەیڤدارێ حوكمەتا هەرێما كوردستانێ پەیامەك بەلاڤكر و تێدا هاتیە: حوكمەتا ئیراقێ گەلەك ب نەدادپەروەرانە یا بەرهەڤ نینە مووچە و پشكا بودجەیا هەرێما كوردستانێ بهنێریت.
د پەیاما پەیڤدارێ حوكمەتا هەرێما كوردستانێ دا هاتیە» حوكمەتا هەرێما كوردستانێ هەموو ئەركێن سەر ملێ خوە بجهئیناینە و پێگیری ڕێككەفتنان بوو، بەلێ مە ئەڤ چەندە ژ ئالیێ بەرانبەر نەدیتیە».
دەقێ پەیاما پەیڤدارێ حوكمەتا هەرێما كوردستانێ:
بەرێز سەرۆكێ ڕەوتێ حیكمە یێ نیشتمانی پەیامەك ئاراستەی حوكمەتا هەرێما كوردستانێ كریە و داخواز دكەت حوكمەتا هەرێما كوردستانێ مووچەیێن مامۆستایان ب مەزێخیت.
ئەم ب تمامی د گەل وێ پەیامێ داینە بەلێ جەنابێ وی یێ ئاگەهدارە كو ئەو حوكمەتا هەرێمێ نینە مووچەیان نادەت، بەلكو حوكمەتا فیدرالی یە كو مووچەیێن مامۆستایان و هەموو فەرمانبەرێن هەرێما كوردستانێ ڕاگرتینە و ب شێوەیەكێ گەلەك نە دادپەروەرانە یا بەرهەڤ نینە مووچە و پشكا بودجەیا هەرێمێ ب هنێریت.
داخواز ژ بەڕێز سەید حەكیم دكەین ڕوو ل بەغدا بیت و پشتەڤانیێ ل دوماهی ئینان ب وێ نە دادپەروەریێ بكەت.
حوكمەتا هەرێما كوردستانێ هەموو ئەركێن سەر ملێ خوە بجهئیناینە و پێگیری ڕێككەففتنان بوو، بەلێ مە ئەڤ چەندە ژ ئالیێ بەرانبەر نەدیتیە.
دەمێ داهات ژی د دەستێ حوكمەتا هەرێما كوردستانێ دا، شایستەیێن هەموو فەرمانبەرێن خوە مەزاختینە، بەلێ پشتی هشككرنا ژێدەرێن داهاتێ هەرێمێ ژ ئالیێ بەغدا ڤە كێشە بۆ فەرمانبەران هاتە دروستكرن.
بەڕێز حەكیم وەكو چازان ل بۆری ڕۆلێ چاكخوازی گێرایە، هیڤیدارین د ئەڤێ پرسێ ژی دا داخوازێ ژ هەموو ئالیێن ئیراقێ بكەت د بێ دەنگ نەبن ل وێ ستەما كو دەرحەقێ فەرمانبەرێن هەرێما كوردستانێ دهێتە كرن.

سەرۆكێ حوكمەتا هەرێما كوردستانێ، مەسرۆر بارزانی دوهی سێشەمبی 28/11/2023 د ڕێوڕەسمێ ڤەكرنا كارگەها ئاسنی (ڤان ستیل) دا ڕاگەهاند: هیڤیدارین ڕەوشا كوردستانێ و ئیراقێ و دەڤەرێ ئاران و سەقامگیر بیت و كێشەیێن د ناڤبەرا هەرێما كوردستانێ و حوكمەتا فیدرالی دا ب شێوەیەكێ بنەڕەتی چارەسەرببن بۆ وێ چەندێ ئێدی درێژیێ ب كارنامەیا خوە بدەین، د ئاڤەدانكرنێ دا و دروستكرنا ژێرخانەیا ئابۆری.

دەقێ پەیڤا سەرۆكێ حوكمەتا هەرێما كوردستانێ:

جهێ خوەشحالیێ یە ئەڤرۆ ل ڤێرێ مە، پڕۆژەیەكێ دی یێ گرنگ ل هەرێما كوردستانێ ڤەدكەین، دەستخوەشیێ ل كۆمپانیا جێبەجێكار، گرۆپێ گەلیاوە دكەم بۆ ئەنجامدانا ڤی كارێ گرنگ كو ب ستانداردەكێ جیهانی و بكارئینانا پێشكەفتیترین تەكنەلۆژیا هاتیە دروستكرن.
ڤەكرنا ڤێ كارگەهێ دێ ڕۆلەكێ گرنگ هەبیت بۆ پێشڤەبرنا كەرتێ پیشەسازی ل كوردستانێ و پەیداكرنا هزاران دەلیڤەیێن كاری بۆ گەنجێن كوردستانێ، جهێ دەستخوەشیێ كو كارگەهێ پێگیریبوونا خوە ب بەرچاڤ وەرگرنا بنەمایێن پاراستنا ژێنگەهێ دەربڕیە، ئەڤە ژی ب ڕێكا بكارئینانا شێواز و تەكنیكەكا پێشكەفتی كو دۆستا ژینگەهێ یە.
حوكمەتا هەرێما كوردستانێ ل چەند سالێن بۆری ب هاریكاری ل گەل كەرتێ تایبەت، پلان و بەرنامەیێن گرنگ هەبوون، بۆ گرنگیدان ب كەرتێ پیشەسازی، ب تایبەت د بوارێن پیشەسازیا خۆراكی و پترۆكیمیا و پیشەسازیا كانزایان و دابینكرنا مادەیێ خام دا بۆ پیشەسازیا بچووك و ناڤەندی. هەروەسا دروستكرنا چەند دەڤەرێن پیشەسازی ل باژێرێن هەرێما كوردستانێ، كو بەری چەند ڕۆژان مە بەرێ بنیاتێ دەڤەرەكا پیشەسازی ل سنۆرێ ئیدارەیا سەربخوە یا زاخۆ دانا، ڤەكرنا ئەڤێ كارگەهێ ژی پشكەكە ژ هاریكاری و هەماهەنگیا حوكمەتێ ل گەل كەرتێ تایبەت، ژ پێخەمەت زێدەتر پێشئێخستنا ژێرخانەیا پیشەسازی ل هەرێما كوردستانێ.
سەرەرای چەندین گرفتان ل سالێن بۆری كو چەندین جاران مە ئاماژە پێكریە، د ڤی دەمی دا مە چەندین پڕۆژەیێن مەزن ل هەرێما كوردستانێ دەستپێكرینە، د بوار و كەرتێن جۆراوجۆر دا، كە پتریا وان نوكە یێن كەفتینە كاری و د خزمەتا خەلكێ كوردستانێ دانە، ئارمانجا مە ئەوە ژێرخانەیەكا ئابۆری ل هەرێما كوردستانێ دروست بكەین بۆ وێ چەندێ ژیانا خەلكێ كوردستانێ باشتر بكەین و نڤشێ بهێت ژی بشێت ل سەر پێ خوە ڕاوەستیت.
هیڤیدارین ڕەوشا كوردستانێ و ئیراقێ و دەڤەرێ ئارام و سەقامگیر بیت و كێشەیێن د ناڤبەرا هەرێما كوردستانێ و حوكمەتا فیدرالی ب شێوەیەكێ بنەڕەتی چارەسەر ببن، بۆ وێ چەندێ درێژیێ ب كارنانامەیا خوە بدەین، د ئاڤەدانكرنێ و دروستكرنا ژێرخانەیا ئابۆری دا.
كوردستان و ئیراق ب گشتی ژ ئەگەرێ شەڕێن ئێك ل دووڤ ئێك دا و ژ ئەگەرێ خراب بڕێڤەبرنا دەستهەلاتێ، د ڕەوشەكا دژوار دا بوو و خەلكێ وێ د نەئارامیێ و هەژاریێ و وێرانیێ دا ژیانیە، ئەڤرۆ دەمێ وێ چەندێ یە وانەیان ژ شاشیێن بۆری وەربگرین و هاریكاری و پشتەڤانیا هەڤدو بكەین ژ پێخەمەت خزمەتكرنا وەلاتیێن مە و ئاڤەدانكرنا وەلاتێ مە كو پێدڤی ب چەندین سالێن كاركرنا بەردەوام هەیە، بۆ وێ چەندێ بگەهینە ئاستێ وەلاتێن پێشكەفتی، ئەڤە ژی تنێ ب ئاشتیێ و ئارامیێ و چارەسەركرنا بنەڕەتی یا كێشەیان دێ بدەستڤەهێت، هەكە حەز و خواستا ڕاستەقینە بۆ چارەسەریێ هەبیت، بێگومان ڕێكێن چارەسەریێ گەلەكن.
ل ڤێرە دخوازم بۆ هەوە ڕابگەهینم كو شاندێ مە بۆ چارەسەركرنا كۆمەكا ئەوان كێشەیێن هێشتا ل گەل حوكمەتا فیدرالی ماین، ل بەغدایە بۆ چارەسەركرنا كێشەیان ب تایبەتی بابەتێ مووچەی و بودجەی، كو بۆ بابەتێ مووچەی و گیرۆبوونا مووچەیێن خەلكێ كوردستانێ چارەیەكێ ببینن و بگەهنە ئەنجامەكێ ئەرێنی. شاندێ حوكمەتا هەرێمێ دانوستاندنێن باش هەبوون و دێ درێژیێ ب وان دانوستاندنان دەت ژبۆ وێ چەندێ ئێدی خەلكێ هەرێما كوردستانێ باجا وان شاشیان نەدەت كو مخابن ب شێوەیەكێ نەگونجای ڕەفتار ل گەل فەرمانبەرێن هەرێما كوردستانێ هاتیە كرن. ئەڤە بهێتە چارەسەركرن، ژ ئالیەكێ دی ڤە هەتا بۆ بابەتێ پەترۆلێ و غازێ ژی كو مە پێدڤی ب داڕێشتنا قانوونەكا فیدرالی یا پێشكەفتی ل سەر بنەمایێ دەستووری هەیە كو ئەوژی بشێین جارەكادی بەرهەمئینان هنارتنا پەترۆلێ دەستپێبكەت. ئەڤە ژی دێ بیتە دەستكەفت نەتنێ بۆ خەلكێ هەرێما كوردستانێ، بەلكو بۆ هەموو ئیراقێ.
هیڤیدارین ب تێكگەهشتنەكا هەپڤشك گەلەك تشتێن باشتر بكەین، ب دیتنا من ئەوا ل بەراهیا مە و ئەوا هەڤپشك د ناڤبەرا مە دا گەلەك زێدەترە ژ ئەوان كێشە و گرفتێن هەین، تنێ پێدڤیەئەم هەموو هزر د وێ چەندێ دا بكەین كو بەرژەوەندیا وەلاتێ مە و باشتركرنا ژیانا خەلكێ مە بكەینە سەرێ لیستا بەرنامەیێ كارێن خوە، هیڤیدارم ل گەل بەرێز محەمەد شیاع سۆدانی و حوكمەتا فیدرالی و هەموو وەزیرێن ئەڤێ كابینەیێ كار و هەماهەنگیا زێدەتر پێكڤە بكەین و وەلاتێ خوە بەر ب قۆناغەكا باشتر ببەین.