سەرۆكێ هەرێما كوردستانێ، نێچیرڤان بارزانی پێشوازی ل ماوریتزیۆ گرێگانتی، بالیۆزێ ئیتالیا ل ئیراقێ كر. د دیدارەكێ دا سەرۆكێ هەرێمێ سەرەرای سوپاسیا پشتەڤانیا ئیتالیا بۆ ئیراقێ و هەرێمێ گوت» سەقایەكێ ئەرێنی د ناڤبەرا بەغدا و هەولێرێ دا بۆ چارەسەریا كێشەیان دروستبوویە و د خوەشحالین ب پێنگاڤێن نوكە یێن حوكمەتا فیدرالی و جهێ ئومێدێ نە».
دیاركر ژی»بەغدا هەڤپشكا سەرەكی یا هەرێما كوردستانێ یە و ژبلی چارەسەركرنا كێشەیان، هیچ ڕێكەكا دی ل بەردەم حوكمەتا هەرێما كوردستانێ و حوكمەتا ئیراقێ دا نینە». بالیۆزێ ئیتالیا ل ئیراقێ ژی دیاركر» چارەسەركرنا كێشەیێن بەغدا و هەولێرێ دێ بیتە ئەگەر جڤاكێ نێڤدەولەتی زێدەتر بەر ب ئیراقێ و هەرێما كوردستانێ ڤە بهێت و بوارێ وەبەرئێنانا بیانی ل ئیراقێ و هەرێمێ زێدەتر ببیت».

سەرۆكێ هەرێما كوردستانێ، نێچیرڤان بارزانی، ل گەل شاندەكێ بلند یێ ئەمریكی ب سەرۆكایەتیا تێری وولف هاریكارێ تایبەت یێ سەرۆكێ ئەمریكا و ڕێڤەبەرێ بلند بۆ ڕۆژهەلاتا ناڤین و باكوورێ ئەفریكا ل جڤاتا ئاسایشا نیشتمانی .د كۆمبوونەكێ ڕەوشا سیاسی و ئابۆری یا ئیراقێ و هەرێما كوردستانێ هاتە باسكرن و بیروڕا هاتنە ئالۆگوركرن سەبارەت پەیوەندیێن بەغدا و هەولێرێ. شاندێ بلند یێ ئەمریكی بەردەوامیا پشتەڤانی و هاریكاریا ئەمریكا بۆ ئیراقێ و هەرێما كوردستانێ دووپاتكر، هەروەسا ئێكڕێزیا هێزێن سیاسی یێن كوردستانی ب تایبەتی پارتی و ئێكەتی ب پێدڤی زانی بۆ دەربازكرنا ئاستەنگێن نوكە ل ئیراقێ و هەرێما كوردستانێ. هەروەسا هەردو ئالیان دووپاتی ل پشتەڤانیا محەمەد شیاع سۆدانی و كارنامەیا حوكمەتا وی كر.

ئەڤرۆ

پشتی بیڤەلەرزا ل باژێرێ عەفرینێ دەزگەهێ خێرخوازیێ بارزانی ل وی باژێری ب هەمی رەنگەکێ خزمەتا وەلاتیان دکەت، نها ژی د چارچۆڤێ هەوا پاقژکرنا باژێری و هەروەسا چاندنا داران ژی هاریکاریا خەلکی دکەن و ئەو یەک ژی بوویە جهێ دلخۆشیا وەلاتیێن عەفرینێ.

پشتی بڤەلەرزا ل باژێرێ عەفرینێ یێ رۆژئاڤایێ کوردستانێ، دەزگەهێ خێرخوازیێ بارزانی وەکو ئێکەم دەزگەهێ خێرخوازی هاریکاریا خەلکێ لێقەومی کر و نها ژی د چارچۆڤێ کارێ ئاڤەندانیێ و خزمەتکرنا خەلکی ل وی باژێری، دەزگەهێ خێرخوازیێ بارزانی رۆلەکێ گەلەک گرنگ دگێریت، کارمەندێن دەزگەهێ خێرخوازیێ بارزانی ل گەل خەلکی دەست ب پاقژکرنا کۆلانان دکەن، داران دچینن و بەردەوام ژی هاریکاریێن مرۆڤی پێشکێشی خەلکی دکەن.
د ڤێ دەربارێ دا محەمەد عەفرینی چالاکڤانێ مافێن مرۆڤی راگەهاند، دەزگەهێ خێرخوازیێ بارزانی ئێکەم دەزگەهێ خێرخوازیێ بوو هاریکاری گەهاندنە باژێرێ عەفرینێ، نها ژی نڤیسینگەها دەزگەهێ خێرخوازیێ بارزانی ل عەفرینێ هاتیە ڤەکرن و بەردەوام هاریکاریێن مرۆڤی پێشکێشی وەلاتیان دهێنە کرن، براستی ژی ئەو یەک کارەک گەلەک مەزنە، وەکو وەلاتیێن عەفرینێ ئەم سوپاسیا سەرۆک بارزانی، دەزگەهێ خێرخوازیێ بارزانی و هەرێما کوردستانێ دکەین، کو د رەوشەکا وەسا دژوار دا هاریکاریا مە کرن، ئەو یەک جهێ شانازیێ یە.
ناڤهاتی ئەو یەک ژی دیار کر، بەری نها ژی سەرۆک بارزانی و هەرێما کوردستانێ گەلەک هاریکاریا رۆژئاڤایێ کوردستانێ کرینە، ئەم ژبیر ناکەین کا چاوا پێشمەرگێن کوردستانێ شیان ب رێیا تورکیا دەربازی باژێرێ کۆبانێ ببن و وەسا باژێر ژ دەستێ رێکخستنا تیرۆرستی یا داعشێ هاتە رزگار کرن و گۆت: (براستی ژی سەرۆک بارزانی و هەرێما کوردستانێ هەتا نها گەلەک هاریکاریا رۆژئاڤایێ کوردستانێ کرینە، لێ مخابن نها ژ بەر گەلەک ئەگەران رەوشا رۆژئاڤایێ کوردستانێ باش نینە، ناکۆکی د ناڤبەرا هێزێن کوردی دا هەنە، ئەم هێڤیدارین کو د چارچۆڤێ بزاڤێن بەری نها یێن سەرۆک بارزانی دا جارەکا دی هەر دو جڤاتێن کوردی یێن رۆژئاڤایێ کوردستانێ دەست ب دانوستاندنان بکەن، چونکی نها پتر ژ هەر دەمەکێ پێدڤیا مە وەکو کوردێن رۆژئاڤایێ کوردستانێ ب ئێکگرتنێ هەیە، هەکە کورد ئێکگرتی بن دێ شێن گەلەک کارێن مەزن بکەن، مخابن نها ژ بەر ناکۆکیێن د ناڤبەرا هێزێن کوردی دا پێگەهێ کوردان ژی ل سووریێ لاواز بوویە).
هەژی ئاماژەپێدانێ یە، کو پشتی بیڤەلەرزا ل باژێرێ عەفرینێ یێ رۆژئاڤایێ کوردستانێ دەزگەهێ خێرخوازیێ بارزانی وەکو ئێکەم دەزگەهێ خێرخوازی شیا هاریکاریێن مرۆڤی پێشکێشی خەلکێ لێقەومی بکەت، هەروەسا ژ بۆ هندێ دەزگەهێ خێرخوازی بشێت بەردەوام هاریکاریا خەلکی بکەت نڤیسینگەهەکا خۆ ل باژێرێ عەفرینێ ڤەکریە و نها ئەو نڤیسینگەه کارێن باش دکەت و ئەو یەک ژی بوویە جهێ دلخۆشیا هەموو وەلاتیان ل عەفرینێ، چونکی ژ بەر رەوشا خراب یا وی باژێری پێدڤیا خەلکی ب هاریکاریان هەیە.

ئەڤرۆ

ل 14 ئادارا 1903 بارزانیێ نەمر سەركردێ بزاڤا ڕزگاریخوازا كوردستانێ هاتە ژیانێ و پشتی زێدەتر ژ 50 سالێن ژیانا خوە بۆ خەباتێ وڕزگاریا كوردستانێ و ئازادیا گەلێ خوە تەرخانكرین، پشتی وەغەركرنا وی ژی دناڤ گەلێ خوە دا و ل دەف شۆڕەشگێر و ئازادیخوازێن جیهانێ ب نەمری مایە.
ڕۆژا ژ دایكبوونا بارزانیێ نەمر د دیرۆكا كوردستانێ دا ڕۆژەكا تایبەتە و هەموو سالان خەلكێ كوردستانێ ب جوداهیا بیر و بۆچوون و نەتەوە و ئاینان ڤە چەندین ڕێورەسمێن جۆرا و جۆر ئەنجام ددەن.
مەلا مستەفا بارزانی ئەندامەكێ مالباتەكێ بوو كو د دیرۆكێ دا پێگە و جهەكێ ئایینی و نیشتمانی یێ مەزن هەبوو، دەمێ بارزانیێ نەمر ژ دایكبووی چاڤ ب ئازار و ژانێن مللەتێ خوە و ل ژیەكێ زوو ئەو دەمێ سەركردەكێ وەكو شێخ عەبدولسەلامێ بارزانی سەركردایەتیا بزاڤا ڕزگاریخوازا كوردی دكر، مستەفا بارزانی ل گەل هەژمارەكا ئەندامێن مالباتا خوە هاتە زیندانكرن.
دەمێ شێخ ئەحمەدێ بارزانی ژی سەركردایەتی وەرگرتی و ژ پێخەمەتی ئازادیا كوردستانێ درێژی ب خەباتێ دای، ل بن سەركردایەتیا مستەفا بارزانی دەستەیەكا پێشمەرگەی بۆ كوردستانا توركیا هنارتن و ل وێرێ بارزانیێ نەمر ب مەبەستا هەماهەنگیێ چاڤ ب شێخ عەبدولقادرێ نەهرێ و شێخ سەعیدێ پیران كەفت، هەروەسا ل دەمێ شێخ مەحموودێ حەفید ل گۆلانا 1919 ل دەڤەرا سلێمانیێ شۆڕەش دەستپێكری، مستەفا بارزانیێ نەمر سەركردایەتیا وان پێشمەرگەیان دكر كو ب مەرەما هاریكاریا شێخ مەحموودێ بەر ب سلێمانیێ ڤە چووین.
پاشی ل شۆڕەشێن سالێن 1932 بارزانیێ نەمر ڕۆلەكێ فەرماندەیێ یێ دیار هەبوو و پاشی سەركردایەتیا شۆڕەشێن سالێن 1943 و 1945 كر، ل كۆمارا مهابادێ ژی ڕۆلەكێ مەزن هەبوو دەمێ ب مەرەما پشتەڤانیكرنێ ل كۆمارا دیموكرات ل مهابادێ پێشمەرگەیێن شۆڕەشا سالا 1954 ل كوردستانا ئیراقێ برنە كوردستانا ئیرانێ.
بارزانیێ نەمر سەركردێ ئێك ژ كاروانێن مەزن بوو كو ل دیرۆكا خەباتا ئازادیخوازانە دا ب كاروانێ دیرۆكی یێ دەربازبوونا ڕووبارێ ئاراس یێ ناڤدارە، پشتی دەربازبوونێ ژ ڕووبارێ ئاراس و گەهشتن ب ئێكەتیا سۆڤیەتی یا جاران، بارزانیێ نەمر ب هەڤالینیا 500 پێشمەرگەیان بۆ دەمێ زێدەتر ژ 11 سالان ل ئێكەتیا سۆڤیەت ییا جاران مابوو.
بارزانیێ نەمر ل 11 ئیلۆنا 1961 مەزنترین شۆڕەش ل كوردستانا ئیراقێ ل چەرخێ بیستێ ئەنجامدا و شیا ڕژێما بەعس نەچار بكەت دانپێدانێ ب مافێن ڕەوا یێن گەلێ كوردستانێ بكەت و ب وێ چەندێ ژی بزاڤا ڕزگاریخوازا كوردستانێ بەر ب قۆناغەكا نوو بر، د دیرۆكا كوردستانێ و دەڤەرێ و جیهانێ ژی دا بارزانیێ نەمر كاریگەریەكا مەزن د دروستكرنا دیرۆكا سیاسی یا ئیراقێ و دەڤەرێ وبگرە جیهانێ ژی دا هەبوو، لەوما ناڤێ وی ب زیندی و ڕێباز و خەبات و ژیانا وی ب نەمری دێ مینیت

ئەڤرۆ

سەرۆك وەزیرێن ئیراقێ، محەمەد شیاع سودانی ب ڕێكا فرۆكخانەیا هەولێرێ یا نێڤدەولەتی گەهشتە هەرێما كوردستانێ و ژئالیێ مەسرور بارزانی، سەرۆكێ حوكمەتا هەرێما كوردستانێ پێشوازی لێ هاتە كرن.
دوهی سێشەمبی 14/3/2023، محەمەد شیاع سودانی، سەرۆك وەزیرێن ئیراقێ گەهشتە هەرێما كوردستانێ و ژ ئالیێ مەسرور بارزانی، سەرۆكێ حوكمەتا هەرێما كوردستانێ، ل فرۆكخانەیا هەولێرێ یا نێڤدەولەتی پێشوازی لێ هاتە كرن.
مەسرور بارزانی، سەرۆكێ حوكمەتا هەرێما كوردستانێ د پێگەهێ خوە یێ تایبەت دا ل سەر تۆرا جڤاكی یا تویتەری ب خێرهاتنا محەمەد شیاع سودانی سەرۆك وەزیرێن ئیراقێ كر د سەرەدانا وی دا بۆ هەرێما كوردستانێ و گوت ژی» ب خێر هاتنا محەمەد شیاع سودانی دكەم د ئێكەمین سەرەدانا وی یا فەرمی دا بۆ كوردستانی» هەروەسا گوت» نیازپاكیا سودانی یا گرنگە بۆ زڤراندنا باوەریێ. پەسەندكرنا پرۆژێ قانوونا بودجەیا فیدرالی و پێشكەفتن د بابەتێ وزێ دا بناغەیە بۆ پەیوەندیەكا نوو و ب هێز» و دیاركر ژی» بلا ل سەر ڤی بنەمای، كار بۆ چارەسەركرنا كێشەیان بكەین».
پشتی كۆمبوونێ ل گەل بەرپرسێن بلند یێن هەرێما كوردستانێ ل هەولێرێ، سەرۆك وەزیرێن ئیراقێ ب مەرەما پشكداریكرنێ د دیدارا زانكۆیا ئەمریكی دا ل سلێمانیێ، دێ سەرەدانا باژێرێ سلێمانیێ كەت.

ئەڤرۆ

مەكتەبا ڕێكخستنا پارێزگەها دهۆكێ یا پارتی دیموكراتی كوردستان ب هەلكەفتا 32 سالیا سەرهلدانا دهۆكێ پەیامەك بەلاڤكر و ئەڤە دەقێ وێ یە:
بەری ”٣٢”سالان و ل هـەیڤا ئادارێ جەماوەرێ دلسوز و فیداكارێ دەڤەرا بەهـدینان مل ب ملێن برایێن خوە پێشمەرگەهـێن قەهـرەمان دەست ب سەرهـەلدانێ كر و ل چەند ڕۆژەكان دا كۆچك و دیوانێن زۆلم و زۆریێ هـەرفاندن و تیڕۆشكێن ئازادیێ هـەلاتن سەرهـەلدانا دەڤەرا بەهـدینان بەرسڤەكا توند بوو بۆ دوژمن و داگیركەرێن كوردستانێ بەرامبەر كریارێن وان یێن هـوڤایەتی ل كوشتنێ و‌ئەنفاڵكرنێ‌ و كێمیابارانكرنێ‌ و دەربەدەركرنێ‌ و وێرانكرنا باژێر و گوندان، سەرهـەڵدانێ ئەڤە خۆیا كر كو ئیرادا مللەتان ب هێزترە ژ ئاگر و ئاسنێن دوژمنان ، مللەتێ داخوازا ئازادیێ ژی بكەت بێگومان دێ گەردەنا ڕۆژا ئازادیێ ماچی كەت.

ئەڤرۆ

دوهی سێشەمبی 14/3/2023 مەسرور بارزانی، سەرۆكێ حوكمەتا هەرێما كوردستانێ و جێسیكا سڤاردسترۆم، بالیۆزا وەلاتێ سوید ل ئیراقێ كۆمبوون.
د دیدارەكێ دا مەسرور بارزانی و بالیۆزا سوید ل ئیراقێ، ڕەوشا گشتی یا ئیراقێ و پێشڤەبرنا پەیوەندیێن هەرێما كوردستانێ و سوید هاتە باسكرن.
تەوەرەكێ كۆمبوونێ، یێ تایبەت بوو ب گرنگیا ئەنجامدانا هەلبژارتنێن پەرلەمانێ كوردستانێ د دەمەكێ گونجای دا ل ئە ڤ سالە. د ڤی بیاڤی دا مەسرور بارزانی بەرهەڤیا حوكمەتا هەرێما كوردستانێ بۆ هەر ئاسانكاریی و هەماهەنگیەكێ بۆ ئەنجامدانا پرۆسەیا هەلبژارتنان دووپات كر.
ئاماژە ب وێ چەندێ ژی هاتە كرن، كو چاكسازیێن كابینەیا نەهێ یا حوكمەتا هەرێمێ و چارەسەركرنا كێشەیێن هەرێما كوردستانێ و حوكمەتا فیدرالی ل سەر بنەمایێ دەستووری و بجهئینانا ڕێككەفتنا شنگالێ و ئاساییكرنا ڕەوشا دەڤەرێ و دەلیڤە خوەشكرن بۆ ڤەگەراندنا ئاوارەیان بۆ جهێن وان، پشكەكا دی یا دانوستاندنێن دیدارێ بوون.

ئەڤرۆ

سكرتێرێ جڤاتا وەزیرێن هەرێما كوردستانێ ڕاگەهاند، جڤاتا وەزیرێن ئیراقێ ڕێكارێن فیدرالی یێن گرێدای ب پارێزگەهبوونا هەلەبجە پەسەندر. پەرلەمانتارەك ژی دبێژیت، پارێزگەهبوونا هەلەبجە دێ بیتە ئەگەرێ تەرخانكرنا بودجەیا تایبەت بۆ وێ پارێزگەهێ.
ئامانج رەحیم، سكرتێرێ جڤاتا وەزیرێن هەرێما كوردستانێ د داخۆیانیەكا ڕۆژنامەڤانیدا گوت» جڤاتا وەزیرێن ئیراقێ د كۆمبوونا ڕۆژا 13/3/2023 بڕیار دا هەلەبجە ببیتە پارێزگەها هەژمار 19 ل ئیراقێ».
ژ ئالیێ خوەڤە وەزارەتا پلاندانانا ئیراقێ ڕاگەهاند كو ڕێكارێن پارێزگەهبوونا هەلەبجە یێن تمام بووین و هاتینە هنارتن بۆ جڤاتا وەزیران.
ل سالا 2013 نێچیرڤان بارزانی، كو وی دەمی سەرۆكێ حوكمەتا هەرێما كوردستانێ بوو، ڕەشنڤیسێ قانوونا ب پارێزگەهبوونا هەلەبجە ڕادەستی حوكمەتا ئیراقێ كربوو، كو نوری مالكی سەرۆكایەتیا وێ دكر.
ل دەستپێكا ئەڤ سالە، محەمەد شیاع سودانی، سەرۆك وەزیرێن ئیراقێ د داخۆیانیەكا ڕۆژنامەڤانیدا ڕاگەهاندبوو» حوكمەت یا ڕژدە ب پشتبەستنێ ب بڕیارا مامەلەكرنێ ل گەل هەلەبجە وەكو پارێزگەهەكا ئیراقێ، چونكە هەلەبجە هەژی گەلەك كارایە بۆ بكەین، ئەركە ل سەر مە پشتەڤانیێ لێ بكەین».

ئەڤرۆ

شیرەتكارێ دارایی و ئابۆری یێ سەرۆك وەزیرێن ئیراقێ ڕاگەهاند، بەهرا هەرێما كوردستانێ ژ پرۆژێ قانوونا بودجەیا گشتی یا ئیراقێ هاتیە گرەنتیكرن و سەرۆك وەزیرێن یێ ڕژدە ل سەر و گوت ژی، قەیرانا وزێ ل جیهانی هەیە، بەلێ ئەوا بۆ ئیراقێ باش هنارتنا وزێ یە.
مەزهەر محەمەد سالح، شیرەتكارێ دارایی و ئابۆری یێ سەرۆك وەیزرێن ئیراقێ گوت» چاوان سەرۆك وەزیرێن ئیراقێ یێ ڕژدە ل سەر ڤەژاندنا ئیراقێ، وەسا یێ ڕژدە ل سەر بەهرا هەرێما كوردستانێ ژ بودجەی، كو هاتیە گرەنتیكرن».
ل ڕۆژا 13/3/2023 جڤاتا وەزیرێن ئیراقێ پڕۆژەیێ قانوونا بودجەیا گشتی یا ئیراقێ بۆ سالێن 2023 و 2024 و 2025 پەسەندكر، كو بەهرا هەرێما كوردستانێ د هەر سالەكێ دا زێدەتر ژ 24 ترلیۆن دینارایە.
مەزهەر محەممد سالح خویاكر» بۆ جارا ئێكێ یە گوهۆڕینەكا ژ وی جۆری د پرسا داراییا ئیراقێ دا بهێتە كرن، كو پلانا دارایی بۆ سێ سالان بیت» هەروەسا ئاماژەكر» سالانە بودجە د قانوونا كارگێری دارایی دا هاتیە جهگیركرن، بەلێ ئەو ڕێگر نینە كو بودجا 2023 ب شێوازەكێ جودا بهێتە دەركرن و هەرسێ بودجەیان دێ پەیوەندی پێكڤە هەبیت» .
شیرەتكارێ سەرۆك وەزیرێن ئیراقێ، هۆكارێ دەركرنا ئێك پڕۆژە قانوونا بودجەی بۆ سێ سالان ڤەگەراند بۆ پەسەند نەكرنا قانوونا بودجەی بۆ دەمێ چەند سالان و گوت» ئارمانج زێدەتر پڕۆژەیێن وەبەرئێنانێ نە، بۆ وێ چەندێ دشیاندا بیت مەزاختی بۆ وان پڕۆژەیان بهێنە دابینكرن».
هەروەسا گوت» سندووقا ئاڤەدانكرنا ئیراقێ گرنگترین خالە د پڕۆژێ قانوونا بودجەیا گشتی دا، ب تایبەتی بۆ پڕۆژەیێن وەبەرئێنانێ كو دەلیڤێ ب حوكمەتێ ددەت مەزاختیێن وان پڕۆژەیان ب ڕێكا وی سندووقێ دابین بكەت» .

ئەڤرۆ

سیاسەتمەدارەکێ کورد ل تورکیا دیار دکەت هەلوەستێ توند یێ ئەردۆغانی ل هەمبەر کوردان ناهێتە گوهۆڕین و هەتا نها هەڤپەیمانیا مللەت ژی چو پرۆژە بۆ چارەسەرکرنا پرسا کوردی پێشکێش نەکرینە، هەکە دەنگێ کوردان نەهێتە پارچەکرن کورد دشێن دەستهەلاتا بهێت یا تورکیا دیار بکەن.

سەدات یوردتاش سیاسەتمەدارێ کورد ل تورکیا راگەهاند نها رەوشا تورکیا گەلەک ئالۆزە، چونکی پشتی چەین سالان نها ئۆپۆزسیۆنەکا بهێز ل دژی ئاکپارتیێ دروست بوویە، رۆژانە ژی ل تورکیا راپرسی دهێنە کرن، ل گۆر ئەنجامێن پڕانیا راپرسیان ژی ڤێجارێ ئەردۆغان نەشێت ببیتە سەرۆک کۆمارێ تورکیا، لێ د سیاسەتێ دا هەر تشت دشێت روی بدەت، نها ئەردۆغان و هەڤالێن وی ب هەموو رەنگەکێ کار بۆ هندێ دکەن دا بشێن جارەکا دی د هەلبژارتنان دا سەرکەڤن و گۆت: (ئەز باوەر ناکەم هەلوەستێ توند یێ ئەردۆغانی و هەڤپەیمانیا جمهور ل هەمبەر کوردان بهێتە گوهۆڕین، لێ د هەمان دەمی دا هەتا نها ئۆپۆزسیۆنا تورکیا ژی چو پرۆژەیەک بۆ چارەسەرکرنا پرسا کوردی پێشکێش نەکریە، رەوشا کوردان ل تورکیا نها گەلەک ئالۆزە، چونکی هەدەپێ ژی هەتا نها چو بەربژار دیار نەکرینە، کوردان جارێ بریارا خۆ یا دویماهیکێ نەداینە، ژ بەر هندێ ژی دەستهەلات و ئۆپۆزسیۆنا تورکیا نها چاڤەرێی هندێ نە دا بزانن کا دێ هەلوەستێ کوردان چ بیت، بێگومان دەنگێ کوردان ل تورکیا کاریگەرە، کورد پشتەڤانیێ ل کیژ هەڤپەیمانیەکێ بکەن دێ ئەو سەرکەڤیت، ژ بەر هندێ ژی ئەز دبێژم هەکە کورد ئێکدەنگ بن، کورد دێ دەستهەلاتا بهێت یا تورکیا دیار کەن، دەنگێ کوردان گەلەک گرنگە، لێ مخابن هەتا نها دیار نینە کا دێ کورد چ کەن، چونکی د ناڤ کوردان دا پارچەبوونەک هەیە و هەتا نها دیار نینە دێ کورد دەنگێ خۆ دەنە کیژ بەربژاری، پارچەبوونا دەنگێ کوردان بێگومان یا باش نابیت).
ناڤهاتی راگەهاند نها پڕانیا کوردان ل تورکیا و باکورێ کوردستانێ ژ ئاکپارتیێ توورە نە، چونکی ئەردۆغانی د دەمێ بیست سالێن بۆری دا گەلەک سۆز دانە کوردان، لێ سۆزێن خۆ بجه نەئینان، ب تایبەتی ژی قۆناغا ئاشتیێ، چونکی کوردان باوەریەکا مەزن ب ئەردۆغانی هەبوو، د چەندین هەلبژارتنێن بۆری دا کوردان دەنگێن خۆ دانە ئاکپارتیێ، لێ ئاکپارتیێ چ نەکر و گۆت: (ئەز پێشبینی دکەم ڤێجارێ رێژەکا مەزن ژ کوردان ل تورکیا دەنگێن خۆ بدەنە هەڤپەیمانیا مللەت، د هەلبژارتنێن هەری دویماهیێ یێ باژێرڤانیان ل تورکیا دا ژی، ژ بەر دەنگێ کوردان ل چەندین باژێرێن مەزن یێن تورکیا ئاکپارتی تووشی شکەستنەکا مەزن هات، نها کلچدار ئوغلۆ و هەڤالێن وی دخوازن هەمان تشتی ل هەلبژارتنێن بهێت ژی دوبارە بکەن، وان دەنگێ کوردان دڤێت، ژ بەر هندێ ژی ئەز دبێژم دەنگێ کوردان دێ بیتە ئەگەرێ گوهۆڕینا دەستهەلاتێ و دێ کورد دەستهەلاتا بهێت یا تورکیا دیار کەن).