ئەڤرۆ

شیرەتكارێ دارایی و ئابۆری یێ سەرۆك وەزیرێن ئیراقێ ڕاگەهاند، بەهرا هەرێما كوردستانێ ژ پرۆژێ قانوونا بودجەیا گشتی یا ئیراقێ هاتیە گرەنتیكرن و سەرۆك وەزیرێن یێ ڕژدە ل سەر و گوت ژی، قەیرانا وزێ ل جیهانی هەیە، بەلێ ئەوا بۆ ئیراقێ باش هنارتنا وزێ یە.
مەزهەر محەمەد سالح، شیرەتكارێ دارایی و ئابۆری یێ سەرۆك وەیزرێن ئیراقێ گوت» چاوان سەرۆك وەزیرێن ئیراقێ یێ ڕژدە ل سەر ڤەژاندنا ئیراقێ، وەسا یێ ڕژدە ل سەر بەهرا هەرێما كوردستانێ ژ بودجەی، كو هاتیە گرەنتیكرن».
ل ڕۆژا 13/3/2023 جڤاتا وەزیرێن ئیراقێ پڕۆژەیێ قانوونا بودجەیا گشتی یا ئیراقێ بۆ سالێن 2023 و 2024 و 2025 پەسەندكر، كو بەهرا هەرێما كوردستانێ د هەر سالەكێ دا زێدەتر ژ 24 ترلیۆن دینارایە.
مەزهەر محەممد سالح خویاكر» بۆ جارا ئێكێ یە گوهۆڕینەكا ژ وی جۆری د پرسا داراییا ئیراقێ دا بهێتە كرن، كو پلانا دارایی بۆ سێ سالان بیت» هەروەسا ئاماژەكر» سالانە بودجە د قانوونا كارگێری دارایی دا هاتیە جهگیركرن، بەلێ ئەو ڕێگر نینە كو بودجا 2023 ب شێوازەكێ جودا بهێتە دەركرن و هەرسێ بودجەیان دێ پەیوەندی پێكڤە هەبیت» .
شیرەتكارێ سەرۆك وەزیرێن ئیراقێ، هۆكارێ دەركرنا ئێك پڕۆژە قانوونا بودجەی بۆ سێ سالان ڤەگەراند بۆ پەسەند نەكرنا قانوونا بودجەی بۆ دەمێ چەند سالان و گوت» ئارمانج زێدەتر پڕۆژەیێن وەبەرئێنانێ نە، بۆ وێ چەندێ دشیاندا بیت مەزاختی بۆ وان پڕۆژەیان بهێنە دابینكرن».
هەروەسا گوت» سندووقا ئاڤەدانكرنا ئیراقێ گرنگترین خالە د پڕۆژێ قانوونا بودجەیا گشتی دا، ب تایبەتی بۆ پڕۆژەیێن وەبەرئێنانێ كو دەلیڤێ ب حوكمەتێ ددەت مەزاختیێن وان پڕۆژەیان ب ڕێكا وی سندووقێ دابین بكەت» .

ئەڤرۆ

سیاسەتمەدارەکێ کورد ل تورکیا دیار دکەت هەلوەستێ توند یێ ئەردۆغانی ل هەمبەر کوردان ناهێتە گوهۆڕین و هەتا نها هەڤپەیمانیا مللەت ژی چو پرۆژە بۆ چارەسەرکرنا پرسا کوردی پێشکێش نەکرینە، هەکە دەنگێ کوردان نەهێتە پارچەکرن کورد دشێن دەستهەلاتا بهێت یا تورکیا دیار بکەن.

سەدات یوردتاش سیاسەتمەدارێ کورد ل تورکیا راگەهاند نها رەوشا تورکیا گەلەک ئالۆزە، چونکی پشتی چەین سالان نها ئۆپۆزسیۆنەکا بهێز ل دژی ئاکپارتیێ دروست بوویە، رۆژانە ژی ل تورکیا راپرسی دهێنە کرن، ل گۆر ئەنجامێن پڕانیا راپرسیان ژی ڤێجارێ ئەردۆغان نەشێت ببیتە سەرۆک کۆمارێ تورکیا، لێ د سیاسەتێ دا هەر تشت دشێت روی بدەت، نها ئەردۆغان و هەڤالێن وی ب هەموو رەنگەکێ کار بۆ هندێ دکەن دا بشێن جارەکا دی د هەلبژارتنان دا سەرکەڤن و گۆت: (ئەز باوەر ناکەم هەلوەستێ توند یێ ئەردۆغانی و هەڤپەیمانیا جمهور ل هەمبەر کوردان بهێتە گوهۆڕین، لێ د هەمان دەمی دا هەتا نها ئۆپۆزسیۆنا تورکیا ژی چو پرۆژەیەک بۆ چارەسەرکرنا پرسا کوردی پێشکێش نەکریە، رەوشا کوردان ل تورکیا نها گەلەک ئالۆزە، چونکی هەدەپێ ژی هەتا نها چو بەربژار دیار نەکرینە، کوردان جارێ بریارا خۆ یا دویماهیکێ نەداینە، ژ بەر هندێ ژی دەستهەلات و ئۆپۆزسیۆنا تورکیا نها چاڤەرێی هندێ نە دا بزانن کا دێ هەلوەستێ کوردان چ بیت، بێگومان دەنگێ کوردان ل تورکیا کاریگەرە، کورد پشتەڤانیێ ل کیژ هەڤپەیمانیەکێ بکەن دێ ئەو سەرکەڤیت، ژ بەر هندێ ژی ئەز دبێژم هەکە کورد ئێکدەنگ بن، کورد دێ دەستهەلاتا بهێت یا تورکیا دیار کەن، دەنگێ کوردان گەلەک گرنگە، لێ مخابن هەتا نها دیار نینە کا دێ کورد چ کەن، چونکی د ناڤ کوردان دا پارچەبوونەک هەیە و هەتا نها دیار نینە دێ کورد دەنگێ خۆ دەنە کیژ بەربژاری، پارچەبوونا دەنگێ کوردان بێگومان یا باش نابیت).
ناڤهاتی راگەهاند نها پڕانیا کوردان ل تورکیا و باکورێ کوردستانێ ژ ئاکپارتیێ توورە نە، چونکی ئەردۆغانی د دەمێ بیست سالێن بۆری دا گەلەک سۆز دانە کوردان، لێ سۆزێن خۆ بجه نەئینان، ب تایبەتی ژی قۆناغا ئاشتیێ، چونکی کوردان باوەریەکا مەزن ب ئەردۆغانی هەبوو، د چەندین هەلبژارتنێن بۆری دا کوردان دەنگێن خۆ دانە ئاکپارتیێ، لێ ئاکپارتیێ چ نەکر و گۆت: (ئەز پێشبینی دکەم ڤێجارێ رێژەکا مەزن ژ کوردان ل تورکیا دەنگێن خۆ بدەنە هەڤپەیمانیا مللەت، د هەلبژارتنێن هەری دویماهیێ یێ باژێرڤانیان ل تورکیا دا ژی، ژ بەر دەنگێ کوردان ل چەندین باژێرێن مەزن یێن تورکیا ئاکپارتی تووشی شکەستنەکا مەزن هات، نها کلچدار ئوغلۆ و هەڤالێن وی دخوازن هەمان تشتی ل هەلبژارتنێن بهێت ژی دوبارە بکەن، وان دەنگێ کوردان دڤێت، ژ بەر هندێ ژی ئەز دبێژم دەنگێ کوردان دێ بیتە ئەگەرێ گوهۆڕینا دەستهەلاتێ و دێ کورد دەستهەلاتا بهێت یا تورکیا دیار کەن).

ئەڤرۆ

سەرۆكێ حوكمەتا هەرێما كوردستانێ، مەسرور بارزانی پشكداری د ئێكەمین دیدارا لاوان ل دهۆكێ كر و تێدا باسێ ژیانا چەند ئالیێن لاوێن كوردستانێ كر و ڕاگەهاند: ئەوێ شارەزایی د دیرۆكا خوە دا نەبیت نەشێت پاشەڕۆژەكا باشتر بۆ خوە ئاڤا بكەت.
سەرۆكێ حوكمەتا هەرێما كوردستانێ، ئاماژە ب وێ چەندێ ژی كر، ل سەردەمێ چیای پێشمەرگەی هیڤی دخواستن ب ئازادی ل كوردستانێ بژین هەكە ل بن تراشەكێ ژی دا بیت، نوكە كوردستان یا ئازادە و ژ هەموو ئیراقێ یا ئاڤەدانترە.
دەقێ پەیڤێن سەرۆكێ حوكمەتا هەرێما كوردستانێ:
ڕۆژێن سەرهلدانێ و ئازادكرنا باژێر و باژێركێن كوردستانێ ل هەموو خەلكێ كوردستانێ پیرۆز دكەم، هەلكەفتەكا مەزن و پیرۆزە بۆ ڕزگاركرنا گەلێ مە ژبن دەستێ زۆرداریێ و وەرچەرخانەیەكا دیرۆكی بوو د ژیانا هەموو خەلكێ كوردستانێ دا. ئەوێن بەری سەرهلدانێ ژیاین، ل ئیراقێ و ئەوێن ئاوارەی دەرڤەژی بووین، ژیانا ئاوارەیێ و بندەستیێ دیتیە. بیرا من دهێت، گەلەك جاران كو ل گەل هەڤالێن خوە و پێشمەرگەیان د ڕوونشتین، د گوت، خوزی زڤریباین كوردستانێ و ب ئازادی ژیاباین، بلا ل بن تراشەكێ دا ژیاباین، هزار جاران سوپاس بۆ خودێ زڤرینە كوردستانێ، كوردستان نوكە یا ئازادە، نەكو د بن تراشان دا نینین، بەلكو كوردستان ژ هەموو ئیراقێ یا ئاڤەدانترە.
چەندین نفش پشتی سەرهلدانێ یێن ژ دایكبووین و مەزن بووین و چووینە زانكۆ و پەیمانگە و خواندنا خوە ژی ب دووماهی ئینایە. بەلێ ئەوا نوكە دیار، پشكەكا زۆر ژ وان گەنجان ئەو ئێش و ئازارە نە دیتینە، دبیت قەدر و قیمەتا ڤێ ئازادیا نوكە نەزانن، ئینشائەللا چو جاران وێ ژیانێ نەبینن، ئەوا مە دیتی. هەموو دەمەكی ب سەربلندی بژین و ئەوا ل سەر مە هەردوویان پێدڤی پێكڤە كاربكەین بۆ دەستەبەركرنا ژیانەكا باشتر بۆ وان.
ئەوێ شارەزایی د دیرۆكا خوە دا نەبیت، نەشێت پاشەڕۆژەكا باشتر بۆ خوە ئاڤا بكەت. پێدڤیە ل سەر مە هەموویان دیرۆكێ بینینە بیرا خوە و بزانین ژ كیڤە مە دەستپێكر و گەهشتینە كیڤە. گەلەك جاران كێشە و گرفت هەبوون، پێدڤیە بزانین ژێدەرێن وان كێشەیان چ بوون، بۆ ڕێگری ل مە هاتیە كرن و داخوازیێن مە وەكو پێدڤی نەهاتینە بجهئینان. ئەڤە كارێ مە ب تنێ نینە، كارێ هەڤپشكە، پێدڤیە هەر كەسەك د مالا خوە دا، ئەو بابێ پێشمەرگایەتی، نەخوەشی و بندەستی دیتی، بینیتە بیرا كچ و كۆرێن خوە كا چ ژیان دیتیە و نوكە د چ ژیانەكێ دانە و بۆ پاراستنا ڤێ ژیانێ پێدڤیە پێكڤە كار بكەین و پێدڤیە ڤێ ئەزموونێ بهێتە پاراستن. ل سەر حوكمەتا هەرێمێ ژی پێدڤیە دەلیڤەیان بۆ گەنجان پەیدا بكەت بۆ وێ چەندێ پاشەڕۆژەكا باشتر بۆ خوە ئاڤا بكەن.

ئەڤرۆ

ئەندامەكێ مەكتەبا سیاسی یا پارتی دیموكراتی كوردستان ڕاگەهاند، د هەیڤا ئادارێ دا دێ ڕۆژا ئەنجامدانا هەلبژارتنان هێتە دیاركرن و پتریا ئالیێن سیاسی ل گەل ئەنجامدانا هەلبژارتنانە.
پشتیوان سادق، ئەندامێ مەكتەبا سیاسی یا پارتی دیموكراتی كوردستان د داخۆیانیەكا ڕۆژنامەڤانیدا گوت» وەكو پارتی د ڕژدین ل سەر وێ چەندێ كو هەلبژارتنێن پەرلەمانێ كوردستانێ بهێنە ئەنجامدان، ژ بەر كو ژ ڕوویێ قانوونی و پرۆسەیا دیموكراسی ڤە هیچ چارەسەریەك نەمایە، ژ بلی ئەنجامدانا هەلبژارتنان».
پشتیوان سادق گوت ژی» ڕۆژا ئەنجامدانا هەلبژارتنان ل دەمەكێ نێزیك و ل هەیڤا ئادارێ، ژ ئالیێ نێچیرڤان بارزانی، سەرۆكێ هەرێما كوردستانێ دێ هێتە دەستنیشانكرن» هەروەسا دیاركر ژی» پتریا ئالیێن سیاسی ل هەرێما كوردستانێ ل گەل ئەنجامدانا هەلبژارتنانە».
وی ئەندامێ مەكتەبا سیاسی یا پارتی ئاماژە ب وێ چەندێ ژی دا» پارتی هەموو بزاڤان دكەت بۆ وی ئێكێ هەلبژارتن د ئەڤ سالەدا بهێنە ئەنجامدان و حوكمەتا هەرێما كوردستانێ هەموو ئاسانكاریەكێ بۆ بڕێڤەچوونا هەلبژارتنان دكەت و سەرۆكێ هەرێما كوردستانێ ژی دێ ڕۆژا ئەنجامدانا هەلبژارتنان دەستنیشان كەت».
پشتیوانی زێدەتر گوت» هیڤیدارین د دەمێ چەند ڕۆژێن داهاتی دا پەرلەمانێ كوردستانێ ڤەخواندنێ بۆ پرۆژە قانوونا ڕاستڤەكرنا هەلبژارتنان بكەت».

ئەڤرۆ

پەیڤدارێ حوكمەتا هەرێما كوردستانێ، ڕاگەهاند شاندێ هەرێما كوردستانێ بۆ دانوستاندنێ ل سەر پرۆژەیێ قانوونا پەترۆل و غازێ یا فیدرالی، ل ڕۆژا ئێكشەمبی دەست ب سەرەدانا خوە بۆ بەغدا كریە و ئەڤرۆ دوشەمبی 13/3/2023 دێ دەست ب كۆمبوونان ل سەر ڕەشنڤیسێ قانوونا ناڤبری كەن كو ئێك ژ بابەتێن گرنگە د ناڤبەرا بەغدا و هەولێرێ دا و پێدڤیە د دەمەكێ دیاركری دا تمام ببیت.
جوتیار عادل، پەیڤدارێ حوكمەتا هەرێما كوردستانێ گوت « ئەڤ پرۆژە قانوونە دێ كۆمەكا گرفتێن د پەیوەندیێن بەغدا و هەولێرێ دا هەین د بوارێ وزێ دا چارەسەركەت. بۆ وێ چەندێ هەرێما كوردستانێ وەكو هەڤپشكەكا ڕاستەقینە د دروستكرنا وان بڕیارێن گرێدای پیشەسازیا پەترۆلێ ل ئیراقێ، ب شێوەیەكێ كارا پشكدار بیت، هەروەسا بۆ ڕێكخستنا وی كەرتی چ ل سەر ئاستێ ئیراقێ و هەرێما كوردستانێ و پەیوەندیێن هەردو ئالیان گرنگیا خوە هەیە. بێگومان ل دووماهیێ پێدڤیە ئەڤ پڕۆژە ڕەنگڤەدانا ڕێككەفتنا هەردو ئالیان بیت و د مفایێ وان دا بیت. ئەو نەكو بۆ هەرێما كوردستانێ، بەلكو بۆ هەموو خەلكێ ئیراقێ ژی دەستكەفتەكا گرنگە».
سەبارەت چاوانیا بجهئینانا وێ پڕۆژە قانوونێ، جوتیار عادل گوت» ڕێككەفتن یا هاتیە كرن كو هەردو ئالی پێكڤە ڕەشنڤیسی بنڤیسن، تا ڕادەیەكی ل سەر پرەنسیپێن گشتی ڕێككەفتن هاتیە كرن، بەلێ هووردەكاری زۆرن، هەر د ڤی چارچۆڤەی دا دانوستاندن دێ د بەردەوام بن. ئەم چاڤەڕێ دكەین د دەمەكێ نێزیك دا، ئەنجام بۆ هەیت، هیڤیدارین باوەری بوون ب هەڤپشكیێ و پشت بەستن ب دەستووری و ئەو ڕێككەفتنا د كارنامەیا كابینەیا محەمەد شیاع سودانی دا هەی، د وێ پڕۆژە قانوونێ دا ڕەنگڤەدەت».
ل دۆر پڕۆژەیێ قانوونا بودجەیا گشتی یا ئیراقێ بۆ سالا 2023، پەیڤدارێ حوكمەتا هەرێمێ دبێژیت» پشتی دانوستاندنەكا دوور و درێژ ل گەل حوكمەتا فیدرالی، ئەوا گرێدای شایستە و مافێن هەرێما كوردستانێ دانوستاندن ل سەر هاتە كرن، ئەو پڕۆژەیە قانوونە ژی دێ كۆمەكا كێشەیان د ناڤبەرا هەردو ئالیان دا چارەسەركەت، حوكمەتا فیدرالی دەمەكە بودجە نەبوو، وێ چەندێ ژی كاریگەری ل سەر ئاستێ پەیوەندیان ل گەل هەرێما كوردستانێ هەیە كو پێدڤیە بۆ دەستنیشانكرنا بەهرا هەرێما كوردستانێ پشت بەستن ب سەرژمێریێ بهێتە كرن. هندەك ئەنجام دەستكەفتێن باش بوون بۆ هەرێما كوردستانێ، وەكو هەژمارەكرنا مووچێ پێشمەرگەی و پشتەڤانیا هێزا پێشمەرگەی د چارچۆڤەیێ خەرجیێن سیادی دا و دیاركرنا بەهرا هەرێما كوردستانێ ژ خەرجیێن (حاكمە). بابەتێ هنارتنا 400 ملیار دیناران ژی گرفتەكا مەزن ل بەردەم نەمایە و ل ڤان نێزیكان ئەو پارە بۆ هەرێما كوردستانێ دێ هێتە هنارتن».

ئەڤرۆ

هەولێر، قائید میرۆ

حەفتیا بۆری وەزیرێ بەرگریا ئەمریكا سەرەدانا هەرێما كوردستانێ كر و دگەل سەرۆكێ هەرێمێ و فەرماندەیێن سەربازیێن هەرێما كوردستانێ كۆمبوو بسپۆرەكێ سیاسی ژی ئاماژە ب وێ چەندێ دكەت، سەرەدانا وەزیرێ بەرگریا ئەمریكی بۆ گەهاندنا پەیاما ئەمریكا بوویە بۆ هەرێما كوردستانێ و ئەمریكا دێ بەردەوام بیت ل سەر پشتەڤانیا خوە بۆ هێزێن پێشمەرگەی و هەرێما كوردستانێ.
د. ساڵح مەلا عومەر، پسپۆرێ زانستێن سیاسی بۆ ڕۆژنامەیا (ئەڤرۆ) گوت» سەقامگیریا ئیراقێ بۆ ڕۆژهەلاتا ناڤین یا گرنگە و بێگومان هەبوونا سەقامگیریا ئیراقێ ڕامانا سەقامگیریا دەڤەرێ یە، ئەڤەژی بوویە ئەگەر سەقامگیریا ئیراقێ بۆ ئەمریكا یا گرنگ بیت، مە دیت سالا ٢٠١٤ێ دەمێ گرۆپا تیرۆرستیا داعشێ هێرشی ئیراقێ كری د دەمێ ٤٨ دەمژمێران دا داعش شیا هەژمارەكا مەزن یا دەڤەرێن سوننە مەزهەب داگیر بكەت، هەتا مەترسی كەفتە سەر بەغدا ژی، بەلێ هێزێن پێشمەرگەی شیان ب شێوەیەكێ سەركەفتی بەرامبەر هێرشێن داعشێ ڕاوەستن و بەرهنگاری داگیركاریا داعشێ ببن، ئانكو پێشمەرگەی سنورەك بۆ پێشڤەچوونێن داعشێ دانا لەوڕا هێزێن هەڤپەیمان ل ئەسمانی هاریكاریا هێزێن پێشمەرگەی كر ژبوی بەرهنگاربوونا داعشێ و شیان تیرۆرستێن داعشێ بشكێنن، قەهرەمانیا هێزێن پێشمەرگەی بۆ ئەگەرێ وێ چەندێ ئەمریكا و هەڤپەیمان گرنگیێ ب هێزێن پێشمەرگەی بدەن، هەتا بشێن بەرهنگاری گرۆپێن تیرۆرستی ل ئیراقێ ببن».
دیاركر ژی» سەرەدانا وەزیرێ دەرڤەیێ ئەمریكا بۆ هەرێما كوردستانێ وكۆمبوون دگەل سەرۆكێ هەرێمێ و بەرپرسێن پێشمەرگەی ڕامانا وێ چەندێ ددەت، هەرچەندە شەڕێ داعشێ ب دوماهی هاتیە، بەلێ ئەمریكا دێ بەردەوامبیت ل سەر پشتەڤانیا هێزێن پێشمەرگەی».
پتر گوت» د كاركرنا ئەمریكا دا ب درێژاهیا سالێن بۆری دگەل هێزێن پێشمەرگەی بۆ ئەمریكا ئاشكرابوو هەرچەند پشتەڤانیا هەرێما كوردستانێ بكەت دێ گەرەنتیا زێدەتر هەبیت بۆ سەقامگیریا ئیراقێ، بەری گرۆپێن تیرۆرستی هێرشی ئیراقێ بكەن زێدەتر فوكسا ئەمریكا ل سەر لەشكرێ ئیراقێ بوو نەكو هێزێن پێشمەرگەی و ئەمریكا ب بهایێ ملیاران دۆلاران چەك و تەقەمەنیێن لەشكری پێشكێشی هێزێن ئیراقێ كرینە، بەرۆڤاژی د دەمێ ٤٨ دەمژمێران دا هێزێن ئیراقی نەشیان بەرهنگاری هێرشێن داعشێ ببن، ئەڤەژی بۆ ئەگەرێ ئەمریكا زێدەتر پشتەڤانیا هێزێن پێشمەرگەی بكەت».
خویاكر» پشتی شەڕێ داعشێ بۆچوونا ئەمریكا هاتیە گۆهۆڕین ل دۆر هێزێن پێشمەرگەی، نوكە ئەمریكا گەهشتیە وێ باوەریێ تنێ هێزێن پێشمەرگەی شیان هەنە بۆ بەرگریێ و شیانێن پێشمەرگەی زێدەترن ژ لەشكرێ ئیراقێ، بێگومان ل پاشەڕۆژێ دێ ئەمریكا زێدەتر هەڤكار و پشتەڤانیا هێزێن پێشمەرگەی كەت، هاتنا وەزیرێ بەرگریا ئەمریكا بۆ هەولێرێ پەیامەكە بۆ هەرێما كوردستانێ، كو پشتی شەڕێ داعشێ ئەمریكا دەست ژ هەرێما كوردستانێ بەرنادەت و دێ بەردەوامبیت ل سەر پشتەڤانیا وێ».

ئەڤرۆ

سەرۆك مەسعود بارزانی دوهی شەمبیێ 11 ئادارا 2023 پەیامەك ب هەلكەفتا سالڤەگەرا ڕێككەفتنا 11 ئادارێ بەلاڤكر و ڕاگەهاند، ڕێككەفتنا 11 ئادارێ پێناسە و هەبوونا گەلێ كوردستانێ د ناڤ دەولەتا ئیراقێ دا برە قووناغەكا بلندتر و باوەری ب خوەبوون دناخێ تاكێ كوردستانی دا ب هێزتر كر.
دەقێ پەیاما سەرۆك بارزانی:
ڕێككەفتنا 11 ئادارێ ئێكە ژ دەستكەفتێن بهادارێن بزاڤا ڕزگاریخوازا گەلێ كوردستانێ. گرنگیا ڤێ ڕوودانا دیرۆكی د وێ چەندێ دایە كو ژ ئەنجامێ خەبات و شۆرەشا گەلێ كوردستانێ و پارتی ب رێبەریا بارزانی، ڕژێما وی سەردەمی یا ئیراقێ هاتە نەچاركرن كو ل 11 ئادارا 1970 بۆ جارا ئێكێ و ب شێوەیەكێ فەرمی دانپێدانێ ب پشكەك ژ مافێن گەلێ مە بكەت. ئەو مافێن كو هەر ل دەستپێكا دروستبوونا دەولەتا ئیراقێ دانپێدان پێ نەدهاتە كرن.
ڕێككەفتنا 11 ئادارێ كو بەرهەمێ خەبات و قوربانیدانا پێشمەرگە و جەماوەر و هەموو تەخ و چین و پێكهاتەیێن ئایینی و نەتەوەیی یێن كوردستانێ بوو، پێناسە و هەبوونا گەلێ كوردستانێ د ناڤ دەولەتا ئیراقێ دا برە قۆناغەكا بلندتر و باوەری ب خوەبوون د ناخێ تاكێ كوردستانی دا ب هێزتر كر. هەرچەندە ڕژێما ئیراقێ پشتا خوە دا مافێن خەلكێ كوردستانێ و ڕێككەفتنا 11 ئادارێ پێشێلكر، بەلێ ئەو دەستكەفتە دەرگەهەك بوو بۆ قووناغ و پێنگاڤێن مەزنتر یێن خەباتا گەلێ مە و بدەستڤەئینانا دەستكەفت و سەركەفتنێن زێدەتر.
د سالڤەگەرا 53 یا ڕێككەفتنا 11 ئادارێ سەرەرای وێ چەندێ دوپاتیێ ل پەیاما ئاشتیخوازانە و پێكڤەژیانا گەلێ كوردستانێ دكەین، وێ چەندێ ژی دئینینە بیرا هەموو ئالیەكی كو گەلێ كوردستانێ ل بن هیچ ڕەوش و فشارەكێ دا ژ ماف و ئازادی و دەستكەفتێن خوە پاشڤە ناچیت.

ئەڤرۆ

سەرۆكێ حوكمەتا هەرێما كوردستانێ، د چارچۆڤەیێ پشكداریكرنێ د ڕێورەسمێن ڕۆژا جیهانی یا ئافرەتان دا ل هەولێرێ پەیڤەك پێشكێشكر و ڕاگەهاند، پشتەڤانیا خوە بۆ مافێن ئافرەتان و ڕۆلێ كارا و چالاكیان د هەموو بوارێن ژیانێ و جڤاكی و ب تایبەتی د ناڤ دەزگەهێن حوكمەتێ دا، دوپات دكەین.
مەسرور بارزانی، سەرۆكێ حوكمەتا هەرێما كوردستانێ د پەیڤا خوە دا دیاركر» ئافرەتان د درێژیا دیرۆكا گەلێ كوردستانێ دا، ڕۆلەكێ دیار و بەرچاڤ د جڤاكی دا هەبوو. د قووناغێن دژوارێن خەباتا كوردستانێ دا، بەردەوام هاریكار بوون و پشكداریا كاریگەر هەبوو و خودان دیرۆكەكا پڕ سەروەری نە. پشتی سەرهلدانێ و پێكئینانا پەرلەمان و حوكمەتا هەرێمێ ژی دا، ڕۆلێ ئافرەتێن كوردستانێ، د هەموو بوارەكێ حوكمڕانیێ دا یێ دیار بوو و كار ژی دكەین بۆ ب هێزكرنا زێدەتر یا پێگەهێ ئافرەتان د ناڤ حوكمەتێ دا ب گۆرەی شیان و هەژیبوونا وان و نەهێلانا هەموو جۆرەكێ پشتگوهـ هاڤێتنا ڕۆلێ ئافرەتان د ڕێڤەبرنێ دا.
دیاركر ژی» ئەم وەكو حوكمەتا هەرێما كوردستانێ، ب هەموو هێز و شیانێن خوەڤە دژی هەموو جۆرە پێشێلكاریێن مافێن مرۆڤی و هەموو توندوتیژیەكێ نە، ب تایبەتی توندوتیژی و كوشتن و ئازاردانا ئافرەتان و پێشێلكرنا مافێن وان، كو مخابن جڤاكێ كوردستانی ژی، وەكو گەلەك جڤاكێن دی یێن جیهانێ ژێ دنالیت. ئەڤ توندوتیژیە، ب هیچ شێوەیەكی ل دەف مە جهێ قبوولكرنێ نینە و دێ بەردەوام بین د بەرهنگاریبوون و نەهێلانا ڤێ دیاردەیێ دا ب شێوەیەكێ گشتی».
زێدەتر گوت» بەرهنگاریا توندوتیژیێ و كاركرن بۆ پێشڤەبرنا كەلتوورێ یەكسانیا جێندەری، ئەركەكێ هەڤپشكێ مە هەمووبانە و پێدڤیە جڤاك ب گشتی و حوكمەت و ڕێكخراوێن ئافرەتان و جڤاكێ مەدەنی و مامۆستایێن ئایینی و قوتابخانە و زانكۆ و ناڤەندێن ڕەوشەنبیری، ئەم هەموو كار ل سەر هشیاركرنا تاك و خێزانێ بكەین و كارێ ب ڕژد بكەین ژ پێخەمەت نەهێلانا توندوتیژیێ و پێشڤەبرنا كەلتوورێ یەكسانیێ و پێكڤەژیانێ و هەڤدو قبوولكرنێ».
ئاماژەكر» حوكمەتا هەرێمێ، باوەریا تمام ب ستراتیژیا ب هێزكرنا پێگەهێ ئافرەتان هەیە و كاری ژی بۆ دكەت. پێدڤیە زەلام و ئافرەت، وەكو ئێك د مفادار بن ژ وان دەلیڤەیێن بۆ وان دهێتە پەیداكرن و هەروەسا د ئەرك و مافێن وان ژی دا، ب شێوەیەكێ یەكسان مفادار و بەهرەمەند بن».

ئەڤرۆ

سەرۆكێ هەرێما كوردستانێ، نێچیرڤان بارزانی ب هەلكەفتا سالڤەگەرا 53 یا ڕێككەفتنا 11 ئادارێ، دوهی 11 ئادارا 2023 پەیامەك بەلاڤكر و ڕاگەهاند، ڕێككەفتنا 11 ئادارێ، د وێ ڕەوش و هەڤكێشەیا دژوار و ئالۆز یا دەڤەرێ و نێڤدەولەتی یا وی دەمی دا، سەركەفتنەكا مەزن و گرنگترین بەلگەنامەیا فەرمی یا دانپێدانكریە كو پشكەك ژ مافێن گەلێ كوردستانێ دا نیاسین.
دەقێ پەیاما سەرۆكێ هەرێما كوردستانێ:
د سالڤەگەرا وێ یا 53 دا، بیرا خوە ل ڕێككەفتنا 11 ئادارا 1970 ل سەردەمێ شۆڕەشا ئەیلۆنێ ب رێبەریا بارزانیێ نەمر، ل گەل حوكمەتا ئیراقێ، دئینین. سلاڤ بۆ گیانێ هەموو شەهیدێن كوردستانێ و وان قەهرەمانان دهنێرین كو پشكداری د شۆڕەشا ئەیلۆنا مەزن دا كری.
ڕێككەفتنا 11 ئادارێ، د وێ ڕەوش و هەڤكێشەیا دژوار و ئالۆز یا دەڤەرێ و نێڤدەولەتی یا وی دەمی دا، سەركەفتنەكا مەزن و گرنگترین بەلگەنامەیا فەرمی یا دانپێدانكریە كو پشكەك ژ مافێن گەلێ كوردستانێ دا نیاسین و ڕەوایەتیا دۆزا وی گەهاندە جیهانێ. بۆ بنەمایێ سەرەكی یێ هەموو دەستكەفتێن پشتڕا یێن گەلێ كوردستانێ هەر ژ سەرهلدانێ تاكو دامەزراندنا پەرلەمان و حوكمەتێ و و فیدرالیێ.
ڕێككەفتنا 11 ئادارێ، چارەسەریەكا نموونەیی بوو كو دشیا ئیراقێ و گەلێ وێ ب تمامی بەر ب چارەنڤیسەكێ گەشتر ببەت و بكەتە ئێك ژ وەلاتێن پێشكەفتی ل دەڤەرێ و جیهانێ. بەلێ پەشێمانبوونا دەستهەلاتدارێن ئیراقێ و هەلبژارتنا لۆژیكا هێزێ ل شوینا هێزا لۆژیكێ، ژ شەڕی و مەینەتێ و پاشكەفتنێ و ب هەدەردانا سامانێن وەلاتی زێدەتر، هیچ تشتەكێ دی بۆ ئیراقێ نەئینا. هەتا نوكە ژی ئیراق هەر یا باجا وێ شاشیێ ددەت.
ب ڤێ هەلكەفتێ داخواز ژ هەموو هێز و ئالیێن ئیراقی و كوردستانی دكەم كو پەند و وانێ ژ وێ دیرۆكێ وەرگرن و ئەم هەموو مفای ژ شاشیێن بۆری ببینین. زەنگینی و شیانێن مادی و مرۆڤی یێن ئیراقێ بۆ پێشئێخستنا وەلاتی و خوەشگوزەرانیا وەلاتیان بكاربینین. پێكڤە كار بكەین و مافێ هەموو پێكهاتەیێن ئیراقێ و سیستەمێ فیدرالی و سەروەری و ئارامی و سەقامگیریا وەلاتی بپارێزین. ئەم هەموو ب هەڤدوقبوولكرنێ، لێبۆرینێ، پێكڤەژیانێ، ئێكڕێزیێ، پێكڤە بۆ ئاڤەدانكرنا وەلاتەكێ خوەشگوزەران و ب هێز و بۆ پاشەڕۆژەكا باشتر كار بكەین.

ئەڤرۆ

سەرۆكێ حوكمەتا هەرێما كوردستانێ، مەسرور بارزانی د سالڤەگەرا ڕێككەفتنا 11 ئادارێ دا، دوهی 11 ئادارا 2023 پەیامەك بەلاڤكر و ڕاگەهاند، ئەو ڕێككەفتنە دەستكەفتەكێ گرنگ یێ گەلێ كوردستانێ یە و بەلگەنامەیەكا دیرۆكی یە، ل سەر سەركەفتنا خواستێن خەلكێ كوردستانێ و پەیاما وی یا ئاشتیخوازانە.
دەقێ پەیاما سەرۆكێ حوكمەتا هەرێما كوردستانێ:
ئەڤرۆ بیرئینانا ڕێككەفتنا 11 ئادارێ دكەین، كو بەری 53 سالان، حوكمەتا ئیراقێ نەچاربوو، ژ بەر بەرگری و خۆراگریا خەلكێ كوردستانێ د شۆڕەشا ئەیلۆنا مەزن دا ب ڕێبەریا بارزانیێ نەمر، وێ ڕێككەفتنێ ئیمزا بكەن و دانپێدانێ هندەك ژ داخوازیێن گەلێ كوردستانێ بكەت.
ڕێككەفتنا 11 ئادارا 1970، دەستكەفتەكێ گرنك یێ گەلێ كوردستانێ یە و بەلگەنامەیەكا دیرۆكی یە، ل سەر سەركەفتنا خواستا خەلكێ كوردستانێ و پەیاما وی یا ئاشتیخوازانە، كو بەردەوام خواستیە ب ڕێكا دانوستاندنێ و ڕێچارەیا ئاشتیانە، كێشە بهێنە چارەسەركرن. بەلێ مخابن حوكمەتا ئیراقێ یا وی سەردەمی، ژ سۆز و ڕێككەفتنا خوە ل گەل سەركردایەتیا كوردستانێ لێڤەبوو و دەست ب هێرشێ ل سەر كوردستانێ كر و د ئەنجامدا ژ ئەگەرێ سیاسەتا شەڕكرنێ یا ڕژێما ئیراقێ، هەرێما كوردستانێ و ئیراق ب گشتی، تووشی شەڕی و وێرانكاریێ و كارەساتێن مەزن بوون، كو هەتا نوكە ژی هەرێما كوردستانێ دبن وان تاوانێن دنالیت و نەهاتیە قەرەبووكرن ژی.
د ڤێ هەلكەفتێ دا، هەلویستێ خوە ل داكۆكیكرن و دەستبەردار نەبوون ژ مافێن مە یێن دەستووری و چارەسەركرنا كێشەیان ب شێوەیەكێ بنەرەتی و ئاشتیانە و ل سەر بنەمایێ دەستووری، دوپات دكەین.