ئه‌ڤرۆ نيوز:

بسپۆرەکێ سیاسەتا دەرڤە یا ئەمریکا ل ھەمبەر رۆژھەلاتا ناڤین دیار دکەت کو سزایێن ئابووری یێن ئەمریکا ل سەر تورکیا تنێ ژ بەر گرتنا قەشەیەکێ نینە و ئەو یەک بوویە بەھانە، بەلکو ب سالانە تورکیا دژبەریا سیاسەتا ئەمریکا دکەت و ئاستەنگیان بۆ بەرژەوەندیێن ئەمریکا ل رۆژھەلاتا ناڤین دروست دکەت، ئۆباما تا رادەیەکێ نەرم بوو لێ ترامپ داخوازا گوھۆڕینا ھەلویستێ تورکیا دکەت.

د. نەوزاد عەبدوللا مامۆستایێ زانکۆیێ و بسپۆرێ سیاسەتا دەرڤە یا ئەمریکا ل ھەمبەر رۆژھەلاتا ناڤین د دیدارەکا تایبەت دا ل گەل رۆژناما ئەڤرۆ ل دۆر سزایێن ئەمریکا یێن ئابووری ل سەر تورکیا دیار کر کو جارێ ئەز دشێم بێژم کو ئەمریکا چ نەکریە، ئانکۆ ئەڤا نھا ئەمریکا ل ھەمبەر تورکیا کری تشتەکێ گەلەکێ بچووکە و ھەکە تورکیا ل سەر ھەلویستێ خوە یێ نھا ل ھەمبەر ئەمریکا بەردەوام بیت دێ تووشی سزایێن گرانتر بیت و گۆت: (قەیرانا نھا یا د ناڤبەرا ئەمریکا و تورکیا دا ڤەدگەریتە بۆ سالێن ٢٠٠٣ ھەتا ٢٠١٠ و نھا پتر بابەت ئاشکرا دبیت، چونکو وی دەمی تورکیا نەھێلا ئەمریکا ئاخا وێ بۆ لێدانا سەدامی بکار بینیت و ل سالا ٢٠١٠ دەمێ ئەمریکا پشتەڤانی ل مالکی کری تورکیا ب ھەموو رەنگەکێ دژبەریا مالکی و سیاسەتا ئەمریکا ل عیراقێ بوو و ھەروەسا سیاسەتا تورکیا ل دەمێ بھارا عەرەبی ژی وەسا کر کو ئێدی سەبرا ئەمریکا ل ھەمبەر تورکیا نەما و نھا ب رێیا سزایێن بچووک یێن ئابووری دخوازیت تورکیا ھەلویستێ خوە ب گوھۆڕیت).

ناڤھاتی ھەروەسا دیار کر کو تورکیا گەلەک ئاریشە بۆ بەرژەوەندیێن ئەمریکا ل سووریێ دروست کرینە، دەمێ ئالۆزی ل سووریێ دروست بوون ئەمریکا دخواست گوھۆڕینێن ل سووریێ ب رەنگەکێ جودا بن، لێ تورکیا ھەر زوو ھێزێن ھشکباوەر یێن ئیسلامی کۆمکرن و لەشکرێ ئازاد یێ سووریێ دروست کر و دخواست گرۆپێن ئیسلامی یێن ھشکباوەر ل سووریێ بھێنە سەر دەستھەلاتێ و رژێما بەشاری ژناڤ بچیت، لێ ئەمریکا ل دژی ڤێ یەکێ بوو، چونکو ئەمریکا دزانی ھەکە رژێما بەشاری ژناڤ بچیت و ئیسلامیێن ھشکباوەر ببنە دەستھەلاتدار دێ رەوشا رۆژھەلاتا ناڤین گەلەکێ ئالۆز بیت و مەترسی ل سەر بەرژەوەندیێن ئەمریکا دروست دبوون و گۆت: (زێدەباری گڤاشتنێن ئەمریکا یێن وی دەمی ل سەر تورکیا کو ھەلویستێ خوە ل ھەمبەر سووریێ ب گوھۆڕیت لێ مخابن تورکیا ل سەر ھەلویستێ خوە بەردەوام بوو، ئۆباما ل ھەمبەر تورکیا نەرم بوو، لێ پشتی کو ترامپ ھاتیە سەر دەستھەلاتێ سەبرا ئەمریکا ل ھەمبەر تورکیا نەمایە و نھا ھێدی ھێدی دەست ب سزادانا تورکیا کریە).

د. نەوزاد عەبدوللا د پشکەکا دی یا ئاخڤتنا خوە دا ژی ئەو یەک دیار کر کو ئەمریکا د ئاستێ سیاسەتا ناڤخوەیی یا تورکیا ژی دلگرانە، چونکو دەستھەلاتا ئەردۆگانی دەنگێ ئازاد ل تورکیا نەھێلایە و ب سەدان رۆژنامەڤان و مامۆستایێن زانکۆیێ و کەسێن ئەکادیمی نھا ل زیندانان دانە و ئەمریکا بەری نھا ژی چەندین جاران داخواز ژ تورکیا کربوو کو رێزێ ل مافێ مرۆڤان بگریت لێ ھەلویستێ تورکیا ھەر یێ توند بوو و گۆت: (ل ئاستێ دەرڤە ژی تورکیا دژبەریا وان وەلاتان دکەت یێن کو ھەڤپەیمانێن ستراتیژی یێن ئەمریکا نە، وەکو سعوودیێ و ئیسرائیلێ و ئەمریکا ژی ب چو رەنگەکێ ھەڤپەیمانێن خوە ب تنێ ناھێلیت، ژ بەر ھندێ ژی گرتنا قەشەیێ ئەمریکی ژ ئالیێ تورکیا ڤە بۆ بەھانە کو ئەمریکا دەست ب سزادانا تورکیا بکەت).

مامۆستایێ زانکۆیێ و بسپۆرێ سیاسەتا دەرڤە یا ئەمریکا ل ھەمبەر رۆژھەلاتا ناڤین د دووماھیا ئاخڤتنا خوە دا ئەو یەک ژی دیار کر کو چەند سالن تورکیا تووشی قەیرانا ئابووری بوویە و بارێ ئابووری یێ تورکیا رۆژ ب رۆژێ خرابتر لێ دھێت، ئەمریکا ژی نھا گەفان ل تورکیا دکەت دا خوە ژ بەرەیێ روسیا و ئیرانێ دوور بکەت، دەمێ ئەردۆگان دبێژیت ئەم دێ ل ھەڤپەیمانێن نوو بگەرین ئەمریکا باش دزانیت کا تورکیا دخوازیت چ بکەت، سزایێن نھا یێن ئەمریکا سڤکن و ھێشتا ئەمریکا دەست ب سزایێن گران ل دژی تورکیا نەکریە و گۆت: (ھەکە ئەمریکا وەکو ئیرانێ وەسا سەرەدەریێ ل گەل تورکیا بکەت دێ ئابوورێ تورکیا ژناڤ بچیت، ئەمریکا نھا دخوازیت تورکیا خوە ژ روسیا دوور بکەت، ئەمریکا ب کریاری ژی بۆ تورکیا سەلماند کو دشێت وی وەلاتی تووشی قەیرانەکا مەزن یا ئابووری بکەت و ھەتا ئابوورێ تورکیا ژناڤ ببەت، ژ بەر ھندێ ژی ئەز دبێژم تورکیا نەچارە کو ھندەک ژ داخوازیێن ئەمریکا قەبوول بکەت، چونکو تورکیا نەشێت وەسا بەردەوام بیت و ھەکە ھەتا دەمەکێ دەستھەلاتا ئاکپارتیێ سیاسەتا خوە ل ھەمبەر ئەمریکا نەدەتە گوھۆڕین رەنگە تورکیا تووشی رەوشەکا خرابتر ببیت و ئابوورێ تورکیا ژناڤ بچیت).