پەیڤدارێ پارتی دیموكراتی كوردستان ل دۆر دوماهی پێشهاتێن ڕەوشا سیاسی یا ئیراقێ بەیاننامەیەك بەلاڤكر و تێدا دبێژیت: ڕەوشا ئیراقێ و دەڤەرێ ب جۆرەكێ یا هاتیە شێواندن كو پێشبینیا نە ئارامیەكا مەزن دهێتە كرن، هەروەسا لادانا محەمەد حەلبووسی ژ ئەندامەتی و سەرۆكایەتیا جڤاتا نوونەرێن ئیراقێ ب هۆكارەكی دزانیت كو ئالۆزیان زێدەتر و كوورتر بكەت.
د بەیاننامەیا پەیڤدارێ پارتی دیموكراتی كوردستان دا هاتیە»ڕەوشا ئیراقێ و دەڤەرێ ب جۆرەكی هاتیە شێواندن كو پێشبینیا نە ئارامیەكا مەزن دهێتە كرن، د ڤێ ڕەوشێ دا بەرپرسیارەتیا سەر ملێ هەموو هێز و ئالیێن ئیراقی ب گشتی و ئالیێن ئیئتیلافا ئیدارەیا دەولەتێ پێكئینای ب تایبەتی، هوورتر هەلسەنگاندنێ بۆ ڕەوشێ بكەن ب تایبەتی ڕوودانا دووماهی بڕیارا دادگەها فیدرالی ل ئیراقێ سەبارەت لادانا سەرۆكێ دەستهەلاتا قانوون دانانێ كو دێ ئالۆزیان زێدەتر و كوورتر كەت، ئەڤە د دەمەكی دا چاڤەڕێی ئەوێ چەندێ بوون ئەو ئالۆزی و كێشەیێن هەین بهێنە چارەسەركرن نەكو بابەتێن زێدەتر بهێنە كۆمكرن ب جۆرەكی كو ئاشتیا جڤاكی و سەقامگیریێ د ئێخیتە د مەترسیێ دا».
ل ڕۆژا 14/11/2023 دادگەها فیدرالی یا ئیراقی، ئەندامەتیا محەمەد حەلبووسی د جڤاتا نوونەرێن ئیراقێ دا هەلوەشاند. د ڕۆژا دووڤدا محەمەد حەلبووسی د كۆنگرەیەكێ ڕۆژنامەڤانی دا گوت» ئەركێ دادگەها بلند یا فیدرالی پاراستنا دەستووری یە، بەلێ وێ ب خوە ئەو چەندە پێشێلكریە و نەشێت ئەندامەتیا هیچ كەسەكی د جڤاتا نوونەراندا ب هەلوەشینیت ل دووڤ مادەیا 52 ژ پەیڕەوێ ناڤخوەیێ جڤاتا نوونەرێن ئیراقێ».
حەلبووسی پشتی بڕیارا دادگەها فیدرالی یا ئیراقێ نەشێت سەرۆكایەتیا ڕوونشتنێن جڤاتا نوونەرێن ئیراقێ بكەت.
پەیڤدارێ پارتی دیموكراتی كوردستان د بەیاننامەیا خوە دا باس ل وێ چەندێ دكەت» پارتیا مە ب جدی دنێریتە ڕەوشێ و نیگەرانین ژ دوماهی پێشهاتێن سیاسی، لەوما ب پێدڤی دزانین ڕەوشا ئیراقێ ژ ڕوویێ سیاسی، ئەمنی، ئابۆری و ئەگەرێن چاڤەڕێكریێن دەڤەرێ ل بەرچاڤ بهێنە وەرگرتن».
هەڤدەم داخواز دكەت» ب گۆڕەی دەستووری كێشە بهێنە چارەسەركرن و پێنگاڤ بهێنە هاڤێتن بۆ ڕێكخستنا ڕەوشی ژ ڕوانگەها دەستوورێ بەردەوام و بجهئینانا مادە و بڕگە و پرنسیپێن ڕێككەفتنا ئیئتیلافا ئیدارەیا دەولەتێ و كارنامەیا حوكمەتا فیدرالی، ب تایبەتی بڕگەیێن گرێدای جڤاتا فیدرالی و دادگەها فیدرالی، هەروەسا بزڤرین بۆ بنەمایێن ئاڤاكرنا ئیراقەكا نوو (هەڤپشكی ،لهەڤهاتن، هەڤسەنگی) و سەروەریا دەستووری بهێتە چەسپاندن كو تاكە گرەنتیێ پێكڤەژیانێ و سەقامگیریێ و پێكڤەییا ئیراقێ بیت» .

دوهی سێشەمبی 239 سال ل سەر دامەزراندنا باژێرێ سلێمانیێ دەرباز دبن، سەرۆكێ هەرێما كوردستانێ ب وێ هەلكەفتێ ژبلی پیرۆزباهیكرنێ ل خەلكێ وی باژێری، دبێژیت: سلێمانیێ باژێرەكێ زیندی یە و ڕۆل و پێگەهێ وی یێ كاریگەر و دیارە.
نێچیرڤان بارزانی، سەرۆكێ هەرێما كوردستانێ، دوهی سێشەمبی 14/11/2023 ب ڕێكا پێگەهێن خوە ل سۆشیال میدیایێ پیرۆزباهیا دامەزراندنا سلێمانیێ كر.
سەرۆكێ هەرێما كوردستانێ دبێژیت» ب هەلكەفتا 239 سالیادا ئاڤاكرنا سلێمانیێ پایتەختێ ڕەوشەنبیریێ كوردستانێ، باژێرێ سلێمانیێ یێ ئەزیز، گەرمترین پیرۆزباهیێ ل خەلكێ باژێرێ هەلمەت و قوربانیێ دكەم».
نێچیرڤان بارزانی هەروەسا دبێژیت» سلێمانیێ هەردەم باژێرەكێ زیندی بووە و ڕۆل و پێگەهەكێ كاریگەر و دیار د خەبات و قوربانیدانێ بۆ ئازادی و سەرفەرازیا گەلێ مە هەبوو. ب ئومێدا ئاڤەدانی وگەشەكرن و پێشكەفتنا بەردەوام بۆ سلێمانیێ و هەموو باژێرێن دی یێ كوردستانێ».

سەرۆكێ حوكمەتا هەرێما كوردستانێ ل سالڤەگەرا 239 یا دامەزراندنا باژێرێ سلێمانیێ ڕاگەهاند: هیڤیدارم بشێین زێدەتر خزمەتا خەلك و باژێرێ هەلمەت و قوربانیێ بكەین.
دوهی سێشەمبی 14/11/2023، مەسرۆر بارزانی، سەرۆكێ حوكمەتا هەرێما كوردستانێ ب هەلكەفتا سالڤەگەرا دامەزراندنا باژێرێ سلێمانیێ، د پۆستەكی دا ل سەر پێگەهێ خوە یێ تایبەت ل تۆرا جڤاكی یا ئێكس (تویتەرا بەرێ) ئاماژە ب وێ چەندێ كر» هەلكەفتا 239 سالیا ئاڤاكرنا باژێرێ سلێمانیێ ل هەموو خەلكێ كوردستانێ پیرۆز دكەم».
سەرۆكێ حوكمەتا هەرێما كوردستانێ د پشكەكا دی یا پەیاما خوە دا دبێژیت» هیڤیدارم خودایێ مەزن مەزنە دەلیڤەیەكا وەسا بۆمە پەیدا بكەت كو بشێین زێدەتر خزمەتا خەلك و باژێرێ هەلمەت و قوربانیێ بكەین».

سەرۆكێ حوكمەتا هەرێما كوردستانێ ڕاگەهاند: مە داخوازا مووچەیێن شەش مەهێن ئەڤسالە ژ حوكمەتا ئیراقێ كریە، بڕیار ل سەر هنارتنا مووچەیێن سێ مەهان دایە و بۆ سێ مەهێن دی ژی وان گۆتیە ل مەها 12 دێ تەسفیا حیساباتان كەین و چاڤەڕێی بەرسڤا وان دكەین.
دوهی سێشەمبی 14/11/2023، مەسرور بارزانی، سەرۆكێ حوكمەتا هەرێما كوردستانێ پشكداری د فیستەڤالا پەیمانگەها هونەرێن جوان ل هەولێرێ بۆ سالا 2023 كر. پاشی د داخۆیانیەكا ڕۆژنامەڤانی دا بەرسڤا هەژمارەكا پرسیارێن ڕۆژنامەڤانان دا.
ل دۆر ناڤەرۆكا وێ نامەیا بۆ سەرۆك وەزیرێن ئیراقێ هنارتی، مەسرور بارزانی گوت» ژ بلی هنارتنا نامەیێ، سەبارەت ڤی بابەتی (هنارتنا 700 ملیار دیناران مەهانە) من ل گەل سەرۆك وەزیرێن ئیراقێ ئاخڤتیە. ل دەمێ خوە مە داخوازا گۆژمەیێ پارەیێ ئەو شەش مەهێن ئەڤسالە ماین كریە بۆ وێ چەندێ بۆ خەلكێ كوردستانێ دابین بكەن، بەلێ ئەوان بڕیار دا پارەی بۆ سێ مەهان بنێرن، مە داخوازا 800 ملیار دیناران كر، بەلێ جڤاتا وەزیرێن ئیراقێ بڕیار ل سەر 700 ملیار دیناران دا. بۆ سێ مەهێن دی مە دیسان ئاخفت و ئەوا گوت ل مەها 12 پێدڤیە تەسفیا حیساباتان بهێتە كرن بۆ وێ چەندێ بزانن چ مایە دابین بكەن. ئەم ژی دێ چاڤەڕێی وان بین كو سۆزێن خوە بجهبینن».
سەرۆكێ حوكمەتا هەرێما كوردستانێ ئاماژە ب وێ چەندێ كر حوكمەتا فیدرالی ئەگەرێ گیروبوونا بەلاڤكرنا مووچەیێن فەرمانبەرێن هەرێما كوردستانێ بوو و دبێژیت» مە داخواز كریە كو دووماهی ب ڤان كێشەیان بهێت و خەلكێ هەرێما كوردستانێ ژی وەكو هەموو خەلكێ دی یێ ئیراقێ ب مافێن خوە شاد بیت و ئەو شایستەیێن دارایی كو مافێ وانە ئێدی نەهێنە گیروكرن».
ل ڕۆژا ئێكشەمبی 12/11/2023، شاندەكێ بلند یێ وەزارەتا پەترۆلا ئیراقێ ب سەرۆكایەتیا حەیان عەبدولغەنی، جێگرێ سەرۆك وەزیران و وەزیرێ پەترۆلا فیدرال و شاندەكێ د گەلدا گەهشتە هەولێرێ و پاشی ل گەل هەر ئێك ژ نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ كۆمبوو.
سەرۆكێ حوكمەتا هەرێما كوردستانێ دیاركر» مە كۆمبوونەكا باش هەبوو ل گەل وەزیرێ پەترۆلا ئیراقێ كو د هەمان دەمدا جێگرێ سەرۆك وەزیرێن ئیراقێ یە ژی. ئەوا ل سەر هەرێمێ بوو ژ ڕوویێ كارێ تەكنیكی یان ژی قانوونی، هەر چ ئەركێ ل سەر حوكمەتا هەرێما كوردستانێ یێ هاتیە بجهئینان. مە هەموو تشت ل گەل وان باسكرن، دێ مینیت ل سەر وێ چەندێ كو مافێن خەلكێ كوردستانێ وەكو خوە كو د دەستووری دا هاتیە، ئەوژی ڕێزێ ل وان مافان بگرن و بجهبینن».
سەرۆكێ حوكمەتا هەرێما كوردستانێ ئاماژە كر» د ئاخڤتنان دا ئەم گەهشتینە تێكگەهشتنەكا باش وئەوان گوت دێ زڤرین بۆ وێ چەندێ دوماهی بڕیار ل سەر پێشنیازان بدەین . من ئومێدەكا مەزن هەیە كو ئینشائەللا ئەنجامەكێ باش و بەرسڤەكا باش بۆ خەلكی ژی دێ هەبیت».
مەسرور بارزانی ڕۆهنكر ژی» ئەگەر بۆ دوبارە هنارتنا پەترۆلا هەرێما كوردستانێ هەیە و مە ل سەر ڤی بابەتی ئاخڤتیە، بەلێ پێدڤیە مافێن هەرێما كوردستانێ ب گۆڕەی دەستووری ل بەرچاڤ بهێنە وەرگرتن».
سەبارەت سەرەدانا وی بۆ فیستەڤالا پەیمانگەها هونەریچن جوان ل هەولێرێ، سەرۆكێ حوكمەتا هەرێما كوردستانێ گوت» ئەز ب خوە حەز ژ هونەری دكەم، ب تایبەتی هونەرێ شێوەكاری، لەوما گەلەك من پێخوەشبو بهێم سەرەدانا فیستەڤالێ بكەم و بزانم ئەوا ل ڤێرێ هاتیە كرن، كارێ گەنجێن مەیە كو ل قۆناغێن جودا یێن كارێ خوە دا، تشتێ گەلەك جوان كریە و من ئومێدەكا مەزن ب وان هەیە كو دێ شێن ببن هونەرمەندێن گەلەك مەزن ل پاشەڕۆژێ».

سكرتێرا بەرێ یا پەرلەمانێ كوردستانێ ئاشكراكر، هندەك ئالی كار بۆ نەهێلانا كورسیێن توركمانان دكەن و ئەم ژی وەكو گەلێ توركمان ڕازینابین كورسیێن توركمانان نەمینن هەروەسا دبێژیت، تنێ پەرلەمانێ كوردستانێ شیان هەنە دەستكاریا كورسیێن توركمانان بكەت.
مونا قەهوەچی، سكرتێرا بەرێ یا پەرلەمانێ كوردستانێ بۆ ڕۆژنامەیا (ئەڤرۆ) گوت» كورسیێن كۆتا ب گۆڕەی قانوونێ هاتینە جهگیركرن و ژبلی پەرلەمانێ كوردستانێ چو ئالیەكێ دی نەشێت دەستكاریا كورسیێن كۆتا بكەت، چونكە ئەم ڕازینابین دەستكاریا كورسیێن توركمانان بهێتەكرن، ڕاستە ئێكەتیێ ل دادگەها فیدڕالی سكالا ل سەر قانوونا هەلبژارتنان تۆماركریە و تێدا داخوازا نەهێلانا كورسیێن كۆتا كریە بۆ پێكهاتەیێ توركمان، بەلێ دادگەها فیدڕالی ژی دەستهەلات نینە بۆ نەهیلانا كورسیێن كۆتا،».
مونا قوهوەچی پتر گوت» ئەو سكالایا هاتیە تۆماركرن ل سەر قانوونا هەلبژارتنێن هەرێما كوردستانێ یە، دادگەها فیدڕالی دەستهەلات هەیە بۆ ڕەتكرنا قانوونا هەلبژارتنان، بەلێ قانوونا هەلبژارتنان ژی بهێتە ڕەتكرن چو پەیوەندی ب كورسیێن كۆتا ڤە نینە، تنێ د ئێك حالەتدا دەستكاریا كورسیێن كۆتا دهێتەكرن ئەوژی دەمێ پەرلەمانێ كوردستانێ قانوونا هەلبژارتنان ڕاستڤە دكەت دشێت دەستكاریا كورسیێن كۆتا بكەت، پەرلەمانێ كوردستانێ ژی ژئالیێ دادگەها فیدڕالی ڤە هاتیە ڕاگرتن ئەڤە دبیتە ئەگەر پەرلەمان ژی نەشێت د دەمێ نوكەدا قانوونا هەلبژارتنان ڕاستڤە بكەت، مخابن بابەتێ كورسیێن توركمانان گەلەك یێ هاتیە مەزن كرن».
قەهوەچی ئاماژەكر» ب گۆڕەی قانوونا هەلبژارتنێن هەرێما كوردستانێ یا سالا ١٩٩٢ێ تنێ پێنج كورسیێن كۆتا بۆ پێكهاتەیێ كریستیان هاتینە دیاركرن، بەلێ ددوڤدا قانوون هاتیە ڕاستڤەكرن و پێنج كورسیێن كۆتا بۆ پێكهاتەیێ توركمان ژی هاتینە دیاركرن، هەكە ئێكەتیێ سكالا هەیە ل سەر كورسیێن توركمانان بۆچی سەرۆكێ بەرێ یێ ئێكەتیێ ب خوە ڕازیبوویە پێنج كۆرسی بۆ توركمانان بهێنە دیاركرن؟ ئەم وەكو مللەتێ توركمان ب هیچ شێوەیەكی ڕازینابین كورسیێن كۆتا بهێنە كێمكرن و نەهێلان، چونكە توركمان نەتەوەیەكێ سەرەكی یە ل ئیراقێ و كوردستانێ، مافێ توركمانایە نوونەرێن خوە ل پەرلەمانێ كوردستانێ هەبن، هەكە بێژن پێنج كورسی گەلەكن ژی ئەڤە چو بەلگە نینە، ژ بەر كو سەرژمێری نەهاتیەكرن هەتا بزانن هەژمارا وەلاتیێن توركمان بەهرا پێنج كورسیان ناكەن، ئەم هیڤیدارین چو ئالیەك نەبیتە ڕێگر هەمبەر مافێن گەلی توركمان وەكو گەلەكێ ڕەسەنێ كوردستانێ، هیچ دەمەكی توركمان نەبووینە ژێدەرێ ئاریشەیان ل هەرێما كوردستانێ و ڕێگر نینن ل هەمبەر پڕۆسەیا هەلبژارتنان».

دوهی سێشەمبی 14/11/2023، مەسرور بارزانی، سەرۆكێ حوكمەتا هەرێما كوردستانێ، پێنجەمین پێشانگەها بازرگانی یا نێڤدەولەتی یا پیشەسازی و بیناسازی ل هەولێرێ ڤەكر.
پیشانگەها بازرگانی یا نێڤدەولەتی یا پیشەسازی و بیناسازی Construct Iraq 2023 كو یا تایبەتە ل كەرەستێن بیناسازی، كارەبا، سیستەمێ سار و گەرم، ب پشكداریا 212 كۆمپانیێن بیانی و ناڤخوەیی بڕێڤەدچیت، ژوان 178 كۆمپانیێن بیانی نە، كو ژ 10 وەلاتێ جودا جودا هاتینە وەكو توركیا، ئیران، هندستان، چین، ئیتالیا، ئیمارات، لیتوانیا، ئازەربایجان. هەروەسا 36 كۆمپانیێن ناڤخوەیی، ل سەر ئاستێ ئیراقێ و هەرێما كوردستانێ د پشكدارن.

وەزیرێ ئەوقاف و كاروبارێن ئایینی ل هەرێما كوردستانێ ڕاگەهاند، هەڤبەركرن ب پتریا وەلاتێن دەڤەرێ، ئازادیا ئایینی ل هەرێما كوردستانێ یا هەی، ئەڤێ چەندێ ژی وەكریە هەرێما كوردستانێ ببیتە نموونەیەكا جوان یا پێكڤەژیانا ئایینی ل ڕۆژهەلاتا ناڤین.
پشتیوان سادق، وەزیرێ ئەوقاف و كاروبارێن ئایینی ل هەرێما كوردستانێ ل ئاكرێ ڕاگەهاند» هەرێما كوردستانێ هەڤبەركرن ب پتریا وەلاتێن دەڤەرێ، ل كێم وەلاتێن دەڤەرێ وەكو هەرێما كوردستانێ ئازادیا ئایینی هەیە، هەر وێ چەندێ ژی وەكریە كوردستان ببیتە نموونەیەكا جوان ل ڕۆژهەلاتا ناڤین».
گوت ژی» پێدڤیە وەبكەین هەستێ نەتەوەیی و نیشتمانپەروەری و ئاخا مە د پاراستی بن، چونكە هەكە وەلاتێ مە یێ ئارام نەبیت و سەقامگیری تێدا نەبیت، دوبارە دێ مزگەفتێن مە تێكدەن، مخابن ئەو عەقلیەتا ستەم ل مللەتێ مە دكر، نوكە ژی ب جۆرەكێ دی ل ئیراقێ مایە، دوهی ب كیمیابارانكرن و ئەنفال، هەكە بو وان ڕێكبكەڤیت ب ناڤێ ئابۆری و دادگەها فیدرالی دێ هەمان ستەمێ كەن».

پەرلەمانتارەکێ کورد ل تورکیا دیار دکەت، سیاسەتا نها یا تورکیا ل هەمبەر کوردان چو ئەنجامێن خوە نابن، دوژمناتیا دەولەتا تورکیا ل هەمبەر کوردان هەتا نها ژی بەردەوام دکەت و دڤێت تورکیا دەست ژ دژبەریا کوردان بەردەت و ب چارەسەرکرنا پرسا کوردی ژی بێگومان دێ تورکیا بهێز کەڤیت.

سینان چیفت یورەک ئەندامێ پەرلەمانێ تورکیا سەر ب فراکسیۆنا هەدەپێ راگەهاند، سیاسەتا نها یا تورکیا ل هەمبەر کوردان گەلەک خرابە، دوژمناتیا تورکیا ل هەمبەر کوردان ل تورکیا، ئیراقێ، سووریێ بەردەوام دکەت، رۆژانە فرۆکێن شەری یێن تورکیا ئێرشێ دەڤەرێن سنۆری یێن هەرێما کوردستانێ دکەن، ل رۆژئاڤایێ کوردستانێ ژی رەوشەکا خرابتر یا هەی، د ناڤ تورکیا دا ژی رۆژانە سیاسەتمەدارێن کورد دهێنە دەستەسەرکرن، تورکیا دڤێت ب سیاسەتا ژناڤبرنا ل گۆر خوە پرسا کوردی چارەسەر بکەت و گۆت: (ئەزموونێن چەندین سالێن بۆری بۆ مە سەلماندینە کو ب شەری پرسا کوردی ناهێتە چارەسەرکرن، هندەک هێزێن شەرخواز ل تورکیا هەنە و دخوازن ب شەری هەموو بۆدجێ تورکیا بۆ وان بهێتە تەرخانکرن، ژ بەر ڤێ یەکێ ژی هەتا نها پرسا کوردی و پرسێن دی یێن تورکیا نەهاتینە چارەسەرکرن، ژ بەر کو هەتا نها پرسا کوردی نەهاتیە چارەسەرکرن، قەیرانا ئابووری ژی ل تورکیا دژوارتر لێ هاتیە و نها وەلاتیێن تورکیا د رەوشەکا گەلەک خراب دانە، هەژاری زێدەتر لێ هاتیە و ئەو یەک ژی ب چو رەنگەکێ ناهێتە قەبوول کرن).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، دڤێت دەستهەلاتا نها یا تورکیا رێزی ل کوردان بگریت و کار بۆ چارەسەرکرنا پرسا کوردی بکەت، ئەڤرۆکە یان ژی سوباهی تورکیا یا نەچار پرسا کوردی چارەسەر بکەت، دەستهەلاتا ئاکپارتیێ گەلەک باش دزانیت هەتا پرسا کوردی نەهێتە چارەسەرکرن دێ قەیرانێن نها ل تورکیا بەردەوام بن، ژ بەر هندێ ژی ئەم دبێژین بلا هەر زوو دەست ب قۆناغەکا نوو یا ئاشتیێ و چارەسەرکرنا پرسا کوردی بهێتە کرن، لێ مخابن ژ بەر کو نها ئاکپارتی بوویە هەڤپەیمانا پارتا بزاڤا نەتەوەپەرست ئەو یەک ژی کاریگەریەکا گەلەک خراب ل سیاسەتا تورکیا ل هەمبەر کوردان کریە و گۆت: (پارتا بزاڤا نەتەوەپەرست ل سەر بنەمایێ دوژمناتیا گەلێ کورد سیاسەتێ دکەت، هەکە ئاکپارتیێ بڤێت تورکیا ژ رەوشا نها یا خراب قورتال بکەت، دڤێت بەری هەر تشتەکێ خوە ژ پارتا بزاڤا نەتەوەپەرست دوور بکەت، چونکی هەتا هەڤپەیمانیا ئاکپارتیێ ل گەل مەهەپێ بەردەوام بیت، نە پرسا کوردی دهێتە چارەسەرکرن و نە ژی تورکیا دشێت ببیتە ئەنداما ئێکەتیا ئۆرۆپا، ژ بەر ڤێ یەکێ ژی دڤێت بەری هەر تشتەکێ ئاکپارتی خوە ژ مەهەپێ دوور بکەت و دەست ب قۆناغەکا نوو بۆ بهێزکرنا تورکیا بکەت، ژ بۆ ڤێ یەکێ ژی گرنگە بەری هەر تشتەکێ پرسا کوردی بهێتە چارەسەرکرن).

ب هەلكەفتا وەرگرتنا پۆستێ وەزیرێ دەرڤەیێ بریتانیا، مەسرور بارزانی، سەرۆكێ حوكمەتا هەرێما كوردستانێ پیرۆزباهیێ ل دەیڤید كامیرۆن دكەت.
دوهی دوشەمبی 13/11/2023، ب بڕیارا ڕیشی سوناك، سەرۆك وەزیرێن بریتانیا، دەیڤید كامیرۆن، سەرۆك وەزیرێن پێشتر یێ بریتانیا وەكو وەزیرێ دەرڤەیێ وی وەلاتی هاتە دەستنیشانكرن.
مەسرۆر بارزانی، سەرۆكێ حوكمەتا هەرێما كوردستانێ د پۆستەكی دا ل تۆرا جڤاكی یا ئێكس (تویتەرا بەرێ) پیرۆزباهی ل دەیڤید كامیرۆن كر ب هەلكەفتا وەرگرتنا پۆستێ وەزیرێ دەرڤەیێ بریتانیا.
سەرۆكێ حوكمەتا هەرێما كوردستانێ د پشكەكا دی یا پۆستێ خوە دا ئاماژە ب وێ چەندێ كر « چاڤێ مە ل وێ ئێكێ یە ژ نێزیك كار ل گەل هەڤدو بكەین».

سەرۆكێ هەرێما كوردستانێ، ب شاندەكێ بلند یێ ئیراقێ گوت: گرنگ و پێدڤیە هەر چ زووترە پەترۆلا هەرێما كوردستانێ بهێتە هنارتن.
نێچیرڤان بارزانی، سەرۆكێ هەرێما كوردستانێ دوهی دوشەمبی 13/11/2023 پێشوازی ل شاندەكێ بلند یێ ئیراقێ كر كو بۆ دانوستاندنێ ل سەر بابەتێ هنارتنا پەترۆلا هەرێما كوردستانێ، هاتیە هەولێرێ.
حەیان عەبدولغەنی، جێگرێ سەرۆك وەزیرێن ئیراقێ بۆ كاروبارێن وزێ و وەزیرێ پەترۆلا ئیراقێ، سەرۆكێ شاندێ بلند یێ ئیراقێ یە و دو جێگرێن وی ژی ئەندامێن شاندی نە، كو بەری دو ڕۆژان گەهشتنە هەولێرێ و چەند كۆمبوون ل دۆر گەمترین پرسا د ناڤبەرا بەغدا و هەولێرێ كرن، ئەوژی پرسا دەست ب هنارتنا پەترۆلا هەرێما كوردستانێ یە.
سەرۆكایەتیا هەرێما كوردستانێ بەلاڤكر»د كۆمبوونێ دا كو وەزیرێ سامانێن سروشتی ب وەكالەت ل حوكمەتا هەرێما كوردستانێ بەرهەڤبووی، دوماهی پێنگاڤ و پێرابوون بۆ دەستپێكرنا هنارتنا پەترۆلا هەرێما كوردستانێ و دانوستاندنێن ئالیێن پەیوەندیدارێن حوكمەتا فیدرالی یا ئیراقێ و حوكمەتا هەرێما كوردستانێ ل دۆر ڤێ پرسی هاتنە باسكرن».
د كۆمبوونەكێ دا سەرۆكێ هەرێما كوردستانێ دوپاتی ل پشتەڤانیا خوە بۆ دانوستاندنێ و پێنگاڤێن حوكمەتا فیدرالی و حوكمەتا هەرێما كوردستانێ بۆ چارەسەركرنا كێشەیان و دوبارە هنارتنا پەترۆلا هەرێما كوردستانێ كر، هەروەسا ئاماژە ب وێ چەندێ كر ڕاوەستیانا هنارتنا پەترۆلا هەرێما كوردستانێ زیانەكا مەزن ب داهاتێ گشتیێ ئیراقێ گەهاندیە، لەوما دەستپێكرن هەر چ زووتر ب هنارتنا پەترۆلا هەرێما كوردستانێ، ب گرنگ و پێدڤی زانی.
ئاخڤتنێن نێچیرڤان بارزانی د دەمەكی دانە هنارتنا پەترۆلا هەرێما كوردستانێ ل 25/3/2023 پشتی بڕیارەكا دادگەها ناڤبەریا نێڤدەولەتی ل پاریس ل سەر سكالایەكا ئیراقێ دژی توركیا، هاتبوو ڕاگرتن.
زێدەتر ژ حەفت مەهان هنارتنا پەترۆلا هەرێما كوردستانێ هاتیە ڕاگرتن، كو هەتا نوكە زیان ب زێدەتر ژ حەفت ملیار دۆلار گەهاندیە داهاتێ ئیراقێ.
وەزیرێ پەترۆلا ئیراقێ، د كۆمبوونێ دا دوپاتی ل خواستا ڕژد یا حوكمەتا فیدرالی یا ئیراقێ و محەمەد شیاع سۆدانی، سەرۆك وەزیرێن ئیراقێ كر بۆ چارەسەركرنا كێشەیان و دەستپێكرنا هنارتنا پەترۆلا هەرێما كوردستانێ، هەروەسا پوختەیەك ل دۆر ئارمانجا سەردانا خوە بۆ هەرێما كوردستانێ و ئەنجامێ دانوستاندنێن ئالیێن پەیوەندیدارێن حوكمەتا فیدرالی و حوكمەتا هەرێما كوردستانێ، بەرچاڤكر.