ئەڤرۆ

هەولێر، سولین سلێمان

چەڤدێرەكێ سیاسی دبێژیت، ل وەلات و ناڤەندێن نێڤدەولەتی ب ڕێز مامەلە ل گەل هەرێما كوردستانێ دهێتە كرن.
بەری چەند ڕۆژان ڕۆژنامەیا ئەلسەباح كو دهێتە هەژمارتن ڕۆژنامەیەكا فەرمی یا ئیراقێ دڕاپورتەكا خوە دا ئاماژە ب ڕاپرسیەكێ كربوو كو خەلكێ كوردستانێ دخوازن ڤەگەڕن سەر حوكمەتا بەغدا، ڤێ چەندێ ژی دەنگڤەدانەكا زۆر ل دووڤ خوە ئینا.
سەلام عەبدوللا، چاڤدێرێ سیاسی و سەرنڤیسەرێ ڕۆژنامەیا خەبات زمان حالێ پارتی دیموكراتی كوردستان بۆ ڕۆژنامەیا (ئەڤرۆ) گوت» ئەو ڕاپرسیا كو ڕۆژنامەیا ئەلسەباح یا ئێراقی د ڕاپۆرتێ خوەدائاماژە پێكری، ڕاپرسیەكا ڕاست و دروست نینە و ب تمامی رێزنەگرتنە ل حوكمەتا هەرێما كوردستانێ ، چونكە هەكە وان ڕێز ل هەرێما كوردستانێ گرتبان بەلاڤكرنا بابەتەكێ وەسا ل بەرپەرێ ئێكێ بەلاڤ نەدكر».
سەلام عەبدوللا زێدەتر گوت» ئەو ڕاپرسیا وێ ڕۆژنامەیا ئێراقی پشت بەستن ل سەر كری وتێدا دیاركریە كۆ پتریا خەلكێ هەرێما كوردستانێ دخوازیت بچنە ب سەر بەغدا ڤە و فیدرالیەتێ ڕەت دكەن، هیچ ڕاستیەك ژبۆ نینە دیسا ژی ڤێ ڕۆژنامێ پشت ب سەنتەرەكێ ئەكادیمی گرێنەدایە ژبۆ ڤێ ڕاپرسیێ چونكە دبیت بووچۆنا ئالیەكی یان كەسەكی هاتبیتە وەرگرتن كو بوچونەكا بەرۆڤاژی هەبیت، لێ وێ ڕۆژنامێ وەسا دیاركریە كۆ گەلەك كەس و ئالی دگەل وێ دانە ڤەگەرنەڤە سەر بەغدا پشتی وێ ئەڤ جۆرە بووچۆنە بۆ خوە كریە ڕاپرسی».
ئاماژەكر» هەرێما كوردستانێ یا هاتیە دانپێدان كریە ژ ئالیێ نێڤدەولەتی ڤە و هەر وەلاتەك دزانیت كو ئەم هەرێمەكین مافێ خوە مە هەیە و گەلێ مە گەلەك ژ وێ چەندێ هشیارترە كو باوەریێ ب خەونا نەیار و نەحەزان بكەت و خەلكێ مە یێ پێداگیرە كو پشتەڤانیێ ل هەرێما خوە بكەت هەروەسا پێدڤیە دیار بكەین كو د قۆناغا ئەڤرۆدا ل وەلات و ناڤەندێن نێڤدەولەتی چەند ب ڕێزڤە مامەلە دگەل هەرێما كوردستانێ دهێتە كرن».

ئەڤرۆ

سەرۆكا فراكسپۆنا چاكسازی یا توركمانی ڕاگەهاند، پێكهاتەیێ توركمانی یێ بەرهەڤە پشكداریێ د هەلبژارتنێن پەرلەمانێ كوردستانێ دا بكەت و ل گەل وێ چەندێ دایە هەلبژارتن ب شێوەیێ ئێك بازنەیی بهێنە ئەنجامدان.
مونا قەهوەچی، سكرتێرا پەرلەمانێ كوردستانێ و سەرۆكا فراكسپۆنا چاكسازی یا توركمانی گوت» گرنگە بۆچوونا پێكهاتەیێن هەرێما كوردستانێ ل دۆر ڕاستڤەكرنا قانوونا هەلبژارتنێن پەرلەمانێ كوردستانێ ب گرنگ بهێتە وەرگرتن و سوپاسیا ئالیێن سیاسی دكەین، هەكە ل دەمێ داڕێشتنا ڕاستڤەكرنا قانوونا هەلبژارتنان، پشتەڤانیێ ل داخوازیا مە بكەن».
ئەوژی بەرچاڤكر» ئەنجامدانا هەلبژارتنێن پەرلەمانێ كوردستانێ ب سیستەمێ چار بازنەیی (فرەبازنەیی) د بەرژەوەندیا پێكهاتەیان دا نینە، لەوما ئەم ل گەل وی سیستەمی نینین».

ئەڤرۆ

ئەندامەكێ مەكتەبا سیاسی یا پارتی دیموكراتی كوردستان دووپاتیێ ل سەر زڤرینا پارتی بۆ كەركووكێ دكەت و ڕادگەهینیت، پێدڤیە ڕەوشا كەركووكێ ژ ڕویێ كارگێری و ئەمنی ڤە بهێتە ئاساییكرن.
كەمال كەركووكی، ئەندامێ مەكتەبا سیاسی یا پارتی دیموكراتی كوردستان گوت» پارتی وەكو هندەك ئالیان ناكەت كو نوكە ل كەركووكێ ب ڕەزیلی دژین، بەلكو دێ ب سەربلندی بۆ وی باژێری زڤریت و پێدڤیە بارەگەهێن داگیركری یێن پارتی ل كەركووكی بهێنە چۆلكرن».
سەبارەت ڕێككەفتنا زڤرینا پارتی بۆ كەركووكێ، كەمال كەركووكی ئاماژەكر» د ڕێككەفتنا د ناڤبەرا ئالیێن سیاسی یێن ئیراقی بۆ پێكئینانا كابینەیا محەمەد شیاع سودانی كو ل جڤاتا نوونەرێن ئیراقێ ژی هاتبوو پەسەندكرن، هەموو ئالی و پارتێن سیاسی مافێ ئەنجامدانا چالاكیێن سیاسی هەیە ب شێوەیەكێ ئازاد و ب گۆرەی دەستووری».
هەروەسا ڕۆهنكر» دانوستاندن د بەردەوامن بۆ بجهئینانا ناڤەرۆكا وێ ڕێككەفتنێ مە باوەری ب سەرۆك وەزیرێن ئیراقێ و ئالیێن حوكمەت پێكئینای هەیە بۆ بجهئینانا وێ ڕێككەفتنا دناڤبەرا واندا هەی».
ل دۆر نەرازیبروونا هندەك ئالیێن پێكهتەیان ل بەرامبەر زڤرینا پارتی بۆ كەركووكێ، كەمال كەركووكی دووپاتی ل سەر ڕژدبوونا پارتی بۆ زڤرینێ بۆ كەركووكێ كر و دیاركر» ل كەركووكێ ڕێز ل مافێن هەموو پێكهاتەیان دێ هێتە گرتن و پشتەڤانیێ ل پێكڤەژیانا هەموو پێكهاتەیێن نەتەوەیی و ئایینی یێن ڕەسەن ل باژێرێ كەركووكێ دكەین».
د پشكەكا دی یا ئاخڤتنێن خوە دا، كەمال كەركووكێ ڕاگەهاند» پارتی بزاڤێ دكەت د چارچۆڤەیێ دەستووری دا هەموو وان ڕێككەفتنێن هاتینە كرن وەكو خوە بهێنە بجهئینان و ڕەوشا كارگێری و ئەمنی ل باژێرێ كەركووكێ بهێتە ئاساییكرن».
خویاكر ژی» پارتی ب سەربلندی دێ زڤریتە باژێرێ كەركووكێ و وەكو هندەك ئالیان ناكەت كو نوكە ب ڕەزیلی ل وی باژێری دژین». باس ل وێ چەندێ ژی كر كو» ڕاكرنا ئالایێ كوردستانێ ب گۆرەی مادەیێ 117 ژ دەستوورێ ئیراقێ مافەكێ سروشتیە و پێدڤیە ئەم هەموو ڕێزێ ل ئالایێ كوردستانێ بگرین، ل گەل وێ چەندێ ژی دا لادانا پارێزگەرێ نوكە یێ سەپاندی و ڤەگەراندنا مافێن كوردان كو پشتی 16 ئۆكتۆبەرا 2017 ژێ هاتینە وەرگرتن، پشكەكەن ژ پاكیچەیا ئاساییكرنا ڕەوشا كەركووكێ».

هەلەبجە، عەزیز هەورامی

بەرپرسێ مەكتەبا ڕێكخستنا سلێمانیێ – هەلەبجە و ئیدارەیا ڕانیا یا پارتی دیموكراتی كوردستان، ڕاگەهاند، ل ژێر بڕیارا سەرۆك بارزانی و مەكتەبا سیاسی، هەردو بەرپرسێن لقێن 12 و 21 هاتنە گوهۆڕین، سلێمانیێ و هەلەبجە و ڕانیا ل دەف پارتی د گرنگن و دخوازین ژ ڕویێ حزبی و حوكمەتێ ژی ڤە گرنگیێ پێ بدەین و ڕۆلێ ئۆرگانێن مە یێ كاریگەر بیت د ناڤ خەلكی دا.
عەلی حسێن، بەرپرسێ مەكتەبا ڕێكخستنا سلێمانیێ – هەلەبجە و ئیدارەیا ڕانیا یا پارتی دیموكراتی كوردستان بۆ ڕۆژنامەیا (ئەڤرۆ) گوت» پارتی ل كۆنگرەیێ 14 دەستپێشخەری كریە و دەرگەهێ دانوستاندنێ بۆ هەموو ئالیان ڤەكریە، شاندەكێ بلند یێ پارتی دیموكراتی كوردستان، سەرەدانا هەموو ئالیێن سیاسی یێن كوردستانێ ب ئێكەتی نیشتمانی كوردستان ڤە كریە».
عەلی حسێن ئاماژەكر» ئەم چاڤەڕێی ئێكەتی نیشتمانی كوردستان دكەین سەرەدانا مە بكەت، تاكو دانوستاندنێ ل سەر وان گرفتان بكەین، ب تایبەتی هەلبژارتنان، هیچ دەلیڤە نەمایە بۆ وێ چەندێ هەلبژارتن بهێنە پاشئێخستن و جڤاكێ نێڤدەولەتی و وەلاتیێن كوردستانێ ژی داخوازا ئەنجامدانا هەلبژارتنان ژ مە دكەن، داخوازێ ژ هەموو ئالیێن سیاسی دكەین ب گیانێ بەرپرسیارەتیێ، بەرامبەر ڕەوشا نوكە یا كوردستانێ و ئیراقێ ڕەفتارێ بكەین و هەموو گرفتێن هەین چارەسەر بكەین».
زێدەتر گوت» بەرپرسێ مەكتەبا هەلبژارتن یێ ئێكەتی نیشتمانی كوردستان پەیوەندی ب مەكر تاكو دانوستاندنێ بكەین كا گرفت چنە، تاكو بۆ كۆمبوونێن داهاتی و كۆمبوونێن پەرلەمانێ كوردستانێ ژی، ڕاستڤەكرنا قانوونان و پركرنا وان ڤالاتیێن ل كومسیۆنێ هەین».
گوت ژی» تێبینی هەموو ل سەر فرەبازنەیا هەلبژارتنایە، ژ بەر وێ چەندێ وەكو پارتی دیموكراتی كوردستان ل گەل فرەبازنەیی نەبویون، قانوونا ئێك بازنەیێ هەبوو تاكو هەلبژارتن نەهێنە پاشئێخستن و مە دخواست هەلبژارتن بهێنە ئەنجامدان و بۆ هەلبژارتنێن داهاتی قانوون بهێتە گوهۆڕین بۆ فرەبازنەیی، نوكە ژی مە ل سەر فرەبازنەییێ هیچ گرفت نینە، بابەتێ پێكهاتەیان ژی مە بۆ وان ب خوە هێلایە ئەو بخوە بڕیارێ بدەن».
ل دووماهیێ گوت» پارتی بەرهەڤی هەر دانوستاندنەكێ یە ل سەر تێبینیێن هەین و نابیت هیچ گرفتەك بمینیت بۆ وێ چەندێ هەلبژارتن نەهێنە ئەنجامدان».

ئەڤرۆ

سالار محەمەد دۆسكی:

شیرەتكارێ مەكتەبا سیاسی یا پارتی دیموكراتی كوردستان ڕاگەهاند، دڤێت ئالیێ گرفت دروستكەرو ڕێگریێ ل حوكمڕانیا هەرێما كوردستانێ دكەن ژئالیێ خەلكی ڤە ل هەلبژارتنان بهێنە سزادان چونكە هەكە باوەری ب دیموكراسیەتێ هەیە نابیت ڕێگریێ ل ئەنجامدانا هەلبژارتنێن پەرلەمانێ كوردستانێ بكەن.
عارف ڕوشدی، شیرەتكارێ مەكتەبا سیاسی یا پارتی دیموكراتی كوردستان بۆ ڕۆژنامەیا (ئەڤرۆ) گوت» ڕاستیەك هەیە دڤێـت هەر كەسەك بزانیت كو دەسپێكا ئاڤابوونا دەزگەهێن هەرێما كوردستانێ ل سەر بنەمایێن دیموكراتی هاتینە ئاڤاكرن لەوما نابیت ئالیێن سیاسی ڕێگربن ل ئەنجامدانا هەلبژارتنان چونكە هەر كێماسیەك د ڤی بیاڤی دا برینداركرنا هەرێما كوردستانێ و خەلكێ وێ یە، دڤێت ئەف سالە هەلبژارتن بهێنە ئەنجامدان چ دەلیڤە نینە بۆ خوە ڤەدزینێ چونكە هەكە هات و هەلبژارتن نەهاتنەكرن دێ هەرێما كوردستانێ كەڤیتە دبن چەندین پرسیاران ڤە».
عارف ڕوشدی ئەو ژی گوت» بەری چەند ڕۆژان بەرپرسەكێ ئالیەكێ سیاسی ل كوردستانێ د دیدارەكا ڕۆژنامەڤانی دا وەسا دیاركر كو بەرپەرەكێ سپی نە و فریشتە نە، ژبیر كربوو چەندین ساڵە نوێنەرایەتی هەنە د پەرلەمانی وكابینێن حكومەتێدا ، بەلێ هەر دەمێ دیت كێشەیەك هەیە خوە ژ بەرپرسیارەتیێ ڤەدكێشن.. باشە دەمێ هین ل پەرلەمانێ كوردستانێ دا بوون بۆچی هەوە كارنەدكر ئەو قانوونا هوون باس ژێ دكەن كێماسی هەنە ل دەمەكێ گونجایی دا بهێتە چارەسەركرن ؟ یا فەر ئەوبوو هەكە خواستا وان ڕاستڤەكرنا قانوونا هەڵبژارتنان با دڤیا بەری دو سالان ژدەمێ هەلبژارتنان ئەو هەلویستە هەبان نەكو د دەراڤەكی تەنگدا».
ئاماژەكر» ئەو مەرجێن چەند ئالیان باس دكر ، نها پارتی دیموكراتی كوردستان هەموو پەسندكرینە لەوما نابیت ئێدی ڕێگرێێ ل ئەنجامدانا هەلبژارتنان بكەن ؟ هەر ئالیەكێ سیاسی نوكە ڕێگربیت دڤێت خەلكێ كوردستانێ ل سەر سندوقێن دەنگدانێ وی ئالی سزابدەت ، چونكە نەیا ڕەوایە بەرژوەندییا مللەتی دپێخەمەت بەرژوەندێن حزبیدا بێخنە دمەترسیێ دا».
هەروەسا گوت» پێدڤیە هەموو ئالیان هەكە باوەری ب دیموكراسیەتێ هەیە هەڤكاربن بۆ ئەنجامدانا هەلبژارتنان و ئەنجامان ژی قەبوول بكەن ، هەكە ئالیەكێ سیاسی كێشەیەك هەیە ئەو كێشەیێن وانن نەیێن خەلكی نە ؟ هەر وەسا هەكە دبینن دەنگ و كورسییێن وان دێ كێم بن، ئەو ئاریشەیا وانە نەیا خەلكی یە ؟ یا ڕاست ئەوە ل جهێ ڕێگریێ ل هەلبژارتنان بكەن ، بلا بخودا بچنەڤە و كێماسیێن خوە چارەسەربكەن دا خەلكی باوەریەكا باشتر پێ هەبیت».
ل دووماهیێ گوت» داخوازێ ژ ئالیێن سیاسی دكەم بەرژەوەندیا مللەتێ كورد ل سەر هەموو بەرژوەندیان بیت ، ب چ ئەگەرەكی ڕێگری ل ئەنجامدانا هەلبژارتنان نەهێتەكرن و هەر ئالیەك ب ئەنجامان رازی بیت».

ئەڤرۆ

سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ ڕادگەهینیت، دانوستاندنێن د ناڤبەرا بەغدا و هەولێرێ بۆ ڕێككەفتنێ ل سەر ڕەشنڤیسێ قانوونا پەترۆل و غازێ د بەردەوامن و هەردو شاندێن دانوستاندكار ل سەر بەرهەڤكرنا ڕەشنڤیسەكێ نوو بۆ قانوونا پەترۆل و غازێ كاردكەن.
ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ گوت» د دەمێ سێ حەفتیێن بۆریدا شاندێ هەرێما كوردستانێ سێ جاران سەرەدانا بەغدا كریە بۆ ڕێككەفتنێ ل سەر پرسا بودجەی و ڕەشنڤیسێ قانوونا پەترۆل و غازێ».
ژ سالا 2003 ل ئیراقێ دو ڕەشنڤیسێن پەترۆل و غازێ هاتینە بەرهەڤكرن، ئێكەم ڕەشنڤیسێ پرۆژەیێ قانوونا پەترۆل و غازێ ل ئیراقێ ل سالا 2007 هاتیە بەرهەڤكرن كو ژ 43 مادەیان پێكهاتبوو، بەلێ ژ ئەگەرێ ناكۆكیێ د ناڤبەرا بەغدا و هەولێرێ دا ل جڤاتا نوونەران نەهاتیە پەسەندكرن. پاشی ل سالا 2011 پرۆژە قانوونەكا دی بۆ پەترۆل و غازێ ل جڤاتا نوونەرێن ئیراقێ هاتە بەرهەڤكرن كو ژ 49 مادەیان پێك دهات، بێی كو دەنگ ل سەر بهێتە دان.
ڤیان سەبری دبێژیت» دانوستاندن ب وی ئاراستەی نە كو ڕەشنڤیسەكی دی و نوو بهێتە بەرهەڤكرن، چونكە ئەم دووپاتیێ دكەین دانوستاندن ل سەر بنەمایێ دەستوورێ بەردەوامێ ئیراقێ و ل سەر بنەمایێ مادەیێن 111 و 112 ژ دەستووری بن. پێدڤیە ژی دەستەیەكا تایبەت ژی هەبیت ب گۆرەی مادەیا 121 ژ دەستووری بۆ بەلاڤكرنا داهاتێن فیدرالی ب شێوەیەكێ دادپەروەرانە».
سەبارەت قۆناغێن بەرهەڤكرنا ڕەشنڤیسی و هنارتنا وی بۆ جڤاتا نوونەران، سەرۆكا فراكسیۆنا پارتی بەرچاڤكر» دانوستاندن هەتا نوكە دباشن، بەلێ هێشتا ڕەشنڤیس نەهاتیە تمامكرن، پێدڤیە لەز بهێتە كرن د بەرهەڤكرنا وی دا، پشتی دهێتە تمامكرن دێ جڤاتا وەزیرێن ئیراقێ پەسەندكەت و پاشی هنێریتە جڤاتا نوونەران بۆ ڤەخواندنێ و پەسەندكرنێ».
ڤیان سەبری ئاماژەكر ژی» حوكمەتا هەرێما كوردستانێ یا ڕژدە ل سەر بزاڤێن خوە بۆ ڕێككەفتنێ ل گەل حوكمەتا فیدرالی و بەغدا ژی خواست هەیە. ب گۆرەی ڕێككەفتنا دناڤبەرا هەردو ئالیان دا پێدڤیە هەردو سەرۆك وەزیر بهێنە سەرپشككرن بۆ چارەسەركرنا گرفتان».
ڕەشنڤیسێ قانوونا بودجەیا گشتی یا ئیراقێ بۆ سالا 2023، ئێك ژ پرسێن دی یە كو بەغدا و هەولێر دانوستاندنێ ل سەر دكەن بۆ ڕێككەفتنێ ل سەر بەهرا هەرێما كوردستانێ د وێ قانوونێ دا. ل سالا 2022 ئیراقێ قانوونا بودجەی نەبوو، بەلێ حوكمەتا ئیراقێ بۆ چەند هەیڤێن كێم، هەیڤانە گۆژمێ 200 ملیار دیناران وەكو پێشینە بۆ مووچێ فەرمانبەرێن هەرێما كوردستانێ دهنارت، بەلێ ل ڕۆژا 25/1/2023 دادگەها فیدرالی ل ئیراقێ، هنارتنا 200 ملیار دیناران هەیڤانە بۆ هەرێما كوردستانێ ب نە دەستووری هەژمارت.
ڤیان سەبری دبێژیت» پێدڤی بوو ڕەشنڤیسێ بودجەی ل هەیڤا كانوونا دویێ یا ئەڤ سالە هاتبا هنارتن بۆ جڤاتا نوونەران، بەلێ چەند هۆكارەك بۆ گیروكرنا وێ چەندێ هەنە، ژوان نە جهگیربوونا بهایێ پەترۆلێ و بهایێ دیناری، ل گەل وێ چەندێ ژی دا دانوستاندنێن د ناڤبەرا بەغدا و هەولێرێ بۆ ڕێككەفتنێ».

ئەڤرۆ

حسێن ئەمیر عەبدوللاهیان وەزیرێ دەرڤە یێ ئیرانێ راگەهاند ئەو ب چو رەنگەکێ قەبوول ناکەن بارەگاهێن هێزێن دژبەری ئیرانێ ل هەرێما کوردستانێ بمینن و دڤێت هەموو بارەگاهێن وان بهێنە دائێخستن، وەکو ئیران وان بەری نها ژی چەندین جاران هۆشداری داینە بەرپرسێن هەرێما کوردستانێ و دڤێت ئێدی هەموو بارەگاهێن وان بهێنە دائێخستن و کەسێن تاوانبار ژی دڤێت بهێنە دادگەهکرن.
فەرهاد رۆژهەلاتی چاڤدێرێ سیاسی ژی راگەهاند، کو بابەت پارتێن رۆژهەلاتێ کوردستانێ نینە، چونکی ب سالانە پارتێن رۆژهەلاتێ کوردستانێ چو چالاکیێن سەربازی ل دژی ئیرانێ نەکرینە، لێ نها رەوشەکا نوو هاتیە پێش، ئیران د قەیرانەکا گەلەک مەزن دایە، خوەنیشادانێن چەند مەهێن بۆری ل ئیرانێ ژی نیشا دا خەلک ژ سیستەمێ نها یێ ئیرانێ رازی نینن، وەلاتی ل دژی سیستەمی نە، بێگومان کوردێن رۆژهەلاتێ کوردستانێ ژی ب سالانە داخوازا مافێن خوە دکەن و گۆت: (ئیرانێ دڤێت قەیرانەکا دی ل دەرڤەی سنۆرێن خوە دروست بکەت دا وەسا بابەتێ قەیرانا نها ژبیرا خەلکی ببەت، ژ بەر هندێ ژی بەری نها ئێرشی بارەگاهێن پارتێن رۆژهەلاتێ کوردستانێ ل هەرێما کوردستانێ هاتە کرن، هەروەسا دەمەکە بەرپرسێن ئیرانێ گەفان دکەن و داخواز ژ بەغدا و هەولێرێ ژی دکەن، کو دڤێت بارەگایێن هەموو پارتێن کوردی بهێنە دائێخستن، ئەو یەک ژی نیشا ددەت کو نها دەستهەلاتا ئیرانێ گەلەک تەنگاڤ بوویە و ژ بەر هندێ ژی بەردەوام گەفان دکەت).
ناڤهاتی ئەو یەک ژی دیار کر کو چەند سالێن پێشمەرگێن رۆژهەلاتێ کوردستانێ چو چالاکی ل دژی ئیرانێ نەکرینە، لێ خوەنیشادانێن چەند مەهێن بۆری ل ئیرانێ و رۆژهەلاتێ کوردستانێ نیشا دا کو خەلک ژ سیستەمێ نها بێزار بووینە، رەوشا ئابووری یا خەلکی گەلەک خرابە، هەژاری و بێکاری رۆژ ب رۆژێ زێدەتر لێ دهێت، ب جهێ کو بەرپرسێن ئیرانێ چارەسەریەکا گونجای بۆ ئاریشێن ناڤخوەیی یێ وەلاتێ خوە پەیدا بکەن دیسان گەفان دکەن و گۆت: (ئاشکرایە ب گەفان و ئێرشان چو پرسەک ناهێتە چارەسەرکرن، چونکی ب سالانە ل ئیرانێ پرسا کوردی هەیە و هەتا نها ژی نەهاتیە چارەسەرکرن، دڤێت بەری هەر تشتەکێ بەرپرسێن ئیرانێ کار بۆ چارەسەرکرنا پرسا کوردی و پرسێن دی بکەن، پێدڤیە پرۆژێن خوە بۆ چارەسەریێ ئاشکرا بکەن، هەتا پرسا کوردی و پرسێن دی یێن ل ئیرانێ نەهێنە چارەسەرکرن دێ قەیرانا نها ل ئیرانێ بەردەوام بیت).