ئه‌ڤرۆ نيوز:

پشتی ھەلبژارتنێن 24 خزیرانا بۆری ل تورکیا ئەو وەلات کەفتیە قۆناغەکا نوو یا سیاسی و ئیداری و چەندین رەخنەیێن توند ل سیستەمێ حوکمرانیێ ل سەر دەستێ ئەردۆگانی دھێنە گرتن.

پشتی وان ھەلبژارتنان سیستەمێ حوکمرانیێ ل تورکیا بوویە سیستەمێ سەرۆکاتیێ و ھەموو گەھێن وی وەلاتی کەفتینە دەستێ ئێک کەس و ھەر تشتێ ئەو بێژیت و بریارێ ل سەر بدەت، حزبا دەستھەلات ب ھەر 10 تبلان بۆ مۆر و پەسەند دکەت.

ئاسلی ئەردۆگان، رۆمانڤیس و چالاکڤانا تورک یا ناڤدار ل دۆر پاشەرۆژا تورکیا دبێژیت: دەولەتا تورکیا بەر ب سیستەمەکێ فاشیزمی دچیت و سازیێن وی وەلاتی ھەمبەری کەفتنەکا تەمام دانە.

ئاسلی ئەردۆگان، نڤیسەر و چالاکڤانا ناڤدارا تورکیا یا چەندین خەلات د وارێ نڤێشسنێ دا ب دەستڤە برین، د دیدارەکێ دا بۆ ئاژانسا فرانس پرێس راگەھاند؛ رەجەب تەیب ئەردۆگان ژیانا خەلکێ تورکیا ھەموو کۆنترۆلکریە، سیستەمێ نوو یێ حوکمرانیێ ژی ل تورکیا دوپات دکەت کو ھێزێن نوو ل تورکیا دێ ھێنە بەرزەرکرن.

ئاسلی ئەردۆگان ئاشکرا ژی کر، سیستەمێ سەرۆکاتیێ ل تورکیا وەکو سیستەمێ نازیانە ل سالێن 1930 ل ئەلمانیا.

زێدەباری رەخنەیێن ئاسلی ئەردۆگان، پارتیێن ئۆپۆزسیۆنێ و ل سەرێ وان پارتیا گەل یا کۆماری جەھەپە و پارتیا دیمۆکراتیک یا گەلان ھەدەپە کو پارتیەکا کوردیە، رەخنە ل سیستەم و شێوازێ رێڤەبەرنا ئەردۆگانی بۆ کاروبارێن دەولەتێ گرتینە، جەھەپە وەسا ئاشکرا دکەت کو رەوشا ئاوارتە یا پشتی کۆدەتایا تیرمەھا سالا 2016 ھاتیە راگەھاندن و پشتی ھەلبژارتنێن 24 خزیرانێ ھاتیە راکرن، حزبا دەستھەلاتدار وێ رەوشێ ب شێوەیەکێ دی برێڤە دبەت و کریە قانوون و ب وێ قانوونێ ھەمان رەوشا ئاوارتە برێڤە دبەت.

سەرەدەریێن ئەردۆگانی ژی د گەل ھەدەپێ کو پارتیا ئێکانەیا کوردانە کورسی ل پەرلەمانێ تورکیا ھەین و د ھەلبژارتنێن بۆری دا 6 ملیۆن دەنگ بدەستڤە بربوون، بەری دو رۆژان ئەردۆگانی ئەو پارتی ب تیرۆرست بناڤ کربوو، پارتیێن دی یێن ئۆپۆزسیۆنێ ژی ب پشتەڤانێن تیرۆرێ و تیرۆرستان بناڤ کربوون، ئانکو ئەو سەرەدەریێن ئەردۆگانی، گۆتنێن ئاسلی ئەردۆگان نڤیسەرا ناڤدارا تورکیا پشتراست دکەن کو ئەردۆگان یێ وی وەلاتی بەر ب سیستەمەکێ فاشیزمی دبەت.

ئه‌ڤرۆ نيوز:

پشتی کو سەرۆکێ ئەمریکا سزایێن ئابووری یێن ل سەر ئیرانێ ئیمزا کری ھەر زوو بھایێ دۆلاری جارەکا دی ل ئیرانێ بلند بوو و وەزیرێ پیشەسازیێ ژی راگەھاند کو ئەڤسالە دێ ئێک ملیۆن کەسێن دی ل ئیرانێ بێکار مینن و ل پرانیا باژێرێن ئیرانێ خەلکی دەست ب خوەنیشادانان کرن و داخوازا نەمانا دەستھەلاتا مەلایان کرن.

مەحمود فەرھادنیا چاڤدێرێ سیاسی ل رۆژھەلاتێ کوردستانێ بۆ رۆژناما ئەڤرۆ دیار کر کو دوھی سزایێن ئابووری یێن ئەمریکا کەفتنە د بیاڤێ بجھئینانێ دا و ئەو سزا ھەموو ئابووری نە و ژ بەر ھندێ ژی کارتێکرنا خوە ھەر زوو ل ژیانا وەلاتیان کر، چونکو بھایێ دۆلاری و زێری ل بازارێن ئیرانێ جارەکا دی بلند بوون و گەلەک بازرگان ژی نھا ب بەھانا دۆرپێچا ئابووری بھایێ کەلوپەلێن خوارنێ ژی گران کرینە، ژ بەر ھندێ ژی رەوشا نھا یا ئیرانێ گەلەکێ خرابە و گۆت: (جارا ئێکێ خوەنیشادان ل دژی ڤێ رەوشێ سەرێ سالێ ئانکۆ ھەشت مەە بەری نھا ھاتنە کرن، ئەو خوەنیشادان بوونە بناغەکا باش بۆ خوەنیشادانێن نھا و ئەز باوەرم ھەتا ئەنجامەک بدەستڤە نەھێت دێ خوەنیشادان بەردەوام بن، چونکو پرانیا خەلکێن ئیرانێ ژ ژیانا خوە یا نھا بێزار بووینە و دبێژن ھەتا رژێما مەلایان ل سەر دەستھەلاتێ بیت رەوشا مە باش نابیت و داخوازا نەمانا دەستھەلاتا ئیسلامی یا مەلایان ل ئیرانێ دکەن).

سەعید ئەحمەدی مامۆستایێ زانکۆیێ ل ئورمیێ ژی بۆ رۆژناما ئەڤرۆ دیار کر کو بەرپرسێن ئیرانێ د خەما خەلکی دا نینن، ٤٠ سالن ب درووشمێن” مرن بۆ ئەمریکا- مرن بۆ ئیسرائیلێ” ڤێ جڤاکێ برێڤە دبەن و ئێدی بۆ ھەموو کەسەکێ ل ئیرانێ ئاشکرا بوویە کو مەلا نەشێن جڤاکێ برێڤە ببەن، قەیرانا ئاڤ و کارەبێ ل ھەموو ئیرانێ دروست بوویە، بەری نھا ل ئیرانێ ئاریشا ئاڤ و کارەبێ نەبوو، لێ دەستھەلاتا مەلایان نەشیان ب بەرنامە کار بکەن و نھا ل گەلەک باژێرێن ئیرانێ خەلکی ئاڤا ڤەخوارنێ نینە و ئەڤسالە گەلەکێ گەرمە و کارەب ژی ل گەلەک دەڤەران نینە و ژ بەر ھندێ ژی خوەنیشادان و نەرازیبوون ل ھەموو ئیرانێ یا ھەی و ئەز باوەرم دێ رەوشا نھا خرابتر ژی لێ ھێت و گۆت: (کەل و پەلێن خوارنێ گەلەکێ گران بووینە و مووچێن وەلاتیان تێرا پێدڤیاتێن سەرەکی یێن ژیانێ ناکەن، نھا مامۆستایەکێ زانکۆیێ ل ئیرانێ نەشێت ب مووچێ خوە ژیاناکا ئاسایی برێڤە ببەت و تاخ و چینێن دی د رەوشەکا گەلەک خراب داینە، ژ بەر ھندێ ژی پشتی سزایێن ڤێ دووماھی ئەز باوەرم دێ خوەنیشادان بەرفرەھتر لێ ھێن و ھەتا نەگەھنە ئەنجامەکێ ناراوەستن ژی).

ناڤھاتی ل دۆر بەرنامێن ئیرانێ بۆ چارەکرنا قەیرانێ ژی راگەھاند کو دەستھەلاتێ چو بەرنامە بۆ چارەکرنا قەیرانێ نینن و نھا دخوازن ب رێیا خاتەمی و ھندەک کەسێن کو بەری نھا بەحسێ ریفۆرمان دکرن جارەکا دی خەلکی بخاپینن، لێ ئێدی رەوش گەلەک ژ ھندێ مەزنترە و گەلێ ئیرانێ گوە نادەنە سۆزێن بێ بنەما یێن ھندەک بەرپرسان و ژ بەر ھندێ ژی خوەنیشان بەرفرەھتر لێ دھێن و گۆت: (ھەکە دەولەتا ئیرانێ بەرنامەک بۆ چارەکرنا قەیرانا نھا ھەبیت و بشێت رەوشێ باش کەت رەنگە خوەنیشادان سڤک ببن، لێ تشتێ ھەتا نھا دیارە حوکمەتێ چو بەرنامە نینن و وەکو من گۆتی ب درووشمان دخوازن خەلکی ئارام بکەن، لێ رەوش ژ ھندێ مەزنترە و ئەڤرۆکە ل باکور، باشور و ناڤەندا ئیرانێ خەلک خوەنیشادانان دکەن و دەزگەھێن راگەھاندنێ ژی راستیان بۆ رایا گشتی یا جیھانێ ئاشکرا ناکەن و نھا ل گەلەک باژێرێن مەزن یێن ئیرانێ ھێلا ئنترنێتێ ھاتیە راگرتن و رێ نادەن رۆژنامەڤان و وەلاتیێن ئاسایی راستیان بۆ رایا گشتی ئاشکرا بکەن و ب ھەموو رەنگەکێ ئاستەنگیان بۆ خەلکی دروست دکەن).