ئه‌ڤرۆ نيوز:

بسپۆرەکێ زانستێن سیاسی ئاماژە بڤێ چەندێ دکەت، بڕیاردان لدۆر ئەنجامێن پڕۆسا ھەلبژارتنێن عێراقێ دێ عێراقێ بەرەف پاشە رۆژەکا مەترسیدار بەت و دیارکر، عێراقێ شیانێن ئەڤان ھەموو ئاریشەیان نینە کو بۆ ھاتینە چێکرن و ئاریشەیێن عێراقێ ھند نەبوون ئاریشەیا پەرلەمانی ژی ھاتنە سەر.
دکتۆر سەباح سوبحی، بسپۆرێ زانستێن سیاسی بۆ رۆژناما ئەڤرۆ گۆت” بڕیارێن پەرلەمانێ عێراقێ لدۆر ئەنجامێن ھەلبژارتنێن 12ی ھەیڤا بۆری یێن پەرلەمانی نیشانا ڤێ چەندێ یە ھێشتا بۆ گەھشتن ب پڕۆسا دیموکراتیێ زۆر مایە ل عێراقێ ، چونکە بڕیارێن پەرلەمانی لدۆر ئەنجامین ھەلبژارتن زێدەتر ئاریشە بۆ عێراقێ زێدەکرینە، ھەتا رەوشا عێراقێ گەھاندیە ئاستەکێ مەترسیدار، ئەگەرێ ڤێ چەندێ ھەیە بڤی شێوەی بیت دێ شەڕ کەڤیتە ناڤبەرا ھندەک گروپێن چەکدار یێن باشوورێ عێراقێ، ژبەرکو ھژمارەک گروپێن جودایێن چەکدار ل عێراقێ پەیدابووینە و ھەگەر دەستکاریا ئەنجامێن ھەلبژارتنان بھێتەکرن یانژی گۆھۆڕین بسەر ئەنجاماداندا بھێن، ئەڤە پێشبینیا چێبوونا شەڕەکی تێتەکرن، بدیتنامن چوونا دادوەران دەمەکێ زوودا پشتی بڕیارێن پەرلەمانی بۆ ئوفیسا کۆمسیۆنا ھەلبژارتنان پێنگاڤەکا شاشبو، ھەتا ئەز شێم بێژم پڕۆسەکا رێکخستی بو ھاتیە دارشتن، وەسا دبیم ھندەک نموونە ھاتبانە وەرگرتن ل دەڤەرێن جودایێن عێراقێ و بدەستی دەنگ ھاتبانە ھژمارتن زۆر باشتر و سەرکەفتی تر بو لڤێ چەندێ ھەموو پڕۆسە بھێتە رەتکرن و دەنگ ھەموو بھێنە ھژمارتن دوبارە.
ئەڤی بسپۆرێ زانستێن سیاسی دیارکر” گورەی قانوونا بەرێ یا ھەلبژارتنێن عێراقێ رێو جھێن تانەدان و تۆمارکرنا سکالایان ھاتبو دیارکرن، بەلێ مخابن پەرلەمانی بسەر قانوونێ دا بازدا، وەرگرتنا باوەریێ ل کۆمسیۆنێ رامان ئەڤە باوەری ل پەرلەمانی و قانوونێ ژی ھاتیە وەرگرتن، بگرە بەرۆڤاژی دستووری بو وەرگرتنا باوەریێ ل کۆمسیۆنێ، چونکە گورەی قانوونا بەرێ ھەر دەستھەلات دابونە جڤاتا دادوەری بۆ ئێکلاکرنا ھەر ئاریشەیەکێ کو ژ ئەنجامێ ھەلبژارتنان پەیداببیت، ژبلی دادگەھا بلندا فیدڕال بۆ چو کەس و لایەنەکی نینە بڕیارێ لدۆر ھەلبژارتنان بدەت، ئەڤرۆ ئەم یێ دبینین عێراقێ چەندین ئاریشە ھەنە و یا بەرزەبوی دناڤا ئاریشەیاندا، مخابن ئاریشە ھند نەبوون ئاریشەیێن دیژی بۆھاتنە زێدەکرن، لەوڕا دێ رەوش ل عێراقێ زێدەتر ئالۆزیێ بخۆڤە بینن و عێراق نەشێت ھەڤان ھەموو ئاریشەیانڕا دەرباز بیت.
دکتۆر سەباح سوبحی گۆتژی” وەلاتەکێ دەرەیەکی سنورەکی بۆ ئاریشەیێن عێراقێ نەدانیت، دێ عێراق کەڤیتە مەترسیەکا زۆرا مەترسیداردا، مە ھەموویان ھیڤی بڤێ چەندێ ھەبو پڕۆسا پێکئینانا حوکمەتا نوویا عێراقێ بێ ئاریشە بڕێڤەبچیت و لایەنێن سیاسی مژۆلی دانوستانان بوون بۆ ئاڤاکرنا حوکمەتێ، ژبەرکو حوکمەتا بەرێ نێزیکی 10 ھەیڤا ڤەکێشابو نوکە ب نەمانا قانوون و پەرلەمان و باوەریێ ئاریشە مەزنتر لێھات و پاشەڕۆژا عێراق یا نەدیارە، کو ئەز دبینم پەرلەمانێ عێراقێ تاوانبارێ سەرەکیە و بۆیە ژێدەرێ پەیداکرنا ئەڤان ئاریشەیان یاکو عێراق ئێخستیە قەیرانەکا ئالۆزدا.

ئه‌ڤرۆنيوز:

په‌يڤدارێ دادگه‌ها فيدرالى يا عيراقى راگه‌هاند، رۆژا پێنجشه‌مبيا داهاتى 21/6/2018 دادگه‌ها فيدرالى دێ روونشتنه‌كێ ل دۆر تانا هه‌ر ئێك ژ پارتى ديموكراتى كوردستان وفوئاد مه‌عسووم وكۆمسيۆنێ ئه‌نجام ده‌ت.

ئياس سامۆك، په‌يڤدارێ دادگه‌ها فيدرالى يا عيراقى، دبه‌ياننامه‌كێ دا گۆت” دادگه‌ها فيدرالى ل رۆژا پێنجشه‌مبى دێ ل دۆر وان تانێن ل به‌رانبه‌ر راستڤكرنا سيێ يا قانوونا هه‌لبژارتنان ئه‌وا ژلايێ په‌رله‌مانێ عيراقێ ڤه هاتيه‌ كرن‌، كۆمبيت”.

دياركر” ئه‌و تانه‌ ژلايێ هه‌ر ئێك ژ فوئاد مه‌عسووم سه‌رۆك كۆمارا عيراقێ وكۆمسيۆنا بلند يا هه‌لبژارتنان وپارتى ديموكراتى كوردستان هاتينه‌ تۆماركرن”.

ل شه‌شێ ڤێ هه‌يڤێ، په‌رله‌مانێ عيراقێ دروونشتنه‌كێ دا راستڤه‌كرنا سيێ بۆ قانوونا هه‌لبژارتنان كر وبريار دا دوباره‌ هژمارتنا ده‌نگان ب ده‌ست بهێته‌ ئه‌نجامدان وكارێ جڤاتا كۆمسياران بهێته‌ راوه‌ستاندن ودادوه‌ر ل شوونا وان بهێنه‌ دانان.