ئه‌ڤرۆنيوز:
ئه‌ندامێ په‌رله‌مانێ عيراقێ، فائيق شێخ عه‌لى دبه‌رپه‌رێ خوه دا ل سه‌ر تۆرا جڤاكى يا فه‌يسبووكى به‌لاڤكر، هنده‌ك كه‌سێن دهه‌لبژارتنان دا ب سه‌رنه‌كه‌فتين بزاڤا كرينا كورسيێن په‌رله‌مانى دكه‌ن.
فائيق شێخ عه‌لى گۆت ژى” ئه‌و كه‌سێن ب سه‌رنه‌كه‌فتين ب هه‌ر شێوه‌كى بزاڤا په‌رله‌مانتاربوونێ دكه‌ن و ل 18 ڤێ هه‌يڤێ هه‌تاكو 5 مليۆن دۆلار ژى بۆ كورسيه‌كا په‌رله‌مانى بۆ جڤاتا كۆميساران به‌رچاڤكرن”
ئه‌ڤرۆ نیوز ، نه‌وزاد هلۆرى:
پشتى چار هه‌یڤان ژ قه‌ده‌غه‌كرنا نێچیر و گرتنا ماسیان ئه‌ڤرۆ وێڤه ماسیگر د ئازادن د نێچیركرنا ماسیان دا ، رێڤه‌به‌ریا دارستان و پاوان و ژینگه‌ها ئاكرێ ژى دیاركر هه‌ر كه‌سێ پێنج خالان دگرتنا ماسیان دا به‌رچاڤ نه‌كه‌ت دێ هێته سزادان.
موقه‌ده‌م ئیبراهیم ئاكره‌يى، رێڤه‌به‌رێ دارستان و پاوان و ژینگه‌ها ئاكرێ بۆ ئه‌ڤرۆ نیوز گۆت: (پشتى قه‌ده‌غه‌كرنا نێچیرا ماسیان ژبه‌ر كێشك و خه‌رزى، ئه‌ڤرۆ وێڤه هه‌ر ماسیگره‌ك دشێت بچيته نێچيرا ماسیان و ئه‌و ئازاده چ بوو خوارنێ یان بۆ فروتنێ، به‌لێ پێدڤیه ب گۆره‌ى رێنمایێن ژینگه‌هێ بیت).
زێده‌تر گۆت: (هه‌ركه‌سێ ماسیان ب رێيێن نه‌قانونی ێن مینا ده‌رمانێن ژه‌هركر ، بومبه و تى ئێن تى ، كاره‌با ، تۆرێن بچوك و هه‌ر رێیه‌كا دى یا كۆمكوژیا ماسیان ، بچيته ماسیان دێ ب توندى هێته سزادان)
ب گۆره‌ى ئاخڤتنێن ناڤبرى ، راڤه‌كرنا ماسیان د هه‌موو وه‌رزێن سالێ دا دبیته ئه‌گه‌رێ بنبربوونا ماسیان و نه‌مانا وان ب ئێكجار، زێده‌تر گۆت: (پێدڤیه هه‌ر وه‌لاتیه‌ك وه‌كو زێره‌ڤان و چاڤدێره‌كێ ب هێز و وژدان بیت ل سه‌ر پاراستنا ژینگه‌هێ دا كو ماسى به‌رده‌وام هه‌بن، ل سنوورێ پارێزگه‌ها دهۆكێ و ئاكرێ ژى هژماره‌كا رووباران هه‌یه و سالانه پشتى ئازادكرنا ده‌مێ گرتنا وان، هژماره‌كا زومه‌زن یا خه‌لكى ب رێیا گرتن و فروتنا ماسیان داهاته‌كێ بۆ خوه په‌یدا دكه‌ن ژبه‌رڤێ گرنگه كو ماسى بهێنه پاراستن)
دهێته زانین كو ب مه‌ره‌ما پاراستنا سامانێ ماسى و پاراستنا وان ، سالانه ل 1/3 هه‌تا 15/6 ماسى ژبه‌ر دانا خه‌رزى دهێنه قه‌ده‌غه‌كرن.
ئه‌ڤرۆ نیوز ، نه‌وزاد هلۆرى:
ده‌ڤه‌را بارزان ئێكه ژ ده‌ڤه‌رێن چیایى ل كوردستانێ زانست و ئالیه‌تێن چاندنێ نكارن روولێ خوه د دوورینا گه‌نمى دا ب بینن ژبه‌رڤێ جوتیارێن ده‌ڤه‌رێ نه‌چاردبن ب داس و ترپانێ گه‌نمێ خوه ب دوورن.
جوتیارێن ده‌ڤه‌رێ دیار دكه‌ن كو ژ سه‌رده‌مێ باب و باپیران هه‌تا نها ئه‌و ب شێوه‌یێ كوم كوم وزوباره ب داس و ترپانێ هه‌ڤكاریا هه‌ڤدو دكه‌ن د دوورینا گه‌نم و جه‌هى دا.
جیهاد موسته‌فا، ئێكه ژ جوتیاران دبێژیت: (هه‌ر دكه‌ڤن دا و ل سه‌ر ده‌مێ باب و باپیران مه داس و ترپانه بۆ دوهورینا گه‌نمى بكاردئینان، ژبه‌ركو زانست و ئامیرێن چاندنێ نكارن رۆلێ خوه ل ده‌ڤه‌رێن چیایى بینن و دورینا گه‌نمى ب ترپانێ پێدڤى ب شاره‌زایه‌كێ یه، ژبه‌ركو به‌روڤاژى دبیت مرۆڤ خوه بریندار بكه‌ت، دوورين ب شێوه‌یێ زووباره هاریكاریه‌كا باشه بۆ خودانێ كارى و ئه‌م هه‌ر رۆژه‌كێ دچینه هاریكاریا جوتیاره‌كێ).
زێدەتر گۆت: (ئەم گەنمی دکەین ساڤار و دانهێرک و دانەقوت و بەرمایک و قرشێ وان ژی بۆ ئالیکێ ئاژەلان بکاردئینین ، بەلێ گیروبوونا بارانان و نەبارینا وان د ده‌مێ خوە دا کارتێکرنێن خراپ ل سەر گەنمى و جەهی کرینە).
عامر سه‌لیم، ئه‌و ژى ئێكه ژ جوتیاران بۆ ئه‌ڤرۆ نیوز دبێژیت: (دوورینا گه‌نمى ب داس و ترپانێ ب زه‌حمه‌ته، به‌لێ ب نه‌چارى ئه‌م ل ده‌ڤه‌رێن چیایى بكاردئینین و یا گرنگ ئه‌وه كو پێدڤیه حوكمه‌ت رولێ خوه ببینیت دهاریكاریكرنا جوتیاران دا، ژبه‌ركو مودێلا دوورینا گه‌نمى ب ترپانێ نه‌مایه و جیهان يا هاتیە گوهۆرین ، پێشتر ل سەر دەمێ باب و باپیرا ب زەوق و خوه‌شی بوو و ب زووبارە کار دهاتنەکرن و ئاسانکاریێن زۆر هەبوون، بەلێ نه‌ڤيێ نها وەکو بەرێ نەمایە و پێشکەفتنا تەکنولوژیایێ و خواندنێ ئەو مژوول کرینە ، بەلێ ل گەل ڤێ یەکێ ژی هێشتا ئەڤ شێوازە يێ هەی، ژبەرکو گەنم هێمایێ ژیان و خوراگریا کوردان ب گشتی و خەلکێ گوندان ب تایبەتی بوویە).
دوورینا گه‌نمى ب داس و ترپانێ كاره‌ك گران و ب زه‌حمه‌ته و ماندوبوونه‌كا مه‌زن پێدڤێت ، به‌لێ ب گوتنا سترانان ئه‌و گه‌رما رۆژێ و زه‌حمه‌تا خوه ژبیر دكه‌ن.
ئەڤرۆنیۆز ،سالار دۆسكی:
رێڤەبەرێ حەج و عومرێ ل پارێزگەها دهۆكێ ئاشكراكر كو حوكمەتا عیراقێ بۆ ئەڤ سالە رێژەكا دیاركری بۆ چوونا حەجێ یا بازرگانی بۆ هەرێما كوردستانێ دیاركریە و هەر كەسەكێ بڤێت ب تنێ دو رۆژ مۆلەت هاتینە دەست نیشانكرن.
شەمسەدین تاهر شوشی، رێڤەبەرێ حەج و عومرێ ل پارێزگەها دهۆكێ بۆ ئەڤرۆ نیۆزگۆت” ئەڤرۆ رۆژا پێنچ شەمبی 21/6/2018 ئاشكراكر كو حوكمەتا عیراقا فیدرال رێژەكا كورسیێن بازرگانی بۆ چوونا حەجێ بۆ ئەڤ سالە دابینكرینە و 141 كورسی بۆ دهۆكێ هاتینە دابینكرن و هەتا رۆژا شەمبی 23/6/2018 هەر كەسەكێ دڤێت بچیتە حەجێ بێ مەرج دەرگەه ڤەكرینە بۆ هەر كەسەكی 8 هزار دۆلار هاتینە دەستنیشانكرن، پێدڤیە كەسێ داخواز بكەت بچیتە حەجێ، پاسپورت هەبیت و ده‌مێ وێ ب سەرڤە نە چوو بیت.
ناڤبری ئاشكراكر ژی كو سالا بۆری چوونا حەجا بازرگانی ب 60 6 هزار دۆلاران بوو و بۆ ئەڤ سالە كرينە 8هزار دۆلار و ئەڤ پارە ب بسولە بۆ حوكمەتێ دهێتە رەوانەكرن.
شەمسدین ئەو ژی گۆت: هەتا رۆژا شەمبی دووماهی مۆلەتە هەر كەسەكێ بڤێت بچیتە حەجێ ب رێيا بازرگانی دێ مامەلێن وی هێنە برێڤەبرن.
ئەڤرۆ نیوز، باسم قاسم شنگالی:
ئەڤرۆ سپێدێ رێکەفتی 21-6-2018 کچەکا ئێزدی ژ ناڤ دەستێن رێکخراوا تیرۆرستیا داعشێ ل سووریا هاتە رزگارکرن.
سەلام حه‌مید ژ مالباتا وێ کچێ بۆ ئەڤرۆ نيوز دا زانین ئەڤرۆ کچ ماما وێ ژ سوریا هاتە رزگارکرن ب ناڤێ (مارتین خوەدێدا مستۆ) کو ژيێ وێ دگەهێتە نێزیکی 10 سالان و خەلکا کۆمالگەها خانەسۆرێ یە.
گۆتژى: “ل دەمێ 3-8-2014 رێخراوا تیرۆرستیا داعش دەڤەرا شنگالێ داگێ رکری ئەو ژی ل گەل ب هەزاران کچ و ژنێن ئێزدی هاتبوو ده‌ستەسەرکرن ژ لایێ وان ڤە”.
ل دووماهیێ گۆت: “هیشتا دو خووشك و برايه‌ك و دایکا ئەڤێ کچێ یێن د ناڤ دەستێن وان دا و نەهاتینە رزگارکرن، ئەڤرۆ ئەڤه ب هەڤکاریا نڤیسنگەها کاروبارێن رەڤاندیان ل پارێزگەها دهۆکێ هاتە رزگارکرن و نها گەهشتیە کۆمالگەها خانەسۆرێ ل باشووری قەزا شنگالێ”.
ئه‌ڤرۆ نيوز، فاتما مزوورى:
دلێر حسێن سه‌رۆكێ لژنا چاندنێ ل جڤاتا پارێزگه‌ها هه‌ولێرێ ئه‌ڤرۆ خۆياكر كو بێهنێن نه‌خۆش يێن ل باژێرێ هه‌ولێرێ به‌ربه‌لاڤ دبن، به‌لێ لايه‌نێن په‌يوه‌نديدار ل سه‌ر ڤى بابه‌تى د كێم ته‌رخه‌من.
ئاماژه ب وێ چه‌ندێ ژى كر كو ئه‌و پارزينگه‌هێن ل سنورێ پارێزگه‌ها هه‌ولێر كار دكه‌ن پرانيا وان ل دووڤ پيڤه‌رێن زانستى كار ناكه‌ن، ب تنێ ژ بۆ به‌رژه‌وه‌نديێن خوه كار دكه‌ن بێى كو گرنگيێ بده‌نه پاراستنا ژينگه‌هێ و ئه‌ڤه هه‌موو ژى دبيته ئه‌گه‌رێن پيسبوونا ژينگه‌هێ.
دلێر حسێن خۆيا كر ژى كو ئه‌و ماددێن ئه‌و پارزينگه‌هـ ب كار دئينن د خرابن و ئه‌و ماددێ دبێژنێ گازوائيل يا خرابه و ب تايبه‌ت كو دده‌نه مواليدێن تاخان ژ بۆ كارپێگرنا مواليدان و دووباره كارتێكرنێن خراب دێ ل سه‌ر ژينگه‌هێ هه‌بن.
ئه‌ڤرۆ نيوز، عه‌زيز هه‌ورامى:
ئه‌ڤرۆ ل سه‌ر داخوازيا چالاكڤانان بۆ مانگرتنا سه‌رتاسه‌رى ل دژى كاودانێن ئه‌منى يێن باژێرێ خانه‌قين و داخوازيا ڤه‌گه‌ريانا هێزێن پێشمه‌رگێ كوردستانێ، دوكاندار و فه‌رمانبه‌رێن هه‌موو چين و توێژێن باژێرێ خانه‌قين ده‌ست ب مانگرتنێ كريه.
ئه‌كبه‌ر حه‌يده‌ر، جێگرێ به‌رپرسێ لقا 15 يا پارتى ديموكراتى كوردستان ل خانه‌قين بۆ ئه‌ڤرۆ نيوز گۆت: “ئه‌م وه‌كو پارتى ل باژێرى هه‌موو پشته‌ڤانيا ڤێ مانگرتنا مه‌دنى يا وه‌لاتيانين و دژى كاودانێن ئه‌منى يێن باژێرى نه كو سۆپا و حه‌شدا شه‌عبى نه‌شێن ئه‌منيه‌تا وێ ب پارێزن”.
پشتى خيانه‌تا 16ى ئوكتوبه‌رێ ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ ژ لايێ سۆپا و حه‌شدا شه‌عبى يا عيراقى ڤه هاتنه داگيركرن و ره‌وشا ئه‌منى يا ده‌ڤه‌رێن كوردستانى گه‌له‌ك خراب بوويه و چه‌كدارێن داعش ژى ئه‌ڤ چه‌نده ب ده‌ليڤه ديتيه و رۆژانه وه‌لاتيان د ره‌ڤينن و تيرۆر دكه‌ن.
ئه‌كبه‌ر حه‌يده‌ر، ئاماژه ب وێ چه‌ندێ ژى كر كو پشتى 16ى ئوكتۆبه‌رێ كاودان تێكچووينه و ب ده‌هان وه‌لاتى هاتينه ره‌ڤاندن و تيرۆركرن و هێرش كريه سه‌ر گۆندێن كوردى و ژ ترسا گۆندێن خوه بجهـ هێلاينه، حوكمه‌تا عيراقێ نه‌ڤێت وه‌لاتيان ب پارێزيت دا كو كورد جهێن خوه چوول بكه‌ن و ب وێ چه‌ندێ ژى ديموگرافيا ده‌ڤه‌رێ بهێته گوهۆڕين”.
حوكمه‌تا عيراقێ ژ ترسا دا هێزه‌كا مه‌زن يا فرقا 5 يا سۆپايى بريه به‌ر سينگێ خوه‌نيشانده‌ران بۆ هێرشكرنه سه‌ر مانگرتيان ل سه‌ر هه‌بوونا هه‌ر لڤينه‌كێ.
ئه‌ڤرۆ نيوز:
وه‌زيرێ به‌رێ يێ دارايى و ئابوورى ل حوكمه‌تا هه‌رێما كوردستانێ باييز ته‌له‌بانى وه‌غه‌را دووماهيێ كر.
به‌رى نيڤرۆيا ئه‌ڤرۆ رۆژا پێنجشه‌مبى رێكه‌فتى 21ى خزيرانا 2018ێ “پاييز سه‌عيد محه‌مه‌د ته‌له‌بانى” وه‌زيرێ دارايى و ئابوورى ل كابينا پێنجێ يا حوكمه‌تا هه‌رێما كوردستانێ وه‌غه‌را دووماهيێ كر.
ئه‌ڤرۆ نيوز، فاتما مزوورى:
ئه‌نگێلا مێركل شيره‌تكارا ئه‌لمانیا ل گه‌ل ئیمانوێل ماكرۆن سه‌رۆكێ فه‌ره‌نسا دا ل به‌رلینێ جڤیا و هه‌ردو ل سه‌ر یه‌كخستنا یه‌كیتیا ئورۆپا ده‌ربارێ پرسا كۆچبه‌ران و چه‌ند دۆسه‌یێن دی یێن جیهانی رێكه‌فتن.
ئه‌گێلا مێركل د جڤینێ دا گۆت: “ئه‌ز دكارم ب زه‌لالی بێژم كو ئه‌و هه‌موو تشتێ ئه‌م ل سه‌ر رێككه‌فتينه، حوكمه‌تا ئه‌لمانیا و په‌رله‌مانێ وێ ژی پشتگریا وان دكه‌ن”.
ئێكه‌تيا ئورۆپا د حه‌فتیا داهاتى دا دێ لۆتكه‌كی كو ب ئێكلايكه‌ر دهێته دیتن، ل سه‌ر ئاستێ سه‌رۆك و سه‌ركردێن ئێكه‌تيێ ده‌ربارێ پرسا په‌نابه‌ر و كۆچبه‌ران كو نها پرسا گه‌رم یا وه‌لاتێن ئورۆپا یه ساز بكه‌ت.
وه‌زیرێ ناڤخوه‌یا ئه‌لمانیا ژی دو حه‌فتی ل پێش مێركل دانایه هه‌تا كو ل گه‌ل ئێكه‌تیا ئورۆپا ل سه‌ر پرسا په‌نابه‌ران رێك بكه‌ڤن، به‌روڤاژی ڤێ یه‌كێ ژی وه‌زیرێ ناڤخوه‌ی نه‌چار دبن كۆچبه‌ران ل سه‌ر سنورێ وه‌لاتێ خوه ڤه‌گه‌رینن و ده‌ربكه‌ن.
مێركل و ماكرۆن كو نوونه‌رێن دو وه‌لاتێن زلهێز یێن ئێكه‌تیا ئورۆپانه، ده‌ربارێ ئاوایێ رووبرووبوونا قه‌یرانا كۆچبه‌ر و په‌نابه‌ران كو ب سه‌ر ئێكه‌تيێ دا كرينه ئێك ده‌نگ.
هه‌ردو دبێژن پێدڤيه قه‌یرانا كۆچبه‌ران ژ ژێده‌رێ خوه ڤه بهێته چاره‌كرن، هه‌روه‌يا داخوازا مافێ په‌نابه‌ریێ ژ وه‌لاته‌كێ ئێكه‌تيا ئورۆپا دڤێت ل ده‌رڤه‌يى ئاخا ئێكه‌تيێ ئه‌نجام بده‌ت، هه‌روه‌سا هه‌ردو داخواز دكه‌ن هژمارا پاسه‌وانێن ده‌ریایا ئورۆپا زێده‌تر ببيت.
ئه‌ڤرۆ نيوز، فاتما مزوورى:
ژ ئه‌نجامێ بۆمبه‌بارانا فرۆكێن شه‌رى يێن وه‌لاتێ توركيا ده‌ڤه‌را برادۆست يا سه‌ر ب قه‌زا سۆران ڤه، ئاگر ب وێ ده‌ڤه‌رێ كه‌فتيه.
ئه‌ڤرۆ سپێدێ ژى فرۆكێن شه‌رى يێن وه‌لاتێ توركيا ب گرانى بنگه‌هـ و باره‌گايێن په‌كه‌كێ ل ده‌ڤه‌رێن خنێره، لۆلان، خواكورك و گه‌ليێ موخارێ يێن ده‌ڤه‌را برادۆست بۆردۆمان كرن.
ژ ئه‌نجامێ بۆمبه‌بارانێ فرۆكێن توركيا، ئاگر ب چه‌ند ده‌ڤه‌رێن برادۆست كه‌فتيه.
ئه‌ڤه د ده‌مه‌كى دايه دوهى د روونشتنا جه‌ماوه‌رى يا بانگه‌شه‌يا هه‌لبژارتنان دا سه‌رۆك كۆمارێ توركيا ره‌جه‌ب ته‌يب ئه‌ردوگان راگه‌هاند كو فرۆكێن وان دوجاران چيايێ قه‌نديل بۆمبه‌بارانكريه.
نيشاندان