ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، پێشوازی ل شانده‌كێ ئاژانسا هاریكاریا نێڤده‌وله‌تی یا چاپۆنی (جایكا) ب سه‌رۆكایه‌تیا ئاندۆ ناووكی، جێگرێ سه‌رۆكێ ئاژانسێ كر.

د دیداره‌كێ دا شاندێ جایكا كورتیه‌ك ده‌رباره‌ی كار و چالاكیێن ئاژانسا خوه‌ ل هه‌رێما كوردستانێ به‌رچاڤكر، كو ب هه‌ماهه‌نگی ل گه‌ل حوكمه‌تا هه‌رێما كوردستانێ چه‌ندین پرۆژه‌یان د بوارێن كاره‌بێ، ئاڤ و سۆلینان، چاندن و ڕاستڤه‌كرنا ماسته‌رپلانا هه‌ولێرێ ئه‌نجام دده‌ن.

شاندێ چاپۆنی هه‌روه‌سا به‌رهه‌ڤیا كۆمپانیێن چاپۆنی بۆ وه‌به‌رئێنانێ ل هه‌رێما كوردستانێ نیشاندا.

سه‌رۆكێ حوكمه‌تا هه‌رێما كوردستانێ، سوپاسیا حوكمه‌تا چاپۆن و ئاژانسا جایكا كر كو ب ڕێیا ئه‌نجامدانا پرۆژه‌یێن خوه‌ ب شێوه‌یه‌كێ باش و پیشه‌ییانه‌، هاریكاریا حوكمه‌تا هه‌رێما كوردستانێ دكه‌ن د پرۆسه‌یا ئاڤه‌دانكرنێ و دروستكرنا ژێرخانه‌یه‌كا بهێز یا ئابووری ل هه‌رێما كوردستانێ.

ئه‌ڤرۆ:

په‌یڤدارێ پارتی دیموكراتی كوردستان ڕاگه‌هاند، نابیت ئه‌و ڕه‌وشا نوكه‌ هه‌ی یا به‌رده‌وام بیت و پێدڤیه‌ كێشه‌یان  چاره‌سه‌ر بكه‌ین. دبێژیت ژی: مه‌ به‌رسڤا نامه‌یا ئێكه‌تیێ یا دای و نه‌رمیه‌ك ل ڤان چه‌ند ڕۆژێن بۆری دا هه‌بوو و وه‌كو پارتی د به‌رهه‌ڤین ل گه‌ل ئێكه‌تیێ كۆمبین.

مه‌حموود محه‌مه‌د، ئه‌ندامێ مه‌كته‌با سیاسی و په‌یڤدارێ پارتی دیموكراتی كوردستان ل دۆر په‌یوه‌ندیێن پارتی و ئێكه‌تیێ و بزاڤێن چاره‌سه‌ركرنا كێشه‌یان گوت” نوكه‌ ڕه‌وشه‌ك یا هاتیه‌ پێش دبیت ئه‌م په‌سه‌ند نه‌كه‌ین، چونكه‌ ئه‌و گرژیێن هه‌ین د مفایێ پرۆسه‌یا سیاسی و په‌یوه‌ندیێن مه‌ ل گه‌ل به‌غدا و وه‌لاتان دا نینه‌”.

ب دیتنا په‌یڤدارێ پارتی دیموكراتی كوردستان دڤێت ئه‌و ل گه‌ل ئالیێن سیاسی كۆمبوون و دانوستاندنان بكه‌ن بۆ وێ چه‌ندێ چاره‌سه‌ریێ بۆ وان كێشه‌یێن هه‌ین ببینن، هه‌روه‌سا چاره‌سه‌ریێ بۆ وان تیبینیان پارتی و ئێكه‌تیێ هه‌ین، ببینین”.

پێشتر ئێكه‌تی نیشتمانی كوردستان نامه‌یه‌ك ئاراسته‌ی پارتی دیموكراتی كوردستان كربوو، مه‌حمود محه‌مه‌د دبێژیت” وان ژی نامه‌یه‌ك بۆمه‌ هنارتیه‌، به‌لێ نابیت د ڕاگه‌هاندنێ دا دانوستاندنان ل گه‌ل هه‌ڤدوو بكه‌ین، چونكه‌ ب دیتنا مه‌ وان چه‌ند تێبینی هه‌نه‌، مه‌ ژی ژ وان زێده‌تر تیبینی یێن هه‌ین”.

په‌یڤدارێ پارتی دیموكراتی كوردستان كۆمبوون و ڕوونشتن ل گه‌ل ئێكه‌تیێ ب چاره‌سه‌ری دبینیت و ئاماژێ ب وێ چه‌ندێ ژی دكه‌ت كو د به‌رسڤا نامه‌یه‌كێ دا كو بۆ ئێكه‌تیێ هنارتیه‌” ئه‌م د به‌رهه‌ڤین بۆ كۆمبوونێ، به‌لێ تاكو نوكه‌ به‌رسڤا ئێكه‌تیێ سه‌باره‌ت وێ چه‌ندێ نه‌گه‌هشتیه‌ مه‌”.

بافل تاله‌بانی، سه‌رۆكێ ئێكه‌تی نیشتمانی كوردستان ب سه‌ره‌دانه‌كێ ل ده‌رڤه‌ی كوردستانێ یه‌ و باس ل وێ چه‌ندێ دهێته‌ كرن كو دبیت ل گه‌ل سه‌رۆك بارزانی كۆمببن، مه‌حمود محه‌مه‌د ل دۆر ڤێ چه‌ندێ دبێژیت” دبیت ئه‌و د ڕاگه‌هاندنێ دا هاتبیته‌ باسكرن، به‌لێ ب فه‌رمی هیچ بۆمه‌ نه‌هاتیه‌ و هه‌تا ب ته‌له‌فۆنێ ژی”.

په‌یڤدارێ پارتی دیموكراتی كوردستان دبێژیت ژی” مه‌ بڕیار یا هه‌ی و ل كۆمیته‌یا ناڤه‌ندی و مه‌كته‌با سیاسی ژی ڕێپێدان یا هه‌ی كو لژنه‌یه‌ك بهێته‌ پێكئینان بۆ وی بابه‌تی و ئه‌م د به‌رهه‌ڤین بۆ كۆمبوونێ ل گه‌ل ئێكه‌تیێ”.

مه‌حمود محه‌مه‌د دیاركر ژی” ل سه‌ر ڕاسپارده‌یا سه‌رۆك بارزانی و وه‌كو ل كرنگره‌یێ 14 یێ پارتی هاتی و ل كۆمیته‌یا ناڤه‌ندی باس لێ هاتیه‌ كرن، دێ به‌رپه‌ره‌كێ نوو ڤه‌كه‌ین و ژ ڕۆژا چارشه‌مبی 14/12/2023 دێ ده‌ست ب كۆمبوونان ل گه‌ل ئالیێن سیاسی كه‌ین، ئێكه‌مین كۆمبوونا مه‌ ژی دێ ل گه‌ل ئێكگرتوو ئیسلامی كوردستان بیت و ل چه‌ند ڕۆژێن داهاتی دا دێ ل گه‌ل حزب و ئالیێن سیاسی یێن دی ژی كۆمبین”.

په‌یڤدارێ پارتی گوت ژی” ل چه‌ند ڕۆژێن بۆری نه‌رمیه‌ك هه‌بوو ل دۆر گرژیێن پارتی و ئێكه‌تیێ و ئه‌و گرژی پیچه‌ك یێن خاڤ بووین و ئه‌و توندوتیژیا ل ڕاگه‌هاندنێ دا هه‌بوو وه‌كو جاران نه‌مایه‌”.

هه‌روه‌سا خویاكر” بۆ وێ چه‌ندێ چاره‌سه‌ریێ ببینین پێدڤیه‌ ئه‌م ل هه‌رێما كوردستانێ دانوستاندنێ بكه‌ین ئه‌ڤجا نیازێن هه‌ڤدوو بخوینین”.

ڕۆهنكر ژی” چ جهه‌ك بهێته‌ دیاركرن بۆ ئه‌نجامدانا كۆمبوونێ، ئه‌م وه‌كو پارتی دیموكراتی كوردستان د به‌رهه‌ڤین، چ هه‌ولێرێ بیت یان سلێمانیێ”.

مه‌حمود محه‌مه‌د سه‌رۆكایه‌تیا هه‌رێما كوردستانێ ب چه‌ترا كۆمكرنا ئالیێن سیاسی دزانیت و دبێژیت ب هه‌موو ئالیێن سیاسی گوتیه‌ كو” پێدڤیه‌ ل هه‌رێما كوردستانێ چه‌تره‌ك بۆ كۆمكرنا ئالیێن سیاسی هه‌بیت ئه‌وژی سه‌رۆكایه‌تیا هه‌رێما كوردستانێ یه‌، كو پێدڤیه‌ ئالیێن سیاسی ل وێرێ كۆمبنن و دانوستاندنان بكه‌ن”.

ئه‌ڤرۆ:

جێگرێ سه‌رۆكێ جڤاتا نوونه‌رێن ئیراقێ ڕاگه‌هاند، شاندێ حوكمه‌تا هه‌رێما كوردستانێ ل به‌غدا دیدار و كۆمبۆنێن باش ل گه‌ل به‌رپرسێن حوكمه‌تا ئیراقێ ئه‌نجامداینه‌ و تێكگه‌هشتنه‌كا باش دناڤبه‌را واندایه‌ یا هه‌ی.

شاخه‌وان عه‌بدوللا، جێگرێ سه‌رۆكێ جڤاتا نوونه‌رێن ئیراقێ گوت” چه‌ندین دیدار د ناڤبه‌را شاندێ حوكمه‌تا هه‌رێما كوردستانێ و به‌رپرسێن حوكمه‌تا ئیراقێ ییچن هاتینه‌ ئه‌نجامدان، كۆمبوونێن هه‌فتیا بۆری ژی دباش بوون و گاڤێن باش یێن هاتینه‌ هاڤێتن”.

شاخه‌وانی دیاركر ژی” پێشبینیێ دكه‌ین پرۆژه‌ قانوونا بودجه‌یا گشتی یا ئیراقێ بۆ سالا 2023 ب ڕازیبوونا هه‌درو ئالیان بهێته‌ جڤاتا نوونه‌ران، وی ده‌می ئه‌م ژی دێ پشته‌ڤانیێ ل وێ ڕێككه‌فتنێ كه‌ین كو د ناڤبه‌را هه‌ردو ئالیان دا دهێته‌ كرن”.

ل 10 كانوونا ئێكێ 2022 شاندێ حوكمه‌تا هه‌رێما كوردستانێ ب سه‌ره‌دانه‌كێ چوویه‌ به‌غدا، پشتی پێكئینانا كابینه‌یا نوو یا حوكمه‌تا ئیراقێ ب سه‌رۆكایه‌تیا محه‌مه‌د شیاع سوودانی، ئه‌ڤه‌ جارا دویێ یه‌ شاندێ بلند یێ حوكمه‌تا هه‌رێما كوردستانێ بۆ دانوستاندنێ ل سه‌ر پشكا هه‌رێما كوردستانێ ژ بودجه‌یا گشتی یا ئیراقێ و پرسا بودجه‌ی و ماده‌یێ 140 یێ دستووری و كێشه‌یێن هه‌لاویستی یێن دی د ناڤبه‌را حوكمه‌تا هه‌رێما كوردستانێ و حوكمه‌تا ئیراقێ سه‌ره‌دانا به‌غدا دكه‌ت”.