ئەڤرۆ نیوز ، زنار تۆڤی :

پشتی هەلبژارتنێن پەرلەمانێ عێراقێ ئێکسەر پارتی دیموکراتی کوردستان دەست ب گوهۆرینێن ناڤخوەیی یێن حزبێ کر و د ئێکەم پێنگاڤ دا پارتی بەرپرسێن هەر سێ لقێن خوە ل كه‌ركووك و هەلەبجە و سلێمانیێ گوهارتن.

وەکو دیار مەکتەبا سیاسی یا پارتی د دووماهی کۆمبوونا خوە دا بریارا دا کو گوهۆرینێن مەزن یێن ناڤخوەیی یێن حزبێ ل سەر ئاستێ لق و مەکتەبان بکەن ، لەوما هەر نوکە پارتی بەرپرسێ لقا 12 ل هەلەبجە گوهارت و کادرەکی گەنج ب ناڤێ بەسام عەلی حەمە سالح کرە بەرپرسێ لقا هەلەبجە.

هەروەسا پارتی دیموکراتی کوردستان ئالان حەمە سەعید كادرێ خوه‌ یێ گه‌نج كو ئەندامێ جڤاتا سەرکرداتیا سلێمانیێ بوو ، كره ‌بەرپرسێ لقێ چار یا پارتی ل پارێزگەها سلێمانیێ.

دیسا ل كه‌ركووكێ ژى پارتى شاخه‌وان عه‌بدوللا كادرێ خوه‌ یێ دیار ل وێ پارێزگه‌هێ و ئەندامێ پەرلەمانێ عێراقێ ، بۆ پۆستێ به‌رپرسێ لقێ کەرکووکێ ده‌ستنیشان كریە.

لدووڤ بریارا مەکتەبا سیاسی یا پارتی ، ئەڤ گوهۆرینە دێ لق و مەکتەبێن پارتی ، ل دەڤەرێن کوردستانی یێن دەرڤەی ئیدارەیا هەرێمێ ژى ڤەگەریت و پارتی ل بەرە کۆمەکا کادرێن خوە یێن گەنج بگەهینیتە جهێن بریارێ.

ئەڤرۆ نیوز ، زنار تۆڤی :

ئەڤرۆ شەمبیێ 2/6/2018 هێزه‌كا سوپایێ ئەمریکا گه‌هشته‌ سه‌رێ چیایێ شنگالێ و بریاره‌ بنگه‌هه‌كێ سه‌ربازی ل سه‌رێ وی چیایی دانیت.

لدووڤ زانیاریێن ئەڤرۆ نیوز ، ئه‌ڤرۆ شەمبیێ 15 ترۆمبێلێن سه‌ربازی یێن سوپایێ ئه‌مریكا ب چه‌ك و كه‌ل و په‌لێن خوە یێن سه‌ربازی ڤه‌ گه‌هشتینه‌ چیایێ شنگالێ و ل نێزیك گۆپیتكا میرا یا زنجیرا وی چیایی بنه‌جهـ بووینه‌.

هەروەسا وێ هێزا ئه‌مریكی ئامیر و ترومبێلین خوه ژی‌ ل وێ ده‌ڤه‌رێ داناینه‌ و ده‌ست ب ئاماده‌كاریێن دانانا بنگه‌هه‌كێ سه‌ربازی یێ به‌رفره‌هـ ل چیایێ شنگالێ دكه‌ن.

ئەڤرۆ نیوز ، تۆڤی :

ل حەفتیا بوری شاندەکێ پارتی سەرەدانا بەغدا كربوو و ل گەل حزب و لایەنێن سیاسی كۆمبوویە ، وی شاندی پارتی راگەهاند بوو ، بۆ كوردان وەرگرتنا پۆستێ سەرۆك كۆماری یێ گرنگە ، لەوما دڤێت گوتۆبێژ ل سەر وی پۆستەی بهێتە کرن ، لدووڤ هژمارا كورسیان ژی دێ پشكا پارتی بیت.
هەڤدەم ل سەر وەرگرتنا پۆستێ سەرۆك كۆمارێ عێراقێ هژمارک ژ بەرپرسێن ئێكەتیێ لێدوانێن جۆدا ددەن و پشکەک ژ وان دبێژن ئەڤە پشكا ئێکەتیێ یە ،چونکی بەری نوکە رێككەفتن دناڤبەرا ئێكەتیێ و پارتی ل سەر ڤی پۆستی هاتیە كرن.

مەحمود محەمەد پەیڤدارێ پارتی دیموكراتی كوردستان دیارکریە ، کو پۆستێ سەرۆك كۆماری پشكا كوردانە و ل كوردستانێ ژی ب رێككەفتن دێ هێتە ئێكلا کرن ، چونكی هەکە بەری نوکە رێككەفتنەک دناڤبەرا سەرۆك بارزانی و جەلال تالەبانی دا هەبیت ، ب ئەگەرێ پابەند نەبوونا ئێكەتیێ ئەو رێككەفتنە تێكچوویە ، هەروەسا گوتیە ، دڤێت سەر ژنوو گفتوگۆ بهێتە کرن بۆ رێككەفتنێ ل سەر ڤی پۆستی و لدووڤ هەموو پێڤەران ژی سەرۆک کۆمار پشكا پارتی دیموكراتی كوردستانە.

ئەڤە چەند سالن پۆستی سەرۆك كۆمارێ عێراقێ د دەستی ئێکەتیێ دایە ، بەلێ زۆرترین نەرازیبوون و نیگەرانی ل سەر فوئاد مەعسوومی سەرۆك كۆمار ل پشكا ئێکەتیێ هەبوویە ب ئەگەرێ وێ چەندێ ل دەمێ بوریدا وی هەلویست بەرانبەر مافێن دەستووری یێن خەلکێ كوردستانێ نەبوویە.