ئه‌ڤرۆ نيوز:
لیژنا بلند یا سه‌رپه‌رشتیا موه‌لیدێن پارێزگه‌ها دهۆکێ ده‌رباره‌ی بهایێ ئه‌مپێری، رۆنكرنه‌ك به‌لاڤ كريه، ئه‌ڤه ده‌قێ وێ يه:
هه‌ر جارا بهایێ ئه‌مپێری ده‌ردکه‌ڤیت ودهێته راگه‌هاندن.. هنده‌ک که‌س و لایه‌ن هه‌نه یێ خۆ لبه‌ر ڤه‌نای دا ئاگرێ فتنێ گه‌ش که‌ت.. وئه‌ڤ بوهایه هه‌ر چه‌ند بیت یێ رازی نینه و توره‌یه ومه‌ره‌ما وی چه‌واشه‌کاریه و دڤێت به‌رێ خه‌لکی ژ راستیان وه‌رگێریت .. وڤان جوره ره‌وشا بۆ مزایداتان بکار دئینیت .و دهێن و به‌راوردی دگه‌ل هه‌ولێر وسلێمانیئ دکه‌ن وئه‌و باش دزانن کۆ به‌رنامێ کارکرنا موه‌لیدا هه‌می ده‌ما ل دهۆکێ یێ جودایه و پتره لدویف داخوازیا خه‌لکی .. ئه‌ڤجا ده‌ست دده‌نه نفرین و جڤینا وگوتنێن کرێت و نه شایسته وبێ هیچ بنیات ودگه‌ل چه‌ندین بابه‌تێن دی کۆ چ په‌یوه‌ندی ب بابه‌تێ که‌هه‌ره‌با موه‌لیدان ڤه نه … هه‌میا تێکه‌ل و پێکه‌ل دکه‌ن ب مه‌ره‌ما هندێ کارتێکرنێ ل خه‌لکه‌کێ بکه‌ن وهزرا وان شێلی بکه‌ن و وان سست و خاڤ بکه‌ن و ئه‌گه‌ر چ ژوی خه‌لکی چێنه‌که‌ن ب ڤان مه‌رامێن خۆ بۆ وان به‌سه هه‌ر ب کێمی بێژن ئامین .. هێژایان خه‌لکێ دهۆکێ .. ئه‌وێن دڤێن راستیێ بزانن ئه‌ڤا ل خوارێ رونکرنا بابه‌تی یه.. ١- هه‌یڤانه بهایێ ئه‌مپێری ب کۆژمه‌کێ جودایه و دیسان ژ جهه‌کی بۆ جهه‌کێ دی جودایه.. لسه‌ر شه‌نگستێ بهایێ گازوایلێ یێ بازرگانی ل بازاری و ئه‌و ده‌مژمێرێن ب دره‌ستی موه‌لیدان کارکرین..دچارچوڤێ وان سه‌رجه‌م ده‌مژمێرێن بۆ هاتینه ده‌ستنیشانکرن د ٢٤ ده‌مژمێراندا کۆ دبێژنێ به‌رنامێ کارکرنا موه‌لیدا. ٢- پشتێ ب نڤیسارێن فه‌رمی ، ده‌مژمێرێن کارکرنا موه‌لیدا یێ وێ مه‌ها بها تێده دیارکرن ژلایێ رێڤه‌به‌ریا کۆنتره‌لێ که‌هره‌با دهۆکێ دگه‌هیته لیژنا بلندا سه‌رپه‌رشتیا موه‌لیدێن پارێزگه‌ها دهۆک دیسان تێکرایێ بهایێ گازوایلێ یێ بازرگانی ژلایێ رێڤه‌به‌ریا نه‌فت و کانزایێن دهۆک ژی دگه‌هیته لیژنا بلند ئه‌ڤ ژمارانه دکۆمبوونه‌کا فه‌رمی دا ب ئاماده‌بوه‌نا نوینه‌رێن هه‌ر ٧ قایمقامیا،که‌هره‌با دهۆکێ،کۆنترولێ که‌هره‌بێ، دایرا نه‌فتێ، پارێزگه‌ها دهۆک، جڤاتا پارێزگه‌هێ پرانیا جارا، پۆلیس،راگه‌هاندن…ئه‌ڤ ژمارانه داخلی به‌رنامه‌کێ کۆمپۆته‌ری دبن کۆ تایبه‌ت هاتیه دروستکرن ژلایئ ئابورناس و ئه‌ندازیارو بسپوران ڤه بۆ هژمارتنا بهایێ ئه‌مپێری هه‌یڤانه .وبهایێ ئه‌مپێری دهێته هژمارتن. —- ٣- به‌راوردکرنا بهایێ ئه‌مپێری دگه‌ل هه‌ولێرێ و سلێمانیێ و بۆچی یئ وان ئه‌رزانتره بۆ نمۆنه هه‌یڤا ٤ ؟ – چنکۆ به‌رنامێ کارکرنا مولیدا ل دهۆکێ پتره کۆ (١٦) سه‌عه‌تن (٧ بۆ ١١ سپێدێ) و (٢ بۆ ٢ شه‌ڤ. دڤان ١٦ سه‌عه‌تان دا ١٠ سه‌عه‌ت که‌هره‌با گشتی دناڤرا هاتیه و ٦ سه‌عه‌تێن مایی بدروستی موه‌لیدان کار کریه کۆ بهایێ وێ لدویف به‌رنامجێ کۆمپیوته‌ری دبیته ٧٥٠٠ دینار. ئه‌ڤه تنێ ل قه‌زایێن دهۆک سێمێل و زاخۆ و ئامێدیێ .ل ئاکرێ و به‌رده‌ره‌ش و شێخان بهایێ ئه‌مپێری ژ ٣٥٠٠ دینارا بۆ٦٥٠٠ یه هه‌ر جهه‌ک و لدویف به‌رنامێ کارکرنا مولیدێن وان و سه‌عه‌تێن کارکرنا مولیدان.بۆ زانینا بهایێن ئه‌مپێری لسه‌رانسه‌ری پارێزگه‌ها دهۆک هوین یێن به‌رێز دشێن سه‌ره‌دانا مالپه‌رێ قایمقامیا قه‌زا دهۆک بکه‌ن. – ل هه‌ولێرێ به‌رنامێ کارکرنا مولیدان تنێ ٩ سه‌عه‌تن(ژ ٤ ئێڤاری هه‌تا ١ شه‌ه‌ڤه) دڤان ٩ سه‌عه‌تان دا ٥ سه‌عه‌تێن که‌هره‌با عام هاتیه و٤ سه‌عه‌تا موه‌لیدا کار کریه ئه‌ڤه بهایێ ئه‌مپێری لوێرێ بۆ ٥٥٠٠ دینار ول سلێمانیێ ژی بهه‌مان شێوه‌یه. ٤- بوچوونا لیژنا موه‌لیدان ئه‌گه‌ر خه‌لکێ دهۆکێ بڤێت و داکۆ ده‌رگه‌هی ل ڤان گوتگوتک و ئاخفتنێن بێ ئه‌ساس وبێ رامان و بۆهتان وبێ به‌ختی و بێ وژدانیێ بگریت ئه‌وه کۆ به‌رنامێ کارکرنا موه‌لیدا ل دهۆکێ وه‌کۆ یێ سلێمانیئ و هه‌ولێرێ لێ بکه‌ت ژ سه‌عه‌ت ٤ ئێڤاری بۆ ١ شه‌ڤ وب ڤێ چه‌ندێ بهایێ ئه‌مپێرێ دێ وه‌کی یێ وان لێ هێت ودێ ده‌رگه‌ه لهه‌مبه‌ر ڤان مزایداتان ئێته گرتن. ٥- بۆ ره‌مه‌زانێ ژی لیژنێ به‌رنامه‌کێ تایبه‌ت بۆ ڤێ مه‌ها پیرۆز به‌رهه‌ڤ کریه ودێ دده‌مێ خۆدا هێته به‌لاڤکرن و په‌یره‌وکرن.. ٦- هه‌ر به‌رێزه‌کێ مافێ پسیارکرنێ ب زانین و ب مه‌ره‌ما زانینا راستیێ هه‌یه.. ومافێ سکالان هه‌یه و ده‌رگه‌هێن دادگه‌هێ دڤه‌کرینه بۆ هه‌ر که‌سه‌کێ گومان هه‌بیت لسه‌ر کارو ئه‌دائا لیژنێ یان هه‌ر بریار بده‌سته‌کێ. ٧- مافێ لیژنێ ژی و دام و ده‌زگه‌هێن په‌یوه‌ندیدار ب ڤی بابه‌تی ڤه هه‌یه وی ده‌می داوایێ لسه‌ر ڤان جوره که‌سان ڤه‌که‌ت ل دادگه‌هێ ئه‌وێن بێ به‌لگه گوتن و بوهتانان دڤی بیاڤی دا به‌لاڤ دکه‌ن و چه‌واشه‌کاریئ دکه‌ن و خه‌لکی دئازرینن وسار دکه‌ن. ٨- بۆ بیرئینان ، که‌رتێ که‌هره‌با موه‌لیدا ١٠٠% که‌رته‌کێ تایبه‌ته و ئه‌هلی یه، وکارێ لیژنێ سه‌رپه‌رشتیا کارو به‌رنامه رێکخستنا وایه وپاراستنا هه‌ڤسه‌نگیێ و مافێ خه‌لکی یه. لیژنا بلند یا سه‌رپه‌رشتیا موه‌لیدێن پارێزگه‌ها دهۆک ٢/٥/٢٠١٨
نيشاندان