ئه‌ڤرۆنیوز:
ئاڤاهیه‌ك ل زاخۆ ئه‌ڤرۆ چارشه‌مبى 23/5/2018هه‌رفت وكه‌سه‌كى گیانێ خوه ژ ده‌ست دا وپێنج كه‌س ژى برینداربوون.
راگه‌هاندنا به‌ره‌ڤانیا باژێرى ل پاریزگه‌ها دهۆكێ گۆت” ئه‌ڤرۆ نیڤرۆ پەیوەندی ب مەفرەزا شەهیدان ل زاخۆ هاتە کرن ل دۆر هەبوونا روودانەکا هەرفینێ ل( نی یو زاخۆ).”.
دیاركر ژى” مەفرەزا ناڤبری دگەل بنگەهێ (رکاڤا نی) ل جهێ روودانێ ئامادەبوون کو ئاڤاهیەك کەفتیە ژئەگەرێ سەب کرنی و شەش کەس بووینە قوربانى كو ئێك ژوان ل جهێ روودانێ گیانێ خو ژدەست دایە و پێنج کەس ژى بریندار بوون و هاتینە رەوانەکرن بۆ نەخوه‌شخانا تەنگاڤیان ل زاخۆ”.
ئه‌ڤرۆنیوز:
سه‌ركرده‌كێ حزبا ده‌عوه یا ئیسلامى كو نورى مالكى سه‌رۆكێ وێ یه، ئاشكراكر كو ئه‌و دژى وێ چه‌ندێ نینن هشیار زێبارى ئه‌ندامێ مه‌كته‌با سیاسى یا پارتى دیموكراتى كوردستان پۆستێ سه‌رۆك كۆمارا عیراقێ وه‌رگریت.
پشتى ده‌نگوباسێ دیاركرنا هشیار زێبارى بۆ پۆستێ سه‌رۆك كۆمارا عیراقێ ژلایێ پێكهاتێ كوردى ڤه هاتیه به‌لاڤكرن، جاسم محه‌مه‌د جه‌عفه‌ر سه‌ركرده ل حزبا ده‌عوه یا ئیسلامى گۆت” هه‌ر قۆناغه‌كێ زه‌لامێ خوه یێ هه‌ى، هه‌كه سازانه‌كا سیاسى ل سه‌ر هشیار زێبارى هه‌بیت بۆ وه‌رگرتنا پۆستێ سه‌رۆك كۆمارا عیراقێ، مه چو لارێ بوون نابیت”.
ناڤبرى داخۆیانیه‌كا رۆژنامه‌ڤانى دا گۆت ژى” وه‌رگرتنا وى پۆستى ژلایێ زێبارى ڤه دو خال بۆ دڤێن وهه‌كه ئه‌و دو خاله هه‌بن، مه چو لارى بوون نابیت، خالا ئێكێ سازانا كوردانه چونكى پۆستێ سه‌رۆك كۆمار پشكا كوردانه وهێزێن كوردى ناڤێ سه‌رۆك كۆمارى پێشنیاز دكه‌ن”.
ل دۆر خالا دویێ گۆت” دانوستاندن ل گه‌ل هێزێن دى یه ل به‌غدا ل سه‌ر وى بابه‌تى، چونكى ئێكلاكرنا هه‌رسێ سه‌رۆكاتیان گرێداى ب سازان ورێككه‌فتنێن سیاسى ڤه‌یه”.
دهێته زانین، ئه‌ڤرۆ چارشه‌مبى 23/5/2018 خالد شوانى ئه‌ندامێ شاندێ ئێكه‌تیێ ل به‌غدا راگه‌هاندبوو كو پۆستێ سه‌رۆك كۆمارا عیراقێ شایسته‌یا ئێكه‌تیێ یه، به‌لێ هه‌ر ل وى ده‌مى ول هه‌مان كۆنفرانسێ رۆژنامه‌ڤانى خسرۆ گۆران ئه‌ندامێ شاندێ پارتى ل به‌غدا گۆت” نوكه نه ده‌مێ ئاخڤتنێ یه ل سه‌ر پۆست وپله‌یان وكه‌نگى ده‌م هات دێ دانوستاندنێ ل سه‌ر كه‌ین”.
ئه‌ڤرۆنیوز:
ئه‌ندامه‌كێ لیستا ده‌وله‌تا قانوونى كو نورى مالكى سه‌رۆكاتیا وێ دكه‌ت، هه‌لویستا لیستا خوه ل سه‌ر مانا حه‌یده‌ر عه‌بادى دپۆستێ سه‌رۆك وه‌زیران دا به‌رچاڤكر.
عه‌بدولهادى سه‌عداوى، ئه‌ندامێ لیستا ده‌وله‌تا قانوونى راگه‌هاند” لیستا مه وچه‌ندین لیست ولایه‌نێن دى ژى دژى وێ چه‌ندێ عه‌بادى جاره‌كا دى ببیته سه‌رۆك وه‌زیران”.
سه‌عداوى گۆت ژى” هه‌موو ئه‌ندامێن ده‌وله‌تا قانوونى ب نورى مالكى ژى ڤه مانا عه‌بادى دپۆستێ سه‌رۆك وه‌زیران دا ره‌ت دكه‌ن”.
ئەڤرۆ نیوز ، زنار تۆڤی :
شاندێن هه‌ڤپشكێن پارتی دیمۆكراتی كوردستان و ئێكه‌تیا نیشتیمانی یا كوردستانی ئه‌ڤرۆ چارشەمبی 23 گولانا 2018 ل به‌غدا كۆمبوون و وان راگه‌هاندیە ، کو ئه‌ڤ سه‌ره‌دانا وان یا راوێژكاریه.
ئەڤرۆ هەردو شاندێن پارتی و ئێكه‌تیێ ل به‌غدا كۆمبوون، سه‌ره‌دانا لایەنان ژبۆ پێكئینانا حكومه‌تا نوو یا عێراقێ گۆتوبێژ كرن.
پشتی وێ كۆمبوونێ ژی هه‌ر ئێك ژ خسرۆ گۆران و خالد شوانی ئه‌ندامێن شاندێن پارتی و ئێكه‌تیێ د پرێسكۆنفرانسه‌كی دا راگه‌هاند ،کو سه‌ره‌دانا شاندێن ئێكه‌تی و پارتی بۆ به‌غدا و لایەنێن عێراقی، ب تنێ ژبۆ هایداربوونێ یه ل سه‌ر بۆچوونێن لایەنێن سیاسی یێن عێراقی.
هه‌روه‌سا گوت ژی ، كۆمبوونێن پارتی و ئێكه‌تیێ دێ ل گه‌ل لایەنێن كوردستانی ل هه‌رێما كوردستانێ ل قۆناغا بهێت ده‌ست پێ كه‌ن ب ئارمانجا پێكئینانا تیمه‌كا هه‌ڤپشك ژبۆ گۆتوبێژێن پێكئینانا حكومه‌تا نوو یا عێراقێ.
ئه‌ڤرۆنیوز:
ل دووڤ قانوونا هه‌لبژارتنان ل عیراقى یا هژمار 45 یا سالا 2013 پێدڤیه 25% ژ ئه‌ندامێن جڤاتا نوونه‌ران ژن بن، دهه‌لبژارتنێن ڤێ دووماهیێ یێن جڤاتا نوونه‌رین عیراقێ 83 ژن لسه‌رانسه‌رى عیراقێ بوونه په‌رله‌مانتار كو 15 ژوان كوردن.
13 ژنێن كورد ل پارێزگه‌هێن هه‌رێما كوردستانێ وئێك ل كه‌ركووكێ وئێك ل به‌غدا بووینه په‌رله‌مانتار كو ناڤێن وان ژى ئه‌ڤه نه:
پارێزگه‌ها هه‌ولێرێ: مه‌یاده محه‌مه‌د (پارتى) وسه‌لما عومه‌ر (ئێكه‌تى) و سروا یونس (نه‌وه‌ى نوێ)
پاریزگه‌ها سلێمانیێ: جوان ئیحسان وپلێسه جه‌بار وئاره‌زوو مه‌حموود ( ئێكه‌تى) وبهار مه‌حموود (گۆران) ویوسرا ره‌جه‌ب (نه‌وه‌ى نوێ).
پاریزگه‌ها دهۆكێ: ڤیان سه‌برى ووه‌سفیا محه‌مه‌د ودالیا فه‌رهاد (پارتى).
پاریزگه‌ها نه‌ینه‌وا: ئیخلاس سه‌باح وخالیدا خه‌لیل ( پارتى)
پارێزگه‌ها كه‌ركووك: دیلان غه‌فوور (ئێكه‌تى)
پارێزگه‌ها به‌غدا : ئالا تاله‌بانى (هه‌ڤپه‌یمانیا به‌غدا)
ژ ڤێ ئامارێ دیاردبیت كو شه‌ش په‌رله‌مانتارێن ژن ژوان 15 ب سه‌ر پارتى دیموكراتى كوردستان ڤه‌نه و پێنج ب سه‌ر ئیكه‌تیێ ڤه ودو ب سه‌ر نه‌وه‌ى نوێ ڤه وئێك ب سه‌ر گۆران ڤه وئێك ژى ب سه‌ر لیستا هه‌ڤپه‌یمانیا به‌غدا یا عه‌ره‌بى ڤه.
ئه‌ڤرۆنیوز:
په‌یڤدارێ دادگه‌ها فیدرالى یا عیراقى دبه‌یاننامه‌كێ دا راگه‌هاند، دستوورى یا دیاركرى كا چ لایه‌ن دشێت حوكمه‌تێ پێك بینیت.
ئیاس سامۆك، په‌یڤدارێ دادگه‌ها فیدرالى دیاركر” برگا ئێكێ ژ مادێ 76 ژ دستوورى ئاماژێ ب وێ چه‌ندێ دكه‌ت كو سه‌رۆك كۆمار دده‌مێ 15 رۆژان دا داخوازێ ژ مه‌زنترین لیستا په‌رله‌مانى دكه‌ت حوكمه‌تا نوو پێكبینیت”.
دیاركر ژى” ل دووڤ دستوورى، مه‌زنترین لیست مه‌رج نینه ئه‌و لیست بیت یا زورترین كورسى دهه‌لبژارتنان دا ب ده‌ستڤه‌ئیناین، به‌لكو دبیت ئه‌و لیسته بیت كو پشتى هه‌لبژارتنان وب رێككه‌فتنا لیستان دهێته دروستكرن”.
ل دووڤ ڤێ رۆهنكرنا دادگه‌ها فیدرالى، دو هه‌ڤپه‌یمانى دشێن لیسته‌كا په‌رله‌مانى دروست بكه‌نوهه‌ڤپه‌یمانیا سائیرون ژ حوكمه‌تێ دوور بێخن كو وێ زورترین كورسیێن جڤاتا نوونه‌ران ب ده‌ستڤه‌ئیناینه كو 54 كورسى نه
ئه‌ڤرۆنيوز:
شاره‌زايه‌كێ بوارێ په‌ترۆلێ وغازێ راگه‌هاند، بلندبوونا بهايێ په‌ترۆلێ ل جيهانێ دێ به‌رده‌وام بيت وره‌نگه بگه‌هيته 100 دۆلاران بۆ هه‌ر به‌رميله‌كێ، ڤێ چه‌ندێ ژى دێ كاريگه‌ريه‌كا مه‌زن هه‌بيت ل سه‌ر ئابوورێ هه‌رێما كوردستانێ ودێ ل ده‌مه‌كێ كێم قه‌يرانا داراييا هه‌رێمێ هێته چاره‌سه‌ركرن.
د. بێوار خنسی، شيره‌تكارێ ئاسایشا هه‌رێمی كوردستان بۆ كاروبارێن وزێ وشاره‌زايێ په‌ترۆلێ وغازێ گۆت” چه‌ند فاكته‌ر يێن هه‌ين بۆ بلندبوونا بهايێ په‌ترۆلێ، ژوان داخوازى ل سه‌ر په‌ترۆلێ ل بازارێن جيهانێ يا زێده‌بووى، ديسا گرفتێن ل رۆژهه‌لاتا نازه‌راست په‌يدابووين ب تايبه‌تى تێكچوونا په‌يوه‌نديێن ئيرانێ ل گه‌ل وه‌لاتێن ئورۆپا، له‌وما دبيت دۆرپێچا ئابوورى ل سه‌ر ئيرانێ بهێته سه‌پاندن وكۆمپانيێن په‌ترۆلێ كارێن خوه ل ئيرانێ رابگرن وكۆمپانيا تۆتال وكۆمپانيا ميليسكى يێن دانيماركى ژى كارێن خوه رابگرن”.
دياركر ژى” ئيران رۆژانه سێ مليۆن و300 هزار به‌رميلێن په‌ترۆلێ دفرۆشيت/ هه‌كه ئه‌و رێژه كێم ببيت، بهايێ په‌ترۆلێ دێ بلند بيت وهه‌كه فشارا وه‌لاتان ژى نه‌بيت ئه‌و په‌ترۆلا عومباركرى ل چينێ وژابۆنێ وئه‌لمانيا وبريتانيا وئه‌مريكا وفره‌نسا كێم ببيت، دێ بهايێ ئێك به‌رميلا په‌ترۆلێ گه‌هيته 100 دۆلاران، ئه‌ڤه ژى هه‌كه فشار ل سه‌ر ئيرانێ به‌رده‌وام بن، چونكى وى ده‌مى رێكخراوا ئۆپك كو مليۆنه‌ك و300 هزار به‌رميل كێم بكه‌ت، راسته‌وخوه دێ بهايێ په‌ترۆلێ بلند بيت”.
د. بێوار خوياكر” هه‌ر وه‌لاته‌كێ په‌ترۆلێ بفرۆشيت دێ ره‌وشا وى يا ئابوورى خوه‌شتر بيت وهه‌رێما كوردستانێ ژى كو خودانا په‌ترۆلێ يه دێ ره‌وشا وێ يا ئابوورى گه‌له‌ك باشتر بيت، له‌وما ئه‌ڤه دێ بيته ئه‌گه‌رێ وێ چه‌ندض كو قه‌يرانا دارايى زووتر چاره‌سه‌ر بيت ومووێ فه‌رمانبه‌ران ل ده‌مێ خوه بهێته دان وكورتهينان ژى كێمتر ببيت ودێ سه‌ربخوه‌يا ئابوورى يا هه‌رێما كوردستانێ دروست بيت وئه‌و كێشێن دروست ژى بووين دێ هه‌موو هێنه چاره‌سه‌ركرن وئه‌و كۆمپانيێن ل هه‌رێمێ كاردكه‌ن دێ داهاتێ هه‌رێمێ زێده‌تر كه‌ن، له‌وما ئه‌ڤه هه‌موو دێ بنه ئه‌گه‌رێ زێده‌بوونا داهاتێ هه‌رێما كوردستانێ”.
ئاماژه دا وێ چه‌ندێ ژى” بۆ بودجا عيراقێ هه‌ر به‌رميله‌كا په‌ترۆلێ ب 46 دۆلاران هاتيه خه‌ملاندن وعيراق رۆژانه سێ مليۆن و800 هزار به‌رميلێن په‌ترۆلێ دفرۆشيت، له‌وما نوكه كو بهايێ په‌ترۆلێ بلندبوويه دێ بيته ئه‌گه‌ر كو داهاتيێ عيراقێ جار ونيڤان زێده‌تر ببيت، ئه‌ڤ چه‌نده ژى دێ كێشێن دناڤبه‌را هه‌رێما كوردستانێ وبه‌غداچاره‌سه‌ر كه‌ت، هه‌كه حوكمه‌تا عيراقێ ل سه‌ر بنه‌مايێ دستوورى كاربكه‌ت”.
ئه‌ڤرۆنيوز:
شانده‌كێ پارتى ديموكراتى كوردستان دوهى ل به‌غدا چه‌ندين كۆمبوون ل گه‌ل سه‌ركردێن عيراقى ئه‌نجامدان ب مه‌ره‌ما دانوستاندنێ ل دۆر پێكئينانا حوكمه‌تا عيراقى يا نوو، سه‌رۆكێ شاندێ پارتى فازل ميرانى دوان كۆمبوونان دا ب ئالايێ كوردستانێ ل سه‌ر دلێ خوه ده‌ردكه‌ت.
ل دووڤ وام وێنێن به‌لاڤبووين ده‌ردكه‌ڤيت كو فازل ميرانى سه‌رۆكێ شاندێ پارتى ئالايێ كوردستانێ ل سه‌ر لايێ چه‌پێ يێ سينگێ خوه دانايه وب وى شێوه‌ى ل گه‌ل هژماره‌كا سه‌ركردێن عيراقى كۆمبوويه وه‌كو موقته‌دا سه‌در ونورى مالكى وعه‌مار حه‌كيم وهادى عامرى.
ئه‌و كارێ سه‌رۆكێ شاندێ پارتى ده‌نگڤه‌دان ل تۆرێن جڤاكى په‌يداكر وهژماره‌كا مه‌زن يا خه‌لكێ كوردستانێ ده‌ستخوه‌شى ل وى كارى كر وب ديتنا چاڤدێرێن سياسى ئه‌ڤه بزاڤه‌كه بۆ به‌رگريكرنا پارتى ژ مافێن خه‌لكێ كوردستانێ.
ئه‌ڤ هه‌لويسته دده‌مه‌كى دايه كو دهه‌وا بانگه‌شا هه‌لبژاتنان دا هه‌ر ئێك ژ نێچيرڤان بارزانى جێگرێ سه‌رۆكێ پارتى ومه‌سرور بارزانى ئه‌ندامێ مه‌كته‌با سياسى يا پارتى ل كه‌رنه‌ڤالێن جه‌ماوه‌ر دا چه‌ندين جاران دووپاتى ل سه‌ر وێ چه‌ندێ دكر كو پارتى بۆ ب ده‌ستڤه‌ئينانا مافێن دستوورى يێن خه‌لكێ كوردستانێ بريارا چوونا به‌غدا دايه وسۆز دابوو ده‌نگده‌ر ولايه‌نگرێن خوه كو بزاڤێن مه‌زن بۆ ڤێ چه‌ندێ بكه‌ن.
ئه‌ڤرۆنيوز:
ب مه‌ره‌ما ئه‌نجامدانا كۆمبوونان ل گه‌ل لايه‌نێن سياسى يێن عيراقى، ئه‌ڤرۆ چارشه‌مبى 23/5/2018 شانده‌كێ ئێكه‌تى نيشتمانى كوردستان گه‌شهته به‌غدا.
مه‌كته‌با سیاسى یا ئێكه‌تیێ دبه‌یاننامه‌كێ دا به‌لاڤكر” شاندێ ئێكه‌تیێ دێ ب سه‌رۆكاتیا مه‌لا به‌ختیار به‌رپرسێ ده‌سته‌یا كارگیریا مه‌كته‌با سیاسى بیت وئه‌ندامه‌ته‌یا هه‌ر ئێك ژ رزگار عه‌لى وخالد شوانى وفریاد رواندوزى وسه‌عدوون فه‌یلى بیت”.
دیاركر ژى” ده‌مێ سه‌ره‌دانێ دێ دو رۆژبن وتێدا دێ دیدار وكۆمبوونان ل دۆر ئه‌نجامێن هه‌لبژارتنان ودانوستاندن بۆ پێكئینانا حوكمه‌تا نوو یا عیراقێ هێنه كرن”.
هه‌ر ئه‌ڤرۆ شاندێ ئێكه‌تیێ ل به‌غدا كۆمبوونه‌ك ل گه‌ل شاندێ پارتى ب سه‌رۆكاتیا فازل میرانى ئه‌نجامدا وپاشى ل گه‌ل موقته‌دا سه‌در رێبه‌رێ ره‌وتى سه‌درى وهه‌ڤپه‌یمانیا سائیرون كۆمبوو.
نيشاندان