ئه‌ڤرۆ نيوز:
شیرەتکارەکێ پەرلەمانێ کوردستانێ ئاماژە بڤێ چەندێ دکەت، کو راستڤەکرنا قانوونا چاکسازیا خانەنشینا دێ پاشکەڤیت بۆ پشتی بھێنڤەدانا پەرلەمانی و دیارکر، پێدڤیە پەرلەمان کۆمبوونەکا نە ئاسایی بکەت بۆ پەسەندکرنێ.
دکتۆر مەدحەت سلێمان، شیرەتکارێ پەرلەمانێ کوردستانێ بۆ رۆژناما ئەڤرۆ گۆت” قانوونا چاکسازیا خانەنشینا ئێکە ژ قانوونێن ھەرە باش کو ژلایێ پەرلەمانێ کوردستانێ ھاتیە دەرکرن، بەلێ مخابن ڤەخواندنا دروست بۆ نەھاتەکرن و کارڤەدان دووڤدا ھاتن، نوکە قانوون ھاتیە ڤەگەڕاندن بۆ پەرلەمانی و بڕیارە لسەر داخوازا وەلاتیان بھێتە راستڤەکرن، ب تایبەتی دێ مادێ سیێ ھێتە راستڤەکرن کو تایبەتە بۆ مووچێ پەرلەمانتار و پلەیێن تایبەت، بدیتنامن پێدڤی دەستپێکێ ھاتبا رۆھنکرن بۆ وەلاتیان.
دکتۆر مەدحەت سلێمان گۆتژی” نوکە پەرلەمان یێ د وەرزێ بھێنڤەدانا زڤستانێ دا و راستڤەکرن دێ گیروبیت بۆ پشتی دوو ھەیڤێن دی، چونکە پەرلەمان دێ ل ھەیڤا ئەیارا داھاتی دەست ب کۆمبوونێن خوە بکەت، ئەڤەژی دبیتە زیان بۆ قانوونێ، ژبەرکو بدیتنامن دبو پەرلەمان ل چەند رۆژەکادا کار کربایە ھەتا قانوون دھاتە راستڤەکرن، پشتی راستڤەکرنێ ھەتا دچیتە رۆژناما فەرمیی و پاشی تێتە فڕێکرن بۆ حکوومەتێ و سێ ھەیڤان ژی حوکمەتێ دێ بجە ئینیت ئەڤە دێ گیروبیت بۆ دووماھیا ئەڤ سالە، بەلێ ھەگەر کۆمبوونەکا نە ئاسایی بۆ بھێتەکرن ئەڤە دێ شێن دەمەکێ زووتر بکەڤیتە بیاڤێ بجە ئینانێ دا.
نيشاندان