ئەڤرۆ
قائید میرۆ:
بسپۆرەكێ دارایی ئاشكراكر، بڕیارا سەرۆكێ حوكمەتا هەرێما كوردستانێ ل دۆر دانانا هژمارا بانكی دێ كاریگەری ل سەر سیستەمێ بانكی هەبیت و چەندین مفا بۆ وەلاتی و فەرمانبەران هەنە. هەروەسا دبێژیت: ئێك ژ مفایێن دانانا هژمارا بانكی دێ رێگریێ ل قەچاخ برن و سپی كرنەڤا پارەی گریت و چەندین خزمەت گوزاری ژی دێ بۆ وەلاتیان هەبن.
پرۆفیسۆرێ هاریكار ئیدریس رەمەزان كۆچەر بسپۆرێ دارایی و بانكی بۆ رۆژناما ئەڤرۆ دیار كر «بڕیارا سەرۆكێ حوكمەتا هەرێما كوردستانێ ل دۆر ڤەكرنا هژمارا من، كو هژمارا بانكیە بۆ فەرمانبەرێن هەرێما كوردستانێ یا گرنگە بۆ قۆناغا نوكە ئەم تێدا، بڕیارە زۆر گرنگە ب دیتنا من بۆ فەرمانبەر و هەموو خەلكی، چونكە دێ بیتە ئەگەرێ وێ چەندێ زێدەتر وەلاتیان زانیاری ل دۆر نەختینە و بانكێ هەبن، هەژمارا بانكی ب شێوەیەكێ سەردەمیانە، ژ بەر كو هەتا نوكە وەلاتیێن هەرێما كوردستانێ شارەزایی و زانیاری ل دۆر نەختینە و پارێ كاش نینە، ڤێجا ئەو پارە مووچە بیت راكێشیت ل بانكێ یان بۆ هەر ئەگەرەكێ دی بیت، هەتا دێ باوەری بۆ بانكێن هەرێما كوردستانێ ڤەگەڕیت، هەروەسا دێ بیتە ئەگەرێ ڤەگەڕیانا باوەریا وەلاتی و بازرگانان بۆ بانكێ، ژلایەكێ دیڤە ڤەكرنا هژمارا من ل بانكێ دێ ئاسانكاریا بۆ وەلاتیان كەت د دەمێ گەشتێن دەرڤە دكەن.
خویاژی كر، ئەو قەلەبالغی و روتینێن سەر بانكێن هەرێمێ ژی نامینیت، دێ بیتە دەستپێكەكا باش هەر كەس گۆرەی پێدڤیا خوە پارەی ل بانكێ راكێشیت و وەلاتی ب هەبوونا هژمارا بانكی دێ زێدەتر خزمەت گوزاریان مفاداربیت و دێ باوەری ژی هەبیت ل بانكێ، بڕیارا حوكمەتا هەرێما كوردستانێ دێ چەندین مفایێن دی ژی هەبن و چەندین روتینات هەنە ئەو ژی نامینن، خەلك ژی دێ فێری سەرەدەریێ بیت دگەل سیستەمێ بانكی.
پڕۆفیسیۆرێ هاریكار ئیدریس رەمەزان كۆچەر ئاماژە كر «ڤەكرنا هژمارا بانكی دێ بیتە ئەگەرێ كێمبوونا قەلەبالغیێ ل سەر بانكێن هەرێما كوردستانێ ل دۆر نەختینێ و ئەو لودێ راكێشانا نەختینەی ل سەر بانكان دێ زۆر بەرەف كێم بوونێ بچیت.
پرۆفیسۆرێ هاریكار ئیدریس رەمەزان ئاماژە ب هندێ ژی دا، بانك ژی دێ ب باوەریەكا زۆرتر شێن كارۆبارێن خوە بڕێڤەببەن و خزمەت گوزاریێن زێدەتر پێشكێشی وەلاتیان بكەن، چونكە بانكێ رۆلەكێ زۆر كاریگەر هەیە بۆ گەشەپێدانا و بەرەف پێشبرنا سیستەمێ دەولەت و جڤاكی، هەروەسا دێ شەفافیەتا زێدەتر پەیداكەت و ئابوور دێ بەرەف جێهگیر بوونێ ڤە بچیت و بیتە ئەگەرەكێ بهێز بۆ گەشەیا ئابووری، ژ بەر كو هەموو بیاڤ گرێدای بیاڤێ نەختینێ ڤە هەیە، هەر چەندە بیاڤێ نەختینێ بهێتە شەفاف كرن جڤاك و دەولەت دێ مفاداربن، هەتا دێ رێگریێ ل سپیكرنا پارە و ب قەچاخ برنێ ژی كەت بۆ دەرڤەی وەلاتی.
هەروەسا دبێژیت: خالەكا دیا زۆر كاریگەر و مفادار بۆ ڤەكرنا هژمارا بانكی ئەو ژی گۆهۆڕینا پارەیە ب رێیا بانكێ ئیدی وەلاتی پشتی سیستەمێ هژمارا بانكی دهێتە دانان ب رێیا نڤیسینگەهێن پارە گۆهۆڕان كار ناكەن و رێ و جهێن قانوونی و سەردەمیانە دێ هەبن بۆ گۆهۆڕینا پارەی.
نيشاندان
