چاڤدێرەكێ‌ سیاسی سەبارەت سەرەدانا سەرۆك وزیرێن هەرێما كوردستانێ‌ مەسرور بارزانی و شاندێ‌ حكومەتا هەرێما كوردستانێ‌ بۆ بەغدا دبێژیت، ئێكگرتنا شاندێ‌ حوكمەتا هەرێمێ‌ حكومەتا بەغدا نەچاركر پێگیڕێب جهئینانا دستوور و قانوونا بۆدجێ‌ بكەت، و دڤێت مووچێ‌ فەرمانبەرێن هەرێما كوردستانێ‌ ب هنێریتن.
محەمەد خەزعەلی چاڤدێرێ‌ سیاسی تایبەت بۆ كەنالێ‌ كوردستان 24 ڕاگەهاند، سەرەدانا ڤێ‌ جارێ‌ یا شاندێ‌ هەرێما كوردستانێ‌ سەرەدانەكا جوداتر بوو، ئێكگرتنا دناڤبەرا هەولێرێ و سلێمانیێ‌ دا و هەموو ئالیێن سیاسی یێن هەرێما كوردستانێ‌، ئەڤە وەرچەرخانەكا گرنگە دناڤا هەرێما كوردستانێ‌ دا.
خەزعەلی ئاماژەدا هندێ‌، حكومەتا فیدرال یا د برامبەری ب جهئینانا ئەركەكێ‌ دستووری دا بۆ هنارتنا مووچە و شایستەیێن هەرێما كوردستانێ‌ و نەهێلانا فەرمانبەرێن هەرێما كوردستانێ‌ كو چاڤەرێی مووچەیێن خوەبن، هەروەسا گۆت: دڤێت حكومەتا فیدرالی ب ئەركێ خوە یێ‌ دستووری راببیت، و ل گەل حكومەتا هەرێما كوردستانێ‌ كێشەیێن خوە ب رێیا دستووری چارەسەر بكەت، و ئێدی خەلكێ‌ هەرێما كوردستانێ‌ د ڤێ‌ قەیرانێ‌ دا بكارنەئینن.
محەمەد خەزلی دوپاتكر، حكومەتا هەرێما كوردستانێ‌ د كاركرنا خوە دا ل گەل بەغدا یا رژدە و رێككەفتن ل سەر بنەمایێ‌ دستوور و رێككەفتنا سیاسی بۆ پێكئینانا حكومەتا ئیراقێ‌ كریە.
چاڤدێرێ‌ سیاسی زێدەباری وێ‌ چەندێ‌ ژی دیاركر، ئێكگرتنا لایەنێن سیاسیێن هەرێما كوردستانێ‌ پەیامەك بوو بۆ حكومەتا ئیراقێ‌، كو كورد ب ئێك دەنگ داخوازا مافێن خوە دكەن بیێ‌ جوداهی.
خەزعەلی سەرنجا وێ‌ چەندێ‌ ڕاكێشا، شاندێن كوردان بەری نوكە ب جودا جودا سەرەدانا بەغادایێ‌ دكرن، و هەر ئێك ژوانا بۆ بەرژوەندیێن خوە یێن كەسۆكی و حزبی ل گەل ئالیێن سیاسی و ئالیێن پەیوەندیدارێن حكومەتا ل بەغدا كۆمبوون ئەنجامددان، لەما چو ئەنجام نەبوون، بەلێ‌ ڤێ‌ جارێ‌ كو سەرەدانا ئێكگرتی بوو، ئەنجامێن ئەرینی دێ‌ بۆ هەبن.
هەژی گۆتنێ‌ یە ل رۆژا چوارشەمبی رێككەفتی 14 ئیلۆنێ‌ 2023 شاندێ‌ حكومەتا هەرێما كوردستانێ‌ كو پێكهاتی بوو ژ سەرۆك وەزیران مەسرور بارزانی و جێگرێ‌ سەرۆك وەزیران قوباد تالەبانی و ئاوات شێخ جەناب وەزیری دارایی و ئابووری، و ئۆمێد سەباح سەرۆكێ‌ دیوانا جڤاتا وەزیران، و ئامانج رەحیم سكرتێرێ‌ جڤاتا وەزیران، ب مەرەما دانوستاندنێ‌ و نەهێلانا كێشێن دارایی ل گەل حكومەتا بەغدا سەردانا بەغدا كرن، و ل گەل هەر سێ‌ سەرۆكاتیێن ئیراقێ‌ و ئالیێن سیاسی یێن شیعەیان كۆمبوون.

هەڵەبجە، عەزیز رەسول:

سەرانێن ئیراقێ‌، پێگریا وێ‌ رێككەفتنێ‌ نەبووینە یا ل گەل حكومەتا هەرێما كوردستانێ‌ كری، بوودجەیا خەلكێ‌ كوردستانێ‌ ناهنێرن، دناڤا جاددەیا كوردستانی ژی دەنگێن نەرازی ل هەمبەری بەغدایێ‌ بلند بووینە، چاڤدێرەكێ‌ سیاسی ژی دبێژیت، كارتا ب هێزا كوردان ئەوە خوە ژ حكومەتا بەغدایێ‌ ڤەكێشن دا كو حكومەتا شیعی بهێتە هەلوەشاندن.
چاڤدێرێ‌ سیاسی دارا محەمەد ئەمین بۆ رۆژناما ئەڤرۆ ڕاگەهاند، كوردان وەك نەتەوە ب خەباتا خوە حوكمێ‌ زاتی و پاشی فیدرالی وەرگرتیە، كارتا ب هێزا كوردان كوردبوونا وانایە، نەتەوەیا دویێ‌ یە د ئیراقێ‌ دا، كورد ب ئێك دەنگی و ب ئێكرێزی ژ بەغدایێ‌ بهێنە ڤەكێشان ئەو حكومەتا نوكە یا بناڤێ‌ حكومەتا ئیراقێ‌ دێ‌ هێتە هەلوەشاندن، هەكە كوردان پشتەڤانیا دامەزراندنا دەولەتا ئیراقا نوو نەكربا شیعە نەدشیان دەولەتێ‌ ب تنێ‌ دروست بكەن، سوونەیان ژی نەدهێلان ئەو كارە بهێتە ئەنجامدان، دبیت هندەك كەس وەسا هزر بكەن ئەڤ گۆتنە بۆ بەرڤانیكرنا ژ پارتی و ئێكەتیە بەلێ‌ وەسا نینە، بەغدا نەشێت دژاتیا كوردان بكەت، چونكی پێكهاتەكێ‌ سەرەكییێ‌ ئیراقێ‌ نە وحاشاتی لڤێ‌ ئێكێ‌ ناهێتە كرن.
چاڤدێرێ‌ سیاسی هەروەسا گۆت: هەكە كورد خوە ژ پرۆسێسا سیاسییا ئیراقێ‌ ڤەكێشن
ئەڤە حكومەت سۆدانی دێ‌ هێتە هەلوەشاندن، بێگۆمان عیراقێ‌ حكومەتەكا لاواز هەیە، كورد ل گەل ئالیێ‌ سونی ئێكبگرن وی دەمی شیعە نەشێن ب ساناهی حوكمڕانیا ئیراقێ‌ بكەن، ئیراق وەلاتەكێ‌ ب هێزە، كورد ئێكرێزبن دێ‌ شێن گڤاشتنێن گەلەم مەزن ل سەر ئیراقێ‌ دروست بكەت، ‌ بەلێ‌ دڤێ‌ رەوشێ‌ دا بێگۆمان نەشێن چو گڤاشتنان بكەن، چونكی هەر حزبەك ب جودا دچیت دانوستاندنان ل گەل بەغدایێ‌ دكەن.
دارا محەمەد ئەمین خوەیاكر، پرت و بلاڤبوونا ناڤمالیا كوردی، كورد بێهێز كرینە، حكومەتا ئیراقێ‌ نوكە گڤاشتنا ل سەر كوردستانێ‌ دكەت، بەردەوام داخوازیێن بلند دكەت، بەلێ‌ كۆمەكا بابەتان هەنە، مافێ‌ نەتەوەیی وەك فێدرالیەت د دستوورێ‌ ئیراقێ‌ دا هاتی بنەجهكرن و نەشێن دەستكارییێ‌ تێدا بكەن، باوەرناكەم بەغدا بشێت بوودجە و مووچێ‌ خەلكێ‌ كوردستانێ‌ بەردەوام ڕاكریت و نەهنێریت، چونكی فرۆشتنا پەترۆلێ‌ نەمایە، دبیت گیرو بكەت بەلێ‌ هەر دێ‌ هنێریت.

كۆمسیونا بلندا هەلبژارتنێن ئیراقێ‌ پشتی تروپشككرنا ناڤ و قەوارەیێن سیاسی ل ئیراقێ‌ بۆ ئەنجامدانا هەلبژارتنێن پارێزگەهان، ژمارا لیست و هەڤپەیامنی و پارت و ئالیێن سیاسیێن دیاركرن، لیستا پارتی دیموكراتی كوردستان ب ژمارە 197 دێ‌ پشكداریێ‌ دەهاەلبژارتنێن پارێزگەهاندا كەت.
پارتی دیموكراتی كوردستان ل پارێزگەهێن كەركووك و نەینەوا و دیالا، دێ‌ لیستا خوەیا تایبەت بۆ پشكداریا د هەلبژارتێن پارێزگەهێن ئیراقێ‌ دا هەبیت.
هەژی گۆتنێ‌ یە هەر ژ سالا 2005 وهەتا نوكە ئەڤە جارا ئێكێ‌ یە پارێزگەها كەركووكێ‌ دێ‌ دڤان هەلبژارتناندا پشكدار بیت.

سەرۆك بارزانی ب هەلكەفتا 62 سالیا سالڤەگەرا هەلكرنا شۆڕەشا مەزنا ئیلۆنێ‌ رێككەفتی 11 ئەیلۆنا سالا 1961 پەیامەك بەلاڤكر.
دپەیاما سەرۆك بارزانی دا هاتیە: شۆڕەشا ئیلۆنێ‌ مەزنترین شۆڕەشا سیاسی و چەكداری و جڤاكییا مللەتێ‌ كوردستانێ‌ بوو، سەخمەراتی پاراستنا ناسنامە و بەرگیریا ژ مافێن ڕەوایێن مللەتێ‌ كوردستانێ‌ و بەرقراركرنا دیموكراتیێ‌ ل ئیراقێ‌.
ئەڤە ژی دەقێ‌ پەیاما سەرۆك بارزانییە :
بناڤێ‌ خودێ‌ مەزن و دلۆڤان

شۆڕەشا ئیلۆنێ‌ مەزنترین شۆڕەشا سیاسی و چەكداری و جڤاكییا مللەتێ‌ كوردستانێ‌ بوو، سەخمەراتی پاراستنا ناسنامە و بەرگیریكرنا ژ مافێن ڕەوایێن مللەتێ‌ كوردستانێ‌ و بەرقراركرنا دیموكراتیێ‌ ل ئیراقێ‌. شۆڕەشا مەزنا ئیلۆنێ‌ ب ڕێبەرایا بارزانیێ‌ نەمر ئەزموونەكا بێ‌ وێنەیا خەبات و تێكۆشانێ‌ بوو، كو هەموو دەڤەر و چیایێن كوردستانێ‌ و هەموو تەخ و چین وتێكرایا ئایین و نەتەوەیێن كوردستانێ‌ تێدا پشكدار بوون.
ل بیرەوەریا شێست و دو سالیا هەلكرنا شۆرەشا ئیلۆنێ‌ دا رێز و بهاگرتن بۆ خەبات و ماندیبوونا هەموو شۆڕەشگێر و پێشمەرگە و كادرێن شۆڕەشا ئەیلۆنێ‌ هەنە، كو رۆلەك هەبوویە دڤێ‌ شۆڕەشا مەزندا و شانازییەك بۆ مللەتێ‌ خوە تۆمار كر.

مسعود بارزانی
11 ئیلۆنێ‌ 2023

سەرۆكێ‌ هەرێما كوردستانێ‌ ل 62 سالیا سالڤەگەرا شۆڕەشا ئیلۆنێ‌ د پەیاما خوە دا دبێژیت، وەكی چەوا ئێكرێزی و تەبایی، هێز و بنەمایێن شۆڕەشا ئیلۆنێ‌ بوون، ب ڤێ‌ هەلكەفتێ‌ ژی، دوپاتیێ‌ ل سەر ئێكرێزی و تەبایی و قەبیلكرنا ئێكودو و هاریكاریا د ناڤبەرا هەموو هێز و لایەن و پێكهاتێن مللەتێ‌ كوردستانێ‌ دا دكەین.
دەقێ‌ پەیاما سەرۆكێ‌ هەرێما كوردستانێ‌:
ب هەلكەفتا بوورینا 62 سالیا شۆڕەشا مەزنا ئیلونێ‌، سلاڤ و رێز بۆ گیانێ‌ پاكێ‌ ڕێبەرێ‌ شۆڕەشێ‌، بارزانیێ‌ نەمر و هەموو خەباتكەر و پێشمەرگەیێن قارەمان د هنێرین، كو ژ بۆ ئازادی یا مللەت و وەلاتی گیانێن خوە كرینە قوربان، و د رێكێن سەخت و دژوارێن شۆڕەشێ‌ دا تالی و ماندیبوونەكا مەزن دەرباز كرن.
شۆڕەشا مەزنا ئیلۆنێ‌، دایكا شۆڕەشێن كوردستانێ‌ یە كو بوویە هەلگرا بهایێن بلندێن مللەتێ‌ ستەملێكری و تێهنیێن ئازادای و سەرفرازیێ‌. بوویە كۆمكەرا ناسناما نەتەوەیی و نیشتیمانی و كلتووری یا هەموو پێكهاتێن مللەتێ‌ كوردستانێ‌، بوویە هیڤی و ئۆمێدێن مەزن، ئاگەهداری و هەست و هشیاریا نەتەوەیی و نیشتیمانی زێندی كرنەڤە، بوویە دۆز و داخوازیا مافێن ڕەوایێن مللەتی كو ب ئێكرێزی و تەبایی و ئامادەبوون هەموو قوربانیەكێ‌ بدەن داكو بگەهنە سەركەفتنێ‌ و ئارمانجێن بلندێن ڕەوا و دەنگێ‌ خوە گەهاندە هەموو جیهانێ‌.
مللەتێ‌ كوردستانێ‌ د شۆرەشا مەزنا ئیلۆنێ‌ دا ب باوەری بەرهنگاری و گیانفیدایی و خوین و قوربانی، ئێك ژ توندترین رژێما خوین مێژێن دەڤەرێ‌ ملكە چ كر و نەچار كرن دان پێدانێ‌ ب مافێن مللەتێ‌ كوردستانێ‌ بكەت، سەرەڕای وان هەموو نەیاران یێن دژی شۆڕشێ‌ كار دكرن، وهەتا نسكۆیێ‌ ژی، ئاگرێ‌ شۆڕەشێ‌ نەهاتە ڤەمراندن و دەستكەفتێن شۆڕەشێ‌ بوونە بناغەیا هەموو دەستكەفت و مافێن دستووری یێن مللەتێ‌ كوردستانێ‌.
وەكی چەوا ئێكرێزی و تەبایی، هێز وبنەمایێن شۆڕەشا ئیلۆنێ‌ بوون، هەر ب ڤێ‌ هەلكەفتێ‌ ژی دووپاتیێ‌ ل ئێكرێزی و تەبایی و قەبیلكرن و هاریكاریا د ناڤبەرا هەموو هێز و لایەن وپێكهاتێن كوردستانێ‌ دا دكەین، ئەڤە تاكە رێیە بۆ دەربازكرنا ئاستەنگ و مەترسی و نەخووشی و پاراستنا فێدرالی و ماف و دەستكەفتێن دستووری یێن هەرێما كوردستانێ‌ و دابیكرنا نوكە و پاشەرۆژەكا باشتر بۆ مللەتێ‌ كوردستانێ‌.
رێز و سلاڤ بۆ گیانێ‌ پاكێ‌ شەهیدێن شۆڕەشێ‌ و هەمو شەهیدێن رێییا ئازادیێ‌

نێچیرڤان بارزانی
سەرۆكێ‌ هەرێما كوردستانێ‌
11 ئیلۆنێ‌ 2023

د شێست و دو سالیا سالڤەگرا هەلكرنا شۆڕەشا مەزنا ئیلۆنێ‌ دا، باشترین رێز و بهاگرانی بۆ هەموو خەباتكەر و پێشمەرگەیێن قارمان ئارساتە دكەین، و هەموو وان كەسێن پشكداری دڤی شۆڕەشا سەرانسەریا كوردستانێ‌ دا كرین.
شۆرەشا ئیلۆنێ‌، مەزنترین شۆڕەشا مللەتێ‌ كوردستانێ‌ بوو، كو هەموو پێكهاتێن جودا جوداێن مللەتێ‌ كوردستانێ‌ ل ژێر سەركرداتیا رێبەرێ‌ نیشتیمانی جەنابێ‌ بارزانیێ‌ نەمر ژ بۆ ئارمانجێن بلندێن هەڤپشك پشكدار بوون، چەندین داستانێن سەركەفتنێ‌ تێدا تۆماركرن، و سەروەری و دەستكەفتێن گرنگ بۆ مللەتێ‌ كوردستانێ‌ ب دەستڤەئینان، د ڤێ‌ هەلكەفتا دژوار دا بەرخودان و خوەراگری و قارەمانیا پێشمەرگەیێ‌ نەبەز و خەلكێ‌ كوردستانێ‌ ب گشتی، ل جیهانێ‌ دەنگڤەدان و هەتا نوكە ژی نە ب تنێ‌ هەر ئازادیخوازێن كوردستانێ‌، بەلكی ئازادیخوازێن هەموو جیهانێ‌، ب رێزەكا هەرە مەزن ل شۆڕەشا ئیلۆنا مللەتێ‌ كوردستانێ‌ دنێڕن.
لەوڕا بیرەوەریا شۆڕەشا مەزنا ئیلۆنێ‌، پێدڤیە ببیتە پالدەركێ‌ زێدەتر بۆ هەموویان داكو پتر پێگیری ل سەر بدەستڤەئینانا مافێن دستووریێن خوە بین و خەمخۆری و دلسۆزیەكا زێدەتر بكەین، وان هەموو دەستكەفتێن نیشتیمانی بپارێزین كو بەرهەمێ‌ ڕنج و خەبات و قوربانیدانا شۆڕەش و سەرهەلدانێن مللەتێ‌ كوردستانێ‌ نە، ب تایبەتی شۆڕەشا ئیلۆنێ‌ كو ئێك ژ دەستكەفتێن دیرۆكی یە، رێككەفتنا 11 ئادارێ‌ یا سالا 1970 بوو حكومەتا وی دەمییا ئیراقێ‌ نەچار كرن دانپێدانێ‌ ب هندەك ژ مافێن مللەتێ‌ كوردستانێ‌ بكەن، شۆڕەشا ئیلۆنێ‌، بۆ هەموو دوژمن و نەیارێن كوردستانێ‌ سەلماند، كو مللەتێ‌ كوردستانێ‌ رێیا خەبات و سەرفرازیێ‌ گرتیە نەك خوەڕادەستكرن و ماكەچییێ‌.
سلاڤ بۆ گیانێ‌ پاكێ‌ شەهیدێن شۆڕەشا ئیلۆنی و هەموو شەهیدێن كوردستانێ‌ .
مەسرور بارزانی
سەرۆكێ‌ حكومەتا هەرێما كوردستانێ‌
11 ئیلۆنێ‌ 2023

سەرۆك مەسعود بارزانی ل پیرمام پێشوازی ل ئەلینا رۆمانسكی بالیۆزا ئەمریكا ل عیراقێ‌ و شاندێ‌ ل گەل كر.
ل دۆر راگەهاندنا بارەگایێ‌ بارزانی، د وێ‌ كومبوونێ دا‌ هزر و بیر ل دۆر رەوشا سیاسییا دەڤەرێ‌ و ئیراقێ‌ و ئاستەنگێن ل بەرامبەری پەیوەندیێن هەرێما كوردستانێ‌ و ئیراقێ‌ و پشتبەستن ل سەر دیالۆگی بۆ چارەكرنا وان ئاریشان هاتن پێكگۆهارتن.
هەر دۆی كومبوونێ‌ دا بالیۆزا ئەمریكا ل ئیراقێ‌ پشتەڤانیا وەلاتێ‌ خوە بۆ حكومەتا فیدرالیا ئیراقێ‌ و حكومەتا هرێما كوردستانێ‌ دیاركر، ب مەرما بەردەوامیا ل سەر دانوستاندنان و گەهشتن بۆ چارەسەرییەكا گونجایی ب تایبەت د بابەتێ‌ بودجێ‌ و ئاریشێن هەلاویستی دا.
زێدەباری وێ‌ چەندێ‌ بالیۆزا ئەمریكی دلگرانیا خوە هەمبەری روودانێن كەركووكی و ئالۆزیێن وێ دەربرین كو دە ئەنجامدا چوار وەلاتیێن سڤیل شەهید بوون و 15 دیتر بریندار بوون.
هەر د وێ‌ كۆمبوونێ‌ دا سەرۆك بارزانی پشتەڤانیا خوە بۆ محەمەد شیاع سۆدانی و حكومەتا وی دوپاتكر.
ژ ئالیەكێ‌ دیڤە هەر ئەڤرۆ، سەرۆكێ‌ حكومەتا هەرێما كوردستانێ‌ مەسرور بارزانی پێشوازی ل بالیۆزا ئەمریكا ل ئیراقێ‌ ئەلینا رۆمانسكی ل هەولێرێ‌ كر، تەوەرەكێ‌ دانوستاندنا دناڤبەرا هەردو ئالیاندا ل دۆر ماف و شایستەیێن دارایی یێن هەرێما كوردستانێ‌ بوون.
سەرۆكێ‌ حكومەتا هەرێما كوردستانێ‌ گۆت: ب مخانی ڤە هندەك لایەن هەنە وانا دڤێت ب رەنگەكێ‌ نەڕوەا و ژ دەرڤەیی قانوونا بودجێ‌ سەرەدەریێ‌ ل گەل هەرێما كوردستانێ‌ بكەن، ددەمەكی دا شاندێ‌ دانوستاندنان یێ‌ هەرێما كوردستانێ‌ داتا و زانیاریێن هوور و پشبەستن ب بەلگەیێن قانوونی و دستووری پێشكێشی لایەنێن پەیوەندیدار یێن حكومەتا فێدرال كرینە، لەوما پێدڤیە هەڤشێوەیێ‌ پارێزگەهێن ئیراقێ‌، مووچێ‌ فەرمانبەرێن هەرێما كوردستانێ‌ ژی بهێتە هنارتن و نە هێنە پێشێل كرن.
هەردو ئالی د هەڤڕا بوون ل سەر گرنگیا چارەسەركرنا ئاریشان ل سەر بنەمایی دستووری و ب رێیا دانوستاندنێ‌.
ژئالیەكێ‌ دیتر ڤە بەحسێ‌ روودانێن ڤێ‌ دووماهیێ‌ ل باژرێی كەركووكێ‌ كرن، دوپاتكر كو پێدڤیە رەوشا كەركووكی بهێتە ئاسایكرن و بارەگایێن پارتی بهێنە ڤەگەڕندن.

مەسرور بارزانی سەرۆكێ‌ حكومەتا هەرێما كوردستانێ‌ پێشوازی ل محەمەد كازم ئال سادق بالیۆزێ‌ كۆمارا ئیسلامی یا ئیرانێ‌ ل ئیراقێ‌ و شاندێ‌ ل گەل دا كر.
دهەڤدیتنەكێ‌ دا بالیۆزێ‌ كۆمارا ئیسلامی یا ئیرانێ‌ ، سۆپاسی و خوەشحالیا وەلاتێ‌ خوە بۆ حكومەتا هەرێما كوردستانێ‌ دەربڕین بۆ وان ئاسانكاری و هاریكاریا پێشكێشی زیارەتكارێن ئیرانێ‌ كرین، كو ل دەرگەهێن سنۆری یێن هەرێما كوردستانێ‌ هاتینە ئیراقێ‌ بۆ پشكداریا چلییا ماتەمینیا ئیمام حوسێن ل باژێرێ‌ كەربەلایێ‌.
بالیۆزێ‌ كۆمارا ئیسلامی یا ئیرانێ‌ هەروەسا پەسنا پێشكەفتن و ئاڤەدانیا هەرێما كوردستانێ‌ و ب تایبەتی باژێرێ‌ هەولێرێ‌ كر.
چارەسەركرنا كێشێن حكومەتا ئیراقێ‌ و هەرێما كوردستانێ‌ ل سەر بنەمایێن دستووری و رێككەفتنان، تەوەرەكێ‌ دیتر یێ‌ وێ‌ هەڤدیتنێ‌ بوو، دڤی بیاڤی سەرۆكێ‌ حكومەتا هەرێما كوردستانێ‌ مەسرور بارزانی دوپاتكر، كو هەرێما كوردستانێ‌ هەموو پێگیریێن خوە د چارچۆڤێ‌ قانوونا بۆدجە و دستووری دا ب جهئیناینە، و پێدڤیە حكومەتا فیدرالی ژی شایستەیێن دارایی هەرێمێ‌ ب هنێریت.

بریكارێ‌ وەزارەتا دارایییا حكومەتا ئیراقێ‌ سەبارەت مووچێ‌ فەرمانبەرێن كوردستانێ‌ گۆت: هەموو پێزانین ب تەمامی ل دۆر قانوونا بۆدجەیێ بۆ سەرۆك وەزیرێن ئیراقێ‌ نەهاتینە گۆتن، زێدەباری وێ‌ چەندێ‌ ژی لێكدانێن شاش بۆ پشكا بودجا هەرێما كوردستانێ‌ هاتینە كرن، وەك بریكارێ‌ وەزارەتا دارایی، بتایبەت پێزانینێن دروست دڤی بیاڤی دا دێ‌ دەمە سەرۆك وەزیرێن ئیراقێ‌ و هەموو بابەتێن گرنگ دێ‌ گەهینمە سەرۆك وەزیران.
مەسعود حەیدەر هورەسا گۆت: پێدڤیە ل سەر حكومەتا فیدارالیا ئیراقێ‌ مووچەیێ‌ فەرمانبەرێن هەرێما كوردستانێ‌ كو هەیڤانە (775) ملیار دینارە، ل گەل بودجا كارپێكرنێ‌ و خەرجیێن دیتر یێن مەزاختنا كارایی یێن یا دەولەتی ئیراقێ‌ بدەت.
بریكارێ‌ وەزارەتا داراییا ئیراقێ‌ هەروەسا دوپاتكر دێ‌ هەموو بزاڤێن چارەكرنا كێشا مووچە و بودجا هەرێما كوردستانێ‌ كەین.