ئەڤرۆ نيوز:
رێکخراوا مافێ مرۆڤی یا سەر ب نەتەوێن ئێکگرتی راگەھاند کو ژ بەر شەری و دۆرپێچا ل سەر یەمەنێ ھەتا نھا ب سەدان زارۆ و کەسێن دانعەمر ژ برسان مرینە و نەخوەشی ل وی وەلاتی بەلاڤ بوویە و دەرمان ناگەھیتە دەستێ خەلکی، یا نھا ل یەمەنێ روو ددەت کارەساتەکا مەزنە و مخابن جڤاکێ نێڤدەولەتی ل ھەمبەر یەمەنێ و وێ کارەساتێ بێ ھەلویست مایە و یا پێدڤی بۆ خەلکێ یەمەنێ نەھاتیە کرن.
ئەڤرۆ نيوز:
رێکخراوا مافێ مرۆڤی یا رۆژھەلاتێ کوردستانێ دوھی د داخۆیانیەکێ دا راگەھاند کو پشتی خوەنیشادانێن ل ئیرانێ و رۆژھەلاتێ کوردستانێ ھێزێن ئێمناھیێ یێن ئیرانێ ل باژێرێن رۆژھەلاتێ کوردستانێ ب سەدان لاوێن کورد دەستەسەر کرینە و ھەتا نھا ب دەھان لاوێن کورد ل ژێر ئەشکەنجەدانێ جانێ خوە ژ دەست داینە، دو رۆژ بەری نھا سارو قارەمانی لاوێ کورد ل باژێرێ سنە یێ رۆژھەلاتێ کوردستانێ ل ناڤەندا سازیا ھەوالگیریێ ب ئەشکەنجەدانێ ھاتیە کوشتن و گەف ل بابێ سارویی ژی ھاتیە کرن کو دڤێت بێژیت کورێ من خوە کوشتیە.
رێکخراوا مافێ مرۆڤی یا رۆژھەلاتێ کوردستانێ ھەروەسا دیار کریە کو گرتن و ئەشکەنجەدانا لاوان ل ئیرانێ و رۆژھەلاتێ کوردستانێ بەردەوامە و رژێما ئیرانێ پشتی خوەنیشادانان ژ ترسا ژناڤچوونا دەستھەلاتا خوە ب ھەموو رەنگەکێ کەسێن کو پشکداری د خوەنیشادانان دا کرینە ژناڤ دبەن، بەرپرسێن ئیرانێ دبێژن ھەتا نھا نێزیکی ٤ ھزار کەس ل ھەموو ئیرانێ ھاتینە گرتن کو ئەو ئامار دروست نینە و پتر ژ دەە ھزار کەسان ھاتینە گرتن و چارەنڤیسێ ب سەدان کەسان ژی دیار نینە.
پشتی خوەنیشادانێن ل دژی رژێما ئیرانێ ھێزێن ئێمناھیێ ل ھەموو ئیرانێ دەست ب گرتنا وان کەسان کرینە کو پشکداری د خوەنیشادانان دا کرینە و ل گۆر زانیاریان ھەتا نھا پتر ژ ٥٠ کەسان ھاتینە کوشتن و ب سەدان کەس ژی بریندار بووینە.
ئەڤرۆ نیۆز ، زنار تۆڤی:
وەزیرێ دارایی و ئابووری یێ حوکمەتا هەرێما كوردستانێ د دیدارەکێدا ل گەل بالیۆزێ بریتانیا ل عێراقێ ئاشكرا كریە،کو جێبەجێكرنا پرۆژە یاسایێ چاكسازیێ کو نوکە ل پەرلەمانێ كوردستانێیە،هەیڤانە دێ 150 ملیار دینار پارەیان بۆ خەزینا گشتی ڤەگەرینیت و دێ كاریگەریێ ل سەر باشتركرنا پێدانا مووچێ كارمەندێن هەرێما كوردستانێ دا هەبیت.
وەزارەتا دارایی و ئابووری یا حوکمەتا هەرێما كوردستانێ راگەهاندیە،کو رێباز حەملان وەزیرێ دارایی و ئابووری یێ هەرێما كوردستانێ ل گەل جۆن ویلكسی بالیۆزی بریتانیا ل عێراق و مارتن وار كونسولێ گشتی یێ بریتانیا ل هەرێما كوردستانێ كۆمبوویە، بالیۆزێ نوو یێ بریتانیا ل عێراقێ جۆن ویلكس د وێ دیدارێدا گوتیە،د كۆمبوونا مەدا ل گەل بەرپرسێن بەغدا و هەولێرێ مە گوتیە،بریتانیا ب گرنگی ڤە بەرێخو ددەتە دەستپێکرنا دانوستاندان دناڤبەرا هەولێر و بەغدا دا و پێدڤیه كۆمبوونێن ڕاستەوخۆ هەبن و ئەوێن هەین ژی نوکە بەردەوامی پێ بهێتەدان.
بالیۆزێ بریتانیا ل عێراقێ پێداگیریا وەلاتی خۆ نیشاندایە،بۆ پێدانا مافێن دستووری یێن هەموو لایان و رژدبوونا لەندەنێ ژی دووپاتكریە ل سەر دەستكاریكرنا پرۆژە یاسایێ بودجێ& 2018 یێ عێراقێ.
هەروەسا رێباز حەملان وەزیرێ دارایی و ئابووری یێ هەرێما كوردستانێ دیارکریە،پێدڤیە بریتانیا رۆلێ زێدەتر هەبیت ل ناڤبەیگیریا هەولێر و بەغدا، وەك حوکمەتا هەرێما كوردستانێ د ئامادەینە داخوازیان بۆ هووربینیێ د لیستێن مووچەخۆران و چاودێریا خالێن سنووری و فرۆكخانا جێبەجێ بكەین.
وەزیرێ دارایی و ئابووری یێ كوردستانێ گوتیە، حوکمەتا كوردستانێ پرۆژەکێ چاكسازیێ ئاراستەی پەرلەمانی كریە، بۆ رێكخستنا مووچێ خانەنشین و دەرمالەیان،لدووڤ وی پرۆژە یاسای دێ هەیڤانە 150 ملیار دینار بۆ خەزینا گشتی ڤەگەرن، ئەڤێ ژی دێ كاریگەری ل سەر پێدانا مووچەی هەبیت.
ئه‌ڤرۆنيوز:
به‌رپرسێن كۆمپانيا فه‌يسبووك يا ئه‌مريكى، دێ تايبه‌تمه‌نديه‌كا دى بۆ تۆرا جڤاكى يا فه‌يسبووكى زێده‌كه‌ن.
ده‌زگه‌هێن راگه‌هاندنێ يێن جيهانى يێن تايبه‌تمه‌ند دبوارێ ته‌كنه‌لۆژيايێ ڤه به‌لاڤكرن كو نوكه كۆمپانيا فه‌يسبووكى ل چه‌ند باژێرێن ئه‌مريكى ب شێوه‌كێ ئه‌زموونى، تايبه‌تمه‌نديا (Today In) بۆ فه‌يسبووكى يا زێده‌كرى.
تايبه‌تمه‌نديا (Today In) بۆ وێ چه‌ندێ يه، ده‌م وجهێ ئاهه‌نگ وهه‌لكه‌فتان ل باژێرێ خوه بزانى، هه‌روه‌سا دناڤ وێ تايبه‌تمه‌نديێ دا، ده‌نگوباسێن ناڤخوه‌يى يێ باژێرێ ته دێ هينه نيشادان.
به‌حسێ وێ چه‌ندێ ژى هاتيه كرن، هه‌كه ئه‌و تايبه‌تمه‌نديه يا سه‌ركه‌فتى بيت و بكارئێنه‌رێن باش هه‌بن، ل ده‌مه‌كێ نێزيك دا دێ ل سه‌رانسه‌رى جيهانێ يا به‌رده‌ست بيت.
ئه‌ڤرۆنيوز:
وه‌زاره‌تا ساخله‌ميێ ل هه‌رێما كوردستانێ راگه‌هاند، ل ده‌ستپێكا ئه‌ڤ ساله 2018، به‌غدا چو ده‌رمان بۆ هه‌رێمێ نه هنارتينه.
خالس قادر په‌يڤدارێ وه‌زاره‌تا ساخله‌ميێ گۆت” هه‌رچه‌نده برياربوو د سالا 2018 دا، به‌غدا رێژا 17% ژ ده‌رمانێن عيراقێ بۆ هه‌رێما كوردستانێ ب هنێريت، به‌لێ هه‌تا نوكه چو ده‌رمان بۆ هه‌يڤا كانوونا دويێ نه‌گه‌هشتينه مه”.
خالسى زێده‌تر بۆ باسنيوز گۆت” بۆ چاره‌سه‌ركرنا وێ گرفتێ، ب وى گۆژمێ پاره‌ى ئه‌وێ ل به‌ر ده‌ستێ وه‌زاره‌تا ساخله‌ميێ دا هه‌ى، مه پێدڤيێن نوشدارى وهنده‌ك ده‌رمان بۆ نه‌خوه‌شخانان يێن دابينكرين”.
په‌يڤدارێ وه‌زاره‌تا ساخله‌ميێ دياركر كو ل دووڤ وێ پێداچوونا وان كرى ل دۆر هۆكارێ نه هنارتنا ده‌رمانان ژلايێ حوكمه‌تا به‌غدا ڤه بۆ هه‌رێمێ، وه‌زاره‌تا ساخله‌ميا عيراقێ ب وه‌زاره‌تا ساخله‌ميا هه‌رێمێ راگه‌هانديه كو ده‌رمان يێن ژ ده‌رڤه‌ى وه‌لاتى هاتينه كرين، به‌لێ هێشتا نه‌گه‌هشتينه عيراقێ، له‌وما چو ژڤانێن دياركرى نينن بۆ هنارتنا ده‌رمانان بۆ هه‌رێما كوردستانێ.
گۆت ژى”هه‌تا دو هه‌يڤێن دى، بودجا كرينا ده‌رمانان يا ل به‌ر ده‌ستێ وه‌زاره‌تێ هه‌ى وچو گرفت ژ وى لايى ڤه بۆ دروست نابن” .
ئه‌ڤرۆنيوز:
وه‌زاره‌تا په‌روه‌ردێ ل هه‌رێما كوردستانێ ئه‌ڤرۆ دوشه‌مبى 15/1/2018، رۆهنكرنه‌ك ل دۆر ئه‌زموونێن نيشتمانى ويێن وه‌زارى يێن هه‌ردو رێزێن نه‌هێ ودوازدێ به‌لاڤكر.
وه‌زاره‌تا په‌روه‌ردێ درۆهنكرنا خوه دا دبێژيت” ده‌مه‌كه چه‌ندين ده‌نگوباسێن نه‌راست به‌لاڤ دبن ل سه‌ر چاوانيا ئه‌نجامدانا ئه‌زموونێن نيشتمانى ووه‌زارى يێن رێزێن نه‌هێ ودوازدێ، پێدڤيه دياربكه‌ين كو چو گوهۆرين ل سه‌ر وان ئه‌زموونان نه‌هاتينه ئه‌نجامدان ورۆژه‌كێ نه رۆژا دى دێ هێنه ئه‌نجامدان وهه‌كه بكه‌ڤيته درۆژا ئه‌ينيێ دا، دوێ رۆژێ دا ناهێته ئه‌نجامدان ول رۆژا ددوڤدا دێ هيته ئه‌نجامدان”.
وه‌زاره‌تا په‌روه‌ردێ د وێ رۆهنكرنێ دا داخواز ژ رۆژنامه‌ڤانان وده‌زگه‌هێن راگه‌هاندنێ وقوتابى ومامۆستايان دكه‌ت كو تنێ ئاخڤتنا فه‌رمى يا وه‌زاره‌تا په‌روه‌ردێ ل مالپه‌رێ فه‌رمى يێ وه‌زاره‌تێ وه‌ربگرن.
ئەڤرۆ نیوز، باسم قاسم شنگالی
ئەڤرۆ ئێڤاری ئاگر بەربوو کەرەڤانەکێ ل كه‌مپا مام ره‌شان ل سنورێ قه‌زا شێخان.
حەنان حەیدەر ژ ناڤ کەمپا مام ره‌شان بۆ ئەڤرۆ نیوز گۆت” ل دەمژمێر 5:30 ئێڤاريا ئه‌ڤرۆ دوشه‌مبى 15/1/2018، پشتی کارەبا کەمپێ هاتی ژ ئەنجامێ شۆرتەکی کارەبێ ئاگر بەربوو کەره‌ڤانەکا ئاوارەیێن شنگالێ دناڤ کەمپێ دا”.
بتر گۆت ” حالەتێن ئاگر بەربوونێ دناڤ کەمپان دا بەرب زێدەبوونێ نە ب ئەگەرێ ب سەرڤەچوونا کێبەلێ کارەبێ، ئەڤرۆ ژی ئاگر بەربوو کەره‌ڤانەکێ و بتنێ زیانێن مادی ل دووڤ خوە هێلان”.
ئه‌ڤرۆنيوز:
پارتى ديموكراتى كوردستان بريار دا جودا وه‌كو كيانه‌كێ سه‌ربخوه پشكداريێ دهه‌لبژارتنێن هه‌رێما كوردستانێ وعيراقێ دا بكه‌ت.
ئه‌ڤرۆ دوشه‌مبى 15/1/2018، مه‌كته‌با سياسى يا پارتى كۆمبوو وژێده‌ره‌كێ ئاگه‌هدار بۆ كوردستان 24 راگه‌هاند كو پارتى دووپاتيێ ل ئه‌نجامدانا هه‌لبژارتنين كوردستانێ به‌رى هه‌لبژارتنين جڤاتا نوونه‌رين عيراقێ دكه‌ت.
وى ژێده‌رى دياركر ژى كو پارتى داخوازا پێكئينانا هه‌ڤپه‌يمانيه‌كێ كربوو، كو هه‌موو هيزێن كوردستانى پشكدارببن تێدا بۆ هه‌لبژارتنێن جڤاتا نوونه‌رين عيراقێ، به‌لێ پتريا حزبان ل گه‌ل وێ پێشنيازا پارتى نه‌بوون، له‌وما پارتى بريار دا جودا وه‌كو كيانه‌كێ سه‌ربخوه پشكداريێ دهه‌لبژارتنين جڤاتا نوونه‌رێن عيراقێ دا بكه‌ت.
ژێده‌رێ ئاگه‌هدار ژ كۆمبوونا مه‌كته‌با سياسى يا پارتى گۆت ژى كو پارتى وه‌كو ليسته‌كا سه‌ربخوه دێ پشكداريێ دهه‌لبژارتنێن په‌رله‌مانێ كوردستانێ دا كه‌ت وب ديتنا وى دشياندايه پشتى ئاشكرابوونا ئه‌نجامێن هه‌لبژارتنان، هه‌ڤپه‌يمانيه‌كا نوو بۆ پێكئينانا كابينا نوو يا حوكمه‌تا هه‌رێما كوردستانێ وبه‌لاڤكرنا پۆستێن په‌رله‌مانێ كوردستانێ بهێته پێكئينان.
دياركر ژى، هه‌كه ره‌وشا كه‌ركووكێ وخورماتوو نه‌هێته ئاسايى كرن وخه‌لك نه‌شێت ب ئازادى ل مالێن خوه بن وژيانا ئاسايى يا خوه ب سه‌ر ببه‌ن وباره‌گايێن حزب ولايه‌نێن كوردستانى نه‌ڤه‌گه‌رن بۆ وان ده‌ڤه‌ران وئازاديا ئه‌نجامدانا كارى سياسى نه‌بيت، پارتى وان ده‌ڤه‌ران ب داگيركرى دزانيت وئه‌نجامدانا پرۆسا هه‌لبژارتنان ل وان ده‌ڤه‌ران د وێ ره‌وشێ دا ب ئاسايى نزانيت.
ئەڤرۆنیوز، باسم قاسم شنگالى
دوهی ب شەڤ زاۆيه‌كا پێنج سالى دكه‌ڤيته دسولينه‌كێ دا ودئه‌گه‌رێ دا دخه‌ندقيت.
کەمپا ئێسیان یا ئاوارەیێن شنگالێ کچەکا پێنچ سالی کەفتبوو سوولینەکێ دا و و خەندقی
دەرمان باعەدری، رۆژنامه‌ڤان، بۆ ئەڤرۆ نیوز دا زانین” ل شه‌ڤا بۆرى ل كه‌مپا ئيسيان يا ئاوارێن شنگالێ، كچه‌كا پێنج سالى ب ناڤێ (مادلين خدر) دكه‌ڤيته دسولينه‌كێ دا كو ده‌رگه‌هێ وێ يێ ڤه‌كرى وپشتى سێ ده‌مژمێران خيزانا وێ وكارگێريا كه‌مپێ وپۆليس دناڤ كه‌مپێ دا لێگه‌ريان دناڤ سولينه‌كێ دا هاته ديتن كو يا خه‌ندقى بوو”.
بتر گۆت” هاتە نها نەهاتیە زانین ئەو چاوان کەفتیە دناڤ وێ سوولینێ دا ودووڤچوون يا به‌رده‌وامه”.
ئه‌ڤرۆنيوز:
ژێده‌ره‌كى ژناڤ هه‌ڤپه‌يمانيا حه‌يده‌ر عه‌بادى سه‌رۆك وه‌زيرێن عيراقێ بۆ هه‌لبژارتنان پێكئيناى بۆ ئه‌ڤرۆ نيوز ئه‌گه‌رێن خوه‌ڤه‌كێشانا هادى عامرى وچه‌ندين سه‌ركردێن گرۆپێن حه‌شدا شه‌عبى ژ هه‌ڤپه‌يمانيا عه‌بادى دياردكه‌ت.
وى ژێده‌رى بۆ ئه‌ڤرۆنيوز گۆت” هه‌ڤپه‌يمانيا (فه‌تح) ب سه‌رۆكاتيا هادى عامرى ئه‌ميندارێ گشتيێ رێكخراوا به‌در كو چه‌ندين لايه‌ن وسه‌ركردێن به‌رێ يێن گرۆپێن حه‌شدا شه‌عبى ب خوه‌ڤه دگريت، ل ده‌ستپێكێ بريار دا جودا پشكداريێ دهه‌لبژارتنێن گشتى يێن عيراقێ دا بكه‌ن كو دێ ل 12/5/2018 هێنه ئه‌نجامدان”.
دياركر ژى”پشتى چه‌ندين دانوستاندن وهه‌ڤپه‌يڤينان دناڤبه‌را هه‌ڤپه‌يمانيا مه (سه‌ركه‌فتن) وهه‌ڤپه‌يمانيا (فه‌تح) كو هه‌ردو مه‌زنترين هه‌ڤپه‌يمانيێن هه‌لبژارتنانه هاتيه دروستكرن، بريار دان كو ب ئێك هه‌ڤپه‌يمانى پشكداريێ دهه‌لبژارتنان دا بكه‌ن وناڤێ هه‌ڤپه‌يمانيا نوو بوو (سه‌ركه‌فتنا عيراقێ)”.
زێده‌تر گۆت” به‌لێ ڤێ هه‌ڤپه‌يمانيا نوو 48 ده‌مژمێران نه‌ڤه‌كێشا وهه‌ڤپه‌يمانيا (فه‌تح) خوه ژێ ڤه‌كێشا وب ديتنا من ئه‌گه‌رێ سه‌ره‌كى دزڤريت بۆ وێ چه‌ندێ كو (فه‌تح) دخوازيت سه‌رۆكێ وێ هادى عامرى ببيته سه‌رۆك وه‌زيرێن داهاتى نه‌كو حه‌يده‌ر عه‌بادى”.
ل دۆر ئه‌گه‌رێ دى يێ خوه‌ڤه‌كێشانا هه‌ڤپه‌يمانيا (فه‌تح) ژ هه‌ڤپه‌يمانيا عه‌بادى، وى ئه‌ندامێ ليستا عه‌بادى گۆت” به‌رى ئه‌و هه‌ڤپه‌يمانيه بهێته دناڤ هه‌ڤپه‌يمانيا مه دا، گلۆپا كه‌سك ژ ئيرانێ وه‌رگرتيه كو بهێته دناڤ مه‌دا، به‌لێ ب مه‌رجه‌كى چو ژ ڤان هه‌ردو ليست وكه‌سايه‌تيان نه‌هێنه دناڤ هه‌ڤپه‌يمانيا نوو دا ئه‌وژى هه‌ر ئێك ژ موقته‌دا سه‌در وعه‌مار حه‌كيم”.
ناڤبرى خوياكر ژى”مه‌رج نينه پشكدارى كرن دهه‌لبژارتناندا ب ليستێن جودا ببيته ئه‌گه‌رێ دووركه‌فتنێ ژ هه‌ڤدو، دبيت پشتى هه‌لبژارتنان هه‌ڤپه‌يمانيێن نوو بۆ دروستكرنا حوكمه‌تا داهاتى بهێنه پێكئينان”.
نيشاندان