ئه‌ڤرۆ، عه‌زیز هه‌ورامی:

روودانێن ئیراقێ یێ ئالۆزتر دبن و سه‌ركردێن ئیراقێ باس ل وێ چه‌ندێ دكه‌ن جڤاتا نوونه‌ران ب دووماهی هاتیه‌، ئه‌ندامه‌كا كورد ل جڤاتا نوونه‌رێن ئیراقێ ژی دبێژیت، ناڤمالا شیعی ب تمامی یا په‌رت و به‌لاڤبووی و پێدڤیه‌ كورد مفای ژ ڤێ ده‌لیڤێ ببینن و ل بن چه‌ترا ئالایێ كوردستانێ كۆمڤه‌بن.

چرۆ حه‌مه‌ شه‌ریف، ئه‌نداما جڤاتا نوونه‌رێن ئیراقێ بۆ رۆژناما (ئه‌ڤرۆ) گۆت” نه‌شێین بێژین دووماهی ب جڤاتا نوونه‌رێن ئیراقێ هاتیه‌ چونكه‌ ئالیێن سیاسی د بزاڤا وێ چه‌ندێ دانه‌ ڤێ ناكۆكیێ چاره‌سه‌ربكه‌ن، ژ به‌ركو ب دووماهی ئینانا جڤاتا نوونه‌ران دێ زیانێن مه‌زن بۆ هه‌موو ئیراقێ هه‌بیت”.

چرۆ گۆت ژی” هه‌كه‌ بهێت و به‌رده‌وام خوه‌نیشاده‌ر دناڤ جڤاتا نوونه‌رێن ئیراقێ دا بن و كۆمبوونێن جڤاتێ تێدا نه‌هێنه‌ كرن، دستوور و په‌یره‌وێ ناڤخوه‌یی جڤاتا نوونه‌ران رێ دایه‌ كو ل ره‌وشێن نه‌ گونجای كۆمبوونێن جڤاتا نوونه‌ران بهێنه‌ ڤه‌گوهاستن بۆ پارێزگه‌هێن دی یێن ئیراقێ ب هه‌رێما كوردستانێ ژی ڤه‌”.

لایه‌نگرێن موقته‌دا سه‌در داخواز دكه‌ن به‌ربژارێ راسپاردی بۆ پێكئینانا حوكمه‌تا نوو یا ئیراقێ به‌ربژاركرنا خوه‌ ڤه‌كێشیت، ل دۆر وێ چه‌ندێ ئه‌ڤ په‌رله‌مانتاره‌ دبێژیت” مه‌ پێزانین نین نكا هه‌ڤپه‌یمانیا چارچوڤێ هه‌ماهه‌نگیێ به‌ربژارێ خوه‌ ڤه‌كێشایه‌ یان نه‌”.

ئاماژه‌كر” مه‌ پێ باشه‌ هه‌موو ئالیێن كوردی ل به‌غدا پێكڤه‌ ل بن ئێك چه‌تر و بۆچوون دا بین ئه‌وژی چه‌ترێ ئالایێ كوردستانێ و بۆچوونه‌كا نیشتمانی، هه‌ر ده‌مێ وه‌كو كورد پێكڤه‌بین مه‌ یا شیای مافێن خوه‌ بده‌ستڤه‌بینین، ل ده‌مێ ناكۆكیان دا ژی مه‌ نه‌شیایه‌ مافێن خوه‌ بده‌سڤه‌بینین له‌وما پێدڤیه‌ ل ژێر چه‌ترێ ئالایێ كوردستانێ بین”.

خویاكر ژی” هه‌كه‌ د ڤێ ره‌وشا ناڤمالا شیعی دا هه‌ی كورد د ئێكگرتی و ئێكده‌نگ بن، ئه‌ڤ ده‌لیڤه‌ یا باشه‌ بۆ كوردان و هیڤیدارین كورد مفای ژ په‌رت و به‌لاڤبوونا ناڤمالا شیعی دا ببینیت و بشێین ناڤمالا كوردی رێكبێخین”.

مه‌ ژ چرۆ حه‌مه‌ شه‌ریف پرسی كو دهێته‌ گۆتن بافل تاله‌بانی یێ رازی بووی به‌رهه‌م سالحی ژ به‌ربژاركرنێ بۆ پۆستێ سه‌رۆك كۆماری بگوهۆریت بۆ له‌تیف ره‌شید تاكو پارتی پشته‌ڤانیێ لێ بكه‌ت و كوردان ئێك به‌ربژار بۆ وی پۆستی هه‌بیت، د به‌رسڤێ دا گۆت” روودان هه‌موو د ئالۆزن و هه‌تا نوكه‌ ئه‌وا هه‌ی كو باس ل گوهۆرینا به‌ربژاركرنا به‌رهه‌م سالحی بۆ له‌تیف ره‌شید ژ ئالیێ ئێكه‌تیێ ڤه‌ دهێته‌ كرن تنێ ئاخڤتنه‌، ئه‌وا ئه‌ز پێ ئاگه‌هدار د نوكه‌ دا ره‌وش یا ئالۆزه‌ و هه‌موو مژوولی روودانێن به‌غدانه‌ كو كێمتر هزر دچیته‌ پرسا سه‌رۆك كۆماری”.

هه‌ولێر، قائید میرۆ

چه‌ند رۆژه‌كه‌ لایه‌نگرێن موقته‌دا سه‌در ده‌ست ب خوه‌نیشادانان كریه‌ و ره‌وشا ئیراقێ به‌ر ب  ئالۆزیان دچیت په‌رله‌مانتاره‌كێ كورد ژی ل جڤاتا نوونه‌رێن ئیراقێ ئاماژه‌كر، هه‌موو بزاڤ دهێنه‌كرن بۆ دوباره‌ ئه‌نجامدانا هه‌لبژارتنان، به‌لێ هه‌كه‌ هه‌لبژارتن بهێنه‌ ئه‌نجامدان، دێ كاره‌سات ل ئیراقێ په‌یدا بن، ناڤبری ل دۆر رۆلێ كوردان ژی دبێژیت، كورد پشكه‌ك نینن ژ ئالۆزیێن نوكه‌ یێن ئیراقێ.

سیپان شێروانی، ئه‌ندامێ جڤاتا نوونه‌رێن ئیراقێ ژ فڕاكسیۆنا پارتی ل به‌غدا بۆ رۆژناما (ئه‌ڤرۆ) گۆت” خوه‌نیشادانێن نوكه‌ ل ئیراقێ دهێنه‌ ئه‌نجامدان تشته‌كێ چاڤه‌ڕێ كری بوویه‌، چونكه‌ ده‌مێ موقته‌دا سه‌در سه‌رۆكێ ره‌وتا سه‌دری خوه‌ ڤه‌كێشای ل پرۆسا سیاسی یا ئیراقێ، مه‌ پێشبینیا ڤێ چه‌ندێ دكر دێ ئالۆزی په‌یدابن و دێ گڤاشتنان كه‌ته‌ سه‌ر ده‌ستهه‌لاتدارێن ئیراقێ، هه‌كه‌ بهێت و محه‌مه‌د شیاع سودانی ژی وه‌ك به‌ربژارێ پۆستێ سه‌رۆك وه‌زیران بهێته‌ ڤه‌كێشان ژی دێ خوه‌نیشادان و ئالۆزیێن ئیراقێ هه‌ر به‌رده‌وام بن، له‌وڕا ژی پێشبینی هه‌موو ئه‌ون دێ خوه‌نیشادانێن لایه‌نگرێن موقته‌دا سه‌در به‌رده‌وام بن هه‌تا گڤاشتن دهێنه‌ كرن بۆ دووباره‌ ئه‌نجامدانا هه‌لبژارتنان ل ئیراقێ، هه‌كه‌ هات وهه‌لبژارتن جاره‌كادی بهێنه‌كرن ژی تشتێ وه‌سا ل جیهانێ نه‌بوویه‌ و ل گۆر دیتنا من هه‌كه‌ هه‌لبژارتن بهێنه‌ دوباره‌كرن دێ كاره‌سات په‌یدابن، خه‌لكه‌ك یێ به‌رهه‌ڤه‌ لسه‌ر ئێك (تویتا) موقته‌دا سه‌در گیانێ خوه‌ لسه‌ر ده‌ستێ خوه‌ دانیت، ئه‌ڤه‌ هه‌موو نیشانێن وێ چه‌ندێ نه‌ كو خه‌لكێ ئیراقێ یێ بێزاره‌ ژ ره‌وشا نوكه‌ یا ئیراق تێدا ده‌رباز دبیت، ره‌نگه‌ ژی سیسته‌مێ نوكه‌ یێ حوكمڕانیێ ل ئیراقێ نه‌مینیت”.

ل دۆر رێڤه‌چوونا كۆمبوونا جڤاتا نوونه‌رێن ئیراقێ، ڤی په‌رله‌مانتاری ئاشكراكر” هه‌تا نوكه‌ ژڤانێ ئه‌نجامدانا كۆمبوونا جڤاتا نوونه‌ران بۆ هه‌لبژارتنا سه‌رۆك كۆمارێ و سه‌رۆك وه‌زیران نه‌هاتیه‌ دیاركرن، ده‌مێ كۆمبوونێن جڤاتا نوونه‌ران ژی یێ دیار نینه‌ و ئه‌و پێزانینێن دهێنه‌ به‌لاڤكرن ل دۆر رۆژا كۆمبوون دێ تێدا هێته‌ ئه‌نجامدان چ راستی بۆ نینه‌”.

سیپان شێروانی گۆت ژی” ب دیتنا من ئه‌نجامدانا هه‌لبژارتنان نابیته‌ چاره‌سه‌ری بۆ ره‌وشا نوكه‌ یا ئیراقێ، چونكه‌ ئه‌ڤه‌ پێنج هه‌لبژارتن ل ئیراقێ هاتنه‌ ئه‌نجامدان وهه‌مان ئه‌نجام هه‌نه‌ و ره‌وش ناهێته‌ گوهۆڕین، ئیراقیان سه‌ربور دگه‌ل هه‌لبژارتنان هه‌نه‌ و یێن گه‌هشتینه‌ وێ باوه‌ریێ هه‌لبژارتن گوهۆڕینان په‌یدا ناكه‌ن بۆ نموونه‌ سالا ٢٠١٠ێ ئه‌یاد عه‌لاوی ده‌نگێ ئێكێ بده‌ستڤه‌ئینا، به‌لێ نوری مالیكی حوكمه‌ت پێكئینا، دیسان ل سالا ٢٠١٤ێ موقته‌دا سه‌در ئێكه‌م بۆ ل هه‌لبژارتنان به‌لێ حوكمه‌ت ژئالیێ هه‌ڤپه‌یمانیا ده‌وله‌تا قانوونێ هاته‌ پێكئینان، چه‌ند هه‌لبژارتن ل ئیراقێ بهێنه‌ ئه‌نجامدان، هه‌مان سیسته‌مێ حوكمڕانیا دهێته‌ به‌رهه‌م، كورد پشكه‌ك نینن ژ ئاریشێن نوكه‌ ل ئیراقێ په‌یدابووین، به‌ری نوكه‌ ژی شه‌ڕێ مه‌زهه‌بی ل ئیراقێ هه‌بوو و كورد پشكه‌ك نه‌بووینه‌ ژ ڤان هه‌ڤڕكیێن دناڤبه‌را ئیراقیان دا هه‌ین، به‌رۆڤاژی كورد زێده‌تر وه‌كو ته‌ماشه‌كه‌ر مایه‌ هه‌مبه‌ر وان ئالۆزیێن نوكه‌ دناڤبه‌را ئیراقیان دا هه‌ین، هه‌كه‌ كورد نه‌بنه‌ پشكه‌ك بۆ چاره‌سه‌ریێ، نابنه‌ لایه‌نگرێ هیچ مه‌زهه‌ب وئالیه‌كێ شیعی یان ژی د ناڤبه‌را شیعه‌ و سوننه‌ێن ئیراقێ دا”.

ئه‌ڤرۆ:

سه‌رۆكێ دیوانا سه‌رۆكایه‌تیا جڤاتا وه‌زیرێن هه‌رێما كوردستانێ راگه‌هاند، مه‌ كار كریه‌ بۆ نه‌مانا رۆتینێ و ریچكخستنا ئیداری و شۆركرنا ده‌ستهه‌لاتێ بۆ پارێزگا و ئیدارێن سه‌ربخوه‌، د ده‌مێ سێ سالێن بۆریدا، ژ سه‌رجه‌مێ 40 هزار نڤیسارێن چووینه‌ جڤاتا وه‌زیران، 96% ژێ كارێن وان یێن ب دووماهی هاتین.

ئومێد سه‌باح، سه‌رۆكێ دیوانا سه‌رۆكایه‌تیا جڤاتا وه‌زیرێن هه‌رێما كوردستانێ دیاركر كو وان كاركریه‌ بۆ ئه‌نجامدانا چاكسازیا كارگێری ل جڤاتا وه‌زیران و رێكخستنا كاركرنا فه‌رمانبه‌ران، هه‌روه‌سا كار هاتیه‌ كرن بۆ دامه‌زراندنا جڤاتا راژه‌ی ل هه‌رێمێ.

ئاماژه‌كر” ل گه‌ل سكرتاریه‌تا جڤاتا وه‌زیران و ئالیێن په‌یوه‌ندیدار، مه‌ كار كریه‌ بۆ ده‌ركرنا قانوونا چاكسازیێ د مووچه‌ی و ده‌رمالان و بابه‌تێن دی دا، ژ ئالیه‌كی دیڤه‌ هه‌ر ژ ده‌ستپێكا كابینا نه‌هێ، مه‌ ل گه‌ل وه‌زاره‌تا دارایی كاركریه‌ بۆ زێده‌كرنا داهاتی، بۆ نموونه‌ داهاتێ ناڤخوه‌یی ژ 140 ملیۆن دۆلاران گه‌هشته‌ زێده‌تر ژ 200 ملیۆن دۆلاران”.

دیاركر ژی” ژ روویێ قانوونی ڤه‌، ب هاریكاریا ئالیێن په‌یوه‌ندیدار، مه‌ شیایه‌ 24 قانوونان و 15 په‌یره‌وان ده‌ربكه‌ین بۆ رێكخستنا كاروباران”.

سه‌رۆكێ دیوانا سه‌رۆكایه‌تیا جڤاتا وه‌زیرێن هه‌رێمێ دیاركر” رازیبوون ل سه‌ر ئه‌نجامدانا 884 پرۆژان هاتیه‌ دان و زێده‌تر ژ 840 ملیار دیناران بۆ هاتینه‌ ته‌رخانكرن” .

هه‌ولێر، قائید میرۆ

شیره‌تكاره‌كێ سه‌رۆكایه‌تیا جڤاتا وه‌زیران ئاشكرا دكه‌ت، پێله‌كا دی یا ب ئه‌ره‌بكرنێ ل كه‌ركووكێ هاتیه‌ ده‌ستپێكرن و ده‌ستێن ده‌ره‌كی و به‌غدا ژی ل پشت پرۆسا ب ئه‌ره‌بكرنا كه‌ركووكێ نه‌ و دبێژیت، هژماره‌كا مه‌زن یا به‌رپرس و فه‌رمانبه‌رێن كورد یێن هاتینه‌ لادان و كه‌س ل شوونا وان نه‌هاتیه‌ دامه‌زراندن ئه‌ڤه‌ ژی بۆ كێمكرنا رێژا كوردانه‌ ل كه‌ركووكێ.

دژوار فایه‌ق، شیره‌تكارێ سه‌رۆكایه‌تیا جڤاتا وه‌زیران بۆ ده‌ڤه‌رێن كوردستانی بۆ رۆژناما (ئه‌ڤرۆ) گۆت”د چارچوڤێ پرۆسا ب ئه‌ره‌بكرن و داگیركرنا كه‌ركووكێ دا به‌رده‌وام گوهۆڕین دهێنه‌كرن ب مه‌ره‌ما گوهۆڕینێن سیاسی و جوگرافی ل كه‌ركووكێ، ب تایبه‌تی لسه‌ر ده‌ستێ راكان جبووری پارێزگارێ سه‌پاندیێ كه‌ركووكێ پرۆسا ب ئه‌ره‌بكرنێ یا به‌ر ب مه‌ترسیێن مه‌زن دچیت، پارێزگارێ كه‌ركووكێ ب تنێ كار بۆ بجهئینانا پیلانا ب ئه‌ره‌بكرنێ ناكه‌ت، مخابن ل ده‌رڤه‌ و ل به‌غدا ژی پشته‌ڤانیا وی دهێته‌كرن بۆ بجهئینانا پیلانێن ب ئه‌ره‌بكرنێ، ئه‌ڤه‌ژی د ده‌مه‌كی دایه‌ پارێزگارێ سه‌پاندیێ كه‌ركووكێ چه‌ندین باده‌كێن گه‌نده‌لیێ یێن ل سه‌ر هه‌ین و یێ تۆمه‌تباره‌ ب گه‌نده‌لیێ، مه‌ترسیا هه‌ره‌ مه‌زن د ده‌مێ نوكه‌ دا ڤه‌گوهاستنا فه‌رمانبه‌ر و رێڤه‌به‌رێن كورده‌ ل كه‌ركووكێ، چونكه‌ به‌رده‌وام فه‌رمانبه‌ر و رێڤه‌به‌رێن كورد دهێنه‌ ڤه‌گوهاستن و خانه‌نشین كرن ژی و كه‌س ل شوونا وان ناهێته‌ دامه‌زراندن، مه‌ چه‌ندین ناڤ یێن هه‌ین كو فه‌رمانبه‌رێن كورد یێن هاتینه‌ ڤه‌گوهاستن و لادان ژ پۆستێن وان، ژ ئالیه‌كێ دی ڤه‌ پرۆسا داگیركرنا ئه‌ردێ كوردان به‌رده‌وامی هه‌یه‌ و ب گۆره‌ی قانوونێ كوردان كرێبه‌ست هه‌نه‌، به‌لێ ب زۆری ئه‌ردێ وه‌لاتیێن كورد دهێته‌ داگیركرن و وه‌لاتیێن ئه‌ره‌بێن شۆڤێنی ل سه‌ر ئه‌ردێ كوردان دهێنه‌ جهگیركرن”.

دژوار فایه‌ق ئاماژه‌كر” ب فه‌رمانا پارێزگارێ كه‌ركووكێ ئه‌ره‌ب ل ده‌ڤه‌رێن جودا یێن كه‌ركووكێ دهێنه‌ كه‌ركووكێ نه‌كو تنێ خانیان ئاڤا دكه‌ن، به‌لكو كار گه‌هشتیه‌ وێ چه‌ندێ تاخێن نوو ئاڤاكرینه‌ وهه‌موو ب زێده‌گاڤی وكارئاسانی دهێنه‌كرن بۆ ڤه‌گوهاستنا ره‌گه‌زناما ئه‌ره‌بێن پارێزگه‌هێن دی بۆ ناڤا كه‌ركووكێ، پیلانا ب ئه‌ره‌بكرنێ گه‌هشتیه‌ ئاسته‌كی ژئالیێ وه‌لاتێن هه‌رێمی پشته‌ڤانی لێ دهێته‌كرن، مه‌ گازنده‌ ژ هه‌رێما كوردستانێ ژی یێن هه‌ین، ژ به‌ر كو هه‌تا نوكه‌ مه‌ لژنه‌ك ل به‌غدا نینه‌ بۆ به‌رگریێ ل ڤان ده‌ڤه‌ران، هه‌روه‌سا لژنه‌كا بلند بۆ بجهئینانا مادێ ١٤٠ ل به‌غدا هه‌یه‌ و چار پۆستێن كوردان هه‌نه‌ دناڤا ڤێ لژنێ دا و كه‌س نه‌هاتیه‌ دانان، ئه‌ڤه‌ژی بۆ خه‌مساریا هه‌رێما كوردستانێ ڤه‌دگه‌ڕیت و نابیت تا ڤی راده‌ی كورد هه‌مبه‌ری كه‌ركووكێ و ده‌ڤه‌رێن كوردستانی د خه‌مساربن”.

ب، سه‌رجان مه‌حمود:

پتر ژ دوسه‌د كه‌سایه‌تیێن به‌رنیاس یێن توركیا و باكورێ كوردستانێ پشته‌ڤانیا خوه‌ بۆ بانگه‌وازیا ده‌میرتاشی دیار كرن كو به‌ری نها داخواز كربوو په‌كه‌كه‌ ده‌ستان ژ چه‌كی به‌رده‌ت و راگه‌هاندن كو دڤێت ئۆپۆزسیۆنا توركیا ژی پشته‌ڤانیێ ل بانگه‌وازیا ده‌میرتاشی بكه‌ت.

202 رۆژنامه‌ڤان، نڤیسه‌ر، هونه‌رمه‌ند و كه‌سانێن ئه‌كادیمی د داخۆیانیه‌كا هه‌ڤپشك دا داخواز ژ سازی و ده‌زگه‌هێن سڤیل كرن كو پشته‌ڤانیا داخۆیانیا سه‌لاحه‌دین ده‌میرتاشی بكه‌ن كو به‌ری نها گۆتبوو، ئه‌ز دخوازم په‌كه‌كه‌ شه‌رێ ل هه‌مبه‌ر توركیا ب ته‌مامی راوه‌ستینیت و ده‌ستان ژ چه‌كی به‌رده‌ت و دڤێت سیاسه‌ت ژ توندوتیژیێ دوور بكه‌ڤیت و پرسا كورد ب دیالۆگێ و ئاشتیێ بهێته‌ چاره‌سه‌ركرن.

پشتی داخویانیا ده‌میرتاشی 202 كه‌سایه‌تیێن دیار یێن باكورێ كوردستانێ و توركیا ب داخۆیانیه‌كا هه‌ڤپشك راگه‌هاندن كو ئه‌و پشته‌ڤانیێ ل داخوازا سه‌لاحه‌دین ده‌میرتاشی دكه‌ن و ژ په‌كه‌كێ و هه‌موو ئالیێن چه‌ك د ده‌ستێ وان دایه‌ دخوازن كو شه‌ری راوه‌ستینن و هێڤیدارن په‌كه‌كه‌ ئێدی ده‌ستان ژ چه‌كی به‌رده‌ت و شه‌ڕێ نها ب ته‌مامی بهێته‌ راگرتن، چونكی هه‌كه‌ كاره‌ك وه‌سا هاته‌ كرن وی ده‌می زه‌مینه‌ بۆ هندێ خوه‌ش دبیت كو پرسا كوردی و هه‌موو پرسێن دی یێن توركیا ژی دوور ژ شه‌ڕی بهێنه‌ چاره‌سه‌ركرن.

موراد سابونجو یه‌ك ژ نڤیسه‌ر و رۆژنامه‌ڤانێ ناسكری یێ توركیا د ڤێ مژارێ دا راگه‌هاند كو ئه‌و ب ته‌مامی پشته‌ڤانیا داخۆیانی و بانگه‌وازیا ده‌میرتاشی دكه‌ن و گۆت: (ب سالانه‌ ل توركیا د ناڤبه‌را په‌كه‌كێ و توركیا دا شه‌ڕ هه‌یه‌ و ئه‌زموونێن چه‌ندین سالێن بۆری ژی سه‌لماندن كو پرسا كورد ب شه‌ڕی چاره‌سه‌ر‌ نابیت، شه‌ڕ زیانێن مه‌زن گه‌هانده‌ گه‌لێ كورد و گه‌لێ تورك و رێ ل به‌ر توندوتیژیێ ڤه‌دكه‌ت و بۆ ڤێ چه‌ندێ دڤێت كورد دوور ژ شه‌ڕی و ب سیاسه‌تێ بزاڤا چاره‌سه‌ر‌كرنا پرسا كوردی بكه‌ن و بۆ ڤێ چه‌ندێ بانگه‌وازیا ده‌میرتاشی د ره‌وشا نها دا گه‌له‌ك گرنگه‌ و دڤێت ئۆپۆزسیۆنا توركیا به‌رسڤه‌كا ئه‌رێنی بده‌ته‌ داخۆیانیا ده‌میرتاشی و پشته‌ڤانیا بانگه‌وازیا ده‌میرتاشی بكه‌ت، هه‌روه‌سا دڤێت په‌كه‌كه‌ ژی ب فه‌رمی پشته‌ڤانیا خوه‌ بۆ داخوازیا ده‌میرتاشی دیار بكه‌ت و ده‌ستان ژ چه‌كی به‌رده‌ت).

د ناڤ 202 نڤیسه‌ر، رۆژنامه‌ڤان، پارێزه‌ر و هونه‌رمه‌ندان دا كه‌سایه‌تیێن وه‌ك حه‌سه‌ن جه‌مال، سیاسه‌تمه‌دار فیكری ساخلار، موراد یێتكین، باسكن ئۆران و فیگه‌ن چالكوشو هه‌نه‌ و دهێته‌ چاڤه‌رێ كرن د رۆژێن دا‌هاتی دا هژماره‌ك دی ژ كه‌سایه‌تیێن به‌رنیاس ل توركیا و باكورێ كوردستانێ ب فه‌رمی پشته‌ڤانیا خوه‌ بۆ داخوازیا ده‌میرتاشی دیار بكه‌ن و ب فه‌رمی داخواز ژ په‌كه‌كێ بكه‌ن كو ده‌ستان ژ چه‌كی به‌رده‌ت.

ل ئالیێ دی كه‌مال كلچدار ئوغلۆ سه‌رۆكێ گشتی یێ پارتیا كۆماریا گه‌ل ژی د داخۆیانیه‌كێ دا پشته‌ڤانیا خوه‌ بۆ بانگه‌وازیا ده‌میرتاشی دیار كر كو و راگه‌هاند كو پێدڤیا توركیا ب ئاشتیێ هه‌یه‌، دڤێت چه‌ك بهێنه‌ بێده‌نگكرن، چونكی هه‌تا شه‌ڕ هه‌بیت پرسا كوردی و پرسێن دی یێن توركیا ناهێنه‌ چاره‌سه‌ركرن.

ئه‌ڤرۆ:

وه‌كو به‌رهه‌ڤی بۆ گرێدانا كۆنگره‌ی، پارتی دیموكراتی كوردستان لژنا هه‌لبژارتنا نوونه‌رێن كۆنگرێ 14 پێك دئینیت.

دوهی ئێكشه‌مبی 24 ته‌مووزا 2022، ئیدریس هادی، سه‌رۆكێ لژنا هه‌لبژارتنا نوونه‌رێن كۆنگرێ 14 یێ پارتی دیموكراتی كوردستان راگه‌هاند، ژ ئالیێ سه‌رۆك بارزانی ڤه‌ ئه‌ز وه‌كو سه‌رۆكێ لژنا هه‌لبژارتنا نوونه‌رێن كۆنگرێ 14 یێ هاتیمه‌ دیاركرن و ئه‌ڤ لژنه‌ ژ 19 ئه‌ندامان پێكهاتیه‌ كو ژ زاخۆ هه‌تا خانه‌قینێ ئه‌ندام یێن تێدا هه‌ین و دو ئه‌ندام ژی ژ ده‌رڤه‌ی وه‌لاتی نه‌ و ئاماژه‌كر ژی كو بۆ ده‌ستپێكرنا كارێن خوه‌ ئه‌م چاڤه‌رێی فه‌رمانا سه‌رخوه‌ دا دكه‌ین.

ل رۆژا 17 ته‌مووزا 2022، نه‌جات حه‌سه‌ن، جێگرێ سه‌رۆكێ لژنا به‌رهه‌ڤكارا كۆنگرێ 14 یێ پارتی دیموكراتی كوردستان راگه‌هاندبوو” هه‌موو تشته‌ك یێ هاتیه‌ دیاركرن و مه‌ رۆژا كۆنگره‌ی ژی یا ده‌ستنیشانكری، به‌لێ چه‌ند هوورده‌كاریه‌ك یێن ماین، له‌وما ل رۆژێن داهاتی دێ پێزانینێن زێده‌تر و ژڤانێ كۆنگره‌ی به‌رچاڤ كه‌ین”.

مه‌حموود محه‌مه‌د، په‌یڤدارێ پارتی دیموكراتی كوردستان ل 8 گۆلانا 2022 د كۆنگره‌كێ رۆژنامه‌ڤانیدا باسێ كۆنگرێ 14 یێ پارتی كربوو و راگه‌هاندبوو” جڤاتا سه‌ركردایه‌تیا پارتی بریار ل دۆر گرێدانا كۆنگرێ 14 دایه‌ و ده‌ستهه‌لات ب مه‌كته‌با سیاسی هاتیه‌ دان بۆ پێكئینانا لژنان بۆ به‌رهه‌ڤیان و ل هه‌فتیا داهاتیدا رێكارێن دێ هێنه‌ ده‌ستپێكرن و هه‌تاكو هه‌یڤا 10 یان 11 دێ كۆنگره‌ هێته‌ گرێدان”.

ب گۆره‌ی په‌یره‌وێ ناڤخوه‌یێ پارتی دیموكراتی كوردستان، پێدڤیه‌ چار سالان جاره‌كێ كۆنگره‌ بهێته‌ گرێدان، به‌لێ ژ سالا 2010 پارتی كۆنگره‌ نه‌ گرێدایه‌ و ئه‌گه‌ر ژی دزڤریت بۆ شه‌رێ داعشێ و قه‌یرانێن سیاسی و ئابووری ل هه‌رێما كوردستانێ.

پارتی دیموكراتی كوردستان ب گۆره‌ی هه‌لبژارتنێن جڤاتا نوونه‌رێن ئیراقێ و په‌رله‌مانێ كوردستانێ، مه‌زنترین حزبا هه‌رێما كوردستانێ یه‌ و خودانا زوورترین كورسیێن په‌رله‌مانی یه‌، ل جڤاتا نوونه‌رێن ئیراقێ ژی 31 كورسی یێن هه‌ین و ل په‌رله‌مانێ كوردستانێ ژی ژ سه‌رجه‌مێ 111 كورسیان خودانا 45 كورسیانه‌.

درۆكا كۆنگرێن پارتی دیموكراتی كوردستان:

كۆنگرێ ئێكێ: ل 16/8/1946 ب نهێنی ل به‌غدا ل مالا سه‌عید فه‌هیم هاته‌ گرێدان و تێدا 70 ئه‌ندام پشكدار بوون.

گۆنگرێ دوویێ: ل هه‌یڤا ئادارا 1951 ل به‌غدا ل مالا عه‌لی حه‌مدی هاته‌ گرێدان، تێدا 30 ژ نوونه‌رێن لق و ناوچان پشكدار بوون.

كۆنگرێ سیێ: ل 26/1/1953 ل كه‌ركووكێ ب به‌رهه‌ڤبوونا 35 هه‌تا 40 نوونه‌ران.

كۆنگرێ چارێ: ل 4/7/1959 ل به‌غدا ل مالا سه‌ید كاكه‌ ب سه‌رپه‌رشتیا مسته‌فا بارزانی.

كۆنگرێ پێنجێ: ل گۆلانا 1960 ل باره‌گه‌هێ وی ده‌می یێ پارتی ل به‌غدا.

كۆنگرێ شه‌شێ: ل ده‌ستپێكا ته‌مووزا 1964 ل قه‌لادزێ.

كۆنگرێ حه‌فتێ: ل 15/11/1966 ل گه‌لاله‌.

كۆنگرێ هه‌شتێ: ل 1/7/1970 ل ناوپردان ب به‌رهه‌ڤبوونا 488 ئه‌ندامان.

كۆنگرێ نه‌هێ: ل 4/10/1979 ل زێوه‌ ل ده‌ڤه‌را مه‌رگه‌وه‌ر هاته‌ گرێدان، تێدا ب تێكراییا ده‌نگان سه‌رۆك مه‌سعود بارزانی ب سه‌رۆكێ پارتی هاته‌ هه‌لبژارتن.

كۆنگرێ ده‌هێ: ل 2/12/1989 ل مه‌رگه‌وه‌ر ب پشكداریا 332 نوونه‌ران.

كۆنگرێ 11: ل سالا 1993 ب پشكداریا 2167 ئه‌ندامان ل هه‌ولێرێ.

كۆنگرێ 12: ل 14/10/1999 ب پشكداریا 1473 ئه‌ندامان ل هه‌ولێرێ.

كۆنگرێ 13: ل 18/12/2010 ب پشكداریا هزار و 500 ئه‌ندامان ل هه‌ولێرێ.

ئه‌ڤرۆ:

سه‌رۆكێ پارتا سوسیالیستا دیموكراتا كوردستانی راگه‌هاند، سه‌ره‌دانا سه‌رۆكێ حوكمه‌تا هه‌رێما كوردستانێ بۆ به‌غدا جاره‌كادی نیشادانا نیازپاكیێ یه‌ بۆ چاره‌سه‌ریا ئێكجاری یا كێشێن ئیراقێ، ناڤبری دیاركر ژی ” ب دیتنا من تنێ پارچه‌بوونا ئیراقێ چاره‌سه‌ریا ئێكجاری یا كێشێن وی وه‌لاتیه‌”.

محه‌مه‌د حاجی مه‌حموود، سه‌رۆكێ پارتا سوسیالیستا دیموكراتا كوردستانی، گۆت” وه‌كو كورد مه‌ كێشه‌ ل گه‌ل به‌غدا نینه‌، به‌لكو مه‌ دۆزه‌ك ل گه‌ل هه‌یه‌، به‌لێ وان كێشه‌ یا ل گه‌ل مه‌ هه‌ی، ب باوه‌ریا من ئه‌و د به‌رهه‌ڤ نینن ب گۆره‌ی دستووری كێشان چاره‌سه‌ر بكه‌ن، چونكه‌ هه‌تا نوكه‌ وان خاله‌كا دستووری ژی بجهنه‌ئینایه‌”.

زێده‌تر گۆت” كۆنفیدرالی یان ژی پارچه‌بوونا ئیراقێ بۆ سێ هه‌رێمان چاره‌سه‌ریه‌ بۆ كێشێن ئیراقێ، چونكی ل ده‌ستپێكا دروستبوونا ده‌وله‌تا ئیراقێ به‌رده‌وام كێشه‌ دناڤبه‌را پێكهاتان دا هه‌بوون، هه‌ر پێكهاته‌كا ل به‌غدا ده‌ستهه‌لاتێ وه‌ردگریت، دخوازیت ده‌ست ب سه‌ر هه‌موو ئیراقێ دا بگریت، له‌وما تنێ پارچه‌بوون چاره‌سه‌ریا كێشێن ئیراقێ دكه‌ت”.

ل دۆر سه‌ره‌دانا مه‌سرور بارزانی، سه‌رۆكێ حوكمه‌تا هه‌رێما كوردستانێ، بۆ به‌غدا و كۆمبوونا وی ل گه‌ل سه‌رۆك وه‌زیرێن ئیراقێ و به‌رپرسێن بلند یێن ئیراقی، محه‌مه‌د حاجی مه‌حموود، دبێژیت” پێشتر سه‌رۆكێ حوكمه‌تا هه‌رێما كوردستانێ پشتی چه‌ند رۆژان ژ پێكئینانا كابینا نه‌هێ یا حوكمه‌تا هه‌رێمێ سه‌ره‌دانا به‌غدا كربوو، ئه‌ڤه‌ژی رامانا نیازپاكیێ یه‌ بۆ رێككه‌فتنێ، نوكه‌ ژی كو سه‌رۆكێ حوكمه‌تا هه‌رێمێ چوویه‌ به‌غدا كاره‌كێ باشه‌، ئه‌ز یێ پشت راستم ل وێرێ دێ بێژیته‌ وان: مه‌ ماف یێ هه‌ی  ل ڤی وه‌لاتی به‌رگریێ ژ مافێن خوه‌ بكه‌ین، جاره‌كادی نیشادانا نیه‌ت پاكیێ یه‌ به‌رامبه‌ر ئالیان، به‌لێ ب دیتنا من به‌غدا گاڤێن جدی ناهاڤێژیت بۆ چاره‌سه‌ریا كێشان، كازمی دخوازیت جاره‌كادی ببیته‌ سه‌رۆكێ وه‌زیران و دبیت نیشادانا نه‌رمیێ ژئالیێ ویڤه‌ هه‌ر بۆ ڤێ چه‌ندێ بیت”.

ئاماژه‌ كر” ئه‌و دادگه‌ها ناڤكری دادگه‌ها فیدرالی یا بلند، یا فیدرالی نینه‌، مه‌ ل ئیراقێ پێدڤی ب دادگه‌هه‌كا دستووریه‌ كو چاره‌سه‌ریا كێشان بكه‌ت، نه‌كه‌ دادگه‌هه‌ك د ده‌ستێ حزبان دا بیت چ بێژن ئه‌و بجهبینیت، ئه‌و دادگه‌هه‌ ده‌ستێوه‌ردانێ د هه‌موو تشتان دا دكه‌ت، د ڤی ده‌می دا نێزیك ببوو ده‌ستێوه‌ردانێ د بابه‌تێ پێكئینانا هه‌ڤژینیێ ل هه‌رێما كوردستانێ دا بكه‌ت، كو كارێ وێ نینه‌”.

سه‌باره‌ت پێكئینانا كابینا نوو یا حوكمه‌تا ئیراقێ، سه‌رۆكێ پارتا سوسیالیستا دیموكراتا كوردستانی گۆت” نوكه‌ هه‌ڤپه‌یمانیا چارچۆڤێ هه‌ماهه‌نگیێ دبێژیت: مه‌ لژنه‌ك یا پێكئینای بۆ دیاركرنا به‌ربژارێ پۆستێ سه‌رۆك وه‌زیرێن نوو، ب گۆره‌ی قانوونێ و دستووری پێدڤیه‌ مه‌زنترین فراكسیۆنا جڤاتا نوونه‌ران به‌ربژارێ پۆستێ سه‌رۆك وه‌زیران پێشكێش بكه‌ت”.