ئه‌ڤرۆ:
سه‌رۆكێ هه‌رێما كوردستانێ، نێچیرڤان بارزانی، پێشوازی ل عوسمان داود كونسۆلێ نوو یێ وه‌لاتێ كوێت كر و هیڤیا سه‌ركه‌فتنێ بۆ خواست د ئه‌ركێ وی یێ نوو دا هه‌روه‌سا خواستا هه‌رێما كوردستانێ بۆ پێشڤه‌برنا په‌یوه‌ندیان ل گه‌ل وه‌لاتێ كوێت نیشاندا.
سه‌رۆكێ هه‌رێمێ سوپاسی و پێزانین بۆ سه‌ركردایه‌تیا وه‌لاتێ كوێت دووپاتكر بۆ وان هاریكاریێن مرۆڤایه‌تی یێن ل هه‌رێما كوردستانێ پێشكێشی ئاواره و په‌نابه‌ران كرین.
ئه‌ڤرۆ:
سه‌رۆكێ حوكمه‌تا هه‌رێما كوردستانێ، مه‌سرور بارزانی، دوهی ئێكشه‌مبی 9/10/2022 د چارچۆڤه‌یێ پشكداریكرنێ د فیسته‌ڤالا هه‌لكه‌فتا ژ دایكبوونا حه‌زره‌تێ محه‌مه‌د پێغه‌مبه‌رێ ئیسلامێ (س.خ) ل باژێرێ هه‌ولێرێ، ڕاگه‌هاند، خوه ب شه‌ره‌فمه‌ند دزانم د خه‌زمه‌تا هه‌وه‌یێن به‌رێز دا ڤێ هه‌لكه‌فتا پیرۆز ساخ بكه‌ین ئه‌وژی هه‌لكه‌فتا پێشه‌وایێ مرۆڤایه‌تیێ، حه‌زره‌تێ محه‌مه‌د (س.خ) و ئه‌ڤه جهێ شانازیێ یه بۆ مه هه‌موویان كو ئه‌ڤرۆ ڤێ هه‌لكه‌فتا پیرۆز دكه‌ین، پێدڤیه ئه‌م هه‌موو دلخوه‌ش بین ب وێ چه‌ندێ كو خودێ مه‌زن ئه‌و (نیعمه‌ته) ب مرۆڤایه‌تیێ به‌خشی.
د پشكه‌كا دی یا په‌یڤا خوه دا مه‌سرور بارزانی باسێ پێكڤه‌ژیانا ئایینان ل هه‌رێما كوردستانێ كر و ئاماژه دا، په‌یره‌وكارێن هه‌موو ئایینان ل هه‌رێما كوردستانێ ب ئازادی پێكڤه دژین، داخواز ژی ژ مامۆستایێن ئایینی ل هه‌رێما كوردستانێ كر د ڕێبه‌رایه‌تیا جڤاكی و شیره‌تان دا بێ به‌هر نه‌كه‌ن. هه‌روه‌سا گوت ژی: ئایین بۆ وێ چه‌ندێ یه مرۆڤ ل گه‌ل خودایێ خوه یێ راستگۆ بیت.
سه‌رۆكێ حوكمه‌تا هه‌رێما كوردستانێ دیاركر ژی” هه‌كه سه‌حكه‌ینه ژیانا پێغه‌مبه‌رێ مه محه‌مه‌د (س .خ) دێ بینین ل سه‌رده‌مه‌كی هات كو روو ب روویێ نه یه‌كسانیێ ببیت، ڕوو ب ڕوویێ سته‌مێ ببیت، ڕوو ب ڕوویێ ب ساخ ڤه‌شارتنا ئافره‌تێ ببیت، ڕوو ب ڕوویێ وێ چه‌ندێ ب ڕاوه‌ستیت كو به‌ندێ خودای نه‌بیته به‌ندێ كه‌سێ، بۆ وێ چه‌ندێ هات یه‌كسانیێ په‌یدا بكه‌ت، بۆ وێ چه‌ندێ هات كو دادپه‌روه‌ریێ ل جیهانێ پێشڤه ببه‌ت”.
د پشكه‌كا دی یا په‌یڤا خوه دا مه‌سرور بارزانی باسێ بكارئینانا ئایینی بۆ مه‌ره‌مێن سیاسی كر و داخواز ژ مامۆستایێن ئایینی ل هه‌رێما كوردستانێ كر ڕێ نه‌ده‌ن هیچ كه‌س، گرۆپ و ئالیه‌ك ئایینی بۆ ئه‌جیندایێن سیاسی بكاربینیت. هه‌روه‌سا ڕاگه‌هاند، حوكمه‌تا هه‌رێما كوردستانێ ب شێوه‌یه‌كێ به‌رده‌وام و بێی جوداهی خزمه‌تا هه‌موو ئایینان ل هه‌رێما كوردستانێ دكه‌ت.
ئه‌ڤرۆ:
دوهی ئێكشه‌مبی 9/10/2022 په‌رله‌مانێ كوردستانێ پێشنیازا قانوونا (به‌رده‌وامبوونا خولا پێنجێ یا په‌رله‌مانی) خسته ده‌نگدانێ و ب ده‌نگێ 80 ئه‌ندامێن په‌رله‌مانی هاته په‌سه‌ندكرن. و ب ڤێ چه‌ندێ ژی ده‌مێ خولا پێنجێ یا په‌رله‌مانێ كوردستانێ بۆ ده‌مێ ساله‌كێ هاته درێژكرن.
پێشتر ب نڤیساره‌كا فه‌رمی كو ئیمزایێن په‌رله‌مانتارێن هه‌ر ئێك ژ فراكسیۆنێن پارتی و ئێكه‌تیێ و گۆڕان و پێكهاته‌یان ل سه‌ر بوو، پێشنیازه قانوونه‌ك ئاراسته‌ی سه‌رۆكایه‌تیا په‌رله‌مانێ كوردستانێ كر، ب ناڤێ (به‌رده‌وامبوونا خولا پێنجێ یا په‌رله‌مانی كوردستانێ) بۆ وێ چه‌ندێ بۆ ساله‌كێ ده‌مێ په‌رله‌مانێ كوردستانێ بهێته درێژكرن ،ئارمانج ژی ژ ده‌ركرنا وێ قانوونێ ئه‌وه تاكو ده‌مێ ئه‌نجامدانا هه‌لبژارتنان، ڤالاهیا قانوونێ دروست نه‌بیت.
زانا مه‌لا خالد، سه‌رۆكێ فراكسیۆنا پارتی ل په‌رله‌مانێ كوردستانێ، گوت” ئارمانج ژ درێژكرنا ده‌مێ په‌رله‌مانی ئه‌وه هه‌رێما كوردستانێ نه‌كه‌ڤیته د ڤالاهیا قانوونی دا، دخوازین ئه‌زموونا هه‌رێما كوردستانێ و ده‌زگه‌هێن وێ یێن شه‌رعی ب پاراستی بهێلین و ناخوازین هه‌رێم بزڤریت به‌ری سالا 1992 كو هیچ ده‌زگه‌هه‌ك نه‌بوو”.
ئاماژه‌كر” هه‌لبژارتن بۆ ئێك ئالیێ سیاسی نینه ل هه‌رێما كوردستانێ و بۆ هه‌موو خه‌لكێ كوردستانێ یه و بۆ سه‌قامگیریا سیاسی یا هه‌رێما كوردستانێ یه نه‌كو زێده‌كرنا ناكۆكیان، درێژكرنا ده‌مێ په‌رله‌مانی ژی بۆ وێ چه‌ندێ یه د ڤی ده‌می دا هه‌موو به‌ربه‌ست و ناكۆكی بهێنه چاره‌سه‌ركرن و هه‌لبژارتن بهێنه ئه‌نجامدان”.
ده‌مه‌كه دانوستاندن دناڤبه‌را ئالیێن سیاسی ل هه‌رێما كوردستانێ بۆ ئه‌نجامدانا هه‌لبژارتنان ڕاوه‌ستیاینه و سه‌رۆكێ فراكسیۆنا پارتی ژی دبێژیت” تێكگه‌هشتنه‌كا باش د ناڤبه‌را پارتی و ئێكه‌تیێ و بزاڤا گۆڕان و پێكهاته‌یان یا هه‌ی بۆ وێ چه‌ندێ بشێین د نێزیكترین ده‌م دا دانوستاندنان بۆ ڕاكرنا به‌ربه‌ستێن قانوونی ده‌ستپێبكه‌ین بۆ ئه‌نجامدانا هه‌لبژارتنان ل هه‌رێما كوردستانێ”.
پتر گوت” ل ده‌قێ پێشنیازا قانوونا درێژكرنا ده‌مێ خولا په‌رله‌مانی ژی دا هاتیه كو هه‌تا دووماهیا وه‌رزێ پاییزا سالا 2023 پێدڤیه هه‌لبژارتن به‌ری دووماهیا وی ژڤانی بهێنه ئه‌نجامدان ئانكو دبیت دو هه‌یڤێن دی یان شه‌ش هه‌یڤێن دی هه‌لبژارتن بهێنه ئه‌نجامدان كو ئه‌وژی دزڤریت بۆ ڕێككه‌فتنا د ناڤبه‌را ئالیێن سیاسی دا”.
زانا مه‌لا خالد بزاڤێن نوونه‌ران تایبه‌ت یا نه‌ته‌وێن ئێكگرتی ل ئیراقێ ب گرنگ دهه‌ژمێریت و دبێژیت” هوشداریا جینین پلاسخارت د ده‌مه‌كی دایه كو رۆژا 1/10/2022 وه‌كو ژڤانێ ئه‌نجامدانا هه‌لبژارتنێن په‌رله‌مانێ كوردستانێ ژ ئالیێ سه‌رۆكێ هه‌رێما كوردستانێ ڤه هاتبوو دیاركرن، به‌لێ ژ ئه‌گه‌رێ ڕێكنه‌كه‌فتنێ، هه‌لبژارتن نه‌هاتنه ئه‌نجدامدان، ئانكو ئه‌ڤه به‌رده‌وامیدانا پرۆسه‌یا دیموكراسیه ل هه‌رێما كوردستانێ كو ئه‌م و ئالیێن پشكدار د حوكمه‌تێدا دخوازین دسالا داهاتیدا هه‌لبژارتن بهێنه ئه‌نجامدان”.
گوت ژی” ل چار خولێن بۆری ژی ده‌می په‌رله‌مانی ژ ئه‌گه‌رێ ڕێكنه‌كه‌فتنا ئالیێن سیاسی هاتبوو درێژكرن، مه ل هه‌رێما كوردستانێ دستوور نینه و هه‌تاكو دستووره‌ك بۆ هه‌رێمێ نه‌هێته دانان، ئه‌م دێ تووشی ڤان گرفتان بین”.
ئه‌ڤرۆ ، زنار تۆڤی:
بسپۆره‌كا زانستێن سیاسی ل زانكۆیا دهۆكێ، بۆ رۆژناما (ئه‌ڤرۆ) رادگه‌هینیت، پێكئینانا حوكمه‌تا ئیراقێ دێ یا ب زه‌حمه‌ت بیت، چونكی گرۆپێ خوه‌نیشادانان قه‌بوول ناكه‌ت حزبێن به‌ری نوكه ده‌ستهه‌لات ل ئیراقێ كری، جاره‌كا دی ده‌ستهه‌لاتێ وه‌ربگرن، ژبه‌ركو گه‌له‌ك دۆسیێن گه‌نده‌لیێ ل سه‌ر وان یێن هه‌ین ، هه‌روه‌سا وان چو خزمه‌ت بۆ وه‌لاتیان نه‌كریه، دیسان چو پارتێن دی ل ئیراقێ نه‌هاتینه دامه‌زراندن، كو جادا ئیراقی رازی بكه‌ت و پارته‌كا نیشتیمانی بیت، بشێت هه‌موو خه‌لكێ ئیراقێ رازی بكه‌ت، ب تایبه‌تی ژی گرۆپێ خوه‌نیشادانان ل دژی چارچۆڤه‌یێ هه‌ماهه‌نگیێ نه، د نوكه دا ناڤمالا شیعی پرت و به‌لاڤبوویه، د هه‌مان ده‌مدا باسكێ سه‌دری و چارچۆڤه‌یێ هه‌ماهه‌نگیێ نه‌گه‌هشتینه چو رێككه‌فتنان، ئه‌ڤه ژی دێ بیته ئه‌گه‌ر كو حوكمه‌ت زوو نه‌هێته پێكئینان، چو ئالیێن سیاسی بێی سه‌دری نه‌شێن حوكمه‌تا ئیراقێ پێكبینن و كورد و سوننی ژی نه‌گه‌هشتینه رێككه‌فتنێ ل گه‌ل چارچۆڤه‌یێ هه‌ماهه‌نگیێ.
د. سۆزان ئامێدی، بسپۆرا زانستێن سیاسی ل زانكۆیا دهۆكێ هێشتا دبێژیت” كوردان باوه‌ری ب چارچۆڤه‌یێ هه‌ماهه‌نگیێ نینه، چونكی چه‌ندین جاران حوكمه‌ت هاتیه پێكئینان، هه‌ر ئه‌و كه‌سه بووینه یێن دناڤا ڤی چارچۆڤه‌یێ دا، هه‌روه‌سا چو جاران سه‌ركردێن چارچۆڤه‌یێ هه‌ماهه‌نگیێ ئه‌و سۆزێن داینه كوردان بجه نه‌ئیناینه، دیسان هه‌كه كورد و سوننی ل گه‌ل چارچۆڤه‌یێ هه‌ماهه‌نگیێ بگه‌هنه رێككه‌فتنێ و ئالیێن نێڤده‌وله‌تی ژی پشكداریێ تێدا بكه‌ن، په‌یماننامه‌ك ژی دناڤبه‌را وان دا بهێته ئیمزا كرن، باسكێ سه‌دری ل سه‌ر ڤێ چه‌ندێ رازی نابیت، دیسان كوردان ژی باوه‌ری ب چارچۆڤه‌یێ هه‌ماهه‌نگیێ نینه، جڤاكێ نێڤده‌وله‌تی ژی دڤێت حوكمه‌تا ئیراقێ پێك بهێت، ژ پێخه‌مه‌ت ئێمناهیه‌كا سیاسی ل ئیراقێ په‌یدا ببیت، هه‌كه په‌یدا نه‌بیت، ئه‌ڤ چه‌نده د به‌رژه‌وه‌ندیا ئه‌مریكا و ئێكه‌تیا ئورۆپا دا نابیت”.
دیاركر” هاتنا مسته‌فا كازمی بۆ هه‌رێما كوردستانێ و دانوستاندنێن وی ل گه‌ل سه‌رۆك بارزانی و نێچیرڤان بارزانی، سه‌رۆكێ هه‌رێما كوردستانێ و مه‌سرور بارزانی، سه‌رۆكێ حوكمه‌تا هه‌رێما كوردستانێ، ژبه‌ر وان هێرش و گه‌فێن ئیرانێ بوویه، بۆ سه‌ر هه‌رێما كوردستانێ، كو ده‌مێ چه‌ندین رۆژان بوو ئیرانێ ب دژواری ده‌ڤه‌رێن سنۆری یێن هه‌رێما كوردستانێ تۆپباران دكرن، ب ڤێ چه‌ندێ ئیرانێ دڤێت گڤاشتنان ل سه‌ر هه‌رێمێ دروست بكه‌ت، ژبه‌ر به‌رژه‌وه‌ندیێن خوه ل به‌غدا، هه‌ر هه‌لبژارتنه‌كا ل ئیراقێ بهێته كرن، ئیران دێ گڤاشتنان ل سه‌ر هه‌رێما كوردستانێ كه‌ت، داكو بریارا كوردان ل به‌غدا لدووڤ به‌رژه‌وه‌ندیا ئیرانێ بیت، هه‌ر چه‌نده چو جاران هه‌رێم ناكه‌ڤیته بن گڤاشتنێن ئیرانێ، هه‌رده‌م هه‌رێما كوردستانێ به‌رژه‌وه‌ندیا خه‌لكێ هه‌رێمێ پاراستیه وبه‌رگری ژێ كریه، هه‌روه‌سا ره‌وشا ئیرانێ د بیاڤێ ئه‌منی و سییاسی و ئابووری دا، یێ خرابه و ئیرانێ دڤێت ب ڤێ چه‌ندێ ره‌وشا خوه یا ناڤخوه‌یی ڤه‌گوهێزیته هه‌رێما كوردستانێ، هه‌رده‌م ئیرانێ ڤیایه پێگه‌هێ هه‌رێما كوردستانێ یێ لاواز بیت، ب تایبه‌تی ژی هه‌ر ده‌مێ ئیران دبینیت، ده‌وله‌تێن جیهانێ مامه‌له‌كا باش ل گه‌ل هه‌رێما كوردستانێ دكه‌ن، ئیران دێ ڤان گاڤێن دۆژمنكاری هاڤێژیت و ده‌ڤه‌رێن سنۆری تۆپباران و مۆشه‌كباران كه‌ت”.
ل دووماهیێ ئه‌و ژی گوت” هه‌رێما كوردستانێ هه‌رده‌م بێده‌نگی پاراستیه و گاڤێن عه‌قلانی هاڤێتینه و به‌لانس راگرتیه، ئێمناهیا هه‌رێمێ ژی پاراستیه و په‌یوه‌ندیێن خوه ل گه‌ل ئالیێن ئیراقی ژی باشكرینه، به‌لێ كوردان باوه‌ری ب چو ئالیێن ئه‌ره‌بی نینه، گه‌له‌ك جاران ژ نه‌چاری رێككه‌فتن كرینه، چونكی گه‌له‌ك ژ ئاخفتنێن سوننی و شیعه‌یان و گرۆپێ تشرینیا نه د به‌رژه‌وه‌ندیا هه‌رێما كوردستانێ دانه، له‌وما دڤێت كورد ب ژیرانه سه‌رده‌ریێ ل گه‌ل وان پێشهات و روودانان بكه‌ن یێن كو ل ئیراقێ روو دده‌ن”.
دهۆك، نه‌وزاد هلۆری:
شه‌مبیا بۆری ل ده‌ڤه‌را ئه‌لقوش روودانه‌كا هاتنوچوونێ د ناڤبه‌را دو ترۆمبێلان دا روو دا و د ئه‌نجام دا هه‌شت كه‌سان گیانێ خوه ژ ده‌ست دا و سێ كه‌سێن دی ژی برینداربوون، كو هه‌موو ژ خێزانه‌كا كریستیان یا گوندێ سێجێ بوون، ب ئاماده‌بوونا جێگرێ پارێزگارێ دهۆكێ د رێوره‌سمه‌كی دا هاتنه ڤه‌شارتن.
سیڤان ئاشوت، برایێ مه‌زن یێ وێ خێزانێ بۆ رۆژناما ئه‌ڤرۆ گۆت: (خه‌م و كوڤانێن مه ژ بۆ گیان ژ ده‌ستدانا باب و برا و ژنبرا و پێنج زارۆیێن وان ناهێته به‌حسكرن، خه‌مه‌كا گه‌له‌كا گرانه، له‌و ئه‌م داخواز دكه‌ین، ب هه‌ر رێیه‌كا هه‌بیت دڤێت رێیا ئه‌لقۆش بهێته چاره‌سه‌ركرن، ژ به‌ركو ئه‌ڤه رێك نینه، به‌لكو سه‌نگه‌رێ شه‌ڕی یه، چه‌ندین جاران روودانێن ب ڤی ره‌نگی ل سه‌ر وێ رێیێ رووداینه).
ئه‌و هه‌ر هه‌شت كه‌سێن، كو د روودانێ دا گیانێ خوه ژ ده‌ستدای پێك دهێن ژ ئاشوت عه‌بدۆ، كو باپیرێ وایه و ژییێ وی 73 سال بوون، ستیڤان ئاشوت، مه‌زنێ مالێ و بابێ زارۆیان د ژییێ 37 سالی دا، مه‌ی مه‌ولود، دایكا زارۆیان د ژییێ 30 سالیێ دا، هایتان ستڤان 13 سال و ئارین ستیڤان 12 سال و ئیلینا ستیڤان 10 سال و مارسیس ستیڤان شه‌ش سال و میروڤ ستیڤان یا ئێك سالی كو زارۆیێن وان بوون گیانێ خوه ژ ه‌ستدایه، سێ زارۆیێن دی ژی نوكه ل نه‌خۆشخانا ته‌نگاڤیان و نه‌خۆشخانا هیڤی یا زارۆیان ل ژێرچاڤدێریا چڕ یا نۆشداران دانه.
ژنبرا ستیڤانی د ناڤ رێوره‌سمێن نڤێژ و دوعا ل كه‌نیسا ئه‌رمه‌نان ل دهۆكێ گۆت: (ب چو ره‌نگی روودانا گیان ژ ده‌ستدانا ئه‌ڤان هه‌موو كه‌سان ل خێزانا مه روودان نینه، به‌لكو فه‌رمانه و كاره‌سته‌كا مه‌زنه).
دوهی ئێڤاری ل كه‌نیسا ئه‌رمه‌نان ل دهۆكێ رێوره‌سمه‌كێ تایبه‌ت بۆ نڤێژ و دوعا ل سه‌ر ته‌رمێن وان هاته رێكخستن، پاشی د رێوره‌سمه‌كێ تایبه‌ت دا ل گوندێ سێجێ یێ سه‌ر ب ده‌ڤه‌رداریا سێمێلێ ڤه ب ئاماده‌بوونا جێگرێ پارێزگارێ دهۆكێ و هه‌ژماره‌كا به‌رپرسێن حكومی و حزبی و كریستیان و وه‌لاتیان هاتنه ڤه‌شارتن.
ئه‌ڤرۆ:
سه‌رۆك مه‌سعود بارزانی ب هه‌لكه‌فتا ژدایكبوونا محه‌مه‌د پێغه‌مبه‌ری ئیسلامێ(س . خ) په‌یامه‌كا پیرۆزباهیێ به‌لاڤكر و تێدا دبێژیت، ب هه‌لكه‌فتا ژ دایكبوونا پێغه‌مبه‌رێ مه‌زن، حه‌زره‌تێ محه‌مه‌دولمسته‌فا (س .خ) پیرۆزباهیێ ل هه‌موو موسلمانێن جیهانێ و ئیراقێ و كوردستانێ دكه‌م.
د ڤێ هه‌لكه‌فتا پیرۆز دا ژ خودایێ مه‌زن دخوازم ده‌رگه‌هێن خێر و به‌ره‌كه‌ت و ڕحمه‌تێ بۆ گه‌لێ كوردستانێ و گه‌لێن ئیراقێ و ده‌ڤه‌رێ ڤه‌كه‌ت و ئاشتی و مرۆڤدۆستی ل سه‌رانسه‌ری جیهانێ و ده‌ڤه‌را مه ڤه‌گریت.
هه‌روه‌سا ژ یه‌زدانێ مه‌زن دخوازم فه‌رهه‌نگا پێكڤه‌ژیانێ و برایه‌تیێ و ته‌بایێ دناڤ گه‌لێ مه دا به‌رفره‌هتر ببیت.
ئه‌ڤرۆ:
سه‌رۆكێ هه‌رێما كوردستانێ د په‌یامه‌ك ب هه‌لكه‌فتا ژ دایكبوونا پێغه‌مبه‌رێ ئیسلامی (س .خ) به‌لاڤكر و تێدا دبێژیت: ب هه‌لكه‌فتا پیرۆز یا ژدایكبوونا پێغه‌مبه‌رێ ئیسلامێ حه‌زره‌تێ محه‌مه‌د (س . خ) گه‌رمترین پیرۆزباهیێ ل موسلمانێن كوردستانێ و ئیراقێ و جیهانێ دكه‌م.
هیڤیدارم ئه‌ڤ هه‌لكه‌فتا پیرۆز، خێر و خوه‌شی و ئاسوده‌یی ژێ په‌یدا ببیت و هانده‌ر بیت بۆ پێگیریا زێده‌تر ب بها و وانه‌یێن مه‌زن یێن په‌یاما ئاشتیخوازانه یا ئایینێ ئیسلامێ.
بلا ئه‌م هه‌موو وێ هه‌لكه‌فتێ بكه‌ینه ده‌لیڤه بۆ پتر بهێزكرنا گیانێ لێبۆرینێ و چاكخوازیێ و برایه‌تیێ و پێكڤه‌ژیانا ئاشتیانه.
مه‌سرور بارزانی: دخوازین هه‌لكه‌فتا ژ دایكبوونا پێغه‌مبه‌رێ ئیسلامێ (س . خ) هانده‌ره‌كێ بهێزكرنا لێبۆرینێ بیت
سه‌رۆكێ حوكمه‌تا هه‌رێما كوردستانێ، مه‌سرور بارزانی، ب هه‌لكه‌فتا ژدایكبوونا پێغه‌مبه‌رێ ئیسلامێ (س. خ) په‌یامه‌ك به‌لاڤكر و تێدا دبێژیت، ب هه‌لكه‌فتا ژ دایكبوونا پێغه‌مبه‌رێ ئیسلامێ حه‌زره‌تێ محه‌مه‌د (س. خ) گه‌رمترین پیرۆزباهیان ئاراسته‌ی هه‌موو موسلمانێن كوردستانێ و ئیراقێ و جیهانێ دكه‌م.
ژ خودایێ مه‌زن و دلۆڤان دخوازین، ئه‌ڤ هه‌لكه‌فتا پیرۆز، ببیته هانده‌ره‌كێ زێده‌تر بۆ پێشڤه‌برنا بهایێن بلند و مرۆڤایه‌تی یێن ئایینی و بهێزكرنا كه‌لتوورێ ته‌باییێ و لێبۆرینێ و پێكڤه‌ژیانا ئاشتیانه د ناڤ گه‌لێن جیهانێ دا.
ب هه‌لكه‌فتا جه‌ژنا جه‌مایێ یا كوردێن ئێزدی، سه‌رۆك بارزانی په‌یامه‌كا پیرۆزباهیێ به‌لاڤكر و ئه‌ڤه ده‌قێ وێ یه :
ب هه‌لكه‌فتا جه‌ژنا جه‌مایێ، پیرۆزباهیێن گه‌رم ئاراسته‌ی میرێ ئێزدیان و بابه شێخ و جڤاتا رۆحانی و هه‌موو خوشك و برایێن ئێزدی ل كوردستانێ و جیهانێ دكه‌م.
هیڤیدارم ئه‌ڤ جه‌ژنه ببیته ئه‌گه‌رێ خوشی و ئارامی یا خوشك و برایێن ئێزدی و بشێن هه‌موو ساله‌كێ جه‌ژن و خوشیێن خوه ب ئاشتی و ئاسوده‌یی ساز بكه‌ن.
هه‌ر ب ڤێ هه‌لكه‌فتێ داكوكیێ دكه‌ین كو پێدڤیه هه‌موو لایه‌ك كار بو بهێزكرنا فه‌رهه‌نگ و كه‌لتورێ پێكڤه‌ژیانێ و برایه‌تی و ئێكرێزیێ د ناڤبه‌را هه‌موو پێكهاته‌یێن ئولی و نه‌ته‌وه‌یێن كوردستانێ بكه‌ن و بپارێزن.
نێچیرڤان بارزانی، سه‌رۆكێ هه‌رێمێ د په‌یاما خوه یا پیرۆزباهیێ دا به‌لاڤكر”دلێ مه ل جه‌م وان مالبات و خوشك و برایێن مه یێن ئێزدییه كو هه‌تا نها كه‌سوكارێن وان د ڕه‌ڤاندینه و ئه‌م وان هه‌موویان پشتڕاست دكه‌ین كو هه‌تا ڕه‌ڤاندیه‌ك ئێزدی مابیت، دێ لسه‌ر بزاڤا ڕزگاركرنا وان و دیاركرنا چاره‌نڤیسێ وان به‌رده‌وام بین”.
مه‌سرور بارزانی، سه‌رۆكێ حوكمه‌تا هه‌رێمێ د په‌یاما خوه یا پیرۆزباهیێ دا دبێژیت” دووپات دكه‌ینه‌ڤه دێ هه‌رده‌م د به‌رده‌وام بین لسه‌ر پشته‌ڤانیا ماف و داخوازیێن خوشك و برایێن ئێزدی و پتر خزمه‌تكرنا وان” .
ئه‌ڤرۆ:
سه‌رۆكێ حوكمه‌تا هه‌رێما كوردستانێ، مه‌سرور بارزانی، داخواز دكه‌ت پرسا سه‌رۆك كۆمارا ئیراقێ ل دناڤ په‌رله‌مانێ كوردستانێ بهێته ئێكلاكرن و به‌ربژارێ هه‌ڤپشك یێ كوردان بۆ وی پۆستی دناڤ په‌رله‌مانێ كوردستانێ دا بهێته دیاركرن.
دوهی شه‌مبیێ 8 چریا ئێكێ 2022، مه‌سرور بارزانی، سه‌رۆكێ حوكمه‌تا هه‌رێما كوردستانێ د چارچۆڤێ پشكداریكرنێ د دیدارا (پرسا كوردی ل رۆژهه‌لاتا ناڤین) د به‌رسڤا پرسیارا چه‌ند پشكداربوویان دا ل دۆر چاره‌سه‌ركرنا كێشه‌یا پۆستێ سه‌رۆك كۆمارا ئیراقێ، راگه‌هاند” هیچ خاله‌كا دستووری و قانوونی نینه كو پۆستێ سه‌رۆك وه‌زیران بۆ شیعان بیت و پۆستێ سه‌رۆك كۆماری بۆ كوردان بیت یان پۆستێ سه‌رۆكێ جڤاتا نوونه‌ران بۆ سوونه‌یان بیت، به‌لێ وه‌كو نه‌ریته‌كی لێهاتیه و تاكو نوكه ژی دهێته په‌یڕه‌وكرن، به‌لێ چاوا ئه‌و نه‌ریته هاتیه؟ زورینه‌یا شیعی سه‌رۆكێ وه‌زیران به‌ربژار دكه‌ت و پاشی ل جڤاتا نوونه‌ران باوه‌ری پێ دهێته دان، زورینه‌یا سوننی ژی سه‌رۆكێ جڤاتا نوونه‌ران ده‌تنیشان دكه‌ت. ل ڤێرێ داخوازی ئه‌وه كو پێدڤیه زورینه‌یا كورد به‌ربژارێ خوه بۆ پۆستێ سه‌رۆك كۆماری ده‌ستنیشان بكه‌ت”.
مه‌سرور بارزانی گوت ژی” ل سێ خولێن ئێكێ یێن جڤاتا نوونه‌رێن ئیراقێ كوردان ب ئێكڕێز و ئێكگرتی پشته‌ڤانی ل به‌ربژاره‌كی بۆ پۆستێ سه‌رۆك كۆمارێ دكر، به‌لێ د خولا پێشتر مخابن ئه‌و نه‌ریته هاته شكاندن، ئانكو سه‌رۆك كۆمارا ئیراقێ كو پێدڤی بوو ژئالیێ زۆرینه‌یا كوردی بهێته هه‌لبژارتن نه‌هاته په‌یڕه‌وكرن، به‌روڤاژی ل جڤاتا نوونه‌ران بێی كوردان زۆرینه‌یا شیعی هه‌لبژارتن كر و سه‌رۆك كۆماره‌ك ده‌ستنیشانكر” .
مه‌سرور بارزانی ب پێدڤی زانی ڕێز ل ئه‌نجامێن هه‌لبژارتنان بهێته گرتن و گوت” ئالیێ سه‌ركه‌فتی د هه‌لبژارتنێن ئیراقێ دا ل هه‌رێما كوردستانێ مافێ زێده‌تر یێ هه‌ی كو به‌ربژارێ سه‌رۆكێ كۆمارێ پێشنیاز بكه‌ت، به‌لێ بۆ وێ چه‌ندێ ئه‌م بهێین و بزڤرین سه‌ر هه‌مان نه‌ریتێ كه‌ڤن، ئه‌و مه داخوازكریه كو زۆرینه‌یا خه‌لكێ كوردستانێ به‌ربژارێ سه‌رۆكێ كۆماری ده‌ستنیشان بكه‌ن و ئه‌و كه‌سه ببیته به‌ربژاری هه‌موو خه‌لكێ كوردستانێ و ل جڤاتا نوونه‌رێن ئیراقێ ده‌نگ پێ بهێته دان، ئه‌و جهه ژی په‌رله‌مانێ كوردستانێ یه كو نوونه‌رایه‌یتا هه‌موو خه‌لكێ كوردستانێ دكه‌ت”.
مه‌سرور بارزانی گوت ژی” هه‌موو ده‌مه‌كی گه‌لێ كورد ڕێز ل بڕیارێن ئالیێن شیعی و سوننی ل دۆر دیاركرنا به‌ربژارێن خوه بۆ پۆستێن سه‌رۆك وه‌زیران و سه‌رۆكێ جڤاتا نوونه‌رێن ئیراقێ گرتیه، له‌وما د ده‌مه‌كیدا په‌رله‌مانێ كوردستانێ ژی تاكه به‌ربژارێ كورد بۆ پۆستێ سه‌رۆك كۆمارا ئیراقێ دیاردكه‌ت، پێدڤیه حزب و ئالیێن سیاسی یێن ئیراقی ڕێزێ ل بڕیارا په‌رله‌مانێ كوردستانێ بگرن”.
مه‌سرور بارزانی، سه‌رۆكێ حوكمه‌تا هه‌رێما كوردستانێ د چارچۆڤێ پشكداریا خوه دا ل وێ دیداری، د په‌یڤه‌كێ دا گوت” ب درێژیا دیرۆكێ سته‌مه‌كا مه‌زن ل كوردان وه‌كو نه‌ته‌وه، ل نه‌ته‌وه و ئایینێن جودا وه‌كو پێكهاته‌یێن ره‌سه‌ن یێن ڤێ ده‌ڤه‌رێ، هه‌روه‌سا ل ئاخا كوردستانێ وه‌كو نیشتمان هاتیه كرن، ئه‌و سته‌مه ب ده‌هان سالان، به‌لكو ل سه‌د سالێن بۆری و هه‌تا نوكه ژی یا به‌رده‌وامه، مخابن ل شوینا وێ چه‌ندێ هزر د چاره‌سه‌ریا بنه‌ره‌تی دا بهێته كرن، گه‌له‌ك جاران مژوولی وێ چه‌ندێنه هێجه‌تان ببینن، بۆ وێ ئێكێ ئه‌ڤ كێشه‌یه وه‌كو پێدڤی نه‌هێته چاره‌سه‌ركرن، كێشه‌یا كوردی ل رۆژهه‌لاتا ناڤین ئه‌ڤرۆ كێشه‌یه‌كا جیهانیه، پێدڤیه ئه‌م هه‌موو بزاڤا وێ چه‌ندێ بكه‌ین وان گرفت و شاشیان دیاربكه‌ین كو د دیرۆكێدا دژی ڤێ ده‌ڤه‌رێ و مه هاتیه كرن، بۆ وێ چه‌ندێ ڕێچاره‌یه‌كا گونجای بۆ ببینین، ل سالێن بۆری ئه‌و وه‌لاتێن كو كێشه ل گه‌ل كوردان وه‌كو نه‌ته‌وه هه‌بوو نه‌هێلایه كورد هه‌تاكو باسێ كێشه‌یا خوه ژی بكه‌ن، هه‌ر پێشنیازه‌كا به‌رچاڤكربیت بۆ چاره‌سه‌ریێ، پاشی كورد هاتیه تاوانباركرن ب جوداخوازیێ یان كێشه و ئاژاوێ دروست دكه‌ت، ئه‌م وه‌كو هه‌ر نه‌ته‌وه‌یه‌كی مه مافێ وێ چه‌ندێ یێ هه‌ی كو ب دیتنا مه چاوان سه‌قامگیریا ده‌ڤه‌رێ ده‌سته‌به‌ر دبیت و چاوان ئه‌م دشێین فاكته‌ره‌كێ ئاڤاكه‌ر بین، هه‌روه‌سا مه ب خوه مافێ وێ چه‌ندێ هه‌بیت باسێ بیر و بۆچوونێن خوه بكه‌ین ل پلاتفۆرمێن نێڤده‌وله‌تی، ل ڤی ده‌مێ كو ڕێ ب كوردان هاتیه دان ده‌نگێ خوه بگه‌هینیته جیهانێ، یێن شیاین د گه‌له‌ك بواران دا ئه‌و شرۆڤه‌كرنا شاش سه‌باره‌ت نه‌ته‌وا كوردی و خه‌لكێ كوردستانێ هاتیه كرن ڤه‌ره‌ڤینیت، جیهان دیده‌ڤانێ وێ چه‌ندێ یه ئه‌م دشێین فاكته‌ره‌كێ ئاڤاكه‌ر بین، هه‌ر ژ سه‌رده‌مێ بارزانیێ نه‌مر وتاكو سه‌رۆك بارزانی به‌رده‌وام داكۆكی ل وێ چه‌ندێ كریه نابیت كێشه‌یا كوردی ل گه‌ل حوكمه‌تان وه‌سا بهێته شرۆڤه‌كرن كو ببیته كێشه‌یا نه‌ته‌وان، مه به‌رده‌وام ڕێز ل هه‌موو نه‌ته‌وان گرتیه و ل سه‌ر وی پرنسیپی دێ د به‌رده‌وام بین، كێشه‌یا مه ل گه‌ل نه‌ته‌وان نینه كو دگه‌لدا دژین، به‌لكو كێشه ل گه‌ل هنده‌ك ده‌ستهه‌لاتدار و حوكمه‌تان بوو، كوم خابن ل شوونا هزر د حوكمڕانیه‌كا یه‌كسان و دادپه‌وه‌رانه دا بكه‌ن هزر د چه‌وساندنا نه‌ته‌وه‌یه‌كێ سته‌م دیتی كریه، به‌لێ مه نه‌هێلایه ئه‌و ببیته كێشه‌یا د ناڤبه‌را نه‌ته‌وه‌یان دا، هه‌ر ده‌مه‌كی ژی پێدڤی بیت هه‌ر نه‌ته‌وه و پێكهاته‌یه‌كی پێدڤی ب كوردستانێ هه‌بیت، كوردستانێ ده‌رگه‌هێن خوه یێن ڤه‌كرین و حه‌واندین” .
سه‌رۆكێ حوكمه‌تا هه‌رێما كوردستانێ، دیاركر” پشتی په‌یدابوونا شه‌ڕێ داعشێ، زێده‌تر ژ دو ملیۆن كه‌سان ژ ده‌ڤه‌رێن دی یێن ئیراقێ و سووریێ و وه‌لاتێن هه‌ڤسنوور به‌ر ب هه‌رێما كوردستانێ هاتن، هه‌رێمێ ده‌رگه‌هێ خوه بۆ ڤه‌كر، كو هه‌تا نوكه ژی ب شانازی ڤه دبێژین كوردستان بوویه په‌ناگه‌هه‌ك بۆ ئه‌وێن ژ ده‌ستێ تاوانێ و تیرۆرێ د رٍه‌ڤن وكوردستانێ ب جهه‌كێ پاراستی دزانن و به‌ر ب وێ دهێن، ئه‌م منه‌تێ ل كه‌سێ ناكه‌ین، به‌لێ ئه‌ڤه كه‌لتوره‌كه ل گه‌ل مه‌یه و ئه‌و پره‌نسیپه‌ن یێن مه باوه‌ری پێ هه‌ی”.
مه‌سرور بارزانی د پشكه‌كا په‌یڤا خوه دا به‌رچاڤكر” چاره‌سه‌ركرنا كێشه‌یا كوردی دێ بیته چاره‌سه‌ریا كێشه‌یا رۆژهه‌لاتا ناڤین ب گشتی، دخوازم باسێ نموونه‌یا ئیراقێ بكه‌م، هه‌كه سه‌حكه‌ینه روودانێن 100 سالێن بۆری بكه‌ین پشتی دامه‌زراندنا ده‌وله‌تا ئیراقێ هه‌تا نوكه ئایا ئیراقێ وه‌كو پێدڤی سه‌قامگیری بخوه‌ڤه دیتیه؟ پێشكه‌فتیه؟ شیایه ب یه‌كسانی خزمه‌تا هه‌موو خه‌لكی بكه‌ت؟ بێگومان نه‌خێر، ئێك ژ هوكارێن هه‌ره سه‌ره‌كی یێن هه‌موو وان نه‌هامه‌تیێن ل ڤی وه‌لاتی رووداین ئه‌وه كێشه‌یا كوردی نه‌هاتیه چاره‌سه‌ركرن”.
گوت ژی” كورد وه‌كو نه‌ته‌وه ڕێز لێ نه‌هاتیه گرتن، به‌لێ ل كوردستانێ ڕێز ل مافێن مرۆڤی و نه‌ته‌وه و پێكهاته‌یێن جودا دهێته گرتن، پێكڤه‌ژیان بوویه پێناسه‌كا دیار یا هه‌رێما كوردستانێ، هه‌كه ده‌لیڤه‌كا وه‌سا ب مه هاتبا دان كاربكه‌ین، ڕێز ل مه هاتبا گرتن، دانپێدان ب مافێن مه هاتبا كرن، بێگومان دا شێین پێشكه‌فتنه‌كا گه‌له‌ك زێده‌تر نه‌كو بۆ خوه، به‌لكو بۆ هه‌موو ده‌ڤه‌رێ ژی بده‌ستڤه‌ئینین”.
ئه‌ڤرۆ، سالار محه‌مه‌د دۆسكی:
شیره‌تكارێ مه‌كته‌با سیاسی یا پارتی دیموكراتی كوردستان، راگه‌هاند، دڤێت پارتی بۆ قۆناغا داهاتی بهێز و شیانێن مه‌زنتر د مه‌یدانا خه‌باتا كوردایه‌تیێ دا رۆلێ پیشه‌نگێ خوه بگێریت، خویاكر كو پێشكه‌فتن و هاتنا گه‌نج و ئافره‌تان بۆ پێشڤه خه‌سله‌ته‌كا دێرینا پارتی یه.
عارف روشدی، شیره‌تكارێ مه‌كته‌با سیاسی یا پارتی دیموكراتی كوردستان بۆ رۆژناما (ئه‌ڤرۆ) گۆت” كۆنگره هه‌ر وه‌ك د پشكا حه‌فتێ و مادێ شازدێ ژ په‌یره‌وێ ناڤخوه‌یێ پارتی دا هاتیه (بلندترین ده‌سته‌هه‌لاتا حزبی یه) هه‌ر چار سالان جاره‌كێ دڤێت بهێته سازكرن، كۆنگره ده‌ستهه‌لاتا هه‌موو گوهۆرینان یا هه‌ی ل سه‌ر ئاستێ (رێكخراوه‌یی، هزری، سیاسی) به‌لكو ئه‌م دشێین بێژین وه‌ك دادگه‌هه‌كێ یه بۆ پێداچوون و هه‌لسه‌نگاندنا چاوانیا بجهئینانا كاروبار و ئه‌ركێن حزبی دناڤبه‌را كۆنگره‌یاندا، بریاردان ل سه‌ر دارشتنا په‌یره‌و و پرۆگرامێ كارێ داهاتی و هه‌ر گوهۆرینه‌كا دی یا پێدڤی بیت داكو حزب ب هه‌ڤسه‌نگی ل گه‌ل كاودانێن نوو یێن سیاسی، ئیداری، جڤاكی خوه ب گونجینیت و ب ره‌نگه‌گێ سه‌رده‌میانه سه‌رده‌ریێ بكه‌ت”.
شیره‌تكارێ مه‌كته‌با سیاسی یا پارتی دیموكراتی كوردستان گوت ژی” جوداهیا كۆنگره‌یێ 14ێ ل گه‌ل كۆنگره‌یێ 13ێ ئه‌وه یێ یێ 14 د ده‌مه‌كی دایه گه‌له‌ك ئالنگاریێت چونایه‌تی هه‌نه ل سه‌ر ئاستێ ناڤخوه‌یێ كوردستانێ، یان ل سه‌ر ئاستێ ئیراقێ و سیاسه‌تا هه‌رێمی و نیڤ ده‌وله‌تی به‌رامبه‌ر دوزا ملله‌تێ مه وسه‌روه‌ریا قه‌وارێ هه‌رێما كوردستانێ، پارتی وه‌كو هێزا سه‌ره‌كی یا حوكمڕان ل هه‌رێما كوردستانێ و خودان كاریگه‌ری ل سه‌ر دوزا نه‌ته‌وی ب شێوه‌كێ گشتی دڤێ كۆنگره‌یدا دێ بهێزه‌كا دی به‌رامبه‌ر چه‌وایه‌تییا چاره‌سه‌ركرنا ده‌رهاوشتێت ڤان ئالنگاریا نێرینێت خودا دارێژیت، گه‌له‌ك یا گرنگه ب بابه‌تیانه دڤی بیاڤێ هه‌ستیاردا ئه‌و گاڤێن هه‌تا نوكه هاتینه هاڤێتن دوی واریدا بهێنه هه‌لسه‌نگاندن”.
ل دور بڕێڤه‌چوونا كۆنگره‌یێ 14ێ یێ پارتی ل دهۆكێ، عارف روشدی گوت” هه‌تا نوكه پارتی دیموكراتی كوردستان كۆنگره ل هه‌موو پارێزگه‌هێن هه‌رێما كوردستانێ و به‌غدا ژی یێن گرێداین، دهۆك وه‌كو بنه‌ستره‌كی دیار د پشته‌ڤانیا جه‌ماوه‌ری دا نه‌هێته بێ باركرن ژڤێ هه‌لكه‌فتا سیاسی پارتی بریاردایه كۆنگره ل ئێك ژ هولێن باژێرێ دهۆكێ بهێته برێڤه‌برن، هه‌روه‌سا رێز و پێزانینه‌كه بۆ خه‌لكێ دهۆكێ و ده‌ڤه‌را به‌هدینان به‌رامبه‌ر وێ قوربانیدانا به‌رده‌وام د درێژاهیا بزاڤا رزگاری خوازیا خه‌لكێ كوردستانێ دا”.
شیره‌تكارێ مه‌كته‌با سیاسی یا پارتی دیموكراتی كوردستان ئاماژه‌كر ژی” پێشكه‌فتن و هاتنا گه‌نج و ئافره‌تان بۆ پێشڤه دناڤ پارتیدا خه‌سله‌ته‌كا دێرین یا پارتی یه، چونكه پارتی دوێ باوه‌ریێ دایه نووبوونه‌ڤه د هه‌موو ده‌راڤێن ژیانێ دا (خواسته‌كا خوزاییه) له‌وما پێدڤیه به‌رده‌وام لێكتێگه‌هشتن دناڤبه‌را خه‌باتكه‌رێن نفشێ دێرین و خودان سه‌ربور و نفشێ ژ نوو پێگه‌هشتی ژ هه‌ر دو ره‌گه‌زێن نێر و مێدا ب ڕه‌نگه‌كێ ئه‌رێنی دروست ببیت”.
ل دووماهیێ شیره‌تكارێ مه‌كته‌با سیاسی یا پارتی دیموكراتی كوردستان دبێژیت” هیڤیا من ئه‌وه خه‌باتكه‌رێن پارتی ل سنورێ هه‌موو لق و مه‌كته‌ب و ده‌زگه‌هان ب هه‌سته‌كێ به‌رپرسیارانه پشكداربن دپرۆسا هه‌لبژارتنا نوونه‌رێن خوه بۆ كۆنگره‌یێ 14ێ بۆ وێ چه‌ندێ بشێن پشكدارێن ئه‌رێنی بن د نه‌خشه‌دانانا سیاسه‌تا حزبا خوه بۆ قوناغا داهاتی و دڤێـت بزانین قۆناغه‌كا هه‌ستیاره و پێدڤیه پارتی بهێز و شیانه‌كا مه‌زنتر د مه‌یدانا خه‌باتا كوردایه‌تیێ دا رۆلێ پیشه‌نگێ خوه بگێریت”.
نيشاندان