ئه‌ڤرۆ:

د په‌یوه‌ندیه‌كا ته‌له‌فۆنی دا د ناڤبه‌را مه‌سرور بارزانی، سه‌رۆكێ حوكمه‌تا هه‌رێما كوردستانێ و برێت مه‌كگۆرك، هه‌ماهه‌نگكارێ كۆچكا سپی بۆ كاروبارێن ڕۆژهه‌لاتا ناڤین و باكوورێ ئه‌فریقیا، سه‌رۆكێ حوكمه‌تا هه‌رێمێ نیگه‌رانیا خوه‌ ژ بڕیارا دادگه‌ها فیدرالی یا ئیراقی یا تایبه‌ت ل ڕێگریكرنێ ل هنارتنا پاره‌ی بۆ هه‌رێما كوردستانێ ده‌ربری و دیاركر كو ئارمانج ژێ تێكدانا سه‌قایێ ئه‌رێنی و باشتركرنا په‌یوه‌ندیێن د ناڤبه‌را به‌غدا و هه‌ولێرێ یه‌ و مه‌به‌سته‌كا سیاسی یا ل پشت.

د وێ په‌یوه‌ندیا ته‌له‌فۆنی دا، برێت مه‌كگۆرك، باسێ سه‌ره‌دانا ڤێ دووماهیێ بۆ به‌غدا و هه‌ولێرێ و دانوستاندنێن سه‌باره‌ت گاڤێن داهاتی بۆ چاره‌سه‌ركرنا كێشه‌یێن د ناڤبه‌را هه‌رێما كوردستانێ و حوكمه‌تا فیدرال دا ل سه‌ر بودجه‌ی و پرسێن دی, هه‌روه‌سا دووپاتی ل گرنگیا ئێكڕێزیا ئالیێن كوردستانی و باشتركرنا په‌یوه‌ندیێن دناڤبه‌را پارتی دیموكراتی كوردستان و ئێكه‌تی نیشتمانی كوردستان كر.

هه‌ماهه‌نگكارێ كۆچكا سپی بۆ كاروبارێن ڕۆژهه‌لاتا ناڤین و باكوورێ ئه‌فریقیا، پشته‌ڤانیا وه‌لاتێ خوه‌ بۆ چاكسازیێن كابینه‌یا نه‌هێ ب تایبه‌تی چاكسازیێن وه‌زاره‌تا پێشمه‌رگه‌، هه‌روه‌سا پێشكه‌فتنێن كه‌رتێ وزێ و باشتركرنا ژێرخانه‌یا ئابووری و بزاڤێن به‌رهنگاربوونا گوهۆڕینا سه‌قی دووپاتكر.

هه‌ردو ئالی د هه‌ڤڕا بوون ل سه‌ر گرنگیا نه‌هێلانا هه‌موو ئاسته‌نگێن ل به‌رده‌م گه‌شه‌پێدانا كه‌رتێ وزێ و وه‌به‌رئێنانا زێده‌تر یا كۆمپانیێن ئه‌مریكی ل هه‌رێما كوردستانێ، هه‌روه‌سا د هه‌ڤڕا بوون ل سه‌ر وێ چه‌ندێ كو د په‌یوه‌ندیا به‌رده‌وام دا بن.

ئه‌ڤرۆ:

سه‌باره‌ت بڕیارا دادگه‌ها فیدرالی، یا ب نه‌قانوونی هه‌ژمارتنا بڕیارا هنارتنا 200 ملیار دیناران هه‌یڤانه‌ بۆ هه‌رێما كوردستانێ، حوكمه‌تا هه‌رێمێ به‌یاننامه‌یه‌ك به‌لاڤكر.

ده‌قێ به‌یاننامه‌یا حوكمه‌تا هه‌رێمێ…

مخابن دادگه‌ها فیدرالی، جاره‌كادی، دژایه‌تیا خوه‌ بۆ مافێن دستووری و شایستێن دارایی یێن خه‌لكێ هه‌رێما كوردستانێ دووپاتكر. ئه‌ڤ هه‌لویستێ نوو یێ ڤێ دادگه‌هێ، دووپاتكرنه‌ ل درێژه‌پێدان ب سیاسه‌تا نه‌ڕه‌وا و دژایه‌تیكرنا خوه‌ به‌رامبه‌ر هه‌رێما كوردستانێ، د ده‌مه‌كی دا كو سه‌قایه‌كێ ئه‌رینێ و نێزیكبوونه‌ك د ناڤبه‌را هه‌ردو حوكمه‌تێن هه‌رێما كوردستانێ و فیدرال دا دروست ببوو بۆ ڕێككه‌فتنێ و چاره‌سه‌ركرنا كێشه‌یان ل سه‌ر بنه‌مایێ دستووری، به‌لێ مخابن دادگه‌هێ، ل شوونا پشته‌ڤانیكرنێ ل وی سه‌قایێ ئه‌رێنی یێ دروستبووی، د بڕیاره‌كا نه‌ڕه‌وا و دژی خه‌لكێ كوردستانێ، ڕێگری ل هنارتنا وی گۆژمێ پاره‌ی كر كو بڕیار بوو ژ ئالیێ حوكمه‌تا فیدرالی ڤه‌ بۆ هه‌رێما كوردستانێ بهێته‌ هنارتن.

حوكمه‌تا هه‌رێما كوردستانێ، چه‌ندین جاران شاند هنارتیه‌ به‌غدا و ل دووماهی سه‌ره‌دان ژی، ل به‌غدا دانوستاندنێن گه‌له‌ك به‌رهه‌مدار هاتنه‌ كرن و هه‌ردو ئالیان نیازپاكیا خوه‌ بۆ چاره‌سه‌ركرنا كێشه‌یان د چارچۆڤه‌یێ دستووری و وێ كارنامه‌یا كو ئالی ل سه‌ر ڕێككه‌فتین دووپاتكربوو.

هه‌رێما كوردستانێ، هه‌رێمه‌كا فیدرالی یا دستووری یه‌ و ئه‌ڤ بڕیار، پێشێلكرنه‌كا دیار و ئاشكرا یا دستوورێ ئیراقێ یه‌. هه‌روه‌سا دژی ڕێككه‌فتنا ئالیێن ئیداره‌یا ده‌وله‌تێ یه‌ بۆ پێكئئینانا حوكمه‌تا نوو و دژی كارنامه‌یا وه‌زاری یا حوكمه‌تا ئیراقێ ژی یه‌ كو ژ ئالیێ جڤاتا نوونه‌ران ڤه‌ هاتیه‌ په‌سه‌ندكرن و تێدا د به‌رگه‌یه‌كێ دا ب ڕۆهنی باس ل خوه‌ دووركرن ژ هه‌ر ڕێكاره‌كی دكه‌ت كو كێشه‌یان ئالۆزتر بكه‌ت. له‌وما ئه‌م وێ بڕیارا دادگه‌ها فیدرالی، ب بڕیاره‌كا نه‌ تنێ دژی هه‌رێما كوردستانێ یه‌، به‌لكو دژی حوكمه‌تا نوو یا ئیراقێ و ئالیێن حوكمه‌ت پێكئینای دزانین و پێدڤیه‌ هه‌لویسته‌كێ ڕۆهن و ئاشكرا به‌رامبه‌ر بڕیار و ڕه‌فتارێن نه‌ڕه‌وا یێن دادگه‌ها فیدرالی هه‌بیت. هه‌روه‌كو د كارنامه‌یا وه‌زاری یا حوكمه‌تا ئیراقێ ژی هاتی كو هه‌موو ئالیێن پشكدار ل سه‌ر ڕێككه‌فتین، پێدڤیه‌ د ده‌مێ شه‌ش هه‌یڤان دا، پرۆژێ قانوونا دادگه‌ها فیدرالی بهێته‌ ده‌ركرن، چونكه‌ ل بن سیبه‌را ڤێ دادگه‌هێ دا، نوكه‌ كو ب گۆره‌ی دستووری نه‌هاتیه‌ دروستكرن، هیچ ده‌لیڤه‌یه‌ك بۆ چاره‌سه‌ركرنا كێشه‌یان نینه‌ و نابیت.

هه‌رێما كوردستانێ ڕێزێ ل دستووری و قانوونێ و دادگه‌هێن شه‌رعی دگریت، به‌لێ ئه‌ڤ دادگه‌هه‌ ب شێوه‌یه‌كێ دستووری نه‌هاتیه‌ پێكنه‌هاتیه‌ و نه‌هاتیه‌ ڕێكخستن و نه‌شێت وه‌كو دادگه‌هه‌كا فیدرالی بڕیارێ بده‌ت، له‌وما بڕیارێن وێ ڕه‌ت دكه‌ین و داخوازێ ژ حوكمه‌تا فیدرال دكه‌ین، نه‌چیته‌ بن بارێ ڤێ بڕیارێ و پێگیر بیت ب وان سۆزێن كو بۆ هنارتنا شایستێن دارایی یێن هه‌رێما كوردستانێ داین.

ئه‌ڤرۆ:

سه‌رۆكێ گشتی یێ پارتا ماف و ئازادیان پشتی هه‌ڤدیتنا ل گه‌ل هه‌ڤسه‌رۆكێ هه‌ده‌پێ راگه‌هاند كو نها قۆناغه‌كا نوو ل توركیا ده‌ستپێكریه‌ و بێگومان وه‌كو به‌ری نها ژی مه‌ گۆتی دڤێت كورد ئێكه‌تیا خوه‌ دروست بكه‌ن، چونكی كار بۆ داخستنا هه‌موو پارتێن كوردی ل توركیا دهێته‌ كرن.

بایرام بۆزیه‌ل سه‌رۆكێ گشتی یێ پارتا سوسیالیست یا كوردستانێ ل گه‌ل شانده‌كێ سه‌ره‌دانا هه‌ده‌پێ كرن و پشتی كۆمبوونا ل گه‌ل هه‌ڤسه‌رۆكێ هه‌ده‌پێ ناڤهاتی د داخۆیانیه‌كێ دا بۆ ده‌زگه‌هێن راگه‌هاندنێ دیار كر كو جوداهی د ناڤبه‌را مه‌ و هه‌ده‌پێ دا هه‌یه‌، مه‌ نێرینێن خوه‌ ل دۆر پاشه‌رۆژا توركیا، پرسا هه‌لبژارتنان و گه‌له‌ك پرسێن دی دیار كر، هه‌ڤدیتنه‌كا باش بوو و گۆت: (نها به‌حسێ داخستنا هه‌ده‌پێ دهێته‌ كرن، ئه‌و یه‌ك ب ته‌مامی ل دژی قانوونێن توركیا یه‌، لێ بابه‌ت تنێ هه‌ده‌په‌ نینه‌، ئه‌ز وه‌سا دبینم كو پشتی هه‌ده‌پێ دێ ده‌ست ب داخستنا پارتێن دی یێن كوردی ژی كه‌ن، چونكی به‌ری نها ژی گه‌له‌ك ئاریشه‌ بۆ پارتا مه‌ و پارتێن دی یێن كوردی دروست كرینه‌، ئانكۆ ب كورتی من دڤێت بێژم كو كار بۆ هندێ دهێته‌ كرن كو پشتی هه‌ده‌پێ پارتێن دی ژی بهێنه‌ داخستن).

ناڤهاتی د پشكه‌كا دی یا ئاخڤتنا خوه‌ دا ئه‌و یه‌ك ژی دیار كر كو هه‌تا نها گه‌له‌ك سكالا ل سه‌ر پارتا وان ژی هاتینه‌ تۆمار كرن، ل سه‌ر پارتێن دی یێن كوردی ژی گه‌له‌ك سكالا هاتینه‌ تۆمار كرن، دیاره‌ ناخوازن كورد ل توركیا سیاسه‌تێ بكه‌ن، ئاسته‌نگیێن مه‌زن هه‌نه‌ و دڤێت هه‌موو هێزێن كوردی ژی هه‌ست ب مه‌ترسیێن نها ل سه‌ر بزاڤا كوردی ل توركیا بكه‌ن و گۆت: (نها توركیا به‌ر ب هه‌لبژارتنان ڤه‌ دچیت، گه‌له‌ك بزاڤێن جودا جودا هه‌نه‌، هنده‌ك هێز ل توركیا كار بۆ بده‌ستڤه‌ئینانا ده‌نگێن كوردان دكه‌ن، هنده‌ك ژی كار دكه‌ن دا كو ده‌نگێن كوردان پارچه‌ بكه‌ن، ل هه‌مبه‌ر وان مه‌ترسیان ژی دڤێت هه‌موو هێزێن كوردی ل توركیا هشیار بن).

ئه‌و یه‌ك د ده‌مه‌كێ دایه‌ كو نها ل توركیا بابه‌تێ داخستنا هه‌ده‌پێ د رۆژه‌ڤێ دایه‌، هنده‌ك ژ چاڤدێرێن سیاسی ژی دیار دكه‌ن كار بۆ هندێ دهێته‌ كرن كو به‌ری هه‌لبژارتنێن ئه‌ڤساله‌ هه‌ده‌په‌ بهێته‌ داخستن، چونكی ئاكپارتی دڤێت ب رێیا داخستنا هه‌ده‌پێ ده‌نگێ كوردان پارچه‌ بكه‌ت لێ گه‌له‌ك چاڤدێرێن سیاسی ژی ل سه‌ر وێ باوه‌ریێ نه‌ كو داخستنا هه‌ده‌پێ دشێت ئاریشێن مه‌زن بۆ ئاكپارتیێ ژی دروست بكه‌ت، چونكی ب داخستنا هه‌ده‌پێ ره‌نگه‌ رێژه‌كا گه‌له‌ك مه‌زن ژ كوردان ده‌نگێ خوه‌ بده‌نه‌ پارتێن دی یێن ئۆپۆزسیۆنێ و ئه‌و یه‌ك ژی دشێت ببیته‌ ئاریشه‌كا گه‌له‌ك مه‌زن بۆ ئاكپارتیێ، ژ به‌ر هندێ ژی هه‌تا نها بابه‌تێ داخستنا هه‌ده‌پێ نه‌هاتیه‌ ئێكلا كرن.

ئه‌ڤرۆ:

سه‌رۆك مه‌سعود بارزانی په‌سنا بڕیارا په‌رله‌مانێ ئه‌لمانیا یا ب جینۆساید نیاسینا كۆمكوژیا كوردێن ئێزدی دكه‌ت و دبێژیت، ئه‌و بڕیاره‌ جهێ پێزانینا مه‌یه‌ و گه‌له‌ك ب بلندی د هه‌لسه‌نگینین.

ل ڕۆژا 19 ڤێ هه‌یڤێ، ڕوونشتنا په‌رله‌مانێ ئه‌لمانیا بۆ ده‌نگدانێ ل سه‌ر ب جینۆساید نیاسینا كۆمكوژیا كوردێن ئێزدی بڕیڤه‌چوو و ب پتریا ده‌نگان په‌رله‌مانتارێن ئه‌لمانی ئه‌و كۆمه‌لكوژیه‌ ب جینۆساید هه‌ژمارت.

سه‌رۆك مه‌سعود بارزانی سوپاسیا پشته‌ڤانیا ئه‌لمانیا كر و گوت” سوپاسیا هه‌موو پشته‌ڤانیێن ئه‌لمانیا بۆ گه‌لێ كوردستانێ دكه‌ین، مه‌ ئه‌و چاڤه‌ڕێیه‌ ژی ژ وه‌لاتێن دی یێن ڕۆژئاڤایی هه‌یه‌ ژ پێخه‌مه‌ت بده‌ستڤه‌ئینانا دادپه‌روه‌ریێ و نه‌هێلانا سته‌مكاریێ و بڕیارا هه‌ڤشێوه‌یێ په‌رله‌مانێ ئه‌لمانیا بده‌ن”.

هه‌ر پشتی بڕیارا په‌رله‌مانێ ئه‌لمانیا، نێچیرڤان بارزانی، سه‌رۆكێ هه‌رێما كوردستانێ ژ ڕاگه‌هاند” مه‌ سوپاس و پێزانین بۆ هاریكاری و پشته‌ڤانیا به‌رده‌وام یا ئه‌لمانیا هه‌یه‌ و دخوازین هه‌مان گاڤا په‌رله‌مانێ ئه‌لمانیا ژ ئالیێ په‌رله‌مانێ وه‌لاتێن دی یێن ئه‌وروپا و جیهانێ ژی بهێته‌ دان و دادپه‌روه‌ری بۆ قوربانیان بده‌ستڤه‌ بهێت”.

ڕه‌شنڤیسا 20 خالی ژ بلی داخوازیا دانپێدانێ ب جینۆساید نیاسینا كۆمكوژیا كوردێن ئێزدی، داخوازێ ژ حوكمه‌تا ئه‌لمانیا دكه‌ت، ژ ئالیێ دارایی ڤه‌ پشته‌ڤانیا زڤرینا كوردێن ئێزدی یێن ئاواره‌ بۆ حهێن خوه‌ بكه‌ت كو ب گۆره‌ی نڤیسینگه‌ها ڕزگاركرنا ڕه‌ڤاندیێن ئێزدی، هه‌تا نوكه‌ 135 هزار و 860 ئاواره‌ ل كه‌مپێن دهۆكێ دژین و 189 هزار و 337 ئاواره‌یێن دی ل ده‌رڤه‌ی كه‌مپان ل ده‌ڤه‌رێن جودا ل هه‌رێما كوردستانێ دژین.

هه‌ر ل دۆر بڕیارا ب جینۆساید نیاسینا كۆمكوژیا كوردێن ئێزدی، میر حازم ته‌حسین به‌گ، میرێ كوردێن ئێزدی ڕاگه‌هاندبوو” ب جینۆساید نیاسینا كۆمكوژیا ئێزدیان ژ ئالیێ په‌رله‌مانێ ئه‌لمانیا ڤه‌ بۆمه‌ گه‌له‌گ یا گرنگه‌ و باوه‌رناكه‌م د 100 سالێن بۆری دا، د هیچ پرسه‌كێ دا 100% په‌رله‌مانتارێن ئه‌لمانیا د هه‌ڤڕا بوون”.