ئه‌ڤرۆ:

سه‌رۆكا فراكسیۆنا پارتی دیموكراتی كوردستان ل جڤاتا نوونه‌رێن ئیراقێ، ڤیان سه‌بری دووپاتكر كو محه‌مه‌د شیاع سودانی سه‌رۆك وه‌زیرێن ئیراقێ یێ پێگیره‌ بجهئینانا ڕێككه‌فتنا سیاسی ل گه‌ل هه‌رێما كوردستانێ.

حوكمه‌تا نوو یا ئیراقێ ل سه‌ر بنه‌مایێ، ڕێككه‌فتنا سیاسی دناڤبه‌را پارتی دیموكراتی كوردستان، ئێكه‌تی نیشتمانی كوردستان، هه‌ڤپه‌یمانیا سیاده‌ یا سوننی و چارچۆڤه‌یێ هه‌ماهه‌نگیێ یێ شیعی هاتیه‌ پێكئینان، ڤیان سه‌بری ل دۆر ڤێ چه‌ندێ دبێژیت” ب گۆره‌ی وێ ڕێككه‌فتنێ، به‌غدا هه‌ر بڕیاره‌كا ل دۆر هه‌رێما كوردستانێ بده‌ت، پێدڤیه‌ ب ڕازیبوونا هه‌رێما كوردستانێ بیت و ئه‌ڤه‌ ژی گه‌له‌ك یا گرنگه‌”.

سه‌رۆكا فراكسیۆنا پارتی ل جڤاتا نوونه‌رێن ئیراقێ گوت ژی” ل سالا بۆری جار سه‌رۆك وه‌زیرێن ئیراقێ یێ به‌رێ مسته‌فا كازمی بڕیار ددا، به‌لێ وه‌زاره‌ت هه‌بوو پێگیری پێ نه‌دكر، ب گۆره‌ی ڕێككه‌فتنا ڤێجارێ هه‌ر بڕیاره‌كا ل دۆر پرسێن دستووری وه‌كو بودجه‌، پێشمه‌رگه‌، ماده‌یێ 140 یێ دستووری و په‌ترۆلێ بهێته‌ دان، پێدڤیه‌ ڕازیبوونا هه‌رێما كوردستانێ ل سه‌ر هه‌بیت. پێگیریكرن ب وان بڕیاران گه‌له‌ك یا گرنگه‌ و سه‌قامگیریا ئیراقێ و حوكمه‌تێ گرێدای ڤێ چه‌ندێ یه‌”.

ڤیان سه‌بری ئاماژه‌كر” به‌ری ده‌مه‌كی مه‌ سه‌ره‌دانا سه‌رۆك وه‌زیرێن ئیراقێ محه‌مه‌د شیاع سودانی كربوو و سودانی پێگیریا خوه‌ بجهئینانا ڕێككه‌فتنا سیاسی دووپاتكربوو و هه‌موو وه‌زاره‌تێن حوكمه‌تا خوه‌ ژی ئاگه‌هداركرینه‌ كو د پێگیر بن ب وێ ڕێككه‌فتنێ”.

ئه‌ڤرۆ:

شیره‌تكارێ سه‌رۆكێ حوكمه‌تا هه‌رێما كوردستانێ بۆ كاروبارێن ده‌ڤه‌رێن كوردستانێ یێن ده‌رڤه‌ی ئیدارا هه‌رێما كوردستانێ ڕاگه‌هاند، بۆ بجهئینانا ماده‌یێ 140 پێدڤیه‌ ل گه‌ل وێ ڕێككه‌فتنا سیاسی ئه‌وا هاتیه‌ ئه‌نجامدان، پێرابوونێن دستووری بهێنه‌ وه‌رگرتن بۆ وێ ئێكێ ئه‌و ماده‌ بهێته‌ بجهئینان.

رێبوار تاله‌بانی، شیره‌تكارێ سه‌رۆكێ حوكمه‌تا هه‌رێما كوردستانێ بۆ كاروبارێن ده‌ڤه‌رێن كوردستانێ یێن ده‌رڤه‌ی ئیدارا هه‌رێما كوردستانێ، گوت” ئه‌و ب خوه‌ هه‌موو جاران ڕێككه‌فتنا سیاسی یا هاتیه‌ كرن بۆ وێ چه‌ندێ ماده‌یێ 140  بهێته‌ بجهئینان و لژنه‌یا وی ماده‌یێ دستووری بهێته‌ كاراكرن، به‌لێ پاشی نه‌هاتیه‌ بجهئینان، له‌وما یا پێدڤیه‌ ڤێجارێ كو لژنه‌ دهێته‌ كاراكرن، گاڤێن دستووری بهێنه‌ هاڤێتن، چونكه‌ گه‌له‌ك گیروبوویه‌ و پێدڤی بوو پێشتر ل دادگه‌ها دستووری سكالایێ تۆمار بكه‌ین، چونكه‌ نیه‌تێن حوكمه‌تێن ئیراقێ د باش نه‌بوون بۆ وێ چه‌ندێ ماده‌یێ 140 یێ دستووری بهێته‌ بجهئینان”.

رێبوار تاله‌بانی ئاماژه‌كر” هیڤیدارین د ڤێ كابینه‌یا نوو یا حوكمه‌تا ئیراقێ دا گاڤێن كریاری بهێنه‌ هاڤێتن بۆ وێ چه‌ندێ ماده‌یێ 140 یێ دستووری بهێته‌ بجهئینان و هه‌مان سیناریۆیێن حوكمه‌تێن پێشتر دووباره‌ نه‌بن، چونكه‌ كێشه‌ ب ته‌رخانكرنا 10 ملیار دیناران ناهێته‌ چاره‌سه‌ركرن و كێشه‌یا مه‌ كێشه‌یا ئه‌ردی یه‌ كو 100 ساله‌ خه‌بات بۆ دهێته‌ كرن، له‌وما نابیت ب 10 ملیار دیناران بهێینه‌ سه‌ردابرن، چونكه‌ پێدڤی بوو ماده‌یێ 140 یێ دستووری ل سالا 2007 هاتبا بجهئینان”.

ناڤبری ڕۆهنكر ژی” پێدڤیه‌ د چارچۆڤه‌یێ ڕێككه‌فتنا سیاسی ل دۆر بجهئینانا ماده‌یێ 140 پێرابوونێن دستووری بهێنه‌ وه‌رگرتن بۆ وێ چه‌ندێ بهێته‌ بجهئینان، چونكه‌ گه‌له‌ك جاران ڕێككه‌فتن یا هاتیه‌ كرن و نه‌هاتیه‌ بجهئینان، به‌لێ هه‌كه‌ دستوور بهێته‌ بجهئینان وی ده‌می دێ ماده‌ییچ 140 ژی هێته‌ بجهئینان”.

ئه‌ڤرۆ:

ده‌زگه‌هێن راگه‌هاندنا ئه‌مریكا دیار دكه‌ن كو بێی كوردان چو هێزه‌ك نه‌شێت ل توركیا بهێته‌ سه‌ر ده‌ستهه‌لاتێ، چونكی رێژه‌یا ده‌نگده‌رێن كورد ل توركیا گه‌له‌ك زێده‌ بوویه‌ و ل ئالیێ دی ئێدی كورد ل توركیا وه‌كو سالێن بۆری سه‌ره‌ده‌ریێ ل گه‌ل روودانێن سیاسی ناكه‌ن، هه‌ر هێزه‌ك پشته‌ڤانیێ ل مافێن كوردان نه‌كه‌ت نه‌شێت ل توركیا ببیته‌ ده‌ستهه‌لاتدار.

رۆژناما واشنتۆن پۆست یا ئه‌مریكی د راپۆرته‌كێ دا به‌حسێ هندێ كریه‌ كو توركیا به‌ر ب هه‌لبژارتنان ڤه‌ دچیت و هه‌ر ژ نها ڤه‌ هێزێن سیاسی یێن توركیا به‌حسێ كوردان دكه‌ن، ئه‌و یه‌ك ژی نیشا دده‌ت كو هه‌م پارتا ده‌ستهه‌لاتدار و هه‌م ژی پارتێن ئۆپۆزسیۆنێ هه‌ست ب هندێ كرینه‌ كو ئێدی نه‌شێن بێی كوردان ل توركیا ببنه‌ ده‌ستهه‌لاتدار، كورد ل توركیا هێزه‌كا گه‌له‌ك كاریگه‌رن و هه‌لبژارتنێن هه‌ری دووماهیێ یێن باژێرڤانیان ل توركیا ژی سه‌لماند كو هه‌ر هێزه‌كا سیاسی ل توركیا دژبه‌ریا كوردان بكه‌ت نه‌شێت بهێته‌ سه‌ر ده‌ستهه‌لاتێ، ژ به‌ر هه‌لوه‌ستێ خراب یێ ئاكپارتیێ ل دژی كوردان د هه‌لبژارتنێن هه‌ری دووماهیێ یێن باژێرڤانیان دا كوردان پشته‌ڤانی ل به‌ربژارێن پارتا كۆماری كرن و ژ به‌ر هندێ ژی چه‌ندین باژێرێن هه‌ری گرنگ یێن توركیا ژ ده‌ستهه‌لاتێ ئاكپارتیێ ده‌ركه‌فتن و ژ به‌ر هندێ ژی نها ئاكپارتیێ نه‌ڤێت هه‌مان ئه‌زموون ل هه‌لبژارتنان بهێت دووباره‌ ببن.

رۆژناما نیویورك تایمز ژی د راپۆرته‌كێ دا ئاماژه‌ ب هندێ كریه‌ كو كوردێن توركیا نها هشیار بووینه‌ و ناخوازن وه‌كو سالێن بۆری ده‌نگێ خوه‌ بده‌نه‌ وێ پارتێ كو به‌ره‌ڤانیێ ژ مافێن وان نه‌كه‌ت، ژ به‌ر هندێ ژی نها رێژه‌یا پشته‌ڤانیا كوردان بۆ ئاكپارتیێ گه‌له‌ك كێم بوویه‌، ئۆپه‌راسیۆنێن توركیا ل ده‌ڤه‌رێن سنۆری یێن هه‌رێما كوردستانێ، ئێرشێن به‌رده‌وام یێن توركیا بۆ سه‌ر رۆژئاڤایێ كوردستانێ و ده‌سته‌سه‌ركرنا سیاسه‌تمه‌دارێن كورد ل توركیا وه‌سا كریه‌ كو ئێدی كورد ل توركیا وه‌كو به‌رێ پشته‌ڤانیێ ل ئاكپارتیێ ناكه‌ن، لێ د هه‌مان ده‌می دا ئاكپارتی باشتر ژ هه‌موو پارتێن دی یێن سیاسی ل توركیا دزانیت كو بێی پشته‌ڤانیا كوردان نه‌شێت بهێته‌ سه‌ر ده‌ستهه‌لاتێ، ژ به‌ر هندێ ژی دبیت ئه‌ردۆغان هه‌لوه‌ستێ خوه‌ ل هه‌مبه‌ر كوردان نه‌رم بكه‌ت.

گه‌له‌ك مالپه‌ر و ئاژانسێن ده‌نگوباسان ژی به‌حسێ هه‌لبژارتنێن ئه‌ڤساله‌ ل توركیا دكه‌ن و ئاماژه‌ ب هندێ دكه‌ن كو ئه‌ردۆغان و پارتا وی بێی كوردان نه‌شێن جاره‌كا دی ل توركیا بهێنه‌ سه‌ر ده‌ستهه‌لاتێ، ژ به‌ر هندێ ژی دبیت ئه‌ردۆغان هه‌لوه‌ستێ خوه‌ ل هه‌مبه‌ر كوردان نه‌رم بكه‌ت یان ژی د سیاسه‌تا ده‌رڤه‌ دا ده‌ست ب هنده‌ك گوهۆرینان بكه‌ت، چونكی نها ژ بلی رۆسیا وه‌لاتێن دی یێن زلهێز پشته‌ڤانیێ ل مانا ئه‌ردۆغانی ل ده‌ستهه‌لاتێ‌ ناكه‌ن و ئه‌و یه‌ك ژی دشێت ببیته‌ ئه‌گه‌رێ روودانا ئالۆزیێن نوو و ره‌وشا هه‌ی بۆ ئه‌ردۆغانی و پارتا وی دژورارتر لێ بكه‌ت.

ئه‌و یه‌ك د ده‌مه‌كێ دایه‌ كو دوهی فه‌هیم تاشته‌كین ڤه‌كۆله‌رێ ناڤدارێ توركیا ژی راگه‌هاند كو نها ئه‌ردۆغان ل سه‌ر چه‌ندین خالان كار دكه‌ت و ئارمانجا سه‌ره‌كی یا ئه‌ردۆغانی ئه‌وه‌ دا كو جاره‌كا دی ببیته‌ سه‌رۆك كۆمارێ توركیا، چونكی ئه‌ردۆغان باش دزانیت هه‌كه‌ ره‌وش وه‌كو نها بیت كورد پشته‌ڤانیێ لێ ناكه‌ن، د هه‌مان ده‌می دا ژ به‌ر هه‌لوه‌ستێ توند یێ ئه‌ردۆغانی ل هه‌مبه‌ر كوردان و هه‌روه‌سا هه‌ڤپه‌یمانیا ئاكپارتیێ ل گه‌ل پارتا بزاڤا نه‌ته‌وه‌په‌رست كورد گه‌له‌ك ژ ئاكپارتیێ و ئه‌ردۆغانی تووره‌ نه‌، ئه‌ردۆغان باش دزانیت هه‌كه‌ ده‌ست ب هنده‌ك گوهۆرینان د سیاسه‌تا ناڤخوه‌یی و ده‌رڤه‌ دا نه‌كه‌ت نه‌شێت د هه‌لبژارتنان دا سه‌ركه‌ڤیت.

ناڤهاتی ئه‌و یه‌ك ژی دیار كریه‌ كو ئه‌ردۆغانی دڤێت د پێنگاڤا ئێكێ به‌ری هه‌لبژارتنان بابه‌تێ په‌نابه‌رێن سووری ئێكلا بكه‌ت، ژ به‌ر هندێ ژی ده‌مه‌كه‌ ئه‌ردۆغان بزاڤا هندێ دكه‌ت ل گه‌ل رژێما سووریێ ده‌ست ب دانوستاندنان بكه‌ت و كۆمبوونا ئێكێ ژی د ناڤبه‌را وه‌زیرێن به‌ره‌ڤانیێ یێن هه‌ر دو وه‌لاتان ب پشكداریا رۆسیا برێڤه‌ چوو و به‌رپرسێن توركیا گه‌شبینیا خوه‌ بۆ هندێ دیار دكه‌ن كو دێ كۆمبوونێن ل گه‌ل شامێ به‌رده‌وام بن، چونكی ئه‌ردۆغان و ده‌ستهه‌لاتا نها دخوازن هه‌م بابه‌تێ په‌نابه‌رێن سووری چاره‌سه‌ر بكه‌ن و هه‌م ژی ل گه‌ل سووریێ پێكڤه‌ كار بۆ نه‌مانا ده‌ستهه‌لاتا كوردی بكه‌ن، هه‌كه‌ ئه‌ردۆغان بشێت كاره‌كێ وه‌سا بكه‌ت وی ده‌می دێ وه‌كو كارته‌كێ ل دژی ئۆپۆزسیۆنێ بكار ئینیت و بێگومان هه‌كه‌ ئه‌ردۆغان سه‌ركه‌فتی بیت دێ شێت جاره‌كا دی رێژه‌كا باش ژ ده‌نگێن نه‌ته‌وه‌په‌رستان بده‌ستڤه‌ بینیت، ژ به‌ر هندێ ژی هه‌ڤدیتنێن د ناڤبه‌را سووریێ و توركیا دا بۆ ئه‌ردۆغانی و پارتا وی گه‌له‌ك گرنگن.

ئه‌ڤرۆ:

سه‌رۆكێ هه‌رێما كوردستانێ، نێچیرڤان بارزانی، ب هه‌لكه‌فتا سالا زایینی یا نوو 2023 په‌یامه‌ك به‌لاڤكر و ئه‌ڤه‌ ده‌قێ وێ یه‌.

سالا زایینی یا نوو ل مالباتێن سه‌ربلندێن شه‌هیدان، پێشمه‌رگێن قه‌هره‌مان و هێزێن ئه‌منی، ل هه‌موو گه‌لێ كوردستانێ و ئیراقێ و جیهانێ پیرۆز دكه‌م. هیڤیدارم سالا بده‌ستڤه‌ئینانا هیڤیان و سه‌ركه‌فتنێ، نه‌مانا شه‌ڕو ئالۆزی و په‌تا و نه‌خوه‌شیان بیت، ئارامی و ئاسایش و سه‌قامگیری، ل سه‌ر هه‌موو مرۆڤایه‌تیێ دا زال ببیت.

پێدڤیه‌ به‌رژه‌وه‌ندیا گه‌لێ كوردستانێ، ئارمانجا سه‌ره‌كی یا هه‌موویان بیت. بلا د گه‌ل ده‌ستپێكرنا سالا نوو دا، ئێكڕێزی، ته‌بایی، پێكڤه‌بوون، هه‌ڤدوقه‌بوولكرن و هاریكاریا هه‌ڤپشك، بكه‌ینه‌ به‌رپه‌ره‌كێ نوو یێ په‌یوه‌ندیێ د ناڤبه‌را هێز و ئالیێن سیاسی و هه‌موو پێكهاته‌یێن هه‌رێما كوردستانێ د. پێكڤه‌ كار بكه‌ین بۆ پاراستن و مسۆگه‌ركرنا مافێن دستووری و فیدرالی و چاره‌سه‌ركرنا كێشه‌یان ل گه‌ل حوكمه‌تا فیدرالی یا ئیراقێ ل سه‌ر بنه‌مایێ دستووری.

دووپات دكه‌ین كو هه‌رێما كوردستانێ دێ ئه‌رك وبه‌رپرسیاره‌تیا هه‌ڤپشك یا خوه‌ بجه ئینیت و وه‌كو به‌رده‌وام دێ فاكته‌رێ ئارامیێ و سه‌قامگیریێ بیت، بۆ هه‌موو هاریكاریه‌كێ ژی یا به‌رهه‌ڤه‌ ژ پێخه‌مه‌ت به‌رهنگاریا ئاسته‌نگان و چاره‌سه‌ركرنا كێشه‌یێن وه‌لاتی، بۆ بده‌ستڤه‌ئینانا ئارامیێ و سه‌قامگیریا سیاسی و ئه‌منی ل ئیراقێ، ب شێوه‌یه‌كی ماف و شایستێن هه‌موو پێكهاته‌یێن وه‌لاتی د پاراستی بن.

ل گه‌ل وه‌لاتێن ڕه‌خوده‌ور و ده‌ڤه‌رێ و دۆستان و هه‌ڤپه‌یمانیا نێڤده‌وله‌تی، په‌یوه‌ندیێن خوه‌ پێشڤه‌ببه‌ین ل سه‌ر بنه‌مایێ ڕێز ل هه‌ڤدو گرتن و به‌رژه‌وه‌ندیا هه‌ڤپشك، ل هاریكاریا هه‌ڤپشك ژی دێ به‌رده‌وام بین بۆ به‌رهنگاریا مه‌ترسیێن تیرۆرێ و نه‌هێلانا تیرۆرستان، دێ پێكڤه‌ كاركه‌ین بۆ چه‌سپاندنا ئاشتیێ و ئارامیێ و سه‌قامگیریێ.

دێ كاركه‌ین بۆ باشتركرنا ژیانا وه‌لاتیان، بۆ زێده‌تر ب هێزكرنا پێكڤه‌ژیانێ، لێبۆرینێ، پاراستنا دیموكراسیه‌تێ، مافێن مرۆڤی، ئێكسانیێ و ئازادیان. ب ئۆمێد و گه‌شبینی دنێرینه‌ سالا نوو و پاشه‌ڕۆژێ. هیڤیا ساخله‌میه‌كا باش، سه‌ركه‌فتنێ بۆ هه‌موویان دخوازم.

ئه‌ڤرۆ:

سه‌رۆك وه‌زیرێن هه‌رێما كوردستانێ، مه‌سرور بارزانی ب هه‌لكه‌فتا سه‌رێ سالا زایینی یا نوو 2023 په‌یامه‌ك به‌لاڤكر و تێدا پیرۆزباهی” ل وه‌لاتیێن هه‌رێما كوردستانێ ب تایبه‌تی پێشمه‌رگێن قه‌هره‌مان و هێزێن ئاسایشا ناڤخوه‌یی و مالبات و كه‌سوكارێن سه‌ربلندێن شه‌هیدێن، هه‌روه‌سا گه‌لێن ئیراقێ و جیهانێ” كر.

سه‌رۆك وه‌زیرێن هه‌رێما كوردستانێ د په‌یاما خوه‌ دا گوت ژی” سه‌ره‌رای سنورداركرنا شیانێن به‌رده‌ستێن حوكمه‌تێ، به‌لێ ل 2022 شیاین ب هاریكاریا كه‌رتێ تایبه‌ت چه‌ندین پرۆژه‌یێن جۆرا و جۆر دبوارێن ڕێ و پران، چاندنێ، پیشه‌سازی و ب دیجیتالكرنا خزمه‌تگوزاریان ئه‌نجام بده‌ین” گوت ژی” د بوارێ دیپلۆماسی و پێشڤه‌برنا په‌یوه‌ندیێن مه‌ ل گه‌ل وه‌لاتێن ئه‌ره‌بی و ده‌ڤه‌رێ و ئورۆپا، ساله‌كا به‌رهه‌مدار بوو”.

مه‌سرور بارزانی دیاركر ژی” د ده‌مه‌كی دا هه‌رێما كوردستانێ فاكته‌ره‌كێ ئارامی و سه‌قامگیریێ بوو ل ئیراقێ و ده‌ڤه‌رێ و هیچ ده‌مه‌كی جهێ گه‌فان نه‌بوو بۆ هیچ ئالیه‌كی. به‌لێ ل 2022 ڕوو ب ڕوویێ چه‌ندین هێرش و گه‌فان بووین”.

هه‌روه‌سا ئاماژه‌كر”هیڤیدارین سالا نوو ئاسایش و سه‌قامگیریا ئیراقێ وهه‌رێما كوردستانێ  و ده‌ڤه‌رێ ب گشتی یا پاراستی و جهگیر بیت و كێشه‌یێن د ناڤبه‌را هه‌رێما كوردستانێ و حوكمه‌تا فیدرالی دا ل سه‌ر بنه‌مایێ دستووری و ب شێوه‌یه‌كێ بنه‌ره‌تی چاره‌سه‌ر ببن”.

سه‌رۆك وه‌زیرێن هه‌رێما كوردستانێ سه‌قامگیریا ئیراقێ و هه‌رێما كوردستانێ ب گرنگ دزانیت بۆ وێ چه‌ندێ بشێن” درێژیێ ب پرۆسه‌یا چاكسازیان و خزمه‌تكرنا زێده‌تر یا خه‌لكێ كوردستانێ” بكه‌ن و دبێژیت” ب هیڤی نه‌ هه‌موو ئالیه‌ك به‌رژه‌وه‌ندیا نیشتمانی بێخینه‌ سه‌ر هه‌موو به‌رژه‌وه‌ندیێن دی و ڕێزێ ل سه‌روه‌ریا قانوونێ بگرین”.

ئه‌ڤرۆ:

د سالا 2022 دا، هه‌ژماره‌كا ڕوودانان ل هه‌رێما كوردستانێ ڕوودان كو هنده‌ك ژوان ل سه‌ر ئاستێ ناڤخوه‌ و هنده‌ك ژی ل سه‌ر ئاستێ نێڤده‌وله‌تی كارڤه‌دانێن جودا جودا بۆ هه‌بوون.

ڕۆژا 16 كانوونا دویێ 2022، پێله‌كا به‌فربارینێ هه‌رێما كوردستانێ ڤه‌گرت و بۆ ده‌مێ چار ڕۆژان به‌رده‌وام بوو، ژ ئه‌گه‌رێ نزمبوونا پله‌یێن گه‌رمێ چه‌ند ڕۆژان بۆ بێهنڤه‌دان.

ڕۆژا 25 كانوونا دویێ 2022، سه‌رۆك وه‌زیرێن هه‌رێما كوردستانێ، مه‌سرور بارزانی ب سه‌ره‌دانه‌كا ئێك ڕۆژی گه‌هشته‌ (ئه‌بو زه‌بی) پایته‌ختێ ئیمارات و ل گه‌ل جهنشینێ ئه‌بوزه‌بی و جێگرێ فه‌رمانده‌یێ بلند یێ هێزێن چه‌كدار ل ئیمارات  محه‌مه‌د بن زاید كۆمبوو و په‌یوه‌ندیێن د ناڤبه‌را ئیمارات و ئیراقێ و هه‌رێما كوردستانێ هاتنه‌ باسكرن.

ڕۆژا 15 شوباتا 2022، سه‌رۆك وه‌زیرێن هه‌رێما كوردستانێ، مه‌سرور بارزانی ب داخوازنامه‌یه‌كا فه‌رمی یا میرێ قه‌ته‌ر، شێخ ته‌میم بن حه‌مه‌د ئال سانی سه‌ره‌دانا ده‌وحه‌ كر و ل گه‌ل مه‌زنه‌ به‌رپرسێن وی وه‌لاتی كۆمبوو.

ڕۆژا 18 شوباتا 2022، هه‌ر ئێك ژ سه‌رۆكێ هه‌رێما كوردستانێ، نێچیرڤان بارزانی و سه‌رۆك وه‌زیرێن هه‌رێما كوردستانێ، مه‌سرور بارزانی د چارچۆڤه‌یێ بڕێڤه‌چوونا كۆنفرانسێ ئاسایشێ ل میونخ ل ئه‌لمانیا ل گه‌ل سكرتێرێ گشتیێ نه‌ته‌وه‌یێن ئێكگرتی، ئه‌نتۆنیۆ گۆتیرێس كۆمبوون و هه‌ردوئالیان دووپاتی ل وێ چه‌ندێ كر كو هێشتا داعش مه‌ترسیه‌كا ڕاسته‌قینه‌یه‌ و ل ئیراقێ و سووریێ گه‌فان ل ئارامیێ و سه‌رقامگیریێ دكه‌ت.

ڕۆژا 24 شوباتا 2022، سه‌رۆكێ هه‌رێما كوردستانێ، نێچیرڤان بارزانی بڕیاردا ل ڕۆژا ئێكێ چریا ئێكێ 2022 پرۆسه‌یا هه‌لبژارتنێن په‌رله‌مانێ كوردستانێ بهێته‌ ئه‌نجامدان.

ڕۆژا 13 ئادارا 2022، هێرشه‌كا مووشه‌كی ل سه‌ر هه‌ولێرێ هاته‌ كرن و د وێ هێرشێ دا، مالا ڕێڤه‌به‌رێ كۆمپانیا كار، شێخ باز به‌رزنجی بوو ئارمانج و پاشی له‌شكرێ پاسدارێن ئیرانێ به‌رپرسیاره‌تیا خوه‌ ژ ئه‌نجامدانا وێ هێرشێ ڕاگه‌هاند.

ڕۆژا 14 ئادارا 2022، سه‌رۆك وه‌زیرێن ئیراقێ، مسته‌فا كازمی ب مه‌به‌ستا سه‌ره‌دانا جهێ هێرشا مووشه‌كی ل سه‌ر هه‌ولێرێ سه‌ره‌دانا هه‌رێما كوردستانێ كر و ل گه‌ل سه‌رۆك وه‌زیرێن هه‌رێما كوردستانێ، مه‌سرور بارزانی كۆمبوو و پاشی سه‌ره‌دانا جهێ توپبارانكرنێ كر.

ڕۆژێن 27 – 28 ئادارا 2022، كۆربه‌ندێ جیهانیێ وزێ ل باژێرێ ئه‌بو زه‌بی ل ئیمارات هاته‌ گرێدان، چه‌ندین به‌رپرس و شاره‌زایێن بوارێ وزێ تێدا پشكدار بوون و سه‌رۆك وه‌زیرێن هه‌رێما كوردستانێ، مه‌سرور بارزانی ئێك بوو ژ ئاخڤتنكه‌رێن سه‌ره‌كی یێن كۆربه‌ندی.

ڕۆژا 1 گۆلانا 2022، هێرشه‌كا مووشه‌كی ل سه‌ر پالاوگه‌ها كه‌ورگۆسك ل قه‌زا خه‌بات ل ڕۆژئاڤایێ هه‌ولێرێ هاته‌ ئه‌نجامدان.

ڕۆژا 21 گۆلانا 2022،  سه‌رۆك وه‌زیرێن هه‌رێما كوردستانێ، مه‌سرور بارزانی ب مه‌به‌ستا پشكداریكرنێ د كۆربه‌ندێ جیهانیێ داڤۆس دا، به‌ر ب وه‌لاتێ سویسرا بڕێكه‌فت و ل وێرێ چه‌ندین دیدار وكۆمبوون ل گه‌ل به‌رپرسێن بلند یێن وه‌لاتان ئه‌نجامدان.

ڕۆژا 26 خزیرانا 2022، هێرشه‌ك ل سه‌ر ژێرخانه‌یا گشتی و ده‌زگه‌هێن په‌ترۆلێ و غازێ ل هه‌رێما كوردستانێ هاته‌ ئه‌نجامدان.

ڕۆژا 30 خزیرانا 2022، سه‌رۆك وه‌زیرێن هه‌رێما كوردستانێ، مه‌سرور بارزانی فه‌رمانا داخستنا هه‌موو جهێن فرۆتنا چه‌كی ل هه‌رێما كوردستانێ ده‌ركر.

ڕۆژا 28 ئیلۆنا 2022، ب ڕێیا مووشه‌ك و درۆنان ئیرانێ هێرش كره‌ سه‌ر حزبێن ئۆپۆزسیۆنا ئیرانی ل قه‌زا كۆیه‌ یا سه‌ر ب پارێزگه‌ها هه‌ولێرێ و ناحیا پردێ یا سه‌ر ب پارێزگه‌ها كه‌ركووكێ و گوندێ زڕگوێز ل ناحیا تانجه‌ڕۆ یا سه‌ر ب پارێزگه‌ها سلێمانیێ كو د ئه‌گه‌ر دا هه‌ژماره‌كا مه‌زن یا قوربانیان كه‌فتن و هنده‌ك جه ژی ب ته‌مامی وێران بوون.

ڕۆژا 7 چریا ئێكێ 2022، ل تاخێ سه‌ربه‌ستی ل باژێرێ هه‌ولێرێ ب ڕێیا بۆمپه‌كا چاندی ب ترۆمبێله‌كێ ڤه‌ عه‌قید هاوكار جاف بوو ئارمانج و د ئه‌نجامدا ژیانا خوه‌ ژده‌ستدا و چه‌ند كه‌س ژ خێزانا وی بریندار بوون.

ڕۆژا 9 چریا ئێكێ 2022، په‌رله‌مانێ كوردستانێ ب پتریا ده‌نگێن په‌رله‌مانتاران، ژیێ ڤێ خۆلا په‌رله‌مانی هه‌تا دووماهیا وه‌رزێ قانوون دانانێ یا خۆلا پائیزی كو دبیته‌ دووماهیا سالا 2023 درێژكر.

ڕۆژا 28 چریا ئێكێ 2022، كابینه‌یا حوكمه‌تا ئیراقا فیدرال ب سه‌رۆكایه‌تیا محه‌مه‌د شیاع سودانی ل جڤاتا نوونه‌رێن ئیراقێ ده‌نگ پێ هاته‌ دان.

ڕۆژا 3 چریا دویێ 2022، كۆنگره‌یێ 14 یێ پارتی دیموكراتی كوردستان ل باژێرێ دهۆكێ ده‌سپێكر و د ئێكه‌م ڕۆژدا، سه‌رۆك مه‌سعود بارزانی ب سه‌رۆكێ پارتی دیموكراتی كوردستان هاته‌ هه‌لبژارتن و هه‌ر ئێك ژ نێچیرڤان بارزانی و مه‌سرور بارزانی ب جێگرێن سه‌رۆكێ پارتی دیموكراتی كوردستان هاتن هه‌لبژارتن.

ڕۆژا 14 چریا دویێ 2022، بۆ جارا دویێ ئیرانێ هێرشا مووشه‌كی ل سه‌ر حزبێن ئۆپۆزسیۆنا ئیرانی ل قه‌زا كۆیه‌ سه‌ر ب پارێزگه‌ها هه‌ولێرێ ڤه‌ ئه‌نجامدا.

ڕۆژا 17 چریا دویێ 2022، ژ ئه‌نجامێ ته‌قینا سیسته‌مێ غازێ (LPG) ل ئێك ژ مالێن تاخێ كازیوه‌ ل باژێرێ سلێمانیێ 15 كه‌سان ژیانا خوه‌ ژده‌ستدا و 12 كه‌سێن دی ژی بریندار بوون.

ڕۆژێن 21 – 22 چریا دویێ 2022، ئیرانێ ب ڕێیا مووشه‌ك و درۆنان هیرش ل سه‌ر حزبێن ئۆپۆزسیۆنا ئیرانی ل قه‌زا كۆیه‌ یا سه‌ر ب پارێزگه‌ها هه‌ولێرێ ڤه‌ ئه‌نجامدا و د ئه‌گه‌ردا ترس دناڤ ئاكنجیێن وێ ده‌ڤه‌رێ دا دروستكر و ئاكنجیێن گوندێ هه‌رمۆته‌ كو كریستیانن گوند چۆلكر.

ڕۆژا 27 چریا دویێ 2022، شانده‌كێ حوكمه‌تا هه‌رێما كوردستانێ ب مه‌به‌ستا دانوستاندن و ڕێككه‌فتنێ ل سه‌ر بودجه‌ی و شایستێن دارایی سه‌ره‌دانا به‌غدا كر كو ئێكه‌م سه‌ره‌دان بوو پشتی پێكئینانا كابینه‌یا نوو یا حوكمه‌تا ئیراقێ ب سه‌رۆكایه‌تیا محه‌مه‌د شیاع سودانی.

ڕۆژا 9 كانوونا ئێكێ 2022، سه‌رۆكا هنگاریا، كاتالین نۆڤاك سه‌ره‌دانا هه‌رێما كوردستانێ كر ود ده‌مێ دو ڕۆژێن مانا وێ دا ل هه‌ولێرێ، ل گه‌ل به‌رپرسێن هه‌رێما كوردستانێ كۆمبوو و پاشی سه‌ره‌دانا هێزێن هنگاری كر كو د چارچۆڤه‌یێ هه‌ڤپه‌یمانیا نێڤده‌وله‌تی یا دژی داعشێ ل هه‌رێما كوردستانێ و ئیراقێ هاتینه‌ جهگیركرن.

ڕۆژا 23 كانوونا دویێ 2022، سه‌رۆكا وه‌زیرێن ئیتالیا، جۆرجیا میلۆنی ب ڕێیا فرۆكخانه‌یا نێڤده‌وله‌تی یا هه‌ولێرێ گه‌هشته‌ هه‌رێما كوردستانێ، پشتی كۆمبوونێ ل گه‌ل به‌رپرسێن بلند یێ هه‌رێما كوردستانێ، سه‌ره‌دانا هێزێن وه‌لاتێ خوه‌ كر كو د چارچۆڤه‌یێ هێزێن هه‌ڤپه‌یمانیا نێڤده‌وله‌تی یا دژی داعشێ ل هه‌رێما كوردستانێ خزمه‌تێ دكه‌ن.

ڕۆژا 26 كانوونا ئێكێ 2022، ژ ئه‌گه‌رێ كێمبوونا به‌رچاڤكرنا دۆلاری ژ ئالیێ به‌نكا ناڤه‌ندی یا ئیراقێ ڤه‌، بهایێ 100 دۆلاران ل بازارێن هه‌رێما كوردستانێ گه‌هشته‌ ئاستێ 157 هزار و 500 دینارێن ئیراقی و ئه‌ڤه‌ جارا ئێكێ یه‌ د ده‌مێ 20 سالێن بۆری دا بهایێ دۆلاری بگه‌هیته‌ وی ئاستی ل به‌رامبه‌ر دینارێ ئیراقی.

ئه‌ڤرۆ:

ده‌زگه‌هێن راگه‌هاندنا ئۆرۆپا به‌حسێ كۆمبوونا سێ قۆلی یا د ناڤبه‌را رۆسیا، توركیا و سووریێ دا دكه‌ن و دیار دكه‌ن كو رۆسیا دڤێت جاره‌كا دی شام حوكمێ ل هه‌موو سووریێ بكه‌ت و ل هه‌مبه‌ر دا توركیا ژی به‌رهه‌ڤه‌ ب مه‌رجێ نه‌مانا رێڤه‌به‌ریا خوه‌سه‌ر پشته‌ڤانیێ ل شامێ بكه‌ت.

ئاژانسا دویچه‌ یا ئه‌لمانی د راپۆرته‌كێ دا به‌حسێ كۆمبوونا حه‌فتیا بۆری یا د ناڤبه‌را هه‌ر سێ وه‌لاتێن رۆسیا، توركیا و سووریێ كریه‌ و د راپۆرتێ دا هاتیه‌ دیار كرن كو توركیا به‌ری نها گه‌له‌ك بزاڤ كرن كو رێڤه‌به‌ریا كوردان ل باكورێ سووریێ ژناڤ ببه‌ت و گرۆپێن سه‌ر ب ئه‌نقه‌ره‌ ل وان ده‌ڤه‌ران بجه بكه‌ت، لێ رۆسیا ب ته‌مامی ل دژی پیلانا توركیا بوو و ژ به‌ر هندێ ژی نها توركیا كار ل سه‌ر ستراتیژیه‌كا نوو بكه‌ت كو ئه‌و یه‌ك د به‌رژوه‌ندیا رۆسیا و شامێ دایه‌، توركیا به‌رهه‌ڤه‌ هه‌موو هێزێن خوه‌ ژ ئاخا سووریێ ڤه‌كێشیت و ده‌ست ژ پشته‌ڤانیا گرۆپێن چه‌كدار به‌رده‌ت ب مه‌رجه‌كێ شام ژی به‌رهه‌ڤ بیت چه‌ند ملیۆن په‌نابه‌رێن سووری وه‌ربگریت و رێڤه‌به‌ریا خوه‌سه‌ر ژناڤ ببه‌ت.

ئاژانسا فرانس پرێس ژی د راپۆرته‌كێ دا دیار كریه‌ كو مه‌ترسیێن گه‌له‌ك مه‌زن ل سه‌ر كوردان ل سووریێ هه‌نه‌، چونكی رۆسیا و توركیا دخوازن شام هه‌موو ده‌ڤه‌رێن ل ژێر كۆنترۆلا رێڤه‌به‌ریا خوه‌سه‌ر كۆنترۆل بكه‌ت و ژ بۆ رۆسیا نها گه‌له‌ك گرنگه‌ كو شام بهێز كه‌ڤیت، هه‌روه‌سا توركیا ژی به‌رهه‌ڤه‌ هێزێن خوه‌ ژ ئاخا سووریێ ڤه‌كێشیت ب مه‌رجه‌كێ كو كوردان چو رۆل د پاشه‌رۆژا سووریێ دا نه‌بن، ژ به‌ر هندێ ژی كۆمبوونا حه‌فتیا بۆری كو د ناڤبه‌را سێ وه‌لاتێن رۆسیا، توركیا و سووریێ دا برێڤه‌ چوو دشێت مه‌ترسیێن خوه‌ یێن گه‌له‌ك مه‌زن ل سه‌ر كوردان ل سووریێ هه‌بیت.

ل ئالیێ دی گه‌له‌ك مالپه‌ر و ئاژانسێن نووچه‌یان ژی به‌حسێ هندێ كرینه‌ كو ئه‌مریكا هه‌تا نها ژی هه‌لوه‌سته‌ك ئه‌رێنی ژ بۆ پشته‌ڤانیا كوردان ل هه‌مبه‌ر پیلانێن رۆسیا، توركیا و شامێ دیار نه‌كریه‌ و ژ به‌ر هندێ ژی هێزێن سووریا دیموكرات كو د شه‌رێ ل دژی داعشێ دا ل سووریێ هه‌ڤپه‌یمانا سه‌ره‌كی یا ئه‌مریكا بوون ژ ره‌وشا نها دلگرانن، كورد وه‌سا دبینن كو هه‌ر رێككه‌فتنه‌ك د ناڤبه‌را رۆسیا، توركیا و سووریێ دا بهێته‌ كرن ئه‌و یه‌ك دێ ل دژی وان بیت.

چاڤدێرێن سیاسی ژی دیار دكه‌ن كو دڤێت كوردێن سووریێ د زووترین ده‌م دا ئێكه‌تیا خوه‌ دروست بكه‌ن، ب تایبه‌تی ژی دڤێت پارتێن كوردی یێن رۆژئاڤایێ كوردستانێ ل هه‌مبه‌ر هه‌ر مه‌ترسیه‌كێ د ئێكگرتی بن، چونكی مه‌ترسیێن گه‌له‌ك مه‌زن ل سه‌ر پاشه‌رۆژا كوردان ل سووریێ هه‌نه‌ و هه‌لوه‌ستێ لاواز یێ ئه‌مریكا ژی وه‌سا كریه‌ كو رۆسیا پشته‌ڤانیێ ل هه‌ر رێككه‌فتنه‌كێ بكه‌ت كو ژ بۆ بهێزكرنا شامێ بهێته‌ كرن، بێگومان هه‌ر رێككه‌فتنه‌كا وه‌سا ژی دێ بیته‌ مه‌ترسی لسه‌ر پاشه‌رۆژا كوردان ل سووریێ.

ئه‌ڤرۆ:

دوهی سێشه‌مبی 20 كانوونا ئێكێ 2022، سه‌رۆك مه‌سعود بارزانی پێشوازی ل كلاوس شترایشه‌ر، قونسۆلێ گشتیێ ئه‌لمانیا ل هه‌ولێرێ كر.

د دیداره‌كێ دا، بیر و بۆچوون ل دۆر ڕه‌وشا سیاسی یا ده‌ڤه‌رێ ب گشتی و ئیراقێ ب تایبه‌تی هاتنه‌ ئالوگۆركرن و باس ل په‌یوه‌ندیێن د ناڤبه‌را هه‌رێما كوردستانێ و به‌غدا و به‌رنامه‌یێ كارێ حوكمه‌تا نوو یا ئیراقێ هاته‌ كرن.

د وێ دیدارێ دا دووپاتی ل بجهئینانا ڕێككه‌فتنا د ناڤبه‌را حوكمه‌تا فیدرالی یا ئیراقێ و حوكمه‌تا هه‌رێما كوردستانێ دا ل دۆر شنگالێ هاته‌ كرن، ئه‌وژی بۆ زڤراندنا سه‌قامگیریێ بۆ ده‌ڤه‌رێ شنگالێ و دووماهیئنانا ڕه‌وشا ئاواره‌یێ یا خه‌لكێ شنگالێ و زڤراندنا وان بۆ جهێ باب و باپیرێن وان.

گه‌فێن تیرۆرێ ته‌وه‌ره‌كێ دی یێ وێ كۆمبوونێ بوو و قونسۆلێ ئه‌لمانیا ل هه‌ولێرێ ئه‌و چه‌نده‌ دووپاتكر كو وه‌لاتێ وی ل شه‌ڕێ دژی تیرۆرێ دێ هه‌ڤپشك و پشته‌ڤانێ هه‌رێما كوردستانێ و ئیراقێ مینیت و سه‌قامگیری و پێشكه‌فتنا هه‌رێما كوردستانێ بۆ ئه‌لمانیا جهێ گرنگیه‌كا تایبه‌ته‌.

هه‌ر د وێ دیدارێ دا سه‌رۆك بارزانی سوپاسیا حوكمه‌ت و گه‌لێ ئه‌لمانیا كر كو ل شه‌ڕێ دژی تیرۆرێ هاریكاریا گه‌لێ كوردستانێ كر و په‌یوه‌ندیێن د ناڤبه‌را گه‌لێ كوردستانێ و گه‌لێ ئه‌لمانیا ب دیرۆكی و دۆستانه‌ هه‌ژمارتن.