ئه‌ڤرۆنيوز:
پشتى زيده‌تر ژ دو سالان ژ دوورخستنا وى، رێباز حه‌ملان دوباره زڤرى سه‌ر پۆستێ خوه وه‌كو وه‌زيرێ دارايى وئابوورى ل هه‌رێما كوردستانێ.
ژێده‌ره‌كى ژ وه‌زاره‌تا دارايى وئابوورى ب رووداو راگه‌هاند” ئه‌ڤرۆ رۆژا چارشه‌مبى 13/12/2017، رێباز حه‌ملان وه‌كو كه‌سيا‌تيه‌كێ سه‌ربخوه ل پۆستێ وه‌زيرێ دارايى وئابوورى ده‌ست بكاربوو”.
رێباز حه‌ملان ل 18/9/2017 ژناڤا بزاڤا گۆران ده‌ركه‌فتبوو.
ئه‌ڤرۆنيوز:
وه‌زاره‌تا په‌روه‌ردێ ل هه‌رێما كوردستانێ برياردا كو ڤه‌گۆهاستنا ده‌واما مامۆستايان ژ باژيره‌كى بۆ باژێره‌كێ دى بهێته راگرتن.
وه‌زاره‌تا په‌روه‌ردێ ب نڤيسارا خوه يا هژمار(28512) دبێژيت” ب مه‌ره‌ما جهگيركرنا ميلاكى ونێزيكبوونا ئه‌زموونێن وه‌رزێ ئێكێ وپێدڤيا رێڤه‌به‌ريێن په‌روه‌ردان ب مامۆستا، ژ سه‌رێ ڤێ هه‌يڤێ ڤه ب چو شێوه‌كى نڤيسارێن ڤه‌گۆهاستنا ده‌واما مامۆستايان ژ باژێره‌كى بۆ باژێره‌كێ دى نه‌هێنه بلندكرن”.
ل دووڤ وێ نڤيسارێ، هه‌ر رێڤه‌به‌ريه‌كا په‌روه‌ردێ رازيبوونێ ل سه‌ر ڤه‌گۆهاستنا مامۆستايان بده‌ت، دێ به‌رپرسيار بيت.
ئه‌ڤرۆنيوز:
ل دووڤ داخوازا توركيا، نێچيرڤان بارزانى، سه‌رۆك وه‌زيرێن هه‌رێما كوردستانێ دێ ل ده‌مه‌كێ نێزيك سه‌ره‌دانا توركيا كه‌ت.
ئه‌ندامێ جڤاتا نوونه‌رين عيراقێ ژپارتى ديموكراتى كوردستان، ئيسلام حسێن راگه‌هاند” به‌رهه‌ڤيێن سه‌ره‌دانا نێچيرڤان بارزانى بۆ توركيا يێن تمام بووين بۆ كۆمبوونێ ل گه‌ل ئه‌ردۆگانى ومه‌زنه به‌رپرسێن توركى”.
وى په‌رله‌مانتارى زێده‌تر بۆ باسنيوز گۆت” ئه‌و پێزانينێن ل ده‌ف من هه‌ين ئاماژێ بۆ سه‌ره‌دانه‌كا نێزيك يا شانده‌كێ هه‌رێما كوردستانێ بۆ توركيا دده‌ن” گۆت ژى” ئه‌ڤ پێزانينه د فه‌رمى نينن”.
دياركر ژى” برياربوو كۆمبوونه‌ك دناڤبه‌را سه‌رۆكێ توركيا ره‌جه‌ب ته‌يب ئه‌ردۆگان وسه‌رۆ وه‌يزرێن هه‌رێما كوردستانێ نێچيرڤان بارزانى بهێت ئه‌نجامدان، به‌لێ ژبه‌ر سه‌ره‌دانا ئه‌ردۆگانى بۆ وه‌لاتێ يۆنانێ ئه‌و كۆمبوون نه‌هاته ئه‌نجامدان”.
ئه‌ڤرۆنيوز:
قوباد تاله‌بانى جێگرێ سه‌رۆك وه‌زيرێن هه‌رێما كوردستانێ، دداخۆيانيه‌كا ته‌له‌ڤزيۆنى دا ئاشكراكربوو كو فه‌رمانده هه‌يه خوه ب قه‌هره‌مان دزانيت، به‌لێ ل ده‌مێ هێرشێن ل سه‌ر كوردستانێ ژشه‌رێ دره‌ڤيت وچه‌كێن پێشمه‌رگه‌ى ل بازارێ ره‌ش دفرۆشيت.
گه‌له‌ك ژ ده‌زگه‌هێن راگه‌هاندنێ ل كوردستانێ، ئه‌و داخۆيانيا قوباد تاله‌بانى ب به‌رسڤه‌كا نه‌راسته‌وخوه يا ئاخڤتنێن مه‌حموود سه‌نگاوى ئه‌ندامێ مه‌كته‌با سياسى يا ئێكه‌تيێ كو قوباد ب نوونه‌ره‌كێ لاواز يێ ئێكه‌تيێ دحوكمه‌تێ هژمارتبوو.
ل دۆر وان تۆمه‌تێن قوباد تاله‌بانى ئاراسته‌كرين، نه‌قيبێ پارێزه‌رێن كوردستانێ، به‌ختيار حه‌يده‌ر، راگه‌هاند” پێدڤيه ئاخڤتنێن قوباد تاله‌بانى ب گرنگى بهێنه وه‌رگرتن، يا دياره مه‌ره‌ما وى كى يه، به‌لێ باشتره ناڤێن وان ئاشكرا بكه‌ت”.
به‌ختيارى زێده‌تر بۆ باسنيوز گۆت” پێدڤيه وه‌زاره‌تا پێشمه‌رگه‌ى ڤه‌كۆلينێ ل دۆر وى بابه‌تى بكه‌ت.
دياركر”دڤێت ڤه‌كۆلين ل گه‌ل هه‌ر كه‌سه‌كێ په‌يوه‌ندى ب وى بابه‌تى ڤه هه‌ى بهێته كرن ولژنه‌كا قانوونى بهێته دروستكرن”.
ئەڤرۆ نیوز، باسم قاسم شنگالێ
ئەڤرۆ چارشەمبێ رێکەفتی 13/12/2017، كه‌سه‌ك ل باكوورێ چيايێ شنگالێ هاته كوشتن وئێك ژى بريندار بوو ئێك ژى هاته به‌رزه‌كرن.
چالاكڤانێ مه‌ده‌نى سه‌عد حه‌مۆ بۆ ئه‌ڤرۆنيوز گۆت”ئه‌ڤرۆ ل ده‌مژمێر 12 نيڤرۆ ژلايێ هنده‌ك كه‌سێن نه‌نياس ڤه گوله ئاراسته‌ى سێ كوردێن ئێزدى يێن خه‌لكێ گۆندێ ( ته‌ل به‌نات) كرن ل باكوورێ چيايێ شنگالێ، دئه‌نجامدا ئێكى گيانێ خوه ژده‌ستدا وئێك ژى بريندار بوويه ويێ دى ژى يێ به‌رزه‌يه وهێشتا چ ژێ نه‌هاتيه زانين كا ل كيڤه‌يه”.
گۆت ژى” ئه‌و هه‌رسێ كه‌سه شڤان بوون ول به‌ر په‌زى بوون، له‌شێ ئه‌وێ هاتيه كوشتن ل گه‌ل يێ بريندار هاتينه ڤه‌گۆهاستن بۆنه‌خوه‌شخانا شنگال يا گشتى”.
ئه‌ڤرۆ نيوز:
كۆمبوونا په‌رله‌مانى و حوكمه‌تێ ب دووماهى هات و بڕيار دا راستڤه‌كرن د مووچان دا بهێنه كرن.
ئامانج ره‌حيم سكرتێرێ جڤاتا وه‌زيران پشتى كۆمبوونا حوكمه‌ت و په‌رله‌مانى د كۆنگره‌كێ رۆژنامه‌ڤانى يێ هه‌ڤپشك دا ل گه‌ل شێركو جه‌وده‌ت سه‌رۆكێ لژنا پێشه‌سازى و سامانێن سرۆشتى ل په‌رله‌مانێ كوردستانێ راگه‌هاند كو دێ پێداچوون د ده‌رماله و مووچێ خانه‌نشين و خانه‌نشينێن پله تايبه‌ت دا كه‌ن و سندوقا خانه‌نشينى ژى دێ هێته كارا كرن.
گۆتژى: “د كۆمبوونێ دا هه‌موو ئه‌گه‌ر ده‌رباره‌ى دابينكرنا بودجه و مووچه‌ى هاتنه گه‌نگه‌شه‌كرن”.
ئه‌ڤرۆ نيوز:
ئه‌ندامه‌كێ لژنا كاروبارێن پێشمه‌رگه‌ى ل په‌رله‌مانێ كوردستانێ راگه‌هاند كو مووچێ هه‌موو ليوايێن پێشمه‌رگه‌ى ل حوكمه‌تا هه‌رێمێ و وه‌زاره‌تا ناڤخۆ دێ هێته كێمكرن.
قادر ره‌زگه‌يى، ئه‌ندامێ لژنا پێشمه‌رگه‌ى ل په‌رله‌مانێ كوردستانێ بۆ خه‌ندان راگه‌هاند كو بريكارێ وه‌زاره‌تا دارايى كۆمبوون ل گه‌ل هێزێن 70 و 80 كريه و دێ ل گه‌ل وه‌زاره‌تا پێشمه‌رگه‌ى ژى كه‌ت، به‌حس ل چاوانيا كێمكرنا پاشكه‌فتێ مووچێ پێشمه‌رگه‌ى ل گه‌ل كه‌ت.
ئاماژه ب وێ چه‌ندێ ژى كر كو د كۆمبوونا ل گه‌ل هێزێن 70 يێن سه‌ر ب ئێكه‌تيێ بريكارێ وه‌زاره‌تا دارايى راگه‌هانديه كو بودجێ وه‌زاره‌ت و هێزێن 70 ژ 45 مليار ديناران دێ بۆ 28 مليار و 800 مليۆن ديناران هێته كێمكرن.
ب گۆتنا قادر ره‌زگه‌ى بريكارێ وه‌زاره‌تا دارايى گۆتيه فه‌رماندێ هێزێن 70: “هوون ب خوه مۆچه‌ى ببڕن و هه‌وه چاوان دڤێت وه‌سان، يا گرنگ ئه‌وه ليستا مۆچه‌ى ژ وى پاره‌ى پتر نه‌بيت يێ هاتيه دياركرن”.
گۆتژى: “ل گه‌ل هێزێن 80 يێن سه‌ر ب پارتى ژى روونشتى يه و دا كو رێژا ڤان هه‌ردو هێزان ديار نه‌بيت گۆتيه پارتى ژى كو ژ 36 مليار دينارێن وه‌زاره‌تێ دێ كه‌نه 22 مليار بۆ 23 ملياران بۆ هه‌موو ديوانا وه‌زاره‌تێ و ليوايێن هه‌ڤپشك”.
ره‌زگه‌ى روونژى كر كو هه‌موو ژمێرياريێن هێزان راسپاردينه بۆ بجهئينانا وان كێمكرنا، رێژا وێ ديار نينه كا دێ ژ سه‌دێ چه‌ند بيت، به‌لێ ره‌نگه 35% بهێته كێمكرن و هێزێن ئاسايشێ ژى 34.2 بهێته كێمكرن.
راگه‌هاند ژى كێمكرن هه‌موو هێزێن چه‌كدارێن ناڤخۆ ژى ب خوه ڤه دگريت كو 30% دێ هێته كێمكرن ژ پاسه‌وانێن سنورى ژى 65% بۆ 70% ل دووڤ پلان دێ هێته كێمكرن.
نه‌ڤه‌شارت ژى كو ب گۆره‌ى بڕيارا جڤاتا وه‌زيران هه‌ردو هێزێن زێره‌ڤانى و به‌ره‌ڤانى و ڤێراگه‌هشتن وه‌كو پێشمه‌رگه‌ى سه‌ره‌ده‌رى ل گه‌ل دهاته كرن و مووچێ وان ژى دێ وه‌كو پێشمه‌رگه‌ى هێته كێمكرن.
ئه‌ڤرۆ نيوز:
ئه‌ندامه‌كێ لژنا دارايى ل جڤاتا نوونه‌رێن عيراقێ راگه‌هاند كو ل عيراقێ د هه‌ر چركه‌يه‌كێ دا 263 دۆلار زيان ب خالێن سنورى و ده‌رگه‌هێن نڤێده‌وله‌تى دگه‌هيت و ئه‌گه‌رێ وێ ژى گه‌نده‌لى يه.
هه‌يسه‌م جبۆرى ئه‌ندامێ لژنا دارايى ل جڤاتا نوونه‌رێن عيراقێ د به‌ياننامه‌كێ دا راگه‌هاند كو ب هاريكاريا كه‌سانێن ده‌ست رێتى، به‌رپرسێن ده‌رگه‌هێن سنورى ده‌ست يێن د ناڤ گه‌نده‌ليێن مه‌زن دا هه‌ين و رابووينه ب ده‌ستكاريكرنا رێژه و كوالێتيا كه‌رستێن هاورده‌كرى و گۆڕينا كۆژمێ باجێ ل سه‌ر وان كه‌رستان.
هه‌ر ديسا ئاماژه ب وێ چه‌ندێ ژى كريه كو ئه‌و به‌رپرسه يێ د ناڤ گه‌نده‌ليێ دا و مفايه‌كێ مه‌زن ژێ وه‌ردگرن و رۆژانه ب سه‌دان بارهه‌لگر گه‌له‌ك كه‌لوپه‌لێن هاورده‌كرى بێ وه‌رگرتنا باجێ ده‌رباز دكه‌ن.
هه‌يسه‌م جبۆرى خۆيا ژى كر كو ژ ئه‌گه‌رێ وان گه‌نده‌ليان د هه‌ر چركه‌كێ دا ب كۆژمێ 263 دۆلاران زيان دگه‌هنه عيراقێ.
ئه‌ندامێ لژنا دارايى ل جڤاتا نوونه‌رێن عيراقێ ئاماژه ب وێ چه‌ندێ ژى كر كو داهاتێ گۆمركان ب گۆره‌ى قه‌بارێ هاورده‌كرن و فرۆتنا به‌نكا ناڤه‌ندى 9 مليار دۆلارن، به‌لێ ئه‌و داهاتێ ژ ده‌رگه‌هێن سنورى راده‌ستى گه‌نجينا گشتى دهێته كرن ژ 500 مليۆن دۆلاران كێمتره.
ئەڤرۆ نیوز، لەزگین جۆقى:
بەرپرسێ نڤیسینگەھا رزگارکرنا رەڤاندیێن ئێزدی دیارکر کو ئەڤرۆ 13ى چريا دويێ 2017 پێنج رەڤاندیێن دى يێن ئێزدی ھاتنە رزگارکرن و گەھشتنە دھۆکێ.
حسێن قائێدی، بەرپرسێ نڤیسینگەھا رزگارکرنا رەڤاندیێن ئێزدی بۆ ئەڤرۆ نیوز دیارکر کو ئەڤرۆ ھەر ئێک ژ (د) د ژیێ ھەشت سالیێ دا خەلکێ حەردان و (ە) د ژیێ 19 سالیێ دا خەلکێ کوچۆ و (ش) د ژیێ 14 سالیێ دا و (د) د ژیێ 12 سالیێ دا ژ گرعزێر و کچەکا دى يا یا 9 سالیێ دا خەلکا سولاخ ھاتنە رزگارکرن.
ھەتا نوکە پتر ژ 3200 رەڤاندیێن ئێزدی ب پشتەڤانیا سەرۆکێ حکومەتا ھەرێما کوردستانێ یێن ھاتینە رزگارکرن و ھیشتا چارەنڤیسی پتر ژ سێ ھزار رەڤاندیان ژی نەھاتیە دیتن.
نيشاندان