ئەڤرۆنیوز، سالار دۆسكی:
گوتارخوینێ مزگەڤتا مەزن ل سەنتەرێ‌ بازاری ل دهۆكێ‌ دگۆتارا خوە یا ئەڤرۆ رۆژا ئەینی 8/12/2017 بەحسێ‌ جیهادێ‌ بۆ قەدسێ‌ كر.
مەلا عەبدولحەمید رێكانی گوتارخوینێ مزگەڤتا مەزن ل بازارێ‌ دهۆكێ‌ دگۆتارا خوە یا رۆژا ئەینی دا، بەحسێ‌ قودسێ‌ كر و پیرۆزیا وێ‌ ل دەف موسلمان دیاركر كو ئەو جه بوویە كو پێغەمبەر (محەمەد) سلاف ل سەر بن چوویە عەسمانی رۆژا (ئیسرا و معراجێ‌).
دتەوەرەكێ‌ دیێ‌ دگۆتارا خوە دا، رێكانی بەحسێ‌ مێژوویا قودسێ‌ كر ودیاركر كو ل سەر دەمێ‌ خەلیفێ‌ دوێ‌ (عومەرێ‌ كورێ‌ خەتابی) چار هەیڤان موسلمان قودس دورێپێچ كر، زانایێن قودسێ‌ كرستیان بوون، وان زانا گۆتە موسلمانان هەكە خەلیفێ‌ هەوە بهێت وئەم ببینن و هەكە ل دووڤ وان گۆتنان بیت ئەوێن دپەرتۆكێن مە داهاتین، دێ‌ كلیلێن قودسێ‌ بێ‌ شەر رادەستی هەوە كەین و دێ‌ باوەریێ‌ پێ‌ ئینین، پشتی خەلیفێ‌ موسلمانان هاتی، زانایێن كرستیانان ئاشكراكر كو ئەڤە ئەو خەلیفەیە ئەوێ پەرتۆكین مە بەحس كری و كلیل رادەستی ئیمام (عومەر)كرن و پشتی خەلیفێ‌ موسلمانان چوویە (قودسێ‌) ڤە كرستیانان خواست ل (كەنیسا قیامە) نڤێژا خوە بكەت، بەلێ‌ ئەوی نەكر ب بهانا وێ‌ چەندێ‌ كو رۆژەكێ‌ موسلمان بهێن و بێژن ئەڤە یا مەیە و ئیمام (عومەر) نڤێژا تێدا كری.
مەلا عەبدولحەمیدی دگوتارا خوە دا ئەو ژی گۆت” قودس ئانكو (بەیت المقدس) نە باژێرێ‌ جوهیانە وەكو بەلاڤە بووی، هەتا سەردەمێ‌ (موسا) پێغەمبەر ژی هەكە ددەستێ‌ جوهیان دابیت، (موسا) پێغەمبەر و پێغەمبەرێن ددووف دا گۆتینە مللەتێن خوە، دێ‌ پێغەمبەرەك هێت ناڤێ‌ وی (محەمەد)ە و هەموو سالوخەتێن وی بۆ مللەتێن خوە ئاشكراكرینە كو بگەهنێ‌ و باوەریێ‌ پێ‌ بینن و هەرن دناڤ ئاینێ‌ ئیسلامێ‌ دا.
گۆت ژی، ئەو كەسێ‌ بێژیت (بەیت المقدس) یا جوهیانە، ئەو گەلەكێ‌ شاشە و ئەڤ گۆتنە دێ‌ كارتێكرنێ‌ ل ئیمانا وی كەت، دئاینێ‌ ئیسلامێ‌ دا هاتیە كو هەر جهەكێ‌ موسلمان دەستهەلاتێ‌ لێ‌ بكەن و دبن دەستێ‌ وان دابیت و ددووڤ دا كافر بهێن ژ دەستێ‌ موسلمانان دەربكەن، ئەركە ل سەر هەموو موسلمانان بچن جیهادێ‌ بكەن هەتا وی عەردێ‌ موسلمانان ژ دەستێ‌ كافران بینەدەرێ‌، قودس گرنكترین جهێ‌ موسلمانانە كو بچن ژ دەستێ‌ كافران دا دەربكەن و جوهی ژی كافرن و ئەو كەسێ‌ باوەریێ‌ ب ئاینێ‌ ئیسلامێ‌ نە ئینیت، چو جوهی بیت، یان مەسیحی بیت، دهێـتە هژمارتن كافر و جهێ‌ وی دوزەخە و ناچیتە بەهشتێ‌.
مەلا عەبدولحەمیدی ئەو ژی گۆت”ئەو كەسێ‌ بێژیت قودس یا جوهیانە، بلا ژ ئیمانا خوە بترسیت و بلا بزانیت ئەڤە یا موسلمانایە”.
دتەوەرەكێ‌ دیێ‌ گۆتارا خوە دا، مەلا عەبدولحەمید رێكانی دیاركر كو پشتی 70 سالان سەلاحەدین ئەیووبی (بیت المقدس) ژ دەستێن مەسیحیا ئینایە دەرێ‌، پشتی كەفتیە دەستێ‌ موسلمانان یا موسلمانایە و پێدڤیە هەموو ئاینێن دی پێگریێ‌ ب ئەحكامێن ئیسلامێ‌ بكەن و هەتا ل سەر ئاینێن خوە ژی بن.