ئه‌ڤرۆ:

نوونه‌رێ هه‌ردو وه‌زاره‌تێن پێشمه‌رگه‌ و ناڤخوه‌ ل فه‌رمانده‌یا ئۆپه‌راسیۆنێن هه‌ڤپشك ل ئیراقێ، لیوا عه‌بدولخالق ته‌لعه‌ت راگه‌هاند، بۆ دابینكرنا بودجه‌ی بۆ هه‌ردو لیوایێن هه‌ڤپشك یێن پێشمه‌رگه‌ی و له‌شكرێ ئیراقێ دانوستاندن یێن هاتینه‌ كرن، به‌لێ هه‌تا نوكه‌ بریارا دووماهیێ ل سه‌ر نه‌هاتیه‌ دان.

لیوا عه‌بدولخالق ته‌لعه‌ت گۆت” ئه‌وا باس لێ دهێته‌ كرن كو  بودجه‌ بۆ هه‌ردو لیوایێن هه‌ڤپشك یێن پێشمه‌رگه‌ی و له‌شكرێ ئیراقێ هاتیه‌ دانان هه‌تا نوكه‌ بریارا دووماهیێ ل سه‌ر نه‌هاتیه‌ دان و تنێ باس لێ هاتیه‌ كرن و پێدڤی ب بریارا دووماهیێ یه‌”.

گۆت ژی” هه‌موو رێكار یێن ب دووماهی هاتین و تنێ كێشه‌ دابینكرنا بودجه‌یه‌ كو پێدڤیه‌ بریار ل سه‌ر بهێته‌ دان و كێشه‌ ژی ئه‌وه‌ حوكمه‌تا نوكه‌ یا ئیراقێ شیانێن دابینكرنا بودجه‌ی نینه‌ تاكو بریارێ بده‌ت و پێدڤیه‌ حوكمه‌ته‌كا نوو بهێته‌ پێكئینان”.

دو لیوایێن هه‌ڤپشك یێن پێشمه‌رگه‌ی و له‌شكرێ ئیراقێ بۆ ده‌ڤه‌رێن كوردستانی یێن ده‌رڤه‌ی ئیدارا هه‌رێمێ دێ هێنه‌ دروستكرن كو دێ ب هه‌ڤپشكی وان ده‌ڤه‌ران ب رێڤه‌به‌ن و هه‌موو رێكار ژی یێن ب دووماهی هاتین و تنێ مایه‌ بودجه‌ بۆ بهێته‌ ته‌رخانكرن.

هه‌ولێر، سولین سلێمان

نوونه‌رێ حوكمه‌تا هه‌رێما كوردستانێ ل فره‌نسا ل دۆر په‌یوه‌ندیێن سیاسی و ئابوری و چڤاكی د ناڤبه‌را وه‌لاتێ فره‌نسا و هه‌رێما كوردستانێ راگه‌هاند، پێشبینیێ دكه‌ین په‌یوه‌ندیێن هه‌رێما كوردستانێ وفره‌نسا د سالێن داهاتیدا گه‌له‌ك باشتر و ب هێزتر ببن.

عه‌لی دۆله‌مه‌ری، نوونه‌رێ حوكمه‌تا هه‌رێما كوردستانێ ل فره‌نسا بۆ رۆژناما (ئه‌ڤرۆ) گۆت”وه‌كو یا دیار ئیمانویل ماكرۆن سه‌رۆكێ فره‌نسا په‌یوه‌ندیه‌كا گه‌له‌ك باش دگه‌ل نێچیرڤان بارزانی سه‌رۆكێ هه‌رێما كوردستانێ هه‌یه‌ وئه‌ڤه‌ بۆیه‌ ئه‌گه‌را وێ كو ئه‌ڤ په‌یوه‌ندیه‌ دناڤبه‌را هه‌ردو فره‌نسا و هه‌رێمێ ب هێزتر ببن، دیسا سه‌رۆك ماكرۆن په‌یوه‌ندیه‌كا بهێز هه‌یه‌ دگه‌ل ده‌ڤه‌را روژهه‌لاتا ناڤیندا ودخوازیت جاره‌كادی ته‌ناهی بۆ ده‌ڤه‌رێ ڤه‌گه‌ریت و ئه‌ڤ چه‌نده‌ ژی بێی هه‌رێما كوردستانێ تشته‌كێ ئه‌سته‌مه‌، چونكه‌ كوردستانێ پێگه‌هه‌كێ دیار د شكاندنا داعشێ دا ل ئێراقێ هه‌بوو و تا نۆكه‌ ژی داعش ل سورییێ دا ب دووماهی نه‌هاتیه‌”.

دۆله‌مه‌ری گۆت ژی” هه‌رێما كوردستانێ شیایه‌ په‌یوه‌ندیێن نێڤده‌وله‌تی یێن خوه‌ پێشبێخیت ئه‌ڤ چه‌نده‌ژی گه‌له‌ك یا گرنگه‌، هه‌روه‌سا ماكرۆنی چه‌ندین جاران سه‌رۆكێ هه‌رێمێ داخواز كریه‌ كو سه‌ردانا فره‌نسا بكه‌ت وئه‌ڤ چه‌نده‌ ژی دێ بیته‌ ئه‌گه‌ر كو په‌یوه‌ندیێن كوردستانێ و فره‌نسا گه‌له‌ك ب هێزتر ببن د هه‌موو بواران دا”.

نوونه‌رێ حوكمه‌تا هه‌رێما كوردستانێ ل فره‌نسا ئاماژه‌كر ژی” هه‌كه‌ (ماری لۆپین) شینا ماكرۆنی وه‌كو سه‌رۆكێ فه‌ره‌نسا هاتبا هه‌لبژارتن دا گه‌له‌ك ئاریشان بۆ په‌نابه‌رێن هه‌رێما كوردستانێ ل وه‌لاتێ فره‌نسا په‌یدا كه‌ت، چونكه‌ لۆپین ئاماژه‌ كربوو هه‌ر ده‌مێ ئه‌و بهێته‌ هه‌لبژارتن وه‌كو سه‌رۆكێ فره‌نسا، دێ هه‌موو په‌نابه‌رێن ل فره‌نسا هنێریته‌ جهێن وان وئه‌ڤ چه‌نده‌ ژی دا ئاریشه‌كا مه‌زن دروست كه‌ت”.

دیاركر ژی” سه‌ره‌دانێن نوو یێن سه‌رۆك ماكرۆنی بۆ هه‌رێما كوردستانێ ب باوه‌ریا من دێ هه‌بن، لێ نه‌یادیاره‌ چونكه‌ د نۆكه‌ دا سه‌رۆك ماكرۆن به‌رنامه‌ و كارێن زۆر هه‌نه‌ ژبه‌ركو ل مه‌ها ته‌مووزا 2022 هه‌لبژارتنێن په‌رله‌مانێ فره‌نسا دێ هێنه‌ ئه‌نجامدان وسه‌ردانێن ماكرۆنی پتر دێ بۆ وه‌لاتێن ئه‌وروپا بن ژبه‌ركو د نۆكه‌ دا ئاریشا دیار یا فره‌نسا شه‌رێ د ناڤبه‌را رووسیا و ئۆكراینا یه‌، لێ د داهاتیدا ماكرۆن دێ سه‌ره‌دانا ئیراقێ و هه‌رێما كوردستانێ كه‌ت”.

بسپۆره‌كا زانستێن سیاسی ل زانكۆیا دهۆكێ‌، د دیداه‌ركێ‌ دا بۆ رۆژناما (ئه‌ڤرۆ) دیار دكه‌ت، مه‌ره‌ما حه‌شدا شه‌عبی ژ مۆشه‌ك بارانكرنا هه‌ولێرێ‌ ئه‌وه‌، وان دڤێت كوردستانێ‌ لاواز بكه‌ن و ئێمناهیێ‌ تێدا نه‌هێلن، د هه‌مان ده‌مدا ئه‌ڤه‌ چه‌ندین جاران وان ئالیان هه‌ولێر مۆشه‌ك بارانكر، هه‌ر ژ سالا 2014 ێ‌، هه‌تا نوكه‌ ئه‌و یێ‌ بزاڤان دكه‌ن ب رێیێن ئابووری و سیاسی ره‌وشا هه‌رێما كوردستانێ‌ تێك بده‌ن، دیسان گه‌له‌ك ده‌وله‌تێن جیهانێ‌ هاریكاریان ژی دده‌نه‌ ئیراقێ، لێ‌ ئیراق به‌هرا كوردان ژ وان هاریكاریان ناده‌ت.

د. سوزان ئامێدی،  بسپۆرا زانستێن سیاسی ل زانكۆیا دهۆكێ‌ گۆت” ئه‌و گرۆپێن شیعی یێن ب سه‌ر ئیرانێ‌ ڤه‌، بزاڤێ‌ دكه‌ن، ب هه‌موو رێیان ئێمناهیا هه‌رێمێ‌ تێك بده‌ن، پشتی هه‌لبژارتنێن سالا بۆری یێن جڤاتا نوونه‌رێن ئیراقێ، هه‌تا نوكه‌ حوكمه‌تا نوو پێكنه‌هاتیه‌، له‌وما مۆشه‌ك بارانكرنا هه‌ولێرێ‌ ژ ئالیێ‌ وان گرۆپێن شیعی ڤه‌، بۆ هندێ‌ یه‌ گڤاشتنان ل پارتی دیموكراتی كوردستان بكه‌ن، داكو حوكمه‌تا ئیراقێ نه‌هێته‌ پێكئینان، د هه‌مان ده‌مدا ئه‌و مۆشه‌كه‌ ژ ئیراقێ دهێنه‌ ئاراسته‌كرن بۆ هه‌ولێرێ‌، ب تایبه‌تی ژ وان ده‌ڤه‌ران دهێن یێن كو حوكمه‌تا ئیراقێ لێ‌ هه‌یی، هه‌روه‌سا چو ئالیێن سیاسی یێن ئیراقی، خوه‌ به‌رپرسیار نه‌كریه‌ ژ هاڤێتنا وان مۆشه‌كان، حوكمه‌تا ئیراقێ ژی ب تنێ‌ جۆره‌ نه‌رازیبوونه‌ك دیار كریه‌ و چو گاڤێن وه‌سا ناهاڤێژیت كو ڤێ‌ مۆشه‌ك بارانكرنێ‌ راوه‌ستینیت”.

گۆت ژی” جڤاتا ئاسایشا نێڤده‌وله‌تی یا به‌رپرسیاره‌ ژ ڤێ‌ چه‌ندێ‌، ب تایبه‌تی ژی پشتی ئیرانێ‌ 12 مۆشه‌ك ل ئاڤاهیه‌كێ‌ مه‌ده‌نی داین ل هه‌ولێرێ‌ و ئه‌و كارێ‌ ئیرانێ‌ كری، پێشێلكاریا سه‌روه‌ریا ده‌وله‌تا ئیراقێ بوویه‌، پێدڤی بوو، جڤاتا ئاسایشا نێڤده‌وله‌تی هه‌لویسته‌كێ‌ دژوار ل هه‌مبه‌ری ئیرانێ‌ دیاركربا، د هه‌مان ده‌مدا حه‌شدا شه‌عبی یا نێزیكی سنۆرێن هه‌رێما كوردستانێ‌ یه‌ ب پشته‌ڤانیا ئیرانێ‌ وان كریارێن تیرۆریستی دكه‌ن، له‌وما دڤێت حوكمه‌تا هه‌رێمێ‌ بێده‌نگ نه‌مینیت و هه‌روه‌سا پێدڤیه‌ حوكمه‌تا ئیراقێ ژی خودان هه‌لویست بیت و ڤێ‌ چه‌ندێ‌ قه‌بوول نه‌كه‌ت و ئێدی نه‌هێلیت هه‌ولێر بهێته‌ مۆشه‌ك باران كرن، دیسا پێدڤیه‌ حوكمه‌تا هه‌رێمێ‌ ژی ده‌نگێ‌ خوه‌ بگه‌هینیته‌ جڤاتا ئاسایشا نێڤده‌وله‌تی، ژ پێخه‌مه‌ت ئێدی هه‌ولێر ژ ئالیێ‌ وان گرۆپێن حه‌شدا شه‌عبی ڤه‌ نه‌هێته‌ مۆشه‌ك باران كرن”.

دیاركر”هه‌رێما كوردستانێ‌ چو جاران ناكه‌ڤیت، هندی هه‌ولێر بهێته‌ مۆشه‌ك بارانكرن ژی، دێ‌ هه‌ر خوه‌ راگریت، هه‌روه‌سا هندی بزاڤێن سیاسی و له‌شكری و ئابووری ژی بهێنه‌ كرن، كو شه‌رێ‌ هه‌رێما كوردستانێ‌ بكه‌ن و وان بڤێت ره‌وشا هه‌رێمێ‌ ئالۆز بكه‌ن، كوردستان لاواز نابیت و چو جاران ناكه‌ڤیت، چونكی خه‌لكێ‌ كوردستانێ‌ پشته‌ڤانێ‌ هه‌رێما كوردستانێ‌ یه‌، مه‌ دۆزه‌كا ره‌وا هه‌یه‌، هه‌روه‌سا ژ ئه‌گه‌رێ‌ لاوازیا حوكمه‌تا ئیراقێ هه‌ولێر دهێته‌ مۆشه‌ك باران كرن، ئه‌و ئالیێن شیعی یێن شكه‌ستن د هه‌لبژارتنان دا ئیناین، بزاڤێ‌ دكه‌ن گڤاشتنان ل سه‌ر هه‌رێمێ‌ دروست بكه‌ن، داكو حوكمه‌تا نوو یا ئیراقێ نه‌هێته‌ پێكئینان، هه‌روه‌سا ئه‌و ئالیێن د هه‌لبژارتنان دا سه‌ركه‌فتین، دڤێت ئه‌و حوكمه‌تا نوو پێكبینن، ب تایبه‌تی ژی ( باسكێ‌ سه‌دری، پارتی، ئالیێن سوننی)، لێ‌ ئه‌و ئالیێن شكه‌ستن د هه‌لبژاتنان دا ئیناین، ب تایبه‌تی یێن شیعی، ب هه‌موو رێیان یێن بزاڤێ‌ دكه‌ن، كو حوكمه‌تا ئیراقێ نه‌هێته‌ پێكئینان، د به‌رامبه‌ر دا ( باسكێ‌ سه‌دری، پارتی دیموكراتی كوردستان، ئالیێن سوننی)، د رژدن ل سه‌ر پێكئینانا حوكمه‌تا نوو یا ئیراقێ، له‌وما ئه‌و ئالیێن شیعی هه‌ولێرێ‌ مۆشه‌ك باران دكه‌ن”.

هه‌روه‌سا ئه‌و چه‌ند ژی دیار كر”هه‌كه‌ حوكمه‌تا ئیراقێ زوو نه‌هێته‌ پێكئینان، ڤێ‌ چه‌ندێ‌ دێ‌ كارتێكرنه‌كا خراب ل سه‌ر گه‌لێ‌ ئیراقێ هه‌بیت، هه‌ر چه‌نده‌ ئه‌و ئالیێن شكه‌ستن خواری ژ ڤێ‌ ره‌وشێ‌ د مفادارن و وان نه‌ڤێت حوكمه‌تا نوو بهێته‌ پێكئینان، ب تایبه‌تی ژی ئالیێ چارچۆڤێ‌ هه‌ماهه‌نگیا شیعی، دو چاره‌ بۆ پێكئینانا حوكمه‌تا نوو یا ئیراقێ هه‌نه‌، ئه‌و ژی دڤێت بزاڤ بهێنه‌ كرن، ئه‌و ئالیێن سه‌ربه‌خوه‌ پشكداریێ‌ د حوكمه‌تا نوو دا بكه‌ن، رێیا دیتر ئه‌وه‌، كو ده‌وله‌تێن زلهێز یێن جیهانی، مایێ‌ خوه‌ د ڤی بابه‌تی بكه‌ن و ب زووترین ده‌م حوكمه‌تا ئیراقێ پێكبینن، چونكی هه‌كه‌ حوكمه‌تا نوو نه‌هێته‌ پێكئینان، دێ‌ ره‌وشا ناڤخوه‌یی یا ئیراقێ به‌ر خرابترڤه‌ چیت و دێ‌ پتر ئاریشه‌ په‌یدا بن، د هه‌مان ده‌مدا ل ڤان رۆژێن بۆری، موقته‌دا سه‌در، داخواز ژ په‌رله‌مانتارێن باسكێ‌ سه‌دری كریه‌، كو هه‌ر گاڤا وی بریار دا، دڤێت هه‌موو په‌رله‌مانتارێن باسكێ‌ سه‌دری ده‌ستان ژ په‌رله‌مانی به‌رده‌ن، ڤێ‌ چه‌ندێ‌ دێ‌ كاریگه‌ریه‌كا خراب ل سه‌ر پرۆسا سیاسی ل ئیراقێ هه‌بیت”.

دیدار، هۆشه‌نگ تاجر:

سه‌رۆكێ گشتی یێ پارتا ئازادی یا كوردستانێ راگه‌هاند كو ل گۆر راپرسیێن نها ل توركیا ئه‌ردۆغان نه‌شێت جاره‌كا دی ببیته‌ سه‌رۆك كۆمارێ توركیا و هه‌روه‌سا توركیا ب چو ره‌نگه‌كێ نه‌ڤێت كو هه‌رێمه‌كا وه‌كو هه‌رێما كوردستانێ ل باكورێ سووریێ بهێته‌ ئاڤاكرن و ب هه‌موو ره‌نگه‌كێ ل دژی هندێ كار دكه‌ت.

مسته‌فا ئۆزچه‌لیك سه‌رۆكێ گشتی یێ پارتا ئازادی یا كوردستانێ د دیداره‌كا تایبه‌ت دا بۆ ئه‌ڤرۆ دیار كر كو رۆژانه‌ راپرسی ل توركیا دهێنه‌ كرن و ئه‌نجامێن راپرسیان ژی بۆ رایا گشتی دهێنه‌ ئاشكرا كرن، ئه‌نجامێن راپرسیێن كو هه‌تا نها هاتینه‌ كرن دیار دبیت كو هه‌ڤپه‌یمانا ئه‌ردۆغانی یا ل گه‌ل پارتا بزاڤا نه‌ته‌وه‌په‌رست نه‌شێن ڤێجارێ سه‌ركه‌ڤن ئانكۆ ئه‌ردۆغان ڤێجارێ نه‌شێت ببیته‌ سه‌رۆك كۆمارێ توركیا.

سه‌باره‌ت ب ئۆپه‌راسیۆنا توركیا ل رۆژئاڤایێ كوردستانێ ژی ناڤهاتی راگه‌هاند كو دو خالێن گرنگ هه‌نه‌، یا ئێكێ به‌ری نها سه‌رۆك كۆمارێ توركیا ب ره‌نگه‌كێ ئاشكرا دیار كر كو ئه‌و ناهێلن شاشیا به‌ری نها ل باكورێ ئیراقێ هاتیه‌ كرن ل باكورێ سووریێ بهێته‌ دوباره‌كرن، ئانكۆ ب كورتی ئه‌ردۆغانی گۆت ئه‌و ل دژی ئاڤابوونا هه‌رێما كوردستانێ بوون لێ توركیا نه‌شیا رێگریێ ل ئاڤابوونا هه‌رێما كوردستانێ بگریت، ژ به‌ر هندێ ژی نها توركیا ب هه‌موو ره‌نگه‌كێ كار دكه‌ت كو كورد ل سووریێ نه‌گه‌هنه‌ مافێن خوه‌ یێن ره‌وا، ئانكۆ توركیا نه‌ڤێت ئه‌زموونا هه‌رێما كوردستانێ ل رۆژئاڤایێ كوردستانێ بهێته‌ دوباره‌كرن و گۆت: (توركیا ب ره‌نگه‌كێ ئاشكرا ل دژی ئاڤابوونا كیانه‌كێ كوردی یه‌، تشتێ نها توركیا دكه‌ت ژی هه‌موو بۆ هندێ نه‌ كو چو كیانێن كوردی ل باكورێ سووریێ نه‌هێنه‌ ئاڤاكرن، توركیا به‌ری نها عه‌فرین و گرێ سپی داگیر كر و نها ژی توركیا دڤێت تل رفعه‌ت و منبجێ داگیر بكه‌ت، ئانكۆ توركیا ب هه‌موو ره‌نگه‌كێ كار دكه‌ت كو دیمۆگرافیا رۆژئاڤایێ كوردستانێ بگوهۆریت، توركیا دڤێت كوردان ژ جه و وارێن وان ده‌رخینیت و عه‌ره‌ب و توركمانان ل وارێ كوردان بجه بكه‌ت). مسته‌فا ئۆچه‌لیك ئه‌و یه‌ك ژی دیار كر خالا دویێ‌ ژی توركیا دڤێت ب كووراتیا ٣٠ كیلومیتران بچیته‌ ناڤ ئاخا سووریێ ئانكۆ رۆژئاڤایێ كوردستانێ و هه‌رێمه‌كا ئارام ئاڤا بكه‌ت و بێگومان توركیا دڤێت توركمان و عه‌ره‌بان ل وێ هه‌رێمێ بجه بكه‌ت، ژ به‌ر هندێ ژی توركیا هه‌تا نها چه‌كدارێن عه‌ره‌ب و توركمان خوه‌دان دكه‌ت و پشته‌ڤانیا وان دكه‌ت، توركیا ڤان تشتان هه‌موویێ ژ به‌ر هندێ دكه‌ت دا كو د پاشه‌رۆژا سووریێ دا خوه‌دان گۆتن بیت و رۆله‌كێ سه‌ره‌كی بگێریت و به‌ره‌ڤانیێ ژ به‌رژه‌وه‌ندیێن خوه‌ بكه‌ت و گۆت: (بێگومان هه‌كه‌ توركیا شیا كاره‌كێ وه‌سا بكه‌ت دێ په‌یوه‌ندیێن د ناڤبه‌را باكورێ كوردستانێ و رۆژئاڤایێ كوردستانێ دا هێنه‌ بڕین چونكی توركیا دڤێت رۆژئاڤایێ كوردستانێ ب ته‌مامی دۆرپێچ بكه‌ت دا كوردان چو رۆل د پاشه‌رۆژا سووریێ دا نه‌بن).

سه‌رۆكێ گشتی یێ پارتا ئازادی یا كوردستانێ ئه‌و یه‌ك ژی دیار كر كو نها توركیا تووشی قه‌یرانه‌كا گه‌له‌ك مه‌زن بوویه‌، گه‌نده‌لیێن گه‌له‌ك مه‌زن د ناڤ ئاكپارتیێ دا هه‌نه‌ و توركیا به‌ر ب هه‌لبژارتنان ڤه‌ دچیت، بێگومان ئه‌ردۆغانی دڤێت بابه‌تێ ئۆپه‌راسیۆنه‌كا نوو ل رۆژئاڤایێ كوردستانێ بكار بینیت دا هه‌م بشێت قه‌یرانا ناڤخوه‌یی یا توركیا ڤه‌شێریت و خالا دی ب رێیا ئۆپه‌راسیۆنه‌كا وه‌سا جاره‌كا دی بزاڤا هندێ بكه‌ت دا ده‌نگێ خه‌لكی بده‌ستڤه‌ بینیت، چونكو وه‌كو من گۆتی راپرسیێن نها نیشا دده‌ن كو ئه‌ردۆغان نه‌شێت جاره‌كا دی ببیته‌ سه‌رۆك كۆمارێ توركیا و گۆت: (ئه‌ردۆغان ب هه‌موو ره‌نگه‌كێ كار دكه‌ت دا بشێت كارتێكرنێ ل نێرینا خه‌لكی بكه‌ت و د هه‌لبژارتنان دا سه‌ركه‌ڤیت ئێك ژ خالێن سه‌ره‌كی یێ رژدبوونا وی بۆ ئۆپه‌راسیۆنه‌كێ‌ ل رۆژئاڤایێ كوردستانێ ژی هه‌ر ژ به‌ر هندێ یه‌).

سه‌باره‌ت ب هه‌لوه‌ستێ رۆسیا و ئه‌مریكا ژی ناڤهاتی راگه‌هاند كو هه‌كه‌ رۆسیا و ئه‌مریكا رازی نه‌بن توركیا ب چو ره‌نگه‌كێ نه‌شێت ئێرشی رۆژئاڤایێ كوردستانێ بكه‌ت، ب تایبه‌تی ژی رۆسیا، چونكی گه‌له‌ك ده‌ڤه‌ر نها د ده‌ستێ رۆسیا دانه‌ و ل ئالیێ دی هێزێن ئه‌مریكا ژی ل باكورێ سووریێ و رۆژئاڤایێ كوردستانێ هه‌نه‌ و بێی رازیبوونا ئه‌مریكا و رۆسیا بێگومان توركیا نه‌شێت ده‌ست ب ئۆپه‌راسیۆنه‌كا وه‌سا بكه‌ت چونكی دێ ئه‌نجامێن وێ بۆ توركیا گه‌له‌ك ب خرابی ڤه‌گه‌رن.

مسته‌فا ئۆزچه‌لیك ئه‌و یه‌ك ژی نه‌ڤه‌شارت كو هه‌م ده‌وله‌تا توركیا و هه‌م ژی په‌كه‌كێ نه‌هێلان كو قۆناغا ئاشتیێ برێڤه‌ بچیت، توركیا ژ هندێ دترسیا كو قۆناغا ئاشتیێ ببیته‌ ئه‌گه‌رێ ڤه‌ژینا سیاسی، دیموكرات و پێشڤه‌برنا خه‌باتا ئاشتیانه‌ و دیموكراتی ل باكورێ كوردستانێ، چونكی هه‌كه‌ تشته‌ك وه‌سا هاتبا كرن دا كورد گه‌له‌ك بهێز كه‌ڤن و ژ به‌ر هندێ ژی سالا ٢٠١٥ توركیا هه‌ڤدیتنێن ل گه‌ل په‌كه‌كێ و هه‌ده‌پێ دانه‌ راگرتن و ده‌ست ب شه‌ری كر و گۆت: (په‌كه‌كێ ژی گۆت ئه‌و دێ ب شه‌ری باژێرێن باكورێ كوردستانێ رزگار كه‌ن، شه‌رێ خه‌نده‌قان و ناڤ باژێران بوو ئه‌گه‌رێ هندێ كو زیانه‌كا گه‌له‌ك مه‌زن گه‌هشته‌ باكورێ كوردستانێ، په‌كه‌كێ نها ژی به‌رێ خوه‌ دایه‌ هه‌رێما كوردستانێ و دڤێت وێرێ ژی وه‌كو باكورێ كوردستانێ لێ بكه‌ت، په‌كه‌كێ به‌رێ توركیا دایه‌ هه‌رێما كوردستانێ و یا نها په‌كه‌كه‌ دكه‌ت بوویه‌ مه‌ترسیه‌كا مه‌زن ل سه‌ر ده‌ستكه‌فتیێن كوردان ل هه‌رێما كوردستانێ).

ل دۆر ره‌وشا نها ل باكورێ كوردستانێ و به‌رنامێ وان بۆ پاشه‌رۆژا كوردان ژی سه‌رۆكێ گشتی یێ PAK  راگه‌هاند كو مه‌ ژ بۆ ئێكه‌تیا نه‌ته‌وه‌یی ل باكورێ كوردستانێ گه‌له‌ك هه‌ول داینه‌، مه‌ گه‌له‌ك خه‌بات كرینه‌، ئه‌‌م دخوازین به‌ره‌یه‌كێ‌ كوردستانی ل باكورێ كوردستانێ ئاڤا بكه‌ین و گۆت: (هه‌ده‌په‌ و هوداپار خوه‌ وه‌ك پارتێن توركیا پێناسه‌ دكه‌ن، مخابن هنده‌ك پارتێن كوردی ژ بۆ بده‌ستڤه‌ئینانا باژێرڤانیه‌كێ د هه‌لبژارتنێن بۆری دا پشته‌ڤانی ل هه‌ده‌پێ كرن و نها ژی ل گه‌ل هه‌ده‌پێ نه‌، پارتا ماف و ئازادیان ژی هه‌تا نها خوه‌ نه‌دایه‌ به‌ر خه‌باتێن هه‌ڤپشك یێن نه‌ته‌وه‌یی، ئه‌‌و یه‌ك ژی راستیه‌كا ته‌حل یا بزاڤا كوردی یه‌ ل باكورێ كوردستانێ).

سه‌رۆكێ گشتێ یێ پارتا ئازادی یا كوردستانێ د دووماهیا ئاخڤتنا خوه‌ دا ئه‌و یه‌ك ژی دیار كر كو نها وان‌ وه‌ك 3 پارتی و ته‌ڤگه‌رێن باكورێ كوردستانێ، (پارتا ئازادی یا كوردستانێ، پارتا سوسیالیست یا كوردستانێ، بزاڤا دیموكراتی یا كوردستانێ) ده‌ست ب خه‌باتێ كرینه‌ و ئارمانجا وان ژی بێگومان بده‌ستڤه‌ئینانا مافێن ره‌وا یێن گه‌لێ كوردستانێ یه‌ و گۆت: (ژ بۆ ئاڤاكرنا به‌ره‌یه‌كێ‌ كوردستانی دڤێت ئه‌م خه‌باتێ بكه‌ین و ژ بۆ هندێ ژی هنده‌ك داخوازیێن سه‌ره‌كی هه‌نه‌ كو دڤێت كار ل سه‌ر وان بهێته‌ كرن).

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، د چارچۆڤێ پشكداریكرنێ د رێوره‌سمێن دانانا به‌رێ بنیاتێ هه‌رسێ پرۆژێن كارگه‌ها ئاری، خانیێن پلاستیكی بۆ چاندنا فێقی و كه‌سكاتیێ، ب خودانكرنا چێلا و پیشه‌سازیا خۆراكی ل سنوورێ پارێزگه‌ها دهۆكێ راگه‌هاند، ل كابینا نه‌هێ یا حوكمه‌تا هه‌رێما كوردستانێ بزاڤێن مه‌زن هاتینه‌ كرن بۆ هه‌مه‌جۆركرنا ژێده‌رێن داهاتی و دیتنا ده‌لیڤێن كاری بۆ گه‌نجان، پێدڤیه‌ بۆ دابینركنا ئاسایشا خۆراكی پشت به‌ستنێ ب خوه‌ بكه‌ین.

سه‌رۆكێ حوكمه‌تا هه‌رێما كوردستانێ، د په‌یڤا خوه‌ دا گۆت ژی” گه‌له‌ك یێ به‌خته‌وه‌رم جاره‌كادی ل پارێزگه‌ها دهۆكێ و قه‌زا سێمێلێ كۆمبووین، بۆ دانانا به‌رێ بنیاتێ چه‌ندێن پرۆژێن ستراتیژی و گرنگ، نه‌ ب تنێ بۆ ڤێ ده‌ڤه‌رێ، به‌لكو بۆ هه‌موو كوردستانێ، بۆ پێشڤه‌برنا سیكته‌رێ چاندنێ و پیشه‌سازیا خۆراكی ل كوردستانێ و ڤه‌دیتنا ده‌لیڤێن كاری بۆ چه‌ندین گه‌نجێن وه‌لاتێ مه‌ و هه‌مه‌جۆركرنا ژێده‌رێن داهاتی، كو ئه‌و ئێكه‌ ژ ئارمانجێن حوكمه‌تا هه‌رێما كوردستانێ”.

ده‌قێ په‌یڤا سه‌رۆكێ حوكمه‌تا هه‌رێما كوردستانێ…

كوردستان یا زه‌نگینه‌ ب ژێده‌رێن مرۆڤی و ژێده‌رێن سروشتی یێن خوه‌، پێدڤیه‌ ئه‌وا دشیانیچن مه‌ دا بیت بكه‌ین تاكو مفای ژ ئاخا خوه‌ ببینین، وی ژێده‌رێ سروشتی یێن جوان یێ كوردستانێ ببینین كو مخابن هه‌تا نوكه‌ ژبه‌ر گه‌له‌ك ئه‌گه‌ران مفا ژێ نه‌هاتیه‌ دیتن، یان گرنگی پێ نه‌هاتیه‌ دان، به‌لێ مه‌ ل ڤێ كابینێ سۆز یا پێدای كو هه‌موو شیانێن خوه‌ بۆ پێشخستنا كه‌رتێ چاندنێ و چاندن و پیشه‌سازیا خۆراكی و پێشخستنا ئابوورێ هه‌رێما كوردستانێ بده‌ینه‌ كاری.

پێدڤیه‌ ئه‌م بگه‌هینه‌ وی ئاستی كو پشت راست بین ئاسایشا خۆراكی ل هه‌رێما كوردستانێ دهێته‌ دابینكرن و مه‌ترسی ل سه‌ر ژیانا خه‌لكێ كوردستانێ نامینیت، هه‌روه‌كو دبینین چه‌ندین قه‌یران و گرفت ل جیهانێ په‌یدابووینه‌، ب تایبه‌تی پشتی شه‌ر و پێكدادانێن ل جیهانێ رووداین هه‌روه‌كو ل ئۆكرانیا هه‌ی، دبینین چه‌ند كاریگه‌ری ل سه‌ر كه‌رتێ چاندنێ و خوارنێ ل جیهانێ هه‌بوو و كاریگه‌ری ل سه‌ر هه‌رێما كوردستانێ ژی هه‌بوو، له‌وما پێدڤیه‌ گرنگیه‌كا زێده‌تر ب به‌رهه‌مێ ناڤخوه‌ بده‌ین و زێده‌تر بكه‌ین، زێده‌تر پشت به‌ستنێ ب خوه‌ بكه‌ین ب رێیا زێده‌كرنا به‌رهه‌مێ خۆمالی نه‌كو پێدڤیا خوه‌ دابین بكه‌ین، به‌لكو ببینه‌ ژێده‌رێ به‌رهه‌مئینانا خۆراكی بۆ پشكێن دی یێن رۆژهه‌لاتا ناڤین و هه‌كه‌ شیان هه‌بیت، بۆ وه‌لاتێن كه‌نداڤی و ئورۆپا ژی.

ل ده‌مێ بۆری، ب هاریكاریا جڤاتا وه‌زیران و وه‌زاره‌تێن چاندنێ و بازرگانیێ و وه‌زاره‌تێن په‌یوه‌ندیدار، چه‌ندین بزاڤ هاتنه‌ كرن، ل گه‌ل وه‌لاتێن دی ژی دانوستاندن هاته‌ كرن بۆ دیتنا بازارێن نوو بۆ ساخكرنا به‌رهه‌مێ خۆمالیێ كوردستانی، خوه‌شحالم كو سه‌ركه‌فتن ژی د ڤێ چه‌ندێ دا بده‌ستڤه‌هاتیه‌ و ل ده‌مه‌كێ نێزیك دێ ئه‌زموونه‌كا سه‌ركه‌فتی بینین و هیڤیدارم ئه‌نجامێن وێ دیارببن و ببیته‌ رێخوه‌شكه‌ر تاكو به‌رهه‌مێ ناڤخوه‌ بهێته‌ هنارتن بۆ ده‌رڤه‌ و بازارێن جیهانی ب به‌رهه‌مێ ناڤخوه‌یێ كوردستانێ ئاشنا بكه‌ین، ئه‌ڤه‌ ده‌لیڤه‌كا باشه‌ و ده‌لیڤێن زێده‌تر یێن كاری بۆ خه‌لكێ مه‌ و جوتیارێن مه‌ په‌یدا دكه‌ت.

ده‌مێ جوتیار به‌رهه‌مه‌كی به‌رهه‌م دئینیت، دڤێت كه‌رتێ پیشه‌سازی، بابه‌تێ ڤه‌گوهاستن و ئینان و برن، یان به‌رۆڤاژی و هنارتن بۆ ده‌رڤه‌، هه‌موو دێ بنه‌ ده‌لیڤێن كاری بۆ وان كه‌سێن د ڤان بواران دا كار دكه‌ن. له‌وما من چه‌ندین جاران یا گۆتی چاندن بناغێ پێشخستنا ئابوورێ هه‌ر وه‌لاته‌كی یه‌، هه‌كه‌ گرنگیێ پێ بده‌ین و پێشبێخین، كه‌رتێ چاندنێ ژی دێ پێشكه‌ڤیت.

راسته‌ مه‌ ده‌مه‌كێ گه‌له‌ك نه‌خوه‌ش و چه‌ندین قه‌یران ده‌ربازكرن، به‌لێ پێدڤیه‌ به‌رهه‌ڤ بین بۆ وێ چه‌ندێ هه‌كه‌ قه‌یران به‌رده‌وام بن، بشێین خوه‌ بگونجینین تاكو زیان نه‌گه‌هیته‌ خه‌لكێ مه‌، وه‌كو من باس كری زێده‌بوونا شه‌ر و ئالۆزیان ل جیهانێ، كاریگه‌ری ل سه‌ر زێده‌بوونا بهایێ سوته‌مه‌نیێ و زێده‌بوونا بهایێ كه‌ره‌ستێن خوارنێ ل هه‌موو جیهانێ كر. هه‌كه‌ هه‌مبه‌ركرنا خوه‌ ل گه‌ل هنده‌ك وه‌لاتێن ده‌وروبه‌ر، یان وه‌لاتێن جیهانێ ژی بكه‌ین، دڤێت وێ چه‌ندێ ل به‌رچاڤ بگرین كو حوكمه‌تا هه‌رێما كوردستانێ هه‌موو بزاڤه‌ك كریه‌ تاكو ئه‌ڤ هه‌موو فشاره‌ نه‌كه‌ڤیته‌ سه‌ر وه‌لاتیان. مه‌ چه‌ندین گاڤێن پێدڤی هاڤێتن چ ل كێمكرنا بهایێ هنارتنا كه‌ره‌ستێن ده‌ستپێكی یێن پێدڤی، یان داشكاندنا بهایێ كاره‌با وان كارگه‌ و فرنێن خوارنێ و نانی دروست دكه‌ن، حوكمه‌ت پشكداره‌ د راكرنا گرانیا باری تاكو ئه‌و باره‌ هه‌موو نه‌كه‌ڤیته‌ سه‌ر ملێ وه‌لاتیان. ئه‌وا د ده‌ستهه‌لاتا مه‌ دا بیت ژی دێ ئه‌نجامده‌ین تاكو بارێ وه‌لاتیێن مه‌ سڤك ببیت. پێدڤیه‌ وێ چه‌ندێ ل به‌رچاڤ وه‌ربگرین كو جیهان هه‌موو یا تووشی وێ قه‌یرانێ بووی و نه‌ تنێ هه‌رێما كوردستانێ ڤه‌گرتیه‌.

ئه‌م ژ چ وه‌لاته‌كێ دی كێمتر نینین، شیانێن ملله‌تێ مه‌ ژ كه‌سه‌كێ دی كێمتر نینه‌، ئه‌وا دشیانێن مه‌ دا بیت دێ ئه‌نجامده‌ین تاكو باشترێن رێ بۆ پێشخستنا ئابوورێ كوردستانێ و پێشخستنا چاندنێ و پیشه‌سازیێ ل كوردستانێ ئه‌بگرینه‌ به‌ر. هه‌روه‌سا شیانێن خه‌لكێ خوه‌ پێشبێخین بۆ وێ چه‌ندێ به‌رهه‌مێ خوه‌ زێده‌ بكه‌ن و پێشبێخن، تاكو ببنه‌ ژێده‌ره‌كێ باش بۆ ئابوورێ كوردستانێ ب گشتی.

ل ڤێرێ داخواز ژ هه‌موو زانكۆ و بسپۆرێن خوه‌ دكه‌ین، د هاریكار بن ل گه‌ل كه‌رتێ تایبه‌ت، ل گه‌ل كه‌رتێ گشتی و حوكمه‌تێ بۆ ڤه‌دیتنا رێیێن زانستی تاكو بزانین چاوان خوه‌ بگونجینین ل گه‌ل وێ گوهۆرینا سه‌قای كو دیسان بوویه‌ بابه‌ته‌كێ دی كو حیهان پێڤه‌ مژوول بووی.

داخوازا من ئه‌وه‌ ئه‌وا ب مه‌ دهێته‌ كرن رێیه‌كێ ببینین ب كێمترین مه‌زاختنا ئاڤێ به‌رهه‌مێ خوه‌ به‌رهه‌م بینین، چه‌ندین ساله‌ دبینین بارانێن پێدڤی نابارن، یان دبیته‌ هشكه‌سالی، ئه‌ڤ پرۆژێ ل ڤێرێ مه‌ دیت خانیێن كه‌سك كو پێدڤی ب ئاڤا كێمتره‌ بۆ چاندنێ یا پێدڤیه‌، ئه‌ڤه‌ ببیته‌ نه‌ریته‌ك بۆ وێ چه‌ندێ ئه‌ڤ پرۆژه‌ زێده‌ ببن، تاكو نه‌بینه‌ دیلێن كاریگه‌ریا سه‌قای ل سه‌ر مه‌.

سوپاسیا كه‌رتێ تایبه‌ت ل هه‌موو كوردستانێ دكه‌م كو هاریكارێ حوكمه‌تێ بوو و ل هه‌موو پارێزگه‌هێن كوردستانێ و ئیدارێن سه‌ربخوه‌ یێ پشته‌ڤان بوو، حوكمه‌ت ژی پشته‌ڤانه‌كا ب هێز بوو بۆ پاراستنا مافێن وان و پێشڤه‌برنا وێ په‌یوه‌ندیا دروست د ناڤبه‌را كه‌رتێ گشتی و تایبه‌ت دا هه‌ی، زێده‌تر پرۆژان بجهبینن و پشته‌ڤانیا حوكمه‌تێ بكه‌ن، ئه‌م ژی دێ پشته‌ڤانێن هه‌وه‌ بین.

هه‌ولێر، قائید میرۆ

جڤاتا نوونه‌ران و حوكمه‌تا ئیراقێ لبه‌ره‌ سیسته‌مێ سه‌ربازیا ب زۆری ڤه‌گه‌ڕیت و په‌رله‌مانتاره‌كێ كورد ژی ئاشكراكر، سیسته‌مێ سه‌ربازیا ب زۆری دێ هه‌ڤسه‌نگیێ بۆ له‌شكرێ ئیراقێ ڤه‌گه‌ڕینیت و د ده‌مێ نوكه‌ دا رێژه‌یا كوردان دناڤا له‌شكرێ ئیراقێ زۆر یا كێمبووی هه‌روه‌سا دبێژیت، ئه‌ڤ سیسته‌مه‌ دێ دوماهیێ ب سیسته‌مێ میلشیایی ئینیت و هه‌موو وه‌لاتیه‌ك ب گۆره‌ی قانوونێ ماف یێ هه‌ی خزمه‌تا سه‌ربازی بكه‌ت.

شێروان دوبه‌ردانی، ئه‌ندامێ جڤاتا نوونه‌رێن ئیراقێ ژ فراكسیۆنا پارتی دیموكراتی كوردستان بۆ رۆژناما ئه‌ڤرۆ گۆت” لژنا به‌رگریێ و ئاسایشێ ل جڤاتا نوونه‌رێن ئیراقێ مژوولی به‌رهه‌ڤكرنا پڕۆژه‌ قانوونا سه‌ربازیا ب زۆریه‌، پشتی پڕۆژه‌ دهێته‌ به‌رهه‌ڤكرن و پێشكێشی جڤاتا نوونه‌ران دهێته‌كرن دێ كه‌ڤیته‌ ده‌نگدانێ و هه‌ر ده‌مێ ده‌نگێن پێدڤی بده‌ستڤه‌ ئینان بێگومان دێ سیسته‌مێ وه‌رگرتنا سه‌ربازان ل ئیراقێ بیته‌ ب شێوه‌یێ ب زۆری، ئانكو ب گۆره‌ی سالا ژدایكبوونێ دێ سه‌رباز بۆ ناڤا رێزێن له‌شكرێ ئیراقێ هێنه‌ وه‌رگرتن، به‌لێ وه‌رزێ ده‌ركرنا قانوونان ل جڤاتا نوونه‌ران یێ ب دوماهی هاتی و پڕۆژه‌ دێ كه‌ڤیته‌ پشتی هه‌یڤا ته‌مووزا ئه‌ڤساله‌”.

دوبه‌ردانی دیاركر ژی” دگه‌ل به‌رهه‌ڤكرنا ڤێ پرۆژه‌ قانوونێ،  پێدڤی ب رێكه‌فتنا سیاسی ژی یا هه‌ی،  ب دیتنا من سیسته‌مێ سه‌ربازیا ب زۆری سیسته‌مه‌كێ باش و سه‌ركه‌فتیه‌ و دێ كاریگه‌ریێن خوه‌ هه‌بن لسه‌ر له‌شكرێ ئیراقێ، چونكه‌ د ده‌مێ نوكه‌ دا هه‌ژماره‌كا زۆرا به‌رچاف یا سه‌ربازێن ئیراقێ ژیه‌كێ مه‌زن هه‌یه‌ و نابیت سه‌ربازێن له‌شكری ژیه‌كێ مه‌زن هه‌بیت، به‌رۆڤاژی پێدڤیه‌ سه‌ربازێن ئێراقی ژ ته‌خا گه‌نجان پێك بهێت و سه‌ربازێن نوكه‌ بهێنه‌ خانه‌نشین كرن، دامه‌زراندن ژی نینه‌ بۆ له‌شكرێ ئیراقێ، ئه‌ڤه‌ژی بوویه‌ ئه‌گه‌ر زێده‌تر ب شێوه‌یێ گرێبه‌ست سه‌رباز بهێنه‌ دامه‌زراندن و یێن به‌ری نوكه‌ هاتینه‌ دامه‌زراندن ژیێ وان گه‌هشتیه‌ سه‌ر ٤٠ سالیێ”.

شێروان دوبه‌ردانی ئاماژه‌كر” مفایه‌كێ دی ژی ژ سیسته‌مێ سه‌ربازیا ب زۆری یا هه‌ی ئه‌وژی هه‌موو پێكهاتێن ئیراقێ دێ پشكداربن دناڤا رێزێن له‌شكرێ ئیراقێ دا و هه‌موو وه‌لاتی بێی جوداهیا نه‌ته‌وی و مه‌زهه‌بی و ئاینی ماف هه‌یه‌ پشكداریێ د رێزێن له‌شكرێ ئیراقێ دا بكه‌ن، هه‌روه‌سا بۆمه‌ وه‌كو كورد باشه‌ ئه‌و سیسته‌مه‌ بهێته‌ بجهئینان، ژ به‌ر كو د ده‌مێ نوكه‌ دا رێژه‌یا كوردان دناڤا له‌شكرێ ئیراقێ دا گه‌له‌ك یا كێمه‌ و هه‌كه‌ بهێت و ب گۆره‌ی سالا ژدایكبوونێ خه‌لك بهێته‌ وه‌رگرتن دێ كورد و عه‌ره‌ب و توركومان و كریستیان و كاكه‌یی و ئێزدی پێكڤه‌ هه‌موو وه‌ك ئێك هێنه‌ وه‌رگرتن و خزمه‌تا سه‌ربازی كه‌ن، ئانكو دێ هه‌ڤسه‌نگی ڤه‌گه‌ڕیت بۆ له‌شكرێ ئیراقێ كو نوكه‌ ئه‌و هه‌ڤسه‌نگی نینه‌ و كێمترین رێژه‌یا كوردان دناڤا له‌شكرێ ئیراقێ دا هه‌نه‌، ئه‌ڤه‌ د ده‌مه‌كی دایه‌ نابیت كورد بهێنه‌ بێ به‌هركرن ناڤا له‌شكرێ ئیراقێ، ژلایه‌كێ دیڤه‌ هه‌ژماره‌كا زۆر یا هێزێن میلیشیان یێن هه‌ین و دێ دوماهی ب میلشیان ژی هێت”.

ئه‌ڤرۆ:

پشتی كۆمبوونا دوهی سێشه‌مبی 7 خزیرانا 2022، هه‌ر ئێك ژ پارتی دیموكراتی كوردستان و ئێكه‌تی نیشتمانی كوردستان به‌یاننامه‌كا هه‌ڤپشك به‌لاڤكر.

د وێ به‌یاننامێ دا هاتیه‌” هه‌ردو ئالی د هه‌ڤرابوون ل سه‌ر پێدڤیا نڤیسینا دستوورێ هه‌رێما كوردستانێ و بۆ ڤێ مه‌به‌ستێ پێدڤیه‌ ده‌ست ب به‌رهه‌ڤیێن قانوونی بهێته‌ كرن”.

د پشكه‌كا دی یا به‌یانناما هه‌ڤپشك یا پارتی و ئێكه‌تیێ دا هاتیه‌” پرسا هه‌لبژارتنێن په‌رله‌مانێ كوردستانێ و كۆمسیۆنا بلند یا هه‌لبژارتن و راپرسیان ل هه‌رێما كوردستانێ وه‌كو دو پرسێن نیشتمانی یێن گرنگ پێدڤی ب دانوستاندنێن زێده‌تر و سازانا هه‌موو هێزێن سیاسی یێن هه‌رێما كوردستانێ یه‌ بۆ گه‌هشتن ب رێككه‌فتنه‌كا گشتگیر”.

پارتی و ئێكه‌تی د وێ كۆمبوونێ دا سه‌ره‌رای باسكرنا پرسا ره‌شنڤیسێ دستوورێ هه‌رێما كوردستانێ و هه‌لبژارتنێن په‌رله‌مانێ كوردستانێ بریار دا كۆمبوونێن د ناڤبه‌را هه‌ردو ئالیان دا ل دۆر پرسێن جهێ گرنگیێ به‌رده‌وام بن.

ئه‌ڤرۆ:

دڤێت خزمه‌تكرن و بده‌ستڤه‌ئینانا رازیبوونا وه‌لاتیان ئارمانجا سه‌ره‌كی یا به‌رپرس و فه‌رمانبه‌رێن حوكمه‌تێ بیت

ژ ئه‌گه‌رێ پێكڤه‌ كاركرنێ و هاریكاریكرنا وه‌لاتیێن هه‌رێمێ ل گه‌ل ده‌زگه‌هێن ئه‌منی، نوكه‌ هه‌رێما كوردستانێ جهه‌كێ ئارامه‌ د ده‌ڤه‌ره‌كا نه‌ ئارامدا

سه‌رۆكێ حوكمه‌تا هه‌رێما كوردستانێ، مه‌سرور بارزانی، سه‌ره‌دانا وه‌زاره‌تا ناڤخوه‌ كر و ئالیێ رێبه‌ر ئه‌حمه‌د وه‌زیرێ ناڤخوه‌ پێشوازی لێ هاته‌ كرن.

پاشی سه‌رۆكێ حوكمه‌تێ، ب به‌رهه‌ڤبوونا وه‌زیرێ ناڤخوه‌ و بریكارێ وه‌زاره‌تێ و پارێزگه‌ران و سه‌رپه‌رشتێن ئیدارێن سه‌ربخوه‌ و شیره‌تكارا و رێڤه‌به‌رێن گشتی یێن وه‌زاره‌تێ، سه‌رپه‌رشتیا كۆمبوونه‌كا تایبه‌ت ب وه‌زاره‌تا ناڤخوه‌ ڤه‌ كر.

وه‌زیرێ ناڤخوه‌ پۆخته‌ك ده‌رباره‌ی كار و پرۆژێن وه‌زاره‌تێ و ئه‌و چاكسازیێن د وه‌زاره‌تا ناڤخوه‌ دا هاتینه‌ كرن، د چارچۆڤێ پلان و كارناما حوكمه‌تا هه‌رێمێ به‌رچاڤكر، ب تایبه‌تی د رێكخستنا ده‌زگه‌هێن وه‌زاره‌تێ و پێشكێشكرنا خزمه‌تگوزاریان بۆ وه‌لاتیان دبوارێن هاتووچو و نشینگه‌ و پاراستنا ئاسایش و سه‌قامگیریا هه‌رێمێ ب هاریكاری و هه‌ماهه‌نگیا جڤاتا ئاسایشا هه‌رێما كوردستانێ.

سه‌رۆكێ حوكمه‌تێ، د په‌یڤه‌كێ دا ئاماژه‌ ب گرنگیا وه‌زاره‌تا ناڤخوه‌ كر، كو وه‌زاره‌ته‌كا مه‌زن و گرنگه‌ و ئێك ژ سه‌ركه‌فتیترین وه‌زاره‌تێن هه‌رێما كوردستانێ یه‌، كو سه‌ره‌رای وێ چه‌ندێ وه‌زاره‌ته‌كێ خزمه‌تگوزاریه‌ و چه‌ندین جۆرێن خزمه‌تان پێشكێشی وه‌لاتیان دكه‌ت، د هه‌مان ده‌م دا جێبه‌جێكارا قانوونێ یه‌ و به‌رپرسیاره‌ ژی ژ پاراستنا ئاسایش و سه‌قامگیریا وه‌لاتیان ب هه‌ماهه‌نگی و هاریكاریا ده‌زگه‌هێن په‌یوه‌ندیدارێن دی كو جهێ خوه‌شحالیێ و ده‌ستخوه‌شیێ یه‌ و هه‌ماهه‌نگیه‌كا باش یا هه‌ی د ناڤبه‌را وه‌زاره‌تا ناڤخوه‌ و جڤاتا ئاسایشێ ژ پێخه‌مه‌ت پاراستنا وه‌لاتیێن هه‌رێما كوردستانێ، ژ ئه‌گه‌رێ ڤێ هه‌ماهه‌نگیێ و پێكڤه‌ كاركرنێ و ب ئه‌گه‌رێ هاریكاریكرنا وه‌لاتیێن هه‌رێمێ ل گه‌ل ده‌زگه‌هێن ئه‌منی، نوكه‌ هه‌رێما كوردستانێ جهه‌كێ ئارامه‌ د ده‌ڤه‌ره‌كا نه‌ ئارامدا.

مه‌سرور بارزانی، دووپاتی ل وێ چه‌ندی كر، كو پێدڤیه‌ قانوون ب یه‌كسانی ل سه‌ر هه‌موو كه‌سه‌كی دا بهێته‌ بجهئینان و نابیت كه‌س د سه‌ر قانوونێ دا بیت، به‌رپرسێن وه‌زاره‌تا ناڤخوه‌ ژی راسپاردن كو د پرسا بجهئینانا قانوونێ و سزادانا تۆمه‌تباران، ل گه‌ل ئه‌وێن بووینه‌ گه‌ف ل سه‌ر ژیانا وه‌لاتیان و جڤاكی، گه‌له‌ك د توند بن و هیچ خه‌مساریه‌كێ نه‌كه‌ن د پرسا سزاگه‌هاندنا وان دا، ب تایبه‌تی نه‌هێلانا توندوتیژیێ به‌رامبه‌ر ئافره‌تان و هه‌روه‌سا روو ب رووبوونا ئه‌وێن تاوانێن رێكخستی ئه‌نجام دده‌ن و بازرگانیێ ب مادێن هۆشبه‌ر دكه‌ن كو دخوازن ب وێ رێ شێوازێ جڤاكێ كوردستانی تێك بده‌ن، له‌وما پێدڤیه‌ ب توندترین شێوه‌ به‌رهنگاریا ڤان جۆره‌ تاوانان ببن.

سه‌رۆكێ حوكمه‌تا هه‌رێمێ، هه‌روه‌سا ئاماژه‌ ب زۆربوونا روودانێن هاتنووچونێ كر و باس ل گرنگیا بجهئینانا رێنمایێن هاتنووچونێ و سزادانا وان شۆفێران كر كو گه‌له‌ك بله‌ز و دوور ژ هه‌موو رێنمایان، ترۆمبێلان د هاژون.

سه‌رۆكێ حوكمه‌تا هه‌رێمێ دووپاتكر كو پێدڤیه‌ ل فه‌رمانگه‌هێن حوكمه‌تێ، گه‌له‌ك ب رێز ڤه‌ پێشوازی ل وه‌لاتیان بهێته‌ كرن و ب باشترین و ب شایسته‌ترین شێوه‌، خزمه‌تا وان بهێته‌ كرن و دڤێت خزمه‌تكرن و بده‌ستڤه‌ئینانا رازیبوونا وه‌لاتیان، ئارمانجا سه‌ره‌كی یا به‌رپرس و فه‌رمانبه‌رێن حوكمه‌تێ بیت.