ئه‌ڤرۆ:

جێگرێ سه‌رۆكێ په‌رله‌مانێ كوردستانێ راگه‌هاند، ل رۆژا پێنجشه‌مبی 9 ڤێ هه‌یڤێ هه‌موو ئالیێن سیاسی یێن هه‌رێما كوردستانێ ب پشكداریا هنارتیا گشتی یا نه‌ته‌ویچن ئێكگرتی ل ئیراقێ دێ كۆمبن.

هێمن هه‌ورامی، جێگرێ سه‌رۆكێ په‌رله‌مانێ كوردستانێ د داخۆیانیه‌كێ دا دووپاتكر” هه‌كه‌ ئیراده‌كا باش ل ده‌ف هه‌موو ئالیێن سیاسی هه‌بیت، ئه‌م وه‌كو سه‌رۆكایه‌تیا په‌رله‌مانێ كوردستانێ د رژدین ل سه‌ر وێ چه‌ندێ هه‌لبژارتنێن په‌رله‌مانێ كوردستانێ ل ده‌مێ خوه‌ بهێنه‌ ئه‌نجامدان”.

هه‌ورامی گۆت ژی” كۆمبوونا پێنجشه‌مبیا داهاتی ل ده‌ف نێچیرڤان بارزانی سه‌رۆكێ هه‌رێما كوردستانێ، هه‌موو هێز و ئالیێن سیاسی ل هه‌رێما كوردستانێ ب پشكداریا (جینین پلاسخارت) هنارتیا گشتی یا رێكخراوا نه‌ته‌وێن ئێكگرتی ل ئیراقێ دێ كۆمبن، هه‌كه‌ ئیراده‌كا سیاسی یا باش هه‌بیت، بشێین بله‌ز هه‌ر راستڤه‌كرنه‌كا پێدڤی بهێته‌ كرن و كۆمسیۆن بهێته‌ كاراكرن ب دیتنا من دشیاندایه‌ ل رۆژا 1 /10 هه‌لبژارتن بهێنه‌ ئه‌نجامدان، هه‌كه‌ ژ روویێ ته‌كنیكی ڤه‌ دشیاندا نه‌بوو ل وی ژڤانی بهێنه‌ ئه‌نجامدان وی ده‌می دبیت ئاخڤتن ل سه‌ر بهێته‌ كرن بۆ وێ چه‌ندێ ل نێزیكرین ده‌م بهێنه‌ ئه‌نجامدان”.

جێگرێ سه‌رۆكێ په‌رله‌مانێ كوردستانێ پتر رۆهنكر” د نوكه‌ دا بلا هه‌موو بزاڤێن مه‌ بۆ وێ چه‌ندێ بن هه‌لبژارتنێن په‌رله‌مانێ كوردستانێ د ده‌مێ خوه‌ یێ دیاركریدا بهێنه‌ ئه‌نجامدان،      ژ به‌ر كو پاشخستنا هه‌لبژارتنان دیارده‌كا گونجای نینه‌ بۆ ناڤه‌ده‌نگی و پرۆسا سیاسی و دیموكراسی ل هه‌رێما كوردستانێ”.

هه‌روه‌سا گۆت” كۆمبوونا ئالیێن سیاسی ل ده‌ف سه‌رۆكێ هه‌رێما كوردستانێ دێ هاریكار بیت بۆ په‌رله‌مانێ كوردستانێ، بۆ وێ چه‌ندێ ئالیێن سیاسی بگه‌هنه‌ رێككه‌فتنێ”.

هه‌ولێر، قائید میرۆ

شیره‌تكاره‌كێ سه‌رۆكایه‌تیا جڤاتا وه‌زیرێن هه‌رێما كوردستانێ هۆشداریێ ل دۆر داگیركرنا ئه‌ردێ وه‌لاتیێن كورد ل ده‌ڤه‌رێن كوردستانی یێن داگیركری دده‌ت و دبێژیت، پیلانه‌ك هه‌یه‌ ل خانه‌قین هه‌تا شنگالێ بۆ داگیركرنا زه‌ڤیێن جوتیارێن كورد و داخوازكر، چاره‌سه‌ركرنا ئاریشا ده‌ڤه‌رێن كوردستانی ببیته‌ مه‌رجێ به‌روه‌خت بۆ پشكداریكرنێ د حوكمه‌تا نوو یا ئیراقێ دا.

دژوار فایه‌ق، شیره‌تكارێ سه‌رۆكایه‌تیا جڤاتا وه‌زیران بۆ رۆژناما (ئه‌ڤرۆ) گۆت” پرۆسا ب ئه‌ره‌بكرنێ ل سالێن سیهان ژ چه‌رخێ بۆری یا هاتیه‌ ده‌ستپێكرن و ئاریشه‌یه‌كا گه‌له‌ك مه‌زنه‌ هاتیه‌ دروستكرن و زیانێن مه‌زن  ب كوردان گه‌هاندینه‌، ب ئه‌ره‌بكرنا ده‌ڤه‌رێن كوردستانی گرێدای ب وی مێشكێ ل به‌غدا هه‌ی كو حوكمرانه‌، نوكه‌ ئیراق بناف ده‌وله‌ته‌ و ده‌وله‌ت ژی نینه‌، جڤاتا نوونه‌رێن ئیراقێ بڕیاردایه‌ ئه‌ردێ وه‌لاتیێن كورد یێ كو ل سه‌رده‌مێ به‌رێ ب ئه‌ره‌بكرنێ هاتیه‌ داگیركرن بهێته‌ ڤه‌گه‌ڕاندن، هه‌روه‌سا بڕیارا سه‌رۆكایه‌تیا جڤاتا وه‌زیرێن ئیراقێ هه‌یه‌، به‌لێ خه‌لكه‌ك یێ هه‌ی ل ئیراقێ یێ به‌رهه‌ڤ نینه‌ بۆ بجهئینانا بڕیارا ڤه‌گه‌ڕاندنا ئه‌ردێ كوردان، هه‌تا ئه‌ره‌بێن هاورده‌ به‌ری نوكه‌ ٢٠ ملیۆن دینار قه‌ره‌بوو دگه‌ل پارچه‌كا ئه‌ردی وه‌رگرتیه‌، به‌لێ به‌رده‌وام ئه‌ره‌بێن شۆفێنی دخوازن ئاریشه‌یان بۆ كوردان دروست بكه‌ن، به‌ری نوكه‌ و هه‌ر ژ دامه‌زراندنا ده‌وله‌تا ئیراقێ هه‌تا سالا ٢٠٠٣ێ حوكمه‌تێن دیكتاتۆری ل به‌غدا هه‌بو، به‌لێ نوكه‌ حوكمه‌ته‌ك ل به‌غدا هه‌یه‌ ژبلی ده‌ستێوه‌ردانێن ده‌ره‌كی حوكمه‌تا نوكه‌ یا ئیراقێ ل سه‌ر بنه‌مایێ دیكتاتۆریه‌تا زۆرینه‌ حوكمێ ئیراقێ دكه‌ت، چونكه‌ ماده‌م ب زۆرینه‌ و كه‌مینه‌ ئیراق بڕێڤه‌بچیت، كورد نه‌شێن د چو بڕیاره‌كێ دا ب ب هیڤیا ٥٠ هه‌تا ٦٠ په‌رله‌مانتار و دو سێ وه‌زیران ب سه‌ركه‌ڤن،  ئیراق بناڤ وه‌لاته‌كێ فیدڕالیه‌، به‌لێ مخابن ئیراقێ چو په‌یوه‌ندی ب فیدڕالیێ ڤه‌ نینه‌، خه‌لكه‌ك ل باشوورێ ئیراقێ ب بڕیاره‌كا نه‌ مرۆڤانه‌ و شۆفێنی هاتیه‌ ئه‌ردێ كوردان داگیركریه‌ و ب بڕیارا جڤاتا نوونه‌رێن ئیراقێ دڤێت ئه‌ردێ داگیركری بهێته‌ ڤه‌گه‌ڕاندن بۆ خه‌لكێ كوردستانێ، حوكمه‌تا ئیراقێ ژی به‌رپرسه‌ ل هه‌مبه‌ر ڤێ پێلا ب ئه‌ره‌بكرنێ ئه‌وا نوكه‌ ل ده‌ڤه‌رێن كوردستانێ بڕێڤه‌دچیت”.

شیره‌تكارێ سه‌رۆكایه‌تیا جڤاتا وه‌زیران گۆت ژی” پشتی روودانێن ١٦ی ئۆكتۆبه‌رێ كورد د ئێكگرتی نه‌بوون د و لاواز بوون هه‌مبه‌ر ئیراقێ، ئه‌ڤه‌ژی بویه‌ ئه‌گه‌ر ئه‌ره‌بێن شۆفێنی زێده‌تر گڤاشتنان بكه‌نه‌ سه‌ر وه‌لاتیێن كورد ل خانه‌قین و داقووق و سه‌رگه‌ڕان و كه‌ركووك و خورماتوو هه‌تا  مه‌خموور و شنگالێ پێله‌كا ب ئه‌ره‌بكرنێ ده‌ستپێكریه‌ و مه‌ترسیێن مه‌زن هه‌نه‌ لسه‌ر كوردان، داخوازێ ژ جووتیارێن كورد دكه‌م هه‌ر چاوابیت ئه‌ردێ خوه‌ نه‌فرۆشن، چونكه‌ ره‌وشا ئیراقێ هه‌ر هۆسا نابیت و دێ ئه‌ردێ كوردان بۆ هێته‌ ڤه‌گه‌ڕاندن و بڕیار ده‌رچوویه‌”.

دژوار فایه‌ق ئاماژه‌كر” پێدڤیه‌ كوردان پلان هه‌بیت بۆ ڤه‌گه‌ڕاندنا ده‌ڤه‌رێن كوردستانی یێن داگیركری و باره‌گه‌هه‌كێ ئالیێن سیاسی یێن كوردی ل به‌غدا هه‌بیت و تیمه‌كا به‌رگریێ هه‌بیت ل به‌غدا كو هه‌موو ئالیێنسیاسی تێدابن، هه‌تا ده‌مێ ئاریشه‌یه‌ك په‌یدادبیت ئێكسه‌ر ل دادگه‌ها فیدڕال سكالایێ تۆمار بكه‌ن به‌ری ئیراق سكالایێ تۆمار بكه‌ت”.

خویاكر” بڕیاربوو ل سالا ٢٠٠٧ێ مادێ ١٤٠ بهێته‌ بجهئینان به‌لێ ئه‌ڤ چه‌نده‌ نه‌هاته‌ كرن و مه‌ژی وه‌كی هه‌رێما كوردستانێ خه‌مساری كریه‌ و سكالا نه‌هاته‌ تۆماركرن، هه‌روه‌سا دده‌مێ دانوستاندنان دا بۆ پێكئینانا حوكمه‌تا نوو یا ئیراقێ چاره‌سه‌ركرنا ئاریشا ده‌ڤه‌رێن كوردستانێ یێن دكه‌ڤنه‌ د چارچوڤێ مادێ ١٤٠ یێ دستوورێ ئیراقێ بكه‌نه‌ مه‌رجێ به‌روه‌خت و ده‌نگی نه‌ده‌نه‌ سه‌رۆك وه‌زیرێن داهاتی هه‌تا سۆزێ نه‌ده‌ت كار بۆ بجهئینانا مادێ ١٤٠ بكه‌ت و ده‌ڤه‌رێن كوردستانی بهێنه‌ ڤه‌گه‌ڕاندن بۆ سه‌ر هه‌رێما كوردستانێ، چاره‌سه‌ریا وان ده‌ڤه‌ران تنێ ب رێیا قانوونێ دهێته‌كرن، ژ به‌ر كو ده‌مێ ره‌وش هاته‌ ئاساییكرن و پێشمه‌رگه‌ ڤه‌گه‌ڕیا ده‌ڤه‌رێ، ئه‌ره‌بێن شۆڤێنی نه‌شێن زۆرداریێ ل وه‌لاتیێن كورد بكه‌ن”.

ئه‌ڤرۆ:

به‌رپرسێ په‌یوه‌ندیێن كوردستانی و ئیراقی یێن پارتی دیموكراتی كوردستان، راگه‌هاند، پارتی سه‌ره‌دانا هه‌موو ئالیێن سیاسی ل ئیراقێ و هه‌رێما كوردستانێ كر بۆ وێ چه‌ندێ بشێت خالێن هه‌ڤپشك كۆمڤه‌كه‌ت و بۆچوونه‌كا هه‌ڤپشك دروست بكه‌ت.

عه‌لی حسێن، به‌رپرسێ په‌یوه‌ندیێن كوردستانی و ئیراقی یێن پارتی دیموكراتی كوردستان، گۆت ” پرۆسا سیاسی پشتی هه‌لبژارتنێن ڤێجارێ ئالۆزیه‌ك یا پێڤه‌ دیاره‌ و هه‌تا نوكه‌ ژی به‌رده‌وامی یا هه‌ی، ئه‌ڤه‌ سه‌ره‌رای وێ چه‌ندێ كو پارتی سه‌ره‌دانا هه‌موو ئالیان ل ئیراقێ و هه‌رێما كوردستانێ كر بۆ وێ چه‌ندێ بشێت خالێن هه‌ڤپشك كۆمڤه‌كه‌ت و بۆچوونه‌كا هه‌ڤپشك دروست بكه‌ت”.

گۆت ژی” خالێن هه‌ڤپشك د ناڤبه‌را پارتی دیموكراتی كوردستان و ئێكه‌تی نیشتمان كوردستان دا هه‌بوون و ل هه‌رێما كوردستانێ هه‌ڤپه‌یمانن، به‌لێ مخابن د ده‌مێ بۆری دا د ناڤبه‌را پارتی و ئێكه‌تیێ دا دووركه‌فتنه‌ك هه‌بوو”.

به‌رپرسێ په‌یوه‌ندیێن كوردستانی و ئیراقی یێن پارتی دیموكراتی كوردستان پتر رۆهنكر” د كۆمبوونا 8 نیسانێ دا یا جڤاتا سه‌ركردایه‌تیا پارتی دیموكرایت كوردستان، سه‌رۆك مه‌سعود بارزانی بریاره‌ دا ده‌رگه‌هه‌كی ل گه‌ل ئێكه‌تی نیشتمان كوردستان ڤه‌كه‌ین بۆ وێ چه‌ندێ بشێین وێ ره‌وشا ئالۆز نه‌هێلین، پشتی وێ چه‌ندێ ژی نێچیرڤان بارزانی سه‌ره‌دانا ده‌ڤه‌را سلێمانیێ كر و ل گه‌ل ئێكه‌تیێ و ئالیێن دی یێن سیاسی كۆمبوو بۆ دیتنا رێچاره‌كێ بۆ كێشێن دناڤ هه‌رێما كوردستانێ و ئیراقێ دا”.

هه‌روه‌سا خویاكر” نوكه‌ گرفت ل ئیراقێ زێده‌تر گرێداینه‌ ب مالا شیعی ڤه‌ بۆ دیاركرنا سه‌رۆك وه‌زیرێن داهاتی ل ئیراقێ، نه‌كو گرفتا سه‌رۆك كۆماری”.

ئاماژه‌كر” د كۆمبوونا ڤێ دووماهیێ دا د ناڤبه‌را پارتی دیموكراتی كوردستان و ئێكه‌تی نیشتمانی كوردستان دووپات هاته‌ كرن ل سه‌ر وێ چه‌ندێ كو پێدڤیه‌ پێكڤه‌بین بۆ چاره‌سه‌ركرنا كێشان و هنده‌ك بابه‌تان بكه‌ینه‌ ئه‌ولویه‌تا كارێن خوه‌، هه‌روه‌سا پرسا هه‌لبژارتنێن هه‌رێما كوردستانێ ژی باس ل سه‌ر هاته‌ كرن كو نابیت ده‌مێ ژیێ په‌رله‌مانێ كوردستانێ بهێته‌ زێده‌كرن”.

عه‌لی حسێن دیاركر ژی” د دووماهی كۆمبوونا پارتی و ئێكه‌تیێ دا تێگه‌هشتنه‌كا باش د ناڤبه‌را هه‌ردو ئالیان دا هه‌بوو”.

سه‌باره‌ت ره‌وشا ئیراقێ، به‌رپرسێ په‌یوه‌ندیێن كوردستانی و ئیراقی یێن پارتی دیموكراتی كوردستان دبێژیت” دڤێت كورد ببنه‌ پشكه‌ك ژ چاره‌سه‌ریا قه‌یرانان ل ئیراقێ، ئه‌ڤه‌ ژبلی وێ چه‌ندێ كو هه‌تا نوكه‌ هیچ پێشهاته‌كێ ئه‌رێنی نینه‌، به‌لێ پێدڤیه‌ كورد به‌رژه‌وه‌ندیێن خوه‌ بپارێزن”.

هه‌ولێر، قائید میرۆ

پێله‌كا دی یا ب ئه‌ره‌بكرنێ ل ده‌ڤه‌رێن كوردستانێ ل خانه‌قین هه‌تا شنگالێ ده‌ستیێكریه‌ و سه‌رۆكا لژنا ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ ل په‌رله‌مانێ كوردستانێ ئاشكراكر، به‌رپرسێن وان ده‌ڤه‌ران ده‌رگه‌ ل هه‌مبه‌ر پرۆسا ب ئه‌ره‌بكرنێ ڤالاكریه‌ و ب پیلان كار بۆ وێ چه‌ندێ دهێته‌كرن رێژه‌یا وه‌لاتیێن ئه‌ره‌ب هه‌مبه‌ری كوردان زێده‌ بكه‌ن، هه‌تا ل پاشه‌ڕۆژێ بكار بینن ده‌مێ سه‌رژمێری دهێته‌ ئه‌نجامدان.

جوان رۆژبه‌یانی، سه‌رۆكا لژنا ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ ل په‌رله‌مانێ كوردستانێ بۆ رۆژناما (ئه‌ڤرۆ) گۆت” ئه‌م چاڤدێریا ره‌وشا ده‌ڤه‌رێن كوردستانێ دكه‌ین، ب مخابنی ڤه‌ دێ بێژین پێله‌كا دژوار یا ب ئه‌ره‌بكرنێ ل ده‌ڤه‌رێن كوردستانی یێن سنورێ مادێ ١٤٠ دهێته‌ بجهئینان، كه‌س نینه‌ پارێزگاریێ ل خه‌لكێ ڤان ده‌ڤه‌ران بكه‌ت و به‌رهنگاری پیلانا ب ئه‌ره‌بكرنێ ببیت، به‌رپرسێن وان ده‌ڤه‌رێن دهێنه‌ ب ئه‌ره‌بكرن وان بخوه‌ ده‌رگه‌ ل هه‌مبه‌ر ب ئه‌ره‌بكرنێ ڤه‌كریه‌، وه‌لاتیێن بناڤێ ب ئه‌ره‌بكرنێ ژی دهێنه‌ ده‌ڤه‌رێن كوردستانی هه‌موو ئه‌ون یێن پشتی پڕۆسا ئازادیا ئیراقێ ب گۆره‌ی دستووری و ب رێیا نڤیسینگه‌هێن مادێ ١٤٠ هاتینه‌ قه‌ره‌بووكرن و ڤه‌گه‌ڕیاینه‌ ده‌ڤه‌رێن به‌رێ یێن ئه‌و ژی هاتین بۆ سه‌ر ئه‌ردێ كوردان، به‌لێ نوكه‌ پیلان هه‌یه‌ بۆ زێده‌كرنا رێژه‌یا ئه‌ره‌بێن هاورده‌ بۆ ده‌ڤه‌رێن كورد تێدا، هه‌تا دیموگرافیا وان ده‌ڤه‌ران بهێته‌ گوهۆڕین و ل پاشه‌رۆژێ هه‌ر سه‌رژمێریه‌ك بهێته‌ ئه‌نجامدان رێژه‌یا كوردان كێم ده‌ركه‌ڤیت، لژنه‌یا ده‌ڤه‌رێن كوردستانێ یێن ده‌رڤه‌ی ئیدارا هه‌رێمێ دده‌مێ نوكه‌دا هه‌ماهه‌نگی دگه‌ل جڤاتا نوونه‌رێن ئیراقێ هه‌یه‌، نوكه‌ حوكمه‌تا ئیراقێ كاربرێكه‌ره‌ و پشتی پێكئینانا حوكمه‌ته‌كا نوو ل ئیراقێ مه‌ پلان هه‌نه‌ بۆ ده‌ڤه‌رێن كوردستانی، چونكه‌ ئه‌ركێ حوكمه‌تا ئیراقێ هه‌ژماره‌ك لژنه‌ هه‌نه‌ بۆ بجهئینانا مادێ ١٤٠ یێ دستووری و ئاساییكرنا ره‌وشا وان ده‌ڤه‌ران ئه‌و لژنه‌ بهێنه‌ كاراكرن”.

جوان رۆژبه‌یانی ئاماژه‌كر” پێدڤیه‌ ئه‌ره‌بێن هاتینه‌ ده‌ڤه‌رێن كوردستانی بهێنه‌ ڤه‌گه‌ڕاندن بۆ جهێن وان، ئه‌م وه‌كی هه‌رێما كوردستانێ هندی دشیاندابیت دێ به‌رگریێ ژ ڤان ده‌ڤه‌ران و خه‌لكێ خوه‌ بكه‌ین، به‌لێ هنده‌ك تشته‌ك د ده‌ستهه‌لاتا هه‌رێما كوردستانێ دا نینن و پێدڤیه‌ حوكمه‌تا ئیراقێ كار بكه‌ت بۆ رێگریكرنێ ل پرۆسا ب ئه‌ره‌بكرنێ، به‌لێ حوكمه‌تا ئیراقێ یا به‌رهه‌ڤ نینه‌ بۆ وێ چه‌ندێ، ئه‌م چاڤه‌ڕێ دكه‌ین حوكمه‌تا ئیراقی یا نوو بهێته‌ پێكئینان، ئه‌ڤه‌ رێكارێن دی هه‌نه‌ بگرینه‌ به‌ر بۆ دژایه‌تیكرنا ب ئه‌ره‌بكرنێ، سالانه‌ دده‌مێ گه‌هشتنا به‌رهه‌مێ دان و دكاكێ جوتیارێن كورد ژئالیێ چه‌كدارێن داعشێ و خه‌لكه‌كێ شۆڤێنی ڤه‌ دهێته‌ سووتن و ئه‌ڤساله‌ ژی مه‌ترسی هه‌یه‌ بناڤێن جودا به‌رهه‌مێ جوتیارێن كورد بهێنه‌ سووتن، ئه‌م باوه‌رین ده‌ستێن چه‌په‌ل ب رێیا سووتنا به‌رهه‌مێ جوتیاران دخوازن وه‌لاتیێن كورد بێ هیڤی بكه‌ن ژ هه‌موو تشته‌كی و نه‌چار بكه‌ن ل ده‌ڤه‌رێن خوه‌ نه‌مینن، كه‌سه‌ك ژی نینه‌ ل وان ده‌ڤه‌ران خوه‌ بكه‌ته‌ خودانێن جوتیارێن كوردستانێ و وان بپارێزیت ژ هێرش و پیلانێن دژی كوردان دهێنه‌كرن”.

ئه‌ڤرۆ، سالار محه‌مه‌د دۆسكی:

فه‌رمانده‌كێ‌ پێشمه‌رگه‌ی ئاشكراكر كو بتنێ‌ هێزێن پێشمه‌رگه‌ی و له‌شكرێ ئیراقێ دشێن ئێمناهی و ته‌ناهیێ‌ بۆ شنگال ڤه‌گه‌رینن و داخوازا هاتنا ڤان هێزا هاتیه‌كرن، خویاكر ژی كو هێشتا هێزێن نه‌قانوونی ل ناڤ شنگالێ دا ماینه‌ و هه‌ر هێزه‌كێ‌ بۆ خوه‌ قایمقامه‌ك دانایه‌ و شنگال ژ سالا 2014 وه‌ره‌ پێدڤی ب پرۆژێن خزمه‌تگوزاری یه‌.

قاسم شه‌شۆ، فه‌رماندێ‌ فه‌رمانده‌یا هێزێن پێشمه‌رگه‌ی ل قه‌زا شنگالێ بۆ رۆژناما (ئه‌ڤرۆ) گۆت”داخوازێ‌ ژ هێزێن پێشمه‌رگێ‌ كوردستانێ‌ و له‌شكرێ ئیراقێ دكه‌م ل شنگالێ بنه‌جه ببن دا ته‌ناهی بۆ شنگالێ ڤه‌گه‌ریته‌ ڤه‌”.

قاسم شه‌شۆی زێده‌تر گۆت” پشتی هێرشا له‌شكرێ ئیراقێ بۆ سه‌ر گرۆپێن نه‌قانوونی ل شنگالێ گه‌له‌ك خێزان ژ شنگالێ ده‌ركه‌فتن و نوكه‌ ره‌وش یا ئارامه‌، به‌لێ‌ دهه‌مان ده‌م دا هه‌تا نوكه‌ رێككه‌فتنا د ناڤبه‌را هه‌ولێرێ‌ و به‌غدا ل دۆر ئاساییكرنا ره‌وشا شنگالێ نه‌هاتیه‌ بجهئینان و داخوازایا مه‌ هه‌ر ئه‌وه‌ له‌شكرێ ئیراقێ و پێشمه‌رگه‌ بهێن ل سنوورێن شنگالێ به‌لاڤ ببن دا ته‌ناهی بۆ ده‌ڤه‌رێ‌ ڤه‌گه‌ریت و خه‌لكێ‌ شنگالێ ئارام و ته‌نا بژیت و ئێمناهی یا ناڤ شنگالێ بۆ خه‌لكێ‌ شنگالێ بهێته‌ راده‌ستكرن”.

شه‌شۆی ئاماژه‌كر” ئاڤه‌دانكرنا شنگالێ پێدڤی ب ته‌ناهیێ‌ یه‌ و هێزێن نه‌قانوونی ژ شنگالێ بهێنه‌ ده‌ركرن و سنوور ژئالیێ پێشمه‌رگه‌ی و هێزێن ئیراقێ ڤه‌ بهێته‌گرتن و ته‌ناهی و ئارامی ل ناڤ شنگالێ بۆ خه‌لكێ‌ وێ‌ بهێته‌ راده‌ستكرن”.

پتر رۆهنكر” شنگال گه‌له‌ك پێدڤی ب پرۆژێن خزمه‌تگوزاری یه‌ كو بهێنه‌ بجهئینان و ئه‌نجامدانا پرۆژێن خزمه‌تگوزاری وه‌ك ئاڤ و و گه‌له‌ك پرۆژێن دی “.

ناڤبری ئه‌و ژی گۆت” نوكه‌ پتر ژ دو قایمقاما ل شنگالێ یێن هه‌ین و هه‌ر ئالیه‌كی بۆ خوه‌ قایمقامه‌ك دانایه‌ و ژ سالا 2014 وه‌ره‌ هه‌تا نوكه‌ حوكمه‌تا ئیراقێ چ خزمه‌تگوزاری ل شنگالێ دروست نه‌كرینه‌ و ته‌ناهی و ئێمناهی ل ده‌ڤه‌رێ‌ نه‌ ڤه‌گه‌راندیه‌ و حوكمه‌تا به‌غدا جوداهیێ دكه‌ت د ناڤبه‌را شنگالێ و قه‌زایێن دی و مه‌ داخواز ژ سه‌ركرداتیا كوردستانێ‌  و سه‌رۆك مه‌سعود بارزانی ژی كریه‌ كو پێشمه‌رگه‌ ڤه‌گه‌ریته‌ شنگالێ تاكو ته‌ناهی و ئارامی ڤه‌گه‌ریت، گرنگیا پارتی بۆ شنگالێ ئه‌ڤرۆ ژ سوباه چێتره‌ و سوباهی ژ دوزبه‌ باشتره‌”.

فه‌رماندێ هێزا پێشمه‌رگه‌ی ل شنگاێ دیاركر” هه‌تا نوكه‌ هێزێن نه‌قانوونی ل شنگالێ یێن هه‌ین و ل ده‌مێ هێرشا له‌شكرێ ئیراقێ دژی وان هێزێن نه‌قانوونی مه‌ هزر كر دێ‌ ئه‌ڤ هێزه‌ هێنه‌ ده‌ركرن به‌لێ هه‌تا ل ناڤ شنگالێ یێن ماین و نه‌هاتینه‌ ده‌ركرن و هاتنا هێزێن له‌شكرێ ئیراقێ بۆ ده‌ڤه‌رێ‌ چ مه‌ترسی  نه‌ بۆ شنگالێ و نه‌ بۆ خه‌لكێ‌ كوردستانێ‌ دروست نه‌بوویه‌”.

ئه‌ڤرۆ:

گه‌فێن توركیا یێن بۆ ده‌ستپێكرنا ئۆپه‌راسیۆنه‌كا نوو ل دژی رۆژئاڤایێ كوردستانێ به‌رده‌وام دكه‌ن و ل ئالیێ دی وه‌لاتیێن رۆژئاڤایێ كوردستانێ داخوازا ژ ئه‌مریكا و رۆسیا دكه‌ن كو نه‌هێلن توركیا ده‌ست ب ئۆپه‌راسیۆنه‌كا نوو ل دژی رۆژئاڤایێ كوردستانێ بكه‌ت.

گه‌فێن توركیا یێن بۆ ده‌ستپێكرنا ئۆپه‌راسیۆنه‌كا نوو ل دژی رۆژئاڤایێ كوردستانێ به‌رده‌وامن و دوهی وه‌زیرێ ده‌رڤه‌ یێ توركیا راگه‌هاند كو باكورێ سووریێ بوویه‌ گه‌ف ل سه‌ر ئاسایشا توركیا و توركیا نه‌شێت ل هه‌مبه‌ر پێشهاتێن ل سووریێ بێده‌نگ بمینیت و دێ یا پێدڤی هێته‌ كرن و نها ئه‌و ل گه‌ل ئه‌مریكا ژی دانوستاندنان دكه‌ن و دڤێت ئه‌مریكا ژی رازی بیت، چونكو توركیا نه‌چاره‌ ده‌ست ب ئۆپه‌راسیۆنه‌كا دی بۆ نه‌هێلانا تیرۆرێ بكه‌ت.

ل ئالیێ دی وه‌لاتیێن كورد ل رۆژئاڤایێ كوردستانێ ب ره‌نگێن جودا جودا داخواز ژ ئه‌مریكا، رۆسیا و نه‌ته‌وه‌یێن ئێكگرتی دكه‌ن كو نه‌هێلن توركیا ده‌ست ب چو ئۆپه‌راسیۆنێن سه‌ربازی بكه‌ت، چونكو ئه‌و یه‌ك دێ بیته‌ مه‌ترسیه‌كا گه‌له‌ك مه‌زن ل سه‌ر كوردان ل سووریێ، توركیا به‌ری نها ژی چه‌ندین ده‌ڤه‌رێن كوردی ل رۆژئاڤایێ كوردستانێ داگیر كرینه‌ و دڤێت ئه‌مریكا و رۆسیا نه‌هێلن توركیا ده‌ست ب ئۆپه‌راسیۆنه‌كا دی ل رۆژئاڤایێ كوردستانێ بكه‌ت.

د ڤێ ده‌ربارێ دا یوسف زه‌كه‌ریا چاڤدێرێ سیاسی راگه‌هاند كو توركیا دڤێت ل ژێر ناڤێ ئاڤاكرنا ده‌ڤه‌ره‌كا ئارام دیمۆگرافیا رۆژئاڤایێ كوردستانێ ب ته‌مامی بگوهۆریت، توركیا به‌ری نها عه‌فرین داگیر كر و نها رێژه‌یا كوردان ل عه‌فرینێ گه‌له‌ك كێم بوویه‌ و رۆژانه‌ ژی كورد ژ ترسا چه‌كدارێن سه‌ر ب توركیا ژ عه‌فرینێ دڕه‌ڤن و نها توركمان و عه‌ره‌ب ل مالێن كوردان بجه بووینه‌، توركیا دڤێت هه‌مان تشتی ل كۆبانێ و باژێرێن دی یێن رۆژئاڤایێ كوردستانێ بكه‌ت، ژ به‌ر هندێ ژی ئه‌م داخواز ژ ئه‌مریكا، رۆسیا، نه‌ته‌وه‌یێن ئێكگرتی دكه‌ین كو ل هه‌مبه‌ر گه‌فێن توركیا بێده‌نگ نه‌مینن، چونكو توركیا دڤێت چو كورد ل سووریێ نه‌مینن و پیلانا توركیا یا ل دژی كوردان گه‌له‌ك ب مه‌ترسیه‌.

ب ده‌هان چالاكڤان، نڤیسه‌ر، چاڤدێرێن سیاسی و وه‌لاتیێن رۆژئاڤایێ كوردستانێ ب رێیا تۆرێن جڤاكی دیار دكه‌ن كو توركیا دڤێت دیمۆگرافیا رۆژئاڤایێ كوردستانێ ب ته‌مامی بگوهۆریت و عه‌ره‌بێن كو نها ل توركیا ئاكنجی بووینه‌ وان ل رۆژئاڤایێ كوردستانێ ئاكنجی بكه‌ت، ئه‌و یه‌ك ژی بنپێكرنا هه‌موو قانوونێن نێڤده‌وله‌تی یه‌ و ژ به‌ر هندێ ژی دڤێت ئه‌مریكا و رۆسیا ب ئه‌ركێ خوه‌ رابن، چونكو كوردان د شه‌رێ ل دژی داعشێ دا ب هزاران قوربانی دان و شیان ده‌ڤه‌را خوه‌ ژ تیرۆرێ پاقژ بكه‌ن، نابیت نها رێ ب توركیا بهێته‌ دان كو ل ژێر ناڤێ تیرۆرێ رۆژئاڤایێ كوردستانێ داگیر بكه‌ت، گرنگه‌ ئه‌مریكا و رۆسیا سنۆره‌كێ بۆ زێده‌گاڤیێن توركیا دانێن.