ئەڤرۆ نیۆز،زنار تۆڤی:

نوری مالکی سەرۆکێ ئیئتیلافا دەولەتا یاسایێ رادگەهینیت،کو جێگرێ دویێ یێ بەرێ یێ سکرتێرێ گشتی یێ ئێکەتیێ پێشنیاز بۆ کربوو، کو هێزێ ل دژی کوردستانێ بجولینین

.
نوری مالکی د چاڤپێکەفتنەکا کەنالێ (دیجلە) دا دبێژیت،د هەیڤێن دەستکردا مە تێبینیی دکر کو نەفتا نەفتخانە ب تانکەران دهێتە هنارتن بۆ ئێرانێ و ژ وێرێ ژی بۆ ئەفغانستانێ.

نوری مالکی هەروەسا دبێژیت،د وی دەمیدا ئەو سەرۆک وەزیر بوو،هەروەسا بەرهەم سالح، جێگرێ دویێ یێ بەرێ یێ سکرتێرێ گشتی یێ ئێکەتیێ جێگرێ سەرۆک وەزیرێن عێراقێ بوو،وی مالکی گازیکریە و گوتیێ، ئەو تانکەر نەفتێ بۆ بەرژەوەندیا پارتی ڤەدگۆهێزنە ئیرانێ، بەرهەم سالحی د بەرامبەر دا گوتیێ،ئەو تانکەرە ب تنێ یێن پارتی نینن،یێن ئێکەتیێ ژی نە.

سەرۆکێ ئیئتیلافا دەولەتا یاسایێ ئاماژە ب هندێ ژی کریە،کو وی گوتیە بەرهەم سالحی چارە چییە؟ بەرهەمی ژی بەرسڤا وی دایە وگوتیێ،دا هێزێ ل دژی کوردستانێ ب کاربینین.

نوری مالکی د وێ لێدوانێدا بەحسێ وی دەمی دکەت، کو کوردستانێ بۆریا هنارتنا نەفتێ نەبوو،ب تنێ ب رێیا تانکەران نەفت ڤرێدکرە ژ دەرڤە،کو ژێدەرەکێ سەرەکی یێ داهاتیێ هەرێما کوردستانێ بوو،ژبەر ڤێ چەندێ ب بریارا مالکی بەشە بودجێ کوردستانێ هاتبوو برین.

ئەڤرۆ نیۆز،زنار تۆڤی:

فەرماندێن سەربازی یێن کوردستانێ دبێژن، رێکێ نادەین نە چەکدارێن حەشد شەعبی و نە سوپایێ عێراقێ ل دەروازێ پێشابیرێ و ئیبراهیم خەلیل جێگیر ببن.

سەبارەت ب داخوازا عێراقێ بۆ بەلاڤکرنا هێزێن خۆ ل دەروازێن سنووری، شاندێ سەربازی یێ کوردستانێ گوتینه فەرماندێن عێراقێ، هەرێما کوردستانێ رێکێ؛نادەت هێزێن عێراقی و حەشد ل وان جهان  جێگیر ببن.

فەریق جەمال ئێمینکی، سوپا،سالارێ پێشمەرگەی دوماهی سەنگەرێن پێشمەرگەی ل زوممار بۆ رووداو گوتیە”پێشمەرگە یێ ئامادەیە و ئەڤ ناوچە ناهێنە چۆکرن، ئەم و سەرکردایەتیا کوردستانێ ژی ل گەل شەری نینین،بەلێ هەکە شەر فروشتە مە دێ پێشمەرگەی بەرسڤا وان هەبیت”.

هەڤدەم بابەکر زێباری، بەرپرسێ میحوەرێ دیجلەی دبێژیت،پێشمەرگەی بریارا دوماهیێ دایە،وان دەروازێن سنووری و کێلگەهێن نەفتێ چۆلناکەین و نادەینە دەستێ حوکمەتا عێراقێ.

ئه‌ڤرۆ نیۆز،زنار تۆڤى:

زێره‌ڤان به‌روارى ئه‌و ماموستایێ زانكۆیا دهۆكێ و چاڤدێرێ سیاسیه‌ بۆ ئه‌ڤرۆ نیۆز دبێژیت:نوكه‌ ده‌ستهه‌لاتا كوردستانێ پێدڤى ب ده‌ركرنا بریارێن گرنگ هه‌یه‌ د وارێ رێكخستنا نافمالا كوردى و به‌رگریكرنێ ژ هه‌رێما كوردستانێ،چونكى ب كارئینانا میكانیزما له‌شكه‌رى ژ لایێ حوكمه‌تا عێراقێ ڤه‌،یا گرێدایه‌ ب ئه‌جندایێن نێڤده‌وله‌تى و هه‌رێمى ڤه‌،هه‌روه‌سا نوكه‌ كوردستانێ ژى پێدڤى ب رێكخستنا په‌یوه‌ندیێن نوو هه‌یه‌.

ده‌رباره‌ى رۆلێ ره‌ڤه‌ندا كوردى ل جیهانێ به‌روارى گوت:هه‌تاكو نوكه‌ مه‌ رێكخستنێن حزبى ژ ده‌رڤه‌ هه‌نه‌ و ڤێ چه‌ندێ پێدڤى ب هه‌ماهه‌نگیا نه‌ته‌وه‌یى هه‌یه‌،بۆ دروستكرنا گڤاشتنان ل سه‌ر جڤاكێ نێڤده‌وله‌تى ژبۆ پاراستنا ئه‌زموونا هه‌رێما كوردستانێ،كو نوكه‌ كه‌فتیه‌ ژێر كارتێكرنا پرۆژێ ئیرانێ،ناڤهاتى گوت ژى:هه‌تاكو نوكه‌ كورد خودان لۆبیێن ب هێز نه‌بووینه‌ كو كارتێكرنێ ل رایا جیهانى بكه‌ن،هه‌روه‌سا چه‌ند نڤیسكار و ره‌وشه‌نبیرێن رۆژئاڤایى ئه‌ڤ چه‌نده‌ دوپاتكریه‌،كو كوردان قه‌یرانا دبلۆماسى هه‌یه‌،له‌ورا كوردان ب شێوازه‌كێ ده‌زگایه‌تى باده‌كا دبلۆماسى دروست نه‌كریه‌ و ڤێ چه‌ندێ كارتێكرنه‌كا نه‌رێنى هه‌بوو ل سه‌ر هه‌رێما كوردستانێ،ئه‌ڤ چه‌نده‌ پشتى ریفراندۆمێ دیار بوویه‌،لێ یا گرنگه‌ بهێته‌ زانین،كو ناكوكیا هێزێ ل رۆژهه‌لاتا ناڤین بوویه‌ سه‌ده‌مێ ڤان كاودانێن نه‌خوازیار و مه‌ پراكتیكرنا سیاسه‌ته‌كا رێكخستى ل سه‌ر خواندنێن جیۆ سیاسى نه‌كربوو،ژبۆ دروستكرنا بریارا سیاسى.

زێره‌ڤان به‌روارى دیاركر ژى:نوكه‌ ره‌وشا عێراقێ یا به‌ره‌ف ئالۆزیێن ئه‌منى و ئابوورى ڤه‌ دچیت و دهێته‌ پێشبینى كرن،كو عێراق ببیته‌ مه‌یدانا ناكۆكیا هێزێ دناڤبه‌را ده‌وله‌تێن زلهێز و هه‌رێمى دا،هه‌روه‌سا نوكه‌ ب تنێ عێراق میكانیزمه‌كه‌ د ئه‌جندایێن نێڤده‌وله‌تى دا و هه‌روه‌سا دوباره‌بوونا كێشا سووریێ د عێراقێ دا دهێته‌ چاڤه‌رێكرن،ب تایبه‌تى پشتى دروستبوونا میلیشیاتێن جۆدا و نه‌ كونترۆلكرنا بریارا وان گرۆپێن وان میلیشیاتان ژ لایێ عێراقێ ڤه‌،ژ لایه‌كێ دیڤه‌ كارتێكرنا سه‌ره‌دانا عه‌بادى بۆ ئیرانێ و توركیا دێ د باده‌كا گڤاشتنان دا دیار بیت و ئه‌ڤ چه‌نده‌ بۆ رێكخستنا هه‌ولێن هه‌ر سێ ده‌وله‌تانه‌،ژ پێخه‌مه‌ت شكاندنا ئیرادا گه‌لێ كورد و لاوازكرنا فاكته‌رێ كوردى د وارێ هه‌رێمى دا،هه‌روه‌سا ئارمانجێن وه‌ك هه‌ڤ یێن هه‌ر سێ ده‌وله‌تان د قۆناغا نوكه‌ دا،رێگرتنه‌ ل به‌رفره‌هبوونا داخوازیێن سه‌رخوه‌بوونێ و دوورخستنا كوردان ل هه‌ڤكێشه‌یێن هه‌رێمى دا،دیسا د نوكه‌ دا عه‌بادى پێدڤى ب ئیران و توركیا هه‌یه‌،بۆ ب ده‌ست ڤه‌ ئینانا پرسێن سه‌روه‌رى ب تایبه‌تى سنوور و بازرگانیا گشتى و باده‌كا نه‌فتێ،كو ئه‌ڤه‌ دبنه‌ سه‌ده‌مێ لاوازبوونا هه‌رێما كوردستانێ.

سه‌باره‌ت هندێ كو دێ توركیا داخوازیێن عێراقێ بجه ئینیت یان نه‌،یان ژى دێ توركیا ده‌ست ژ كوردێن باشۆر به‌رده‌ت،به‌روارى ئه‌و چه‌ند ژى دیاركر:نوكه‌ توركیا پێدڤى ب پاراستنا ئاسایشا ستراتیجى هه‌یه‌،كو به‌رفره‌هبوونا ناسیۆنالیزما كوردى كه‌فتیه‌ ژێر مه‌ترسیه‌كا دیار،له‌ورا بۆ قۆناغا نوكه‌ توركیا دێ یا هه‌ڤكار بیت ل گه‌ل ده‌ستهه‌لاتا ناڤه‌ندى،ژبۆ كێمكرنا داخوازیێن كوردان ل باشۆر،چونكى ئه‌نقه‌ره‌ سه‌ره‌ده‌ریكرنا خوه‌ ل گه‌ل هه‌رێما كوردستانێ ژ هه‌ڤكار و دۆستایه‌تیێ گوهارتیه‌ بۆ فاكته‌رێ هێرشێ و ژ ده‌ستدانا باوه‌ریا سیاسى،ژبه‌ركو ئه‌نقه‌ره‌ پرۆژێ ریفراندۆمێ ب پرۆژه‌كێ نێڤده‌وله‌تى خواندیه‌،ژبۆ دژایه‌تیكرنا توركیا و ب تایبه‌تى وێ ترس ژ فاكته‌رێ توركیا هه‌یه‌،له‌ورا بۆ قۆناغه‌كا دوورتر ده‌ما كو ناكوكیا هێزێ دناڤبه‌را توركیا و ئیرانێ دا دورست دبیت،دێ توركیا سه‌ره‌ده‌ریكرنا خوه‌ ل گه‌ل كوردان گوهۆریت،ب تایبه‌تى هه‌كه‌ پرۆژێ ئه‌مریكا سه‌رنه‌گرت و حوكمه‌ته‌كا ب هێز ل به‌غدا دروست نه‌بوو.

ماموستایێ زانكۆیا دهۆكێ ئه‌و چه‌ند ژى ئاشكراكر:نوكه‌ عێراق ب فاكته‌رێ هێزێ سه‌ره‌ده‌ریێ ل گه‌ل هه‌رێما كوردستانێ دكه‌ت و هه‌روه‌سا به‌رده‌وام بوونا عێراقێ ب فاكته‌رێ هێزێ ل هه‌مبه‌رى كوردستانێ دێ بیته‌ سه‌رده‌ما پتر ئالۆزیان،له‌ورا یا گرنگه‌ بهێته‌ زانین،كو ئه‌مریكا رێ خۆشكه‌ره‌ بۆ زڤراندنا هێزا حوكمه‌تا ناڤه‌ندى و ئه‌ڤ پرۆژه‌ د به‌رژه‌وه‌ندیا كوردان دا نینه‌.