ئه‌ڤرۆنيۆز:
سه‌رۆك وه‌زيرێن ئيسرائيلێ، بنيامێن ناتانياهۆ، راگه‌هاند گه‌له‌ك وه‌لاتێن عه‌ره‌بى هه‌مان به‌رێخوه‌دان وبۆچوونا مه ل دۆر گه‌فێن ئيرانێ يا هه‌ى.
بنيامێن ناتانياهۆ ل به‌رپه‌رێ خوه ل سه‌ر تويته‌رى به‌لاڤكريه كو سعوديێ وئيماراتێ ومسرێ وگه‌له‌ك هه‌ڤسنۆرێن مه يێن عه‌ره‌ب، هه‌مان بۆچوونا مه يا هه‌ى ل دۆر گه‌فێن ئيرانێ وب ديتنا من ئه‌و بۆچوونه‌كا راسته.
ئه‌ڤرۆنيۆز:
ڤه‌كۆلينه‌كا نوو كو ژلايێ زانكۆيا نيويۆرك يا ئه‌مريكى ڤه هاتيه ئه‌نجامدان ئاشكراكر ئه‌و كه‌سێن خرخرێ ب ده‌نگه‌كێ بلند دكه‌ن ژئه‌گه‌رێ ب زه‌حمه‌ت هه‌ناسه كێشانێ ل ده‌مێ نڤستنێ، دبيت تووشى نه‌خوه‌شيا زهايمه‌رێ ببن.
رۆژناما (ديلى ميل) يا بريتانى به‌لاڤكر كو هه‌بوونا ئاريشه هه‌ناسێ ل ده‌مێ نڤستنێ كو دبيته ئه‌گه‌رێ خرخرێ، دبيت هنده‌ك ئاريشێن ساخله‌ميێ په‌يدابكه‌ت وه‌كو بلندبوونا فشارا خوينێ وشه‌كرێ وگرفتێن دلى، ل ڤێ دووماهيێ ژى زانايێن ئه‌مريكى ئاشكراكريه كو خرخرێ په‌يوه‌ندى ب نه‌خوه‌شيا زه‌هايمه‌رێ (ژبيركرنێ) يا هه‌ى.
رۆژنامێ دياركر كو ئه‌و زانا گه‌هشتينه وى ئه‌نجامێ پشتى چه‌ندين ڤه‌كۆلين و ئه‌زموون ل سه‌ر 208 كه‌سان كرين كو ژيێن وان دناڤبه‌را 50 هه‌تا 90 دابوون.
دياركر ژى كو وان زانايێن ئاماژه دايه، ئه‌و چاره‌سه‌ريێن بۆ كێمبوونا خرخرا بلند وزێده‌بوونا هاتنا ئوكسجينێ دبيت ببنه ئه‌گه‌رێ خوه‌پاراستنێ ژ نه‌خوه‌شيا زهايمه‌رێ.
ئه‌ڤرۆنيۆز:
رۆژنامه‌كا ئه‌مريكى ئاشكراكر، بريت ماكگۆك يێ به‌رپرسياره ژ هێرشا له‌شكرێ عيراقێ وحه‌شدا شه‌عبى ب پشته‌ڤانيا ئه‌مريكى ل سه‌ر كه‌ركووكێ ل 16 مه‌ها بۆرى.
رۆژناما (واشنتۆن تايمز) د گۆتاره‌كا خوه‌دا، دبێژيت( هنارتيێ سه‌رۆكێ ئه‌مريكى بۆ هه‌ڤپه‌يمانيا نێڤده‌وله‌تيا دژى داعشێ بريت ماكگۆرك به‌رپرسه ژروودانێن كه‌ركووكێ ل مه‌ها بۆرى).
دياركر ژى( ماكگۆرك ئه‌گه‌رێ بێ ده‌نگيا ئه‌مريكا ل سه‌ر هێرشا ئيرانى دژى كه‌ركووكێ وهه‌رێما كوردستانێ).
رۆژناما ناڤبرى كو يا نێزيكه ژ حزبا كۆمارى ئاماژه دا كو ماكگۆرك ژ پاشمايێن ئيدارا سه‌رۆكێ ئه‌مريكى يێ به‌رێ باراك ئۆبامايه وپێدڤيه بهێته لادان ژ پۆستێ خوه.
ب ديتنا وێ رۆژنامێ( ترامب دبێژيت كو ده‌مێ سه‌رۆكاتيا وى يا باشتره ژ ده‌مێ ئۆباماى، به‌لێ دڤێت بزانيت كو به‌رده‌واميا يێن وه‌كو ماكگۆركى، ئانكو به‌رده‌واميا سياسه‌تا ئۆباماى يا شكه‌ستى ل عيراقێ، وهه‌تا نوكه ترامب نزانيت كو ده‌مێ عيراقه‌كا ئێكگرتى نه‌مايه وپاراستنا ئێكگرتنا عيراقێ ب زۆرى دێ به‌رهه‌مێ وێ كونترۆلا عيراقێ بيت ژلايێ ئيرانێ ڤه).
واشنتۆن تايمز زێده‌تر دبێژيت( ماكگۆرك وهه‌ڤشێوێن وى ل وه‌زاره‌تا ده‌رڤه‌يا ئه‌مريكى بزاڤا مانا عه‌بادى دكه‌ن ب هه‌ر بهايه‌كى وه‌كو سه‌رۆك وه‌زيران ل هه‌لبژارتنێن عيراقێ يێن داهاتى، له‌وما يێ كاغه‌زا ئێكگرتنا عيراقێ بكاردئينن ب مه‌ره‌ما ب هێزبوونا عه‌بادى وپاراستنا پۆستێ وى).
خوياكر ژى( باليۆزێ ئيسرائيلێ ل ئه‌مريكا (دوركولد) دياركريه كو كورد هه‌ڤپه‌يمانێن رۆژئاڤاى نه وده‌م يێ هاتى يێن وه‌كو ماكگۆرگى بهێنه دوورخستن، چه‌نكى كورد بێ پشته‌ڤانيا ئه‌مريكى نه‌شێن به‌رژه‌وه‌نديێن ئه‌مريكا بپارێزن).
ل ده‌مێن بۆرى، بريت ماكگۆرك تووشى ره‌خنێن دژوار بوويه ژلايێ هژماره‌كا ئه‌ندامێن كۆنگرسێ ئه‌مريكى ب تايبه‌تى ژبه‌ر هه‌لويستێن وى ل به‌رامبه‌ر پرسا كوردى.
ئەڤرۆ نیۆز ، سەباح زۆهێر:
پشتى هاتنا رێژه‌كا باش یا بارانێ ل ڤێ مه‌هێ دا ل ناڤچه‌یێن هه‌رێما كوردستانێ جوتیاران ده‌ست ب چاندنا به‌رهه‌مێ خوه یێ ده‌ست پێكێ كر،كو ئه‌و ژى چاندنا گه‌نم و جه‌هى یه كو دڤێ مه‌هێ دا دبیته ده‌ست پێك بۆ چاندنا وی به‌رهه‌می.
محەمەد سەعید زێبارى جوتیاره‌كێ ده‌ڤه‌را نه‌هلێ یه دبێژیت كو هه‌یڤا 10 ده‌ستپێكه بۆ چاندنا به‌رهه‌مێ گه‌نم و جه‌هى كو ئه‌ڤ چاندنه ژى ل دووڤ بارینا بارانێ دمینیت چونكى ئه‌گه‌ر باران زوو نه‌هات دێ چاندنا گه‌نم و جه‌هى ژى هێته پاش ئێخستن ژبه‌ركو چاندنا ڤى به‌رهه‌مى گرێدایه ب بارینا بارانێ ڤه.
هێشتا گۆت ژی :پار باران د ده‌مێ خودا نه‌هات و لێ مه هه‌ر به‌رهه‌مێ خوه چاند،لێ سه‌ر گیروبوونا بارانێ ژى تاراده‌كێ به‌رهه‌مێ پارسال یێ باش بوو،لێ ئه‌ڤ ساله باران دده‌مه‌كێ گونجایدا بارییه كو دگه‌ل ده‌ست پێكا چاندنێ بوو،ژبه‌ر هندێ هه‌تا باران نه‌باریت كه‌س نه‌شێت گه‌نم و جه‌هى بچینیت،لێ خوش به‌ختانه ئه‌ڤ ساله مه به‌رهه‌مێ خوه چاند و هیڤیا به‌خته‌كێ باش.
هاشم كادانى جوتیاره‌كێ دییه دبێژیت:ئه‌م خودان په‌ز و چێلێن ژبه‌ر هندێ ئه‌م سالانه پێدڤى ب چاندنا گه‌نم و جه‌هى نه،پارسال مه سێ دونمێن عه‌ردى كربوون و ئه‌ڤ ساله دێ پترێ كه‌ین،چونكى ئه‌وێ په‌زى خودان دكه‌ن پێدڤى نه داكو جه‌هى و كایێ ژى ل زڤستانێ دا بكاربینن بۆ په‌زو چێلێن خوه،هه‌ر چه‌نده ئه‌ڤ بارانا هاتى یا گرنگ بوو بۆ ده‌ست پێكا چاندنا گه‌نم و جه‌هى لێ گه‌نم و جه‌هی هەیام هەیام پێدڤى بارانێ یه داكو زاش چێببیت.
ئەڤرۆ نیۆز،زنار تۆڤی:
کۆمپانیاکا نێڤدەولەتی یا تایبەت ب سلامەتیا گەشتیارا ڤە، لیستا مەترسیدارترین وەلاتێن جیهانێ بۆ گەشتیاران برێیا راپرسییەکێ رادگەهینیتت و عێراق ل رێزبەندیا ئێکەم مەترسیدارترین وەلاتە ل جیهانێ بۆ گەشتیاران.
د وێ راپرسیێدا، کۆمپانیا نێڤدەولەتی SOS کو یا تایبەتە ب دابینکرنا ئاسایش و سلامەتیا گەشتیاران، لیستا 10 مەترسیدارترین وەلات ژ روویێ ئاسایشێ ڤە بۆ سالا 2018 راگەهاندیە و عێراق ژی ب مەترسیدارترین وەلات د رێزبەندیا ئێکێ دا دەست نیشانکریە،ب ئەگەرێ هێرەشێن بەردەوام یێن گرووپێن تیرۆریستی و شەرێ تائیفەگەری.
هەروەسا د وێ لیستێدا، ئەفغانستان د رێزبەندیا دویێ دایە، نایجیریا د رێزبەندیا سییێ دایە ، سووریا ژی یا چارێ یە و ل دووڤدا هندستان، لیبیا، سۆمال و یەمەن و پاکستان دهێن.
ل دووڤ وێ لیستێ تورکیا ژ د رێزبەندیا دەهێ دایە،کو ب ئەگەرێ پێگەهێ وێ یێ ستراتیژی بوویە ئارمانجا هێرشێن بەردەوام یێن داعش و گرووپێن تۆندرەو.
ئەڤرۆ نیۆز،زنار تۆڤی:
رێڤەبەریا گشتی یا سەقاناسی و بیڤەلەرزان ل ھەرێما کوردستانێ پێشبینیێن سەقای بەلاڤە کرینە.
ئەڤرۆ ئەینیێ 17/11/2017 رێڤەبەریا گشتی یا سەقاناسی و بیڤەلەرزان ل ھەرێما کوردستانێ پێشبینیێن سەقای د 48 کاتژمێرێن داھاتیدا بەلاڤکرینە و تێدا ئاماژە ب هندێ دایە،کو ئەڤرۆ ل سەرجەم پارێزگەهێن ھەرێما کوردستانێ ئاسمان دێ یێ ساهی بیت و ب تنێ ل هندەک جهان دێ پارچە عەورێن جۆدا دەرکەڤن.
رێڤەبەریا گشتی یا سەقاناسی و بیڤەلەرزان ل ھەرێما کوردستانێ ئەو ژی دیارکریە،کو سوبەهی شەمبیێ 18.11.2017 ل سەرجەم پارێزگەهێن ھەرێما کوردستانێ ئاسمان دێ نیڤ عەور و بۆ عەورێ تەمام هێتە گوهۆرین.
ئەڤرۆ نیۆز،زنار تۆڤی:
سوپا سالارێ ئسرائیلێ ئاماده‌یا وەلاتێ خۆ بۆ ئالوگۆركرنا زانیاریێن هه‌والگیریێ ل گه‌ل سعوودیه نیشاندا بۆ هندێ کو به‌رهنگاری ئیرانێ ببن.
گادی ئیزنكۆت، سوپا سالارێ ئسرائیلێ ل گفتوگۆیه‌كێدا ل گه‌ل وێبسایتی ئیلاف یێ سعوودیێ راگه‌هاندیە،کو مه‌ترسیا راسته‌قینه ل سه‌ر ڤێ دەڤەرێ ئیرانه، جه‌خت ل هندێ کریە، پێدڤیە پاوانخوازیا ئیرانێ رابگرین.
سوپاسالارێ ئسرائیلێ گوت ژی، به‌رژه‌وه‌ندیا هەڤبه‌ش دناڤبەرا وەلاتێ وی و سعوودیێ دا هه‌یه و د ئامادەنە بۆ روو ب رووبوونا پاوانخوازیا ئیرانێ د دەڤەرێدا هاریكاریا سعودیێ بكه‌ن.
ئاشكراكر ژی،کو رێككه‌فتنەکا ته‌مام دناڤبەرا سعوودیێ و ئسرائێلدا هه‌یه ب تایبه‌تی د وان پرسان دا كو په‌یوه‌ندی ب ئیرانێڤه هه‌یه، گوت ژی:چ دەمان سعوودیه دوژمنێ مە نەبوویە،ل دژی ئێک ژی شەری ناکەین.
ل دووڤ بۆچوونێن سوپا سالارێ ئسرائیلێ، ئێران ب نیازا ئه‌نجامدانا سێ كارێن گرنگه، یێ ئێکێ ب دەستڤە ئینانا چه‌كێ ئەتۆمی، دویه‌م ژی سه‌پاندنا هه‌ژموونا خۆ ل ته‌ماما رۆژهه‌لاتا ناڤین، ئه‌و ژی ب هەڤکاریا گرووپێن شیعی یێن سه‌ر ب تەهرانێ ڤە،وەکی حزبولا و حوسیێن یه‌مه‌نێ و هەڤشێوێن وان ل ڤێ دەڤەرێدا.
سیێەم ژی، ئیرانێ دڤێت یاسایێن یاریێ ل رۆژهه‌لاتا ناڤین ب گوهۆریت، ب دامه‌زراندنا كارگه‌هێن چه‌كی یێن پێشكه‌فتی،هەروەسا دروستكرنا فرۆكێن بێ فرۆكه‌ڤان، ل دووڤدا ب فرۆشیتە وەلاتێن ڤێ دەڤەرێ.
سوپاسالارێ ئیسرائیلێ دیارکر ژی، ئیرانێ ل بەرە دو هیلالێن شیعی دروست بکەت،ئێک ژ ئیرانێ بۆ عێراقێ،ژ وێرێ ژی بۆ سووریا و لوبنان، یێ دویێ ژی،ژ ئیرانێ بۆ كه‌نداڤی ب رێیا به‌حره‌ین و یه‌مه‌نێ، تا د‌گەهیتە ده‌ریا سوور، گووت ژی:پێدڤیە ب جددی رێگریێ ل ڤی كارهی بهێتەکرن.
ئه‌ڤرۆنيۆز:
ل دووڤ به‌ياننامه‌كا حوكمه‌تا هه‌رێما كوردستانێ كو ئه‌ڤ شه‌ڤه پێنج شه‌مبى 16/11/2017 به‌لاڤكرى، بريت ماكگۆرك هنارتيێ تايبه‌ت يێ سه‌رۆكێ ئه‌مريكى بۆ هه‌ڤپه‌يمانيا نێڤده‌وله‌تى يا دژى داعشێ ل گه‌ل نيچيرڤان بارزانى سه‌رۆك وه‌زيرێن هه‌ريمێ وقوباد تالبانى جێگرێ سه‌رۆك وه‌زيران كۆمبوويه وداخواز ژ وان كر كێشێن هه‌رێما كوردستانێ ل گه‌ل به‌غدا ب دانوستاندنێ چاره‌سه‌ربكه‌ن.
دبه‌يانناما حوكمه‌تا هه‌رێمێ دا هاتيه( ماكگۆركى دووپاتى ل سه‌ر دۆستايه‌تى وپه‌يوه‌نديێن دناڤبه‌را واشنتۆن وهه‌ولێرێ دا كر وهيڤيا پێشڤه‌برنا زێده‌تر دپه‌يوه‌نديێن هه‌دولا دهه‌موو بواراندا خواست).
ديسا تێدا هاتيه( هه‌ردولا خوه‌شحاليا خوه ب راگرتنا ئالۆزيێن دناڤبه‌را هێزێن عيراقێ وپێشمه‌رگه‌ى ده‌ربرى وپێدڤى زانين كو دانوستاندنه‌كا رژد هه‌ردولا ل سه‌ر بنه‌مايێ دستووررى بۆ چاره‌سه‌ركرنا كێشان ده‌ست پێ بكه‌ن).
به‌يانناما حوكمه‌تا هه‌ريمێ ئاماژه دا كو( به‌رێز سه‌رۆك وه‌زيرێن هه‌ريمێ به‌حسێ په‌يوه‌نديێن هه‌ريمێ وواشنتون كر وهيڤيا خواست زێده‌تر بهێنه پێشڤه‌برن وسوپاسيا هاريكاريێن ئه‌مريكا بۆ هه‌رێما كوردستانێ كر ودووپات كر كو پێدڤيه جڤاكێ نێڤده‌وله‌تى بزاڤا رێخوه‌شكرنێ بۆ ده‌ستپێكرنا دانوستاندنه‌كا جدى به‌غدا وهه‌ولێرێ دا بكه‌ت، كو تاكه رێيا چاره‌سه‌ريا كێشانه ودووپات كر كو هه‌رێما كوردستانێ چو ده‌مه‌كى لايه‌نگرا به‌رهه‌ڤكه‌فتنێ نه‌بوو وبه‌رده‌وام يا به‌رهه‌ڤه بۆ دانوستاندنێ).
نيشاندان