پەیڤدارێ سەرۆكایەتیا هەرێما كوردستانێ ڕادگەهینیت: شاندەكێ سەرۆكایەتیا هەرێما كوردستانێ بۆ پرسا هەلبژارتنان سەرەدانا بەغدا كریە بۆ دانوستاندنێ ل دۆر ئەنجامدانا هەلبژارتنان ل هەرێما كوردستانێ، دیاركر ژی، كۆمسیۆنا هەلبژارتنێن ئیراقێ بەرهەڤیا خوە نیشاندا بۆ هەموو هاریكاریەكێ.
دلشاد شەهاب، پەیڤدارێ سەرۆكایەتیا هەرێما كوردستانێ سەبارەت سەرەدانا وان بۆ بەغدا ئاماژەكر كو سەرۆكایەتیا هەرێما كوردستانێ دێ ڕژد بیت ل سەر ئەنجامدانا هەلبژارتنان و دێ د دانوستاندنێن بەردەوام دا بیت ل گەل كۆمسیۆنا بلند یا هەلبژارتنان ل ئیراقێ بۆ وێ چەندێ ڕۆژەك بۆ دەستنیشانكرنا هەلبژارتنێن پەرلەمانێ كوردستانێ بهێتە دیاركرن.
بڕیارە هەلبژارتنێن جڤاتێن پارێزگەهێن ئیراقێ ل 18/12/2023 بهێنە ئەنجامدان، پەیڤدارێ سەرۆكایەتیا هەرێما كوردستانێ دبێژیت» هەتا نوكە هیچ بڕیارەكا فەرمی بۆ وێ چەندێ نەهاتیە دەركرن و كۆمسیۆنا بلند یا هەلبژارتنان ل ئیراقێ ل گەل حوكمەتێ د دانوستاندنان دایە، هەكە ئەو ژڤانە نەهێتە جهگیركرن، بێگومان كارێ بەراهیێ یێ كۆمسیۆنا ئیراقێ دێ ئەنجامدانا هەلبژارتنێن پەرلەمانێ كوردستانێ بیت».
شاندێ سەرۆكایەتیا هەرێما كوردستانێ ب سەرۆكایەتیا سەرۆكێ دیوانێ، ل بەغدا دانوستاندن ل دۆر پێنگاڤ و بەرهەڤیان بۆ ئەنجامدانا هەلبژارتنێن پەرلەمانێ كوردستانێ كرن، دلشاد شەهاب باس ل وێ چەندێ دكەت» كۆمسیۆنا هەلبژارتنێن ئیراقێ بەرهەڤیا خوە یا تمام نیشاندا كو ب هەماهەنگی ل گەل هەرێما كوردستانێ دەست ب ئەنجامدانا هەلبژارتنان بكەن».
دلشاد شەهاب دیاركر ژی» كارێ بەراهیێ یێ مە ئەوە كو هەلبژارتن بهێنە ئەنجامدان و هەرێما كوردستانێ ژ وێ ڤالاتیا دەستووری ڕزگار ببیت، بۆ وێ چەندێ ژی دێ هەموو كارەكێ پێدڤی كەین».
هەروەسا گوت»مە تێكگەهشتنەكا گەلەك باش ل گەل كۆمسیۆنا ئیراقێ هەبوو و بڕیار ئەوە ل نێزیك كۆمسیۆنا ئیراقێ سەرەدانا هەرێما كوردستانێ بكەت بۆ ڤەدیتنا ڕێكەكا دروست بۆ ئەنجامدانا هەلبژارتنان و مە داخواز ژ حوكمەتا ئیراقێ كریە كو یا هاریكار بیت دگەل كۆمسیۆنێ بۆ وێ چەندێ هەلبژارتنێن پەرلەمانێ كوردستانێ ب ڕێكوپێكی بهێنە ئەنجامدان».
شاندێ سەرۆكایەتیا هەرێما كوردستانێ د سەرەدانا خوە دا بۆ بەغدا ل گەل نوونەرایەتیا ڕێكخراوا نەتەوەیێن ئێكگرتی ل ئیراقێ ژی كۆمبوو، سەبارەت وێ چەندێ دلشاد شەهاب گوت» ئەوان ژی بەرهەڤیا خوە نیشاندنا كو پشتەڤان و هاریكار بن».

هەولێر، قائید میرۆ

بەرپرسەكێ پارتی دیموكراتی كوردستان ل كەركووكێ ئاماژە ب وێ چەندێ دكەت، ئالیێن كوردستانی ل كەركووكێ دژی داگیركرنا ئەردێ جوتیارێن كوردن و هەژمارەكا مەزن یا زەڤیێن جوتیارێن كورد هاتینە ڤەگوهاستن بۆ سەر ناڤێ وەزارەتا بەرگریا ئیراقێ كو دخوازیت بكەتە یەكەیێن ئاكنجیبوونێ بۆ ئەفسەرێن لەشكرێ ئیراقێ.
محەمەد كەمال، بەرپرسێ لقێ سێ یێ پارتی دیموكراتی كوردستان ل كەركووكێ بۆ ڕۆژنامەیا (ئەڤرۆ) گوت « پیلانەك هەیە بۆ داگیركرنا ئەردێ جوتیارێن كورد و توركمان ل دەڤەرێن دەوروبەرێ كەركووكێ و بەری چەند ڕۆژان ئالیێن سیاسی ل كەركووكێ كۆمبوون و پارتی دیموكراتی كوردستان ژی پشكداری تێداكر، كۆمبوون ل دۆر ڤێ ئاریشەیا نوكە پەیدابووی ل گوندێن كوردان بوویە و ڕەوشەكا مەترسیدار هاتیە دەستپێكرن و گەف ل سەر جوتیارێن كورد هەنە ل كەركووكێ، چونكە دخوازن ئەردێ خەلكێ ڕەسەنێ دەڤەرێ داگیر بكەن و كورد ل سەر ئەردێ وان بهێنە دەركرن، لەوڕا ژی ڕەوشەكا مەترسیدار كەركووك ڤەگرتیە و هەكە ڕێگری نەهێتەكرن ئەڤە دێ ئالۆزی پەیدابن».
بەرپرسێ لقێ سێ یێ پارتی گوت ژی» ئەو ئەردێ نوكە ئاریشە ل سەر هەین مولكێ خەلكێ كوردێن دەڤەرێ و توركمانایە، بەلێ ل سەردەمێ ڕژێما بەعسا گۆڕ بەگۆڕ ژ كورد و توركمان هاتیە وەرگرتن و ب شێوەیێ گرێبەست ئەو ئەرد دایە وەلاتیێن ئەرەب، ئەو ئاریشە پێدڤیە ب ڕێكا مادەیێ 140 یێ دەستوورێ ئیراقێ بهێتە چارەسەركرن، بەلێ مخابن ئەڤە ئیراقە و هەر كولانەكێ حوكمەتەك تێدایە، لەوڕا ژی ئاریشەیا ئەردێ جوتیاران ب گۆرەی قانوون و دەستووری ناهێتە چارەسەركرن».
محەمەد كەمال ئاماژەكر» هەژمارەكا مەزن یا وان پارچەیێن ئەردی یێن جوتیارێن كورد ل كەركووكێ هاتینە ڤەگوهاستن بۆ سەر وەزارەتا بەرگریا ئیراقێ و نوكە ئیراق بزاڤان دكەت یەكەیێن ئاكنجیبوونێ بۆ ئەفسەرێن سەربازی ل سەر ئاڤا بكەت، هەتا ڕووبەرەكێ مەزن یێ ئەردێ ئەرەبێن شیعەژی تێدایە و نوكە شیعەیێن دەڤەرێ ژی دگەل كوردانن بۆ ڕەتكرنا ئەڤێ بڕیارێ».
پتر گوت» ئالیێن كوردی ل كەركووكێ ئێك هەلویست هەیە بۆ چارەسەركرنا ئاریشەیا جوتیاران و بەرگریێ ژ وەلاتیێن كورد دكەن ل كەركووكێ، بەلێ مخابن ئێكەتی نیشتیمانی كوردستان هەلویستەكێ دیار نینە و دگەل ئالیێن كوردی ل كەركووكێ ئێك هەلویست نینە بۆ چارەسەركرنێ، بەرۆڤاژی هەموو ئالیێن كوردی بزاڤان دكەن ئاریشە ب ڕێكا قانوونێ بهێتە چارەسەركرن و ڕێگریێن ل جوتیاران دهێنەكرن نەمینن، هەموو ئالیێن سیاسی دژی ئەڤێ غەدرێ كار دكەن و ئەم ڕێكێ نادەین غەدر ل جوتیارێن كورد ل كەركووكێ بهێتەكرن».

سەرۆكێ حوكمەتا هەرێما كوردستانێ، مەسرور بارزانی پێشوازی ل نەسیر مەمەدۆڤ كاربرێكەرێ كاروبارێن بالیۆزخانەیا ئازەربایجان ل ئیراقێ كر.
د كۆمبوونەكێ دا پێشڤەبرنا پەیوەندیێن د ناڤبەرا هەرێما كوردستانێ و وەلاتێ ئازەربایجانێ دا هاتە باسكرن، كاربرێكەرێ بالیۆزخانەیا ئازەربایجان بەرهەڤیا وەلاتێ خوە بۆ ب هێزكرنا پەیوەندیان ل گەل هەرێما كوردستانێ بەرچاڤكر، ئاماژە ب وێ چەندێ ژی كر كو د دەمێ داهاتی دا دێ كونسۆلخانەیا گشتی یا ئازەربایجانێ ل هەرێما كوردستانێ هێتە ڤەكرن، ژ ئالیێ خوەڤە سەرۆكێ حوكمەتا هەرێما كوردستانێ خواستا هەرێمێ بۆ پێشڤەبرنا پەیوەندیان ل گەل كۆمارا ئازەربایجان دووپاتكر.

هۆشەنگ تاجر:

چاڤدێرەکێ سیاسی راگەهاند، نها بابەتێ ڤەگەرا پەنابەرێن سووریێ یێن ل تورکیا بابەتەکێ گەلەک گەرمە، بەری نها تورکیا گەفا ئۆپەراسیۆنێن سەربازی ل دژی رۆژئاڤایێ کوردستانێ دکر، لێ نها تورکیا دڤێت ل گەل سووریێ رێککەڤیت و پەنابەرێن سووریێ ڤەگەرینتە رۆژئاڤایێ کوردستانێ و وەسا دیمۆگرافیا رۆژئاڤایێ کوردستانێ بگوهۆڕیت.

حەمید عەفرینی چاڤدێرێ سیاسی یێ رۆژئاڤایێ کوردستانێ بۆ ئەڤرۆ دیار کر، بەری نها سەرۆک کۆمارێ تورکیا گەفا ئۆپەراسیۆنەکا نوو یا سەربازی ل دژی رۆژئاڤایێ کوردستانێ دکر، لێ پشتی هەلبژارتنان ئێدی ئەو یەک نەما، چونکی بەری نها ئەردۆغانی دخواست بابەتێ ئۆپەراسیۆنەکا نوو یا سەربازی بۆ سەرکەفتنا خوە د هەلبژارتنان دا بکار بینیت، لێ پشتی سەرکەفتنا ئەردۆغانی د هەلبژارتنان دا نها پلانا وی هاتیە گوهۆڕین و گۆت: (تورکیا نها دڤێت پەنابەرێن سووریێ یێن ل تورکیا وەکو کارتەکێ ل دژی کوردان ل رۆژئاڤایێ کوردستانێ بکار بینیت، بەری هەلبژارتنان ژی سەرۆک کۆمارێ تورکیا راگەهاند وان دڤێت د پێنگاڤا ئێکێ دا ئێک ملیۆن پەنابەرێن سووریێ ل دەڤەرێن ئارام ل باکورێ سووریێ بجه بکەن، ئارمانجا ئەردۆغانی ژ دەڤەرێن ئارام ژی بێگومان ئەو دەڤەرێن رۆژئاڤایێ کوردستانێ نە یێن بەری چەند سالان تورکیا داگیر کری و نها ژی تورکیا دڤێت پەنابەرێن سووریێ ل سەر ئاخا کوردان بجه بکەت و وەسا دیمۆگرافیا رۆژئاڤایێ کوردستانێ بگوهۆڕیت، بێگومان ئەو یەک ژی مەترسیەکا خوە یا گەلەک مەزن بۆ کوردان ل رۆژئاڤایێ کوردستانێ هەیە).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، تورکیا و سووریێ دێ دەست ب قۆناغەکا نوو کەن، چونکی ژ بۆ رژێما بەشاری ژی چو رێیێن دی نینن و دڤێت ل گەل تورکیا دەست ب دانوستاندنان بکەت، لێ ئەو یەک دێ بۆ کوردان ل رۆژئاڤایێ کوردستانێ مەترسیەکا خوە یا گەلەک مەزن هەبیت، چونکی تورکیا دڤێت کورد ل سووریێ نەگەهنە مافێن خوە و بەرهەڤە هاریکاریا سووریێ ژی بکەت، خالا دی ئەو پلانا نها تورکیا ژی ب تەمامی د بەرژەوەندیا سووریێ دایە، ب کورتی یا رژێما سووریێ د چەند سالێن بۆری دا نەشیا بکەت تورکیا وێ پلانێ بجه دئینیت و عەرەبان ل سەر ئاخا کوردان بجه دکەت و گۆت: (بێگومان پلانا تورکیا ب تەمامی د بەرژەوەندیا رژێما سووریێ دایە و دبیت هەر دو ئالی ل سەر بنەمایێ نەهێلانا ئیرادا کوردی ل سووریێ بگەهنە هندەک رێککەفتنان، ئەو یەک ژی دێ مەترسیەکا خوە یا گەلەک مەزن بۆ کوردان هەبیت، براستی ژی بابەتێ پەنابەرێن سووریێ دشێت ببیتە مەترسیەکا مەزن بۆ کوردان).
ل دۆر هندێ کا کورد دشێن چ بکەن ژی چاڤدێرێ سیاسی راگەهاند، مخابن هەر دو جڤاتێن کوردی یێن رۆژئاڤایێ کوردستانێ د چەند سالێن بۆری دا گەلەک دەلیڤێن دیرۆکی ژ دەستدان، ب جهێ هندێ هێزێن کوردی هاریکاریا هەڤدو بکەن و بەرەیەکێ نەتەوەیی یێ کوردی ل سووریێ و رۆژئاڤایێ کوردستانێ دروست بکەن، دیسان دژبەریا هەڤدو کرن و ژ بەر هندێ ژی گەلەک دەلیڤێن دیرۆکی ژ دەست دان، مخابن نها پێگەهێ کوردان ل سووریێ گەلەک لاواز بوویە، کوردان د شەرێ ل دژی داعشێ ل سووریێ دا هەری زێدە قوربانی دان و شیان دربێن کوژەک ل داعشێ بدەن، لێ مخابن نها کورد ل سووریێ ب جهێ هندێ کو بهێز کەڤن لاواز دبن، ئەو هزرا بەری چەندین سالان بۆ کوردان دهاتە کرن نها تشتەک وەسا نینە و گۆت: (مخابن ئەو نەخوەشیا کوردان یا کو چ دەمەکێ نابنە ئێک ل رۆژئاڤایێ کوردستانێ ژی وەسا کر کورد ببنە قوربانی، رژێما بەشاری نها پتر ژ هەر دەمەکێ بهێز کەفتیە، رژێما بەشاری پەیوەندیێن خوە ل گەل پڕانیا وەلاتێن عەرەبی ئاسایی کریە، د ئاستێ نێڤدەولەتی دا ژی وەکو بەرێ دژبەریا بەشاری و رژێما وی ناهێتە کرن، ئەو یەک ژی دێ بیتە ئەگەرێ هندێ شام و ئەنقەرە ل سەر بنەمایێ نەهێلانا رێڤەبەریا خوەسەر پێکڤە کار بکەن).
ناڤهاتی د دووماهیا ئاخڤتنا خوە دا ئەو یەک ژی نەڤەشارت هەکە نها ژی کورد بشێن ل رۆژئاڤا پێکڤە بەرەیەکێ نشتیمانی ئاڤا بکەن دێ شێن رێگریێ ل گەلەک پلانێن تورکیا و سووریێ بکەن، لێ هەکە ئەو یەک نەهێتە کرن ب مخابنی ڤە دێ مەترسیێن گەلەک مەزن ل سەر رۆژئاڤایێ کوردستانێ هەبن، چونکی تورکیا دڤێت خوە ژ پەنابەرێن سووریێ قورتال بکەت و بێگومان ئەو یەک ژی ل سەر حسابا کوردان بیت، بجهکرنا پەنابەرێن عەرەبێن سووریێ ل سەر ئاخا کوردان پیلانەک گەلەک مەترسیدارە، هەکە ئەمریکا و هەڤپەیمانیا نێڤدەولەتی یا شەرێ ل دژی داعشێ ئاستەنگیان ل هەمبەر پلانا تورکیا دروست نەکەن دێ تورکیا و سووریێ شێن پێکڤە دیمۆگرافیا رۆژئاڤایێ کوردستانێ ب تەمامی بگوهۆرن، مخابن کورد نها د ئاستەکێ وەسا دا نینن کو بشێن ئاستەنگیان ل هەمبەر پلانا تورکیا و سووریێ دروست بکەن.

نێچیرڤان بارزانی، سەرۆكێ هەرێما كوردستانێ، د پەیوەندیەكا تەلەفۆنیدا ل گەل بافل تالەبانی، سەرۆكێ ئێكەتی نیشتمانی كوردستانی، ل سالڤەگەرا 48 یا دامەزراندنا ئێكەتیێ، پیرۆزباهی ل وی و جڤاتا بلند یا سیاسی و بەرژەوەندیان و مەكتەبا سیاسی و سەركردایەتی و هەموو ئەندام و جەماوەرێ ئێكەتی نیشتمانی كوردستان كر و هیڤی خواست ئەڤ هەلكەفتە ببیتە پالدەرێ تەباییێ و پێكڤەكاركرنێ و ئێكڕێزیا ئالیێن سیاسی ب تایبەتی پارتی و ئێكەتی. ژئالیێ خوەڤە بافل تالەبانی، ب ناڤێ خوە و سەركردایەتیا ئێكەتیێ، سوپاس و پێزانین بۆ پیرۆزباهیا سەرۆكێ هەرێما كوردستانێ دەربری و هیڤیا سەركەفتنێ بۆ خواست.

سەرۆكێ حوكمەتا هەرێما كوردستانێ، مەسرور بارزانی، پەیامەكا پیرۆزباهیێ ئاراستەی ئێكەتی نیشتمانی كوردستان دكەت ب هەلكەفتا 48 سالیا دامەزراندنا وێ و د پەیاما خوە دا دبێژیت، ب هەلكەفتا سالڤەگەرا 48 یا دامەزراندنا ئێكەتی نیشتمانی كوردستان، پیرۆزباهیێ ل سەركردایەتی و هەموو ئەندام و لایەنگرێن ئێكەتیێ دكەم. هیڤیدارم د ڤی بارۆدۆخی دا، هەموو هێزێن سیاسی، پێكڤە كاربكەن و هەموو ئالیەك هەست ب بەرپرسیارەتیا دیرۆكی یا خوە بكەن و خزمەتكرنا بلند یا نیشتمانی، بكەنە ڕێرەوێ كارێ خوە یێ نوكە و پاشەڕۆژێ.

بەرپرسێ دەستەیا كارگیریا مەكتەبا سیاسی یا پارتی، فازل میرانی، پێشوازی ل (مەمەد مەولود یاكوت) قونسۆلێ گشتیێ توركیا ل هەرێما كوردستانێ و شاندێ دگەلدا كر. د دیدارەكێدا فازل میرانی پیرۆزباهی ل رەجەب تەیب ئردۆگان كر ب هەلكەفتا هەلبژارتنا وی وەكو سەرۆكێ كۆمارێ توركیا و پیرۆزباهی ئاراستەی گەلێ توركیا كر. قونسۆلێ گشتیێ توركیا هیڤی خواست بشێت پەیوەندیێن وەلاتێ خوە ل گەل هەرێمێ پێشڤەببەت ب تایبەتی د وان بوارێن بۆ هەردو ئالیان دگرنگ. دووماهی پێشهاتێن هەرێما كوردستانێ و ئیراقێ ودەڤەرێ ب گشتی و بڕیارا ڤێ دووماهیێ یا دادگەها فیدرالی یا ئیراقی و پرۆسەیا هەلبژارتنێن پەرلەمانێ كوردستانێ و چەند پرسێن دی، تەوەرەكێ دی یێ دیدارێ بوون.

هەولێر، قائید میرۆ

پەرلەمانتارەكا فڕاكسیۆنا پارتی دیموكراتی كوردستان جڤاتا نوونەرێن ئیراقێ ئاماژە ب وێ چەندێ دكەت، موزایەدێن سیاسی ب ڤەگەڕاندنا پاشكەفتێ مووچەیێ فەرمانبەرێن هەرێما كوردستانێ دهێنەكرن و هەموو كەس دزانیت حوكمەتا ئیراقێ بەرپرسە ژ ڤەگەڕاندنا پاشەكەفتێ مووچەیێ فەرمانبەران و ئەركێ بەغدایە مووچەیێن هاتینە بڕین ڤەگەڕینیت بۆ خەلكێ كوردستانێ.
نەهلە ئەفەندی، ئەنداما جڤاتا نوونەرێن ئیراقێ ژ فڕاكسیۆنا پارتی دیموكراتی كوردستان بۆ ڕۆژنامەیا (ئەڤرۆ) گوت» پارتی دژی ڤەگەڕاندنا مووچەیێ فەرمانبەرێن هەرێما كوردستانێ نینە و بەرۆڤاژی ئێك ژ بزاڤێن پارتی بۆ هندێ یە پاشكەفت بهێتە ڤەگەڕاندن، چونكە مافێ قانوونیێ فەرمانبەرانە هەر چەند مووچە هاتبینە بڕین و پاشەكەفتكرن بهێنە ڤەگەڕاندن، بەلێ پرسیار ئەوە كێ بودجە و مووچە بڕینە و دڤێت ڤەگەڕینیت، یا خویایە ژ سالا 2014ێ وەرە حوكمەتا فیدڕال پشكا هەرێما كوردستانێ بڕی و هەتا نوكە ژی یا پێگیر نینە ب ڤەگەڕاندنا پشكا هەرێما كوردستانێ ئەڤەژی بۆ ئەگەر حوكمەتا هەرێما كوردستانێ بهێتە نەچاركرن مووچەیێ فەرمانبەران پاشكەفت بكەت، چونكە قەیرانا دارایی دەستپێكر و چو داهات نەمان بۆ هەرێما كوردستانێ، نوكە ژی ئەركێ حوكمەتا بەغدایە ڤی مافێ قانوونیێ فەرمانبەرێن هەرێما كوردستانێ ڤەگەڕینیت و دەست ب دانا پاشەكەفتێ مووچەی بۆ هەموو فەرمانبەرێن هەرێما كوردستانێ بكەت، پارتی دیموكراتی كوردستان هەر ژ دەستپێكێ دگەل ڤەگەڕاندنا پاشەكەفتێ مووچەی بوویە و سیاسەتا پارتی یا نەگوهۆڕە بۆ ڤەگەڕاندنا مووچەیێن وەلاتیان».
گوت ژی» ئەو گوهۆڕینێن هاتینەكرن ل پشكا هەرێما كوردستانێ د ناڤا پڕۆژەیێ قانوونا بودجەیا گشتی یا ئیراقێ ئاستەنگ بۆ پشكا هەرێما كوردستانێ چێكرینە و موزایەدە ب ڤەگەڕاندنا پاشەكەفتێ مووچەی دهێتەكرن، هەكە بهێت و ئەو كەس و ئالیێن دخوازن پاشەكەفت ڤەگەڕیت بلا گڤاشتنان بكەنە سەر بەغدا كو مافێ خەلكێ كوردستانێ ڤەگەڕینیت، بێی دیاركرنا چو پارەیەكی دێ چاوا پاشەكەفت هێتە ڤەگەڕاندن تنێ د ڕاگەهاندنێ دا هندەك ئالی دخوازن ڤێ پرسێ بۆ ڕیكلامێن هەلبژارتنان بكاربینن و خوە بكەنە خودان دەستكەفت و ئەڤە د دەمەكی دایە ئالیێ ئێكانە ل بەغدا كار بۆ ڤەگەڕاندنا شایستەیێن خەلكێ كوردستانێ دكەت تنێ پارتیە و بەری نوكە ژی پارتی هەموو بزاڤ بۆ ئەنجامدانا ڕێككەفتنا دگەل بەغدا كریە هەتا مووچە و پشكا هەرێما كوردستانێ بهێتە گرەنتیكرن د ناڤا پڕۆژەیێ قانوونا بودجەیا گشتی یا ئیراقێ دا، بەرۆڤاژی ڕێككەفتنا هاتیەكرن ئەم ڕازینابین گوهۆڕین بهێنەكرن و هەموو شیانێن خوە دێ مەزێخین گوهۆڕینێن د ناڤا مادەیێن 13 و 14 هاتینە كرن بهێنە هەلوەشاندن و پاشی دەنگ ل سەر پڕۆژەیێ قانوونا بودجەیا گشتی یا ئیراقێ بهێتەدان.

ئەندامەكێ جڤاتا نوونەرێن ئیراقێ ژ فراكسۆنا پارتی دیموكراتی كوردستان، دووپاتكر: ئەو گوهۆڕینێن د مادەیێن 13 و 14 د پڕۆژەیێ قانوونا بودجەیا گشتی یا ئیراقێ دا هاتینە كرن بۆ دژایەتیكرنا هەرێما كوردستانێ یە، هەروەسا دیاركر: بزاڤێن مە ل بەغدا ل گەل هەڤپەیمانیا بڕێڤەبرنا دەولەتێ بۆ چارەسەركرنا كێشەیان د بەردەوامن.
شێروان دوبەردانی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان گوت» ئەو گوهۆڕینێن كو د هەردوو مادەیێن 13 و 14 ژ پڕژەیێ قانوونا بودجەیا گشتی یا ئیراقێ دا ژ ئالیێ هندەك ئەندامێن چارچۆڤەیێ هەماهەنگیێ و ئالیێن دی هاتینە كرن بۆ دژایەتیكرنا هەرێما كوردستانێ و قەوارەیێ وێ بوو».
هەروەسا ڕاگەهاند» سەبارەت بابەتێ داهاتێ پەترۆلێ، هەردو ئالی ڕێككەفتبوون كو داهاتێ پەترۆلا هەرێما كوردستانێ بچیتە د ناڤ هەژمارەكا بەنكی دا كو تنێ بۆ سەرۆك وەزیرێن هەرێما كوردستانێ هەیە مامەلێ ب وی داهاتی بكەت، ل بن چاڤدێریا سەرۆك وەزیرێن ئیراقێ، بەلێ د وان گوهۆڕینێن هاتینە كرن وەكریە كو داهاتێ پەترۆلا هەرێما كوردستانێ ل بن چاڤدێریا وەزیرێ داراییا ئیراقێ بیت، ئەڤە ژی دژی دەستوور و ڕێككەفتنا د ناڤبەرا بەغدا و هەرێما كوردستانێ دا یە».
ناڤبری دووپاتی ژی ل سەر بەردەوامیا دانوستاندنێن وان وان ل گەل هەڤپەیمانیا بڕێڤەبرنا دەولەتێ و چارچۆڤەیێ هەماهەنگیێ كر بۆ وێ چەندێ د ڤێ حەفتیێ دا كۆمبوونا جڤاتا نوونەرێن ئیراقێ بهێتە كرن ب مەبەستا پەسەندكرنا پڕۆژە قانوونا بودجەیا گشتی یا ئیراقێ، چونكو پشتی 8 خزیرانێ بهێنڤەدانا جڤاتا نوونەرێن ئیراقێ دێ دەستپێكەت».
شێروان دوبەردانی دووپاتكر ژی» حوكمەتا هەرێما كوردستانێ و حوكمەتا ئیراقێ گەلەك د نێزیكن ژ ڕێككەفتنێ و هەروەسا زڤرین بۆ ڕێككەفتنا ڕاست كو ل دەستپێكێ د ناڤبەرا هەردوو سەرۆك وەزیرێن ئیراقێ و هەرێما كوردستانێ هاتیە ئەنجامدان».
هەروەسا گوت ژی» ئەم قبوول ناكەین بەغدا وەكو پارێزگە مامەلێ ل گەل هەرێما كوردستانێ بكەت و د ڕژدین ل سەر بجهئینانا ڕێككەفتنا د ناڤبەرا بەغدا و هەرێما كوردستانێ دا ب وی شێوەیێ كو مەسرور بارزانی، سەرۆك وەزیرێن هەرێما كوردستانێ ل گەل محەمەد شیاع سوۆدانی، سەرۆك وەزیرێن ئیراقێ ئیمزاكری».

بریكارێ وەزارەتا داراییا ئیراقێ ڕادگەهینیت، مەژیەك ل بەغدا هەیە كو هیچ تشتەك بۆ جادەیا ئیراقێ ڤێ نینە، تنێ كاركرن ل سەر پرسا كوردی و هەرێما كوردستانێ نەبیت، دبێژیت ژی: هەڤپەیمانیا بڕێڤەبرنا دەولەتێ یا پێگیرە ب ڕێككەفتنا د ناڤبەرا بەغدا و هەرێما كوردستانێ دا.
مەسعود حەیدر، بریكارێ وەزارەتا داراییا ئیراقێ گوت» دناڤ سەركردەیێن ئێكێ یێن چارچۆڤەیێ هەماهەنگیێ دا، بۆچوونەكا دی هەیە، ئەوژی پێگیری بوونە ب ڕێككەفتنا د ناڤبەرا بەغدا و هەرێما كوردستانێ دا، راستیەكێ ژی هەبوونا خوە هەیە ئەوژی كارنامەیا حوكمەتا محەمەد شیاع سۆدانی، سەرۆك وەزیرێن ئیراقێ ل جڤاتا نوونەرێن ئیراقێ دەنگ ل سەر هاتیە دان، ئێك ژ خالێن سەرەكی یێن وێ كارنامەیێ، ڕێككەفتنە ل گەل هەرێما كوردستانێ ل سەر دۆسێیا پەترۆل و غازێ و هەموو پرسێن ئابووری.
مەسعود حەیدەر ئاماژە كر» مخابن هندەك كەسایەتیێن سیاسی یێن ئیراقی كو هیچ تشتەك ل دەف نینە خوە پێ دەربێخن، تنێ كاركرن ل سەر دۆسێیا هەرێما كوردستانێ نەبیت».
هەروەسا ئاشكراكر» بزاڤێن مەزن هەنە كو رایا گشتی یا ئیراقێ بهێتە د سەردابرن».
بریكارێ وەزارەتا داراییا ئیراقێ ئەوژی گوت» هەڤپەیمانیا بڕێڤەبرنا دەولەتێ، یا پێگیرە ب ڕێككەفتنا د ناڤبەرا بەغدا و هەرێما كوردستانێ دا و سەرۆك وەزیرێن ئیراقێ ب خوە ژی ڕۆلەكێ كاریگەر ل دۆر ڤێ چەندێ هەیە».
دیاركر ژی» پشكەك ژ ئەندامێن جڤاتا نوونەرێن ئیراقێ، دەستهەلاتا د ناڤ جڤاتا نوونەران دا بۆ خوە ب هێزكرنا خوە بكاردئینن».
سەبارەت هنارتنا پەترۆلا هەرێما كوردستانێ، مەسعود حەیدەر دبێژیت» ل دۆر وی بابەتی ڕەهندێ دەڤەری و نێڤدەولەتی هەیە، پێدڤیە سەبارەت وێ چەندێ ڕێككەفتن ل گەل توركیا بهێتە كرن».
سەبارەت پەسەندكرنا پرۆژە قانوونا بودجەیا گشتی یا ئیراقێ، ئاماژەكر كو پێدڤیە پرۆژە قانوونا بودجەی ب ڕێككەفتن دەرباز ببیت، هەكە ئەو چەندە نەهێتە كرن، دێ زڤرین بۆ خالا سفرێ، كو د بەرژەوەندیا پێكهاتەیێن ئیراقێ دا نینە».
گوت ژی» بزاڤێن مەسرور بارزانی، سەرۆكێ حوكمەتا هەرێما كوردستانێ و كوردێن د ناڤ حوكمەتێ و جڤاتا نوونەران دا، ب وی ئاراستەیە كو چارەسەریا پرسان بهێتە كرن».
ل دۆر هنارتنا 400 ملیار دینارێن دی، بریكارێ وەزارەتا داراییا ئیراقێ گوت» چاڤەڕێینە بودجە بهێتە پەسەندكرن و شایستەیێن دارایی یێن د ناڤ بودجەی بهێنە هنارتن، هەكە پەسەندكرنا بودجەی گیرو ببیت، پێدڤیە جڤاتا وەزیرێن ئیراقێ بڕیارێ بۆ هنارتنا 400 ملیار دینارێن دی بۆ مووچەیێ مەهەكا دی دەربكەت».