سه‌رۆكێ حوكمه‌تا هه‌رێما كوردستانێ، مه‌سرور بارزانی، پێشوازی ل دیلان یه‌شیلگۆز وه‌زیرا داد یا هوله‌ندی كر و ددیداره‌كێ دا دانوستاندن ل دۆر پێشڤه‌برنا په‌یوه‌ندیێن هه‌رێما كوردستانێ و هوله‌ندا هاته كرن ب تایبه‌تی هه‌ماهه‌نگی د ناڤبه‌را ده‌ستهه‌لاتا دادوه‌ری یا هه‌ردوئالیان دا.
د ته‌وه‌ره‌كی دی یێ كۆمبوونێ، باس ل گرنگیا به‌رده‌وامبوونا پشته‌ڤانیا هه‌رێما كوردستانێ د روو ب رووبوونا تیرۆرستێن داعشێ و هاریكاریا قوربانیێن ده‌ستێ تاوانێن رێكخراوا تیرۆرستی یا داعشێ هاته كرن.
ئه‌ڤرۆ:
فایق ئۆزتورك په‌یڤدارێ پارتا كۆماری یا گه‌ل راگه‌هاند كو ئاكپارتیێ هه‌تا نها گه‌له‌ك سۆز داینه كوردان لێ نه‌شیایه پرسا كوردی ل توركیا چاره‌سه‌ر بكه‌ت، ژ به‌ر هندێ ژی نها ره‌وشا ناڤخوه‌یی یا توركیا گه‌له‌ك خراب بوویه، ب شه‌ری پرسا كوردی ناهێته چاره‌سه‌ر كرن و مخابن هه‌تا نها ئاكپارتیێ چو پرۆژه ژی بۆ چاره‌سه‌ركرنا پرسا كوردی به‌رهه‌ڤ نه‌كرینه.
ناڤهاتی راگه‌هاند كو پارتا وان دڤێت پرسا كوردی ل په‌رله‌مانێ توركیا بهێته چاره‌سه‌ر كرن، پارتا وان تنێ هێزا سیاسی یه كو به‌رهه‌ڤه پرسا كوردی ل په‌رله‌مانێ توركیا چاره‌سه‌ر بكه‌ت و یا كو هه‌تا نها چو هێزه‌كا سیاسی ل توركیا نه‌شیای بكه‌ت پارتا كۆماری دێ ئه‌نجام ده‌ت.
چاڤدێرێن سیاسی یێن كورد ل توركیا ژی دیار دكه‌ن كو ئارمانجا سه‌ره‌كی یا پارتا كۆماری بده‌ستڤه‌ئینانا ده‌نگێن كوردانه، چونكو د بنه‌مایێ خوه دا پارتا كۆماری پتر ژ ئاكپارتیێ ل دژی مافێن ره‌وا یێن گه‌لێ كورده و هه‌تا نها پارتا كۆماری بخوه ژی چو پرۆژه‌یه‌ك بۆ چاره‌سه‌ركرنا پرسا كوردی به‌رهه‌ڤ نه‌كریه و داخۆیانیێن په‌یڤدارێ پارتا كۆماری ژی به‌رهه‌ڤیه بۆ هه‌لبژارتنان و بده‌ستڤه‌ئینانا ده‌نگێن كوردان.
هه‌ولێر، قائید میرۆ
وه‌زاره‌تا په‌ترۆلا ئیراقێ به‌یاننامه‌یه‌كا دی لدۆر باده‌كا په‌ترۆلا هه‌رێما كوردستانێ به‌لاڤكر و تێدا جاره‌كادی كه‌رتێ په‌ترۆل و غازا هه‌رێما كوردستانێ ب نه‌قانوونی هه‌ژمارت، شاره‌زایه‌كێ قانوونی ژی دبێژیت، بڕیارێن ئێك لایه‌نه ئاریشێ چاره‌سه‌ر ناكه‌ن و پێدڤیه بۆ چاره‌سه‌ریا ئێكجاری ب رێیا دانوستاندنان بگه‌هنه رێككه‌فتنێ هه‌روه‌سا دیاركر، باشترین چاره‌سه‌ری ده‌ركرنا قانوونا په‌ترۆل و غازێ یه ب گۆره‌ی دستوورێ ئیراقێ.
هه‌لوێست میرانی، شاره‌زایێ قانوونی بۆ رۆژناما (ئه‌ڤرۆ) دیاركر” هه‌ڤڕكیێن دناڤبه‌را حوكمه‌تا هه‌رێما كوردستانێ و حوكمه‌تا فیدڕال دا لدۆر بابه‌تێ په‌ترۆل و غازێ گرێدای خه‌مساریا حوكمه‌تا ئیراقێ یه ل هه‌مبه‌ر ده‌ركرنا قانوونا په‌ترۆل و غازێ دده‌مێ پازده سالێن بۆری دا، ل سالا ٢٠٠٧ێ وه‌ره د چارچۆڤێ ره‌شنڤیسا ڤێ قانوونێ ژئالیێ وه‌زاره‌تا په‌ترۆلا ئیراقێ و جڤاتا وه‌زیرێن ئیراقێ ڤه هاتیه هنارتن بۆ جڤاتا نوونه‌رێن ئیراقێ، به‌لێ ب بهانه‌یا راستڤه‌كرنێ دیسان ژئالیێ جڤاتا نوونه‌ران بۆ سه‌رۆكایه‌تیا جڤاتا وه‌زیران هاتیه هنارتن، دوماهی راستڤه‌كرنا ره‌شنڤیسێ پڕۆژه قانوونا په‌ترۆل و غازێ ل هه‌یڤا ئادارا ٢٠٢١ێ ژئالیێ جڤاتا وه‌زیرێن ئیراقێ هاتیه هنارتن بۆ پجڤاتا نوونه‌رێن ئیراقێ، ب دیتنا من گیرۆبوونا ده‌ركرنا قانوونا په‌ترۆل و غازێ بۆ وێ چه‌ندێ ڤه‌دگه‌ریت باوه‌ری د ناڤبه‌را هه‌ردو حوكمه‌تان دا نینه، چونكه ئه‌وا تایبه‌ته ب سه‌ره‌ده‌ریا دگه‌ل هه‌رێما كوردستانێ ده‌ستهه‌لاتا حوكمه‌تا فیدڕال ئه‌وه یاكو د ناڤه‌ڕۆكا ڤی پڕۆژه‌ی دا هه‌ی ب گۆره‌ی مادێ ١١٢ یێ دستووری نه‌هێته داڕێشتن، لسه‌ر بابه‌تێ په‌ترۆل و غازا هه‌رێما كوردستانێ هه‌مان سه‌ره‌ده‌ری دگه‌ل باژێڕێن دی یێن ئیراقێ بۆ بهێته‌كرن، ئه‌ڤه‌ژی رامانا وێ چه‌ندێ دده‌ت وه‌زاره‌تا په‌ترۆلا ئیراقێ هه‌موو ده‌ستهه‌لات د كه‌رتێ په‌ترۆلا هه‌رێما كوردستانێ دا هه‌بن”.
هه‌لوێست میرانی ئاماژه‌كر” ئه‌ز باوه‌رم هه‌رێما كوردستانێ هیچ ده‌مه‌كی رازی نابیت وه‌زاره‌تا په‌ترۆلا ئیراقێ هه‌موو ده‌ستهه‌لات لسه‌ر كه‌رتێ په‌ترۆل و سامانێن سرۆشتی یێن هه‌رێما كوردستانێ هه‌بن، ژ به‌ر كو ئه‌وا د واقع دا هه‌ی حوكمه‌تا هه‌رێما كوردستانێ حسابه‌كادی بۆ دهێته‌كرن و ب گۆره‌ی دستووری ژی هه‌رێما كوردستانێ تایبه‌تمه‌ندیا خوه هه‌یه، ئه‌رك و مافێن سیاسی و كارگێڕی و ئابووری دناڤا دستووری دا هاتینه دیاركرن، بڕیارا دادگه‌ها فیدڕال لدۆر باده‌كا په‌ترۆلا هه‌رێما كوردستانێ دێ بیته ئه‌گه‌ره‌كێ سه‌ره‌كی بۆ وێ چه‌ندێ هه‌ردو حوكمه‌ت له‌زێ بكه‌ن دانوستاندنان لدۆر چاره‌سه‌ركرنا بابه‌تێ په‌ترۆلێ بكه‌ن، ئانكو رێككه‌فتن بهێته‌كرن لسه‌ر باده‌كا په‌ترۆل و غازێ، ژ به‌ر كو تاكو چاره‌سه‌ری بۆ به‌رژه‌وه‌ندیا هه‌ردو ئالیان، ژبلی رێككه‌فتنێ هیچ رێیه‌كا دی نابیته چاره‌سه‌ریا دوماهیێ لدۆر بابه‌تێ په‌ترۆل و غازێ، بڕیارێن ئێك ئالی دێ زێده‌تر ره‌وشێ ئالۆزكه‌ن و ئاریشه دێ هێشتا مه‌زنتربیت و هه‌رێما كوردستانێ یا به‌رهه‌ڤ نابیت بچیته ژێر بجهئینانا هیچ بڕیاره‌كا حوكمه‌تا ئیراقێ”.
ئه‌ڤرۆ:
ل چه‌ند رۆژێن بۆری ژ ئه‌گه‌رێ شه‌رێ د ناڤبه‌را هێزێن ئیراقی و چه‌كدارێن PKK ره‌وشا شنگالێ زێده‌تر ئالۆزی ب خوه‌ڤه دیت و به‌رپرسێ لقێ 17 یێ پارتی ل شنگالێ دبێژیت، پارتی دخوازیت سه‌قامگیری بۆ شنگالێ بزڤریت.
ئاشتی كۆچه‌ر، به‌رپرسێ لقێ 17 یێ پارتی دیموكراتی كوردستان ل شنگالێ گۆت” پشتی روودانێن 16 ئۆكتۆبه‌رێ هه‌ژماره‌كا هێزان هاتنه دناڤ شنگالێ دا و به‌رده‌وام ئالۆزی په‌یداكرن، ب تایبه‌تی هێزێن ب سه‌ر PKK ڤه و هنده‌ك هێزێن حه‌شدا شه‌عبی، ئه‌و چه‌نده ژی هۆكاره كو ئاوارێن ئێزدی نازڤرن بۆ جهێن خوه و دناڤ 14 كه‌مپێن هه‌رێما كوردستانێ دا د ئاكنجی نه، رێككه‌فتنا شنگالێ هاتیه كرن د ناڤبه‌را حوكمه‌تا فیدرال و هه‌رێما كوردستانێ دا، نوكه حوكمه‌تا كازمی دخوازیت رێككه‌فتنا شنگالێ بجهبینیت و ئه‌و هێزێن نه شه‌رعی بهێنه ده‌ركرن”.
به‌رپرسێ لقێ 17 ل شنگالێ زێده‌تر گۆت”ژ ئه‌گه‌رێ ئالۆزیێن رۆژێن بۆری ل شنگالێ زێده‌تر ژ هزار و 700 خێزانان ئاواره بوون و گه‌هشتنه پارێزگه‌ها دهۆكێ، بێگومان به‌رده‌وامیا ئالۆزیێن شنگالێ دێ گه‌له‌ك زیان بۆ هه‌بن و ئه‌م چاڤدێریا ره‌وشێ دكه‌ین”.
سه‌باره‌ت بزاڤێن ڤه‌گه‌راندنا سه‌قامگیریێ بۆ شنگالێ، ئاشتی كۆچه‌ر، دبێژیت” مه وه‌كو پارتی هه‌ر ژ ده‌ستپێكێ بزاڤێن مه ب ئاراسته‌یا ئاساییكرنا ره‌وشا شنگالێ بوو، ل شه‌رێ دژی داعشێ شه‌هیدێن مه به‌لگه‌نه ل سه‌ر وێ چه‌ندێ كو پارتی چه‌ند به‌رگری ژ شنگالێ كریه، نوكه ژی بزاڤ ب ئاراسته‌یا ڤه‌گه‌راندنا سه‌قامگیریێ نه بۆ قه‌زا شنگالێ و پاراستنا خه‌لكێ شنگالێ، ئانكو نوكه ژئالیێ پارتی ڤه دانوستاندن و بزاڤ یێن هه‌ین بۆ وێ ئێكێ ره‌وشا شنگالێ بهێته ئاساییكرن”.
ئه‌ڤرۆ:
شیره‌تكارێ سه‌رۆكێ هه‌رێما كوردستانێ راگه‌هاند، بزاڤ یێن هه‌ین بۆ ئه‌نجامدانا كۆمبوونه‌كێ د ناڤبه‌را پارتی دیموكراتی كوردستان و ئێكه‌تی نیشتمانی كوردستان دا.
دلشاد شه‌هاب، شیره‌تكارێ سه‌رۆكێ هه‌رێما كوردستانێ گۆت” بزاڤێن رێكخستنا كۆمبوونه‌كا بلند دناڤبه‌را ئالیێن سیاسی د به‌رده‌وامن و ئالیێن سیاسی ژی پێشوازی ل وان بزاڤان كریه، بزاڤ ژێ یێن دهێنه كرن بۆ ئه‌نجامدانا كۆمبوونه‌كێ دناڤبه‌را پارتی دیموكراتی كوردستان و ئێكه‌تی نیشتمانی كوردستان دا”.
ب هه‌لكه‌فتا جه‌ژنا ره‌مه‌زانا پیرۆز، د په‌یاما پیرۆزكرنا جه‌ژنێ دا، نێچیرڤان بارزانی، سه‌رۆكێ هه‌رێما كوردستانێ نووترین ده‌ستپێشخه‌ری خسته به‌رده‌م ئالیێن سیاسی و داخواز ژ پارتی و ئێكه‌تیێ و هه‌موو ئالیێن كوردستانی كر جه‌ژنێ بكه‌نه ده‌لیڤه‌ك بۆ نه‌هێلانا كێشه و ناكۆكیان، هه‌روه‌سا داخواز كر ژی خوه ژ هه‌وێن راگه‌هاندنێ و هه‌ڤدو شكاندنێ بپارێزن.
شیره‌تكارێ سه‌رۆكێ هه‌رێمێ ئاماژه كر” ئالیێن سیاسی سه‌رۆكایه‌تیا هه‌رێما كوردستانێ وه‌كو چه‌ترا كۆمڤه‌كرنا هه‌موویان دهه‌ژمێرن و گۆت” په‌رت و به‌لاڤبوونێ گورزه‌كێ مه‌زن ل مه‌دایه”.
دلشادی ئه‌گه‌رێ نه‌بوونا ده‌لیڤێ بۆ كۆمبوونا ئالیێن سیاسی بۆ ره‌وشا سیاسی دزڤرینیت و به‌حس ل وێ چه‌ندێ ژی دكه‌ت كو دشیان دایه د چارچۆڤێ ئارمانجه‌كا نیشتمانی ئێك بگرن.
سه‌رۆكێ هه‌رێما كوردستانێ د په‌یاما خوه دا ب هه‌لكه‌فتا جه‌ژنا ره‌مه‌زانێ گۆتبوو ژی” ل هه‌رێما كوردستانێ ژ هه‌موو ده‌مه‌كی زێده‌تر مه پێدڤی ب ته‌بایی و ئێكرێزیێ یه” هه‌روه‌سا داخوازی ژ ئالیان ژی هه‌بوو كو پێكڤه د ئێكرێز و هاریكار و هه‌ماهه‌نگ بن تاكو ل سه‌ر ئاستێ ئیراقێ ژی پێگه و رۆل وكاریگه‌ری هه‌بیت.
ب دیتنا شێره‌تكارێ سه‌رۆكێ هه‌رێما كوردستانێ” پارتی و ئێكه‌تیێ به‌رسڤا ده‌ستپێشخه‌ریا سه‌رۆكایه‌تیا هه‌رێما كوردستانێ دایه” دیاركر ژی” سه‌رۆكایه‌تیا هه‌رێما كوردستانێ دخوازیت ئێكرێزی هه‌بیت”.
ئه‌ڤرۆ:
سه‌رۆكێ حوكمه‌تا هه‌رێما كوردستانێ د په‌یامه‌كێ دا ب هه‌لكه‌فتا سالیادا دامه‌زراندنا ئێكه‌تیا مامۆستایێن كوردستانێ پیرۆزباهی ل هه‌موو مامۆستایان كر و راگه‌هاند، مامۆستایێن كوردستانێ ل سه‌رده‌م و قۆناغێن جودا یێن خه‌باتا گه‌لێ كوردستانێ هه‌تا ئه‌ڤرۆ، رۆله‌كێ دیار و پێشنه‌گ ل به‌رگریكرنێ ژ مافێن ره‌وا یێن خه‌لكێ كوردستانێ و پێگه‌هاندنا نه‌ڤیێ نوو و هشیاركرنا جڤاكی هه‌بوو.
د په‌یاما سه‌رۆكێ حوكمه‌تا هه‌رێما كوردستانێ داهاتیه: مامۆستا دشێن ب رێیا په‌روه‌رده‌كا دروست و پێشكه‌فتی، جڤاكه‌كێ ساخله‌م ئاڤا بكه‌ن، جڤاكه‌ك كو مرۆڤێ نیشتمانپه‌روه‌ر وداهێنه‌ر دروست بكه‌ت و پشكه‌ك بیت ژ پرۆسا پێشخستن و گه‌شه‌پێدانا كوردستانێ.
سه‌رۆكێ حوكمه‌تا هه‌رێما كوردستانێ د په‌یاما خوه دا سوپاسیا مامۆستایێن كوردستانێ كر كو سه‌ره‌رای ره‌وشێن دژوار دا، به‌لێ هه‌موو بزاڤكرن پرۆسا خواندنێ به‌رده‌وام بیت و هیڤی خواستن حوكمه‌تا هه‌رێما كوردستانێ ب هاریكاریا هه‌موو ئالیه‌كی، بشێت خزمه‌ته‌كا زێده‌تر و شایسته‌تر یا مامۆستایێن كوردستانێ بكه‌ت.
ئه‌ڤرۆ:
سه‌رۆكێ هه‌رێما كوردستانێ، نێچیرڤان بارزانی، ب هه‌لكه‌فتا سالیادا دامه‌زراندنا ئێكه‌تیا مامۆستایێن كوردستانێ، په‌یامه‌ك به‌لاڤكر و تێدا دبێژیت، سالیادا 60 یا دامه‌زراندنا ئێكه‌تیا قوتابیێن كوردستانێ، ب گه‌رمی ل هه‌موو مامۆستایێن كوردستانێ پیرۆز دكه‌م، هیڤیا سه‌ركه‌فتنێ بۆ دخوازم، ب رێز و پێزانین ڤه رۆلێ گرنگ و پیرۆزێ مامۆستایان و بزاڤێن وان بۆ فێركرن، په‌روه‌رده‌كرن و پێگه‌هاندنا نه‌ڤیێن نوكه و پاشه‌رۆژا كوردستانێ، ب بلند د هه‌لسه‌نگینین.
گۆت ژی” به‌رپرسیاره‌تی، به‌رهه‌ڤی و رۆلێ پێشه‌نگ یێ مامۆستایان بۆ په‌روه‌رده‌كرنێ و پێگه‌هاندنا تاكی، ل رۆژێن سه‌خت یێن شۆره‌شێ و د ئازادیا نوكه دا، جهێ ده‌ستخوه‌شیێ و پێزانینێ یه، ل رۆژێن هه‌ره سه‌خت دا، مامۆستایێن دلسۆزێن كوردستانێ خوه ل به‌ر هه‌موو ئاسته‌نگان گرتیه و د ئه‌ركێ پیرۆز یێ په‌روه‌رده‌كرن و فێركرنێ دا به‌رده‌وام بوون”.
سه‌رۆكێ هه‌رێما كوردستانێ زێده‌تر دبێژیت” نه‌ڤیێن نوكه و پاشه‌رۆژێ ئه‌مانه‌تی مامۆستایانه، له‌وما مامۆستا كلیل و بناغا سه‌ركه‌فتنا هه‌ر جڤاكه‌كێ پێشكه‌فتی نه و رۆلێ وان د پێشڤه‌برنا كه‌لتوورێ هه‌ڤدوو قه‌بوولكرنێ و لێبۆرینێ و پێكڤه‌ژیانێ یێ هه‌ی، مامۆستایێن كوردستانێ هه‌ژی ژیانه‌كا باشترن، هه‌موو پشته‌ڤانیه‌كێ بۆ ماف و داخوازی و شایستێن وان دووپات دكه‌ین و ب رێز وپێزانین ڤه سه‌حدكه‌ینه رۆل و خزمه‌تا ئێكه‌تیا مامۆستایێن كوردستانێ”.
ل سه‌ر داخوازناما فه‌رمی یا فه‌رمانده‌یا ناڤه‌ندی یا هێزێن ئه‌مریكی، شانده‌كێ بلند یێ وه‌زاره‌تا پێشمه‌رگه و له‌شكرێ ئیراقێ دێ سه‌ره‌دانا ئه‌مریكا كه‌ت.
شانا راگه‌هاندنا وه‌زاره‌تا پێشمه‌رگه راگه‌هاند، ب داخوازنامه‌كا فه‌رمی یا فه‌رمانده‌یا ناڤه‌ندی یا هێزێن ئه‌مریكی، شانده‌كێ بلند یێ راگه‌هاندنا ئه‌منی یا ئیراقی كو عه‌مید عوسمان محه‌مه‌د، رێڤه‌به‌رێ گشتیێ راگه‌هاندن و هشیاریا نیشتمانی ل وه‌زاره‌تا پێشمه‌رگه ئه‌ندامه تێدا، دێ به‌ر ب ئه‌مریكا چیت.
دیاركر، سه‌باره‌ت كار و چالاكیێن راگه‌هاندنا له‌شكری ل ئیراقێ، هه‌روه‌سا باشتركرنا هه‌ماهه‌نگیێ و په‌یوه‌ندیێ د ناڤبه‌را راگه‌هاندنا له‌شكرێ ئیراقێ و هێزێن پێشمه‌رگه‌ی و هێزێن هه‌ڤپه‌یمانان، ب تایبه‌تی ژی ئه‌مریكا دێ چه‌ند دیدار و كۆمبوونێن تایبه‌ت هه‌بن و هه‌ر د وێ سه‌ره‌دانێ دا دێ سه‌ره‌دانا چه‌ندین ناڤه‌ندێن له‌شكری یێن ئه‌مریكی یێن بلند هێته كرن.
ئه‌نداما په‌رله‌مانێ كوردستانێ ژ فراكسیۆنا پارتی، خه‌دیجه عه‌مه‌ر، راگه‌هاند، بزاڤێن كۆمبوونێن په‌رله‌مانی یێن ده‌ستپێكرین و بریاره ل ڤێ حه‌فتیێ چه‌ند كۆمبوونه‌ك بۆ كاراكرنا په‌رله‌مانێ كوردستانێ بهێنه ئه‌نجامدان و دگاڤا ئێكێ دا سه‌رۆكێن فراكسیۆنێن دناڤا په‌رله‌مانی دا دێ كۆمبن و پاشی كۆمبوونا ده‌سته‌یا سه‌رۆكایه‌تیا په‌رله‌مانی و سه‌رۆكێن فراكسیۆنان دێ هێته ئه‌نجامدان بۆ وێ چه‌ندێ تاكو په‌رله‌مان ده‌ست ب كۆمبوونێن خوه بكه‌ت. گۆت ژی، پارتی هیچ مه‌رجه‌ك نینه بۆ ده‌ستپێكرنا كۆمبوونێن په‌رله‌مانی و تنێ مه‌به‌ستا مه بۆ ده‌ستپێكرنا كۆمبوونێن په‌رله‌مانی ئه‌وه په‌رله‌مان وه‌كو ده‌زگه‌هه‌كێ گرنگ نه‌هێته ئیفلیجكرن و ئه‌ركێ خوه بجهبینیت. و دیاركر كو ئه‌نجامدانا پرۆسا هه‌لبژارتنان پێدڤی ب ئێكلاكرنێ هه‌یه ئه‌وژی ژ روویێ قانوونی ڤه پێدڤی ب بۆچوونێن په‌رله‌مانی هه‌یه هه‌روه‌سا چه‌ندین پرس و پرۆژێن دی یێن هه‌ین كو پێدڤیه په‌رله‌مان بهێته كاراكرن. بۆ وێ چه‌ندێ كار ل سه‌ر بهێته كرن.
ئه‌ڤرۆ:
سێ پارتێن باكورێ كوردستانێ د داخۆیانیه‌كا هه‌ڤپشك دا دیار كرن كو دڤێت رێز ل سه‌روه‌ریا هه‌رێما كوردستانێ بهێته گرتن و رێ نه‌هێته دان توركیا ئێرشی ئاخا هه‌رێما كوردستانێ بكه‌ت و شنگال ژی پشكه‌كه ژ ئاخا هه‌رێما كوردستانێ و دڤێت رێز ل داخوازیێن خه‌لكێ شنگالێ بهێته گرتن.
پارتا سوسیالیست یا كوردستانێ ل باكور، پارتا ئازادی یا كوردستانێ و بزاڤا دیموكراتی یا كوردستانێ ل باژێرێ ئامه‌دێ یێ باكورێ كوردستانێ داخۆیانیه‌كا هه‌ڤپشك به‌لاڤكرن و دیار كرن كو دڤێت په‌كه‌كه به‌هانه‌یان نه‌ده‌ته توركیا كو ئێرشی ئاخا هه‌رێما كوردستانێ بكه‌ت و مه‌ترسیێ بۆ پاشه‌رۆژا كوردان دروست بكه‌ت، دڤێت په‌كه‌كه رێزێ ل سه‌روه‌ریا هه‌رێما كوردستانێ بگریت و ئاخا هه‌رێما كوردستانێ بۆ مه‌ره‌مێن خوه بكار نه‌ئینیت، ژ به‌ر هندێ ژی دڤێت به‌هانه‌یان نه‌ده‌ته داگیركه‌رێن كوردستانێ كو ئێرشی ئاخا هه‌رێما كوردستانێ بكه‌ن، چونكو ره‌وشا هه‌ری دووماهیێ نیشا دده‌ت كو داگیركه‌رێن كوردستانێ دخوازن مه‌ترسیێ بۆ پاشه‌رۆژا كوردان ل هه‌رێما كوردستانێ دروست بكه‌ن و دڤێت رێگری ل وێ یه‌كێ بهێته كرن.
د داخۆیانیا هه‌ر سێ پارتێن باكورێ كوردستانێ دا ئه‌و یه‌ك ژی هاتیه دیار كرن كو دڤێت په‌كه‌كه سیاسه‌تا خوه یا نها بده‌ته گوهۆرین و ل گه‌ل هه‌موو پارت و ئالیێن سیاسی یێن كوردستانێ پێكڤه كار بكه‌ت دا بزاڤێن وێ نه‌بنه مه‌ترسی ل سه‌ر پاشه‌رۆا هه‌رێما كوردستانێ، چونكو توركیا ژ هه‌بوونا هه‌رێما كوردستانێ و بهێزبوونا كوردان ل رۆژهه‌لاتا ناڤین دلگرانه و هه‌ر رۆژ ژی ئێرشی ئاخا كوردستانێ دكه‌ت، ژ به‌ر هندێ ژی دڤێت به‌ری هه‌ر تشته‌كێ په‌كه‌كه به‌هانه‌یان نه‌ده‌ته توركیا و ئیرانێ كو به‌رده‌وام ئاخا هه‌رێما كوردستانێ تۆپباران بكه‌ن.
هه‌ر سێ پارتێن باكورێ كوردستانێ ئه‌و یه‌ك ژی دیار كرینه كو مخابن ده‌زگه‌هێن راگه‌هاندنا په‌كه‌كێ رۆژانه نووچه‌یان ل دژی هه‌رێما كوردستانێ ب تایبه‌تی ژی پارتی دیموكراتی كوردستان به‌لاڤ دكه‌ن و كارێ ئه‌و دكه‌ن خزمه‌تا به‌رژه‌وه‌ندیێن نه‌ته‌وه‌یی ناكه‌ت و دڤێت راگه‌هاندنا وان ده‌ستان ژ بزاڤێن خوه یێن بۆ تێكدانێ و ئاژاوه‌گه‌ریێ به‌رده‌ن، چونكو نها پتر ژ هه‌ر ده‌مه‌كێ دڤێت كورد د ناڤا خوه دا ئێكگرتی بن، لێ مخابن تشتێ نها دهێته كرن ب ته‌مامی ل دژی به‌رژه‌وه‌ندیێن نه‌ته‌وه‌یی یێن گه‌لێ كوردستانێ نه.
پارتێن باكورێ كوردستانێ هه‌روه‌سا داخواز ژ هه‌موو پارت و ئالیێن سیاسی یێن هه‌ر چار پارچه‌یێن كوردستانێ دكه‌ن كو پێكڤه كار بۆ پاراستنا ده‌ستكه‌فتیێن كوردان ل هه‌رێما كوردستانێ بكه‌ن، چونكو دوژمنێن گه‌لێ كوردستانێ ب چو ره‌نگه‌كێ ناخوازن كو هه‌رێما كوردستانێ یا بهێز كه‌ڤیت و هه‌ر رۆژ ژی ئاسته‌نگیان ل هه‌مبه‌ر بهێزبوونا هه‌رێما كوردستانێ دروست دكه‌ن.
د دووماهیا داخۆیانیێ دا ئه‌و یه‌ك ژی هاتیه دیار كرن كو دڤێت بابه‌تێ شنگالێ ل سه‌ر بنه‌مایێ به‌رژه‌وه‌ندیێن نه‌ته‌وه‌یی یێن گه‌لێ كوردستانێ بهێته چاره‌سه‌ركرن، چونكو شنگال پشكه‌ك ژ ئاخا كوردستانێ و دڤێت سه‌ر ب هه‌ولێرێ بیت، مخابن ژ به‌ر بزاڤێن نها یێن ل شنگالێ ره‌وش گه‌له‌ك ئالۆز بوویه و دڤێت رێ نه‌هێته دان كو ئالۆزیێن نها ل شنگالێ به‌رده‌وام بن، چونكو ئالۆزیێن نها ب ته‌مامی د خزمه‌تا داگیركه‌رێن كوردستانێ دانه و ئه‌و یه‌ك ژی ناهێته قه‌بوولكرن.
نيشاندان