ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، ل سالیادا 61 یا هه‌لكرنا شۆره‌شا ئیلۆنێ په‌یامه‌ك به‌لاڤكر و راگه‌هاند: ژ ئه‌گه‌رێ خۆڕاگری و ئیرادا ب هێز یا خه‌لكێ كوردستانێ، دوژمن نه‌چار بوو دانپێدانێ ب پشكه‌ك ژ مافێن  وی یێن نه‌ته‌وی و نیشتمانی یێن ره‌وا بكه‌ت”.

د په‌یاما سه‌رۆكێ حوكمه‌تا هه‌رێمێ دا هاتیه‌” سالیادا مه‌زنترین شۆره‌شا گه‌لێ كوردستانێ دكه‌ین كو شۆره‌شا ئیلۆنا مه‌زنه‌، ئه‌ڤ شۆره‌شه‌ وه‌رچه‌رخانه‌كا دیرۆكی و شۆره‌شه‌كا سه‌رانسه‌ری یا خه‌لكێ كوردستانێ بوو ب هه‌موو پێكهاته‌یێن نه‌ته‌وی و ئایینی یێن جودا ڤه‌، ب سه‌ركردایه‌تیا رێبه‌ری مه‌ یێ نیشتمانی مه‌سته‌فا بارزانیێ نه‌مر”.

مه‌سرور بارزانی د په‌یاما خوه‌ دا دووپاتكر” ئێك ژ گرنگترین و بهادارترین تایبه‌تمه‌ندیێن شۆره‌شا ئیلۆنێ، ئێكرێزی و ئێكگرتنا گه‌لێ كوردستانێ بوو، كه‌ ژ ئه‌گه‌رێ خۆڕاگری و ئیرادا ب هێز یا خه‌لكێ كوردستانێ، دوژمن نه‌چاربوو دانپێدانێ ب پشكه‌ك ژ مافێن وی یێن نه‌ته‌وی و نیشتمانی یێن ره‌وا بكه‌ت د چارچۆڤێ رێككه‌فتنا 11 ئادارێ”.

سه‌رۆكێ حوكمه‌تا هه‌رێما كوردستانێ ئاماژه‌ ب وێ چه‌ندێ ژی دا” مه‌زنترین ناسناما شۆره‌شا ئیلۆنێ، گوهۆرینا سه‌رهلدان و خه‌باتا ناوچه‌یی بوو بۆ شۆره‌شه‌كا نیشتمانی یا سه‌رانسه‌ری ل هه‌موو كوردستانێ و دروستكرنا هه‌ستا نه‌ته‌وی و نیشتمانی بوو ل ده‌ف وه‌لاتیێن كوردستانێ”.

مه‌سرور بارزانی گوت ژی” ده‌مێ بیرئینانا شۆره‌شا ئیلۆنا مه‌زن دكه‌ین، پێدڤیه‌ هه‌موو ئالی و پێكهاته‌یێن گه‌لێ كوردستانێ، هه‌ڤ هه‌لویست  و ئێكده‌نگ بن ژ پێخه‌مه‌ت داكۆكیرن و پاراستنا مافێن دستووری و ده‌ستكه‌فتێن مه‌ یێن نیشتمانی، كو خه‌لكێ كوردستانێ، ب ده‌هان ساله‌ ژ پێخه‌مه‌ت وان خه‌باتێ دكه‌ت و قوربانیه‌كا مه‌زن دایه‌”.

سه‌رۆكێ حوكمه‌تا هه‌رێما كوردستانێ د پشكه‌كا دی یا په‌یاما خوه‌ دا دبێژیت” ب رێز و پێزانین ڤه‌، بیرئینانا هه‌موو  پێشمه‌رگه‌ و پشكدارێن وێ شۆره‌شا مه‌زن یا گه‌لێ كوردستانێ دكه‌ین. سلاڤ ل گیانێ یاقژێ شه‌هیدێن شۆره‌شا ئیلۆنێ و هه‌موو شه‌هیدێن كوردستانێ”.

ئه‌ڤرۆ:

مه‌كته‌با سیاسی یا پارتی دیموكراتی كوردستان ل 61 سالیا هه‌لكرنا چریسكا شۆره‌شا ئیلۆنێ، به‌یاننامه‌ك به‌لاڤكر و تێدا هاتیه‌” ب هه‌لكه‌فتا 61 سالیا هه‌لكرنا شۆره‌شا ئیلۆنا مه‌زن پیرۆزباهیێ ل گه‌لێ كوردستاتێ دكه‌ین، ب تایبه‌ت مالباتێن سه‌ربلندێن شه‌هیدان و پێشمه‌رگێن گیانفیدا و رێبوارێن رێیا ئازادیێ و هه‌موو وان عه‌زیزێن پشكداری د وێ شۆره‌شا مه‌زن دا كری و رۆلێ وان بلند د هه‌لسه‌نگینین”.

دیاركریه‌ ژی” به‌ری 61 سالان، ده‌مێ كۆمارا ئیراقێ ل سۆزێن خوه‌ پاشڤه‌ زڤری و دانپێدان ب مافێن گه‌لێ كوردستانێ نه‌كری، پرنسیبێن هه‌ڤپشكیێ و پێكڤه‌ژیانا سیاسی دناڤ دستوورێ ئیراقێ دا بنپێكری، هه‌تاكو رێیێن مه‌ده‌نی یێن خه‌باتێ ژی داخستن و ب له‌شكركێشیێ، ئاگر و ئاسن و شه‌ڕی به‌رسڤا گه‌لێ كوردستانێ دای، وی ده‌می گه‌لێ كوردستانێ ب رێبه‌ریا (مسته‌فا بارزانی)، بۆ به‌رگریكرنێ ژ گه‌لێ كوردستانێ و مافێن وی، ئاخ و سه‌روه‌ریێن وی، مان و شكۆ و پیرۆزیێن وی، ل رۆژا 11 ئیلۆنا سالا 1961، خه‌باتا چه‌كداری ده‌ستپێكر و هه‌موو شیانێن خوه‌ د شۆره‌شه‌كێ دا كۆمڤه‌كرن، كو ب درێژترین و به‌رهه‌مدارترین شۆره‌شا دناڤ دیرۆكا گه‌لێ كوردستانێ دهێته‌ هه‌ژمارتن، كو هه‌تا نوكه‌ ژی هه‌موو، ب جوداهیێن ئایینی و نه‌ته‌وی و سیاسی ڤه‌ شانازیێ پێ دكه‌ن و هنده‌ ب كووری و مه‌زنی و رامانێن فره‌ ره‌هه‌ندێن خوه‌ چوویه‌ دناڤ دیرۆكێ دا، نڤش ل دووڤ نڤشی په‌ند و عیبره‌تان ژێ وه‌ردگرن و بوویه‌ ژێده‌ره‌كێ رۆهن و زه‌لال ژی بۆ وانێن مه‌زن( كوردایه‌تی، ره‌سه‌نایه‌تی، رابوون، راوه‌ستان دژی سته‌مێ، سه‌نگا پێشمه‌رگه‌ی، گیانفیدایی، دادخوازی، ره‌وشه‌نبیرا نیشتمانی، ماف و دیموكراسی، دیالۆك و ئازادی، هونه‌رێ دانوستاندنێ و دووماهی جار كوردستان یان نه‌مان)”.

د به‌یانناما مه‌كته‌با سیاسی دا هاتیه‌ ژی” شۆره‌شا ئیلۆنا مه‌زن شۆره‌شا هه‌موویان بوو، شۆره‌شا هه‌موو جوداهیان بوو، له‌وما زوو به‌رهه‌مێن وێ هاتنه‌ چنین و رژێما به‌غدا نه‌چاركر، كو غرورا خوه‌ بشكێنیت و بهێته‌ سه‌رێن چیایێن كوردستانێ، دناڤ چادر و باره‌گه‌هێن ساده‌ یێن شۆره‌شێ داخوازا دانوستامدنێ ژ رێبه‌رێ نه‌ته‌وه‌ی و سومبۆا ئازادیێ ملله‌تی (مسته‌فا بارزانی) بكه‌ن، كو ئه‌نجام رێككه‌فتنا دیرۆكی یا 11 ئادارا 1970 بوو، ئه‌و رێككه‌فتنه‌ بوو به‌لگه‌نامه‌كا دیرۆكی و بناغه‌یه‌كا ب هێز بۆ هه‌موو وان ده‌ستكه‌فتێن پاشتر ب ده‌ستڤه‌هاتین. ئه‌وژی جارا ئێكێ بوو كو شۆره‌شه‌كا كوردستانی بشێت بگه‌هیته‌ ئارمانجێ و درووشمێ خوه‌ بده‌ستڤه‌ بینیت و سه‌ركه‌فتنێن خوه‌ یێن له‌شكری بكه‌ته‌ ده‌ستكه‌فتێن سیاسی و مافێن نه‌ته‌وایه‌تی و نیشتمانی بده‌ستڤه‌بینیت، پێدڤیه‌ نڤشێن مه‌ ڤان دیمه‌نێن سیاسی بخوینن، پێدڤیه‌ ئه‌م هه‌موو د وێ راستیا دیار تێبگه‌هین، كو ره‌واییا مافان، ئیرادا گه‌ل و ئێكرێزیا نیشتمانی كلیلا سه‌ركه‌فتنانه‌ و ئه‌نجام مه‌زنترین هێزا دوژمنكارانه‌ دێ شكێنن، وه‌كو ئه‌وا شۆره‌شا ئیلۆنێ و پێشمه‌رگێن قه‌هره‌مان و پارتی دیموكراتی كوردستان و رێبه‌رێ وی كری، ئه‌ڤ وانه‌ پتر ژ هه‌ر ده‌مه‌كی، بۆ ئه‌ڤرۆ گه‌له‌ك د گرنگ و پێدڤی و بایه‌خدارن”.

هه‌روه‌سا ئاماژه‌ كریه‌” پێدڤیه‌ هێزێن سیاسی یێن كوردستانێ و ئیراقێ ب هه‌مان گیان و ئیراده‌یا شۆره‌شا ئیلۆنا مه‌زن، بۆ چاره‌سه‌ریان كار بكگه‌ن، تاكو ئه‌م هه‌موو پێكڤه‌ بشێین پێكڤه‌ ده‌رگه‌هه‌كێ خێرێ بۆ گه‌لی پاشه‌رۆژا وی یا سیاسی ڤه‌كه‌ین”.

د به‌یاننامێ دا هاتیه‌ ژی” د ڤێ هلكه‌فتێ دا نابیت رۆلێ زێرین یێ پارتی دیموكراتی كوردستان نه‌ئێخینه‌ به‌ر هه‌موویان، ب تایبه‌ت لاوێن كوردستانێ و ئه‌و نڤشێ نوو، كو ژێرانه‌ دشێن ئه‌ڤرۆ ب دوهی ڤه‌ گرێ بده‌ن و ژ پێخه‌مه‌ت پاشه‌رۆژێ دا دناڤ كار و خه‌باتێ دا سه‌رگرمێن داهێنانێ نه‌، ب هه‌موو سه‌ربلندی ڤه‌ دبێژین: د ناڤ وێ شۆره‌شا مه‌زن دا، پاشی د شۆره‌شا گۆلانێ، سه‌رهلدانێ، پرۆسا ئازادیا ئیراقێ و شه‌ڕێ داعشێ، پارتی دیموكراتی كوردستان زۆرترین قوربانی داینه‌، زۆرترین شه‌هید بۆ نیشتمانی داینه‌، زۆرترین ده‌ستكه‌فت ژی بده‌ستڤه‌ئیناینه‌ و ل هه‌ر جهه‌كێ شه‌ڕ هه‌ی كه‌لها به‌رگریێ بوو و ل كیرێ ژی سه‌قامگیری و ئارامی هه‌ی، ل وێرێ ده‌ستێ ئاشتیێ و بازێ ئاڤه‌دانكرنێ بوو، ئه‌ڤرۆ ژی ب هه‌مان گیان و ب هه‌مان باوه‌ری دێ به‌رده‌وام بیت د خه‌باتێ، قوربانیدانێ، به‌رگریا نیشتمانی، چه‌سپاندنا ئاشتیێ و ئاڤه‌دانیێ و ژ پێخه‌مه‌ت ژی دا ل گه‌ل هێزێن سیاسی و كه‌لتووری و جڤاكی كار دكه‌ت”.

ئه‌ڤرۆ:

سه‌رۆك مه‌سعود بارزانی پێشوازی ل باربارا لیف هاریكارا وه‌زیرێ ده‌رڤه‌یێ ئه‌مریكا بۆ كاروبارێن رۆژهه‌لاتا ناڤه‌راست كر.

وێ به‌رپرسا ئه‌مریكی ئاماژه‌كر كو سه‌رۆكێ ئه‌مریكی جۆ بایدن ب گرنگیه‌كا مه‌زن سه‌حدكه‌ته‌ هه‌رێما كوردستانێ و دیاركر كو سه‌روه‌ری و سه‌قامگیریا كوردستانێ و ئیراقێ بناخه‌یه‌ بۆ سه‌قامگیری ده‌ڤه‌رێ. هه‌روه‌سا دووپاتكر كو ئه‌مریكا گرنگیه‌كا مه‌زن دده‌ته‌ په‌یوه‌ندیێن د ناڤبه‌را كوردستانێ و ئیراقێ دا و سه‌ره‌رای رێزێن وێ بۆ رۆلێ سه‌رۆك بارزانی د چاره‌سه‌ركرنا كێشا ندا ل سه‌ر بنه‌مایێ دستوور، داخواز كر سه‌رۆك بارزانی ب كاریگه‌ریا خوه‌  پترب رۆلێ خوه‌ بۆ چاره‌سه‌ركرنا كێشان و نه‌هێلانا بنبه‌ستێن سیاسی ل ئیراقێ رابیت.

سه‌رۆك بارزانی، دووپاتكر كو ژێده‌رێ كێشێن سیاسی ل ئیراقێ بۆ پێگیری نه‌كرنا به‌غدا ب دستووری و نه‌مانا بنه‌مایێن هه‌ڤپشكیێ و هه‌ڤسه‌نگیێ و سازانێ د پرۆسا سیاسی دا و رێزنه‌گرتن ل ئه‌نجامێن هه‌لبژارتنان و پرۆسا دیموكراسی دزڤریت.

سه‌رۆك بارزانی د درێژیا ئاخڤتنێن خوه‌ دا راگه‌هاند كو پێدڤیه‌ بابه‌تێن سه‌ره‌كی د ناڤبه‌را به‌غدا و هه‌رێما كوردستانێ د چارچۆڤێ دستووری دا بهێنه‌ چاره‌سه‌ركرن و دڤێت هه‌ر رێككه‌فتنه‌ك و پێكهاتنه‌ك ل سه‌ر بنه‌مایێ دستووری ب رۆهنی و ب جدی كار ل سه‌ر بهێته‌ كرن ، هه‌روه‌سا ئه‌وژی به‌رچاڤكر بۆ چاره‌سه‌ركرنا كێشان ل ئیراقێ پێدڤیه‌ فه‌رهه‌نگا هه‌ڤدوقبوولكرنێ هه‌بیت و نابیت هیچ ئالیه‌ك ئالیێ دی پشت گوه بهاڤێژیت.

ل دۆر هزرا ئه‌نجامدانا هه‌لبژارتنێن پێشوه‌خت ل ئیراقێ، سه‌رۆك بارزانی دیاركر كو مه‌ هیچ رێگریه‌ك ل دۆر ئه‌نجامدانا هه‌لبژارتنێن پێشوه‌خت نینن ب مه‌رجه‌كی به‌رهه‌ڤیێن سیاسی و قانوونی بۆ بهێنه‌ كرن و هیچ ئالی و پێكهاته‌یه‌ك نه‌هێنه‌ پشت گوه هاڤێتن و رێز ژی ل ئه‌نجامێن هه‌ر هه‌لبژارتنه‌كا دهێته‌ ئه‌نجامدان بهێته‌ گرتن.

ئه‌ڤرۆ:

دوهی شه‌مبیێ 10/9/2022 ، ب به‌رهه‌ڤبوونا مه‌سرور بارزانی، سه‌رۆكێ حوكمه‌تا هه‌رێما كوردستانێ، ئاهه‌نگا ده‌رچوونا قوتابیێن خولا 17 یا زانكۆیا هه‌ولێر یا نوژداری ب رێڤه‌چوو، كو تێدا باوه‌رناما ده‌رچوونێ ب 692 قوتابیان هاته‌ به‌خشین.

سه‌رۆكێ حوكمه‌تا هه‌رێما كوردستانێ د چارچۆڤێ پشكداریكرنێ د ئاهه‌نگا ده‌رچوونا قوتابیێن زانكۆیا هه‌ولێر یا نوشداری په‌یڤه‌ك پێشكێشكر و ب قوتابیان گوت” هوون كو دێ بنه‌ نوشدار هیڤیدارم و یێ پشت راستم كو دێ هوون ل ئاستێ كارێ خوه‌ و سویندخوارنا بن، نوشداری كار و ئه‌ركه‌كێ گه‌له‌ك پیرۆز و مرۆڤانه‌یه‌، كو پێدڤیه‌ به‌ری هه‌ر تشته‌كی ئه‌نجاما وی رزگاركرنا ژیانا خه‌لكی و پاراستنا ساخله‌میا وان بیت ،ل گه‌ل ده‌رچوونا هه‌وه‌ ژ زانكۆیێ قۆناغه‌ك ژ قۆناغێن ژیانا هه‌وه‌ ب دووماهی دهێت، به‌لێ فێربوون ب دووماهی ناهێت، چونكه‌ فێربوون پرۆسه‌كا به‌رده‌وامه‌”.

سه‌باره‌ت ب بلندكرنا كوالیتیا زانكۆیێ هه‌رێما كوردستانێ، مه‌سرور بارزانی، سه‌رۆكێ حوكمه‌تا هه‌رێما كوردستانێ راگه‌هاند” د ده‌مێ بۆری دا حوكمه‌تا هه‌رێما كوردستانێ ژ پێخه‌مه‌ت پێشڤه‌برنا ئاستێ زانستی و ئه‌كادیمی و زانكۆ و ده‌زگه‌هێن مه‌ یێن په‌روه‌رده‌یی، ده‌سته‌یا باوه‌ری به‌خشینێ ب ده‌زگه‌هان و پرۆگرامێن په‌روه‌ردێ و خواندنا بلند په‌سه‌ندكر، ئارمانجا ڤێ ده‌سته‌یێ بلندكرنا كوالیتیا خواندنێ و په‌روه‌ردێ یه‌ ل هه‌رێما كوردستانێ، د ده‌مێ سالێن بۆری دا دیده‌ڤانێن وێ چه‌ندێینه‌، كو ئاستێ زانكۆیێن مه‌ یێ بلند بووی، به‌لێ بۆ وێ چه‌ندێ بشێین هه‌ڤڕكیێ ل گه‌ل زانكۆیێن جیهانێ بكه‌ین، مه‌ ب پێدڤی زانی وێ ده‌سته‌یێ دابمه‌زرینین، بۆ وێ چه‌ندێ پله‌یێن زانكۆیێن مه‌ ل سه‌ر ئاستێ جیهانێ بلند ببن و ئاستێ خواندنێ ل هه‌رێما كوردستانێ بلند بكه‌ین”.

سه‌رۆكێ حوكمه‌تا هه‌رێما كوردستانێ، گوت ژی” دزانم كو بوارێ ساخله‌می ل هه‌رێما كوردستانێ كێشه‌ و گرفت یێن هه‌ین، له‌وما ئێك ژ ئالیێن گرن گیێن چاكسازیێن كابینا نه‌هێ یا حوكمه‌تا هه‌رێما كوردستانێ، چاكسازیكرنه‌ د بوارێ ساخله‌میێ دا و باشتركرنا كوالیتیا نه‌خوه‌شخانان و چاكسازیكرنه‌ د ئینان و پشكنینا ده‌رمانان دا”.

مه‌سرور بارزانی، راگه‌هاند ژی” من هیڤیه‌كا مه‌زن ب گه‌نجێن ده‌رچوویێن كوردستانێ یا هه‌ی، كو دشێن رۆله‌كێ كاریگه‌ر د پرۆسا گۆرانكاریێ و چاكسازیێ و به‌ر ب پێشڤه‌برنا هه‌رێما كوردستانێ دا ببینن، د پشت راست بن دێ به‌رده‌وام بم د پشته‌ڤانیكرنا هه‌وه‌ دا، دێ پشته‌ڤانیێ ل پرۆژه‌ و هزرێن هه‌وه‌ یێن داهێنه‌ر كه‌م، یێ پشت راستم ژی هه‌وه‌ به‌هره‌یێن زۆر یێن هه‌ین بۆ پێشخستنا كوردستانێ و پرۆسا چاكسازیێ و وان گۆرانكاریێن كوم ه‌ ل هه‌رێما كوردستانێ ده‌ست پێكرین” .

ئه‌ڤرۆ:

په‌یڤدارێ پارتی دیموكراتی كوردستان هه‌لویستێ پارتی ل دۆر ڤه‌كێشانێ ژ جڤاتا نوونه‌رێن ئیراقێ ئاشكرا دكه‌ت و دبێژیت، پێدڤی ب كۆمبوونێ یه‌ تاكو پێكڤه‌ بریار ل سه‌ر بهێته‌ دان.

مه‌حموود محه‌مه‌د، په‌یڤدارێ پارتی دیموكراتی كوردستان گوت” مه‌ لژنه‌یه‌كا تایبه‌ت یا هه‌ی رۆلێ خوه‌ دبینیت و پێدڤیه‌ ئه‌ڤ بابه‌تانه‌ ب روونشتن و كۆمبوونان بهێنه‌ باسكرن بۆ وێ چه‌ندێ پێكڤه‌ بریار بهێته‌ دان”.

مه‌حموود محه‌مه‌د گوت ژی” ئه‌و ره‌وشا نوكه‌ ئیراق تووشبوویێ پێدڤی ب وێ چه‌ندێ هه‌یه‌ ئه‌ویچن هه‌ست ب به‌رپرسیاره‌تیێ دكه‌ن گرنگیێ پێ بده‌ن تاكو ئاسویه‌كی ببینن وان كێشان چاره‌سه‌ر بكه‌ن”.

ل دۆر ئه‌نجامدانا هه‌لبژارتن پێشوه‌خت یێن جڤاتا نوونه‌رێن ئیراقێ، په‌یڤدارێ پارتی دبێژیت” ئه‌م رێگر نینین ل ئه‌نجامدانا هه‌لبژارتنان، به‌لێ پێدڤیه‌ هه‌موو ئالی ل سه‌ر رێكبكه‌ڤن و سۆزێ بده‌ن كو دێ ئه‌نجامان په‌سه‌ند كه‌ن”.

رۆهنكر ژی” رێكنه‌كه‌فتنا ئالیان دستوویێ كوردان دا نینه‌، به‌لكو كێشه‌ یا دوان گرۆپان دا یێن دێ حوكمه‌تێ پێكئینن، ئه‌و ل سه‌ر هه‌لبژارتنا سه‌رۆكێ وه‌زیران رێكنه‌كه‌فتینه‌”.

سه‌باره‌ت كۆمبوونا ئالیێن سیاسی ل سه‌رۆكایه‌تیا هه‌رێما كوردستانێ ل دۆر پرسا هه‌لبژارتنێن هه‌رێما كوردستانێ و درێژكرنا ده‌مێ قانوونی یێ په‌رله‌مانێ كوردستانێ، مه‌حموود محه‌مه‌د راگه‌هاند” ئه‌م وه‌كو پارتی ب باشی دزانین ئالیێن سیاسی ل سه‌رۆكایه‌تیا هه‌رێمێ وه‌كو چه‌تره‌ك كومببن بۆ وێ چه‌ندی بۆچوونێن خوه‌ یێن جودا جودا ب دانوستاندنێ چاره‌سه‌ر بكه‌ین و ئه‌م ل گه‌ل ئه‌نجامدانا وان كۆمبووناینه‌”.

هه‌ڤده‌م ل دۆر چاره‌سه‌ركرنا كێشێن سیاسی ب دستووری ئاماژه‌ كر كو پێدڤیه‌ دستوور هه‌بیت و پێدڤیه‌ ل هه‌رێما كوردستانێ ل سه‌ر رێكبكه‌ڤن.

ئه‌ڤرۆ:

سه‌رۆكایه‌تیا ئه‌ركانێن وه‌زاره‌تا پێشمه‌رگه‌ی ل حوكمه‌تا هه‌رێما كوردستانێ رۆهنكرنه‌ك به‌لاڤكر و تێدا راگه‌هاند، PKK نه‌شێت شه‌ڕێ هێزێن توركی بكه‌ت و به‌رده‌وام ده‌ڤه‌رێن سنووری یێن هه‌رێما كوردستانێ بۆ هێزێن توركی چۆل دكه‌ت و هێزێن توركی ب دووڤ خوه‌دا دئینن.

رۆهنكرنا سه‌رۆكایه‌تیا ئه‌ركانێن وه‌زاره‌تا پێشمه‌رگه‌ی به‌رسڤا وان ده‌نگوباسانه‌ یێن راگه‌هاندنا ب سه‌ر PKK ڤه‌ دژی هێزا پێشمه‌رگه‌ی به‌لاڤ دكه‌ت.

سه‌رۆكایه‌تیا ئه‌ركانێن وه‌زاره‌تا پێشمه‌رگه‌ی، دبێژیت” ده‌مێ چه‌ند رۆژایه‌ جاره‌كادی راگه‌هاندنا سه‌ر ب PKK ڤه‌ ده‌ستدایه‌ هه‌وه‌كا چه‌واشه‌كاری دژی هێزا پێشمه‌رگێ كوردستانێ ووه‌سا به‌لاڤ دكه‌ نكو هێزا پێشمه‌رگێ كوردستانێ  ل چیایێن ئامێدیێ و زاب رێ بۆ له‌شكرێ توركی خوه‌ش كریه‌ بۆ شه‌ڕكرنێ ل به‌رامبه‌ر چه‌كدارێن PKK”.

د وێ رۆهنكرنێدا چه‌ند خاله‌ك هاتینه‌ به‌رچاڤكرن و تێدا هاتیه‌” ل وی ده‌مێ هه‌رێما كوردستانێ دروستبووی  PKK به‌رده‌وام  ژێده‌رێ گه‌فان بوو بۆ خه‌لكێ هه‌رێما كوردستانێ و ب نه‌حه‌قی رێگر بوو ل به‌رامبه‌ر ئاڤه‌دانكرنا ب سه‌دان گوندان”.

د پشكه‌كا دی یا رۆهنكرنێ دا، سه‌رۆكایه‌تیا ئه‌ركانێن وه‌زاره‌تا پێشمه‌رگه‌ی باسێ ره‌فتارێن دی یێن PKK كریه‌ و تێدا هاتیه‌” PKK رێ ب خوه‌ دایه‌ ناڤونیشانێن ده‌ڤه‌ر و چیا و دۆلێن هه‌رێما كوردستانێ بگوهۆریت و ناڤێن سه‌یر بۆ وان ده‌ڤه‌ران دانیت”.

هه‌روه‌سا دیاركریه‌” چه‌كدارێن PKK د كریاره‌كا نه‌مرۆڤانه‌ و دژی ژینگه‌هێ رابووینه‌ ب مینرێژكرنا رێ و پر و دۆل و كانی و دارستانێن سروشتی یێن هه‌رێما كوردستانێ كو مه‌ترسیه‌كا مه‌زن بۆ خه‌لكێ ئاسایی و كاسبكار و خه‌لكێ گوندان دروست كریه‌. هه‌ر ژ ئه‌گه‌رێ هه‌بوونا نه‌قانوونی یا PKK ل سه‌ر ئاخا هه‌رێما كوردستانێ پشكه‌كا مه‌زن ژ خه‌لكێ ده‌ڤه‌رێن سنووری مۆلك و مالێ خوه‌ بجه هێلایه‌”.

سه‌رۆكایه‌تیا ئه‌ركانێن وه‌زاره‌تا پێشمه‌رگه‌ی، د خاله‌كا دی یا رۆهنكرنا خوه‌ دا، سه‌رنج بۆ وێ چه‌ندێ ڕاكێشایه‌ كو چه‌كدارێن PKK هۆكارێ له‌شكركێشیا له‌شكرێ توركیایه‌ و دیاركر” PKK نه‌شێت شه‌ڕێ هێزێن توركی بكه‌ت و به‌رده‌وام ده‌ڤه‌رێن سنووری یێن هه‌رێما كوردستانێ بۆ هێزێن توركی چۆل دكه‌ت و هێزێن توركی ب دووڤ خوه‌ دا دئینن. هه‌كه‌  شه‌ڕه‌ك ژی د ناڤبه‌را هێزێن توركی و PKK دا هه‌بیت، پێدڤیه‌ مه‌یدانا شه‌ڕی ل ناڤخوه‌یا توركیا بیت”.

د رۆهنكرنێدا ئاماژه‌ ب وان وێنان هاتیه‌ كرن كو راگه‌هاندنا PKK به‌لاڤكرینه‌ و تێدا هاتیه‌” راگه‌هاندنا PKK ژ دوورڤه‌ وێنێن چه‌ند ترۆمبێلێن پێشمه‌رگێ كوردستانێ به‌لاڤ كرینه‌ و وه‌سا دایه‌ دیاركرن كو هێزا پێشمه‌رگێ كوردستانێ ڕێ بۆ هێزێن توركی خوه‌ش كریه‌، سه‌ره‌رای وێ چه‌ندێ دووپاتیێ دكه‌ین كو ئه‌و هیچ بنه‌مایه‌ك بۆ وێ چه‌ندێ نینه‌، رادگه‌هینین ژی كو مافێ هێزا پێشمه‌رگێ كوردستانێ یه‌ ل سه‌ر ئاخا خوه‌ ده‌ستهه‌لات و ئه‌ركێن خوه‌ بجه بینیت و ئاخ و خه‌لكێ كوردستانێ بپارێزیت”.

ل دووماهیا رۆهنكرنا خوه‌دا، سه‌رۆكایه‌تیا ئه‌ركانێن وه‌زاره‌تا پێشمه‌رگه‌ی پرسیاره‌ك ئاراسته‌ی PKK كریه‌ كو هێزێن PKK ب چ مافه‌كی ل سه‌ر ئاخا هه‌رێما كوردستانێ نه‌ و ده‌ستێ هێزێن توركی ژی ب دووڤ خوه‌ دا ڕادكێشن؟ بۆچی ناچنه‌ ناڤخوه‌یا توركیا و گه‌فان بۆ خه‌لكێ كوردستانێ دروست دكه‌ن؟

ئه‌ڤرۆ، سالار محه‌مه‌د دۆسكی:

كادره‌كێ پێشكه‌فتیێ پارتی دیموكراتی كوردستان دیاركر كو كۆنگره‌یێ 14ێ یێ پارتی دێ جوداهی هه‌بیت ژ كۆنگره‌یێن دی چونكه‌ ده‌لیڤه‌ بۆ هه‌موو كاداران هاتیه‌دان ببنه‌ ئه‌ندامێن كونگره‌ی و ژ قاعیدێ پارتی سه‌رهلده‌ت و ئه‌ڤه‌ زێده‌تر هێز و نیبوونێ د ده‌ته‌ پارتی دیموكراتی كوردستان.

ئازاد ئیسماعیل ، كارگێرێ لقا 20  یا پارتی دیموكراتی كوردستان ل شێخان بۆ رۆژناما (ئه‌ڤرۆ) گوت” پارتی چاڤه‌رێی ئه‌نجامدانا كۆنگره‌یه‌ و دێ نیبوونه‌كا دی دناڤ پارتی دیموكراتی كوردستان دا دروست بیته‌ ڤه‌ و ئه‌ڤ كۆنگره‌ دێ گه‌له‌ك هێزێ ده‌ته‌ پارتی”.

گوت ژی” دخوازین یشتی ئه‌نجامدانا كۆنگره‌ی گیانێ پێكڤه‌ژیانێ ل قه‌زا شێخان خورتر لێ بهێت و خه‌لكێ ئاواره‌ ڤه‌گه‌رنه‌ سه‌ر جه و وارێن خوه‌ و پشته‌ڤانیا قاعیدێ بهێته‌كرن و كادرێن حزبێ بهێته‌كرن، هه‌روه‌سا پشته‌ڤانی ل پرۆسا چاكسازیێ ژی بهێته‌كرن”.

ل دۆر جوداهیا پارتی ل گه‌ل پارتێن دی یێن كوردستانی، دبێژیت” پارتی خودانا هه‌ر دو شۆرشێن ئیلۆن و گولانێ یه‌ و خودانا سه‌رهلدان و ریفراندۆمێ یه‌، پارتی خودانا خوه‌ و به‌رگێریكرنا كوردستانێ یه‌ و ده‌سكه‌فتێن مه‌زن پارتی ددیرۆكا ملله‌تێ كورد دا بده‌ست ڤه‌ ئیناینه‌ و ئه‌نجامدانا كۆنگره‌ی بۆ نیبوونه‌كێ یه‌ دناڤ پارتی دا و روویێ شارستانیێ پارتی بهێته‌ دیاركرن”.

خویاكر” بۆ جارا ئێكێ یه‌ ئه‌ندامێن كۆنگره‌ی ب رێیا قاعیدێ دچنه‌ كۆنگره‌ی ، تشتێ باش هژمارا ئه‌ندامێن كۆنگره‌ی هاتیه‌ كێمكرن و هندی مه‌ركه‌زیه‌ت ل سه‌ر قاعیدێ حزبی نه‌یا زال بیت دێ باش بیت، ئه‌ندامێ حزبێ یێ چالاك دێ دناڤ كۆنگره‌ی دا رۆلێ خوه‌ بینیت چونكه‌ ژ قاعیده‌ی ده‌ركه‌فتیه‌ و ئه‌ڤه‌ ددیرۆكێ دا چ جاران وه‌كو ڤێجارێ بۆ ئه‌ندامێ پارتی دروست نه‌بوویه‌ و ئه‌ڤه‌ جارا ئێكێ یه‌ د دیرۆكا پارتی دیموكراتی كوردستان دا دروست دبیت”.

ل دور كۆنگره‌یێ پارتی دیموكراتی كوردستان  كو دێ ل پارێزگه‌ها دهۆكێ هێته‌ گرێدان، گوت”جارا ئێكێ  یه‌ د دیرۆكا پارتی و خه‌لكێ باژێرێ دهۆكێ دا دا وه‌كو پارته‌كا كوردی كۆنگره‌ی ل دهۆكێ بگێریت كو پێشتر ل به‌غدا و هه‌ولێرێ و كه‌ركووكێ و ده‌رڤه‌ی كوردستانێ كۆنگره‌یێن خوه‌ گێراینه‌، لێ بۆ جارا ئێكێ یه‌ پارتی ل دهۆكێ كۆنگه‌ره‌یێ خوه‌ بگێریت و ئه‌ڤه‌ جهێ سه‌رفه‌رازیا پارتی دیموكراتی كوردستانه‌ و قاعیدێ هه‌ره‌ مه‌زنێ وێ یه‌ دناڤ دهۆكێ دا”.

رۆهنكر ژی” داخواز دكه‌م پارتی پاكسازی و چاكسازیێ بكه‌ت و نیبوونێ بخوه‌ ڤه‌ ببینیت و خوه‌ ل ئاریشێن خه‌لكی بكه‌ته‌ خودان و پارتی یا خه‌لكی یه‌ و ژ بۆ خه‌لكی یه‌ و دڤێتـ كێشێن خه‌لكی چاره‌سه‌ر بكه‌ت”.