ئه‌ڤرۆ، سه‌رجان مه‌حمود:

ئالۆزیێن د ناڤبه‌را رێڤه‌به‌ریا خوه‌سه‌ر یا رۆژئاڤایێ كوردستانێ و رژێما ئه‌سه‌دی دا به‌رده‌وام دكه‌ن و هێزێن سه‌ربازی ل ده‌ڤه‌را حه‌له‌بێ كو ماهر ئه‌سه‌دێ برایێ به‌شار ئه‌سه‌دێ سه‌رۆكێ رژێما سووریێ فه‌رمانداریا وێ دكه‌ت هه‌ول دده‌ن ب دارێ زۆرێ تاخێن ئه‌شره‌فیه‌، شێخ مه‌قسود و ئه‌لشه‌هبا بكه‌نه‌ ژێر كۆنترۆلا خوه‌ و بۆ ڤێ چه‌ندێ هه‌موو رێیێن كو دچنه‌ ڤان تاخان داخستینه‌ و تاخێن كوردان ب ته‌مامی هاتینه‌ دۆرپێچ كرن، هێزێن رژێما سووریێ داخواز ژ كوردێن وان تاخان كرینه‌ یان دڤێت هه‌موو داخوازیێن هێزێن سووریێ بجه بینن یان ژی دڤێت تاخێن خوه‌ چۆل بكه‌ن.

د ڤێ مژارێ دا ئه‌ڤین عه‌فرین چالاكڤانا مافێن مرۆڤان بۆ رۆژناما ئه‌ڤرۆ راگه‌هاند كو به‌ری نها ژی چه‌ندین جاران رژێما سووریێ ئه‌و تاخ دۆرپێچ كرینه‌ و ئاریشه‌ بۆ كوردان دروست كرینه‌ و گۆت: (هێزێن هه‌والگریێ به‌ری نها داخواز ژ هنده‌ك وه‌لاتیێن كورد یێن وان تاخان كربوون كو دڤێت زانیاریان ل دۆر هێزێن كوردی و چالاكیێن كوردان بده‌نه‌ وان، لێ ئه‌و یه‌ك ژی ئالیێ خه‌لكی ڤه‌ ب توندی هاتبوو ره‌تكرن، ژ به‌ر هندێ ژی دو حه‌فتینه‌ كو هێزێن رژێما سووریێ رێ ناده‌ن خوارن و ده‌رمان بگه‌هیته‌ ده‌ستێ كوردان و ره‌وشا ئاكنجیێن كورد نها گه‌له‌ك خرابه‌، لێ وه‌لاتی به‌رهه‌ڤ نینن كو داخوازیێن هێزێن رژێما به‌شاری قه‌بوول بكه‌ن، وه‌لاتیێن كورد خوه‌ بۆ هه‌ر ئه‌گه‌ره‌كێ ژی به‌رهه‌ڤ كرینه‌).

د دووماهیا ئاخڤتنا خوه‌ دا ئه‌ڤینێ ئه‌و یه‌ك ژی راگه‌هاند ل دووڤ زانیاریێن كو گه‌هشتینه‌ وان شانده‌كێ رۆسیا د ناڤبه‌را رێڤه‌به‌ریا خوه‌سه‌ر و حوكمه‌تا ئه‌سه‌دی دا ناڤبه‌ینكاریێ دكه‌ت دا كو دۆرپێچا ئابووری ل سه‌ر تاخێن كوردان بهێته‌ راكرن و گۆت: (پشتی كو رێڤه‌به‌ریا خوه‌سه‌ر به‌رسڤا دۆرپێچا ئابووری یا ل سه‌ر تاخێن كوردان ل حه‌له‌بێ دا و هه‌موو بنگه‌هێن ئێمناهیێ ئانكۆ بنگه‌هێن د ده‌ستێ رژێما ئه‌سه‌دی دۆرپێچ كر ره‌وش هاتیه‌ گوهۆرین، چونكو هێزێن سه‌ر ب رێڤه‌به‌ریا خوه‌سه‌ر ناهێلن نها هێزێن ئێمناهیێ یێن رژێما سووریێ فرۆكه‌خانا قامشلۆ ژی بكار بینن و گه‌له‌ك رێیێن ستراتیژی هاتینه‌ كۆنترۆلكرن، پشتی ڤێ پێنگاڤا رێڤه‌به‌ریا خوه‌سه‌ر رۆسیا ده‌ست ب بزاڤه‌كا نوو كریه‌ و ئه‌م چاڤه‌رێ دكه‌ین د چه‌ند رۆژێن بهێت دا ئالۆزیێن هه‌ی بهێنه‌ چاره‌سه‌ر كرن).

ئه‌ڤرۆ:

سه‌رۆك مه‌سعود بارزانی، دسالڤه‌گه‌را  تاوانا ئه‌نفالێ په‌یامه‌ك به‌لاڤكر و رادگه‌هینیت، تاوانا ئه‌نفالێ ئێك ژ نه‌ مروڤانه‌ترین و تاریترین قۆناغێن ده‌وله‌تا ئیراقێ یه‌.

سه‌رۆك بارزانی د پێگه‌هێ خوه‌ ل سه‌ر تۆرا جڤاكی یا (تویته‌ری) په‌یامه‌ك ل سالڤه‌گه‌را كاره‌ساتا ئه‌نفالێ به‌لاڤكر و د په‌یامێ دا هاتیه‌، هه‌وا جینۆسایدا ئه‌نفالێ ئێك ژ نه‌ مرۆڤانه‌ترین زنجیرێن دیرۆكا ئیراقێ یه‌ ل چه‌رخێ بۆری.

سه‌رۆك بارزانی ب پێدڤی زانی ده‌وله‌تا ئیراقێ قه‌ره‌بوویا كه‌سوكارێن ئه‌نفالكریان بكه‌ت و رادگه‌هینیت، پێدڤیه‌ ده‌وله‌تا ئیراقێ ده‌ست ب پرۆسا قه‌ره‌بووكرنا مالباتێن قوربانیێن وێ تاوانێ بكه‌ت.

ئه‌ڤرۆ:

سه‌رۆكێ هه‌رێما كوردستانێ، نێچیرڤان بارزانی د سالڤه‌گه‌را كاره‌ساتا ئه‌نفالی، په‌یامه‌ك به‌لاڤكر و تێدا دبێژیت، ب رێز ڤه‌بیرئینانا 182 هزار وه‌لاتیێن بێتاوانێن كوردستانێ دكه‌ین و سه‌رێ رێزێ ل به‌رده‌م گیانێ پاقژێ شه‌هیدان د چه‌مینین كو ل سالا 1988 ل ئێك ژ دره‌نده‌ترین تاوانێ دیرۆكێ دا، ده‌ستهه‌لاتا وی ده‌می یا ئیراقێ جینۆسایدكرین و گیانێ خوه‌ سپاردی. هه‌روه‌سا دیاركر، ئه‌نفال كو ب هه‌شت قۆناغان بوو هه‌ژماره‌كا زۆر یا ده‌ڤه‌رێن هه‌رێما كوردستانێ ڤه‌گرت، هه‌تا هه‌تایێ خاله‌كا ره‌شه‌ ب ناڤچاڤێن دیرۆكێ و ئه‌نجامده‌رێن وێڤه‌ و به‌رپرسیاره‌تیا تمام یا مرۆڤایه‌تیێ یه‌ كو چ جاران رێ نه‌ده‌ت ئه‌ڤ تاوانه‌ ل هیچ جهه‌كی دووباره‌ ببن و ب هه‌موو شێوه‌كی رێ لێ بهێته‌ گرتن. د ده‌مه‌كی دا هه‌رێما كوردستانێ ب ره‌وشه‌كا هه‌ستیاردا ده‌رباز دبیت، باشترین بیرئینان و بلند راگرتنا سالیادا شه‌هیدێن ئه‌نفالێ و هه‌موو شه‌هیدێن كوردستانێ، ته‌بایی و ئێكرێزیا هێز وئالیێن كوردستانێ و پێكهاتێن وێ یه‌ ژ پێخه‌مه‌ت مسۆگه‌ركرن و پاراستنا مافێن دستووری و قه‌وارێ سیاسی و فیدرالی وپاشه‌رۆژا هه‌رێما كوردستانێ یه‌.

دیاركر ژی، د ده‌مه‌كی دا دادگه‌ها بلند یا تاوانان ل ئیراقێ، ئه‌نفال ب جینۆساید و تاوانا دژی مرۆڤایه‌تیێ و تاوانا شه‌ری هه‌ژمارتیه‌، ب ڤێ هه‌لكه‌فتێ دخوازین و دووپاتیێ دكه‌ین كو حوكمه‌تا فیدرالی یا ئیراقێ ل به‌رده‌م ئه‌ركه‌كێ قانوونی و ئه‌خلاقی و مرۆڤایه‌تی دایه‌ بۆ وێ چه‌ندێ قه‌ره‌بوویا كه‌سوكارێن ئه‌نفالكریان بكه‌ت تاكو هنده‌ك ژ برینێن وان سڤك ببن. ل هه‌رێما كوردستانێ ژی هه‌ر چ د شیاندایه‌ پێدڤیه‌ خزمه‌تا باشتر یا مالبات و كه‌سوكارێن ئه‌نفالكریان بهێته‌ كرن و بزاڤێن ئاڤه‌دانكرنا ده‌ڤه‌رێن ئه‌نفالكری و زڤراندنا روفاتێن شه‌هیدان به‌رده‌وام بن، هه‌روه‌سا ل سه‌ر ئاستێ نێڤده‌وله‌تی ژی دێ د به‌رده‌وامبین د بزاڤێن خوه‌ دا بۆ هه‌ژمارتنا ئه‌نفالێ وه‌كو جینۆساید.

ب، سه‌رجان مه‌حمود:

ده‌زگه‌هێن راگه‌هاندنا توركیا ب گرنگی به‌حسێ سه‌ره‌دانا سه‌رۆكێ حوكمه‌تا هه‌رێما كوردستانێ بۆ توركیا دكه‌ن و دیار دكه‌ن كو رۆلێ هه‌رێما كوردستانێ د ئیراقا ئێكگرتی و بجهبوونا ئێمناهیێ‌ و په‌یوه‌ندیێن ئابووری دا ل ده‌ڤه‌رێ گه‌له‌ك گرنگه‌ و توركیا باش دزانیت كو هه‌رێما كوردستانێ خوه‌دان پێگه‌هه‌ك بهێزه‌ ل ده‌ڤه‌رێ.

مه‌سرور بارزانی سه‌رۆك وه‌زیرێن هه‌رێما كوردستانێ ل گه‌ل شانده‌كێ حوكمه‌تێ رۆژا 15/4/2022 سه‌ره‌دانا توركیا كر و ل كۆ‌‌چكا دۆلماباخچه‌ ‌ل باژێرێ ئسته‌نبۆلێ ل گه‌ل ره‌جه‌ب ته‌یب ئه‌ردۆغانێ سه‌رۆك كۆمارێ توركیا هه‌ڤدیتنه‌ك ساز كر و د هه‌ڤدیتنێ دا په‌یوه‌ندیێن ئابووری، بازرگانی و پێشخستنا په‌یوه‌ندیێن دوقۆلی و پێشهاتێن ل رۆژهه‌لاتا ناڤین و ئیراقێ هاتنه‌ گه‌نگه‌شه‌ كرن.

رۆژنامه‌یێن توركیا یێن وه‌كو سه‌باح، حوڕییه‌ت و مللیه‌ت و گه‌له‌ك مالپه‌رێن توركیا ب گرنگی به‌حسێ هه‌ڤدیتنا سه‌رۆك كۆمارێ توركیا و سه‌رۆك وه‌زیرێن  هه‌رێما كوردستانێ كرن و راگه‌هاندن كو هه‌ڤدیتنه‌كا ئه‌رێنی و ب مفا هاتیه‌ سازكرن و ئاشكرا كرن كو د رۆژێن بهێت دا دێ پێنگاڤێن مه‌زن د وارێن ئابووری، بازرگانی و ئێمناهیێ دا هێنه‌ ئاڤێتن.

ل ئالیێ دی مالپه‌رێن ده‌نگێ ئه‌مریكا و دویچه‌  یا ئه‌لمانیا ژی د نووچه‌یێن خوه‌ دا راگه‌هاندن كو حوكمه‌تا هه‌رێما كوردستانێ و توركیا دخوازن په‌یوه‌ندیێن د ناڤبه‌را خوه‌ دا بگه‌هیننه‌ ئاسته‌كی بلند و هه‌ردو ئالی ژی هه‌ول دده‌ن ئارامیێ ل ده‌ڤه‌رێ بجه بكه‌ن و مالپه‌رێن ناڤهاتی راگه‌هاندن ژی پشتی مه‌سرور بارزانی بوویه‌ سه‌رۆك وه‌زیرێن هه‌رێما كوردستانێ ئه‌ڤه‌ جارا دویێ یه‌ سه‌ره‌دانا توركیا دكه‌ت و د هه‌ر دو سه‌ره‌دانێن خوه‌ دا ژی ب گه‌رمی پێشوازی لێ‌ هاتیه‌ كرن.

سه‌باره‌ت ب هه‌ڤدیتنا هه‌ر دو سه‌رۆكان رۆژنامه‌ڤان و نڤیسه‌رێن توركیا ژی راگه‌هاندن كو رۆلێ هه‌رێما كوردستانێ د ئیراقا ئێكگرتی و بجهبوونا ئێمناهی و په‌یوه‌ندیێن ئابووری دا ل ده‌ڤه‌رێ گه‌له‌ك گرنگه‌ و دیار ژی كرن كو كارساز و سه‌رما‌یه‌دارێن توركیا دشێن د گه‌له‌ك واران دا پرۆژه‌یێن ئابووریێ ل هه‌رێما كوردستانێ ئه‌نجام بده‌ن و د ڤێ چارچۆڤێ دا هه‌ڤدیتن و كۆمبوونێن د ناڤبه‌را هه‌ردو ئالیان دا بۆ ئارامیا ده‌ڤه‌رێ ب گرنگ ل قه‌له‌م دان.

چاڤدێرێن سیاسی ژی دیار دكه‌ن كو توركیا هه‌ست ب گرنگیا هه‌رێما كوردستانێ كریه‌ و باش دزانیت كو هه‌رێما كوردستانێ خوه‌دان پێگه‌هه‌كا خوه‌ یا گه‌له‌ك بهێزه‌ ل ئیراقێ و ئه‌ڤرۆكه‌ بێی هه‌رێما كوردستانێ چو حوكمه‌ته‌ك ل ئیراقێ ژی ناهێته‌ ئاڤاكرن، ژ به‌ر هندێ توركیا ژی دڤێت مفای ژ پێگه‌هێ هه‌رێما كوردستانێ وه‌ربگریت و نها په‌یوه‌ندیێن توركیا و هه‌رێما كوردستانێ د باشن و ئه‌و یه‌ك د به‌رژه‌وه‌ندیا هه‌ر دو ئالیان دایه‌ و سه‌ره‌دانا سه‌رۆكێ حوكمه‌تا هه‌رێما كوردستانێ ژی جاره‌كا دی سه‌لماند كو هه‌رێما كوردستانێ بۆ توركیا گه‌له‌ك گرنگه‌.

ئه‌ڤرۆ:

ئه‌ندامه‌كێ په‌رله‌مانێ كوردستانێ ژ فراكسیۆنا پارتی دیموكراتی كوردستان راگه‌هاند، دیموكراسی پرۆسه‌كه‌ و هه‌لبژارتن ژی به‌لگه‌یه‌ بۆ وێ چه‌ندێ بشێین كار و ئه‌رك بهێنه‌ بكارئینان، پارتی دیموكراتی كوردستان باوه‌ریا یا ب وێ پرۆسێ هه‌ی و هه‌لگرا به‌رپرسیاره‌تیێ یه‌، مه‌ كێم ئاخڤتن یێن كرین به‌لێ به‌رده‌وام مه‌ كارێن زۆر كرینه‌، به‌لێ حزبێن دی كو هنده‌ك ب ناڤێ ئۆپۆزسیۆنێ و پشكه‌ك ژی كو دپشكدارن د حوكمه‌تێ دا، دژ ب دیموكراسیه‌تێ فاكته‌ره‌كێ تێكده‌ر بووینه‌ ودژی ئاخێ و نیشتمانی نه‌.

رزگار عیسا سوار، ئه‌ندامێ په‌رله‌مانێ كوردستانێ ژ قراكسیۆنا پارتی گۆت” ئۆپۆزسیۆن باسێ بودجه‌ی و خزمه‌تگوزاریان دكه‌ت، كه‌س وه‌كو پارتی واقعێ ڤی جڤاكی نزانیت، ئه‌وێن بووینه‌ ئه‌گه‌رێ برینا بودجه‌ی، رێ بۆ دوژمنی خوه‌ش كریه‌ بۆ وێ چه‌ندێ هه‌رێما كوردستانێ تووشی كێشه‌ و گرفتان بكه‌ن، به‌لێ ئه‌و به‌رپرسیاره‌تیا كابینا نوو یا حوكمه‌تێ ب سه‌رۆكایه‌تیا مه‌سرور بارزانی سه‌رۆكێ جڤاتا وه‌زیران شیا ل ره‌وشه‌كا گه‌له‌ك دژوار دا گاڤێن گه‌له‌ك باش بهاڤێژیت ژ روویێ خزمه‌تگوزاریان و به‌رده‌وام بوون ب پێشخستن و به‌رده‌وامیا پرۆژان.

رزگار ئاماژێ دكه‌ت” ئه‌و حزبێن دژایه‌تیا پارتی دكه‌ن سیاسه‌تا دوژمنێن كوردان په‌یره‌و دكه‌ن، به‌لێ پێدڤیه‌ خه‌لكێ كوردستانێ یێ هشیار بیت”.

دیاركر ژی” ئه‌و پارێ دهێته‌ هنارتن بۆ سلێمانیێ ژ ئالیێ هه‌ولێرێ و دهۆكێ ڤه‌، دیار نامینیت، جهێ داخێ یه‌، ئه‌و به‌رپرسیاره‌تیا خوه‌ وه‌كو خوه‌ بجهنائینن، بۆ پۆست و پایه‌ وه‌رگرتن ل حوكمه‌تێ یێن ل گه‌ل پارتی، به‌لێ د هه‌لگرتنا به‌رپرسیاره‌تیێ دا د خه‌مسارن، بلا بۆمه‌ دیار بكه‌ن هه‌تا نوكه‌ سه‌رۆك كۆماری ل ده‌مێن بۆری چ هه‌لویسته‌كێ ئه‌رێنی هه‌بوو بۆ هه‌رێما كوردستانێ؟”.

ژ ئالیێ خوه‌ڤه‌ خدر كه‌ریم، شرۆڤه‌كارێ سیاسی دبێژیت” ئۆپۆزسیۆن رامانا وێ هشیاركرنا ده‌ستهه‌لاتێ یه‌ ژبۆ ب هێزكرنا ده‌ستهه‌لاتێ و پێدڤیه‌ د خزمه‌تا گه‌ل و نیشتمانی دا كاربكه‌ن نه‌كو ب دووڤ به‌رژه‌وه‌ندیا حزبی یا خوه‌ گاڤان بهاڤێژن”.

زێده‌تر گۆت” هه‌موو ئه‌و حزب دپشكدارن د هه‌ر خه‌مساریه‌كێ دا هه‌كه‌ هه‌بیت، به‌لێ ئه‌و دخوازن خوه‌ ده‌ربێخن، به‌لێ پارتی باجێ دده‌ت، هه‌كه‌ سه‌حكه‌ینه‌ ئیراقێ سه‌ره‌رای كێماسیان به‌لێ ئۆپۆزسیۆن ب ڤی شێوه‌ی ره‌فتار نه‌كریه‌، به‌لێ ئۆپۆزسیۆن ل هه‌رێما كوردستانێ و هنده‌ك نه‌یارێن كوردان ب هه‌موو شێوه‌كی بزاڤا شێواندنا راستیان دكه‌ن و دژایه‌تیا هه‌رێما كوردستانێ

دكه‌ن”.

ئه‌ڤرۆ:

ژڤانێ ئه‌نجامدانا هه‌لبژارتنێن كوردستانێ یێ هاتیه‌ دیاركرن، به‌لێ ئالیێن سیاسی دناكۆكن ل سه‌ر شێوازێ هه‌لبژارتنێ، كۆمسیۆن دبێژیت ته‌پ یا د مه‌یدانا سه‌رۆكایه‌تیا په‌رله‌مانێ كوردستانێ دا، سكرتێرا په‌رله‌مانێ كوردستانێ ژی دبێژیت، ڤی بابه‌ت دانوستاندن بۆ دڤێت.

شیروان زرار، په‌یڤدارێ كۆمسیۆنا هه‌لبژارتن و راپرسیان ل هه‌رێما كوردستانێ راگه‌هاند، ده‌مێ قانوونی یێ جڤاتا كۆمسیاران یێ ب سه‌رڤه‌چووی و نه‌شێن هه‌لبژارتنان ئه‌نجام بده‌ت و ئه‌م چاڤه‌رێی په‌رله‌مانێ كوردستانێ دكه‌ین كێشێن قانوونی چاره‌سه‌ر بكه‌ت.

ئاماژه‌كر” هه‌ر ده‌مێ په‌رله‌مانی گرفتێن قانوونی چاره‌سه‌ركرن و ئالیێن سیاسی به‌رهه‌ڤی دیاركر، وی ده‌می كۆمسیۆن دێ ل گه‌ل سه‌رۆكایه‌تیا هه‌رێما كوردستانێ و حوكمه‌تێ و په‌رله‌مانی كۆم بیت و ب گۆره‌ی ده‌می دێ هه‌لویستێ خوه‌ به‌رچاڤكه‌ن، كا دێ شێن د ده‌مێ خوه‌ دا هه‌لبژارتنان ئه‌نجام بده‌ن یان دێ داخوازا درێژكرنا ده‌مێ قانوونی یێ په‌رله‌مانێ كوردستانێ كه‌ن.

ژ ئالیێ خوه‌ڤه‌ مونا قه‌هوه‌چی، سكرتێرا په‌رله‌مانێ كوردستانێ دبێژیت ” هیچ به‌رنامك نینه‌ بۆ كۆمبوونا په‌رله‌مانێ كوردستانێ، یان كۆمبوونا سه‌رۆكێن فراكسیۆنان كو تایبه‌ت بیت ب هه‌لبژارتنان ڤه‌”.

مونایێ ئاماژه‌كر” ئێكه‌تی نیشتمانی كوردستان ب هه‌ڤپشكی ل گه‌ل پشكه‌ك ژ په‌رله‌مانتارێن دی ژبلی پارتی، پرۆژه‌ قانوونه‌ك تایبه‌ت ب راستڤه‌كرنا قانوونا هه‌لبژارتنان بۆ سه‌رۆكایه‌تیا په‌رله‌مانێ كوردستانێ هنارتیه‌” لێ دبێژیت” نابیت بێی سازان كۆمبوون ل سه‌ر بهێته‌ كرن، بۆ پرسێن چاره‌نڤیسساز دڤێت دانوستاندن بهێنه‌ كرن، ئه‌م ژی وه‌كو سه‌رۆكایه‌تیا په‌رله‌مانێ كوردستانێ چاڤه‌رێی فراكسیۆناینه‌ و ناخوازین ببینه‌ ئه‌گه‌رێ ئیفلجبوونا ده‌زگه‌هێ قانوون دانانێ”.

سكرتێرا په‌رله‌مانێ كوردستانێ باس ل وێ چه‌ندێ ژی كر” گه‌له‌ك تێبینیێن پێكهاتان یێن ل سه‌ر وی پرۆژه‌ قانوونا هاتیه‌ پێشكێشكرن هه‌ین و دخوازن دانوستاندنێن زێده‌تر ل سه‌ر بكه‌ن”.

دهێته‌ زانین ل رۆژا 24شوباتا 2022، سه‌رۆكێ هه‌رێما كوردستانێ، نێچیرڤان بارزانی فه‌رمانا هه‌رێمی بۆ دیاركرنا رۆژا هه‌لبژارتنێن په‌رله‌مانێ كوردستانێ ئیمزاكر و بریاردا ل رۆژا 1/10/2022 هه‌لبژارتن بهێنه‌ ئه‌نجامدان. پشتی سێ رۆژان مه‌سرور بارزانی، سه‌رۆكێ جڤاتا وه‌زیرێن هه‌رێما كوردستانێ، ئالیێن په‌یوه‌ندیدار راسپاردن هه‌ماهه‌نگیێ ل گه‌ل كۆمسیۆنا بلند یا هه‌لبژارتن و راپرسیان ل هه‌رێما كوردستانێ بكه‌ نبۆ وێ چه‌ندێ هه‌لبژارتن ل ژڤانێ خوه‌ بهێنه‌ ئه‌نجامدان.

سه‌رۆكێ فراكسیۆنا پارتی ل په‌رله‌مانێ كوردستانێ رادگه‌هینیت، د په‌راوێزا دیداره‌كێ دا ل گه‌ل به‌رپرسێ كاروبارێن سیاسی یێن یونامی ل ئیراقێ  به‌حس ل به‌رهه‌ڤیێن پرۆسا هه‌لبژارتنێن په‌رله‌مانێ كوردستانێ و رێكارێن قانوونی یێن به‌رده‌م وێ و پرسا كاراكرنا كۆمسیۆنێ هاته‌ كرن و مه‌ دووپاتی ل سه‌ر هه‌لویستێ پارتی كر بۆ ئه‌نجامدانا هه‌لبژارتنان د ژڤانێ خوه‌ دا و به‌رهه‌ڤیا فراكسیۆنا پارتی بۆ لادانا به‌ربه‌ستێن قانوونی ب ئارمانجا لێكتێگه‌هشتنێ دناڤبه‌را فراكسیۆنان بۆ چاره‌سه‌ریا گرفتێن قانوونی و مه‌ هوشداری ل دۆر پێشهاتێن به‌رده‌م ئه‌نجامدانا پرۆسا هه‌لبژارتنان و ئیفلجبوونا پرۆسا قانوون دانانێ ل هه‌رێمێ دا.