ئەڤرۆ نيوز:
نەدیم زەھاوی ئەندامێ پەرلەمانێ بریتانیا د داخۆیانیەکێ دا بۆ ئاژانسا سپۆتینگ یا روسیا دیار کریە کو د روونشتنا پەرلەمانی دا پرانیا ئەندامێن پەرلەمانی رازیبوونا خوە دیار کرینە کو شاندەکێ پەرلەمانێ بریتانیا وەکو چاڤدێرن بۆ ریفراندۆمێ بچنە ھەرێما کوردستانێ، ئەو شاندە ل ھەموو پارێزگەھێن ھەرێما کوردستانێ وەکو شاندەکا سەربخوە دێ چاڤدێریا پرۆسا ریفراندۆمێ کەت.
ناڤبری د بەردەوامیا ئاخڤتنا خوە دا ئەو یەک ژی دیار کریە کو شاندێ پەرلەمانێ بریتانیا دێ دیتنێن خوە ل دۆر ریفراندۆمێ وەکو راپۆرت پێشکێشی پەرلەمانی کەن و پاشی پەرلەمان دێ دووڤچوونێ کەت و نێرینا خوە ب فەرمی ل دۆر ریفراندۆما ھەرێما کوردستانێ بۆ رایا گشتی ئاشکرا کەت.

ئه‌ڤرۆ نيوز:
دەولەتا تورک و یا ئیرانێ ل ھەمبەری رژدبوونا سازکرنا ریفراندۆما ھەرێما کوردستانێ نەرازیبوونێن خوە ب گەفان دیار دکەن و ل ئالیێ دی ھژمارەکا نڤیسەر و زانایێن سیاسی یێن تورکیا دیار دکەن کو ھەکە کورد دەولەتا خوە راگەھینن پشتی دەمەکێ تورکیا دێ دانپێدانێ ب دەولەتا کوردی کەت.
پشتی کو وەزیرێن دەرڤە یێن ئیرانێ و تورکیا ل ل کۆمبوونا نیویۆرک یا نەتەوێن یەکگرتی ھاتنە گەل ھەڤدو، راگەھاندنێن ھەر دو دەولەتان دیار کرن کو تورکیا و ئیران ناھێلن ھەرێما کوردستانێ ریفراندۆمێ ساز بکەت و ھەتا نھا ئەنجاما کۆمبوونا ھەر دو ئالیان ب دروستی بۆ رایا گشتی نەھاتیە ئاشکرا کرن، لێ وەسا دھێتە پێشبینی کرن کو ھەر دو ئالیان ریفراندۆما ھەرێما کوردستانێ و چاوانیا دروست کرنا ئاستەنگیان ل ھەمبەر ریفراندۆمێ گەنگەشە کرینە.
ھەر د ڤێ مژارێ دا رۆژنامە و تەلەفزیۆن و رادیۆ یێن نێزیکی سەرۆک کۆمار ئەردۆگانی د نڤیس، بەرنامە و شیرۆڤێن خوە دا گەفێن کرێت و دوور ژ رەوشتێن مرۆڤی دکەن و ل ھەمبەر دا پشکەکا گرنگ یا راگەھاندنا تورکیا ژی وەسا دبینن کو سازکرنا ریفراندۆما ھەرێما کوردستانێ مافەکی سروشتی یێ کوردایە و نابیت دەستھەلاتدارێن تورکیا ل دژی ئیرادە و چارەنڤیسێ نەتەوەکی دەرکەڤن کو چو پەیوەندیا وێ ب تورکیا ڤە نینە.
پارتێن نەتەوە پەرەست و ئیسلامی و رێکخستنێن نێزیکی ئاکپارتی و پارتا بزاڤا نەتەوەپەرست و پارتا ئێکەتیا مەزن ل ژێر ناڤێ زۆرداری ل تورکمانێن ل کەرکووکێ دھێتە کرن، دخوازن خەلکێ تورکیا ل دژی ریفراندۆمێ راکەنە سەر پیان، لێ ھەتا نھا پشکەکا گرنگ یا جڤاکێ تورکیا ل دژی ریفراندۆمێ دەرناکەڤن ژ بەر کو وەکو دھێتە خواستن نەشێن پشتەڤانیا جڤاکێ تورکیا راکێشنە گەل خوە و نھا ژی ل ژێر ناڤێ کەرکووک باژێرێ تورکمەنایە و کورد زۆرداریێ ل تورکمەنان دکەن، درەوان دکەن لێ ئەڤ ھەولا وان ژی تووشی شکەستنێ ھاتیە.
لاوێن کورد ئانکۆ ب گشتی کوردێن باکورێ کوردستانێ ژی پشتەڤانیا ریفراندۆمێ دکەن و ب ھزاران لاوێن کورد بەرھەڤیێن خوە بۆ پاراستنا دەولەتەکا سەربخوە یا کوردستانێ ل باشورێ وەلات نیشان ددەن و ل دووڤ ئاخڤتنێن زانایێن جڤاکێ جارا یەکێیە گەلێ کورد ل ھەر چار پارچێن کوردستانێ و دەروەیی وەلات ب دل و جان بۆ ئارمانجا پیرۆز یەک دگرن، ئەو یەک گرتنە پەیامەکا گەلەک مەزنە بۆ دوژمنێن گەلێ کورد کو بەری نھا دوژمنان ھەری زێدە ژ ناکۆکی و ئالۆزیێن د ناڤبەرا ئالیێن سیاسی یێن کوردستانێ دا مفا وەردگرتن و ئەڤرۆ ئەڤ دەلیڤە ژ دەستێ دوژمنان ھاتیە دەرخستن.
ل ئالیێ دی ل دووڤ راپۆرتەکا کو ل سەر تۆرا ئنترنێتێ ھاتیە بەلاڤ کرن ھژمارەکا قۆتابیان ل ناڤا باژێرێن ئستەنبۆل و ئەزمیرێ وەکو راپرسیەکی ژ وەلاتیێن تورک دپرسن گەلۆ ھوون ل دژی ریفراندۆما کوردستانا عیراقێ نە، یان نا؟ پرانیا پشکداربوویێن راپرسیێ ب ئاشکرا دبێژن کو ئەو نە ل دژی ریفراندۆما کوردستانا عیراقێ نە. دیسان پرسیارا گەلۆ ھوون کوردان وەک دوژمن دبینن یان نا؟ دیسان پشکەکا مەزن دبێژن کو کورد نەتەوەکا موسولمانە و زمان و کەلتورێ وان یێ تایبەت ھەیە و ئەم وان وەکو دوژمن نابینین.
ھەروەسا ھژمارەکا زێدە ئەکادیمی و نڤیسەر و رۆژنامەڤانێن ناڤدار یێن تورکیا، یێن وەک جەنگیز چاندار، حەسەن جەمال، ئۆرال چالشلار، ئاسلی ئایدنتاشباش، ئایدن ئەرەن و محەمەد ئیشک ژی د نڤیس و شیرۆڤێن خوە دا دیار دکەن کو سەرۆک کۆمار ئەردۆگان و دەستھەلاتا ئاکپارتی و سەرۆکێ (مەھەپێ) و ھندەک کۆمێن بچووک یێن تورکیا بۆ کۆمکرنا دەنگێ نەتەوەپەرستان ھەڤرکیا ئێکتر دکەن و گەفێن ل ھەرێما کوردستانێ دھێنە کرن ژ بەر ھندێ نە، چونکو د راستی دا ئەو باش دزانن کو کورد ژی وەکو ھەر نەتەوەیەکا دی مافێ خوەیە بریارێ ل سەر پاشەرۆژا خوە بدەت و دیار کرینە کو ئەو باوەر ناکەن دەستھەلاتا تورکیا ب کریاری ل دژی دەولەتا سەربخوە یا ھەرێما کوردستانێ پێنگاڤەکا دژوار ب ھاڤێژیت و ب دەربازبوونا دەمی دێ ب فەرمی ژی کوردستانێ قەبوول کەن.