ئەڤرۆ نیوز ، نەوزاد هلوری.

ژ سپێدێ وەرە هاتا نها جار ب جار توپخانەیێن سوپایێ کومارا ئیسلامیا ئیرانێ لسەر بوردومانکرنا چەند دەڤەرەکێن سنوورێ ناحیا حاجی ئومەران بەردەوامە.
ژێدەرەکێ ژ ناحیا حاجی ئومەران بو ئەڤرۆ نیوز دیارکر کو توپخانەیا سوپایێ ئیرانێ نها چەند دەڤەرەکێن سنوورێ ناحیا حاجی ئومەران بوردومان دکەت و بەردەوامە ژی و گۆت: (ئەڤرۆ ل چەند دەمەکێن ژێکجودا توپخانەیێن سوپایێ ئیڕان ب بهانەیا هەبوونا چەکدارێن ئوپوزسیونا ئیرانێ لسەر بوردومانکرنا دەڤەرێن سنوورێ ناحیا حاجی ئومەران بەردەوامە ب تایبەتی دەڤەرێن زوزان و بەفرینێن چیایێ هەلگۆرد ، ئەڤە د دەمەکێ دایە کو هژمارەکا زورا خەلکی ب مەرەما گەشتوگۆزار و دەم بوراندنێ قەستا چیایێ هەلگۆرد کریە)

زێدەتر گۆت: (توپخانێن ئیرانێ زێدەتر ژ هەشت جاران دەڤەر بوردومانکریە ، سوپاس بو خودێ چوو زیانێن گیانی نەبوون بەلێ ترسەکا زور ل دەف خەلکی درۆستکریە ژ بەرکو هندەک ژ توپێن وان دناڤ مالان دا کەفتینە)

……

وێنە ، ئەرشیف

ئەڤرۆ نیوز ، نەوزاد ھلۆری:
ئەڤرۆ چەند کەسەکێن نەناسیار ل سنوورێ قەزا سوران ب گولەیان ھێرش کرە سەر ژن و زەلامەکێ ، و دئەنجام دا زەلام کوشت و ژن ژی بریندارکر ، و رێڤەبەریا پولیسان ژی دیارکر کو ئەوان دەست ب ڤەکولینێ کریە .
دڤی واریدا ھەوار ئەرگوشی بەرپرسێ راگەھاندنا پولیسێن قەزا سوران بۆ ئەڤرۆ نیوز گۆت: ( پێش نیڤرویا ئەڤرۆ ل تاخێ راپەرین یا سەنتەرێ ناحیا خەلیفان ل سنوورێ قەزا سوران ژلایێ چەند کەسەکان ڤە ب گولەیان ھێرش بو سەر ژن و مێرەکی َھاتنە کرن و د ئەنجام دا زەلام ھاتە کوشتن و ژن ژی برینداربوو)
زێدەتر گۆت: (ئەو ھەردوو ژن و زەلامە ھەڤژنێن ھەڤدوو بوون  ، و زەلام بو نەخوشخانا داد و ژن ژی بو نەخوشخانا تەنگاڤیان ھاتینە رەوانەکرن ، و پولیسێن سوران دەست ب ڤەکولینی َکریە بو گرتنا ئەوان تەقەکەران و زانینا ئەگەرا روودانێ )

ئەڤرۆ نیوز ، ھلۆری:
ئێڤارە درەنگی یا ئەڤرۆ لسەر رێیا گشتی یا دناڤبەرا قەزا ئاکرێ و ناحیا بجێل د روودانەکا ھاتن و چۆنێ دا حەفت کەس برینداربوون و برینا ھندەک ژ وان گرانە.
دڤی واریدا ئازاد تەھا بەرپرسێ راگەھاندنا ھاتن و چۆنا دھۆکێ بۆ ئەڤرۆ نیوز گۆت: (ئێڤارە درەنگی یا ئەڤرۆ دەوروبەرێن دەمژمێر ٦:٠٠ لسەر رێیا گشتی یا دناڤبەرا قەزا ئاکرێ و ناحیا بجێل حەفت کەس برینداربوون و برینا ھندەک ژ وان گرانە و بو نەخۆشخانەیا تەنگاڤیان ئاکرێ ھاتینە رەوانەکرن)
زێدەتر گۆت: ( روودان ژ جورێ ليكدان بوویە دناڤبەرا دوو ترومبێلان ، و دخوازین بو سلامەتیا خوە و کەسانێ، دن شوفێر پێگیریەکا تەمام ب رێنمایێن ھاتن و چۆنێ بکەن ژ بەرکو روودان زور بوینە ، و پرانیا روودانان ژی بو بلەز لێخورین و پێگیرنەبوون ب رێنمایێن ھاتن و چۆنێ دھێنە روودان )

ئەڤرۆ نیوز ، نەوزاد ھلۆری:
ئەڤرۆ ئاوارەیەکێ عەرەب ل رووبارێ خارز ل سنوورێ پارێزگەھا دھۆک خەندقی ، پشتی کو تیمێن بەرەڤانیا باژێری تەرمی وی دەرئینایی ، بو کەس و کارێن وی ھاتە رەوانەکرن.
دڤی واریدا حەیدەر بلباس بۆ ئەڤرۆ نیوز گۆت: ( ئەڤرۆ رۆژا ھەینی ل دەما مەلەڤانیکرنێ ل رووبارێ خازر یا سەر ب قەزا بەردەرەش ئاوارەیەکێ عەرەب خەندقی )
زێدەتر گۆت: ( ئەڤ ئاوارەیە ھاولاتیەکێ موسل بو و ل کەمپا سێفدیدان کو دکەڤیتە دناڤبەرا موسل و قەزا خەبات دا ئاکنجیە و ناڤێ وی بەسام ئەحمەد و ژ دایکبوویێ سالا ١٩٨٦ ، تەرمێ وی ژلایێ بەرەڤانیا باژێری ل قەزا خەبات ھاتیە دەرئینان و بو کەس و کارێن وی ھاتیە رەوانەکرن)
دھێتە زانین ئەڤ سالە ل سنوورێ قەزا خەبات ١٤ کەس خەندقینە.

ئەڤرۆ نیوز ، نەوزاد ھلۆری:
ئێڤاریا ئەڤرۆ ئاگر بەربوویە دوو خیتڤەتێن کەمپا نێرگزلی ل سنوورێ قەزا شێخان و د ئەنجام دا دوو خیڤەتێن ئاوارەیان ب کەلوپەلێن نامالێ ڤە ب تەمامی ھاتن سووتن.
دڤی واریدا شاکر ژ بەرەڤانیا باژێری ل قەزا شێخان بۆ ئەڤرۆ نیوز گۆت: ( ژ ئەگەرا خەمساریێ و ھەلکرتنا ئاگری دناڤا خیڤەتێ دا ئاگر بەربوویە دوو خیڤەتێن کەمپا نێرگزلی کو تایبەتە ب ئاوارەیێن موسل ل سنوورێ قەزا شێخان و د ئەنجام دا خیڤەت ب ئەو کەلوپەلێن تێڤە ب تەمامی ھاتنە سووتن)
زێدەتر گۆت: ( ئاگر ژلایێ تیمێن بەرەڤانیا باژێری ل شێخان ھاتیە کونترولکرن و نەھێلا بگەھیتە خیڤەتێن دن )