دیدار، هۆشەنگ تاجر:

مامۆستایەکێ زانکۆیێ دیار دکەت، پارتی دیموکراتی کوردستان ب رێیا درووشمێ خوە یێ ڤێجارێ کو ژ سێ پەیڤان پێک دهێت دڤێت ناڤەرۆکەکا نوو بدەتە سیستەمێ فیدرالی ل ئیراقێ و بێگومان تنێ پارتی دشێت شەڕی بۆ مافێن کوردان ل بەغدا بکەت.

د. رێبین سەلام مامۆستایێ زانکۆیێ د دیدارەکا تایبەت دا بۆ رۆژنامەیا ئەڤرۆ دیار کر، بەری هەموو تشتەکێ ئاشکرایە کو ئەڤ هەلبژارتنە ژ بۆ هەموو ئیراقێ گرنگیا خوە هەیە و ب تایبەتی ژی ژ بۆ کوردان، چونکی ئیراق نها د گەلەک ئاریشەیان دایە و سیستەمێ فیدرالی ل ئیراقێ ژی د قەیرانەکا گەلەک مەزن دایە، فیدرالی وەکو خوە ناهێتە بجهئینان و ژ بەر ڤێ یەکێ ژی پارتی ب رێیا درووشمێ خوە یێ هەلبژارتنان دڤێت پەیامەکا ئاشکرا بدەتە ئیراقێ و گۆت: (پارتی دڤێت ب سێ پەیڤێن هەڤسەنگی، هەڤپشکی و لهەڤهاتن ناڤەرۆکەکا نوو بدەتە سیستەمێ فیدرالی ل ئیراقێ، چونکی دەمێ دستوورێ ئیراقێ هاتە دانان دا سیستەمێ ئیراقێ فیدرالی بیت و دستوور ببیتە ژێدەرێ چارەسەریا هەموو پرسێن ل ئیراقێ، مخابن ئەم دبینین رۆژ ب رۆژێ ئیراق ژ سیستەمێ فیدرالی دوور دکەڤیت و بەر ب سیستەمەکێ ناڤەندی ڤە دچیت و بێگومان ئەو یەک دێ بیتە ئەگەرێ مەترسیەکا گەلەک مەزن بۆ ئیراقێ و ب تایبەتی ژی بۆ هەرێما کوردستانێ و پارتی دڤێت رێگریێ ل مەترسیەکا وەسا بکەت).
مامۆستایێ زانکۆیێ ئەو یەک ژی دیار کر، ل ئیراقێ سێ پێکهاتەیێن سەرەکی هەنە، کورد، سوننە و شیعە و دابەشکرنا پۆستێن سەرەکی ئانکو سەرۆک کۆمار، سەرۆکێ حوکمەتێ و سەرۆکێ پەرلەمانی ژی ل سەر بنەمایێ هەر سێ پێکهاتەیان بوویە، لێ مخابن ئەم دبینین کو ئالیێ شیعە یێ رۆژ ب رۆژێ کار دکەن دا ب زۆرینە گەلەک قانوونان دەربخینن و رۆلێ کوردان و سوننەیان کێم بکەن، بێگومان سەرۆک بارزانی هەر زوو هەست ب پیلانا مەترسیا یا ئالیێن شیعە کر و هەلوەستەک توند ژی نیشا دا، چونکی سەرۆک بارزانی گەلەک جاران گۆتیە هەکە فیدرالی وەکو خوە ل ئیراقێ نەهێتە بجئینان دێ ئیراق تووشی گەلەک قەیرانێن مەزن بیت.
د. رێبین سەلام ئەو یەک ژی دیار کر، هەتا نها چو ئالیێن سەرکەفتی ل ئیراقێ نەشیایە کابینا نوو یا حوکمەتێ پێک بینیت، نموونەیا دووماهیێ ژی سەدر بوو، ئانکو رێگری لێ هاتیە کرن و ئالیێن دی ب رێککەفتنەکێ حوکمەت ئاڤا کرن و گەلەک سۆز دانە کوردان و سوننەیان و سۆزێن خوە ژی بجه نەئینان و گۆت: (پارتی دیموکراتی کوردستان دڤێت ڤێجارێ حوکمەتا نوو ب بەرنامە بهێتە ئاڤاکرن، ئانکو بەری حوکمەت بهێتە ئاڤاکرن هزر د چاوانیا بجهئینانا سیستەمێ فیدرالی بکەت و ژ بەر ڤێ یەکێ ژی پارتی درووشمێ هەڤسەنگی، هەڤپشکی و لهەڤهاتن هەلبژارتیە دا کو کورد د کابینا نوو یا حوکمەتا ئیراقێ دا هەڤپشک بن و خوەدان بریار بن).
ناڤهاتی د دووماهیا ئاخڤتنا خوە دا ئەو یەک ژی دیار کر، پارتی شیایە هەتا نها گەلەک پیلانێن ل دژی هەرێما کوردستانێ ژ ئالیێ هندەک هێزێن ل بەغدا ڤە ژناڤ ببەت، ژ بەر ڤێ یەکێ ژی دەنگدەرێن هەرێما کوردستانێ باش دزانن کا پارتی تا چ رادە شیایە مەترسیێن هەی ژناڤ ببەت و گۆت: (کورد دزانن بهێزبوونا پارتی ل بەغدا ئانکو بهێزبوونا ئیرادەیا گەلێ کوردستانێ، ژ بەر ڤێ یەکێ ژی ب سەرکەفتنا پارتی و بهێزبوونا پێگەهێ کوردان ل بەغدا دێ کاروانێ خزمەتێ و ئاڤەدانیێ بەردەوام بیت).

دوهی ئێكشەمبی 2/11/2025، ب بەرهەڤبوونا نێچیرڤان بارزانی، جێگرێ سەرۆكێ پارتی دیموكراتی كوردستان، ئاهەنگا بانگەشەیا لیستا 275 یا پارتی ل سلێمانیێ بڕێڤەچوو.
نێچیرڤان بارزانی د پەیڤەكێدا د وێ ئاهەنگا بانگەشەیێدا گوت» ژ سلێمانیێ سلاڤان بۆ بۆ جەماوەرێ پارتی ل سلێمانیێ و هەلەبجە دهنێرم، هوون پشكەكا گرنگن ژ دیرۆكا پارتی دیموكراتی كوردستان، پارتی ب هەوە یا سەربلندە و ب هەوە دێ سەربلند مینیت».
جێگرێ سەرۆكێ پارتی دیموكراتی كوردستان ئاماژەكر» پارتی خودانا هەوەیە، هوون ژی خودانێن پارتی نە، خودانێن رێبازا بارزانی نە، پارتی سلێمانییە، سلێمانی ژی هەر پارتی یە».
نێچیرڤان بارزانی گوتە جەماوەرێ پارتی ل سنوورێ سلێمانیێ و هەلەبجە» هوون پشكەكا گرنگن ژ كەمپینەیا زێدەتر ژ ملیۆن دەنگان بۆ لیستا 275 یا پارتی دیموكراتی كوردستان، چاڤەڕێنە هەژمارا دەنگێن هەوە ل ئاستێ خەبات و دیرۆكا پارتی بیت ل ڤی باژێری، ل ڤێ دەڤەرێ، ئێك ملیۆن دەنگ بێی هەوە تام تێدا نینە، دڤێت ئێك ملیۆن دەنگ بن».
جێگرێ سەرۆكێ پارتی گوت ژی» من پەیاما ئێك ملیۆن بۆ هەوە ئینابوو، بەلێ دەمێ هەوە دبینم پەیاما من ژ ئێك ملیۆن زێدەتربوو، ئەم ژی بەرهەڤین بۆ وان تەحەدیێن ل ئیراقێ بەرامبەر مە دهێتە كرن، پتشڕاست بن دلخوەشییا هەوە دلخوەشییا مەیە و خەما هەوە ژی خەما مەیە، داخوازیێن هەوە ئەركێن سەر ملێ مەیە، بلا راستییەكێ بێژم ل ڤێ دەڤەرێ نوونەرایەتییا پارتی یا كێمە، بەلێ پشتڕاست بن ژ وێ چەندێ بەرنامەیێ پارتی بۆ ڤێ دەڤەرێ یێ مەزنە».
نێچیرڤان بارزانی دوپاتكر ژی» ب دیتنا مە هەرێما كوردستانێ بێی ڤێ دەڤەرێ یا تمام نینە، پارتی بێی ڤیچ دەڤەرێ یا تمام نینە، ژ بەر وێ چەندێ خەما هەوە خەما مەیە، ئەم ل پارتی نا سەحكەینە كێماسیێن هەردو پارێزگەهێن سلێمانیێ و هەلەبجە و ئیدارەیێن سەربخوە یێن گەرمیان و راپەرین، هەروەسا كێماسی جهێ دلخوەشیێ نینن بۆ پارتی، بەلكو خەمەكا مەزنن بۆ پارتی دیموكراتی كوردستان».
نێچیرڤان بارزانی باس ل وێ چەندێ ژی كر» ئەم وەك پشكەكا خوەشتڤییا كوردستانێ دنێرینە ڤێ دەڤەرێ، پارتی حزبا سەرانسەری كوردستانێیە، پارتی ناوچەرگەری ژ بیركریە، ناوچەگەری ل هزرا پارتی جه نەمایە و نامینیت» .
جێگرێ سەرۆكێ پارتی دیموكراتی كوردستان ئاماژە ب وێ چەندێ ژی كر» پارتی بوو جارا ئێكێ شۆڕش ل سەرانسەری كوردستانێ كر، ژ بەر وێ چەندێ هیچ پارتییەك ب جوداهی نانێریتە هیچ جهەكێ كوردستانێ، دەمێ جادەیەك ل هەلەبجە، یان ل زاخۆ دهێتە دروستكرن ئەم پێ دلخوەش دبین».
راگەهاند ژی» ئەسمانێ سلێمانیێ پشكەكا جوانێ كوردستانێیە، هەكە گەشتێن ئەسمانێ سلێمانیێ د كێم بن، ئانكو گەشتێن ئەسمانی ل كوردستانێ كێم دبن, ئەسمان و ئاخا مە ئێك ناڤ هەیە ئەوژی كوردستانە».
نێچیرڤان بارزانی دیاركر ژی» نابیت زۆنا كەسك و زەر هەبن، دڤێت ئێك زۆن هەبیت ئەوژی زۆنا كوردستانێیە، راستە كێماسی هەنە، رژێما بەعس پترییا جهان وێرانكرن، شەڕێ داعشێ كاروانێ ئاڤەدانكرنێ و پێشئێخستنا كوردستانێ سست كر، هێرش كرە سەر پێشمەرگەی، بەلێ پرسیار نەكر خوونا كیش هەوە یا كەسكە و خوونا كێش هەوە یا زەرە، هەروەسا پێشمەرگەیێن قەهرەمان هەموویان پێكڤە بەرگری ژ كوردستانێ كر و ئاڤەدانییەكا مەزن ل كوردستانێ دروست بوو، بەلێ هێشتا ب دلێ مە نینە و دڤێت ب لەزتر و زێدەتر و باشتر بكەین».
جێگرێ سەرۆكێ پارتی دیموكراتی كوردستان دوپاتكر ژی» خەلكێ كوردستانێ دیدەڤانن، ل هەر جهەكێ پارتی هەبوون هەبیت، ئاڤەدانی و خزمەتگوزاریێن زێدەتر دێ هەبن، پارتی ئەڤە ب كریار سەلماندیە ـ پارتی باوەرنامەیا ئاڤەدانیێ ژ خەلكێ كوردستانێ وەرگرتیە».
نێچیرڤان بارزانی گوت ژی» دەمێ وێ چەندێ هاتیە سلێمانیێ وەك جاران بزڤریت و پێشەنگا زانست و مەعریفە و دەستپێشخەریێن سیاسی و رەوشەنبیری بیت. سلێمانیێ ل چەرخێ 20 باژێرەكێ پێشەنگ بوو، رۆلێن وێ پشكداربوون د دامەزراندن و دیاربوونا قوتابخانە و فێربوونێ. دەزگەهێ لەشكری، دادگەها دەولەتێ، ئێكەمین زانكۆ، ئێكەمین بزاڤا رەوشەنبیری، لڤینا سیاسی و ئەدەبی و هونەری، دژی ستەماكاران بوون».

مەسرور بارزانی، جێگرێ سەرۆكێ پارتی دیموكراتی كوردستان ل ئاهەنگا بانگەشەیا لیستا 275 یا پارتی دیموكراتی كوردستان ل شەقلاوە گوت: دیرۆكا پارتی یا دیارە، چیایێ سەفین دیدەڤانێ داستانێن پارتییە، كوردستان ل پشتا مە بیت، دێ هەردەم بەردەوام بین د داخوازكرنا مافێن خەلكێ كوردستانێ و هیچ هێزەك نەشێت مە ب چەمینیت، ئەڤ باژێرە باژێرێ پێكڤەژیانێ یە، بیر و باوەرێن ئایینی یێن جودا تێدا هەنە، شانازیێ دكەین كوردستان وەلاتێ پێكڤەژیانێیە، رێزگرتن ل هەموو ئایین و نەتەوەیان جهێ شانازیێیە و حەقێ هەوەیە ژی شانازیێ ب وی رەوشتێ خوە بكەن.
مەسرور بارزانی باس ل وێ چەندێ ژی كر» گەلەك گرنگە پشكداریێ د ڤان هەلبژارتناندا بكەین، پارتی ل سەر ئاستێ كوردستانێ هیچ هەڤڕكەك نەمایە، دڤێت ڤێجارێ بچینە بەغدا هەڤڕكیێ بكەین، ئالیێن نەحەز هەردەم بزاڤا راوەستاندنا پارتی كریە، بزاڤا وێ چەندێ كریە پارتی سەركەفتی نبەیت و نەگەهیتە ئارمانجێن خوە، ل ڤێرێ هەر چ ژ دەستێ وان هاتی كر، بەلێ نەشیان مە ب راوەستینن، ئەڤجا پەنا برە بەر بەغدا، پەنا برە بەر دروستكرنا هەڤپەیمانیێ ل گەل وان ئالیێن كو هزرا شۆڤینییەتی د سەرێ واندا مایە، بۆ وێ چەندێ پارتی بشكێنن وئامادەبوون كوردستانێ بشكێنن، ڤێجارێ ژی دڤێت ئەم بچین رێگریێ لێ بكەین و نەهێلین هیچ هێزەك ل هیچ جهەكێ ڤی وەلاتی ببیتە بەربەست و رێگر د سەركەفتنا پارتی دا».
جێگرێ سەرۆكێ پارتی دیموكراتی كوردستان ئاماژە ب وێ چەندێ ژی كر» ل سەر ئاستێ ناڤخوە، گەلەك ئالییان گەلەك بزاڤ كرن چاڤ ل پارتی دیموكراتی كوردستان بكەن، بەلێ نەشیان، وان خواست پارتی بشكێنن، چونكە ب دیتنا وان سەركەفتنا پارتی نەمان وان تێدایە، پارتی چو جاران بۆ خوە كار نەكریە، پارتی ئامانج بوویە، بەلكو ئامانجا خەلكێ كوردستانێ و ئاخا كوردستانێ یە، پارتی هەردەم بەرهەڤ بوویە خوە پێخەمەت سەرئێخستنا كوردستانێ بەخت بكەت».
مەسرور بارزانی زێدەتر گوت» پارتی ب كریار نیشا خەلكێ كوردستانێ دایە كو دشێت چ بكەت، بەلێ ئالیێن دی ژ بلی ئاخڤتنان چو دەستكەفت بۆ خەلكێ كوردستانێ نەبوون، هەكە جارەكێ شانازیێ ب دەستكەفتەكی بكەن ل بن سیبەرا ئالایێ پارتی دا پشكدار بووینە د ڤی دەستكەفتی دا».
جێگرێ سەرۆكێ پارتی دیموكراتی كوردستان ئەوژی راگەهاند» نەچارم هندەك رۆهنكرنان بدەم، گەلەك دژی مە ئاخڤتن دهێنە كرن و بوختان دژی مە دهێنە كرن، كو پارتی دیموكراتی كوردستان جوداهیێ دكەت ل سەر ئاستێ كوردستانێ، بەلێ پارتی خوە ب خودانا هەموو كوردستانێ دزانیت، بهوست بهوست ئاخا كوردستانێ ئاخا پارتییە، لەوما پارتی خوە ب بیانی نزانیت و بلا هیچ كەسەك وەسا هزر نەكەت خودانێ پشكەكا كوردستانێیە و پارتی بیانییە، بەلكو پارتی خودانا هەموو كوردستانێیە».
ئاماژە ب وێ چەندێ ژی كر» ئەو ئالیێ دبێژیت مە نەهێلایە حوكمەت بهێتە پێكئینان، داخوازا پۆست و ئیمتیازاتان بۆ خوە كریە».
ئەوژی گوت» حوكمڕانی ب دز و گەندەل و مافیا ناهێتە كرن، حوكمڕانی ب خەلكێ دلسۆز دهێتە كرن».
راگەهاند ژی» ئازادی ئەوە تو بۆ مافێ نەتەوەیەكی خەباتێ بكەی، ئازادی ئەوە بۆ ئازادییا ئاخێ خەباتێ بكەی، ئازادی ئەو نینە ب تۆپ و تانكا بچیە سەر هۆتێلەكێ یان بچیە سەر ئۆپۆزسیۆنا خوە. ئەوێن باسێ ئازادیێ دكەن، دڤێت ئەو ب خوە ژی د ئازاد بن، ئەوێن باسێ ئازادیێ دكەن دڤێت خودان ئاخڤتن بن وكرێگرتی نەبن».

هەولێر، قائید میرۆ

شارەزایەكێ هەلبژارتنان ئاشكراكر، پەیاما سەرۆك بارزانی ل دۆر بانگەشەیا هەلبژارتنان كاریگەری هەبوویە ل سەر رێڤەچوونا پرۆسەیا بانگەشەیا هەلبژارتنان و دبێژیت: كێمترین سكالا ڤێ بانگەشەیێ هاتینە تۆماركرن و ناهێتە هەڤبەركرن ل گەل هەلبژارتنێن بۆری.
هندرێن محەمەد سالح، سەرۆكێ بەرێ یێ كۆمسیۆنا هەلبژارتنێن هەرێما كوردستانێ بۆ رۆژنامەیا (ئەڤرۆ) گوت» سال بۆ سالێ شێوازێ بانگەشەیا هەلبژارتنان دهێتە گوهۆڕین و ب ئەگەرێ پێشكەفتنێن تەكنەلۆژیایێ نوكە ئالیێن سیاسی زێدەتر سۆشیال میدیایێ و تۆڕێن جڤاكی بۆ بانگەشەیا هەلبژارتنان بكاردئینن، ڤان هەلبژارتنان نوكە بانگەشە بەر ب دووماهیێ دچیت وكێمترین بنپێكاری هاتینە تۆمار كرن و ئەڤەژی بۆ رەوشەنبیریا ئالیێن پشكدار د هەلبژارتنان ڤەدگەڕیت و هەموو ئالییان پشكێن هەلبژارتنان هەنە و راهێنان ب بەربژارێ كەمپینەیێن بانگەشەیا هەلبژارتنان دهێتەكرن ئەڤێ چەندێ ژی كاریگەری هەبوویە ل سەر پاشتر بڕێڤەچوونا بانگەشەیا هەلبژارتنان».
گوت ژی» ل هەلبژارتنێن بۆری ب هزاران سكالا هاتبوونە تۆماركرن ل رۆژێن بڕێڤەچوونا بانگەشەیا هەلبژارتنان، بەرۆڤاژی ڤێجارێ سكالا گەلەك كێم بووینە و شێوازەكێ مەدەنی ب بانگەشەیا هەلبژارتنان ڤە یێ دیارە».
ل دۆر پەیاما سەرۆك بارزانی ژی، هندرێن محەمەد سالح گوت» هەر پەیامەك ب ئاراستەیێ بانگەشەیەكا ئارام بهێتە بەلاڤكرن كارەكێ باشە و كاریگەریێن خوە هەنە، بەلێ پەیاما سەرۆك بارزانی كاریگەرییەكا مەزن هەبوو ل دۆر بڕێڤەچوونا بانگەشەیا ئارام، ب تایبەتی سەرۆك بارزانی راگەهاند بەرسڤا تشتێن نەشرین نەدەن، هەتا پەیاما سەرۆك بارزانی كاریگەری ل سەر ئالیێن دی ژی هەبوویە كو ئەوژی شێوازێ خوە یێ بانگەشەیا هەلبژارتنان ب گوهۆڕن و پێگیربن ب رێنمایێن بانگەشەیا هەلبژارتنان، ئەز پێشبینیێ دكەم ل ڤان چەند رۆژێن مای ژ بانگەشەیا هەلبژارتنان ئەوژی بێ ئاستەنگ بڕێڤەبچیت و بانگەشەیا ئەڤسالە ناهێتە هەڤبەركرن ل گەل هەلبژارتنێن بۆری».

ژێدەرەكێ رۆژنامەڤانی ل پارتی دیموكراتی كوردستان، بەرسڤا ئاخڤتنێن قەیس خەزعەلی دا و راگەهاند: پێدڤییە باش د وێ چەندێ بگەهی كو پارتی دیموكراتی كوردستان ئێك سەركردایەتی و ئێك بۆچوون و ئێك بڕیار هەیە و باشترە دلێ خوە ب وان جۆرە خەونان خوەش نەكەن كو فرەبڕیاری دناڤ پارتی دا هەیە.
دەقێ بەرسڤا ئاخڤتنێن قەیس خەزعەلی:
قەیس خەزعەلی د دیدارەكا رۆژنامەڤانیدا ل گەل كەنالێ خوە دا ناڤێ جەنابێ سەرۆك بارزانی و بەرێزان كاك نێچیرڤان و كاك مەسروری ئینان و ب مەرەمێن خوە لێكدان بۆ پێشهات و هەڤكێشەیێن سیاسی كر، ب دیتنا مە ئەو ئاخڤتنە سەردابرنا رایا گشتییە و جەواشەكارییە. پێدڤییە باش د وێ چەندێ بگەهیت كو پارتی دیموكراتی كوردستان ئێك سەركردایەتی وئێك بۆچوون و ئێك بڕیار هەیە و باشترە دلێ خوە ب وان جۆرە خەونان خوەش نەكەن كو فرەبڕیاری د ناڤ پارتی دا هەیە.
هەروەسا هەموو ئالییەك وێ راستیێ باش دزانن كو پشتی ژناڤچوونا رژێمێ كەسێ هندی سەرۆك بارزانی بزاڤ بۆ دروستكرنا ئیراقا نوو نەكریە. سەرۆك بارزانی زێدەتر ژ هەموو كەسەكێ بزاڤ بۆ وێ چەندێ كریە ئیراقەكا فیدرالی ل سەر بنەمایێ دەستووری بهێتە دامەزراندن كو تێدا هەموو ئالی پێگیری دستووری بن و بنەمایێن هەڤپشكی و هەڤسەنگی و لهەڤكرنێ ل بەرچاڤ وەرگرن.
باش ژی بزانن نە ئەم و نە خەلكێ ئیراقێ ل گەل وێ ئیراقێ نینین كو دەستوور بهێتە بنپێكرن و بنەمایێن هەڤپشكی و هەڤسەنگی و لهەڤكرن بهێنە پشت گوه هاڤێتن و مافیا حوكمی ل وەلاتی بكەن.

دیدار، هۆشەنگ تاجر:

سیاسەتمەدارەکێ رۆژئاڤایێ کوردستانێ دیار دکەت، دڤێت د ڤان هەلبژارتنان دا کورد سەرکەفتنەکا مەزن بدەستڤە بینن و بشێن ماددێ ١٤٠، پرسێن ئابووری و پرسێن دی ل گەل بەغدا چارەسەر بکەن و لیستا پارتی دشێت ڤان پرسان چارەسەر بکەت.

فەیسەل ئیسماعیل سیاسەتمەدارێ رۆژئاڤایێ کوردستانێ د دیدارەکا تایبەت دا ل گەل رۆژنامەیا ئەڤرۆ دیار کر، ئەڤ هەلبژارتنە ژ بۆ کوردان گەلەک گرنگن، چونکی سیستەمێ فیدرالی ل ئیراقێ نەهاتیە بجهئینان و زۆرداری ل سەر کوردان هەیە، هەتا نها ژی ماددەیێ ١٤٠ نەهاتیە چارەسەرکرن و ئیراقێ دڤێت رۆژ ب رۆژێ پێگەهێ هەرێما کوردستانێ لاواز بکەت، ژ بەر ڤێ یەکێ ژی بەری هەر تشتەکێ ئەز هیڤیدارم دەنگدەرێن هەرێما کوردستانێ پشکداریەکا باش د ڤان هەلبژارتنان دا بکەن، چونکی گرنگە پێگەهێ کوردان بهێز بیت و کورد ب هێزەکا مەزن بچنە بەغدا و گۆت: (پشتەڤانیێ ل لیستا شەهیدان، لیستا بارزانیێ نەمر، لیستا ئاڤەدانی و پێشکەفتنا کوردستانێ دکەم، کو ئەو ژی لیستا ٢٧٥ یا پارتی دیموکراتی کوردستانە، هیڤیدارم لیستا ٢٧٥ د ڤان هەلبژارتنان دا سەرکەفتنەکا مەزن بدەستڤە بینیت دا پێگەهێ کوردان ل بەغدا بهێز بیت، هیڤیدارم دەنگدەرێن کوردستانێ ژی پشتەڤانیەکا مەزن بدەنە لیستا شەهیدان و لیستا بارزانیێ نەمر).
سیاسەتمەدارێ رۆژئاڤایێ کوردستانێ د پشکەکا دی یا ئاخڤتنا خوە دا ئەو یەک ژی دیار کر، پارتی دیموکراتی کوردستان هێزا مەزن یا گەلێ کوردستانێ یە، پارتی ل هەر جهەکێ بیت خزمەتا دۆزا رەوا یا گەلێ کوردستانێ کریە، ژ بەر ڤێ یەکێ ژی ئەم دبێژین هەکە پارتی ڤێجارێ ب هێزەکا مەزن بچیتە بەغدا دێ گەلەک پرسێن هەی ل گەل بەغدا هێنە چارەسەرکرن و گۆت: (ئەز هیڤیدارم پشتی هەلبژارتنان کورد بشێن بەرەیەکێ ئاڤا بکەن، براستی ژی گەلەک یا گرنگە کورد ل بەغدا ئێک هەلوەست بن، پارتی دیموکراتی کوردستان هەتا نها گەلەک بزاڤ کرینە کو کورد ئێک هەلوەست بن و هیڤیدارم پشتی هەلبژارتنان هەموو هێزێن کوردی پشتەڤانیێ ل سیاسەتا نەتەوەیی یا پارتی بکەن و پێکڤە بەرەیەکێ کوردستانی ل بەغدا دروست بکەن).
ناڤهاتی ئەو یەک ژی دیار کر، ئەڤرۆکە کاروانێ ئاڤەدانیێ و پێشکەفتنێ ب پێشەنگیا پارتی یا بەردەوامە و پارتی دیموکراتی کوردستان سەلماندیە کو ئارمانجا وێ پێشکەفتنا کوردستانێ یە، ژ بەر ڤێ یەکێ ژی سەرکەفتنا پارتی د ناڤان هەلبژارتنان دا دهێتە رامانا ئاڤەدانیەکا زێدەتر و پێشکەفتنەکا مەزنتر بۆ کوردستانێ، ژ بەر ڤێ یەکێ ژی ئەم دبێژین دەنگدان ب لیستا سەرۆک بارزانی دەنگدانە ب پێشکەفتنا کوردستانێ و گۆت: (پارتی د هەموو قووناغێن سەخت و دژوار دا ل گەل خەلکێ کوردستانێ بوویە و بەرگری ل کوردستانێ و دۆزا رەوا یا گەلێ کوردستانێ کریە، ژ بەر ڤێ یەکێ ژی سەرکەفتنا لیستا پارتی دیموکراتی کوردستان دێ بیتە ئەگەرێ پێشکەفتنێن مەزنتر و باشتر بۆ کوردستانێ، چونکی پارتی سەلماندیە تنێ هێزە شیایە هەتا نها خزمەتێن باش پێشکێشی کوردستانێ بکەت).
سیاسەتمەدارێ رۆژئاڤایێ کوردستانێ د دووماهیا ئاخڤتنا خوە دا ئەو یەک ژی دیار کر، هیڤیا من ئەڤە گەلێ مە ل هەرێما کوردستانێ ل رۆژا ١١/١١ ب جۆشەکا مەزن بچنە سەر سندوقێن دەنگدانێ و بێگومان مە دڤێت دەنگێ خوە بدەنە لیستا ٢٧٥ یا پارتی دیموکراتی کوردستان، ب سەرکەفتنا پارتی دێ کوردستان هەر یا ئارام و ئاڤەدان بیت و گۆت: (هیڤیا سەرکەفتنەکا مەزن بۆ لیستا ٢٧٥ یا پارتی دیموکراتی کوردستان دخوازم و پشتراستم سەرکەفتنا لیستا پارتی سەرکەفتنا گەلێ کوردستانێ یە).

د بەردەوامییا سەرەدانا خوە دا بۆ دهۆكێ ، ل سەرۆك مەسعود بارزانی، ل گەل چەندین وەلاتی تەخ و چینێن جودا جودا ل دهۆكێ و زاخۆ كۆمبوو.
د كۆمبوونا ل گەل پشكەك ژ تەخ و چینێن نەینەوا و شنگالێ ل باژێرێ دهۆكێ، سەرۆك بارزانی هیڤی خواست ئەڤ هەلبژارتنە دەرئەنجامەكێ جودا هەمبەركرن ل گەل هەلبژارتنێن بۆری هەبن و هاریكار بن بۆ وێ چەندێ پڕۆسەیا سیاسی بزڤریتە سەر راستەڕێیا خوە و ڤەگەڕیت بۆ پێگیریبوون ب دەستووری و پێگیریبوون ب هەرسێ بنەمایێ هەڤپشكی، هەڤسەنگی و لهەڤكرنێ.
سەبارەت دەستوورێ ئیراقێ ، سەرۆك بارزانی دوپاتكر» دەستوور ماف و ئەرك یێن دیاركرین و بەهرا وێ چەندێ تێدایە كو پشتەڤانییا ڤی دەستووری بكەین و شانازیێ پێ بكەین».
ل دووماهیێ سەرۆك بارزانی راگەهاند ژی» دەنگی بدەنە وی ئالی و وی كەسی یێ خزمەتا هەوە دكەت و وەسا دبینن كو دشێت بەرگریێ ژ مافێن هەوە بكەت، ئەڤە بۆ هەوە یا هێلایە و هەوە ئازادییا تمام هەیە».
ژ بلی خودای ئەم خوە بۆ كەسێ ناچەمینین، تنێ بۆ دایكێن شەهیدان دەه جاران خوە دچەمینین
هەر د بەردەوامییا كۆمبوونێن خوە دا ل دهۆكێ، سەرۆك مەسعود بارزانی ل گەل هەژمارەكا مەزن یا دایك و خێزانێن شەهیدان و پێشمەرگە و ئافرەتێن خەباتكەر كۆمبوو و راگەهاند» ژ بلی خودای ئەم خوە بۆ كەسێ ناچەمینین، تنێ بۆ دایكێن شەهیدان دەه جاران خوە دچەمینین».
سەرۆك بارزانی دیاركر ژی، پیلان و دوژمناتییا نوكە ل گەل مللەتێ مە گەلەك مەترسیدارتر و مەزنترە ژ یێن بۆری، نوكە ب شێوەیەكێ بەرنامە بۆ داڕیشتی دخوازن خەلكێ مە و گەنجێ مە تووشی مادەیێن هۆشبەر ببیت، ئەڤە مەزنترین مەترسییە، دخوازن خەلكێ مە تووشی بێئومێدیێ بكەن و هیچ سۆز و ژێیاتی بۆ نیشتمانی نەمینیت لەوما ب بەرهەڤبوویان راگەهاند» ئەركێ مەزن ل سەر ملێ هەوەیە هەر ئافرەتەك زارۆكێ خوە د مالا خوە دا تێبگەهینیت كو چ پیلانەكا مەترسیدار ل سەر مە هەیە، هەكە گەنجێ مە باوەری ب خوە نەما، مە هیچ دۆزەك نامینیت».
هەروەسا رۆهنكر» مووچەیێ خەلكێ كوردستانێ پرسەكا سیاسییە و وەك كارتەكێ بكارئینا بۆ وێ چەندێ هەرێما كوردستانێ ژناڤببەن، ئەڤە ژی ب هاریكارییا خەلكەكێ ناڤخوەیی بوو كو رێ بۆ بەغدا خوەشكر و ئەڤەژی ژ ئەنفالێ و كیمیابارانێ كێمتر نینە».
هەكە دەستوور هاتبا بجهئینان ئەو كێشەیێن هەین نەدهاتنە روودان
هەر ل دهۆكێ سەرۆك بارزانی ل گەل كەسایەتی و ریهسپیێن دهۆكێ و سێمێلێ كۆمبوو و تێدا راگەهاند» پارتی ل هەموو هەلبژارتنان هەر یا ئێكێ بوو و بابەتێ هەلبژارتنان و دەنگێ مللەتی ل دەف پارتی بابەتەكێ مەبدەئییە و پارتی باوەری ب دەنگێ خەلكی هەیە».
گوت ژی» ئیراقا نوو ل سەر بنەمایێن هەڤپشكی، هەڤسەنگی و لهەڤكرنێ هاتیە دامەزراندن، بەلێ ئەڤ بنەمایە نەهاتنە بجهئینان و دەستوور هاتە بنپێكرن و هەكە دەستوور هاتبا بجهئینان ئەو كێشەیێن هەین نەدهاتنە روودان، لەوما نابیت ئیراق ب دەستێ هیچ ئالییەكی دا بیت ب ناڤێ رۆرینەیێ».
ئەوا بۆ زاخۆ هاتیە كرن جهێ دلخوەشیێیە، بەلێ دڤێت هێشتا پتر خزمەت بهێتە كرن
ژ ئالییەكێ دی ڤە سەرۆك مەسعود بارزانی ل باژێرێ زاخۆ، ل گەل تەخ و چین و كەسایەتیێن ئیدارەیا سەربخوەیا زاخۆ كۆمبوو، د پەیڤەكێدا دیاركر» زاخۆ دل و رۆحا مەیە وڤی باژێرێ قوربانییەكا مەزن بۆ ئازادییا كوردستانێ و ل شەڕێ دژی تیرۆرستێن داعشێ دایە، لەوما خوە ب قەردارێن وی دزانین و پێدڤییە ل سەر مە خزمەتا زاخۆ و هەموو كوردستانێ بێی جوداهی بكەین».
سەرۆك بارزانی ئاماژەكر ژی» ئەوا بۆ زاخۆ هاتیە كرن جهێ دلخوەشیێیە، بەلێ دڤێت هێشتا پتر خزمەت بهێتە كرن، ئەو گوهۆڕینا ب سەر زاخۆ دا هاتی هەمبەركرن ب بەری دو سالان گەلەك ب جوانی دهێتە دیتن».
هەر ل زاخۆ سەرۆك بارزانی سەرەدانا بازارێ كەڤن یێ زاخۆ و قشلا زاخۆ یا كەڤن و كۆرنیشێ زاخۆ كر و د ڤێ سەرەدانێدا سەرۆك بارزانی خوەشحالییا خوە ب جوانی و ئاڤەدانییا زاخۆ دەربڕی و ئاماژەكر» خەلكێ زاخۆ هەژی ڤێ خزمەتێیە ئەوا بۆ هاتیە كرن» پاشی سەرۆك بارزانی سەرەدانا گوندێ سپی كر و دیمەنێن زاخۆ ژ بلند دیتن و هەروەسا دیدار ل گەل چەندین وەلاتییان كر كو سەرەدانا زاخۆ كری و وێنە ل گەل هندەك وەلاتییان ژی گرتن.
هەر ل زاخۆ سەرۆك مەسعود بارزانی پشكداری د بەهییا هەڤژینا فەرماندە و پێشمەرگەیێ هەردو شۆڕشێین ئیلۆن و گولانێ شەهید حەمید حەفزوللا كر . سەرۆك بارزانی هەڤخەمییا خوە بۆ ژیان ژ دەستدانا سەبریا مەعرووف دەربڕی.
هەروەسا سەرۆك مەسعود بارزانی سەرەدانا سەنگەرێن هێزا پێشمەرگەیێ كوردستانێ كر و د وێ سەرەدانێدا سەرۆك بارزانی سەرەرای ژ نێزیك ئاگەهداربوون ل رەوشا هێزێن پێشمەرگەی، ل گەل هەژمارەكا پلەدار و فەرماندەیێن هێزا پێشمەرگەیێ كوردستانێ كۆمبوو و ل دۆر رەوشا سیاسی بەرچاڤرۆهنییەكا پێدڤی پێشكێشكر.

دوهی شەمبیێ 1/11/2025، د بەیاننامەیەكێدا بارەگەهێ بارزانی راگەهاند، ل باژێرێ دهۆكێ سەرۆك مەسعود بارزانی ل گەل هەژمارەكا زانایێن ئایینی یێن پارێزگەها دهۆكێ كۆمبوو و تێدا پەیڤەك پێشكێشكر.
ل دۆر هەلبژارتنان سەرۆك بارزانی راگەهاند» هەلبژارتن پرۆسەیەكا گەلەك گرنگە و تێدا خەلك بڕیارێ ل چارەنڤیسێ خوە ددەت و ئەم ژی دخوازین مللەت یێ ئازاد بیت و ب ئازادی بڕیارا خوە بدەت، هەرچەندە ل دەف پارتی هەلبژارتن بۆ ب دەستڤەئینانا پۆستان نینە، بەلكو دخوازین هێز و دەنگێن پارتی نیشا هەموو ئالییەكی بدەین و ب وان هێز و دەنگان ژی بەرگریێ ژ مافێن خەلكێ كوردستانێ و ئیراقێ بكەین».
د پشكەكا پەیڤا خوە دا سەرۆك بارزانی ئاماژە ب وێ چەندێ كر» پشتی 2003 مە بزاڤكر پێكڤە ئیراقەكا نوو ئاڤابكەین، دەستوورێ هەردەم یێ ئیراقێ هاتە نڤیسین و چارەسەری بۆ پترییا كێشەیان تێدا هاتە دانان، دیتنا نە ئەوبوو هەمكە ئەڤ دەستوورە بهێتە بجهئینان دێ ئیراق ژ پترییا كێشەیان رزگار بیت، بەلێ مخابن ئەوژی نەهاتە كرن. نوكە ژی هیڤییا مە ئەوە پشتی ڤان هەلبژارتنان، رێككەفتنێ ل گەل هندەك ئالیێن دلسۆز بكەین و ئیراق ژ ڤێ دەردەسەریێ رزگار بیت. مە داخواز ژی ژ بەربژارێن خوە كریە كو دڤێت نوونەرێن هەموو ئیراقێ بن بێی جوداهی».
سەرۆك بارزانی دیاركر ژی» پێدڤییە پشتبەستنێ ب خوە بكەین و زێدەتر وارێن چاندنێ و گەشتوگوزاری و پیشەسازیێ پێشڤەببەین».
هەروەسا سەرۆك بارزانی داخواز ژ زانایێن ئایینی كر كو ژ ئالیێ خوەڤە ب جدی، خەلكی ژ مەترسیێن مادەیێن بێهۆشكەر هشیار بكەن كو ژ روویێ ئایینی ڤە د رێپێدای نینن و دەردەكێ جڤاكیێ گرانە.

مەسرور بارزانی، سەرۆكێ حوكمەتا هەرێما كوردستانێ، دارا ئێكێ یا پڕۆژەیێ كەمەرا كەسك ل باژێرێ هەولێرێ چاند.
د پەیڤەكێدا كو ل رێوڕەسمێ پێشكێشكری، سەرۆكێ حوكمەتا هەرێمێ ئاماژە ب گرنگییا پڕۆژەی بۆ پاقژكرنا هەولێرێ كر و هۆشداری ژی دا، ژ ئەگەرێ گوهۆڕینا سەقای و ب بیابانبوونێ، ئەگەر هەیە خەلك نەچاری مشەختبوونێ بن كو ئەڤ مشەختبوونە ژی تنێ ل هەرێما كوردستانێ راناوەستیت، بەلكو خەلك دێ بەر ب وەلاتێن ئۆرۆپا ژی مشەخت بن، لەوما داخواز ژ وان وەلاتان كر، هاریكارییا هەرێما كوردستانێ بكەن د سەرئێخستنا پڕۆژەیێن وێ تاكو رێ ل بیابانبوونێ بهێتە گرتن و كاریگەرییا گوهۆڕینێن سەقای بهێنە كێمكرن.
هەڤدەم سەرۆكێ حوكمەتا هەرێمێ ئاماژە ب وێ چەندێ ژی كر، ئەڤ پڕۆژەیە پشكەكە ژ بەرنامەیێن حوكمەتا هەرێما كوردستانێ بۆ هەمەجۆركرنا ژێدەرێن داهاتێ هەرێما كوردستانێ.

سه‌رۆك مه‌سعود بارزانی دوهى رۆژا شه‌مبی ل دهۆكێ، ل گه‌ل پێشمه‌رگه‌یێن ده‌زگه‌هێن ئيلۆن و گولان و زیندانیێن سیاسی یێن سنۆرێ پارێزگه‌ها دهۆكێ كۆمبوو.
سه‌رۆك بارزانی گۆتاره‌ك پێشكێشی ئاماده‌بوویان كر و د ده‌ستپێكێ دا سوپاسیا خۆڕاگری و خه‌بات و ماندووبوونا وان د شۆڕه‌ش و به‌رخودان و زیندانان دا كر و گۆت: «ئه‌و ئازادی و ده‌ستكه‌فتێن نها ژ فه‌زلا خودێ و خوینا شه‌هیدان و رۆندكێن دایكێن شه‌هیدان و ره‌نج و ماندووبوونا هه‌وه‌نه‌، له‌ورا ئه‌ز ده‌مێ ل گه‌ل هه‌وه‌ دروونم، هزر و بیرێن من د ئارامن»‌.
سه‌رۆك بارزانی كورتیه‌ك ل دۆر هه‌لبژارتنێن ده‌ربازبووی یێن هه‌رێما كوردستانێ و هه‌لبژارتنێن ئیراقێ و قۆناغێن وان هه‌لبژارتنان پێشكێش كر. هه‌روه‌سا به‌حسێ نڤیسینا دستوورێ ئیراقێ و پابه‌ند نه‌بوونا ب د‌ستووری ژ لایێ به‌غدا ڤه‌ و سه‌رهلدانا كێشه‌يان كر ب تایبه‌تی ژی د ناڤبه‌را هه‌ولێر و به‌غدا. پوخته‌یه‌ك ژی ل دۆر دیرۆكا زولم و سته‌م و جینۆسایدێ به‌رامبه‌ر خه‌لكێ كوردستانێ بۆ ئاماده‌بوویان به‌حس كر و گۆت: «ب هه‌موو شێوه‌یه‌كی وه‌لاتێ مه‌ خراب كر و مه‌ ژی د ڤان چه‌ند سالێن ده‌ربازبووی دا هه‌وله‌كا زۆر دا بۆ ئاڤاكرن و پێشخستنا كوردستانێ و ڤێ هه‌ولێ ژبلى وێ چه‌ندێ كو ئاسته‌نگێن زۆر ل به‌رسينگێ مه‌ هاتنه‌ دروستكرن، به‌لێ ل سه‌ر كاركرنێ بۆ خزمه‌ت و ئاڤاكرنا كوردستانێ هه‌ر د به‌رده‌وام بووین و دێ به‌رده‌وام ژی بین، نها ژی ئاسته‌نگ د زۆرن و پلان ژی هه‌نه‌ كو مه‌ راگرن، به‌لێ پشته‌ڤانى ب خودێ و ب مله‌تێ خۆ دێ هه‌ر به‌رده‌وام بین.
سه‌رۆك بارزانی بۆ ئاماده‌بوویان راگه‌هاند كو وه‌كو چاوا د ده‌ربازبووی دا ل سه‌نگه‌ران شه‌ڕه‌كێ قاره‌مانانه‌ دكر، نها ژی شه‌ڕه‌كێ مه‌زن ل ئارایێ یه‌ كو هه‌ول دده‌ن‌ و كوردستانێ ب پلانێن جۆراوجۆر ژناڤ ببه‌ن و بێهیڤی بكه‌ن، ب تایبه‌تی ژی ب رێیا به‌لاڤكرنا مادده‌یێن هۆشبه‌ر، د هه‌لبژارتنان ژی دا دڤێت ب هه‌مان رۆحیه‌تا به‌رخودانا سه‌نگه‌ری كار بۆ سه‌ركه‌فتن و نیشادانا سه‌نگا پارتی بكه‌ن.
هه‌روه‌سا سه‌رۆك بارزانی ته‌كست ل وێ چه‌ندێ كر كو دڤێت ئه‌م ب خۆ هه‌بین و چاڤه‌رێی كه‌س نه‌بین، هه‌ر بۆ نموونه‌: چه‌ندین جاران كوردستان كه‌فته‌ به‌ر هێرش و په‌لامارێن زۆر مه‌ترسیدار، ب تنێ پێشمه‌رگه‌ی پارێزگاری ژ ئاخ و مله‌تی كر.
ل دۆر ره‌وشا ناڤخۆ، سه‌رۆك بارزانی گۆت: «پرۆژه‌یێن زۆر مه‌زن هاتینه‌ ئه‌نجامدان و پرۆژه‌یێن مه‌زنتر ژی د به‌رنامه‌ی دا هه‌نه‌ بۆ وێ چه‌ندێ كو مله‌تێ مه‌ پشتبه‌ستنێ ل سه‌ر خۆ بكه‌ت، د ڤان چه‌ند سالێن دووماهیێ ژی دا ب كريار‌ ئه‌و چه‌نده‌ هاته‌ سه‌لماندن كو پتريا پرۆژه‌یێن مه‌ ب ده‌ست و په‌نجه‌یێن ناڤخۆیی ب شێوه‌یه‌كی و ئاسته‌كێ زۆر بلند هاتینه‌ ئه‌نجامدان له‌ورا ئه‌م پشتا خۆ ب مله‌تێ خۆ و پێشمه‌رگه‌ی گه‌رم دكه‌ین و د ژێر هیچ فشاره‌كێ دا سازشێ ل سه‌ر مافێن خۆ و مه‌بده‌ئێن خۆ ناكه‌ین».