سەربەست لەزگین، بەرپرسێ مەكتەبا رێكخستنا پارتی ل پارێزگەها دهۆكێ پەیامەك ئاراستەی خەلكێ پارێزگەها دهۆكێ و ئیدارەیا سەربخوەیا زاخۆ ئەڤە دەقێ وێیە:
خەلكێ شەرەفمەندێ پارێزگەها دهۆكێ و ئیدارەیا سەربخوە یا زاخۆ..
دیسان ل هەرێما كوردستانێ ئەم د پێشوازییا وەرزەكێ نوو یێ ئازادیێ و دیموكراسییەتێ داینە ژبۆ موكمكرنا شەرعییەتا كوردستانێ كو ئارمانجا هەرا پیرۆز یا پارتییە ئەم بەر ب هەلبژارتنێن خولا شەشێ یا پەرلەمانێ كوردستانێ ڤە دچین.
هەر ژ دەستپێكا سەرهلدانا گەلێ مە ل بهارا سالا 1991ێ دیموكراسییا كوردستانێ ب ئەندازیارییا سەرۆك و رێبەر مەسعود بارزانی پڕۆژەیێ سەرەكیێ پارتی دیموكراتی كوردستان بوویە، ب پشتەڤانییا خودایێ مەزن و خەلكێ كوردستانێ و دیرۆكا پڕ سەروەرییا پارتی و سەركردایەتییا حەكیمانەیا سەرۆك بارزانی هەتا ئەڤرۆ پارتی ل سەر ئاستێ كوردستانێ و گەلەك جاران ژی ل سەر ئیراقێ هێزا سیاسییا ئێكێ بوویە و هەر ب ڤێ پشتەڤانیێ دێ مینیت هێزا ئێكێ چونكە پارتی ب كریار یا سەلماندی كو خودانا راستەقینەیا ئاخ و خەلكێ ڤی وەلاتییە.
خۆڕاگرێن دەڤەرا بەهدینان..
دەڤەرا بەهدینان كا چاوان لاندكا شۆڕەشێن ئیلۆن و گۆلانێ و مەیدانا ب دەهان داستان و قەهرەمانییا بوویە، هەروەسا كەلها زەر و بانكا دەنگ و جەماوەرێ پارتییە، دوهی خەلكێ ڤێ دەڤەرێ ب خوینا خوە، ئەڤرۆ ژی ب دەنگ و پشتەڤانییا خوە بەرگریێ ژ دەستكەفت و سەركەفتنێن مللەتێ مە دكەت، وەكو چیایەكێ خوەرست و نەلڤ ل بەر سینگێ هەموو نەیار و دوژمنێن سەروەریێ و شەرعییەتا كوردستانێ راوەستییاینە و د بەرهەڤ بووینە بۆ پێشكێشكرنا هەموو فیداكارییەكێ.
دەنگدەرێ هێژا .. رێڤینگێن رێكا ئازادیێ و دیموكراسیێ
لیستا 190 یا پارتی دیموكراتی كوردستان لیستا خوینا شەهیدان و خوە نەچەماندن و بەرگریێیە، لیستا ئارامی و ئاڤەدانی و پێكڤەیی و خۆڕاگریێیە. پشكدارییا هەوە د هەلبژارتناندا و دەنگدانا هەوە بۆ لیستا 190 و بەربژارێن پارتی مسۆگەركرنا ئاسایش و ئاڤەدانی و پێشەڕۆژەكا گەشە بۆ نڤشێ نوو، لیستا 190 یا پارتی سەر دەستێ پێشمەرگێ كوردستانێ و مالباتێن شەهیدان هاتیە راگرتن، ب زەند و باسكێن قوتابی و لاو و ئافرەت و جوتیار و پالانڤە هاتیە ئاڤاكرن، زانا و رەوشەنبیر و نڤیسەر و ئەكادیمی هەموو دەمان دناڤ پارتیدا رۆلەكێ كاریگەر هەبوویە، لیستا 190 لیستا مافخوازایە بێی جوداهییا ئۆل و نەتەوە و رەگەز بەرگری كریە ب پشتەڤانییا جەماوەرێ خوە یێ وەفادار و دلسۆز و دێ هەر بەردەوام بیت، ئەم د پشتڕاستین ژ پشتەڤانییا دهۆكا داسنییا و زاخۆكا پرا دەلال و دلێ سەرۆكی و سێمێلیێن خوین گەرم و ئاكرەییێن كەلها ئاگری و پایتەختێ نەورۆزێ و ئامێدییا كەلها زانینێ و شێخانا پێكڤەژیانێ و باتیفیێن چاڤنەترس و جوتیار و رێنجبەرێن بەردەرەشێ، ئەم هەموو پێكڤە ل 20 ئۆكتۆبەرا 2024 دێ مزگینییا سەركەفتنا لیستا 190 یا پارتی دەینە سەرۆكێ خوە و دێ داستانەكا دی یا دیموكراسییەت و شارستانییەتێ تۆماركەین.

جەماوەرێ خوەشتڤی، دەنگدەرێ بەرێز:
پارتیا دیموكراتا كوردستانێ، وەكی هەردەم ب راستگۆیی و سەربلندی بەر ب گەلێ كوردستانێڤە دچیت و پەیاما خۆ، كو پەیاما دیرۆكێ و نهۆ و پاشەڕۆژێ یە رادگەهینیت. پەیامەكا پڕە ژ شانازیێن دیرۆكی، یا پڕە ژ دەستكەفتێن نهۆ و، هەروەسا یا پڕە ژ هیڤیێن مەزن بۆ پاشەڕۆژێ.
گەلێ كوردستانێ ب هەمی پێكهاتەیێن نەتەوەیی و ئۆلی و سیاسی و كولتۆری ڤە، پارتیا دیموكراتا كوردستانێ، باش دناسیت، و دزانیت، كو د رۆژێن بەرگریێ دا وەك پێشمەرگە گیانێ خۆ بەخشییە و قوربانی داینە و بەرگرییەكا سەرفەراز كرییە، د رۆژێن ئاشتی و پێكڤەژیانێ دا، دەستێ تەبایی و ئێكڕێزی و پێكڤەژیانێ بوویە، د رۆژێن كار و ئاڤاكرن و ئاڤەدانكرنێ دا، نموونە و بەرهەمێن وێ هند دیارن، لبەر چاڤێن هەمیانە و پێدڤی ب پەسن و پێناسەكرنێ نینن، ئێدی ئەڤە (پارتی)یە، حزبا راست و رەوان، سەربلند و سەرفراز و بەرهەمدارا هەوەیە، لەوما داخواز ژ هەوە دكەین، د رۆژێن هەوا هەلبژارتنێ دا، جوانترین نموونەیا بانگەشەیا هەلبژارتنێ پێشكێش بكەن و ل رۆژا چارەنڤیسساز یا دەنگدانێ، كو حەفتەمین سالڤەگەڕا پڕ شانازی یا داستانا پردێ و سحێلایە، ب وژدانا خۆ یا زیندی، ب سەربلندی، دەنگێ خۆ بدەنە لیستا خۆ، لیستا (190) یا پارتیا دیموكراتا كوردستانێ، ئەو لیستا كو ب درووشمێ (ئارامی و ئاڤەدانی، پێكڤەیی و خۆڕاگری) دەربڕینێ ژ نێڕینێن ڕۆهن یێن پارتی دكەت، ئەو پارتا كو ب سەركردایەتیا (سەرۆك بارزانی)، نوونەراتیا دۆزا مەزن دكەت، نوونەراتیا بەرگریێ ژ مافێن نیشتیمانی و نەتەوەیی، هەروەسا نوونەراتیا شانازی و دەستكەفتان و، پاشەڕۆژەكا گەشتر دكەت.
دەنگدەرێ هێژایێ كوردستانێ
د ناڤبەرا ڤان هەر دو هەلبژارتنێن پەرلەمانێ كوردستانێ دا، هەوە هەمیان دیت، كو پارتی د سەنگەر و چەپەرێن ملەتی دا گازی راستیێ دكر، هەوە ب چاڤێن خۆ دیت، پارتی ب كریار شەڕ بۆ ژین و ژیار و مووچە و بودجەیا هەرێما كوردستانێ دكر. هەوە دیت كو پارتی بوو قەوارەیا دەستووری و دیموكراسی یا هەرێما كوردستانێ پاراستی، و پارتی بوو دەنگێ كوردستانیان گەهاندیە هەمی جیهانێ. بەلێ ئەو (پارتیا دیموكراتا كوردستانێ) بوو ب پشتەڤانیا هەوە یێن بەڕێز، (خۆنەچەماندن) كریە ویردەیا سەر ئەزمانێ مەزن و بچووكان. ئارامی و ئاڤەدانی، بهەڤڕایی و خۆڕاگری، كریە بەرهەمێ هەمیان، نهۆ ژی دا هەمی پێكڤە، بێدەرا پڕ سەروەری و دەستكەفتیێن خوە زێدەتر لێ بكەین و پەڕلەمانەكێ كارا و حوكمڕانیەكا نووژەن و سەرانسەری بۆ خوە دانین. ئەرێ داكو پارتا هەوە (پارتیا دیموكراتا كوردستانێ)، هەر د چەپەرێ پێشین یێ بەرگریكرنێ دا بیت ژ ژیان و دەستكەفتیان و چاكسازی و پاشەڕۆژا ملەتی، دەنگی بدەنە پارتیا دیموكراتا كوردستانێ، پارتییا هەمیان، پارتیا رەهـ و ریشالێن كوردینیێ و رێبازا بارزانی و هەمی رەنگان، پارتیا هزرا پاك و هەلوەستانە، یا وێیە كو ل رۆژا دەنگدانێ، ب كەرنەڤالەكا پڕرەنگا دەنگان ڤە، وژدانا خۆ ئارام بكەین و ب پشتەڤانیا خودێ و جەماوەرێ گەلێ خۆ، دەنگی بدەینە لیستا (190) یا پارتیا دیموكراتا كوردستانێ.

مەسرور بارزانی، جێگرێ سەرۆكێ پارتی دیموكراتی كوردستان د چارچۆڤەیێ كۆمبوونەكێدا ل گەل هەژمارەكا كەسایەتیێن باژێرێ هەولێرێ راگەهاند: هەلبژارتن تنێ حوكمڕانییا چار سالێن بهێن دیار ناكەت بەلكو بڕیارەكا چارەنڤیسسازە. هەروەسا گۆت ژی: هەلوەست وەرنەگرتن هەلوەستە و هەكە كەسەك دەنگی نەدەت دێ هندەك كەس ل شوونا وی بڕیارێ دەن.
دیاركر ژی» هەر بڕیارەك د هەلبژارتناندا بهێتە دان دێ كاریگەری ل سەر تاك ب تاكێ وەلاتییان هەبیت، لەوما دڤێت مە گۆتارەكا راشكاوانە و راستگۆیانە هەبیت».
ئاماژە ب وێ چەندێ ژی كر» هەلوەست وەرنەگرتن هەلوەستە و هەكە كەسەك دەنگی نەدەت دێ هندەك كەس ل شوونا وی بڕیارێ دەن».
مەسرور بارزانی رۆهنكر ژی» هەلبژارتن تنێ حوكمڕانییا چار سالێن داهاتی دیار ناكەت، بەلكو بڕیارەكا چارەنڤیسسازە».
دوپاتكر ژی» هەلبژارتن تنێ پێكئینانا حوكمەتێ نینە، بەلكو بۆ مانا قەوارەیێ هەرێما كوردستانێیە».
جێگرێ سەرۆكێ پارتی دیموكراتی كوردستان گۆت ژی» دڤێت چاڤێ مە ل وێ چەندێ بیت كوردستان ببیتە خوەشترین و پێشكەفتیترین وەلات ل سەر ئاستێ جیهانێ، بەلێ دەستێ ناڤخوەیی یێ هەی رێگریێ ل پێشكەفتنێن مە دكەت».

مەكتەبا رێكخستنا پارتی دیموكراتی كوردستان ل پارێزگەها دهۆكێ هەوا پشتەڤانییێ بۆ لیستا 190 یا پارتی ل بن دروشمێ ”ئارامی و ئاڤەدانی ، پێكڤەیی و خۆڕاگری” ڕاگەهاند.
ب بەرهەڤبوونا سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارێزگەها دهوكێ یا پارتی و ئامینا زكری ئەنداما مەكتەبا سیاسی و بەرپرسا دەستەیا چاڤدێری و دووڤچوونێ و هەرسێ هاریكارێن بەرپرسێ مەكتەبا رێكخستنا پارێزگەها دهۆكێ و بەرپرسێن لقێن ( ئێك، هەشت، نەهـ، هەژدە، بیست) و بەربژارێن پارتی دیموكراتی كوردستان بۆ هەلبژارتنێن خولا شەشێ یا پەرلەمانێ كوردستانێ ل سنۆرێ پارێزگەهـا دهۆكێ و ئیدارەیا سەربەخوەیا زاخۆ. مەكتەبا رێكخستنا پارتی ل پارێزگەها دهۆكێ د رێوڕەسمەكیدا هەوا پشتەڤانیێ بۆ لیستا 190 یا پارتی دیموكراتی كوردستان بۆ هەلبژارتنێن خولا شەشێ یا پەرلەمانێ كوردستانێ ل بن دروشمێ “ئارامی و ئاڤەدانی ، پێكڤەیی و خۆڕاگری ” راگەهاند.
د وێ رێوڕەسمێدا بەربژارێن پارتی دیموكراتی كوردستان بۆ هەلبژارتنێن پەرلەمانێ كوردستانێ ل سنورێ پارێزگەها دهوكێ و ئیدارەیا سەربەخوەیا زاخۆ هاتنە دانەنیاسین.
هەر د وێ رێورەسمێدا”سەربەست لەزگین” پەیڤەك پێشكێشكر و راگەهاند لیستا پارتی دیموكراتی كوردستان ل پارێزگەها دهۆكێ و ئیدارەیا سەربەخوەیا زاخۆ پشتگەرمێ ب دەریایەكا خوینا شەهـیدان و روندكێن دایكان و پشتگەرمی ب دیرۆك و خەلك و جەنابێ سەرۆك بارزانی هەوا پشتەڤانیێ بۆ لیستا 190 رادگەهینین».
سەربەست لەزگین، داخاز ژ جەماوەرێ دلسۆز كر كو بەری هەر تشتەكی ژبیرنەكەن كو ئەو خودانێن وێ ئەزموونا راست و دروست یا هەرێما كوردستانێ نە ژ بەر وێ چەندێ راگرتنا ئارامیێ و سەقایێ دیموكراسیێ و ئازادیێ ئەركێ جەماوەرێ پارتییە و پێدڤییە وەكو هەر جار ئەم روویێ شارستانیێ هەرێما كوردستانێ نیشا هەموو جهیانێ بدەین چونكی بەرهەمێ لیستا 190 یە.
بەرپرسێ مەكتەبا رێكخستنا پارێزگەها دهۆكێ یا پارتی دیموكراتی كوردستان داخاز ژ خەلكێ خوشتڤیێ پارێزگەها دهۆكێ و ئیدارەیا سەربەخوەیا زاخۆ كر كو داستانەكا دی یا دیموكراسیەتێ و ئازادیێ تۆمار بكەن و ب زێدەترێن رێژە ل سەر سندۆقێن دەنگدانێ بەرهەڤ ببن و دەنگێ خوە بدەنە لیستا 190.

ئەندامەكێ مەكتەبا سیاسییا پارتی دیموكراتی كوردستان دبێژیت: پارتی دخوازیت دەزگەهسازیێ بكەت بۆ وێ چەندێ حوكمڕانیێ ل هەرێما كوردستانێ ببەتە قۆناغەكا دی كو هەڤشێوەیێ وەلاتێن پێشكەفتی بیت، بەلێ ئالیێن دی ململانێیا لاوەكی دكەن.
هێمن هەورامی، ئەندامێ مەكتەبا سیاسییا پارتی دیموكراتی كوردستان گۆت» پارتی تشتەكی نابێژیت كو بجه نەئینیت و تشتەكی ژی ناكەت كو نەگۆتبیت. پارتی حزبەكە بەرپرسیارانە رەفتارێ دكەت و حزبەكا كو دەربڕینێ ژ ناخێ خەلكێ هەرێما كوردستانێ دكەت».
دیاركر ژی» پارتی حزبەكە بۆ نوونەرایەتیكرنا دۆزا رەوا یا خەلكێ هەرێما كوردستانێ دروست بوویە و دو ئەركێن سەرەكی یێن ل سەر ملێن وێ ئەوژی ئەركێ نەتەوەسازی و ئەركێ دەزگەهسازی».
ئاماژەكر» پارتی ب رێبەرییا سەرۆك بارزانی، داهێنەر و دەستپێشخەرا ئەنجامدانا هەلبژارتنان بوو. پارتی حزبەكە كو بۆ مللەتێ یا دروستبووی و بۆ ئەوی ژی خەباتێ دكەت. پارتی وەكو هندەك ئالیێن دی سۆزەكێ نادەت كو نەشێت بجهبینیت».
ناڤبری دوپاتكر» پارتی، داهێنەرا پڕۆسەیا دیموكراتی و هەلبژارتنایە ل كوردستانێ، هەروەسا دڤێت خەلكێ كوردستانێ بڕیارێ ل سەر ئەوێ چەندێ بدەت ئایا دێ باوەریێ دەتە پارتی یان دێ باوەریێ ب وان ئالییان كەت كو تنێ ئاخڤتنێن گەلەك مەزن دبێژن. جوداهی د ناڤبەرا پارتی و ئالییان ئەوە، كریارێن وێ هەردەم ژ ئاخڤتنێن وێ دزێدەتر بوون» .
هێمن هەورامی پتر گۆت» پارتی وەكو ئالیێن دی شەڕی ب خەلكێ كوردستانێ ناكەت، بەلكو شەڕی ژ پێخەمەت خەلكێ كوردستانێ دكەت».
رۆهنكر ژی» پارتی دخوازیت دەزگەهسازیێ بكەت بۆ وێ چەندێ حوكمڕانیێ ل هەرێما كوردستانێ ببەتە قۆناغەكا دی كو هەڤشێوەیێ وەلاتێن پێشكەفتی بیت، بەلێ ئالیێن دی ململانێیا لاوەكی دكەن».
ل دوماهیێ گۆت» خەلكێ كوردستانێ ب گۆتارێن پۆپۆلیستی ناهێتە سەردابرن، هەروەسا خەلكی ئاشتی و ئارامی و سەقامگیری دڤێت كو ئەڤ بنەمایێن خزمەتكرنێ تنێ ل دەف پارتی یێن هەین».

پارتی دیموكراتی كوردستان ب درووشمێ (ئارامی، ئاڤەدانی، پێڤەیی و خۆراگری) بانگەشە بۆ هەلبژارتنێن پەرلەمانێ كوردستانێ دەستپێكر.
دوهی چارشەمبی 25/9/2024، ب بەرهەڤبوونا سەرۆك مەسعود بارزانی، سەرۆكێ پارتی دیموكراتی كوردستان، نێچیرڤان بارزانی و مەسرور بارزانی، جێگرێن سەرۆكێ پارتی و ب سەدان ئەندام و لایەنگرێن پارتی، ئاهەنگا لیستا 190 یا پارتی ل باژێرێ هەولێرێ دەستپێكر.
د وێ ئاهەنگێدا، پارتی دیموكراتی كوردستان ب شێوەیەكێ فەرمی بەربژارێن خوە بۆ هەلبژارتنێن خولا شەشێ یا پەرلەمانێ كوردستانێ دانەنیاسین.
سەرۆك بارزانی د چارچۆڤەیێ دەستپێكرنا بانگەشەیا لیستا پارتیدا پەیڤەك پێشكێشكر و تێدا راگەهاند» دێ خوە بۆ 20 ئۆكتۆبەرێ بەرهەڤ كەین و سەركەفتنا مەزن ب دەستڤەئینین».
سەرۆك بارزانی گۆت ژی» ئەم دەستێ برایینیێ بۆ هەموو ئالییەكی درێژ دكەین، هەكە ئالییەك ژی هزربكەت ب دژایەتییا پارتی دێ تشت ب دەست كەڤن، ب دیتنا من هەكە بزڤریت بۆ دیرۆكێ و ئیبرەتێ بۆ خوە ژێ وەربگریت، باشترە ژ وێ چەندێ رژد بیت ل سەر وی ئێكێ ب دژایەتییا پارتی دێ تشتەك ب دەست كەڤیت».
سەرۆك بارزانی ئاماژەكر» هندەكا دلێ خوە ب وێ چەندێ خوەشكریە و جار جار مە گوه لێ دبیت دبێژن چەندین بال یێن دناڤ پارتیدا هەین و پارتی چەند لایەنە، پارتی ئێك حزبە و ئێك بڕیارە، پارتی حزبا شەهیدایە، پارتی بەرپرسیارەتییا وی بەرامبەر خوینا شەهیدایە، پارتی وەكو هەر حزبەكێ نینە كو وەكو خوە بیت. پێگیریێن پارتی گەلەك د گرانن، بلا د خەیالا كەسێ دا نەبیت، چونكە گەلەك كەس خەون ب وێ چەندێ ددیت كو پارتی و سەركردایەتیێن د ناڤ پارتیدا جوداهی هەبن یان كەربێ دروست بكەن، ب خودێ خەونێن وان برنە ناڤ قەبران و ئەوێن نوكە ژی هەر دێ بەنە ناڤ قەبران».
هەروەسا گۆت ژی» گەلەك جاران بەرسڤنەدانا خەلكەكێ بێ بەرپرسیار بەرسڤە، بەرسڤنەدان ب خوە بەرسڤە. هەكە پێدڤی ب بەرسڤدانێ ژی هەبیت، دڤێت یا مەدرووس بیت و پرس ب لژنەیا بلند یا هەلبژارتنان بهێتە كرن. ئەوژی ژ بیرا هەوە نەچیت، ئەوێ زمانێ وی یێ درێژ بیت، دەستێ وی یێ كورتە».
سەرۆك بارزانی ئەوژی بەرچاڤكر» دڤێت بزاڤ بهێتە كرن پشتی 20 ئۆكتۆبەرێ ئێك پەرلەمان، ئێك حوكمەت، ئێك هێزا پێشمەرگەی هەبیت و دوماهی ب هەر چ كارێ نەقانوونی بهێتە دان».

دەقێ پەیڤا سەرۆك بارزانی:

د ڤێ رۆژا پیرۆز دا، دخوازم پیرۆزباهیێ ل هەوە و ل هەموو گەلێ كوردستانێ بكەم، ئەو رۆژا كو گەلێ كوردستانێ بڕیار دای نەهێلیت ئیرادەیا وی بشكێت و خوە نەچەماندی. رۆژا 25 ئیلۆنێ، د ڤێ رۆژێدا بانگەشەیا هەلبژارتنێن خولا شەشێ یا پەرلەمانێ دەستپێكر، پیرۆزباهیێ ل بەربژارێن بەرێز دكەم و هیڤییا سەركەفتنێ بۆ دكەم و پشت ب خودایێ مەزن و هەموو و ب هیممەتا هەموو دلسۆزێن كوردستانێ و ب فەرموودەیا بارزانیێ نەمر، هەر كوردەكێ دلسۆز پارتییە. ب هیممەتا پارتییان، دێ خوە بەرهەڤ كەین بۆ رۆژا 20 ئۆكتۆبەرێ و دێ سەركەفتنا مەزن ب دەستڤەئینین.
دڤێت هەوە باوەری ب خوە هەبیت و ب ئومێدەكا بلند و ب باوەرییەكا بلند پێنگاڤان ب هاڤێژن و خوە بەرهەڤ بكەن، دڤێت هەوە زێدەتر باوەری ب سەركەفتنێ هەبیت و نابیت هزر د شكەستنێدا بهێتە كرن. دڤێت هەردەك هەر ئێك ژ هەوە خوە بەرهەڤ بكەت كو دڤێت سەركەڤین و دێ سەركەڤین ژی.
هەڤالینۆ، كەسێ خێر ب مە نەكریە، هەرێما كوردستانێ بەرهەمێ خوینا شەهیدایە، خوینا ئەنفالكریایە، خوینا پێشمەرگێن قەهرەمانە، رەنجا خەلكێ كوردستانێیە. پارتی شەرەفا وێ چەندێ یا ب بەركەتی، خوینەكا زۆر یا دای بۆ ب دەستڤەئینانا ڤێ دەستكەفتا مەزن و هەروەسا بۆ پاراستنا ڤی دەستكەفتێ مەزن.
ئەز ل ڤێرێ ب پێدڤی دزانم سوپاسییا وەلاتیێن كوردستانێ بكەم، بۆ خۆڕاگرییا وان، بۆ پشتەڤانییا وان بەرامبەر وان پیلانێن دەرەكی و ب چاڤساخییا هندەكان ژ ناڤدا كو دخواستن هەرێما كوردستانێ تێك بدەن، هەدارا ئەیوبی هەبوو، خوە راگرت و هەرێما خوە رادەست نەكر، سوپاسییا وان دكەم پیرۆزباهیێ لێ دكەم.
پارتی باوەری ب ئاشتیێیە، باوەری ب دیموكراسیێیە، باوەری ب پێكڤەژیانێیە و ب كریار یا سەلماندی نەكو ب ئاخڤتنێ. مەبەستا مە و خواستا مە خەلكێ كوردستانێ بەختەوەر بیت و د ژیانەكا خوەشدا بیت، هیڤییا مە خوەشگوزەرانییا خەلكێ كوردستانێیە.
داخواز دكەم د ڤان هەلبژارتناندا گەلەك ل سەرخوە بن، دوور ژ توندوتیژیێ، دوور ژ كارئینانا زمانێ زڤر، هەوە رانەكێشن بۆ شەڕەكێ لابەلا، سەنگا خوە و پارتا خوە بپارێزن. گەلەك جاران بەرسڤنەدانا خەلكەكێ بێ بەرپرسیار بەرسڤدانە، بەرسڤنەدان ب خوە بەرسڤە. هەكە پێدڤی ژی ب بەرسڤێ هەبیت، دڤێت یا مەدرووس بیت و دڤێت پرس ب لژنەیا بلند یا هەلبژارتنان بهێتە كرن. هەكە د حالەتەكێ دیاركریدا پێدڤی بەرسڤێ بوو. ئەوژی ژبیرا هەوە نەچیت، ئەوێ زمانێ وێ یێ درێژ بیت، دەستێ وی یێ كورتە.
ئەركێ هەر هەڤالەكێ پارتییە نەكو ب تنێ خوە، بەلكو كەسوكارێن خوە و هەر كەسەكێ كو كارتێكرن ل سەر هەبیت، بۆ رۆژا 20 ئۆكتۆبەرێ هیممەتێ بكەت، ئەو و هەموو دەوروبەرێن وی بهێن بۆ سەر سندۆقا دەنگدانێ و دەنگی ب لیستا 190 بدەن. لیستا پاراستنا كەرامەتا كوردستانێیە، لیستا پێشمەرگەیە، لیستا شەهیدایە.
بەربژارێن مە هەموو خوەشتڤیێن مەنە، كور و كچێن مەنە، خووشك و برایێن مەنە، هیچ جوداهییەك د ناڤبەرا واندا نینە، داخوازا سەركەفتنێ بۆ هەوە هەموویان دكەم، بەلێ ئێك رجایێ ژ هەوە دكەم، هەڤڕكییا هەڤدو نەكەن، هەر كی ژ هەوە دەربچیت بۆ مە هیچ جوداهییەك نینە و سۆزێن مەزن نەدەن كو پاشی نە ب هەوە دهێتە كرن و نە ب مە بهێتە كرن بجهبینین، ئەو سۆز ب خەلكی بهێنە دان كو قابلی بجهئینانێ بن. بلا دەنگێ هەوە بلند نەبیت و بلا ئاستێ ئاخڤتنێن هەوە و رەفتارێن هەوە یێ بلند بیت.
ئەم دەستێ برایینیێ بۆ هەموو ئالییەكی درێژ دكەین، هەكە ئالییەك ژی هزربكەت ب دژایەتییا پارتی دێ تشت ب دەست كەڤن، ب دیتنا من هەكە بزڤریت بۆ دیرۆكێ و ئیبرەتێ بۆ خوە ژێ وەربگریت، باشترە ژ وێ چەندێ رژد بیت ل سەر وی ئێكێ ب دژایەتییا پارتی دێ تشتەك ب دەست كەڤیت».
یان هندەكا دلێ خوە ب وێ چەندێ خوەشكریە و جار جار مە گوه لێ دبیت دبێژن چەندین بال یێن دناڤ پارتیدا هەین و پارتی چەند لایەنە، پارتی ئێك حزبە و ئێك بڕیارە، پارتی حزبا شەهیدایە، پارتی بەرپرسیارەتییا وی بەرامبەر خوینا شەهیدایە، پارتی وەكو هەر حزبەكێ نینە كو وەكو خوە بیت. پێگیریێن پارتی گەلەك د گرانن، بلا د خەیالا كەسێ دا نەبیت، چونكە گەلەك كەس خەون ب وێ چەندێ ددیت كو پارتی و سەركردایەتیێن د ناڤ پارتیدا جوداهی هەبن یان كەربێ دروست بكەن، ب خودێ خەونێن وان برنە ناڤ قەبران و ئەوێن نوكە ژی هەر دێ بەنە ناڤ قەبران.
ل گەل بەغدا ژی خوەشبەختانە نوكە (ئینفراجەك) یا دروستبووی و ل گەل سەرۆك وەزیران بەرێز سۆدانی تاكو ئاستەكێ باش تێكگەهشتنەك یا هەی و حوكمەتا هەرێمێ ب هەموو شێوەیەكی ل گەل بەغدا یا مژوولە چارەسەرییا وان گرفتان بكەن و ئومێدەوارین بگەهنە چارەسەریێ بۆ هەموو گیروگرفتان و ئەو نەهجێ مەیە و مە پێ خوەشە ئەو كێشە هەموو بهێنە چارەسەركرن. ل گەل هەڤسنوران ژی سیاسەتا مە هەر ئەوە كو ب دانوستاندنێ و تێكگەهشتنێ مە باشترین پەیوەندی ل گەل هەموو ئالییەكی هەبیت.
مخابن بەری چەند رۆژان مە گوه ل هندەك شوڤینیییان بوو كو دگۆت نابیت چەك ب پێشمەرگەی بهێتە دان و رەخنە گرت كو چەند تۆپەك رادەستی پێشمەرگەی هاتینە كرن. بەرسڤا من بۆ وان ئەڤەیە: پێشمەرگە دارەكە، ب خوینا شەهیدان، ب رۆندكێن دایكێن شەهیدان هاتیە ئاڤدان. ناڤێ پێشمەرگەی و ئەركێ پێشمەرگەی ل دەف مە گەلەك یێ پیرۆزە. پێشمەرگە نە ب بڕیارا كەسێ دروست بوویە و نە ب بڕیارا كەسێ ژی تێك دچیت. پێشمەرگەی ب ئیرادە كوردستان یا پاراستی، هەكە نە هیچ دەمەكی هەڤسەنگی نەبوو د ناڤبەرا چەكێ پێشمەرگەی و چەكێ نەحەز و دوژمنێن پێشمەرگەی، بەلێ ئیرادەیا پێشمەرگەی یا ب هێزتربوو. هیچ دەمەكی پێشمەرگە مەترسی نینە، بەلێ مەترسی ئەو هزرا شۆڤینییە كو هێشتا یا مای، مەترسی ل سەر ئیراقێ و ل سەر هەرێمێ و ل سەر دەڤەرێ ئەو شۆڤینییەتەیە كو نوكە ژی یا مای، هەكە نە پێشمەرگە مەترسی نینە ل سەر كەسێ، پێشمەرگە تنێ بەرگریێ ژ كوردستانێ و كەرامەتا مللەتێ كورد دكەت، پێشمەرگە هێرشی كەسێ ناكەت.
پشتی 20 ئۆكتۆبەرێ، چاڤێ هەموو جیهانێ دێ ل هەرێمێ بیت، ئەم ژی هەموو چاڤەڕێ نە كو بزانین ئەو پەرلەمانێ داهاتی دێ یێ چاوا بیت، ئومێدەوارم پەرلەمانێ داهاتی پەرلەمانەك بیت هەیبەت و قودسییەتا پەرلەمانی بزڤرینیت بۆ پەرلەمانی و هەست ب بەرپرسیارەتییا خوە یا دیرۆكی بكەت بەرامبەر خەلكێ كوردستانێ، پەرلەمانەك بیت هەر چ پیلان و بزاڤا تێكدانا هەرێمێ هاتیە كرن ژ هەر ئالییەكی بیت، تێك بدەت و هەموو وان پیلانان نەهێلیت. ئومێدەورام و دڤێت بزاڤ بهێتە كرن، پشتی 20 ئۆكتۆبەرێ، ئێك هەرێم و ئێك پەرلەمان و ئێك حوكمەت و ئێك هێزا پێشمەرگەی هەبیت و دوماهی ب هەر چ كارێ نە قانوونی بهێتە دان.
ئەندامێن پارتی، هەڤالێن پارتی، لایەنگرێن پارتی، هەموو كوردێن دلسۆز، داخواز ژ هەوە دكەم ئەو رێنمایێن ژ لژنەیا بلند یا هەلبژارتنان دەرچووین، بهێنە بجهئینان، هەروەسا داخوازێ ژ هەموو وان هەڤالان دكەم كو هاتینە راسپاردن هەر ئێك ب ئەركەكێ دیاركری، رۆژا 20 ئۆكتۆبەرێ و بەری 20 ئۆكتۆبەرێ، ئەركێن خوە بجهبینن و رێنمایان بجهبینن. هەكە گازندە هەیە، پاش بێخن بۆ پشتی هەلبژارتنان، دەمی وێ چەندێ نینە كەس نوكە گازندێ بكەت. سۆزێ ددەمە هەوە كو بزاڤێ بكەین بەری هەموو كەسەكێ، چاكسازیێ دناڤ خوە دا بكەین و پاشی داخوازێ ژ خەلكێ دی بكەین چاكسازیێ بكەن.
ب باوەرییەكا تمام و ب ئومێدەكا بلند، هەرنە بەر ب هەلبژارتنان و دەنگی بدەن، هەرن بۆ سندۆقێن دەنگدانێ، ژبیرا هەوە نەچیت خوە نەچەمینن.
دووماهیێ دخوازم سوپاسییا لژنەیا بلند یا هەلبژارتنان و هەموو پشكیچن مەكتەبا سیاسی و مەكتەبێن رێكخستنێن پارێزگەهان و هەموو لقان و هەموو وان هەڤالان بكەم كو زەحمەت كێشای، ئومێدەوارم بەرهەمێ وێ وەستییانێ ل رۆژا 20 ئۆكتۆبەرێ بهێتە دەست، پارتی دێ سەركەڤیت بۆ وێ چەندێ كوردستان یا ب هێز بیت و كوردستان یا پاراستی بیت.

سەرۆكێ هەرێما كوردستانێ ل گەل سەرپەرشتێ ئیدارەیا سەربخوە یا سۆران و بەرپرسێن یەكەیێن كارگێری یێن دەڤەرێ كۆمبوو و تێدا داخواز ژ هەموو ئالییەكی كر كو بانگەشەیەكا شارستانی و ئارام ئەنجام بدەن و كاری بۆ سەرئێخستنا هەلبژارتنان بكەن.
نێچیرڤان بارزانی، سەرۆكێ هەرێما كوردستانێ ل گەل هەلگورد شێخ نەجیب، سەرپەرشتێ ئیدارەیا سەربخوەیا سۆران و بەرپرسێن یەكەیێن كارگێری كۆمبوو و ب گۆڕەی بەیاننامەیەكا سەرۆكایەتییا هەرێما كوردستانێ، دەلیڤەیێن گەشەپێدانێ وزێدەتر پێشئێخستنا دەڤەرێ و بابەتێ هەلبژارتنان هاتنە گەنگەشەكرن.
د بەیاننامەیا سەرۆكایەتییا هەرێما كوردستانێدا هاتیە» د كۆمبوونەكێدا، باس ل پلان و بەرنامەیێن داهاتی و كار و پڕۆژەیان ل دەڤەرێ هاتە كرن، هەروەسا دەربارەی چارەسەركرنا گرفت و كێماسییان و پەیداكرنا پێدڤییان، بیر و بۆچوون هاتنە لێكگوهارتن».
سەرۆكێ هەرێما كوردستانێ پشتەڤانی بۆ ئیدارەیا سەربخوەیا سۆران ب مەبەستا باشتر خزمەتكرنا دەڤەرێ دوپاتكر.
نێچیرڤان بارزانی كارێ و خزمەتا سەرپەرشتێ ئیدارەیا سەربخوەیا سۆران و بەرپرسێن كارگێری پێشكێشكری بۆ پێشڤەچوون و گەشەكرنا دەڤەرێ بلند هەلەسەنگاند.
سەرۆكایەتییا هەرێما كوردستانێ دیاركر ژی» بانگەشەیا چاڤەڕێكرییا هەلبژارتنێن پەرلەمانێ كوردستانێ و بەرهەڤیێن بۆ پڕۆسەیا دەنگدانێ، تەوەرەكێ دی یێ كۆمبوونێ بوو. تێدا سەرۆكێ هەرێما كوردستانێ سەرەرای دوپاتكرنێ ل گرنگییا هەلبژارتنان و كاركرن بۆ سەرئێخستنا وان، داخواز ژ هەموو ئالییەكێ كر كو بانگەشەیەكا شارستانی و ئارام بهێتە ئەنجامدان».
هەروەسا بەیاننامەیا سەرۆكایەتییا هەرێمێ ئاماژەكر» چەند پرسێن دی یێن گرێدای رەوشا گشتییا سنۆرێ دەڤەرا سۆران، پشكەكا دی یا گەنگەشەیا كۆمبوونێ بوون».

دوهی سێشەمبی 24/9/2024، نێچیرڤان بارزانی، سەرۆكێ هەرێما كوردستانێ، د سەرەدانەكێدا بۆ پارێزگەها سلێمانیێ، ل ئاڤاهیێ پارێزگەهێ ل گەل هەڤال ئەبوبەكر، پارێزگەرێ سلێمانیێ و هەژمارەكا بەرپرسێن یەكەیێن كارگێری یێن پارێزگەهێ، كۆمبوو.
ب گۆرەی بەیاننامەیەكا سەرۆكایەتییا هەرێما كوردستانێ، د كۆمبوونێدا رەوشا گشتییا پارێزگەها سلێمانیێ، ب تایبەتی ژ روویێ كارگێری و خزمەتگوزاریڤە، هەروەسا بەرهەڤیێن هەلبژارتنێن پەرلەمانێ كوردستانێ و دەستپێكرنا بانگەشەیا هەلبژارتنان هاتنە گەنگەشەكرن و باس ل پێدڤییە چەند پڕۆژەیەكێن سنۆرێ پارێزگەهێ هاتە كرن.
سەرۆكێ هەرێما كوردستانێ باس ل گرنگییا سەرئێخستنا هەلبژارتنان و پڕۆسەیا دەنگدانێ كر و دوپاتی ل بڕێڤەچوونا بانگەشەیەكا شارستانی یا هەلبژارتنان ل سلێمانیێ و هەموو هەرێما كوردستانێ كر. هەروەسا سەرەرای دیاركرنا پشتەڤانییا خوە بۆ كارگێرییا پارێزگەها سلێمانیێ، بڕیارا بجهئینانا هەژمارەكا داخوازیێن وان دا.
چاوانییا پێشڤەبرنا كەرتێن جودا جودا ل سنۆرێ پارێزگەها سلێمانیێ و بزاڤكرن بۆ چارەسەركرنا كێشەیێن فرۆكخانەیا نێڤدەولەتییا سلێمانیێ و چەند پرسێن دی یێن گرێدای كاروبارێن پارێزگەهێ، تەوەرەكێ دی یێ كۆمبوونێ بوون.

سەرۆكێ هەرێما كوردستانێ داخواز ژ ئالیێن سیاسی و بەربژارێن خولا شەشێ یا هەلبژارتنێن پەرلەمانێ كوردستانێ كر بانگەشەیەكا ئارام و شارستانی ئەنجام بدەن، ب جۆرەكی نەبیتە جهێ گرژیێ د ناڤبەرا ئالییان و دابەشكرنا جڤاكی، چونكە ئالیێن سیاسی و بەربژار، دوژمنێن هەڤدو نینن، بەلكو هەڤڕكێن سیاسی یێن هەڤدونە.
نێچیرڤان بارزانی، سەرۆكێ هەرێما كوردستانێ د پەیاما خوە دا داخوازكر» هەموو ئالی ب جۆرەكی بانگەشێ بكەن، كو وێنەیەكێ جوان یێ هەرێما كوردستانێ نیشان بدەت و رەنگڤەدانا كەلتوورێ زەنگێنێ پێكڤەژیانێ و هەڤدو قبوولكرنێ و فرەرەنگییا جڤاكێ كوردستانێ و پێكهاتەیێن وێ بیت».
سەرۆكێ هەرێما كوردستانێ دوپاتكر كو ئارمانجێن خەلكێ هەرێما كوردستانێ د مەزنن و دەلڤەیەكا بەرفرهە یا ململانێیا شارستانی د ناڤبەرا ئالی، لیست و بەربژاراندا یا هەی و گۆت» هەموو د ئازادن د وێ چەندێ دا پرۆپاگندێ بۆ سیاسەت وبەرنامەیێن خوە بكەن و رەخنێ بگرن، بەلێ دڤێت هیچ كەس و ئالییەك رێكێ ب خوە نەدەت كەرب و كینێ بەلاڤ بكەت».
نێچیرڤان بارزانی ب تایبەتی دوپاتی ل پێدڤییا پاراستنا رێز و پێگەهێ ئافرەتێ كر و گۆت» پاراستنا ژنان ب گشتی و بەربژاربوونا وان بۆ هەلبژارتنێن پەرلەمانی، پیڤەرەكێ گرنگە بۆ هەرێما كوردستانێ».
ل گەل پاراستن رێز و پێگەهێ ئافرەتێ، سەرۆكێ هەرێما كوردستانێ دیاركر» پێكڤەژیانا ئاشتییانەیا هەموو نەتەوە و ئایینان، روویەكێ گەش و بنەمایەكێ ب هێز یێ سەركەفتنا هەرێما كوردستانێیە، ئەم هەموو پێكڤە خودانێن هەموو دەستكەفت و پێشكەفتنێن كوردستانێ نە، پاراستنا ئەوێ پێكڤەژیانێ، ئەركێ مە هەموویانە».
سەرۆكێ هەرێما كوردستانێ د پەیاما خوە دا ئەوژی بەرچاڤكر كو چو جاران ل گەل پاشئێخستنا هەلبژارتنان نەبوون و دەمەكێ زۆر بۆ ئەنجامدانا هەلبژارتنان ل گەل ئالییان دانوستاندن كریە» بەلێ ژ پێخەمەت بەرژەوەندییا بلند یا هەرێما كوردستانێ و بۆ وێ چەندێ هەلبژارتن ب پشكدارییا هەموو ئالیێن سیاسی و پێكهاتەیان بهێنە ئەنجامدان، ب نەچاری چەندین جاران مە پاشئێخستن».
نێچیرڤان بارزانی ئەوژی گۆت» سەنگ و ب هێزبوونا پێگەهێ هەرێما كوردستانێ و نووبوونا رەوایەتییا دەزگەهێن مە، ب ئەنجامدان و سەركەفتنا هەلبژارتنێن پاقژ و ئازاد ڤە یا گرێدایە، لەوما ل هەر جهەكی چاڤێ دۆستێن مە ل سەر ڤان هەلبژارتنایە و ئەركێ مە هەموویانە پێكڤە كاری بۆ سەركەفتنا هەلبژارتنان بكەین».

دوهی سێشەمبی 24/9/2024، مەسرور بارزانی، سەرۆكێ حوكمەتا هەرێما كوردستانێ، پڕۆژەیێ گرێدانا جادەیا 120 مەتری ل نێزیك گوندێ گەزنە، ب رێكا سەرەكییا هەولێر – دهۆك ڤەكر كو درێژییا وێ سێ كیلۆمەترن.
پشتی ڤەكرنا پڕۆژەی، مەسرور بارزانی، سەرۆكێ حوكمەتا هەرێمێ، د پەیڤەكێدا راگەهاند» ئەڤ پڕۆژەیە د خزمەتا هەموو وەلاتیێن كوردستانێ دایە و جادەیا 120 مەتری ب رێكا سەرەكییا هەولێر- دهۆك ڤە گرێدەت و ئاسانكارییەكا مەزن بۆ وەلاتییان دكەن».
مەسرور بارزانی دەستخوەشی ل كۆمپانییا بجهئینەر (هێمن گرۆپ) كر و گۆت» ب شێوەیەكێ گەلەك ستاندارد و د ماوەیەكێ پیڤانەییدا ئەڤان پڕۆژەیان بجه دئینیت».
سەرۆكێ حوكمەتا هەرێما كوردستانێ د پشكەكا دی یا ئاخڤتنێن خوەدا هیڤی خواست كو» بشێین كوردستانێ بەر ب پێشڤە ببەین و پڕۆژەیێن باشتر بێخینە د خزمەتا وەلاتییاندا».