سكرتێرێ جڤاتا وه‌زیرێن هه‌رێما كوردستانێ، ئامانج ره‌حیم راگه‌هاند، بریاره‌ شانده‌كێ بلند یێ حوكمه‌تا هه‌رێمێ سه‌ره‌دانا به‌غدا بكه‌ت بۆ دانوستاندنێ ل دۆر پرسا په‌ترۆلێ و وزێ.

پشتی كۆمبوونا حه‌فتیانه‌ ل رۆژا 6/4/2022، جڤاتا وه‌زیرێن هه‌رێمێ بریاردا شانده‌كێ بلند بۆ به‌غدا بهنێریت ب مه‌ره‌ما دانوستاندنێ ل گه‌ل ئالیێن په‌یوه‌ندیدارێن حوكمه‌تا فیدرالی بۆ هه‌ماهه‌نگیێ دبوارێ په‌ترۆلێ و وزێ دا ل سه‌ر بنه‌مایێ دستووری و ل به‌رچاڤ وه‌رگرتن و پاراستنا ده‌ستهه‌لاتێن دستووری یێن هه‌رێما كوردستانێ د وی بواری دا. ل دووڤ پێزانینان شاندێ هه‌رێمێ پێك دهێت ژ سه‌رۆكێ دیوانا سه‌رۆكایه‌تیا جڤاتا وه‌زیران و وه‌زیرێ هه‌رێمێ بۆ كاروبارێن دانوستاندنان ل گه‌ل به‌غدا و سكرتێرێ جڤاتا وه‌زیرێن هه‌رێمێ و سه‌رۆكێ فه‌رمانگه‌ها هه‌ماهه‌نگیێ و دووڤچوونێ ل جڤاتا وه‌زیرێن هه‌رێمێ و لژنه‌كا ته‌كنیكی ژ وه‌زاره‌تا سامانێن سروشتی و بریاره‌ سوباهی دوشه‌مبی ئه‌و شاند سه‌ره‌دانا به‌غدا بكه‌ت.

سه‌رۆكێ فڕاكسیۆنا پارتی دیموكراتی كوردستان ل په‌رله‌مانێ كوردستانێ لدۆر ئاسته‌نگێن هه‌مبه‌ر پرۆسا هه‌لبژارتنێن هه‌رێما كوردستانێ هه‌لویستێ خوه‌ دیاركر و راگه‌هاند، پارتی دگه‌ل رێڤه‌چوونا هه‌لبژارتنانه‌ دده‌مێ خوه‌ یێ دیاری كری دا، به‌لێ هنده‌ك ئالیێن سیاسی رێگرن لهه‌مبه‌ر رێڤه‌چوونا هه‌لبژارتنان ژوان ژی ئێكه‌تی نیشتیمانی كوردستان ژبه‌ر ئاریشه‌یێن ناڤخوه‌یا خوه‌ ناخوازیت هه‌لبژارتن بهێنه‌ ئه‌نجامدان هه‌روه‌سا دبێژیت، پارتی هۆشداریێ دده‌ته‌ سه‌رۆكا په‌رله‌مانی كو ده‌ست ب كۆمبوونێن په‌رله‌مانی بكه‌ت و به‌رۆڤاژی پارتی نه‌چاربیت بۆ پاراستنا په‌یڕه‌وێ ناڤخوه‌یێ په‌رله‌مانی دێ زۆرینه‌یا په‌رله‌مانی بكارئینیت.

زانا مه‌لا خالد، سه‌رۆكێ فڕاكسیۆنا پارتی ل په‌رله‌مانێ كوردستانێ د كۆنگره‌یه‌كێ رۆژنامه‌ڤانی دا دیاركر”هه‌موو كۆمبوونێن هاتینه‌كرن د ناڤبه‌را فڕاكسیۆنێن په‌رله‌مانی بۆ كاراكرنا كۆمسیۆنا هه‌لبژارتنان، مخابن ئێكه‌تی و گۆڕان و كۆمه‌لا دادگه‌ری و ئێكگرتوویا ئیسلامی رازینه‌بوون ب گۆره‌ی ئه‌نجامێن هه‌لبژارتنێن سالا ٢٠١٨ێ كۆمسیۆنا سه‌ربخوه‌یا هه‌لبژارتن و راپرسیان بهێته‌ كاراكرن، د كۆمبوونا ١٣ی ئادارێ هاتیه‌ رێڤه‌برن، سه‌رۆكا په‌رله‌مانێ كوردستانێ زێده‌تر پشته‌ڤانیا هێزه‌كا سیاسی دكر، ئه‌ڤه‌ دده‌مه‌كی دایه‌ سه‌رۆكا په‌رله‌مانێ كورستانێ ب ده‌نگێ پارتی بوویه‌ سه‌رۆكا په‌رله‌مانی و نابیت ڤێ چه‌ندێ ژبیر بكه‌ت، سه‌رۆكا په‌رله‌مانی دخوازیت په‌رله‌مان بهێته‌ راگرتن و چو كۆمبوونه‌كێ نه‌كه‌ت ئه‌وژی ب به‌هانه‌یا وێ چه‌ندێ ئێكه‌تیێ داخوازی هه‌یه‌ بۆ راستڤه‌كرنا قانوونا هه‌لبژارتنان، هه‌موو فڕاكسیۆنێن په‌رله‌مانێ كوردستانێ گه‌هشتبوونه‌ رێككه‌فتنێ و ئیمزا ژی هاتبوونه‌كرن بابه‌تێن قانوونا هه‌لبژارتنان و كاراكرنا كۆمسیۆنێ و دستوورێ هه‌رێما كوردستانێ ب سازان بهێته‌ چاره‌سه‌ركرن، به‌لێ ئێكه‌تی نیشتیمانی كوردستان یا پێگیر نه‌بوو ب رێككه‌فتن و لێكتێگه‌هشتنێ، نوكه‌ژی هه‌كه‌ ئێكه‌تی دگه‌ل رێڤه‌چوونا پرۆسا هه‌لبژارتنێن كوردستانێ نینه‌ بلا بمه‌ ئاگه‌هدار بكه‌ت تاكو ئه‌م ژی بزانین و دانوستاندنان بكه‌ین”.
سه‌رۆكێ فڕاكسیۆنا پارتی زێده‌تر گۆت” پارتی رازی نابیت هیچ ئالیێن سیاسی خۆ فه‌رز بكه‌ن لسه‌ر بۆچوونا پارتی و گه‌لێ كوردستانێ، مه‌ چ جارا نه‌ڤیایه‌ زۆرینه‌یا په‌رله‌مانی بۆ بابه‌ته‌كێ سیاسی بكار بینین، به‌لێ ئه‌ڤه‌ رامانا وێ چه‌ندێ ناده‌ت دێ بێده‌نگ بین هه‌مبه‌ر هه‌ر تشته‌كێ بهێته‌كرن، هیچ ئالیه‌كێ سیاسی نه‌شێت رێگربیت ل مافێ ده‌نگدان و هه‌لبژارتنان، خه‌لكێ هه‌رێما كوردستانێ دڤێت دادوه‌ربیت و بڕیارێ بده‌ت كیش ئالیێ سیاسیه‌ رێ ناده‌ت هه‌لبژارتن بهێنه‌ ئه‌نجامدان و ژبه‌ر ئاریشه‌یێن ناڤخوه‌یا خوه‌ رێگرن ل رێڤه‌چوونا هه‌لبژارتنان، له‌وڕا فڕاكسیۆنا پارتی داخواز دكه‌ت ده‌مه‌كێ زوو ده‌ست ب كۆمبوونێن په‌رله‌مانێ كوردستانێ بهێته‌كرن و به‌رنامه‌ و كارنامه‌یێن كۆمبوونێن په‌رله‌مانی بهێنه‌ دیاركرن”.
زانا مه‌لا خالد ئاماژه‌كر” هۆشداریامه‌ بۆ سه‌رۆكا په‌رله‌مانێ كوردستانێ ئه‌وه‌ بله‌ز كۆمبوونا په‌رله‌مانی بهێته‌ ئه‌نجامدان لدۆر بابه‌تێ هه‌لبژارتنان، سه‌رۆكا په‌رله‌مانی كه‌سه‌كا قانوونیه‌ و دزانیت ب گۆره‌ی په‌یڕه‌وێ ناڤخوه‌یێ په‌رله‌مانی ئه‌ندامێن په‌رله‌مانی چ مافه‌ك هه‌یه‌، هه‌كه‌ پارتی بخوازیت زۆرینه‌یا په‌رله‌مانی بكار بینیت دێ ئه‌م زانین چ كه‌ین، پارتی ڤیتۆ لسه‌ر پڕۆژێ هیچ ئالیه‌كێ سیاسی نینه‌، به‌لێ ئه‌و پڕۆژێ هاتیه‌ به‌رهه‌ڤكرن هه‌تا نوكه‌ژی نه‌گه‌هشتیه‌ ده‌ستێ ئه‌ندامێن په‌رله‌مانی، براده‌رێن ئێكه‌تیێ چو پڕۆژه‌ ب فه‌رمی پێشكه‌ش نه‌كرینه‌ لدۆر هه‌لبژارتنان، تنێ ب رێیا ده‌زگه‌هێن راگه‌هاندنێ ئه‌و چه‌نده‌ دهێته‌ به‌لافكرن ئێكه‌تیێ پڕۆژه‌ هه‌یه‌، دده‌مێ پێنج هه‌یڤێن بۆری دا حه‌فت كۆمبوون هاتینه‌ ئه‌نجامدان و مه‌ داخواز ژ ئێكه‌تی نیشتیمانی كریه‌ پڕۆژێ خوه‌ پێشكه‌ش بكه‌ت، به‌لێ بێی پارتی پڕۆژه‌ پێشكه‌ش كر و رازی نه‌بوون لێك تێگه‌هشتن هه‌بیت دگه‌ل پارتی لدۆر بابه‌تێ هه‌لبژارتنان، پارتی دێ زۆرینه‌یا په‌رله‌مانی بكار ئینیت تاكو په‌یڕه‌وێ ناڤخوه‌یێ په‌رله‌مانی نه‌هێته‌ بنپێكرن”.

به‌رپرسێ ده‌زگه‌هێ هه‌لبژارتن یێ پارتی دیموكراتی كوردستان راگه‌هاند، سه‌رۆكێ هه‌رێما كوردستانێ كو ئه‌ندامه‌كێ پارتیه‌ ژڤانێ ئه‌نجامدانا هه‌لبژارتنێن په‌رله‌مانێ كوردستانێ دیاركرینه‌، هه‌روه‌سا كۆمسیۆنا بلند یا هه‌لبژارتن و راپرسیان كو سه‌رۆكێ وێ پارتیه‌ ب په‌رله‌مانی راگه‌هاندیه‌ كو كۆمسیۆنێ زیندی بكه‌ت، ئه‌م ژی وه‌كو پارتی دبه‌رهه‌ڤین، به‌لێ سه‌رۆكا په‌رله‌مانێ كوردستانێ ئێكه‌تیه‌، نوكه‌ پرسیار دكه‌م كیه‌ كۆمبوونا په‌رله‌مانی ناكه‌ت یان ناخوازیت كۆمبوون بهێته‌ كرن.

خسرۆ گۆران، به‌رپرسێ ده‌زگه‌هێ هه‌لبژارتن یێ پارتی دیموكراتی كوردستان، گۆت” ئه‌م وه‌كو پارتی هه‌رده‌م ل گه‌ل وێ چه‌ندێ بووین هه‌لبژارتن ل ژڤانێ خوه‌ یێ دیاركری دا بهێنه‌ ئه‌نجامدان، مه‌ ئه‌و بابه‌ت ل گه‌ل ئالیێن دی ژی به‌ری چار هه‌یڤان زێده‌تر به‌حسكریه‌، ب ئاخڤتن هه‌موو دبێژن ئه‌م ل گه‌ل ئه‌نجامدانا هه‌لبژارتناینه‌، سه‌رۆكێ هه‌رێما كوردستانێ ژی رۆژا 1/10/2022 دیاركریه‌ وه‌كو ژڤانێ ئه‌نجامدانا هه‌لبژارتنان، به‌لێ كۆمسیۆنێ به‌رسڤا سه‌رۆكایه‌تیا هه‌رێمێ دایه‌ كو ئه‌و نه‌شێن هیچ گاڤه‌كێ ب هاڤێَژن تاكو په‌رله‌مان كۆمسیۆنێ نوو نه‌كه‌ت چونكه‌ ده‌مێ وێ یێ قانوونی یێ ب سه‌رڤه‌چووی”.

خسرۆ گۆران زێده‌تر دبێژیت” پارتی یا به‌رهه‌ڤه‌ كۆمسیۆن بهێته‌ زیندیكرن هه‌كه‌ بۆ ده‌مه‌كێ كورت ژی بیت تاكو ئه‌ڤ هه‌لبژارتنه‌ دهێنه‌ ئه‌نجامدان و پاشی دشیان دایه‌ كۆمسیۆنه‌كا دی بهێته‌ دانان، كێشه‌ ژی ئه‌وه‌ ئالیێن دی دبێژن نه‌خێر دڤێت قانوون بهێته‌ راستڤه‌كرن، وئه‌و كۆمه‌كا مه‌رجان ددانن كو پێدڤی بوو ئه‌و مه‌رج به‌ری ساله‌كێ یان دو سالان پێشكێشی په‌رله‌مانی كربان، نه‌كو ل ڤی ده‌مێ كێم یێ مای، نوكه‌ ده‌ستبرن بۆ راستڤه‌كرنا قانوونێ، ده‌مه‌كێ زۆر دڤێت و ئه‌و ده‌مه‌ ژی ل به‌رده‌ست نه‌مایه‌ تاكو ده‌ستكاریا قانوونێ بكه‌ین، ئه‌و ئالیێن نیازا ده‌ستكاریكرنێ هه‌بوو هه‌ر دڤیا پشتی هه‌لبژارتنێن 2018 پرۆژه‌ پێشكێش كربا”.

خویاكر ژی” پارتی دژی وێ چه‌ندێ نینه‌ ده‌ستكاری د قانوونان دا بهێته‌ كرن، ب مه‌رجێ باشتربوونا وان و ئه‌وا د به‌رژه‌وه‌ندیا خه‌لكی دا بهێته‌ كرن” ئاشكراكر ژی “ئه‌و ئالیێن وی بابه‌تی د ئازرینن تنێ بۆ وێ چه‌ندێ یه‌ هه‌لبژارتن نه‌هێنه‌ ئه‌نجامدان”.

به‌رپرسێ ده‌زگه‌هێ هه‌لبژارتن یێ پارتی دیاركر” ئه‌ڤ بابه‌ته‌ هیچ د ستوویێ پارتی دا نینه‌، بۆ بۆچاڤ رۆهنیا ئالیان، سه‌رۆكێ هه‌رێمێ كو ئه‌ندامه‌كێ پارتیه‌ ژڤانێ ئه‌نجامدانا هه‌لبژارتنان دیاركریه‌، هه‌روه‌سا كۆمسیۆنیچ كو سه‌رۆكێ وێ پارتیه‌ ب په‌رله‌مانی گۆتیه‌ كو كۆمسیۆنێ نوو بكه‌ت ، ئه‌م ژی وه‌كو پارتی د به‌رهه‌ڤین، نوكه‌ ژی ته‌ب یا ل مه‌یدانا په‌رله‌مانی، په‌رله‌مان ژی هه‌موو ئالیێن سیاسی یێن تێدا هه‌ین، له‌وما یا گرنگه‌ په‌رله‌مان كۆمبیت و ئه‌و ژڤانێ سه‌رۆكێ هه‌رێمێ دیاركری بۆ ئه‌نجامدانا هه‌لبژارتنان و كۆمسیۆن ژی داخوازا شه‌رعیه‌تێ دكه‌ت ب گرنگ وه‌ربگرین، ئه‌گه‌ر نه‌ ئه‌وا به‌حس دهێته‌ كرن زێده‌تر بیانویه‌ ئالیێن سیاسی دئینن”.

خسرۆی ئاماژه‌كر” ب دیتنا من كو ئێكه‌تی هێزا دوویێ یه‌ ل كوردستانێ زێده‌تر به‌رپرسیاری دكه‌ڤیته‌ ستوویێ وان، هه‌كه‌ ئێكه‌تی ل دووڤ داخوازیا سه‌رۆكێ هه‌رێمێ و كۆمسیۆنێ بچیت هیچ كێشه‌ك نابیت، به‌لێ دیاره‌ كو ناخوازیت، ب تایبه‌ت ژی كو سه‌رۆكا په‌رله‌مانی ئێكه‌تیه‌، نوكه‌ پرسیار دكه‌م كیه‌ كۆمبوونا په‌رله‌مانی ناكه‌ت یان ناخوازیت كۆمبوونا په‌رله‌مانی بهێته‌ كرن، بێگومان سه‌رۆكا په‌رله‌مانی یه‌ كو ئێكه‌تیه‌”.

هندرین محه‌مه‌د سالح، سه‌رۆكێ كۆمسیۆنا بلند یا هه‌لبژارتن و راپرسیارن ل هه‌رێما كوردستانێ كو ده‌مێ وێ یێ قانوونی ب سه‌رڤه‌چوویه‌، راگه‌هاند، ژ سالا 2019 و وێڤه‌ ئه‌م داخوازا چاره‌سه‌ریا كێشه‌یا ب سه‌رڤه‌چوونا ده‌مێ كۆمسیۆنێ ژ په‌رله‌مانی دكه‌ین، به‌لێ هه‌تا نوكه‌ نه‌كریه‌.

هندرینی گۆت ژی، ل سالا 2019 مه‌ نڤیساره‌ك بۆ په‌رله‌مانی بلندكر ل دۆر ب سه‌رڤه‌چوونا ده‌مێ كۆمسیۆنێ بۆ دیتنا چاره‌سه‌ریه‌كێ و پاشی نڤیساره‌كا دی مه‌ بلندكر و په‌رله‌مانی ئه‌م ئاگه‌هداركرین كو پشتی كاراكرنا ده‌سته‌یا مافێ مرۆڤی دێ كێشا كۆمسیۆنێ چاره‌سه‌ركه‌ین، به‌لێ ئه‌وژی نه‌هاته‌ كرن.

ئاماژه‌كر، پشتی نڤیسارا دوویێ ژی په‌رله‌مانی بۆمه‌ چ نه‌كر و پشتی ده‌رچوونا مه‌رسووما سه‌رۆكایه‌تیا هه‌رێمێ بۆ ئه‌نجامدانا هه‌لبژارتنان جاره‌كا دی مه‌ نڤیساره‌ك ئاراسته‌ی په‌رله‌مانی كر بۆ وێ چه‌ندێ كێشا ده‌مێ كۆمسیۆنێ چاره‌سه‌ربكه‌ت، به‌لێ نوكه‌ ژی هیچ نه‌كر و ئه‌م ژی نه‌شێین هیچ كاره‌كی بكه‌ین تاكو كێشا كۆمسیۆنێ نه‌هێته‌ ئێكلاكرن.

ئه‌ڤرۆ:

وه‌لاتیێن كورد ل رۆژئاڤایێ كوردستانێ داخواز ژ هه‌ر دو جڤاتێن كوردی دكه‌ن كو جاره‌كا دی ده‌ست ب دانوستاندنان بكه‌ن و ئاریشێن هه‌ی د ناڤبه‌را خوه‌ دا چاره‌سه‌ر بكه‌ن، چونكو مه‌ترسیێن مه‌زن ل سه‌ر پاشه‌رۆژا رۆژئاڤایێ كوردستانێ هه‌نه‌ و دڤێت هێزێن كوردی ببنه‌ ئێك.

خه‌مگین حه‌مید چاڤدێرێ سیاسی یێ رۆژئاڤایێ كوردستانێ بۆ ئه‌ڤرۆ دیار كر كو مه‌ترسیێن گه‌له‌ك مه‌زن ل سه‌ر پاشه‌رۆژا كوردان ل سووریێ هه‌نه‌، توركیا دیسان بزاڤا هندێ دكه‌ت كو ده‌ست ب ئۆپه‌راسیۆنه‌كا نوو ل دژی رۆژئاڤایێ كوردستانێ بكه‌ت، بۆ هه‌ر كه‌سه‌كێ ژی ئاشكرایه‌ هه‌ر ده‌ڤه‌را كو ژ ئالیێ توركیا ڤه‌ هاتیه‌ داگیركرن ب ته‌مامی وێران بوویه‌ و نموونا هه‌ری به‌رچاڤ ژی باژێرێ عه‌فرینێ یه‌ كو نها رێژه‌یه‌كا گه‌له‌ك كێم كورد لێ ماینه‌ و رۆژانه‌ ژی چه‌كدارێن سه‌ر ب توركیا وه‌لاتیێن كورد دڕه‌ڤینن و ئه‌شكه‌نجه‌ دده‌ن و دكوژن و گۆت: (ئێدی ده‌م یێ هاتی كو هه‌ر دو جڤاتێن كوردی یێن رۆژئاڤایێ كوردستانێ ژ بۆ به‌رژه‌وه‌ندیێن گه‌لێ كورد ل سووریێ ده‌ست ب قۆناغه‌كا نوو بكه‌ن، دڤێت هه‌ر دو جڤاتێن كوردی ب رێیا دانوستاندنان هه‌موو ئاریشێن د ناڤبه‌را خوه‌ دا چاره‌سه‌ر بكه‌ن، هه‌كه‌ ئه‌م كورد ل رۆژئاڤایێ كوردستانێ بهێز نه‌بین دێ ژناڤ چین، نها ژی گه‌له‌ك پیلان ل دژی كوردان ل سووریێ دهێنه‌ گێران و دوور نینه‌ رژێما به‌شاری و توركیا رێككه‌فتنه‌كێ بكه‌ن و پێكڤه‌ ئێرشی رۆژئاڤایێ كوردستانێ بكه‌ن، ژ به‌ر هندێ ژی تنێ رێیا پاراستنا ده‌ستكه‌فتیێن كوردان ل رۆژئاڤایێ كوردستانێ ئێكه‌تیا هه‌موو هێز و ئالیێن سیاسی یێن كوردستانی یه‌).

نه‌شه‌ت محه‌مه‌د چاڤدێرێ سیاسی كو خه‌لكێ رۆژئاڤایێ كوردستانێ نه‌ و نها ل ئۆرۆپا دژیت دیار كر كو براستی ژی ئاریشا هه‌ری مه‌زن یا كوردان ل سووریێ و رۆژئاڤایێ كوردستانێ كورد بخوه‌ نه‌، چونكو ناكۆكیێن گه‌له‌ك مه‌زن د ناڤبه‌را هێزێن كوردی دا هه‌نه‌، ل ئالیێ دی توركیا و رژێما سووریێ ژی ده‌مه‌كه‌ ده‌ست ب كۆمبوونان كرینه‌ كا دێ چاوا شێن رێڤه‌به‌ریا كوردی ل رۆژئاڤایێ كوردستانێ ژناڤ به‌ن، ب جهێ كو هه‌ر دو جڤاتێن كوردی پێكڤه‌ ده‌ست ب قۆناغه‌كا نوو بكه‌ن هه‌ر دو ئالی دژبه‌ریا ئێكتر دكه‌ن و گۆت: (ئاشكرایه‌ هه‌تا كورد ل سووریێ و رۆژئاڤایێ كوردستانێ نه‌بنه‌ ئێك دێ چاره‌نڤیسێ مه‌ هه‌ر ئه‌ڤه‌ بیت، مخابن گه‌له‌ك پیلان ل دژی رۆژئاڤایێ كوردستانێ دهێنه‌ گێران و هێزێن كوردی ژی هه‌تا نها نه‌شیاینه‌ ئاریشێن هه‌ی د ناڤبه‌را خوه‌ دا چاره‌سه‌ر بكه‌ن، نابیت كورد پشتا خوه‌ ب ئه‌مریكا گه‌رم بكه‌ن، ره‌وشا نها ل ئۆكرانیایێ ژی نیشا دده‌ت هه‌كه‌ تو به‌رگریێ ژ خوه‌ نه‌كه‌ی كه‌س بۆ ته‌ شه‌ری ناكه‌ت، ڤێجا دڤێت ئه‌م وه‌كو كورد وانان ژ دیرۆكا خوه‌ وه‌ربگرین و ژ بۆ پاراستنا خوه‌ هه‌موو ئاریشێن هه‌ی د ناڤبه‌را خوه‌ دا چاره‌سه‌ر بكه‌ین، چونكو براستی گه‌له‌ك مه‌ترسی ل سه‌ر رۆژئاڤایێ كوردستانێ هه‌نه‌).

سه‌رۆكێ لژنا پێشمه‌رگه‌ ل په‌رله‌مانێ كوردستانێ، رێڤینگ هروری، راگه‌هاند، پرۆژێ پێشنیازا پێشمه‌رگێن دێرین دێ هێته‌ به‌رهه‌ڤكرن و تێدا چه‌ندین ماف بۆ پێشمه‌رگێن دێرین هاتینه‌ دیاركرن و چه‌ندین خالێن دی ژی پێدڤیه‌ بهێنه‌ زێده‌كرن ژوان دیاركرنا رۆژا پێشمه‌رگه‌ی و پێدانا میدالیا بۆ هه‌موو پێشمه‌رگه‌یان.

گۆت ژی” پرۆژێ پێشنیازا پێشمه‌رگێن ئیلوون و گۆلانێ و دێرین ل به‌رده‌ستێ په‌رله‌مانێ كوردستانێ دایه‌، به‌لێ هه‌ر پرۆژه‌ قانوونه‌كا ره‌هه‌ندێن دارایی هه‌بیت، پێدڤی ب رازیبوونا حوكمه‌تێ یه‌ چونكه‌ نابیت پرۆژه‌ قانوونه‌ك بهێته‌ ده‌ركرن و ژ روویێ پشته‌ڤانیا دارایی ڤه‌ دشیانێن حوكمه‌تێ دا نه‌بیت، به‌لێ ب دیتنا من هه‌كه‌ ئه‌ڤ پرۆژه‌ پێشنیازه‌ بچیته‌ دبوارێ كاركرنێ دا بارگرانیێ بۆ حوكمه‌تێ دروست ناكه‌ت”.

هروری دیاركر” ئه‌ڤ پرۆژه‌ پێشنیازه‌ ب رێیا فراكسیۆنان هاتیه‌ ئاراسته‌كرن بۆ ئالیێن سیاسی، ب تایبه‌تی پێدڤی ب پشته‌ڤانیا پارتی و ئێكه‌تی هه‌یه‌ ژبه‌ركو پتریا پێشمه‌رگێن دێرین سه‌ر ب وان هه‌ردو ئالیان ڤه‌نه‌”.

ئاماژه‌كر” پرۆژێ ناڤبری گاڤه‌كا باشه‌ و ب گۆره‌ی وی چه‌ندین مه‌رج هاتینه‌ دیاركرن بۆ ده‌ستنیشانكرنا پێشمه‌رگێ دێرین كو ئه‌و ناسناڤه‌ ژ سالا 1961 ده‌ست پێ دكه‌ت تاكو ئادارا 1991 كو هه‌ر كه‌سه‌ك سێ سالان دناڤبه‌را وان سالان دا بێ دابرین پێشمه‌رگه‌ بیت ب پێشمه‌رگێ دێرین دێ هێته‌ هه‌ژمارتن”.

له‌شكرێ ئیراقێ ل سنوورێ ناحیا سنوونێ ل قه‌زا شنگالێ، هه‌وه‌كا لێگه‌ریان و پشكنینێ ده‌ست پێكریه‌ بۆ سه‌ر وان مالێن گۆمانا ڤه‌شارتنا چه‌كی لێ دهێته‌ كرن و لایه‌نگرێن PKK بن.

ل دووماهیا سالا 2017، PKK ب تمامی ده‌ست ب سه‌ر وێ ده‌ڤه‌رێ دا گرتبوو و ل ده‌مێن بۆری چه‌ندین كێشه‌ دروستكرینه‌، ئه‌ڤێ چه‌ندێ ژی وه‌كریه‌ كو له‌شكرێ ئیراقێ نوكه‌ هزر د وێ چه‌ندێ دا بكه‌ت خوه‌ ژ چه‌كدارێن PKK ل وی سنوورێ رزگار بكه‌ت.

ئازرین شنگالی چالاكڤانێ مه‌ده‌نی دیاركر، له‌شكرێ ئیراقێ هه‌ر ژ ئێڤاریا شه‌مبیێ ده‌ست ب هه‌وه‌كا به‌رفرهه‌ كریه‌ بۆ وان گوندێن ژ روویێ ئیداری ڤه‌ سه‌ر ب ناحیا سنوونێ ڤه‌ و دكه‌ڤنه‌ سه‌ر سنوورێ رۆژئاڤایێ كوردستانێ، كو PKK پشكه‌ك ژێ كونترۆلكریه‌.

گۆت ژی، له‌شكرێ ئیراقێ د وێ هه‌وێ دا لیسته‌ك ل ده‌ف هه‌یه‌ كو ناڤێن وان كه‌سان تێدایه‌ كو لایه‌نگرێن PKK نه‌، هه‌روه‌سا ل چوونا وان مالان پشكنینێ دكه‌ن بۆ دیتنا چه‌كێ بێ مۆله‌ت كو گومانا ڤه‌شارتنا وێ لێ دهێته‌.