ئەڤرۆ نیوز:
پەیمانگەھا واشنتۆن بۆ سیاسەتێن رۆژھەلاتا ناڤەراست د ڤەکۆلینەکا خوە دا دیارکریە کو میلیشیا حەشدا شەعبی دێ بیتە مەزنترین ئاریشە پشتی ژناڤبرنا داعشێ، خویاکریە ژی کو پێدڤیە ل سەر حوکمەتا عیراقێ بریارێ بدەت ئایا دێ رێ ب تیما پشتەڤانیا لەشکری یا ئەمریکی دەت ل عیراقێ بمینیت ب تایبەتی نوکە شەڕێ دژی داعشێ د قۆناغا دووماھیێ دا.
سایتێ ئەلخەلیج ئۆنلاین ژ زاردەڤێ شرۆڤەکارێ سیاسی عومەر عەبدولسەتار ڤەدگوھێزیت کو ئەمریکا دو پلان بۆ عیراقێ یێن ھەین کو ئێک ژوان ئەوە عەبادی کارتێکرنا پاسدارێن ئیرانێ ل سەر حەشد شەعبی نەھێلیت کو عەبادی و ھەر ژ دیدارا وی ل گەل سەرۆکێ ئەمریکی ل ئادارا بۆری یێ داخوازکریە ڤێ پلانێ بجھبینیت، ھەکە عەبادی ئەو رێککەفتنە بجە نەئینا کو پاشی کارتێکرنا پاسدارێن ئیرانێ دێ ژ یا عەبادی ب خوە ب ھێزتربیت، وی دەمی عیراق دێ بیتە مەیدانا روو ب رووبوونێ ل گەل دەستھەلاتا ئیرانی ل دەڤەرێ کو ل وێ رەوشێ ئەمریکا دێ پەنایێ بەتە پلانا دویێ کو دچەندین راپۆرتێن ئەمریکی دا ژی یا ھاتیە بەحسکرن ئەوژی روو ب رووبوونا ئەمریکا ل گەل میلیشیێن شیعی یێن چەکدار ب رێیا ھەڤپەیمانێن سونە، یان ھەڤپەیمانێن خەلکێ دەڤەران وەکو چاوان روو ب روویێ رێکخستیا قاعیدە بووی وەکو ئاماژەک بۆ گرۆپێن ( سەحەوات) یێن سونی ئەوێن ئەمریکا پشتەڤانی لێکری بۆ شەڕێ دژی قاعیدە ل 2006 ێ.
ئەڤ شرۆڤەکاری سیاسی پێشبینیێ دکەت کو دبیت مەرجەعی شیعی یێ بلند سیستانی ڤێ پرسی ب دووماھی بینیت، ژبەرکو وی چو فەتوا بۆ جیھادێ دژی داگیرکرنا ئەمریکی نەداینە، بەلێ پشتەڤانیا لیستێن شیعی یا کری د ھەلبژارتنێن بۆری دا و ئەمریکا دخوازیت ئایینی و دەولەتێ و سیستانی ژێک حوداکەت، بەرۆڤاژی ئیرانێ ئەوا ئایینی و دەولەتێ پێکڤە کۆم دکەت، لەوما دیت سیستانی بۆ فەرمۆدێن خوە ئەوێن باوەریێ ب (ویلایەتا فەقیە) نەکەن، بزڤریت و دبیت فەتوایەکێ دژی گرۆپێن ل دەرڤەی قانوونێ دەربکەت.
ڤەکۆلینا پەیمانگەھا واشنتۆن ئاماژێ ب بۆچوونا میلیشیێن شیعی یێن عیراقی یێن ئیران پشتەڤانیێ لێ دکەت، و ئەو چەندا پەیڤدارێ میلیشیا ( کتائب حزب اللە) بۆ دەزگەھێن راگەھاندنا ئیرانی ل دەستپێکا گۆلانا 2017 ێ بەحسکری و گۆتی” ھەکە ھێزێن ئەمریکی ژ عیراقێ دەرنەکەڤن پشتی شکاندنا داعشێ، دێ بنە ئارمانجا بەرخوەدانا ئیسلامی یا عیراقی” و ئەڤە وێ پرسیارێ ددوڤ خوە دا دئینیت کا کی بەرپرسیار و حوکمڕانە ل عیراقێ؟.
ب دیتنا وێ پەیمانگەھا ئەمریکی، چارەنڤیسێ حەشدا شەعبی و میلیشیێن ب سەرڤە ئێک ژ مەنترین پرسێن سیاسی یە ل پاشەرۆژێ ل بەردەم حوکمەتا عیراقی. ژبەرکو ئیران بزاڤا پێکئینانا میلیشیێن وەکو حزب اللە یا لوبنانی ل دەڤەرێ ب گشتی و ل عیراقێ ب تایبەتی دکەت کو ئەو میلیشیایە وەکو بزاڤێن سیاسی یێن فەرمی وخودان تایێن خوە یێن لەشکری و جڤاکی و … ھتد بیت.
پشتی قانوونا حەشد شەعبی ل پەرلەمانێ عیراقی ھاتیە دەرکرن و میلیشیێن حەشد شەعبی ب فەرمی بووینە پشکەک ژ لەشکرێ عیراقێ، حەشد وەکو پاسدترێن ئیرانی لێ ھات و ئەڤە ژی پێشبینیا پێکئینانا ھێزەکا سەربازی بەرچاڤ دکەت، کو یەکسان بیت ل گەل لەشکری، ژوان میلیشیان کو ئیران پشتەڤانیێ لێ بکەت و گەلەک میلیشیێن شیعی یێن ب سەر ئیرانێ ڤە وەکو (کتائب حزب اللە) و ( عصائب اھل الحق) و ( رێکخراوا بەدر) دخوازن نموونا حزب اللە یا لوبنانی ل عیراقێ زیندی ودووبارە بکەن.
پەمانگەھێ ئەمریکی د ڤەکۆلینا خوەدا، پێشبینیێ دکەت کو پشتی ئازادکرنا مووسلێ ب تمامی، سیستانی فەتوایەکا نوو دەربکەت وتێدا وەلاتیێن عیراقی ژ ئەرکێ ھەلگرتنا چەکی راگریت و ئەڤە ژی یا ھەڤدەمە ل گەل ھندەک ئاخڤتنێن بەری نوکە ھاتینە کرن ل دۆر فشارێن ل سەر عەبادی دھێنە کرن بۆ ھەلوەشاندنا حەشدا شەعبی.
ترامبی رەخنێن دژوار ل ئیدارا ئۆبامای گرتینە و دچەندین دیداران دا دیارکریە کو ئەمریکا شاشیەکا مەزن کر دەمێ چوویە د عیراقێ دا و پاشی عیراق کریە ددەستێ ئیرانێ دا و ئاماژە دابوو کو وی چەندین چارە بۆ رەوشا عیراقی یێن ھەین ژوان یێن لەشکری و گۆتبوو ژی” پشتی ڤەکێشانا لەشکری ئەمریکی ژ عیراقێ ل سالا 2011، چو حوکمەت ھەتا نوکە ل عیراقێ نینن”.