ئه‌ڤرۆ:

دوهی ئێكشه‌مبی 6/2/2022 ل باره‌گایێ مه‌كته‌با سیاسی یا پارتی دیموكراتی كوردستان، فازل میرانی، سكرتێرێ مه‌كته‌با سیاسی، پێشوازی ل (ماریا پارێ) به‌رپرسا ئۆفیسا ئێكه‌تیا ئورۆپا ل هه‌رێما كوردستانێ كر.

د كۆمبوونه‌كێ دا، سكرتێرێ مه‌كته‌با سیاسی خوه‌شحالیا خوه‌ بۆ ڤێ دیدارێ ده‌ربری و پیرۆزباهیا ده‌ستبكاربوونێ ل (ماریا پارێ) كر د ئه‌ركێ وێ یێ نوو دا و هیڤیا سه‌ركه‌فتنێ بۆ خواست و به‌رهه‌ڤیا پارتی دیموكراتی كوردستان ده‌ربری بۆ هه‌ر هاریكاریه‌كێ ژ پێخه‌مه‌ت سه‌رخستنا كارێن وێ ل هه‌رێما كوردستانێ.

د ڤێ دیدارێ دا، ره‌وشا سیاسی یا هه‌رێما كوردستانێ و ئیراقێ و دووماهی پێشهاتێن وێ و رێگریێن ل به‌رده‌م پرۆسا سیاسی ل ئیراقێ و هه‌روه‌سا دانوستاندنێن به‌رده‌وام د ناڤبه‌را هێزێن سیاسی دا بۆ پێكئینانا حوكمه‌تا نوو یا ئیراقێ، كو ببیته‌ به‌رسڤا خواست و هیڤیێن چاڤه‌رێكری یێن هه‌موو پێكهاتان و ئارامیێ و سه‌قامگیریێ و خزمه‌تگوزاریان بۆ ئیراقێ دابین بكه‌ت و مافێن دستووری یێن خه‌لكێ كوردستانێ بپارێزیت، چونكه‌ سه‌قامگیریا ره‌وشا ئیراقێ د به‌رژه‌وه‌ندیا هه‌موویان دایه‌ و دووپاتی ل گرنگیا هه‌ماهه‌نگیێ و لێك نێزیكبوونا ئالیێن سیاسی هاته‌ كرن ژ پێخه‌مه‌ت به‌رژه‌وه‌ندیا گشتی و چاره‌سه‌ریا كێشان ب رێیا دانوستاندنێ و لێكتێگه‌هشتنێ.

ژئالیێ خوه‌ڤه‌، به‌رپرسا ئۆفیسا ئێكه‌تیا ئورۆپا ل هه‌رێما كوردستانێ پۆخته‌یه‌ك ژ كار و چالاكیێن ئێكه‌تیا ئورۆپا ل ئیراقێ و هه‌رێما كوردستانێ به‌رچاڤكر و سوپاسیا سكرتێرێ مه‌كته‌با سیاسی یا پارتی كر بۆ ڤێ پێشوازیا گه‌رم كو لێ هاتیه‌ كرن و ئاماژه‌كر كو سه‌قامگیریا هه‌رێما كوردستانێ و ئیراقێ بۆ ئێكه‌تیا ئورۆپا یا گرنگه‌.

ئه‌ڤرۆ، عه‌زیز هه‌ورامی

چاڤدێره‌كێ سیاسی راگه‌هاند، ب گۆره‌ی وی عورفێ سیاسی پشتی 2003 ل ئیراقێ هاتیه‌ بجهئینان دناڤبه‌را پێكهاتان دا، پۆستێ سه‌رۆك كۆمارێ پشكا كوردان بوو، سه‌رۆك بارزانی پشته‌ڤانیا مام جه‌لالی كر وی پۆستی وه‌رگریت بۆ دو خۆلان، پاشی پشته‌ڤانی  فوئاد مه‌عسوومی ژی كر بۆ وه‌رگرتنا وی پۆستی كو ئه‌و پۆسته‌ پشكا كوردایه‌ نه‌كو پشكا حزبه‌كێ یه‌.

ناسح غه‌فوور، چاڤدێرێ سیاسی بۆ رۆژناما (ئه‌ڤرۆ) گۆت” ره‌وش یا هاتیه‌ گوهارتن و پارتی پتریا ده‌نگان و كورسیێن جڤاتا نوونه‌ران ل هه‌رێما كوردستانێ بده‌ستڤه‌ئیناینه‌ و هه‌ڤپه‌یمانی یا هه‌ی د ناڤبه‌را پارتی و ره‌وتێ سه‌دری و سوننه‌یان، بۆ پێكئینانا حوكمه‌ته‌كا نیشتمانی یا زۆرینه‌ ژی پشته‌ڤانیێ ل هه‌ڤدوو دكه‌ن.

گۆت ژی” پارتی ب مافێ خوه‌ دزانیت پشتی 17 سالان پۆستێ سه‌رۆك كۆمارێ پشكا كوردان، به‌ربژارێ خوه‌ هه‌بیت و ئه‌و پۆسته‌ بۆ پارتی بیت وكارێ باش هاتیه‌ كرن، كو هشیار زێباری وه‌كو به‌ربژارێ پارتی و سه‌رۆك بارزانی هاتیه‌ به‌ربژاركرن بۆ وی پۆستی”.

پتر رۆهنكر” ل دووڤ رێككه‌فتنان ده‌لیڤا هشیار زێباری گه‌له‌ك یا ب هێزه‌ ده‌نگێ زۆرینه‌ بده‌ستڤه‌بینیت بۆ وه‌رگرتنا پۆستێ سه‌رۆك كۆمارا ئیراقێ، چونكه‌ رێككه‌فتنێن مه‌زن یێن هه‌ین”.

ئه‌ڤرۆ:

سه‌رۆكێ فراكسیۆنا پارتی دیموكراتی كوردستان ل په‌رله‌مانێ كوردستانێ راگه‌هاند، بریاره‌ ل هه‌شتێ ڤێ هه‌یڤێ سه‌رۆكێن فراكسیۆنێن په‌رله‌مانی ل دۆر كۆمسیۆنا هه‌لبژارتن و راپرسیان ل هه‌رێمێ كۆمبن، بۆ وێ ئێكێ بگه‌هنه‌ رێككه‌فتنه‌كێ، چونكه‌ سه‌رۆكایه‌تیا په‌رله‌مانی رۆژا 10 ڤێ هه‌یڤێ وه‌كو دووماهی ژڤان بۆ رێككه‌فتنێ دیاركریه‌ و ده‌مه‌كێ كێم ژی ل به‌رده‌ست یێ مای و پێدڤیه‌ ئه‌و پرسه‌ بهێته‌ ئێكلاكرن.

زانا مه‌لا خالد، سه‌رۆكێ فراكسیۆنا پارتی ل په‌رله‌مانێ كوردستانێ، گۆت” ل رۆژا هه‌شتێ ڤێ هه‌یڤێ سه‌رۆكێن فراكسیۆنێن په‌رله‌مانێ كوردستانێ دێ كۆمبن و دانوستاندن ل دۆر شێوازێ دروستكرنا كۆمسیۆنه‌كا نوو دێ هێته‌ كرن، ئه‌ڤ چه‌نده‌ ژی بۆ وێ ئێكێ یه‌ رێچاره‌یه‌ك بهێته‌ دیتن بۆ وێ چه‌ندێ كۆمسیۆنه‌كا نوو دروست بكه‌ین و پێشنیازه‌ك بۆ راستڤه‌كرنا قانوونا هه‌لبژارتنان بهێته‌ كرن، ده‌رگه‌هێ دانوستاندنێ یێ ڤه‌كریه‌ بۆ وێ ئێكێ بشێین بگه‌هینه‌ سازانه‌كا نیشتمانی ل سه‌ر بابه‌تێ هه‌لبژارتنێن په‌رله‌مانێ كوردستانی، چونكه‌ یا گرنگه‌ هه‌لبژارتن د ئه‌ڤ ساله‌دا ل ژڤانێ خوه‌ بهێنه‌ ئه‌نجامدان”.

سه‌رۆكێ فراكسیۆنا پارتی ل په‌رله‌مانێ كوردستانێ گۆت ژی” مه‌ وه‌كو فراكسیۆن پێشنیازا خوه‌ یا به‌رهه‌ڤكری و پێدڤیه‌ كۆمسیۆنه‌كا نوو بهێته‌ دروستكرن، بۆ وێ چه‌ندێ هیچ رێگریه‌كا قانوونی ل به‌رده‌م كۆمسیۆنێ دا نه‌بیت”.

ناڤبری رۆهنكر ژی” سه‌رۆكایه‌تیا په‌رله‌مانێ كوردستانێ نڤیساره‌ك ئاراسته‌ی هه‌موو فراكسیۆنێن په‌رله‌مانی كریه‌ و پێدڤیه‌ هه‌تا 10 ڤێ هه‌یڤێ دووماهی بریارا خوه‌ ل دۆر كۆمسیۆنێ بده‌ن، بۆ وێ چه‌ندێ سه‌رۆكایه‌تیا په‌رله‌مانی ژی ب ئه‌ركێ خوه‌ رابیت، كو گرنگه‌ ئه‌م ژی د ڤان چه‌ند رۆژان دا بگه‌هینه‌ سازانه‌كێ و پێدڤی ناكه‌ت گرفتێن سیاسی بۆ بهێنه‌ دروستكرن، چونكه‌ بابه‌تێ كۆمسیۆنێ و ئه‌نجامدانا هه‌لبژارتنان، مافێ وه‌لاتیێن كوردستانێ یه‌ و پێدڤیه‌ د ژڤانێ خوه‌ دا بهێنه‌ ئه‌نجامدان”.

هه‌ولێر، قائید میرۆ

به‌رپرسه‌كێ له‌شكری یێ هه‌رێما كوردستانێ ل به‌غدا ئاشكراكر، pkk و هنده‌ك هێزێن نه‌شه‌رعی رێگرن ل به‌رده‌م پێكئینانا هێزه‌كا پۆلیسان ژ خه‌لكێ شنگالێ و دبێژیت، ئه‌ركێ حوكمه‌تا ئیراقێ یه‌ ب هه‌ر شێوه‌یه‌كێ هه‌بیت چه‌كدارێن pkk ژ شنگالێ ده‌ربكه‌ت، لدۆر هه‌ماهه‌نگیا دناڤبه‌را پێشمه‌رگه‌ی و له‌شكرێ ئیراقێ ژی ئاماژه‌كر، پشتی ڤه‌كێشانا هێزێن ئه‌مریكی، ئیراق نه‌چاربوویه‌ هه‌ماهه‌نگیێ ل گه‌ل پێشمه‌رگه‌ی بكه‌ت.

لیوا (عه‌بدولخالق ته‌لعه‌ت) نوونه‌رێ هه‌رێما كوردستانێ ل ژۆرا ئۆپه‌ڕاسیۆنێن هه‌ڤپشك بۆ رۆژناما (ئه‌ڤرۆ) گۆت” به‌ری نوكه‌ رێككه‌فتن دناڤبه‌را حوكمه‌تا هه‌رێما كوردستانێ وبه‌غدا هاتیه‌كرن بۆ ئاساییكرنا ره‌وشا شنگالێ، بۆ ڤێ مه‌ره‌مێ ژی بڕیاربوو هێزه‌كا پۆلیسان ژخه‌لكێ خوه‌جهێ ده‌ڤه‌رێ بهێته‌ پێكئینان ، هه‌تا ره‌وشا شنگالێ كۆنتڕۆلبكه‌ن و خه‌لكێ شنگالێ ده‌ڤه‌را خوه‌ برێڤه‌ببه‌ن، به‌لێ ژلایێ هێزێن pkk و هنده‌ك هێزێن دی یێن دناڤا شنگالێ دا رێ نه‌هاته‌دان هێزا پۆلیسان بهێته‌ پێكئینان و ئاسته‌نگ بۆ ته‌ناكرنا ره‌وشا شنگالێ په‌یداكرن، پشتی رێككه‌فتن نه‌هاتیه‌ بجهئینان ره‌وشا شنگالێ كه‌فته‌ قۆناغه‌كادی یا مه‌ترسیاندا، بڕیاره‌ هه‌موو ئه‌و هێزێن میلیشیان یێن دناڤا شنگالێ دا، كو ژلایێ وه‌زاره‌تا به‌رگریا ئیراقێ ڤه‌ ناهێنه‌ ب رێڤه‌برن بهێنه‌ ده‌ركرن ل شنگالێ، هه‌تا ره‌وشا شنگالێ بهێته‌ ئاساییكرن و خه‌لكێ شنگالێ ڤه‌گه‌ڕن، به‌رۆڤاژی هه‌كه‌ pkk و هێزێن نه‌ شه‌رعی ژ شنگالێ ده‌رنه‌كه‌ڤن،  ئه‌ركێ هێزێن ئیراقی یه‌ ڤێ ئاریشێ چاره‌سه‌ربكه‌ن، بێگومان pkk شنگالێ چۆل نه‌كه‌ت، دێ ده‌ستێوه‌ردانێن هه‌رێمی ژی هه‌بن بۆ ره‌وشا شنگالێ و ئاریشه‌یێن گه‌له‌ك مه‌ترسیدارتر ژ یێن نوكه‌ هه‌ین دێ شنگالێ ڤه‌گرن، نوكه‌ ئه‌ركێ ده‌ركرنا هێزێن pkk كه‌فتیه‌ سه‌ر له‌شكرێ ئیراقێ و دڤێت ئه‌و ب هه‌ر شێوه‌یه‌كێ هه‌بیت چه‌كدارێن pkk ژ شنگالێ ده‌ربكه‌ن”.

لدۆر هه‌ماهه‌نگیا دناڤبه‌را پێشمه‌رگه‌ی و هێزێن ئیراقی دا، لیوا (عه‌بدولخالق ته‌لعه‌ت) دبێژیت” پێكئینانا دو لیوایێن هه‌ڤپشك بۆ ده‌ڤه‌رێن كوردستانی قۆناغێن باش ده‌ربازكرینه‌ و بڕیاره‌ ل ده‌مه‌كێ نێزیك ده‌ست ب مه‌شق و راهێنان بكه‌ن، به‌لێ ئالۆزیا پڕۆسا سیاسی ل ئیراقێ و گۆهۆڕینا حوكمه‌تێ كاریگه‌ری لسه‌ر پاشكه‌فتنا پێكئینانا لیوایێن هه‌ڤپشك هه‌بوویه‌، چونكه‌ كاره‌كێ ساناهی نینه‌ و پێدڤیه‌ مووچێ وان هێزێن هه‌ڤپشك بكه‌ڤیته‌ سه‌ر حوكمه‌تا فیدڕال، پشتی ڤه‌كێشانا هێزێن شه‌ركه‌ر یێن ئه‌مریكی، هێزێن ئیراقێ نه‌چارن هه‌ماهه‌نگیێ دگه‌ل هێزێن پێشمه‌رگه‌ی بكه‌ن بۆ به‌رهنگاربوونا تیرۆرستێن داعشێ، هه‌تا هه‌ردو هێز پێكڤه‌ بشێن به‌رهنگاری چه‌كدارێن داعش ببن و بڕیار هاتیه‌دان ل هه‌ر ده‌ڤه‌ره‌كێ ئالۆزیێن ئه‌منی هه‌بن، پێكڤه‌ كار بۆ به‌رهنگاربوونا داعشێ ببن و هه‌ماهه‌نگی و هاریكاری هه‌یه‌ د ناڤبه‌را هه‌ردو ئالیاندا”.

ئه‌ڤرۆ:

چه‌ندین رێكخراوێن مافێن مرۆڤی دیار كرن كو ل عه‌فرینێ رۆژانه‌ وه‌لاتیێن سڤیل ژ ئالیێ گرۆپێن چه‌كدار ڤه‌ دهێنه‌ ره‌ڤاندن و تووشی ئه‌شكه‌نجه‌دانێ دبن و گه‌له‌ك وه‌لاتیێن سڤیل ژی هه‌تا نها هاتینه‌ كوشتن، ژ به‌ر هندێ ژی دڤێت جڤاكێ نێڤده‌وله‌تی  ل هه‌مبه‌ر ره‌وشا خراب یا ل عه‌فرینێ بێده‌نگ نه‌بیت.

رێكخراوا مافێن مرۆڤی یا عه‌فرینێ ل گه‌ل چه‌ندین رێكخراوێن دی یێن مافێن مرۆڤی ل ئورۆپا د داخۆیانیه‌كێ دا راگه‌هاندن كو رۆژانه‌ وه‌لاتیێن كورد ل باژێرێ عه‌فرینێ ژ ئالیێ گرۆپێن چه‌كدار ڤه‌ دهێنه‌ ره‌ڤاندن و تووشی ئه‌شكه‌نجه‌دانێ دبن، هه‌ری دووماهیێ ژی دو وه‌لاتیێن سڤیل یێن كورد به‌ری سێ رۆژانه‌ ژ ئالیێ گرۆپه‌كێ چه‌كدار ڤه‌ ل عه‌فرینێ هاتنه‌ ره‌ڤاندن و هه‌تا نها ژی چاره‌نڤیسێ وان كه‌سان دیار نینه‌، سالا بۆری ژی ب ده‌هان وه‌لاتیێن سڤیل ژ ئالیێ گرۆپێن چه‌كدار ڤه‌ هاتنه‌ ره‌ڤاندن و مخابن نها ره‌وشا باژێرێ عه‌فرینێ گه‌له‌ك خرابه‌ و دڤێت گرۆپێن چه‌كدار ژ عه‌فرینێ ده‌ركه‌ڤن دا ره‌وشا وی باژێرێ ئاسایی ببیت.

د داخۆیانیێ دا ئه‌و یه‌ك ژی هاتیه‌ دیار كرن كو مخابن هه‌تا نها ل هه‌مبه‌ر ره‌وشا خراب یا ل باژێرێ عه‌فرینێ و كوشتنا وه‌لاتیێن كورد ب ده‌ستێ گرۆپێن چه‌كدار ڤه‌ د ئاستێ نێڤده‌وله‌تی دا هه‌لوه‌سته‌ك وه‌سا پێدڤی نه‌هاتیه‌ وه‌رگرتن، ژ به‌ر هندێ ژی دڤێت جڤاكێ نێڤده‌وله‌تی ل هه‌مبه‌ر ره‌وشا نها یا خراب ل عه‌فرینێ بێده‌نگ نه‌بیت، دڤێت فشار ل وان گرۆپێن چه‌كدار بهێنه‌ كرن دا نه‌چار بن كو ژ عه‌فرینێ ده‌ركه‌ڤن، چونكی دڤێت ده‌ستهه‌لاته‌ك سڤیل عه‌فرینێ برێڤه‌ ببه‌ت و نابیت هنده‌ك گرۆپێن چه‌كدار ب كه‌یفا خوه‌ رۆژانه‌ خه‌لكی بره‌ڤینن و ئه‌شكه‌نجه‌ بده‌ن یان ژی بكوژن، ئه‌و یه‌ك ب چو ره‌نگه‌كێ ناهێته‌ قه‌بوولكرن و دڤێت جڤاكێ نێڤده‌وله‌تی ژی ل هه‌مبه‌ر ره‌وشا نها یا خراب ل عه‌فرینێ یا پێدڤی د به‌رژه‌وه‌ندیا وه‌لاتیێن سڤیل دا بكه‌ت.

ئه‌و یه‌ك د ده‌مه‌كێ دایه‌ كو به‌ری نها چه‌ندین جاران ئه‌نجوومه‌نێ نشتیمانی یێ كوردی ل سووریێ داخواز ژ ئه‌مریكا و جڤاكێ نێڤده‌وله‌تی كریه‌ كو چاره‌سه‌ریه‌كێ بۆ ره‌وشا خراب یا ل عه‌فرینێ ببینن، چونكی گرۆپێن چه‌كدار رۆژانه‌ زۆرداریێ ل وه‌لاتیێن سڤیل یێن كورد ل عه‌فرینێ دكه‌ن و هه‌تا نها ژی گه‌له‌ك وه‌لاتیێن كورد ب ده‌ستێ وان گرۆپێن چه‌كدار هاتینه‌ شه‌هید كرن و چاره‌نڤیسێ گه‌له‌ك كه‌سان ژی هه‌تا نها دیار نینه‌ و دڤێت گرۆپێن چه‌كدار ب ته‌مامی ژ عه‌فرینێ ده‌ركه‌ڤن.

ل ئالیێ دی سالا بۆری ژی رێكخراوا مافێن مرۆڤی یا عه‌فرینێ د راپۆرته‌كێ دا راگه‌هاند كو دیموگرافیا باژێرێ عه‌فرینێ ب ته‌مامی هاتیه‌ گوهۆرین و نها رێژا كوردان د عه‌فرینێ دا گه‌له‌ك كێم بوویه‌ و گرۆپێن چه‌كدار عه‌ره‌ب ل مالێن كوردان بجه كرینه‌ و ئه‌ردێن كوردان ژی داگیر كرینه‌ و ب ده‌هان شوونوارێن دیرۆكی ژی هاتینه‌ تێكدان و گرۆپێن چه‌كدار تاوانێن مه‌زن ل عه‌فرینێ ئه‌نجام داینه‌ و ژ به‌ر هندێ ژی دڤێت گرۆپێن چه‌كدارێن سه‌ر ب توركیا ژ عه‌فرینێ ده‌ركه‌ڤن، چونكی هه‌تا ئه‌و گرۆپێن چه‌كدار ل وی باژێری بمینن دێ ره‌وشا عه‌فرینێ هه‌ر یا خراب بیت و بێگومان خه‌لكێ وی باژێری ژی ژ ترسان نه‌وێرن كو ڤه‌گه‌رنه‌ ڤه‌ مالێن خوه‌، چونكو هه‌بوونا گه‌له‌ك گرۆپێن چه‌كدار ل عه‌فرینێ ب سه‌ر خوه‌ بوویه‌ ئه‌گه‌رێ دروستبوونا گه‌له‌ك كاره‌ساتان.

ئه‌ڤرۆ ، زنار تۆڤی:

بسپۆرێ زانستێن سیاسی ل زانكۆیا سه‌لاحه‌دین ل هه‌ولێرێ‌، د. نه‌وزاد هێتۆتی، د دیداره‌كێ‌ دا بۆ رۆژناما (ئه‌ڤرۆ) دیار كر، كوردان ئه‌زموونه‌كا دوور و درێژ و نه‌خوه‌ش ل گه‌ل (چارچۆڤێ‌ هه‌ماهه‌نگیێ) یا هه‌ی، كو پتریا وان ئالیان بخوه‌ڤه‌ دگریت یێن نێزیكی ئیرانێ‌، هه‌روه‌سا پتریا وان حوكمه‌تێن پشتی 2005 ێ‌ هاتینه‌ پێكئینان، كو ناڤێ‌ وان كربوو حوكمه‌تا لهه‌ڤهاتنێ و ب ده‌ستێ‌ سه‌ركردێن دناڤا (چارچۆڤێ‌ هه‌ماهه‌نگیێ) بوون، رۆله‌كێ‌ گه‌له‌ك خراب هه‌بوویه‌ دیسان گه‌له‌ك دژایه‌تیا كورد و سووننه‌ یان ژی كریه‌، مافێن ده‌ستووری یێن هه‌رێما كوردستانێ‌ ژی پێشێلكرینه‌، هه‌ر ژ برینا بۆدجێ‌ هه‌رێما كوردستانێ‌ بگره‌، هه‌تا دگه‌هیته‌ داگیركرنا كه‌ركۆكێ‌ و ده‌ڤه‌رێن ده‌رڤه‌ی ئیدارا هه‌رێما كوردستانێ‌، ب ڤی ره‌نگی كوردان ئه‌زموونه‌كا دوور و درێژ و پری نه‌خوه‌شی ل گه‌ل ئالیێن دناڤا (چارچۆڤێ‌ هه‌ماهه‌نگیێ) هه‌یه‌، كو ب چو ره‌نگان پێگیری دستووری و رێككه‌فتنان نه‌بووینه‌، هه‌ر چه‌نده‌ ده‌مێ‌ ئه‌و لاواز ژی دبن، گه‌له‌ك سۆزا دده‌ن، به‌لێ‌ د راستیدا سیاسه‌ته‌كا ته‌مام به‌رۆڤاژی په‌یره‌و دكه‌ن، له‌وما دوباره‌ رێككه‌فتن ل گه‌ل وان، ئانكو دوباره‌كرنا هه‌موو وان شاشیێن  كوردان ل ده‌مێ‌ بوری دا كرین.

ناڤهاتی گۆت ژی” د حوكمه‌تا زۆرینه‌یا نیشتیمانی دا، نه‌كو زۆرینه‌یا سیاسی دا، كورد و سووننی دێ‌ د ده‌رگه‌هه‌كێ‌ ب هێزتر دا پشكداریێ‌ د حوكمه‌تێ‌ دا كه‌ن، ب ڤی ره‌نگی دێ‌ هه‌ڤسه‌نگیه‌ك د حوكمه‌تێ‌ و جڤاتا نوونه‌ران دا د ناڤبه‌را كوردان و سووننه‌یان و شیعان دا دروست بیت، بۆ هندێ‌ داكو حوكمه‌تا زۆرینه‌ یا به‌رده‌وام بیت و نه‌كه‌ڤیت، پێدڤی ب پشته‌ڤانیا كورد و سووننه‌یان هه‌یه‌، ره‌وتێ سه‌دری نه‌شێت ب تنێ‌ وێ‌ حوكمه‌تێ‌ راگریت، ل وی ده‌می دێ‌ سه‌در و سه‌رۆكێ‌ حوكمه‌تێ‌ ژی، هه‌كه‌ ب نه‌چاری ژی بیت، دێ‌ ل هه‌مبه‌ری هنده‌ك داخوازیێن كورد و سووننه‌یان هه‌لویستێن نه‌رم نیشان ده‌ن”.

د. نه‌وزاد هێتۆتی، هێشتا دبێژیت” بۆ هندێ‌ داكو سه‌در پێگه‌هێ‌ خوه‌ دناڤا پێكهاتێ‌ شیعی و حوكمه‌تێ‌ دا ب هێزتر بكه‌ت، ب ره‌نگه‌كێ‌ به‌ردوام دێ‌ پێدڤی ب كوردان و سووننه‌یان هه‌بیت و نه‌شێت ب ساناهی پشتا خوه‌ بده‌ته‌ وان، هه‌ر چه‌نده‌ هنده‌ك وه‌سا هزر دكه‌ن، كو د پاشه‌رۆژێ دا سه‌در دێ‌ شێت وه‌كو خومه‌ینی هه‌موو ئیراقێ كونترۆل كه‌ت، لێ‌ ئه‌ڤ چه‌نده‌ روو ناده‌ت، چونكی نه‌ ل سه‌ر ئاستێ‌ ناڤخوه‌یێ‌ ئیراقێ و نه‌ ل سه‌ر ئاستێ‌ ژ ده‌رڤه‌ ژی، فاكته‌ر د هاریكار نینن بۆ هندێ‌، كو سه‌در وه‌سا ب هێز بكه‌ڤیت”.

ناڤهاتی ئه‌و چه‌ند ژی گۆت” ئێك ژ خالێن ب هێز یێن شیعان ب درێژاهیا ڤان سالێن بوری، پێكهاتبوو ژ ئێكگرتنا وان ل هه‌مبه‌ری كورد و سووننه‌یان، هه‌كه‌ ڤێ‌ جارێ‌ ژی شیعه‌ بگه‌هنه‌ رێككه‌فتنێ‌ و سازانێ‌ دناڤا خوه‌ دا بكه‌ن، ل وی ده‌می كورد و سووننه‌ نه‌شێن رۆله‌كێ‌ مه‌زن د پرۆسا سیاسی یا ئیراقێ دا بگێرن، دیسان ئه‌و حوكمه‌تا كو ژ ئه‌نجامێ‌ رێككه‌فتنا پێكهاتێن شیعی دروست دبیت، هه‌ڤشێوێ‌ حوكمه‌تێن پێشی، نه‌ دكه‌ڤیته‌ ژێر كاریگه‌ریا كورد و سوننه‌یان و نه‌ چو گاڤان ژی ب ئاراسته‌یا راستكرنا پرۆسا سیاسی ل ئیراقێ دا دهاڤێژیت و هه‌ر رێككه‌فتنه‌كا بهێته‌ كرن ژی، ب تنێ‌ دێ‌ خالێن وێ‌ ل سه‌ر كاخه‌زێ‌ مینن، ب ڤی ره‌نگی دابه‌شبوونا ناڤمالا شیعی و لاوازبوونا هه‌ڤپه‌یمانیا ئیرانێ‌، د به‌رژه‌وه‌ندیا كوردان و پرۆسا سیاسی یا ئیراقی دا هه‌یه‌”.

ل دووماهیێ‌ ئاشكرا كر ژی” ئه‌و هه‌لبژارتنێن ل سالا بۆری هاتینه‌ ئه‌نجامدان، بۆ هندێ‌ بوون كو گوهۆرین د ئیراقێ دا بهێنه‌ كرن، هه‌ر ژ پێشكێشكرنا خزمه‌تگوزاریان و به‌هنگاربوونا گه‌نده‌لیێ‌، پاراستنا ئێمناهیێ‌ و سه‌قامگیریێ‌ و دانانا سنۆره‌كێ‌ بۆ میلیشیێن شیعی، به‌لێ‌ په‌نابرن بۆ ستایلێ‌ كه‌ڤن و دوباره‌، كو ناڤێ‌ وێ‌ كریه‌ لهه‌ڤهاتن، ئه‌ڤه‌ پتره‌ ژ 18 سالان ل ئیراقێ دهێته‌ په‌یروكرن، چو تشت نه‌گۆهارتینه‌ و نه‌شێت چو گاڤان بهاڤێژیت و ئه‌زموونا 18 سالێن بۆری ئه‌ڤ چه‌نده‌ یا سه‌لماندی، هه‌روه‌سا رێكخستنا ناڤمالا شیعی و ئاشتبوونا وان چو خزمه‌تان بۆ پێگه‌ه و به‌رژه‌وه‌ندیا كوردان ناكه‌ت، ل دووماهیێ‌ دێ‌ ئه‌نجامێ‌ وێ‌ بیته‌ پتر پشتگۆهخستنا كورد و سووننه‌یان و نه‌مانا كاریگه‌ریا وان ل سه‌ر پرۆسا سیاسی ل ئیراقێ”.

هه‌ولێر، قائید میرۆ

به‌رهه‌ڤیێن ئالیێن سیاسی بۆ هه‌لبژارتنا سه‌رۆك كۆمارێ ئیراقێ د به‌رده‌وامن و شرۆڤه‌كاره‌كێ سیاسی ئاشكراكر، به‌ربژارێ ئێكه‌تیێ بۆ وه‌رگرتنا پۆستێ سه‌رۆك كۆمارێ ئیراقێ سه‌رناكه‌ڤیت هه‌روه‌سا دبێژیت، ئێكه‌تی ژ ترسا شكه‌ستنا به‌رهه‌م سالحی پڕۆپاگنده‌یان دژی به‌ربژارێ پارتی به‌لاڤ دكه‌ت.

د. مه‌دحه‌ت سلێمان، شرۆڤه‌كارێ سیاسی بۆ رۆژناما (ئه‌ڤرۆ) گۆت” پۆستێ سه‌رۆك كۆمارێ ئیراقێ تنێ لسه‌ر ناڤێ ئالیه‌كێ سیاسی نه‌هاتیه‌ تۆماركرن و پشتی نه‌مانا مام جه‌لالی هه‌ردو سه‌رۆك كۆمارێن پشتی وی رۆلێ خوه‌ نه‌دیتیه‌ وه‌كو پێدڤی، بتایبه‌تی سه‌رۆك كۆمار پارێزه‌رێ دستووریه‌ و چه‌ندین ده‌ستهه‌لات هه‌نه‌، به‌لێ مه‌دیت بتایبه‌تی ل سه‌رده‌مێ به‌رهه‌م سالحی چ رۆله‌ك نه‌بوویه‌ و هه‌كه‌ پۆستێ سه‌رۆك كۆماری بۆ به‌رهه‌م سالحی بمینیت، بێگومان دێ زیانێن مه‌زن بۆ كوردان هه‌بن، ئێكه‌تی بخوه‌ژی گه‌هشتیه‌ وێ باوه‌ریێ كو به‌ربژارێ وان بۆ وه‌رگرتنا پۆستێ سه‌رۆك كۆمارێ ئیراقێ ده‌نگێن پێدڤی بده‌ستڤه‌ نائینیت و سه‌رناكه‌ڤیت، به‌لێ ئێكه‌تیێ ژبه‌ر ڤێ چه‌ندێ به‌رهه‌م سالح به‌ربژاركریه‌ هه‌تا دووماهیێ سه‌رنه‌كه‌ڤیت و بێژنێ، تو به‌ربژارێ مه‌بووی، به‌لێ نه‌شیای سه‌ركه‌ڤی، چونكه‌ هه‌كه‌ نه‌هاتبا به‌ربژاركرن دێ ڤه‌گه‌ڕیت سلێمانیێ و ئاریشا بۆ حزبا خوه‌ چێكه‌ت، بتایبه‌تی بۆ مالا مام جه‌لالی، ژبه‌ركو به‌رهه‌م سالح نه‌شێت چو حزبێن دی چێكه‌ت و باوه‌ری نه‌مایه‌ دناڤا خه‌لكی دا پشتی ئه‌زموونا وێ حزبا دامه‌زراندی و و پاشی رێزێن وێ بجه هێلای بۆ پۆستێ سه‌رۆك كۆمارێ”.

ڤی شرۆڤه‌كارێ سیاسی گۆت ژی” ئێكه‌تی باش دزانیت به‌ربژارێ وان سه‌رناكه‌ڤیت له‌وما پڕۆپاگنده‌یان دژی به‌ربژارێ پارتی دكه‌ن، به‌لێ ئه‌ڤه‌ بریارا ئێكه‌تیێ بتنێ نینه‌، چونكه‌ بریارا ئێكه‌تیێ دده‌ستێ وێ دا نینه‌، یا به‌رچاڤ و دیاربوو ژی ده‌مێ ئێكه‌م كۆمبوونا جڤاتا نوونه‌ران، په‌رله‌مانتارێن ئێكه‌تیێ ژ هۆلا جڤاتا نوونه‌ران ده‌ركه‌فتن و وان بخوه‌ژی دیاركر  كو ئه‌و بریار ل سه‌ردا هاتیه‌ سه‌پاندن و بریار دده‌ستێ وان دا نینه‌”.

ل دۆر كارڤه‌دانێن ئێكه‌تیێ د. مه‌دحه‌ت سلێمان ئاماژه‌كر” ئێكه‌تیێ نوكه‌ ده‌ست ب گه‌فان كریه‌، به‌لێ نه‌شێت چو ره‌فتارێن خراپ دژی حوكمه‌تا هه‌رێما كوردستانێ بكه‌ت، قه‌وارێ هه‌رێما كوردستانێ ب گۆره‌ی دستووری هاتیه‌ چه‌سپاندن و هه‌كه‌ ئه‌و داخوازا دو ئیداره‌یێ بكه‌ن، ئه‌ڤه‌ ژلایێ ناڤخوه‌یی و نێڤده‌وله‌تی ڤه‌ دێ ئێكه‌تی تووشی شكه‌ستنێن مه‌زن بیت، تنێ هه‌كه‌ وه‌كو ١٦ی ئۆكتۆبه‌رێ خیانه‌ته‌كا دی بكه‌ت دگه‌ل وان هێزێن سه‌ر ب ئیرانێ یێن حه‌شدی سلێمانیێ راده‌ستی حه‌شدا شه‌عبی بكه‌ت، هه‌رچه‌نده‌ هه‌ژماره‌كا سه‌ركرده‌یێن ئێكه‌تیێ بخوه‌ژی دگه‌ل ڤێ بڕیارا ئێكه‌تیێ نینن بۆ خیانه‌ته‌كادی، چونكه‌ خیانه‌تا بۆری ل ١٦ی ئۆكتۆبه‌رێ هه‌موو خه‌لكێ كوردستانێ دیت چه‌ند گران لسه‌ر ئێكه‌تیێ راوه‌ستیا ، دڤێت ئێكه‌تی دانپێدانێ ب ڤێ راستیێ بكه‌ت كو رۆژا به‌رهه‌م سالح ئاڤابوویه‌”.

ئه‌ڤرۆ، هۆشه‌نگ تاجر:

ده‌مه‌كه‌ مامۆستایێن كورد ل رۆژهه‌لاتێ كوردستانێ داخوازا باشتركرنا ره‌وشا ژیانا خوه‌ دكه‌ن و هه‌روه‌سا هژماره‌ك مامۆستا ژی ژ به‌ر گۆتنا وانه‌یێن ب زمانێ كوردی هاتینه‌ ده‌سته‌سه‌كرن و ژ به‌ر هندێ ژی نها مامۆستایێن كورد ل پرانیا باژێرێن رۆژهه‌لاتێ كوردستانێ ده‌ست ب چالاكیێن نه‌رازیبوونێ كرینه‌ و دوهی ژی سێ مامۆستا هاتنه‌ ده‌سته‌سه‌ركرن.

شه‌هین محه‌مه‌د مامۆستایا كورد ل باژێرێ مه‌ریوانێ یێ رۆژهه‌لاتێ كوردستانێ بۆ رۆژناما ئه‌ڤرۆ دیار كر كو به‌ری هه‌ر تشته‌كێ ئه‌م وه‌كو مامۆستا داخوازا هندێ دكه‌ین كو دڤێت ره‌وشا ژیانا مامۆستایان بهێته‌ باشتر كرن، چونكو نها ئه‌و مووچێ مامۆستا وه‌ردگرن ل هه‌مبه‌ر گرانیا پێدڤیاتێن رۆژانه‌ ل ئیرانێ و رۆژهه‌لاتێ كوردستانێ وه‌سا كریه‌ كو ژیانا مامۆستایان گه‌له‌ك خراب بیت، ژ به‌ر هندێ ژی ده‌مه‌كه‌ پرانیا مامۆستایان داخوازا باشتركرنا ره‌وشا ژیانا خوه‌ دكه‌ن و گۆت: (مخابن هێزێن ده‌وله‌تێ ب جهێ هندێ كو رێزێ ل داخوازیێن مامۆستایان بگرن به‌رده‌وام مامۆستایان ده‌سته‌سه‌ر دكه‌ن و دوهی ژی سێ مامۆستایێن كورد ل باژێرێ مه‌ریوانێ ژ ئالیێ هێزێن ئێمناهیێ ڤه‌ هاتینه‌ ده‌سته‌سه‌ركرن و ل هه‌مبه‌ر ده‌سته‌سه‌ركرنا وان مه‌ وه‌كو هژماره‌ك مامۆستایێن كورد كو هژمارا مه‌ پتر ژ سێسه‌د مامۆستایان بوو مه‌ ل پرانیا باژێرێن رۆژهه‌لاتێ كوردستانێ خواندن بایكۆت كریه‌ و دڤێت ده‌وله‌تا ئیرانێ پێداچوونێ د بریارا خوه‌ دا بكه‌ت).

ناڤهاتیێ ئه‌و یه‌ك ژی دیار كریه‌ كو خالا دی یا گرنگ ژی بابه‌تێ زمانێ كوردی یه‌، چونكو وه‌كو ئه‌نجوومه‌نێ مامۆستایان ل مه‌ریوانێ و باژێرێن دی یێن رۆژهه‌لاتێ كوردستانێ مه‌ بریار دایه‌ كو وانه‌یان ب زمانێ كوردی ژی بێژین، لێ مخابن هه‌لوه‌ستێ ده‌وله‌تا ئیرانێ ل هه‌مبه‌ر گۆتنا وانه‌یێن ب زمانێ كوردی ژی گه‌له‌ك خراب بوو و مه‌ دیت كا چاوا مامۆستا زارا محه‌مه‌دی هاته‌ زیندانكرن، ئه‌م ل هه‌مبه‌ر گه‌ف و زۆرداریا ده‌وله‌تا ئیرانێ بێده‌نگ نامینین و گۆت: (ژ به‌ر هندێ ژی ده‌مه‌كه‌ مه‌ ده‌ست ب خوه‌نیشادانان و چالاكیێن دی یێن نه‌رازیبوونێ كرینه‌ و ئه‌م ب رێیا تۆرێن جڤاكی ژی داخوازا پشته‌ڤانیێ ل هه‌موو وه‌لاتیێن كورد ل رۆژهه‌لاتێ كوردستانێ دكه‌ین، چونكو مافێ ره‌وا یێ گه‌لێ كورده‌ كو ل ئیرانێ ب زمانێ خوه‌ بخوونن و مه‌ دڤێت زارۆیێن مه‌ فێرێ زمانێ كوردی ببن، لێ مخابن هه‌لوه‌ستێ ده‌ستهه‌لاتێ گه‌له‌ك خرابه‌ و ب توندی سه‌ره‌ده‌ریێ ل گه‌ل داخوازا ره‌وا یا گه‌لێ مه‌ دكه‌ن و ئه‌م ژی وه‌كو مامۆستایێن كوردی ل رۆژهه‌لاتێ كوردستانێ ل هه‌مبه‌ر زۆلم و زۆرداریا هێزێن ئیرانێ بێده‌نگ نامینین و دێ چالاكیێن مه‌ ژی ب هه‌موو ره‌نگه‌كێ د به‌رده‌وام بن).

فه‌رهاد ئیسماعیلی مامۆستایێ كورد ل باژێرێ ئورمیێ یێ رۆژهه‌لاتێ كوردستانێ ژی راگه‌هاند كو زۆلم و زۆرداریا ل سه‌ر مامۆستایان ب چو ره‌نگه‌كێ ناهێته‌ قه‌بوولكرن، ب سالانه‌ زۆلم ل كوردان دهێته‌ كرن و نها ژی ناهێلن كو مامۆستایێن كورد ب ئه‌ركێ خوه‌ رابن و زارۆیان فێرێ زمانێ كوردی بكه‌ن، لێ وه‌كو ئه‌نجوومه‌نێ مامۆستایان ل رۆژهه‌لاتێ كوردستانێ مه‌ بریار دایه‌ كو به‌رده‌وامیێ بده‌ینه‌ چالاكیێن خوه‌ و مه‌ دڤێت ده‌وله‌ت گرنگیێ بده‌ته‌ زمانێ كوردی و رێزێ ل داخوازیێن مامۆستایان ژی بگریت و گۆت: (ئه‌م بێده‌نگ نامینین و مه‌ ب فه‌رمی ژی پشته‌ڤانیا خوه‌ بۆ مامۆستایێن كورد ل باژێرێ مه‌ریوانێ و باژیرێن دی یێن رۆژهه‌لاتێ كوردستانێ دیار كریه‌ و بێگومان هه‌كه‌ زۆرداریا نها ل سه‌ر مامۆستایان به‌رده‌وام بیت ئه‌م ژی دێ ده‌ست ب چالاكیێن خوه‌ كه‌ین و بێگومان دێ خوه‌نیشادان ژی هێنه‌ كرن).

ئه‌ڤرۆ:

ئه‌ندامه‌كێ شاندێ پارتی دیموكراتی كوردستان ل به‌غدا راگه‌هاند، تاكو دووماهی ده‌مژمێران دێ پشته‌ڤانیێ ل به‌ربژارێ خوه‌ بۆ پۆستێ سه‌رۆك كۆمارێ كه‌ن و دیاركر ئالیێن ئیراقی پێشوازیه‌كا گه‌له‌ك گه‌رم ل به‌ربژارێ پارتی بۆ پۆستێ سه‌رۆكێ كۆمارێ كریه‌.

رێناس جانۆ، ئه‌ندامێ شاندێ دانوستاندكارێ پارتی دیموكراتی كوردستان ل به‌غدا گۆت” شاندێ پارتی ب سه‌رۆكایه‌تیا هشیار زێباری یێ به‌رده‌وامه‌ ل كۆمبوون و دانوستاندنان ل گه‌ل ئالیێن ئیراقی، گاڤێن ئێكێ یێن دانوستاندنان یێن هاتیه‌ هاڤێتن و نه‌خشێ سیاسی یێ رۆهنه‌ ودزانین كیش ئالی نه‌ كو زۆرترین كاریگه‌ری یا هه‌ی”.

رێناسی گۆت ژی” پێشوازیه‌كا گه‌له‌ك گه‌رم ل به‌ربژارێ پارتی بۆ پۆستێ سه‌رۆكێ كۆمارێ هاتیه‌ كرن ودانوستاندنان ئه‌نجامێن باش هه‌بوون، به‌لێ نه‌شێین هه‌موو ئه‌نجامان بۆ راگه‌هاندنێ رۆهن بكه‌ین، به‌لێ ستراتیژ و ئه‌و ئالیێن لێكتێگه‌هشتن ل گه‌ل مه‌ هه‌ی ددیارن، هه‌تاكو ئه‌وێن روونشتنا ئێكێ ژی بایكۆت كری، بۆچوونێن وان سه‌باره‌ت مه‌ د ئه‌رێنی نه‌”.

ل دۆر وێ چه‌ندێ كو رێككه‌فتنا سه‌دری و حه‌لبووسی یا سه‌ركه‌فتی بوو، ئایا پارتی گه‌ره‌نتی ژ سوننه‌یان وه‌رگرتیه‌ كو ده‌نگی ب به‌ربژارێ پارتی بده‌ن بۆ پۆستێ سه‌رۆكێ كۆمارێ، گۆت” هنده‌ك بۆچوونێن په‌رله‌مانتارێن سوننه‌ و شیعه‌ یێن هه‌ین ل دۆر ئێكرێزیا كوردان، جهێ رێزێ نه‌ ل ده‌ف مه‌، چونكه‌ وه‌كو هاندانه‌كێ یه‌ بۆ ئێكرێزیا ناڤمالا كوردی. پارتی هه‌ر ژ ده‌ستپێكێ داخوازا ئێكرێزیێ دكر، ل سالا 2014 پارتی به‌ربژارێ كوردان دناڤ فراكسیۆنێن كوردی دا ئێكلاكر كو فوئاد مه‌عسووم بوو، پاشی ب تێكراییا ده‌نگێن فراكسیۆنێن كوردستانی ده‌رچوو، ل سالا 2018 ژی پارتی هه‌مان داخوازی هه‌بوو كو هه‌موو ئالیێن كوردی ئێكده‌نگ بن، به‌لێ هنده‌ك ئالیان پێداگیری كر كو وه‌سا نه‌بیت، ڤێ جارێ ژی ب هه‌مان شێوه‌، ئه‌م وه‌كو پارتی ب مافێ دستووری یێ خوه‌ دزانین وتاكو دووماهی ده‌مژمێرێ دێ  پشته‌ڤانیێ ل به‌ربژارێ  خوه‌ كه‌ین”.

دیاركر ژی”هیچ ده‌مه‌كی د سیاسه‌تێ دا ده‌لیڤه‌ بۆ رێككه‌فتنا دووماهیێ ناهێت، ئه‌م پۆسته‌كی ب مافێ خوه‌ دزانین و ئالیه‌كی دی ژی پێداگیریێ ل سه‌ر دكه‌ت، ب دیتنا مه‌ و مه‌ ب ئێكه‌تیێ ژی راگه‌هاندیه‌ كو ئه‌و پۆسته‌ ل ده‌ف پارتی بیت دێ كارێ باشتر كه‌ت. ئالیێن ئیراقی ژی به‌رده‌وام گازنده‌ ژ پارتی كریه‌ كو بۆچی گرنگیێ ب به‌غدا ناده‌ت، باشه‌ مه‌ ژی ل به‌غدا هه‌بوون هه‌بیت و ئه‌و روودانێن نه‌خوه‌ش ل ده‌مێن بۆری رووداین نه‌هێلین دووباره‌ ببن و ده‌روونێ خه‌لكی ئارام ببیت، چونكه‌ پارتی ل هه‌رێما كوردستانێ ژی مه‌زنترین فراكسیۆن یا هه‌ی و سه‌رۆكێ وه‌زیران ژی د ده‌ستێ پارتی دایه‌، دبیت ببیته‌ هۆكاره‌ك بۆ زێده‌تر ئاساییكرنا په‌یوه‌ندیێن هه‌ولێرێ و به‌غدا، ئه‌و پۆسته‌ پۆسته‌كێ بلنده‌ و پێدڤیه‌ د ئاسته‌كێ بلند ژی دا ره‌فتارێ دگه‌لدا بكه‌ین”.

رێناس جانۆی ئاماژه‌ كر” ل سالا 2018 ده‌مێ به‌ربژارێ پارتی بۆ پۆستێ سه‌رۆك كۆمارێ ده‌رنه‌چووی، راسته‌ ئه‌و یا گران بوو بۆمه‌، به‌لێ ئه‌م ئالیێ خێرێ بووین و نه‌بووینه‌ ئه‌گه‌رێ ئالۆزیێ و مه‌ پشكداری ژی د حوكمه‌تێ دا كر و مه‌ پشكا هه‌ڤپشكێن خوه‌ ژی دایێ. ژ نوكه‌ و وێڤه‌ پێدڤیه‌ ئالیێن دی ژی ب وی جۆری ره‌فتارێ ل گه‌ل پارتی بكه‌ن، پارتی ل 2014- 2018 مه‌زنترین پۆستێ خوه‌ كو جێگرێ سه‌رۆكێ جڤاتا نوونه‌رێن ئیراقێ بوو دا بزاڤا گۆران بێی كو هیچ منه‌ته‌كێ ل سه‌ر خه‌لكی و ئالیان ژی بكه‌ت”.

هه‌ولێر، قائید میرۆ

سیاسه‌تمه‌دارێ كورد د. مه‌حموود عوسمان دبێژیت، مه‌رج نینه‌ هه‌موو ئالیێن سیاسی پشكداری د حوكمه‌تا داهاتی یا ئیراقێ دا بكه‌ن و ئاسایی یه‌ حوكمه‌ته‌كا زۆرینه‌یا نیشتمانی بهێته‌ پێكئینان، لدۆر پۆستێ سه‌رۆك كۆمارێ ژی دبێژیت، نابیت پارتی و ئێكه‌تی دژایه‌تیا هه‌ڤدوو بكه‌ن لسه‌ر پۆستێ سه‌رۆك كۆمارێ، به‌روڤاژی ئاسایی یه‌ پۆستێ سه‌رۆك كۆمارێ بۆ پارتی بیت و كه‌سه‌كێ پارتی ببیته‌ سه‌رۆك كۆمار، چونكه‌ ئه‌ڤه‌ پرۆسه‌كا دیموكراسیه‌ و دێ كه‌ڤیته‌ ده‌نگدانێ.

د. مه‌حموود عوسمان، سیاسه‌تمه‌دارێ كورد بۆ رۆژناما (ئه‌ڤرۆ) گۆت” گرنگ نینه‌ دێ حوكمه‌تا داهاتی لسه‌ر چ بنه‌ما هێته‌ پێكئینان، به‌لكو یا گرنگ ئه‌وه‌ دێ حوكمه‌تا داهاتی چ كار بۆ ئیراقیان كه‌ت، به‌لێ زۆر ئاسایی یه‌ وه‌كی موقته‌دا سه‌در دبێژیت حوكمه‌تا داهاتی حوكمه‌ته‌كا زۆرینه‌یا نیشتمانی بیت، ئانكو هه‌موو پێكهاته‌یێن سه‌ره‌كی وه‌كو ئه‌ره‌ب و سوننه‌ و شیعه‌ و كورد پشكداریێ تێدا بكه‌ن، لێ گرنگ نینه‌ چه‌ند ئالیێن سیاسی دێ پشكداریێ كه‌ن، چونكه‌ بێگومان هنده‌ك ئالی د به‌رهه‌ڤ نینن پشكداریێ د حوكمه‌تێ دا بكه‌ن یان ژی دخوازن ببنه‌ ئۆپۆزسیۆن بۆ چار سالێن داهاتی، یا گرنگ بۆ خه‌لكێ ئیراقێ ئه‌وه‌ حوكمه‌تا داهاتی دێ هه‌تا چ راده‌ شێت ئاریشه‌یێن ئیراقێ چاره‌سه‌ركه‌ت، ژ به‌ر كو چه‌ندین ئاریشه‌ ماینه‌ هه‌لاویستی وه‌كو پرسا میلیشیێن چه‌كدار و گونه‌هبارێن كوشتنا خوه‌نیشاده‌ران و بابه‌تێن بودجه‌ی و مووچه‌ی و خزمه‌تگوزاریان، له‌وڕا بۆ وه‌لاتیێن ئیراقێ یا گرنگ نینه‌ چ جۆره‌ حوكمه‌ته‌ك دێ بۆ داهاتی هێته‌ پێكئینان، به‌روڤاژی كاركرنا حوكمه‌تێ بۆ خه‌لكی یا گرنگه‌، چونكه‌ ئیراق دناڤا چه‌ندین قه‌یرانان دا ده‌رباز دبیت و پێدڤیه‌ حوكمه‌تا نوو كار بۆ ده‌ربازكرنا ئیراقێ ژ وان قه‌یرانێن كه‌فتیه‌ تێدا بكه‌ت”.

لدۆر پۆستێ سه‌رۆك كۆمارێ ئیراقێ، د. مه‌حموود عوسمان گۆت” پۆستێ سه‌رۆك كۆمارێ ئیراقێ پشكا كوردانه‌ و پێدڤی بوو به‌ری نوكه‌ هه‌موو  ئالیێن كوردی پێكڤه‌ بگه‌هنه‌ رێككه‌فتنێ و به‌ربژاره‌ك هه‌بیت بۆ وه‌رگرتنا پۆستێ سه‌رۆكێ كۆمارێ، نوكه‌ ژی تشته‌كێ ئاسایی یه‌ پۆستێ سه‌رۆكێ كۆمارێ بۆ پارتی بیت، چونكه‌ ئه‌ز وه‌سا دبینم ڤی پۆستی ل ئیراقێ گه‌له‌ك  ده‌ستهه‌لات نینن، یا گرنگ ئه‌وه‌ كورده‌ك ببیته‌ سه‌رۆك كۆمار ڤێجا ئاسایی یه‌ ئه‌و سه‌رۆك كۆماره‌ پارتی بیت، به‌لێ دیاره‌ براده‌رێن ئێكه‌تیێ ڤی پۆستی گه‌له‌ك ب گرنگ دزانن بۆ وان بیت، ب دیتنا من بلا د پڕۆسه‌كا دیموكراسی دا بكه‌ڤیته‌ ده‌نگدانێ و كیش به‌ربژارێ كورد ده‌نگێن پێدڤی بده‌ستڤه‌ئینان ببیته‌ سه‌رۆك كۆمارێ داهاتیێ ئیراقێ، به‌لێ نه‌بیته‌ ئه‌گه‌رێ تێكچوونا په‌یوه‌ندیێن پارتی و ئێكه‌تیێ، ئانكو ب تشته‌كێ نۆرمال وه‌رگرن”.