ئه‌ڤرۆ:
هێشتا پرسا رێككه‌فتنێ دناڤ پێكهاتێ شیعی داب ۆ دروستكرنا مه‌زنترین فراكسیۆنا جڤاتا نوونه‌ران و پیًكئینانا حوكمه‌تا نوو ل به‌رچاڤێ كه‌سێ یێ رۆهن نینه، به‌لێ سه‌در و چارچۆڤێ هه‌ماهه‌نگیێ د بزاڤان دانه جودا مه‌زنترین فراكسیۆنا جڤاتا نوونه‌ران پێًكبینن.
موقته‌دا سه‌در، كوم افێ پێكئینانا حوكمه‌تا نوو یا ئیراقێ دده‌ته خوه ژبه‌ركو خودانێ 73 كورسیێن جڤاتا نوونه‌رایه، به‌رده‌وام دووپاتیێ ل سه‌ر پێكئینانا حوكمه‌تا زۆرینه‌یا نیشتمانی دكه‌ت، چارچۆڤێ هه‌ماهه‌نگیێ ژی داخوازا پشكداریا هه‌موویان دكه‌ت و دووماهی جار ژی پێكئینانا مه‌زنترین فراكسیۆن ل گه‌ل سه‌دری دكه‌ت بۆ پێكئینانا حوكمه‌تێ، به‌لێ هێشتا به‌رسڤه‌كا رۆهن بۆ وێ داخوازیێ نینه.ئه‌ندامه‌كێ لیستا ده‌وله‌تا قانوونێ كو نوری مالكی سه‌رۆكاتیا وێ دكه‌ت دبێژیت ل دووماهیێ دێ هه‌ر ل گه‌ل موقته‌دا سه‌در گه‌هنه رێككه‌فتنه‌كێ و دبێژیت ئه‌و رێككه‌فتن یا نێزیكه.
ناكۆكیێن دناڤ مالا شیعی دا كوورتر لێ هاتینه، هه‌تا نوكه ئاخڤتنا ده‌ستپێكێ و دووماهیێ یا موقه‌دا سه‌در رێبه‌رێ ره‌وتێ سه‌دری، هه‌ر پێكئینانا حوكمه‌تا زۆرینه‌یه، ئه‌و چه‌نده ژی جهێ نه‌رازیبوونا ئالیێن دناڤ چارچۆڤێ هه‌ماهه‌نگیێ یه كو حوكمه‌تا زۆرینه ره‌ت دكه‌ن و به‌رهه‌ڤیا تمام ژی كریه بۆ وێ چه‌ندێ حوكمه‌تا داهاتی پێكبینن و دبێژن مه پێ باشه سه‌در ژی تێدا پشكدار بیت.
حه‌یده‌ر لامی، ئه‌ندامێ فراكسیۆنا ده‌وله‌تا قانوونێ، دبێژیت” ئه‌م دخوازین هه‌موو ئالیێن سه‌ركه‌فتی د هه‌لبژارتنان دا پشكدارببن د پێكئینانا حوكمه‌تا نوو یا ئیراقێ دا، ئه‌م د گه‌شبینین كو دێ گه‌هینه رێككه‌فتنێ ل سه‌ر خالێن ناكۆك ل گه‌ل موقته‌دا سه‌در، ئه‌م ناخوازین حوكمه‌ته‌كێ بێ پشكداریا موقته‌دا سه‌در پێكبینین، چونكه وی سه‌نگێ خوه یێ سیاسی و یێ هه‌لبژارتنان یێ هه‌ی و كه‌سایه‌تیه‌كێ كاریگه‌ره د پرۆسا سیاسی دا، هه‌روه‌سا ئه‌م دخوازین رێزێن خوه یه‌كبێخین ژ پێخه‌مه‌ت پاشه‌رۆژێ، چونكه قۆناغهكا ب زه‌حمه‌ته”.
د هه‌لبژارتنێن پێشوه‌خت یێن جڤاتا نوونه‌رێن ئیراقێ، ره‌وتێ سه‌دری ب ده‌ستڤه‌ئینانا 72 كورسیان دهیچته هژمارتن سه‌ركه‌فتیا ئێكێ د هه‌لبژارتنان دا و یا رژده ل سه‌ر وێ چه‌ندێ كو حوكمه‌تا زۆرینه‌یا نیشتمانی پێك بینیت. هه‌ر چه‌نده پتریا خه‌لكێ ئیراقێ ل گه‌ل حوكمه‌تا زۆرینه‌یه، به‌لێ دبێژن ژی ره‌وشا نوكه یا ئیراقێ پێدڤی ب حوكمه‌ته‌كا سازانا نیشتمانی یه.
قاسم جابر ئه‌لسودانی، مامۆستایێ زانكۆیێ یه دبێژیت” پێدڤیه حوكمه‌تا هه‌ڤپشكیێ بهێته پێكئینان، چونكه دشیان دا نینه هیچ ئالیه‌كێ ئیراقی بهێته پشت گوه هاڤێتن، هه‌تاكو ئێك پێكهات ژی بیت كو سه‌ركردێن مه‌زن وحزبێن مه‌زن و كاریگه‌رن، له‌وما پێدڤیه هه‌ڤپشكی بیت”.
نيشاندان
