مەسرور بارزانی، سەرۆكێ حوكمەتا هەرێما كوردستانێ، دارا ئێكێ یا پڕۆژەیێ كەمەرا كەسك ل باژێرێ هەولێرێ چاند.
د پەیڤەكێدا كو ل رێوڕەسمێ پێشكێشكری، سەرۆكێ حوكمەتا هەرێمێ ئاماژە ب گرنگییا پڕۆژەی بۆ پاقژكرنا هەولێرێ كر و هۆشداری ژی دا، ژ ئەگەرێ گوهۆڕینا سەقای و ب بیابانبوونێ، ئەگەر هەیە خەلك نەچاری مشەختبوونێ بن كو ئەڤ مشەختبوونە ژی تنێ ل هەرێما كوردستانێ راناوەستیت، بەلكو خەلك دێ بەر ب وەلاتێن ئۆرۆپا ژی مشەخت بن، لەوما داخواز ژ وان وەلاتان كر، هاریكارییا هەرێما كوردستانێ بكەن د سەرئێخستنا پڕۆژەیێن وێ تاكو رێ ل بیابانبوونێ بهێتە گرتن و كاریگەرییا گوهۆڕینێن سەقای بهێنە كێمكرن.
هەڤدەم سەرۆكێ حوكمەتا هەرێمێ ئاماژە ب وێ چەندێ ژی كر، ئەڤ پڕۆژەیە پشكەكە ژ بەرنامەیێن حوكمەتا هەرێما كوردستانێ بۆ هەمەجۆركرنا ژێدەرێن داهاتێ هەرێما كوردستانێ.ب وێرەكی خزمەتا مللەت و وەلاتێ خوە بكەن

د چارچۆڤەیێ رێوڕەسمەكێ بانگەشەیا هەلبژارتنان ل سۆران، سیداد بارزانی، نوونەرێ سەرۆك بارزانی پەیڤەك پێشكێشكر و تێدا گوت» نابیت سیاسەت ل ئیراقێ ب زۆرینە بهێتە سەپاندن، هەكە كورد 100 كورسییان ژی ب دەستڤەبینن، بەلێ هەكە رێككەفتن نەهێنە بجهئینان، دێ هەر وەك كێماتی مینین، ئیراق ل سەر وی بنەمای نەهاتیە دامەزراندن».
نوونەرێ سەرۆك بارزانی دیاركر كو سندووقێن دەنگدانێ پیڤەرە و داخواز كر، ب هەستكرن ب بەرپرسیارەتییا نیشتمانی وەلاتی بچنە سەر سندووقێن دەنگدانێ و
گوت» دەنگدانا مە هەموویان بۆ لیستا 275 یا پارتی، دەنگدانە بۆ ب هێزكرنا كوردستانێ».

دیدار، هۆشەنگ تاجر:

سەرۆکێ ناڤەندا ڤەکۆلینێن کوردی- ئەمریکی دیار دکەت، ئەڤ هەلبژارتنە ژ بۆ ئیراقێ و هەرێما کوردستانێ چارەنڤیسسازن و دڤێت کەسێن بهێز بچنە بەغدا دا بەرگریێ ل مافێن کوردان بکەن و پارتی کەسێن وەلاتپارێز و خوەدان هەلوەست بەربژار کرینە.

کارۆخ خۆشناو سەرۆکێ ناڤەندا ڤەکۆلینێن کوردی- ئەمریکی د دیدارەکا تایبەت دا ل گەل رۆژنامەیا ئەڤرۆ دیار کر، ئەڤ هەلبژارتنە چارەنڤیسسازن و ژ بەر ڤێ یەکێ ژی گرنگە خەلکێ هەرێما کوردستانێ کەسێن وەلاتپارێز و شارەزا هەلبژێرن دا بشێن ل خۆلا بهێت یا پەرلەمانێ ئیراقێ دا بەرەڤانیێ ل مافێن رەوا یێن گەلێ کوردستانێ بکەن، ژ بەر ڤێ یەکێ ژی گرنگە کەسێن وەلاتپارێز کو ل دەف وان هێلین سۆر یێن نشتیمانی هەنە بچنە بەغدا، چونکی کەسێن دچنە بەغدا گرنگە ئەو کەسە بن بشێن نوونەراتیا پرسا کوردی ل ئیراقێ بکەن و گۆت: (گرنگە ڤێجارێ کەسێن دچنە بەغدا شارەزایەکا وان یا گەلەک باش د بابەتێ قانوونی دا هەبیت و هەروەسا گرنگە زمانێ عەرەبی ژی باش بزانن، چونکی ل هەموو جیهانێ پەرلەمانی دو کارێن سەرەکی هەنە ئێک یاسادان و خالا دی ژی چاڤدێریە، ڤێجا گرنگە کەسێن ڤێجارێ بچنە بەغدا کەسێن خوەدان شیان، وەلاتپارێز، خوەدان هەلوەست و زیرەک بن، ئانکو دڤێت وەکو دەنگدەرێن هەرێما کوردستانێ ئەم کەسێن وەسا هەلبژێرین).
ناڤهاتی د بەردەوامیا ئاخڤتنا خوە دا ئەو یەک ژی دیار کر، بەغدا هەتا نها ژی ماددەیێن دستووری بجه نائینیت و زۆرداریێ ل گەلێ کوردستانێ دکەت، ڤێجا گرنگە یێن وەکو نوونەرێن کوردان دچنە بەغدا بشێن کار بۆ هندێ بکەن دستوور وەکو خوە بهێتە بجهئینان، دڤێت ژبیر نەکەین هەتا نها ژی ئەو هزرا ل بەغدا هەیە یا ناڤەندیە و باوەریا وان ب فیدرالیێ نینە، ژ بەر ڤێ یەکێ ژی ئەز دبێژم ئەو کەسێن وەکو نوونەرێن کوردان بچنە بەغدا دڤێت شەڕی بۆ سیستەمێ فیدرالی و دستوورێ نها یێ ئیراقێ بکەن و گۆت: (هەتا نها ٦٢ ماددە ل دستوورێ ئیراقێ یان هاتینە راگرتن یان ژی نەهاتینە بجهئینان کو پڕانیا وان ژی ل دۆر هەرێما کوردستانێ نە، وەکو ماددێ ١٤٠ و گەلەک ماددەیێن دی، حوکمەتا نها و حوکمەتێن بەری وان ژی زۆرداری ل هەرێما کوردستانێ کرینە، ژ بەر ڤێ یەکێ ژی دڤێت ئەم کەسێن وەسا بکەینە نوونەرێن خوە کو براستی ژی کار بۆ مافێن خەلکێ کوردستانێ ل بەغدا بکەن).
سەرۆکێ ناڤەندا ڤەکۆلینێن کوردی- ئەمریکی ئەو یەک ژی دیار کر، هەکە ئەم بەرێ خوە بدەینە لیستا ٢٧٥ یا پارتی دیموکراتی کوردستان ئەم دبینین کو کەسێن وەلاتپارێز، خوەدان هەلوەست و زیرەک هاتینە بەربژارکرن و ئەو یەک ژی بێگومان گەلەک گرنگە، چونکی هەکە ئەم دەنگێ خوە بدەینە کەسێن نیشتیمانی و زیرەک و خوەدان هەلوەست و ئەو ژی ل بەغدا بەرگریێ ل مافێن رەوا یێن گەلێ کوردستانێ بکەن وی دەمی دێ کاروانێ ئاڤەدانیێ ل هەرێما کوردستانێ ژی بەردەوام بیت، ژ بەر ڤێ یەکێ ژی ئەز دبێژم ئەڤ هەلبژارتنە چارەنڤیسسازن و گۆت: (سەرکەفتنا کوردان د ڤان هەلبژارتنان دا دێ بیتە ئەگەر هەرێما کوردستانێ بەر ب قووناغەکا دی یا گەشەپێدانێ و ئاڤەدانیەکا باشتر ڤە بچیت، چونکی دڤێت کورد بشێن ل بەغدا شەڕی بۆ مافێن خوە بکەن و سەرکەفتنا نوونەرێن کوردان ل بەغدا ژی دێ بیتە ئەگەرێ بهێزبوونا پێگەهێ هەرێما کوردستانێ و بەردەوامیا خوەشگوزەرانیێ بۆ هەموو وەلاتیان).

رۆژا چوارشەمبى 29ی چريا ئێکێ 2025، ل باژێرێ دهۆكێ، سه‌رۆك مه‌سعود بارزانى ل گه‌ل ژماره‌یه‌كا خه‌لك و ته‌خ و چينێن باژێرێ دهۆكێ كۆمبوو.
د وێ كۆمبوونێ دا، سه‌رۆك بارزانى په‌یڤه‌ك پێشكێش كر و ئاماژه‌ ب چه‌ند ته‌وه‌رێن په‌یوه‌ندى د گه‌ل ره‌وشا نها و هه‌لبژارتنێن خولا شه‌شێ یا جڤاتا نوونه‌رێن ئێراقێ دا.
ده‌رباره‌يی هه‌لبژارتنێن ل كوردستان و ئیراقێ، سه‌رۆك بارزانى ئاماژه‌ ب وێ چه‌ندێ دا كو ل سالا 1991ێ ل ده‌ما سه‌رهلدانێ كه‌سێ هزرا هه‌لبژارتنان نه‌دكر و مه‌ باسێ هه‌لبژارتنا كر. وێ چه‌ندێ ژى دووپات كر كو پارتى هه‌ر ژ ده‌ستپێكێ باوه‌رى ب هه‌لبژارتن و ده‌نگێ خه‌لك و وه‌لاتى هه‌بوو و پارتى هه‌ر ژ هه‌لبژارتنێن ده‌ستپێكا هه‌تا دوماهیك هه‌لبژارتن هه‌ر يا ئێكێ بوويه‌.
هه‌روه‌سا سه‌رۆك بارزانى ئاماژه‌ ب وێ چه‌ندێ دا كو پارتى هه‌رده‌م‌ خۆ ب به‌رپرسیار زانييه‌ و چ جاران ژ به‌رپرسيارييێ نه‌ره‌ڤيه‌‌ و به‌رپرسيارى نه‌ئێخستيه‌ سه‌ر ‌ستوويێ كه‌سێ، هه‌ڤدژى ڤێ ئێكێ‌ به‌رپرسيارييا خه‌لكێ دیتر ژى هه‌لگرتييه‌.
ده‌رباره‌ی هه‌لبژارتن و قۆناغا پشتى هه‌لبژارتنێ ل ئيراقێ، سه‌رۆك بارزانى هيڤى خواست كو پشتى هه‌لبژارتنان، ره‌وش باشتر لێ بهێت و بهێته‌ گوهۆرين و هيڤى خواست كێشه‌ بهێنه‌ چاره‌سه‌ركرن. سه‌رۆك بارزانى دووباره‌ سوپاسيا خه‌لكێ كوردستانێ كر بۆ خۆڕاگرييا وان به‌رامبه‌ر هه‌موو پيلانان و نه‌هنارتنا مووچه‌ی و سه‌لماندن كو بۆ چ تشتى سه‌رى نادانن.
د پشكه‌كا دى یا وێ كۆمبوونێ دا سه‌رۆك بارزانى باس ل دستوورێ ئيراقێ كر و راگه‌هاند كو ئه‌و د‌ستوور وه‌كو خۆ بهێته‌ بجهئينان گه‌له‌ك ژ كێشان دێ هێنه‌ چاره‌سه‌ركرن. هه‌ر ل سه‌ر بابه‌تێ هه‌لبژارتنان، سه‌رۆك بارزانى دووپات كر كو هه‌ر هه‌لبژارتنا گرنگيا خۆ هه‌يه‌ و دڤێت ئه‌ڤ جاره‌ ژى هێز و مه‌زناھيا پۆستێ پارتى نيشا هه‌مووان بده‌ين‌، هه‌ر كه‌سه‌كێ ژى وژدان هه‌بيت، دزانيت مه‌سه‌لا پاراستن و ئه‌ركێ پاراستنا كوردستانێ ل سه‌ر ‌ستوويێ كيێيه‌ و دێ زانيت ئه‌و خزمه‌تا د بوارێ ئاڤاكرنێ و په‌روه‌رده‌ و ساخله‌مى و خزمه‌تگوزارى و ئاسايش و سه‌قامگیرى و ئابوورى و گه‌شه‌پێدان و پێشخستنا ژێرخانا كوردستانێ و پرۆژه‌یێن ستراتيژى و پێشخستنا كه‌رتێ رێك و پرا و گه‌شتيارى هاتیيه‌ كرن، پارتى كریيه‌ كو ئه‌ڤ چه‌نده‌ ب ساناھی ب ده‌ست نه‌هاتينه‌. هه‌روه‌سا باس ل پاراستنا ئاڤێ و گرنگيا پرۆژه‌یێن به‌نداڤ و پۆندان كر كو بۆ داهاتوويا كوردستانێ ل بوارێ ئاڤێ گرنگييا زۆر هه‌يه‌ و خه‌لك ل پاشه‌رۆژێ دێ زانيت كو چ كاره‌كێ مه‌زن هاتیيه‌ كرن.
فه‌رهه‌نگ و كه‌لتۆرێ پێكڤه‌ژيانێ ل كوردستانێ ته‌وه‌ره‌كێ دیتر یێ په‌یڤا سه‌رۆك بارزانى بوو. ل دۆر وێ چه‌ندێ ته‌كست ل سه‌ر شانازيكرن ب ڤى فه‌رهه‌نگا مه‌زن ل كوردستانێ و زێده‌تر چه‌سپاندن و به‌رده‌وامیدان ب بنه‌مايێن پێكڤه‌ژيانێ كر.
ده‌رباره‌ی پێكئينانا حوكمه‌تا نوو یا هه‌رێما كوردستانێ، سه‌رۆك بارزانى باس ل به‌رده‌واميا هه‌ولان د ناڤبه‌را پارتى ديموكراتى كوردستان و ئێكه‌تييا نيشتمانى كوردستانێ دا كر ب گۆره‌ى ئیستحقاقێ هه‌لبژارتنا و هيڤى ژى خواست هه‌ر چ زووتره‌ حوكمه‌تا نوو بهێته‌ پێكئينان.
سه‌رۆك بارزانى داخواز ژى كر كو هه‌لمه‌تا بانگه‌شا هه‌لبژارتنا خولا شه‌شێ یا جڤاتا نوونه‌رێن ئيراقێ ب ئارامى و هێمنى و دوور ژ توندوتيژيێ بهێته‌ ب رێڤه‌برن.

دوهی چارشەمبی 29/10/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل شێخ نەهرۆ شێخ محەمەد كەسنەزانی، سەرۆكێ تەریقەتا عەلییا قادری یا كەسنەزانی ل جیهانێ كر، د دیدارەكێدا بیر و بۆچوون ل دۆر رەوشا گشتییا هەرێما كوردستانێ و دوماهی پێشهات و گوهۆڕینێن ئیراقێ هاتنە لیكگۆهارتن.
هەردو ئالییان، دوپاتی ل گرنگییا داكۆكیكرنێ ژ مافێن دەستووری یێن خەلكێ كوردستانێ كر.

ئەندامەكێ كۆمیتەیا ناڤەندییا پارتی دیموكراتی كوردستان ئاماژە ب وێ چەندێ دكەت، ب دروستبوونا پارتی، هیڤی بۆ گەلێ كورد و كوردستانییان دروست بوویە، هەروەسا دبێژیت: پارتی هیچ ئالییەكی ل كوردستانا ئیراقێ ب هەڤڕكێ خوە نزانیت، باوەرییەكا تمام ژی ب خوە هەیە، چونكە پشتگەرمە ب دیرۆكا خوە و رێبازا بارزانی و دەستكەفتان كو سیاسەتا حەكیمانەیا سەرۆك بارزانی ب دەستڤە هاتینە.
ئاری نانەكەلی، ئەندامێ كۆمیتەیا ناڤەندییا پارتی دیموكراتی كوردستان گوت» پارتی ب درێژییا خەباتا خوە حزبا پڕۆژە و دەستكەفتان بوویە و هەردەم خودانا سۆزێن خوە یا راستەقینە بوویە».
ئاری نانەكەلی گوت ژی» پارتی دیموكراتی كرودستان ب دەستكەفتێن خوەڤە گەشە كریە و د دەمەكێدا دروست بوو كو خەلكێ كوردستانێ تووشی بێهیڤیێ ببوون و پارتی شیا هیڤیێ بۆ خەلكی بزڤرینیت».
دوپاتكر ژی» پارتی خودانا پڕۆژەیێن ستراتیژی بوو و سۆزێن خوە بجهئیناینە، ڤێ چەندێ ژی وەكریە جهێ باوەرییا خەلكێ كوردستانێ بیت».
وی ئەندامێ كۆمیتەیا ناڤەندییا پارتی ئاماژە كر ژی» كابینەیا نەهێ یا حوكمەتا هەرێما كوردستانێ، كو پارتی تێدا هێزا ئێكێیە و سەرۆكێ حوكمەتێ ژی ژ پارتییە، سەرەرای هەبوونا قەیرانان، بەلێ بەردەوامبوو د خزمەتكرن و پێشكێشكرنا پڕۆژەیێن ئاڤەدانیێ و خوەشگوزەرانیێ».
رۆهنكر ژی» خەلكێ كوردستانێ ڤی واقعی دبینن، ب تایبەت ب دیاركری چەند پڕۆژەیێن مەزن و سەرانسەر و بێجوداهی پێشكێشی خەلكێ كوردستانێ كرینە ژوان ژی: پڕۆژەیێ رۆناهی ( كارەبایا 24 ساتی) و ئاڤ و خزمەتگوزاری كو بۆ هەموو خەلكێ كوردستانێ نە نەك بۆ پارتی».
نانەكەلی د پشكەكا دی یا ئاخڤتنێن خوە دا دوپاتكر» پارتی د هەموو كارنامەیێن هەلبژارتناندا كۆمەكا پڕۆژەیێن گەلەك گرنگ بێی جوداهی، ل هەموو كوردستانێ، ل هەموو باژێر و باژێركان بۆ خەلكێ كوردستانێ راگەهاندینە. هەموو عتەئكید و پێداگرتنا پارتی ل سەر وێ چەندێ بوویە كو پڕۆژە بگەهنە د ناڤ هەموو باژێر و دەڤەرێن كوردستانێدا. ئەو سۆزێن كو داینە خەلكێ كوردستانێ چاوان بوو و نوكە چاوانە. پارتی ژ روویێ ئاڤەدانیێ و ژ روویێ خوەشگوزەرانیێ و ژ روویێ پێدڤیێن ژیانێ بۆ وەلاتییان، ل رێزا بەراهیێیە. بۆچی؟ ژ بەر وێ چەندێ كو باوەرییا خەلكی ب دەستڤە دئینیت، خەلك دەنگی د دەنی و ل بانگەشیان سۆزێ د دەتە خەلكی، دێ ڤێ كەم، پشتی هەلبژارتنان سۆزێن خوە بجهـ دئینیت. ب تایبەتی ل كابینەیێن ئێك د دووڤ ئێكدا و كابینەیا نەهێ كو دبینین كابینەیەكا قەیران هاتبوو بەراهییا وێ، ژ وان هاتنا كۆرۆنایێ، بودجە هاتە بڕین، كێشەیا مووچەی روودا، بەلێ د خزمەتكرنێ و ئاڤەدانیێدا نە راوەستییایە».
ناڤبری گوت ژی» پارتی خودانا سۆزا راستەقینەیە بۆ بجهئینانێ و د هەمان دەمدا خودانا ب دەستڤەئینانا وان دەستكەفتانە كو بۆ هەموو كوردستانێ و بۆ باژێر و باژێركان و هەموو وەلاتییانە بێی هیچ جوداهییەك».
ئاری نانەكەكی باس ل وێ چەندێ ژی كر» هەكە ب دەستكەفتان بیت، پارتی ل ناڤخوەیا هەرێما كوردستانێ و هەتا ل ئیراقێ ژی هیچ هەڤڕكەك نینە، ب تایبەتی ل وارێن سیاسی و دیپلۆماسی و ئاڤەدانی و خزمەتگوزاری و ئاسایش و ئارامی و پێكڤەژیان و سەروەرییا قانوونێ و هەموو وارێن دی ژی».
دیاركر ژی» چاڤێ خەلكێ هەرێما كوردستانێ ب گشتی ل پارتییە، خەلك دزانن پارتی تاكە ئالیێ سیاسییە دشێت ژبلی دابینركنا خزمەتگوزارییان، هەڤدەم پارێزەرا راستەقینەیا مافێن دەستووری یێن وانایە ژی ل ئیراقێ و چو جاران خەمساریێ ناكەت، بۆ نموونە: ل هەموو وان قەیرانێن روو ب روویێ هەرێما كوردستانێ بووین و رێگری و ئاستەنگ بۆ هاتینە دروستكرن، بەلێ پارتی هێزەك د هەموو واراندا راوەستا بۆ وێ چەندێ هەرێما كوردستانێ ب هێزتر بیت و حوكمەتا هەرێمێ ب هێزتر بیت و داكۆكیكارەكا دژواربوویە بۆ ب دەستڤەئینانا مافێن رەوا یێن گەلێ كوردستانێ ب تایبەتی ل هەموو ئیراقێ، ئەڤە ژی ئەو واقعەیە كو پێدڤی ب باسكرنێ ناكەت و خەلك ب چاڤێن خوە ب رۆهنی و رەوانی دبینن».
دوپاتكر ژی» وەك سەرۆك بارزانی و مەسرور بارزانی، جێگرێ سەرۆكێ پارتی دبێژن» پارتی ل كیرێ بیت، دێ كورد و كوردستان دێ ب هێز بن».
ل دوماهیێ گوت» مەبەستا مەیە خەلكێ كوردستانێ تێبگەهن، ئەو پارتا كو ل دەمێن بۆری خزمەتا وان كری، دل ڤان هەلبژارتنان ژی كو دێ سەركەڤیت، پشتڕاست بن ل بەغدا دێ شێت زێدەتر خزمەتا كوردستانێ كەت».

هەولێر، قائید میرۆ

سەركردەیەكێ پارتی دیموكراتی كوردستان راگەهاند ، پێشبینی دهێتەكرن ل هەموو دەڤەران دەنگێن پارتی دیموكراتی كوردستان زێدەببن و دبێژیت، پارتی دێ زێدەتری ئێك ملیۆن دەنگان بدەستڤە ئینیت و بیتە حزبا ملیۆن دەنگان. هەروەسا ئاماژەكر، پارتی مەیدانێ بۆ خەلكەكێ ناهێلیت و دێ بەردەوامبیت ل سەر پاراستنا خەلكێ هەرێما كوردستانێ و ئاخا وێ».
دیاری حسێن، هاریكارێ بەرپرسێ مەكتەبا رێكخستنا پارتی دیموكراتی كوردستان ل كەركووكێ بۆ رۆژنامەیا (ئەڤرۆ) گوت « پارتی كەسێن هەژی و شارەزا كرینە بەربژار بۆ هەموو ئیراقێ و ئەم پشتڕاستین دەمێ دچنە جڤاتا نوونەران دێ بەرگریێ ژ مافێ خەلكێ كوردستانێ كەن، ب تایبەتی بجهئینانا كارنامەیا پارتی و پەیاما سەرۆك بارزانی، بەربژارێن پارتی ئەو كەسێن د بەرژەوەندییا خەلكیدا، دێ كاری بۆ بجهئینانا دەستوورێ ئیراقێ كەن، چونكە هەموو مافێن خەلكێ كوردستانێ د ناڤا دەستووری دانە و پێدڤییە پێگیری ب دەستووری بهێتەكرن، هەر د ئێكەم هەلبژارتنێن ئیراقێ هەتا نوكە هەر بەربژارەكێ پارتی چووبیتە هەموو ئیراقێ بەرگری ژخەلكێ كوردستانێ كریە و پەیاما سەرۆك بارزانی گەهاندیە، ژ بەر كو هەموو مافێن مە د ناڤا پەیاما سەرۆك بارزانی دانە، ل هەلبژارتنێن بۆری یا هەموو ئیراقێ پارتی زێدەتری 800 هزار بدەستڤە ئینابوون و د هەلبژارتنێن ئەڤسالە دێ دەنگێن پارتی بەر ب زێدەبوونێ چن و ئەم باوەرین دێ پارتی ڤێجارێ زێدەتری ئێك ملیۆن دەنگان بدەستڤە ئینیت و بیتە حزبا ملیۆنی، چونكە ژ بلی هەرێما كوردستانێ ل پارێزگەهێن نەینەوا و كەركووك و دیالا ژی دەنگدەرێن پارتی هەنە و دێ پشكداریێ د پرۆسەیا هەلبژارتناندا كەن، لەوڕاژی پێشبینی دهێتەكرن لیستا 275 یا پارتی دیموكراتی كوردستان زێدەتری ئێك ملیۆن دەنگان بدەستڤە بینیت».
دیاری حسێن گوت ژی» پارتی مەیدانێ بۆ خەلكێ گەندەل و سیخۆر ناهێلیت و ب شێوەیەكێ گەلەك بهێزتر دێ پارتی ڤەگەڕیت بەغدا تاكو داكۆكیێ ل هەرێما كوردستانێ وخەلكێ وێ بكەت، سەرۆك بارزانی چەندین مەهان ل بەغدایێ مابوو بۆ چەسپاندنا مافێن خەلكی د ناڤا دەستوورێ ئیراقێدا، نوكە ژی پارتی یا رژدە ل سەر پاراستنا دەستووری و رێ نادەین نەحەزێن هەرێما كوردستانێ مافێن خەلكی بخۆن و پیلانان دژی هەرێما كوردستانێ داڕێژن، ئەركێ پارتییە بەرگریێ ژ كوردستانێ بكەت و رۆژا دەنگدانێ ژی دێ دەنگی دەنە لیستا 275 یا پارتی».
رۆهنكر ژی» ل سەرانسەری هەرێما كوردستانێ بانگەشەیەكا ئارام بڕێڤەدچیت و بەرپرس و ئورگانێن پارتی بەردەوام د ناڤا خەلكیدا نە، شێوەیێ بانگەشەیا پارتی ژی ب گۆڕەی مەزنییا پارتییە وەك حزبا ئێكێ یا كوردستانێ و ئیراقێ، خزمەتێن پارتی و هەلوەستێن سەرۆك بارزانی بەسن بۆ وێ چەندێ خەلك دەنگی بدەتە پارتی و خەلكێ مە یێ وەفادارە هەمبەر پارتی و سەرۆك بارزانی، لەوما ئەم پشتڕاستین ڤێجارێ دێ سەلمینن پارتی هەر ئێكەمینە».

دیدار، هۆشەنگ تاجر:

سەرۆکێ تەڤگەرا ئازادیا کوردستان- سووریێ دیار دکەت د رەوشا نها دا سەرکەفتنا پارتی دیموکراتی کوردستان د بەرژەوەندیا گەلێ کوردستانێ دایە چونکی پارتی هێزەکا مەزن یا نەتەوەیی یە و سەرکەفتنا وێ ئانکو سەرکەفتنا ئیرادا گەلێ کوردستانێ.

مستەفا جومعە سەرۆکێ تەڤگەرا ئازادیا کوردستان- سووریێ د دیدارەکا تایبەت دا ل گەل رۆژنامەیا ئەڤرۆ دیار کر، هەر کوردەک ل هەر جهەکێ ل جیهانێ پارتی دیموکراتی کوردستان وەکو هێزەکا نەتەوەیی دبینیت کو خوەدان پرۆژەیەک مەزنە، ژ بەر ڤێ یەکێ ژی سەرکەفتنا پارتی دیموکراتی کوردستان د ڤان هەلبژارتنان دا ژ بۆ هەموو کوردان یا گرنگە، چونکی پارتی هێزەکا کاریگەرە نە تنێ ل هەرێما کوردستانێ و ئیراقێ بەلکو ل سەر ئاستێ رۆژهەلاتا ناڤین ژی و گۆت: (وەکو تەڤگەرا ئازادیا کوردستان- سووریێ بەری نها ژی مە هەردەم پشتەڤانی ل پارتی دیموکراتی کوردستان و جەنابێ سەرۆک بارزانی کریە و نها ژی ئەم پشتەڤانیا لیستا ٢٧٥ یا پارتی دیموکراتی کوردستان دکەین، کو لیستا جەنابێ سەرۆک بارزانی و یا هەموو کوردانە و بێگومان سەرکەفتنا پارتی دیموکراتی کوردستان دێ بیتە ئەگەرێ بهێزبوونا پێگەهێ کوردان ل ئیراقێ و رۆژهەلاتا ناڤین).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، نها ل رۆژهەلاتا ناڤین گوهۆڕینێن مەزن روو ددەن، هەر کەس دزانیت و دبینیت ژی کو هەر گوهۆڕینەک روو بدەت دێ کاریگەریا خوە ل سەر کوردان هەبیت و ژ بەر ڤێ یەکێ ژی بهێزبوونا کوردان ب تایبەتی ژی بهێزبوونا پارتی دیموکراتی کوردستان ل پەرلەمانێ ئیراقێ د رەوشا نها دا گەلەک گرنگە و ژ بەر ڤێ یەکێ ژی ئەم پشتەڤانیێ ل لیستا پارتی دیموکراتی کوردستان دکەین و هیڤیدارین لیستا پارتی د ڤان هەلبژارتنان دا بشێت سەرکەفتنەکا مەزن بدەستڤە بینیت.
سەرۆکێ تەڤگەرا ئازادیا کوردستان- سووریێ د بەردەوامیا ئاخڤتنا خوە دا ئەو یەک ژی دیار کر، سەرۆک بارزانی شیا ببیتە فاکتەرەک مەزن و کاریگەر ژ بۆ باشبوونا رەوشا رۆژئاڤایێ کوردستانێ، پشتی هەڤدیتنا جەنابێ سەرۆکی ل گەل مەزلوم عەبدی و سازکرنا کۆنفرانسێ نەتەوەیی نها رەوشا رۆژئاڤایێ کوردستانێ گەلەک باش بوویە، ئەو یەک ژی نیشا ددەت کو سەرۆک بارزانی خەمخۆرێ هەموو کوردانە و ژ بەر ڤێ یەکێ ژی ئەم وەکو تەڤگەرا ئازادیا کوردستان- سووریێ هیڤیدارین پارتی بشێت ب هێزەکا مەزنڤە بچیت بەغدا و بەرەڤانیێ ل مافێن رەوا یێن گەلێ کوردستانێ بکەت و گۆت: (پارتی دیموکراتی کوردستان د رەوشێن هەری سەخت و دژوار دا ژی بەرگری ل کوردستانێ و مافێن خەلکێ کوردستانێ کریە، ژ بەر ڤێ یەکێ ژی هەر کوردەک پێ خوەشە دیسان پارتی سەرکەڤیت دا هەم کوردستان بهێز بیت و هەم ژی کورد بگەهنە هەموو مافێن خوە).
مستەڤا جومعە د دووماهیا ئاخڤتنا خوە دا ئەو یەک ژی دیار کر، دبیت د دەمەکێ نێزیک دا گوهۆڕینێن گەلەک مەزن ژی ل رۆژهەلاتا ناڤین و ئیراقێ دا روو بدەن، بێگومان د رەوشەکا وەسا دا گرنگە کورد بهێز بن و خوەدان بریار بن، پارتی هێزەکا مەزن و کاریگەرە و دشێت بریارێن چارەنڤیسساز ژی ژ بۆ کوردان بدەت، ژ بەر ڤێ یەکێ ژی ئەم دبێژین سەرکەفتنا لیستا پارتی دێ بیتە ئەگەر دا کورد بشێن د ڤان گوهۆڕینان دا پتر رۆلێ خوە ببینن، ئەم ب سەرکەفتنا پارتی دلخوەشین و سەرکەفتنا لیستا پارتی سەرکەفتنا ئیرادا گەلێ کوردستانێ یە.

هاریكارێ سەرۆكێ حوكمەتا هەرێما كوردستانێ دبێژیت، هەولێرێ هەموو پێگیریێن خوە بەرامبەر بەغدا بجهئیناینە و ئیراقێ هیچ خالەك نینە كو نوكە بشێت مووچەی گیرو بكەت. هەروەسا ئاماژە ب وێ چەندێ دكەت، دێ بزاڤێن تمام كەن كو د مەها11 دا مووچەیێ مەهێن 9 و 10 پێكڤە بهێنە هنارتن، لقا بانكا ناڤەندییا ئیراقێ ژی ل هەولێرێ پارەیێ پێدڤی هەیە بۆ بەلاڤكرنا دو مووچە و سێ مووچەیان.
رێباز حەملان، هاریكارێ سەرۆكێ حوكمەتا هەرێما كوردستانێ راگەهاند «بەرهەڤییان بۆ كۆمكرنا 120 ملیار دیناران دكەین و وەكو داهاتی نە پەترۆلی دێ چیتە سەر هەژمارا وەزاراتا داراییا ئیراقێ كو 48 ملیار دینار دێ ژ سلێمانیێ بن و ئەوێ دی ژ هەولێرێ و دهۆكێ، بۆ وێ چەندێ بشێین ب گۆڕەی وان ئاخڤتنێن ل گەل بەغدایێ هاتینە كرن، ل دەستپێكا مەها 11 مووچەیێ مەها 9 بهنێرن و ئەم ژی ئێكسەر بەلاڤ بكەین».
گوتژ ی» حوكمەتا هەرێما كوردستانێ هەموو پێگیریێن خوە بەرامبەر حوكمەتا فیدرالییا ئیراقێ بجهئیناینە، ژ وان ژی هنارتنا پەترۆلێ، هنارتنا داهاتێ ناڤخوە و پاقژكرنا لیستا مووچەی».
هاریكارێ سەرۆكێ حوكمەتا هەرێما كوردستانێ رۆهنكر ژی» بەغدا هیچ خالەك نینە كو نوكە بشێت بێژیتە هەرێما كوردستانێ یان مووچەی گیرو بكەت».
ئاماژەكر» مەسرور بارزانی، سەرۆكێ حوكمەتا هەرێما كوردستانێ ل رۆژا دەستپێكرنا هنارتنا پەترۆلێ ب محەمەد شیاع سوودانی، سەرۆك وەزیرێن ئیراقێ راگەهاند، هەرێما كوردستانێ پێگیریێن خوە بجهئیناینە و پێدڤییە ئیراق ژی مووچەیێن سالا 2025 بهنێریت».
هاریكارێ سەرۆكێ حوكمەتا هەرێما كوردستانێ دیاركر ژی» مە گەلەك فشار كرینە ل دەستپێكا مەها 11 مووچەیێ مەها 9 بهێتە هنارتن و ل دوماهییا مەها 11 ژی مووچەیێ مەها 10 بهێتە هنارتن».
رێباز حەملانی رەتكر ئیراق بشێت بهانەیێن دارایی بینیت بۆ هنارتنا مووچەی و گوت» ئەو قەیرانە یان ئەو سیولەیە ل هەرێما كوردستانێ كێشە نینە. بانكا ناڤەندییا ئیراقێ كو لقێ خوە ل هەولێرێ هەیە، بەردەوام پارەیێ كاش ل بەردەستدایە بۆ بەلاڤكرنادو مووچە و سێ مووچەیان ژی، ژ بەر وێ چەندێ ئیراق نەشێت وێ بهانەیێ بەرامبەر مە بكاربینیت».
هاریكارێ سەرۆكێ حوكمەتا هەرێمێ داخواز ژ نوونەرێن كورد ل بەغدایێ و سەرۆككۆمارێ ئیراقێ كر كو فشارەكا مەزن بكەن بۆ وێ چەندێ حوكمەتا فیدرالی پێگیریێن خوە بەرامبەر وەلاتیێن هەرێما كوردستانێ بجهبینیت.

دوهی سێشەمبی 28/10/2025، ب بەرهەڤبوونا سەرۆك بارزانی، ل باژێرێ دهۆكێ، پێنجەمین كۆنفرانسێ زانستیێ نێڤدەولەتی بۆ ل دۆرجینۆسایدا گەلێ كورد دەست ب كارێن خوە كر.
د كۆنفرانسیدا سەرۆك بارزانی پەیڤەك پێشكێشكر و راگەهاند: ئەڤرۆ ژی كەسوكارێن شەهید و ئەنفالكرییان، راستە مە ئەزیزێن مەزن ژ د ەستدان، گەلەك خوەشتڤی مە ژ دەستدان، بەلێ ئەو ب سەربلندی چوون و گەهشتنە پلەیا شەهادەتێ، بەلێ ئەوێن ئەو تاوانە كری، ب روو رەشی و شەرمەزاری و سەرشووری چوون».
سەرۆك بارزانی گوت ژی» قەدەرێ گەلێ كوردستانێ ب درێژییا دیرۆكێ هەر ئێش و ئازار و ستەم بوویە، ب تایبەتی ل چەرخێ بۆری ب شێوەیەكێ گەلەك رێكوپێك وبەرنامە بۆ رێكخستی جینۆسایدا گەلێ كوردستانێ دەستپێكر، ل سالا 1975 هەتا سالا 1980 دژی كوردێن فەیلی دەستپێكر ، ل دووڤ هەموو وان پێزانینێن هەین، ژ بلی دەركرنا هزاران خێزانێن فەیلی كو سەدان سال بوون ل ئیراقێ دژیان و تالانكرنا هەموو سەروەت و سامانێ وان،، 12 هزار گەنجێن وان ژی د ژیێ 18 سالیێ هەتا 30 سالیێ هاتنە بێسەروشوونكرن وهەتا ئەڤرۆ ژی كەس نزانیت كۆڕێن وان ل كیرێ نە.»

دەقێ پەیڤا سەرۆك بارزانی:

گەلەك خوەشحالم كو ئەڤرۆ ئەڤ دەلیڤەیە پەیدابوو ئەز ژی د خزمەتا هەوە دا بم. اسمحوا لی ان ارحب بالسادە الكرام الاخوە الاعزا‌و علی حچورهم لهژا المۆتمر المهم الخاص بعملیات الابادە الجماعیە (الجینوساید) فی كوردستان، حچوركم دلیل علی اهتمامكم ومشاركتكم ڵاحزاننا، وما شاهدناه قبل قلیل من صور توپق هژه الجرائم، تدمی القلب، نرجوا الله للشهدا‌و الجنە والصبر والسلوان لنا ولژویهم.

قەدەرێ گەلێ كورد ب درێژییا دیرۆكێ هەر ئێش و ئازار و ستەم بوویە، ب تایبەتی ل چەرخێ بۆری ب شێوەیەكێ گەلەك رێكوپێك و بەرنامەرێكخستی جینۆسایدا گەلێ كوردستانێ دەستپێكر. ل سالا 1975 هەتا سالا 1980 ب كوردێن فەیلی دەستپێكر. ب گۆڕەی هەموو وان پێزانینێن هەین، ژ بلی دەركرنا هزارەها خێزانێن فەیلی كو ب سەدان سالان بوو ل ئیراقێ دژیان و تالانكرنا هەموو سەروەت و سامانێ وان، 12 هزار گەنجێن وان ژی ژ ژیێ 18 سالی هەتا 30 سالی هاتنە بێسەروشوونكرن و هەتا ئەڤرۆ ژی كەس نزانیت گۆڕێن وان ل كیرێ نە.
ئەوا بۆ مە دیاربووی، هەژمارەكا مەزن یا گەنجێن فەیلی و ژ بارزانییان ژی بربوونە عەكاشات و قائیم و ل وێرێ چەكێ كیمیاوی ل سەر تاقیكربوو.
پشتی وێ چەندێ ئەنفالا بارزانییان بوو ل سالا 1983، پاشی ئەنفالا بەرفرهەیا سەرانسەری كوردستانێ ل سالێن 1987 و 1988، پاشی كیمیابارانكرن دەستپێكر ل دۆلا خۆشناوەتی و ل دۆلا بالیسان، هەروەسا ل دەڤەرا نێروە ل ئامێدیێ كو چەندین بارەگەهێن پێشمەرگەی و بارەگەهێ لقێ ئێكێ پارتی دیموكراتی كوردستان هاتنە كیمیابارانكرن، پاشی تاوانا مەزن كو ل 16/3/1988 هاتیە كرن كو كیمیابارانا هەلەبجە بوو كو دشێین بێژین ئەو دووماهییا وان تاوانان بوو یێن دەستپێكرین.
دوماهی جینۆسایدا مەزن كو خوونێ ژ دلێ مرۆڤی دئینیت دەمێ دبینیت، جینۆسایدا ئێزدییان بوو ل سالا 2014، ئەڤە هەموو نیشا ددەن كو قووناغ ب قووناغ چ ستەم ل ڤی مللەتی هاتیە كرن و ئەڤی مللەتی چ قوربانییەك دایە بۆ ڤێ ئازادییا ب دەستڤەهاتی.
ئەڤ تاوانە هندە د مەزنن كە چو جاران ناهێنە ژبیركرن، بەلێ وەرە تو مەزنییا ڤی مللەتی ببینە، خەلكێ كوردستانێ، ئەو رۆژا كو خودای دەستهەلات دایە وان، بەر ب تولڤەكرنێ نەچوون، ب تایبەتی دەمێ سەرهلدانا سالا 1991، دو فەیلەقێن لەشكرێ ئیراقێ كەڤتنە دەستنێ خەلكێ كوردستانێ وپ ێشمەرگەی و جەماوەری، ئێك سەربازێ ئیراقێ ژی نەهاتە كوشتن و سڤكایەتی پێ نەهاتە كرن. هەر ئەو سەربازە بوون كو چار هزار و 500 گوندێن مە وێرانكرین، ئەو بوون كو ئەنفال ئەنجامدای، ئەو بوون كو ئەو هەموو تاوانە ئەنجامداین، بەلێ تاوانبارێن مەزن ئەوبوون كو بڕیارا وان تاوانان دای.
ئەڤرۆ ژی كەسوكارێن شەهید و ئەنفالكرییان، راستە مە ئەزیزێن مەزن ژ دەستدان، گەلەك خوەشتڤی ژ دەستدان، بەلێ ئەو ب سەربلندی چوونە دەف خودایێ خوە، ب سەربلندی چوون و گەهشتنە پلەیا شەهادەتێ، بەلێ ئەوێن ئەو تاوانە ئەنجامداین، ب رووروشی و شەرمزاری و سەرشووری چوون.
چو جاران من تەخمین نەدكر كو رۆژەكێ ژ رۆژان دەلیڤەیەكا وەسا پەیدا بیت كو تولڤەكرن نەهێتە كرن، بەلێ دەمێ گەلێ ئەو وانە نیشا من و نیشا هەموو جیهانێ دای، مخاین قیمەت و قەدرێ وی هەلوەستێ خەلكێ كوردستانێ هێشتا نەهاتیە زانین. باسێ ئاشتەوایێ و موسالەحا نیشتمانی ل ڤی وەلاتی و ل وەلاتی هە دكەن، ئەوا ل كوردستانێ بوو ل هیچ وەلاتەكێ جیهانێ نەبوویە، ل كیش وەلاتێ جیهانێ حوكمەتا وی وەلاتی مللەتێ خوە كیمیابارانكریە ژ بلی كوردستانێ؟ خەلكێ كوردستانێ هاتنە كیمیابارانكرن، دبیت دەولەت ل گەل دەولەتێ د وارێ سەربازی بكارئینابیت، بەلێ مللەتێ خوە كیمیاباران نەكریە، بەلێ ل كوردستانێ وەك مە ئەو وێنە دیتین، زارۆیێن شیرخۆر، دایكێن دوگیان هاتنە شەهید كرن چ ب كیمیابارانێ و چ ب گوللەیان، جهێ گوللەیان نوكە ژی دیار بوو د سەرێن واندا. چاوان ئەو تاوانە دێ هێنە ژبیركرن؟
گرنگ ئەوە كو ئەڤ تاوانە نەهێنە ژبیركرن، بەلێ نڤشێن داهاتی ژی بزانن چ ب سەرێ باب و باپیرێن وان هاتیە و بزانن ئەو ئازادییا هاتیە دەست ب چ بهایەكی هاتیە دەست. منەتا كەسێ نینە و كەسێ خێر ب مە نەكریە.
ئەوا ژ هەموویێ گرنگتر ئەوە كو جارەكادی ئەڤ تاوانە دوبارە نەبن، دڤێت گرەنتییەك هەبیت كو جارەكادی ئەڤ تاوانە نە ل كوردستانێ و نە ل هیچ جهەكێ دی دوبارە نەبن، خەلكێ بێگونەه چاوان ب ڤی شێوەی و ب خوونەكا سار بهێنە شەهیدكرن وەك وێ چەندێ هیچ نەبن؟
ئەڤێ چەندێ راستییەك نیشاندا، دەمێ مللەتەكی ئیرادە هەبیت و خۆڕاگر بیت، سەركەفتن دێ هەر بەهرا وی مللەتی بیت، هیچ جارەكێ ژی نەبوویە د دیرۆكێدا دیكتاتۆر سەركەفتبن، هەموو جاران دیكتاتۆر سەرشۆر بوویە و تێكچوویە. وەك بزانم، هەژمارەكا تاقانەیێن ئەنفالێ ل گەل مە ل ڤێرێ نە د ڤێ هۆلێدا، ئەز ب خێرهاتنەكا گەرم ل وان دكەم. هوون سیمبوولێن بەرخۆدان و شەرەفا ڤی مللەتی نە، هوون ئەزیزێن هەموو مالێن كورد و كوردستانێ نە، هوون خوەشتڤیێن هەر خودان ویژدانەكینە ل سەرانسەری جیهانێ، هەموو كەس كەسێن هەوەنە و هوون ژی كەسێن مە هەموویانە. ئەز دزانم و گەلەك باش هەست ب وێ چەندێ دكەم كو هەوە چ ئێش و ئازار كێشاینە، هەوە چ زەحمەت كێشایە، دایكێن هەوە چەند زەحمەتی ب هەوەڤە كێشایە، بەلێ ئەڤە هەموو جهێ سەربلندیێیە بۆ هەوە و بۆ مە ژی، ئەوا پێدڤی ئەڤرۆ ل سەر حوكمەتا هەرێمێ و ل سەر حوكمەتا فیدرال، قەرەبوویا ڤی خەلكی بهێتە كرن، قەرەبوو نەك ب وێ رامانێ كو ێ تلا خوونا هیچتە هێتە ڤەكرن یان دێ مافێن وان پێ هێنە دان، هیچ سەروەت و سامانەكێ جیهانێ بهایێ وێ خوونێ نینە ئەوا هاتیە رێتن، بەلێ تشتەكێ مەعنەوییە، تشتەكێ رەمزییە بۆ وێ چەندێ دادپەروەری جهێ خوە بگریت، نابیت ئەو تاوانە هوسا ب سادەیی بچن و كەس هیچ حیسابەكێ بۆ نەكەت. تاوانێن گەلەك مەزن هاتینە كرن و قەرەبووكرنا وی خەلكی ئەركێ حوكمەتا فیدرالییە، چونكە ئەو میراتگرا وێ حوكمەتییە كو ئەڤ تاوانە ئەنجامداین و ئەركێ وێیە و نابیت خوە ژ ڤێ پرسێ لابدەت، ئەركێ حوكمەتا هەرێمێ ژی یە كو بەردەوان داكۆكیێ ل سەر ڤێ چەندێ بكەت.
گەلەك گرنگە جینۆساید ل سەر ئاستێ نێڤدەولەتی بهێتە نیاسین، ئەم سوپاسییا جڤاتا نوونەرێن فیدرالی دكەین كو ل سالا 2008 ئەو بڕیارە دای، بەلێ ژ ئالیێ حوكمەتێ ڤە هیچ كار پێ نەهاتە كرن. سوپاسییا پەرلەمانێ سویدی ژی دكەین كو ل سالا 2012، پەرلەمانێ بریتانی ژی ل سالا 2013 كو وەك جینۆساید هاتیە نیاسین. ئەم هیڤی ژ پەرلەمانێن دی ژی دكەین ییچن ئۆرۆپی و دەرڤە ل جیهانێ هەموویێ، ئەوێن ڤەكۆلین كرین و باسكرین، ئەوژی ڤێ بڕیارێ بدەن و ب جینۆساید بهێتە نیاسین و ئەڤ بابەتە ئەركەكێ گەلەك پیرۆزە هەم ل سەر ملێ حوكمەتا هەرێمێ، هەم حوكمەتا فیدرالی ژی دڤێت ژ نوكە و ێڤە یا هاریكار بیت.
د دەستوروێ ئیراقێدا ل مادەیا 132 ئەو هاتە سەپاندن ل سەر حوكمەتێ كو پێدڤییە قەرەبوویا ڤی خەلكی بهێتە كرن، ئەز هیڤیدارم پشتی هەلبژارتنان كو بۆ ئیراقێ ل پێشە، ئێدی رەوشەكا سەلامەتتر و ساخلەمتر بهێتە پێش، رەوشەك بهێتە پێش كو دەستوورێ هەی ئەو حەكەم بیت د ناڤبەرا هەر وەلاتییەكی و حوكمەتێ، هەكە دەستوور حەكەم بیت مە هیچ كێشەیەك نابیت، هەكە مەزاجی كەسی بڕیاردەر بیت، دبیت كێشە بەردەوام بن و دبیت مەزنتر ژی بن، چونكە ب راستی جهێ داخێیە هێشتا هندەك ماینە ل بن كاریگەرییا وێ فەرهەنگێ كو ئەنفال دروستكری، نابیت ئەڤە بمینیت، نابیت ئەو فەرهەنگە ل ئیراقێ بمینیت.
دخوازم سوپاسییەكا مەزن بۆ خەلكێ پارێزگەها موسەننا (سەماوە) بكەم كو گەلەك هاریكار بوون ل گەل تیمێن مە بۆ ڤەدیتنا وان گۆڕێن ب كۆم، خودێ خێرا وان بنڤیست و ئەم چو جاران باشییا وان ژبیر ناكەین. ل ڤێرێ دخوازم سوپاسییا حوكمەتا هەرێمێ و هەموو دامودەزگەهێن پەیوەندیدار بكەم بۆ وان بزاڤێن كرین و پێدڤییە زێدەتر ژی بن و بەردەوام بن. ل ڤێرێ ب تایبەتی سوپاسییا پرۆفیسۆر دكتۆر یاسینی دكەم بۆ وی رۆلێ دیتی چ ل ناساندنا تاوانێن جینۆسایدێ و چ ل ڤەدیتنا گۆڕێن ب كۆم و چ ل ئینانا رۆفاتێن وان. ئەم ژی پەیمانێ ددەینە هەموو ئەزیزێن خوە، هەتا دوماهی هەناسە دێ بزاڤێ كەین ئێك هەستیێ شەهیدێن مە ژی نەمینیت و بینین و هەتا وێ چەندا د شیانێن مە دا بیت.
ب ڤێ هەلكەفتێ و بۆ رێزگرتنێ ل پرۆفیسۆر دكتۆر یاسینی، مە ب پێدڤی زانی كو مەدالییا بارزانی پێشكێشی وی بكەین.