ئه‌ڤرۆ:
به‌رپرسه‌كێ رێڤه‌به‌ریا خوه‌سه‌ر یا رۆژئاڤایێ كوردستانێ راگه‌هاند كو رۆسیا ل دژی هندێ یه كو توركیا پێگه‌هێ خوه ل باكورێ سووریێ بهێز بكه‌ت و ل ئالیێ دی ئه‌مریكا ژی هۆشداری دا توركیا و ژ به‌ر هندێ ژی توركیا هه‌تا نها نه‌شیایه ئێرشی رۆژئاڤایێ كوردستانێ بكه‌ت.
به‌دران چیا ئێك ژ به‌رپرسێن رێڤه‌به‌ریا خوه‌سه‌ر یا رۆژئاڤایێ كوردستانێ بۆ ده‌زگه‌هێن راگه‌هاندنێ دیار كر كو به‌ری سه‌رێ سالێ شانده‌ك ژ وه‌زاره‌تا ده‌رڤه یا رۆسیا ل باژێرێ قامشلۆ ل گه‌ل شانده‌كێ رێڤه‌به‌ریا خوه‌سه‌ر كۆمبوون و د كۆمبوونێ دا شاندێ رۆسیا دیار كر كو ئه‌و ل دژی هندێ نه توركیا ئێرشی باكورێ سووریێ بكه‌ت، چونكو توركیا دڤێت ئاریشان بۆ رۆسیا و شامێ دروست بكه‌ت و ژ به‌ر هندێ ژی ئه‌و رێ ناده‌ن توركیا ده‌ست ب چو ئۆپه‌راسیۆنێن نوو ل باكورێ سووریێ بكه‌ت و گۆت: (ل ئالیێ دی فه‌رماندارێن ئه‌مریكا یێن ل رۆژئاڤایێ كوردستانێ ژی هه‌رده‌م دیار دكه‌ن كو ئه‌و ب چو ره‌نگه‌كێ رێ ناده‌ن توركیا ده‌ست ب ئۆپه‌راسیۆنه‌كا نوو ل دژی كوردان بكه‌ت، چونكو توركیا پشته‌ڤانیێ ل گرۆپێن هشكباوه‌ر ل سووریێ دكه‌ت و ژ به‌ر سیاسه‌تا شاش یا توركیا ل سووریێ ره‌وشا وی وه‌لاتی هه‌تا نها ئارام نه‌بوویه).
هه‌مان به‌رپرسێ كورد ئه‌و یه‌ك ژی دیار كر كو ئه‌مریكا هێزێن سووریا دیموكرات وه‌كو هه‌ڤپه‌یمانێ خوه یێ سه‌ره‌كی ل سووریێ دبینیت و هه‌تا نها ژی ئه‌مریكا به‌رده‌وام هاریكاریا هێزێن سووریا دیموكرات دكه‌ت، ئه‌و یه‌ك ژی بۆ كوردان ل سووریێ گه‌له‌ك گرنگه و گۆت: (به‌ری چه‌ند رۆژان وه‌زیرێ ده‌رڤه یێ رژێما به‌شاری دیار كربوو كو ئه‌مریكا ناهێلیت شام و كوردێن سووریێ ئاریشێن خوه چاره‌سه‌ر بكه‌ن، چو راستی بۆ هندێ نینه، چونكو هه‌تا نها ژی رژێما به‌شاری هه‌بوونا كوردان ل سووریێ قه‌بوول نه‌كریه و شامێ دڤێت وه‌كو به‌ری سالا ٢٠١١ حوكمێ ل هه‌موو سووریێ بكه‌ت، شامێ دڤێت كورد هه‌موو ئاخا كو ب خوونێ ژ ده‌ستێ داعشێ رزگار كری راده‌ستی وان بكه‌ن، ئه‌و یه‌ك ب چو ره‌نگه‌كێ ناهێته قه‌بوولكرن، چونكو كوردان ب هزاران قوربانی ل سووریێ داینه و ئێدی دڤێت كورد بگه‌هنه مافێن خوه یێن ره‌وا، لێ مخابن هه‌تا نها ئه‌و یه‌ك ژ ئالیێ شامێ ڤه نه‌هاتیه قه‌بوولكرن).
ئه‌و یه‌ك د ده‌مه‌كێ دایه كو به‌ری نها مسته‌فا جومعه ئه‌ندامێ مه‌كته‌با سیاسی یا پارتی دیموكراتی كوردستان/ سووریێ ژی د دیداره‌كێ دا ل گه‌ل رۆژناما ئه‌ڤرۆ دیار كربوو كو ئه‌مریكا و رۆسیا ژ بهێزبوونا توركیا ل سووریێ دلگرانن و ژ به‌ر هندێ ژی ئه‌و ب چو ره‌نگه‌كێ رێ ناده‌ن توركیا ده‌ست ب ئۆپه‌راسیۆنه‌كا نوو ل باكورێ سووریێ ئانكۆ رۆژئاڤایێ كوردستانێ بكه‌ت، به‌ری نها ره‌وشه‌ك جودا هه‌بوو و توركیا ژی شیا مفای ژ هنده‌ك هه‌لوه‌ستێ لاواز یێ رۆسیا و ئه‌مریكا وه‌ربگریت و هنده‌ك ده‌ڤه‌رێن رۆژئاڤایێ كوردستانێ داگیر بكه‌ت، لێ نها ره‌وش ب ته‌مامی هاتیه گوهۆرین.
چاڤدێرێن سیاسی یێن رۆژئاڤایێ كوردستانێ ژی دیار دكه‌ن كو دڤێت هه‌ر دو جڤاتێن كوردی یێن رۆژئاڤایێ كوردستانێ ئاریشێن د ناڤبه‌را خوه دا چاره‌سه‌ر بكه‌ن و هه‌روه‌سا په‌یوه‌ندیێن خوه ل گه‌ل ئه‌مریكا و رۆسیا ژی باشتر لێ بكه‌ن، چونكو قه‌یرانا سووریێ ئێدی بوویه قه‌یرانه‌كا نێڤده‌وله‌تی و بێی رۆسیا و ئه‌مریكا قه‌یرانا نها ل سووریێ و ب تایبه‌تی ژی پرسا كوردی ل وی وه‌لاتی ناهێته چاره‌سه‌ركرن.
نيشاندان
