ئەڤرۆ نيوز:
سەرکردێ میلیشیایێن عەسایب ئەھلێ حەق دوھی بۆ ئاژانسا ” تەسنیم” یا ئیرانی راگەھاند، رەنگە میلیشیایێن وان ب رەوشەکا سیاسی یا جودا رازی ببن، کو تێدا شیعە و سونە و کوردێن میانرەو پشتی شەرێ دژی داعشێ بەرنامەی بۆ دانن.
ل گۆر دیتنا قەیس خەز عەلی، ئێکەتی نیشتیمانی کوردستان و بزاڤا گۆڕان کوردێن میانرەون و دبێژیت:(پەیوەندیێن مە ب رەنگەکێ باش ل گەل وان برێڤە دچن).
خەز عەلی ئاشکرا ژی کر کو ژ بەر سەربخوەخوازیێ و حەزا جودابوونێ ژ عیراقێ ژ لایێ مەسعود بارزانی سەرۆکێ ھەرێما کوردستانێ و پارتی ڤە، پەیوەندیێن وان ل گەل بەرەیێ بارزانی د باش نینن و گۆت:(مەسعود بارزانی و پارتی ھەماھەنگیێ وکاری ل گەل ھەر پرۆژەکی دکەن کو زیانێ بگەھیننە عیراقێ و بەحسێ سەربخوەیا ھەرێما کوردستانێ بکەت).
ئەڤرۆ نيوز:
ل گۆر راپۆرتەکا مالپەرێ نێرینا ئازاد پشتی کو رژێما سووریێ ھۆشداری دایە یەپەگێ کو دڤێت ھەتا سەرێ سالێ ھێزێن خوە ژ حەلەبێ دەرخینیت، یەپەگێ ژی پشکەک ژ ھێزێن خوە ژ حەلەبێ بەر ب عەفرینێ ڤە ڤەکێشاینە و رەنگە پشتی سەرێ سالێ ژی ھێزێن مایی ڤەکێشیت و ھەموو تاخێن حەلەبێ کو ل دەستێ وان بوون رادەستی ھێزێن رژێما سووریێ بکەت، ب تایبەتی ژی تاخا شێخ مەقسود و ئەشرەفیە کو پرانیا ئاکنجیێن وێ کوردن.
د بەردەوامیا راپۆرتێ دا ھاتیە دیار کرن کو پشتی حەلەب کەفتیە دەستێ رژێما سووریێ لەشکرێ وی وەلاتی داخواز ژ یەپەگێ کربوو کو ل گەل چەکدارێن شیعە پێکڤە کۆنترولا تاخێن کوردی بکەن لێ یەپەگێ ئەو یەک رەت کربوو و ژ بەر ھندێ ژی ھەتا سەرێ سالێ دەلیڤە بۆ وان ھاتبوو دان دا ژ حەلەبێ دەرکەڤن. لێ بەرپرسێن یەپەگێ ئەو یەک رەت کربوون و دیار کربوون کو رژێما سووریێ چو داخوازیەکا وەسا ل وان نەکریە، لێ پشتی کو یەپەگێ ھێزێن خوە ژ حەلەبێ ڤەکێشای ھەتا نھا چو داخۆیانیێن فەرمی ل دۆر وێ چەندێ نەداینە.
ئه‌ڤرۆ نیوز:
رێڤبه‌رییا خوه‌سه‌ر ل رۆژئاڤایێ كوردستانێ ب فه‌رمی بریار دا په‌یڤا رۆژئاڤا ژ ناڤێ “فێدراسیۆنا دیمۆكرات يا رۆژئاڤا، باكۆرێ سووریێ”، بهێـه ده‌رێخستن و ببیته “فێدراسیۆنا دیمۆكرات يا باكۆرێ سووریێ”.
پشتی چه‌ندین جڤینان ل رمێلان، رێڤبه‌رییا خوه‌سه‌ر یا رۆژئاڤایێ كوردستانێ ناڤێ سیسته‌مێ خوه یێ فێدرالی ل رۆژئاڤایێ كوردستانێ گوهری و ژ “فێدراسیۆنا دیمۆكرات يا رۆژئاڤا، باكۆرێ سووریێ” كره “فێدراسیۆنا دیمۆكرات يا باكۆرێ سووریێ”، په‌یڤا كوردی یا رۆژئاڤا كو ئاماژه دكه‌ته پارچا رۆژئاڤا ژ كوردستانا مه‌زن تێدا نه‌هێلا.
165 ئه‌ندامێن ده‌سته‌یا رێكخستنا جڤاتا دامه‌زرینه‌ر كو په‌یه‌دێ تێدا ده‌ستهه‌لاتداره ده‌نگ دا ڤێ بریارێ.
جڤاتا ته‌ڤده‌مێ ب سه‌ركێشییا په‌یه‌دێ سیسته‌مێ فێدرالیێ بۆ باكۆرێ سووریێ راگه‌هاندییه لێ ژ ئالیێ رژێما سووریێ و ئۆپۆزسیۆنا سووریێ ژی ڤه هاتییه ره‌ت كرن، توركیا و رۆسیا و ئه‌مریكا ژی ل دژی ڤی سیسته‌مییه كو دبێژن دێ سووریێ پارچه كه‌ت.
ئه‌ڤرۆ:
ب مه‌ره‌ما راگه‌هاندنا ئاگربه‌ستێ ل سه‌رانسه‌رێ سووریا، توركیا و رووسیا ل سه‌ر پلانه‌كا پێشنیازكرى بۆ لایه‌نێن شه‌ركه‌ر رێككه‌فتن، پشتى راگه‌هاندنا ئاگربه‌ستێ ل رۆژهه‌لاتێ ناڤه‌ندا حه‌له‌بێ و ڤه‌گوهاستنا ئاكنجیێن وێ، توركیا و رووسیا ل سه‌ر پلانه‌كا پێشنیازكرى بۆ لایه‌نێن شه‌ركه‌ر ل سووریا رێككه‌فتن تاوه‌كو ب تمامى ل وى وه‌لاتى ئاگربه‌ست دهێته راگه‌هاندن.
ئه‌ڤرۆ نيوز:
ل چريا دويێ يا ئه‌ڤ ساله زێده‌ترى 79 هزار رێڤينگان ل ده‌رگه‌هێ نێڤده‌وله‌تى يێ ئيبراهيم خه‌ليل هاتنوچوون كريه.
ل دووڤ راپۆرتا نڤێسنگه‌ها ئاكنجیبوون و پاسپۆرتان ل ئیبراهیم خه‌لیل 79 هزار و 246 رێڤینگان ل ده‌رگه‌هێ ئیبراهیم خه‌لیل هاتنوچوون كریه.
هه‌ر ب گۆره‌ى راپۆرتا نڤێسنگه‌ها ناڤبری كو دیار بوويه 40 هزار و 856 رێڤینگ هاتینه ناڤ هه‌رێما كوردستانێ كو ژ وان حه‌فت هزار و 444 هه‌لگرێن پاسپۆرتێن عيراقینه و 32 هزار و 606 هه‌لگرێن پاسپۆرتێن توركی نه، هه‌روه‌سا 806 كه‌س هه‌لگرێن پاسپۆرتێن بیانی نه.
د ڤێ راپۆرتێ دا يا دانه‌يه‌ك ب ده‌ست ئه‌ڤرۆ نيوز كه‌فتى دیاربوويه ژى 38هزار و 390 رێڤینگ ب رێیا ده‌رگه‌هێ ئیبراهیم خه‌لیل چووینه وه‌لاتێ توركیا كو ژ وان چار هزار و 935 كه‌س هه‌لگرێن پاسپورتێن عيراقی نه، 32 هزار و 554 هه‌لگرێن پاسپورتێن توركی نه و 901 كه‌س هه‌لگرێن پاسپۆرتێن بیانی نه.
ئه‌ڤرۆ نيوز:
ب گۆره‌ى راپۆرتا ناڤه‌ندا چالاكيێن مافێ مرۆڤى ل ئيرانێ، د رۆژێن بۆرى دا دو زيندانكريێن دى يێن كورد د زيندانا ناڤه‌ندى يا ئه‌راك ژ لايێ ده‌زگه‌هێ دادوه‌ريێ ئيرانێ هاتنه سێداره‌دان.
مالپه‌رێ كۆمه‌لا چالاكێن مافێ مرۆڤى ل ئيراني “هێرانا” به‌لاڤكر كو رۆژا ئێكشه‌مبى 26ى كانوونا ئێكێ 2016 دو زيندانكريێن دى يێن كورد كو خه‌لكێ “پۆلدۆخته‌ر” ب ناڤێن “وه‌ليوئه‌لا ره‌شنوو و قوده‌ت ئيبراهيمى” ل پارێزگه‌ها لورستان ژ لايێ ده‌زگه‌هێ دادوه‌ريێ ئيرانێ ڤه ب تۆمه‌تا “قاچاخى و فرۆتنا ماددێن هۆشبه‌ر” ل گه‌ل زيندانيه‌كێ دى كو هه‌تا نوكه ناسناما وى يا ديار نينه سێداره دان”.
ب گۆره‌ى ئامارێن تۆماركرى ژ ناڤه‌ندا ئامارا مالپه‌رێ “هه‌نگلۆ” د ماوێ 100 رۆژێن بۆرى دا ل زيندانێن ئيرانێ و باژێرێن كوردستانێ ل رۆژهه‌لات د هه‌ر دو رۆژان دا كورده‌ك ژ لايێ ده‌زگه‌هێ دادوه‌رى يێ ئيرانێ ڤه دهێته سێداره دان.
ئه‌ڤرۆ نيوز:
ژ ده‌سپێكا شه‌رێ دژى داعش و هه‌تا نوكه هزار و 654 پێشمه‌رگه شه‌هيد بووينه و 9 هزار و 707 پێشمه‌رگه بريندار بووينه و 62 پێشمه‌رگه د بێ شه‌روشوونن، ئه‌ڤه ژى ب گۆره‌ى ئامارا ده‌زگه‌هێ ساخله‌ميا پێشمه‌رگه‌ى ل هه‌ولێر.
شه‌مال جه‌بار ياوه‌ر، سه‌رۆكێ ده‌زگه‌هێ ساخله‌مييا پێشمه‌رگه‌ى ئه‌ڤرۆ د كۆنگره‌كێ رۆژنامه‌ڤانى دا راگه‌هاند: ب گۆره‌ى ئامارێن فه‌رمى كو ژ وه‌زاره‌تا پێشمه‌رگه‌ى وه‌رگرتينه، ژ 10ى تيرمه‌ها 2014ێ هه‌تا 27ى ڤێ هه‌يڤێ هزار و 654 پێشمه‌رگه ل شه‌رێ دژى داعش شه‌هيد بووينه و 9 هزار و 707 ژى بريندار بووينه و 62 پێشمه‌رگه ژى د بێ سه‌روشوونن”.
ئه‌ڤرۆ نيوز:
وه‌زاره‌تا ده‌رڤه يا ئه‌مريكا داخوازێ ژ په‌كه‌كێ دكه‌ت كو شنگال چۆل بكه‌ت و وه‌سان دبينيت كو ئه‌گه‌ره‌كه ل هه‌مبه‌ر ئاشتيێ و ڤه‌گه‌ريانا خه‌لكێ ئاواره بۆ سه‌ر مال و حالێن خوه.
مارك تۆنه‌ر، جێگرێ ئاخفتنكه‌رێ وه‌زاره‌تا ده‌رڤه يا ئه‌مريكا رۆژا سێشه‌مبى 18ى كانوونا ئێكێ 2016 د كۆنگره‌كێ رۆژنامه‌ڤانى دا راگه‌هاند “په‌كه‌كه ژ لايێ ئه‌مريكا ڤه وه‌كو گرۆپه‌كێ تيرۆرستى هاتيه نياسين و پێدڤى ناكه‌ت چو رۆله‌ك د شنگال دا هه‌بيت”.
گۆتژى: “باوه‌ريا مه يا وه‌سايه كو هه‌بوونا په‌كه‌كێ ل شنگال ئه‌گه‌ره‌كێ مه‌زنه ل به‌رامبه‌ر ئاشتيێ و ڤه‌نه‌گه‌ريانا ئاواران و ئه‌و كه‌سێن مال و حالێن خوه ب جهـ هێلاين، ژ به‌ر هندێ ژى پێدڤيه ده‌ڤه‌رێ چوول بكه‌ن”.
نيشاندان