ئه‌ڤرۆ، عه‌زیز هه‌ورامی
پشتی هه‌لبژارتنێن گشتی ل ئیراقێ ل 10 چریا ئێكێ 2021 و ژ ئه‌گه‌رێ ناكۆكیێن دناڤ مالا شیعی و كوردی و سوننی هه‌تا نوكه سه‌رۆك كۆمارێ نوو و سه‌رۆكێ نووی ێ حوكمه‌تێ نه‌هاتینه ده‌ستنیشانكرن. سه‌رۆكا فراكسیۆنا پارتی ژی ل جڤاتا نوونه‌رێن ئیراقێ دبێژیت درژدین ل سه‌ر وه‌رگرتنا پۆستێ سه‌رۆك كۆماری و ب هیچ شێوه‌كی رێبه‌ر ئه‌حمه‌د ژی به‌ربژارێ پارتی بۆ وی پۆستی خوه ڤه‌ناكێشیت.
ڤیان سه‌بری، سه‌رۆكا فراكسیۆنا پارتی دیموكراتی كوردستان ل جڤاتا نوونه‌رێن ئیراقێ بۆ رۆژناما (ئه‌ڤرۆ) گۆت” پارتی یا رژده ل سه‌ر وه‌رگرتنا پۆستێ سه‌رۆك كۆمارێ ئیراقێ و رێبه‌ر ئه‌حمه‌د به‌ربژارێ پارتی یه و بزاڤێن جدی دكه‌ین بۆ سه‌ركه‌فتنا وی”.
ڤیان سه‌بری گۆت ژی” نه‌شێم بێژم كیش رۆژێ د هه‌فتیێ دا دێ جڤاتا نوونه‌رێن ئیراقێ كۆمبیت بۆ هه‌لبژارتنا سه‌رۆكێ نووی ێ كۆمارا ئیراقێ كو هه‌تا نوكه 45 كه‌سان بۆ وه‌رگرتنا پۆستێ سه‌رۆك كۆماری خوه به‌ربژار كریه”.
دهێته زانین بۆ جارا ئێكێ یه د دیرۆكا نوو یا ئیراقێ دا پشتی ژناڤچوونا رژێما سه‌دام حسێنی، جڤاتا نوونه‌رێن ئیراقێ سێ جاران ده‌رگه‌هێ خوه به‌ربژاركرنێ بۆ پۆستێ سه‌رۆك كۆماری ڤه‌كه‌ت، ئه‌وژی ژ ئه‌گه‌رێ رێكنه‌كه‌فتنا پارتی دیموكراتی كوردستان و ئێكه‌تی نیشتمانی كوردستانه ل سه‌ر به‌ربژاره‌كی بۆ وی پۆستی كو ب گۆره‌ی عورفێ سیاسی و حوكمرانیا ئیراقێ پشتی سالا 2003 ئه‌و پۆسته ب كوردان هاتیه دان.
سه‌رۆكا فراكسیۆنا پارتی ل جڤاتا نوونه‌رێن ئیراقێ دبێژیت” به‌ربژارێ مه وه‌كو پارتی بۆ پۆستێ سه‌رۆك كۆمارێ ئیراقێ تنێ رێبه‌ر ئه‌حمه‌ده و ب هیچ شێوه‌كی خوه ڤه‌ناكێشیت”.
ئاماژه‌كر ژی” دانوستاندن ل نه‌جه‌ف هه‌بوون د ناڤبه‌را ئالیێن سیاسی دا تاكو بگه‌هنه دووماهی بریارا پێكئینانا حوكمه‌تا نوو یا ئیراقێ، ئه‌م ژی وه‌كو پارتی د به‌رده‌وامین ل سه‌ر دانوستاندنێ ل گه‌ل ئالیێن سیاسی بۆ كۆمكرنا زۆرینه‌یا ده‌نگان بۆ به‌ربژارێ خوه بۆ پۆستێ سه‌رۆكێ كۆمارێ”.
پارتی دیموكراتی كوردستان ل گه‌ل ره‌وتێ سه‌دری و هه‌ڤپه‌یمانیا سیاده یا سوننی رێككه‌فتن هه‌یه بۆ پێكئینانا حوكمه‌تا زۆرینه‌یا نیشتمانی ب گۆره‌ی رێككه‌فتنا سێ قۆلی د ئێكه‌م روونشتنا خۆلا نوو یا جڤاتا نوونه‌رێن ئیراقێ دا سه‌رۆكێ نوو یێ جڤاتا نوونه‌ران و هه‌ردو جێگرێن وی هاتنه هه‌لبژارتن، ئه‌ڤ هه‌فتیه ژی دێ بیته هه‌فتیا ئێكلاكه‌ر بۆ هه‌لبژارتنا سه‌رۆك كۆمارێ نوو و ده‌ستنیشانكرنا سه‌رۆك وه‌زیرێن نوو ل ئیراقێ.
نيشاندان
