ئەڤرۆ نيوز:

جڤاتا ناڤەندی یا ئێکەتی نیشتیمانی کوردستان، راگەھاندنەک ل دۆر ناکۆکیێن د ناڤبەرا ناڤەندا بڕیارا ئێکەتیێ و زۆرینەیا مەکتەبا سیاسییا وێ حزبێ بەلاڤکر و تێدا ھاتیە” لیژنەک ژ لایێ وێ جڤاتێ ڤە ھاتییە پێکئینان، بزاڤێ دکەت بۆ نێزیککرنا ھەردو بالێن ناکۆکێن ئێکەتیێ و چارەکرنا کێشان.
جڤاتا ناڤەندی د راگەھاندنا خوە دا داخواز ژ سەرکردێن ئێکەتیێ کریە دەست ژ داخویانیێن دژوار و شکاندنا ھەڤدو بەردەن و ھۆشداری ژی دایە، ھەر بەرپرسەکێ پێگیریێ ب راسپاردان نەکەت، دێ لێپرسین ل گەل ھێتە کرن، ئەڤە بۆ وێ چەندێ یە سەنگێ حزبێ بھێتە پاراستن.
ھەر د ڤێ مژارێ دا، فوئادا مەعسوم سەرۆک کۆماری عیراقێ کو ھەڤدەم ئەندامێ مەکتەبا سیاسی یێ ئێکەتیێ سەرەدانا کۆسرەت رەسول و بەرھەم سالح جێگرێن سکرتێرێ گشتی یێ ئێکەتیێ و ھێرۆ ئیبراھیم ئەحمەد ئەنداما مەکتەبا سیاسی یا وێ حزبێ کر، سلێمان عەبدوللا ئەندامێ مەکتەبا رێکخستنا ئێکەتیێ کو ھایداری کۆمبوونێ بوو راگەھاند، مەعسوم دزانیت ئێکەتیێ قەیران و کێشە یێن و دڤێت رۆلێ د چارەکرنا پشکەکا کێشان دا ببینیت.

ئه‌ڤرۆ نيوز:

راگەھاندنا باسکێ نوو و دوبەرەکیا سەرکرداتیا ئێکەتی، د ناڤەندێن راگەھاندنێ و سیاسەتمەداران دا خواندنێن جودا جودا بۆ ھەبوون، پشکەکا زۆر ژی ژ چاڤدێران دبێژن نەوشیروان موستەفا سەدەما ئەوێ رەوشا ئالۆزە ل سلێمانیێ.
ئاواز جەنگێ ئەنداما پەرلەمانێ کوردستانێ یا سەر فراکسیۆنا ئێکەتی نیشتیمانی کوردستان ڤە، د چارچۆڤێ چاڤپێکەفتنەکا رۆژنامەڤانی دا راگەھاند، نەوشێروان موستەفا رەوشا سلێمانیێ بە رب نەئارامیێ ڤە بریە، پاشی ل گەل کورێ خوە چیایی بەر ب دەرڤەیی وەلاتی برێکەفتن، ددەمەکی دا ئەڤ ئاریشا نوکە ھەموویان پەیوەندی ب رێککەفتنەا بزاڤا گۆڕان ل گەل ئێکەتیێ ھەیە.
ل گۆلڕ دیتنا ئەنداما پەرلەمانێ ھەرێمێ، دڤێت سەرکرداتیا ئێکەتی نیشتیمانی کوردستان و مەکتەبا سیاسی یا حزبا ناڤبری، بزاڤان بۆ مانا ئێکگرتنا ئێکەتیێ بکەت، و دڤێت نەھێتە پارچە پارچەکرن و ل سەر رێبازا مام جەلال سیاسەتا خوە بکەن.

ئه‌ڤرۆ نيوز:

رێڤەبەرێ گشتیێ پەیمانگەهـ و مه‌شق و راھێنانێ ل وەزارەتا پەروەردێ دیار کر کو چو پەیمانگەھێن نوو ئەڤ سالە ل ھەرێمێ ناھێنە ڤەکرن و بتنێ دێ گرنگی ب پەیمانگەھێن بەرێ ھێتەدان و گۆت: “مامۆستایێن بخوازن بەردەوامیێ بدەنە خواندنێ دێ وەزارەت یا ھاریکاربیت”.
حاجی ئیبراھیم، رێڤەبەرێ گشتیێ پەیمانگەهـ و مەشق و راھێنانێ ل وەزارەتا پەروەردێ بۆ رۆژناما ئەڤرۆ ئاشکرا کر کو ئەڤ سالە ژبەر قەیرانا دارایی وەزارەتا پەروەردێ بڕیاردایە چو پەیمانگەھێن نو ل ھەرێما کوردستانێ نەھێنە ڤەکرن و ب تنێ گرنگی ب پەیمانگەھێن بەرێ بھێتەدان و سەرەرایی ڤێ چەندێ ھەکە پەیمانگەھەکێ شیان ھەبن پشکەکا نوو ڤەکەت وەزارەت دێ ئاسانکاریان بۆ کەت، چونکی پەیمانگەھێن نوو دێ بنە ئەگەرێ وێ چەندێ ئاستێ پەیمانگەھێن دی بھێتە کێمکرن و گۆت: “د ڤان کاودانان دا بتنێ مە شیان ھەنە ئەڤێن ھەی گرنگیێ پێ بدەین و سەرپەرشتیا وان بکەین، بەلێ ھەکە پەیمانگەھێن نوو بھێنە ڤەکرن دڤێت د ئاستێ یێن تایبەتدا بن، چونکی پشکێن دی ھاتینە ڤەکرن ل پەیمانگەھێن تایبەت ژوانا پەیمانگەھا پەتڕۆلێ و ئەندازیاری”.
ناڤھاتی ئاماژە دا وێ چەندێ کو ل سەرانسەری ھەرێما کوردستانێ 30 پەیمانگەە ب سەر وەزارەتا پەروەردێ ڤە ھەنە و 50 پەیمانگەە ژی یێن تایبەتن، بەلێ مەشق و راھێنان یا بەردەوامە بۆ بلندکرنا ئاستێ زانستی یێ مامۆستایان، چونکی مامۆستایێن خودان باوەرنامێن دبلۆم ھەکە بخوازن بەردەوامیێ ب خواندنێ بدەن و باوەرناما بەکالوریوس بدەستڤە بینن ئەو دێ د ھاریکاربن وەکو وەزارەت و گۆت: “کۆمەلگەھێن پەروەردەیی ژی د کارێ خوە دا د بەردەوامن و کۆمەلگەھێن نوو ناھێنە ڤەکرن”.

ئه‌ڤرۆ نيوز:
بەرپرسەکێ ئێکەتیا مامۆستایێن کوردستانێ ئاماژە ب ڤێ چەندێ دکەت، ژ ئەگەرێ قەیرانا دارایی و بێئومێدیا وەلاتیان ب پڕۆسا خواندنێ بتنێ د سالا بۆری دا 30 ھزار قوتابیان دەست ژ خواندنێ بەرداینە و رێژەیەکا زۆرا قوتابیان ژی دەرنەچووینە ل قوتابخانێ.
ئەحمەد کەرکووکی، سەرۆکێ لژنا بەڕەڤانیکرنێ ل مامۆستا بۆ رۆژناما ئەڤرۆ گۆت: “ب ئەگەرێ قەیرانا دارایی بتنێ ل سالا بۆری 30 ھزار قوتابیا دەست ژخواندنێ بەردایە و گۆرەی دوڤچوونا مە وەکو ئێکەتیا مامۆستایان کری، ئەگەرێ سەرەکیێ دەست بەردانا ئەڤان قوتابیان بۆ خواندنێ نەبوونا باوەری پڕۆسا خواندنێ و قەیرانا دارایی بوویە، چۆنکو قەیرانا دارایی و نەبوونا ژێدەرێ ژیانێ کاریگەریێن مەزن کرینە سەر پڕۆسا خواندنێ ھەر بۆ نموونە سالا بۆری 196 ھزار قوتابی ل ھەموو قۆناغان سەرنەکەفتینە و ماینەڤە د پۆلێن خوەدا، ئەڤە ژی ھژمارەکا زۆرە و پێدڤیە پێداچوون بۆ بھێتەکرن”.
کەرکووکی گۆتژی “ئەڤ سالە ژبلی ئاریشەیێن نەبوونا مووچە و ئاڤاھیێن قوتابخانان دێ ئاریشەیەکا دی ژی زێدەبیت، ئەو ژی نەبوونا پەرتووکێن قوتابیانە، پێدڤیە ھەر ساڵ حوکمەتا ھەرێما کوردستانێ 17 ملیۆن پەرتووکا چاپ بکەت و ب سەر قوتابیان بھێنە بەلاڤکرن، ھەتا نوکە بتنێ ئێک پەرتووک ژی نەھاتیە بەلاڤکرن و پێشبینی دکەین رێژەیا پێدڤیا پەرتووکان نەھێتە چاپکرن و ھژمارەک قوتابی بێ پرتووک بمینن، چۆنکو پارەیەکێ زۆر دڤێت ھەتا ئەڤ ھەموو پەرتووکە دھێنە چاپکرن”.