ئەڤرۆ نیوز:
وەزارەتا کارەبێ یا حوکمەتا ھەرێما کوردستانێ دیار کر، وان پلان دانایە کو د ھەیڤا ئیلۆنێ دا، ڕۆژانە دو دەمژمێرێن دی ل سەر دانا کارەبا نشتیمانی بۆ وەلاتیان زێدە بکەن و ڕۆژانە 17 ھەتا 18 دەمژمێران کارەبا نشتیمانی دێ ھەبیت.
محەمەد ئەمین ھەورامی، پەیڤدارێ وەزارەتا کارەبێ ل حوکمەتا ھەرێما کوردستانێ ڕاگەھاند، وەزارەتا وان پلانەک یا دانای، کو د ھەیڤا ئیلۆنێ دا دانا کارەبا نشتیمانی بۆ وەلاتیان زێدە بکەن و بۆ خەندان گۆت: “پشتی د ڤان رۆژێن بھێن دا، ئەڤ پێلا گەرمێ ب دووماھی دھێت، ئەم وەکو وەزارەت دێ پلانا زێدەکرنا دانا کەربێ بۆ وەلاتیان بجھئینین، د ناڤەراستا ھەیڤا ئیلۆنێ ژی دا ڕەوشا کارەبێ دێ گەلەک باش بیت، چونکی داخوازا وەلاتیان ل سەر بکارئینانا وێ دێ کێم بیت”.
ل دووڤ ئامارێن وەزارەتا کارەبێ، ، داخوازا وەلاتیان ل سەر بکارئینانا کارەبێ د ھەیڤا تیرمەھێ دا ب چار ھزار و 500 مێگاواتان دھاتە ھژمارتن، لێ وەزارەتا کارەبێ شیانێن بەرھەمئینانا سێ ھزار مێگاواتان ھەبوو، لەو د ھەیڤا تیرمەھێ دا ب تێکرا رۆژانە 14 ھەتا 15 دەمژمێران کارەبا نشتیمانی بۆ وەلاتیان دابین دکر.
پەیڤدارێ وەزارەتێ خویا ژی کر، ژ بە کو د ھەیڤا ئیلۆنێ دا پلێن گەرمێ ھەتا رادەکی دێ نزم بن، لەو داخوازا وەلاتیان ل سەر بکارئینانا کارەبێ دێ کێم بیت، ب ڤی رەنگی ژی دەمژمێرێن دانا کارەبا نشتیمانی بۆ وەلاتیان دێ زێدە بن.
وەزارەتا کارەبا حوکمەتا ھەرێمێ نوکە خودانا خوە 24 وێستگەھێن بەرھەمئینانا کارەبێ یە، 12 وێستگەە ژ وان ب گازا سروشتی کار دکەن و 12 ژی ب گازوایلێ، لێ ژ ئەگەرێ قەیرانا دارایی نوکە ب تنێ دو ژ وان وێستگەھێن ب گازوایلێ کار دکەن، د کاری دانە کو ھەردو ل دھۆکێ نە.

ئه‌ڤرۆ نيوز:

ئەندامەکێ لژنا پەروەردێ و خواندنا بلند ل پەرلەمانێ کوردستانێ دیار کر، وەرگرتنا 50 ھزار دیناران ژ بۆ تۆمارکرنا قوتابیێن زانکۆیێ ب تنێ بۆ مەزاختیێن زانکۆیێ و پێشڤەبرنا ئاستێ زانستیێ قوتابیانە و دبێژیت: ئەڤ سالە چو دەرمالە بۆ قوتابیان ناھێنە مەزاختن، بەرۆڤاژی دڤێت قوتابی پارێ مەزاختیێن زانکۆیان بدەن.
ئایدن مەعرۆف، ئەندامێ لژنا پەروەردێ و خواندنا بلند ل پەرلەمانێ کوردستانێ بۆ رۆژناما ئەڤرۆ ئاشکرا کر، وان وەکو لژنا پەروەردێ دووڤچوون بۆ وەرگرتنا کۆژمێ 50 ھزار دیناران یێن د دەمێ قوتابی ناڤێ خوە بۆ خواندنێ ل زانکۆیێن حوکمەتێ تۆمار دکەن کریە و گۆت: “وەرگرتنا ئەڤی پارەی ب فەرمانەکا سەرۆکایەتیا جڤاتا وەزیرێن ھەرێما کوردستانێ بوویە، ئەڤە ژی دچارچوڤێ ئەوان بڕیاران دایە یێن بۆ بەرھنگاربوونا قەیرانا دارایی ھاتینەدان، دیسا وەرگرتنا 50 ھزار دیناران ھەمبەر وەرگرتنا ھەر قوتابیەکی بۆ ڤێ چەندێیە، ئەو پارە دوبارە بۆ گەشەکرنا بیاڤێ خواندنێ و مەزاختیێن زانکۆیان بھێتە مەزاختن، چونکی سالانە زانکۆیێن حوکمەتێ پارەیەکێ زۆر ل چاپکرنا ماددێن زانستی و پشکێن ناڤخوەیی و گەلەک بابەتێن دی دمەزێخن”.
ئایدنی خویا ژی کر، د سالێن بۆری دا ژ بەر کو پارە ھەبوو حوکمەتێ ھەیڤانە دەرمالەیەک بۆ مەزاختیێن قوتابیا دابین دکر، لێ نوکە بەرۆڤاژی بوویە دەرمالە ژ بەر نەبوونا پارەی ناھێنە بۆ قوتابیێن زانکۆ و پەیمانگەھان مەزاختن، ھەتا وی دەمێ ڕەوشا دارایی ڤەدگەڕیتە ڕەوشا بەرێ و گۆت: “ڕاستە قوتابی ژ وەرگرتنا کۆژمێ پارەی دلگرانن، لێ دڤێت مەزاختیێن زانکۆیێ ژی بەرچاڤ بھێنە وەرگرتن و حوکمەت نەشێت پارێ بەرێ بۆ زانکۆیان د مەزاخت نوکە بمەزێخیت”.

ئەڤرۆ نيوز:
رێڤەبەریا گەشناسی و بیڤەلەرزا ھەرێمێ راگەھاند, کو پێشبینی دھێتە کرن ل پێنج شەمبیا بھێت پلێن گەرمێ نزم ببن و ل دەسپێکا حەفتیا بھێت ژی گەرما ھاڤینا ئەڤ سالە ب دوماھیک بھێت.
فزل ئیبراھیم رێڤەبەرێ گەشناسی و بیڤەلەرزا ھەرێمێ بۆ خەندان دیار کر کو ئەو پێلا گەرمێ یا ب سەر ھەرێمێ دا ھاتی دو رۆژێن دی دێ یا بەردەام بیت و رۆژا پێنج شەمبی پلا گەرمێ دێ نزم بیت و ل دەسپێکا حەفتیا بھێت ژی پلێن گەرمێ ب گشتی ل ھەرێمێ دێ ھێنە خوار بۆ 40% و گەرما ھاڤینا ئەڤ سالە دێ ب دوماھیک ھێت ژبەر نێزیکبوونا وەرزێ پایزێ.
ناڤبری گۆتژی ” د ماوێ ڤان ھەردو سالێن بوری دا پلێن گەرمێ ل ھەرێما کوردستانێ د جیاواز بوون ل گەل سالێن دیتر د وەرزێ ھاڤینێدا, ئەگەرێ بلندبوونا گەرمێ ژی د ڤان ھەردو سالان دا بۆ دیاردا نینۆ ڤەدگەریت ئەو ژی ھەر وەختەکێ پلێن گەرمێ ل سەر رویێ ئاڤێ ل زەریایا ھێمن دھێتە گۆھورین و دبیت ئەگەرێ گۆھورینا پێلێن ئاڤێ, ئەڤە ژی کارتێکرنێ دکەتە سەر ئاراستەکرنا فشارا ھەوایێ وان دەڤەران”.
رێڤەبەرێ گەشناسی و بیڤەلەرزا ھەرێمێ دیار کر ژی کو ھەر وەختەکێ دیاردا نینۆ بەلاڤ بۆ دبیتە ئەگەرێ نزمبوونا فشارا پالەپەستویا وەرزی و پلێن گەرمێ ل وان دەڤەران بلند دکەت, بەلێ ب لاوازبوونا ڤێ دیاردێ پلێن گەرمێ نزم دبن.
گۆتژی ” ل دووڤ ڤەکۆلینێن دیاردا نینۆی ل پایزا ئەڤ سالە دێ ب دوماھیک ھێت, لەوما پێشبینی ناھێتە کرن ل ھاڤینێن سالێن بھێن پلێن گەرمێ وەکو یێن ڤان دو سالان بلند ببن”.