ئەڤرۆ نیوز:
رێڤەبەرێ نڤیسینێ ل سایتێ (ئەلخەلیج ئۆنلاین) دداخۆیانیەکێ دا بۆ رۆژناما ئەڤرۆ دبێژیت ھەموو کێشێن دناڤبەرا ھەرێمێ و بەغدا ژ پاشماوێن سەردەمێ مالکی نە و نوکە دخوازیت بزڤریتە دەستھەلاتێ و بزاڤا کوورکرنا ناکۆکیێن لایەنێن کوردی ل ھەرێما کوردستانێ دکەت ب پشتەڤانیا ئیرانێ، د ھەمان دەمدا رۆژنامەنڤیسەکێ بەغدا دبێژیت د بەرژوەندا کوردان دا نینە نێزیکی مالکی ببن و بلا پرسا بۆدجا 2014 ێ ل بیرا کوردان بیت.
محەمەد ئەلجبوری رۆژنامەنڤیسەکێ عیراقی یە ژ بەغدا، ل دۆر بزاڤێن مالکی بۆ وەرگرتنا دەستھەلاتێ ل عیراقێ، بۆ رۆژناما ئەڤرۆ دبێژیت” ھەموو حزبێن پشکدار د پرۆسا سیاسی دا ل سەر پلانێن مالکی د ئاگەھدارن و کا چاوان ژ وی پۆستێ ھاتە دەرکرن، سەرەرای بەربژارکرنا عەبادی بۆ وی پۆستی”.
ب دیتنا جبووری”ھەتا نوکە ژی مالکی یێ ب دووڤ پۆستێ سەرۆکاتیا وەزیران ڤە و باوەرناکەت کو ژ وی پۆستی یێ ھاتیە دوورخستن و ئەڤە ژی بەلگەیە ل سەر نەباوەریا وی ب ڤەگوھاستنا ئاشتیانە یا دەستھەلاتێ”.
ناڤبری خویاکر ژی” سەرەدانا مالکی بۆ سلێمانیێ و سەرەدانێن دێ د دووڤدا ژی ھێنە ئەنجامدان، بزاڤەکە بۆ کێشانا حزبێن کوردی بۆ لایێ خوە و دبیت ھندەک سۆزا ژی بدەت ژبۆ بدەستڤەئینانا پشتەڤانیا ھێزێن کوردی بۆ ڤەگەراندنا وی بۆ پۆستێ سەرۆکاتیا وەزیران و بۆ ڤێ چەندێ ژی مفای ژ ناکۆکیێن سیاسی ل بەغدا وەردگریت، چ ل سەر ئاستێ جڤاتا نوونەران ، یان ژی د ئاریشێن دناڤ حوکمەتا بەغدا دا ھەین کو ھەتا نوکە عەبادی تووشی چەندین کێشان بوویە ب تایبەتی ژلایێ کەسێن نێزیک و پشتەڤانێن مالکی و بزاڤێن وان یێن بەردەوام بۆ رێگریێ ل کارێ حوکمەتێ ژبۆ رازیکرنا ھەموو لایەنێن سیاسی ل سەر لاوازیا حوکمەتا عەبادی”.
ل دووڤ بۆچوونا جبووری، مالکی نەشێت دەرزێ بێخیتە دناڤ لایەنێن کوردی دا و دبێژیت” حزبێن کوردی و ژبەر ئەزموونێن سالێن بۆری دزانن کا مالکی ب چ عەقلیەت رەفتارێ دکەت، دیسا مالکی ژی باش دزانیت ھەرێما کوردستانێ ھەڤرکەکا ب ھێزە و سەنگا خوە د پرۆسا سیاسی دا یا ھەی، لەوما بزاڤێن دروستکرنا دەرزان دناڤ لایەنێن کوردی دا چو مفای ناگەھینیتە مالکی، بەلکو نوکە یێ بزاڤا دروستکرنا ھەڤالینیێ ل گەل کوردان دکەت کو ببنە پشتەڤانێن وی د کارێ سیاسی دا، ب دیتنا من ژی ئەڤ چەندە دبەرژەوەندا کوردستانێ دا نینە و کورد باش دزانن کا چ چێبوویە ب تایبەتی د بۆدجا سالا 2014 ێ دا، کا چاوان مالکی فشار ل سەر سەرکردە و حزبێن کوردی کر.
محەمەد سادق ئەمین رێڤەبەرێ نڤیسینێ ل سایتێ ( ئەلخەلیج ئۆنلاین) بۆ ئەڤرۆ دبێژیت” دەرکەفتنا مالکی ژ دەستھەلاتێ شەرمزاری بوو بۆ وی، ب تایبەتی ھەموو گەلێن عیراقێ دھەڤپشک بوون ل سەر خرابیا ب رێڤەبرنا وی بۆ دەولەتێ و کەسەکە ھەموو رێیان بکاردئینیت بۆ گەھشتنێ ب دەستھەلاتێ و دیرۆکا غەدرا وی ل گەل کوردان یا بەرچاڤە و ئەو ب خوە ب پشتەڤانیەکا کوردی گەھشتبوو دەستھەلاتێ و ھەتا جھێ خوە ب ھێزکری غەدر ل کوردستانێ کر و ھەموو کێشێن نوکە د ناڤبەرا بەغدا و ھەرێما کوردستانێ دا ھەین ژ پاشمایێن سەردەمێ مالکی نە”.
ل دۆر سەرەدانا ڤێ دووماھیێ یا مالکی بۆ سلێمانیێ، محەمەدی گۆت” ب وێ سەرەدانێ مالکی بزاڤکر یاریێ ب کاغەزا ناکۆکیێن کوردی – کوردی بکەت ژبۆ خستنا دەرزەکێ د ناڤبەرا لایەنێن کوردی داو بکارئینانا ڤێ چەندێ بۆ مەرەما وی ئەوژی دەستھەلاتە و ب دیتنا من مالکی ب شێوەکێ تاکەکەسی لڤینێ ناکەت دڤی چارچۆڤی دا و ئیران پشتەڤانیا وی دکەت و بزاڤا کوورکرنا ناکۆکیان دناڤ لایەنێن کوردی دا دکەت و پشتەڤانیا ھێزێن ناکۆک ل گەل سەرۆکێ ھەرێمێ دکەت ژبەر ھەڤپەیمانیا وی ل گەل تورکیا و ھەلویستێ وی یێ پشتەڤان بۆ عەرەبێن سونە ل عیراقێ، نەیا ڤەشارتی یە ژی کو بارزانی بزاڤا بدەستڤەئینانا سەربخوەیێ د بریارا کوردستانی دا کر دوور ژ میحوەران و ئیرانێ ژی”.

ئه‌ڤرۆ نيوز:

ئەندامەکێ کورد ل جڤاتا نوونەرێن عیراقێ دیارکر، کو پەرلەمانتارێن عیراقێ کار بۆ لادانا سالیم جبۆری دکەن، سەرۆکێ پەرلەمانێ عیراقێ ھەتا نوکە 125 ئێمزا دژی جبۆری ھاتنیە کۆمکرن، ل گۆر پیشبینێ و خۆاندنا پەرلەمانتارێن عیراقێ پەرلەمانتار (ڤیان ئەحمەد) و پەرلەمانتار (د. سلاح الدین الجبۆری) بەربژێرین بۆ پڕکرنا پوستێ سەرۆکێ پەرلەمانێ عیراقێ، ھەکە سالیم جبۆری نەمینت دێ ئێک ژڤان ھەر دوو کەسان ھێنە دانان ھەر دوو ژی سونە مەزھەبن سەرب ھەڤپەیمانیا قوە ڤە نە.
حاکم سرحان سلێڤانەی ئەندامێ جڤاتا نوونەرێن عیراقێ بۆ ئەڤرۆ گۆت: نوکە فڕاکسیونا بەرەیێ یا چەکسازی ھەموو شیانێن خوە کار دکەت، بۆ لادانا جبۆری و ب چوو شێوەیەکێ رازی نابیت سالیم جبۆری پەرلەمانێ بمینت.
د بەرامبەر دا حزبا ئیسلامی یا عیراقێ پشتەڤانیێ ل مانا سالیم جبۆری ل ناڤ پەرلەمانێ عیراقێ دکەت، دەنگی نەرازیبوونێ یێ زێدە دبن دژی مانا سالیم جبۆری نە.
سلیڤانەی ئەو ژی دیار کر پەرلەمانێ عیراقی گەھشتە وێ باوەری پێدڤیە سالیم جبۆری دەست ژ کار بەردەت و ەکو سەرۆکێ پەرلەمانێ نەمینیت، پشتی خالد ئەلعوبەیدی گەندەلیی ل سەر ئاشکراکری، نوکە رۆژ دووڤ رۆژی دەنگێ نەرازیبوونێ دژی مانا سالیم جبۆری سەرۆک پەرلەمانێ عیراقێ یێ زێدە دبن، ل رۆژا سی شەمبیی 9/8/2016 دێ کار ل سەر لادانا سالیم جبۆری ل پەرلەمانێ عیراقێ ھێتە کرن، ھەکە چو ئاریشێن سیاسی دروست نەبن.
زێدەتر گۆتژی دناڤ ھۆلا پەرلەمانێ دا دێ دەنگدان ل سەر مان ونەمانا سالیم جبۆری ھێتە کرن، ل ڤێرە دیار دبیت کا دێ چەند پەرلەمانتار ل گەل مانا سالێم جبۆری بن، ل گۆری دیتن و خۆاندنا من وەکو پەرلەمانتار ژبلێ ھەڤالین سالیم جبۆری پتریا ئەندام پەرلەمانتارێن عیراقێ نە ل گەل دانە جبۆری بمینت، وەکو سەرۆکێ پەرلەمانێ ھەکە رۆژا سی شەمبیی روونشتنا پەرلەمانێ نە ل سەر جبۆری بیت دێ رۆژەکا دێ تایبەت پەرلەمانێ عیراقێ روونشتنی ل سەر جبۆری کەت، ھەکە ئەو گەندەلێن خالد ئەلعوبەیدی ژێ بەحسکرین پشت راست بوون ب چوو شیوەیەکێ ل پەرلەمانێ نامینیت، لێ سەرۆکێ پەرلەمانێ دێ دانپیدانێن خوە ل دادگەھی و دەستەیا دەستپاکێ دەت گەلەک ڤەکولین دێ سەر ھێتە کرن ئەڤە نە تشتەکێ ئاسانە و رەنگە ژێ ئەڤە ئالوزیا گەلەک ئالوزیێن مەزنتر ل پەرلەمانێ و عیراقێ دروست بکەت.

ئەڤرۆ نيوز:
دادگەھا کەرخ ل بەغدا دوھی ل سەر سکالایەکا سەرۆکێ جڤاتا نوونەرێن عیراقێ بریار دا وەزیرێ بەڕەڤانیێ ب تومەتا ناڤزراندنێ ل ھەمبەر دادگەھی ئامادە بکەت.
پەیڤدارێ دەستەیا دادوەری ل عیراقێ راگەھاند، دادگەھا کەرخ بڕیار دا خالد عوبێدی ب تومەتا ناڤزراندنێ ل گۆری مادێ 433 یێ قانوونا سزایان ل ھەمبەری دادگەھێ ئامادە بکەت.
عەبدولستار بەیرەقدار ئاشکرا کر، ب بڕیار جڤاتا دادوەری لژنەک دێ ھێتە پێکئینان بۆ ڤەکۆلینا وان پرسێن عوبێدی د روونشتنا پەرلەمانی دا کرین.