ئه‌ڤرۆ، دووڤچوون:
به‌رپرسه‌كا حزبی ل شنگالێ راگه‌هاند، هه‌تا نوكه زێده‌تر ژ 400 كچ و ژنێن ئێزدی ل شنگالێ ژ ئالیێ په‌كه‌كێ ڤه هاتینه سه‌ردابرن و ره‌ڤاندن و نوكه ل ناڤ رێزێن وان دانه و گۆت: نها ل شنگالێ ده‌مێ خه‌لك دچیته دمالا خوه دا ده‌رگه‌هێن خوه ژ ترسا په‌كه‌كێ د دائێخن و هنده‌ك ژی ب چه‌كی چاڤدێریێ ل سه‌ر مال و خێزانێن خوه دكه‌ن.
لازیما، كارگێرا لقا ١٧ یا پارتی دیموكراتی كوردستان ل شنگالێ تایبه‌ت دیار كر، د ماوه‌یێ ڤان چه‌ند سالێن بۆری دا ل سنوورێ قه‌زا شنگال، پتری 400 كچ و ژنێن ئێزدی ژ ئالیێ په‌كه‌كێ ڤه هاتینه سه‌ردابرن و ره‌ڤاندن و نوكه ل ناڤ رێزێن وان دانه و گۆت: ئه‌ڤه مه‌ترسیه‌كا مه‌زنه ل سه‌ر خه‌لكێ ده‌ڤه‌رێ و پێدڤیه رێگری ل هه‌بوونا په‌كه‌كێ دناڤا شنگال د بهێته كرن.
دهێته زانینن پشتی بوویه‌رێن ٣ ته‌باخا سالا ٢٠١٤ و داگیركرنا شنگالێ ژ ئالیێ داعشێ ڤه په‌كه‌كێ ئه‌و ره‌وشه بۆ خوه بده‌لیڤه دیت و د نها دا چه‌ندین زارۆك و ژن و كچێن ئێزدیان ل قه‌ندیلی نه ب گۆتنا ئالیێن فه‌رمی.
هادی سفوكا، به‌رپرسێ نڤیسینگه‌ها جڤاكی یا لقێ 17 یا پارتی ل شنگال بۆ ئه‌ڤرۆ دیار كر، هه‌ركه‌سێ ل شنگال چوو بیته دناڤ رێزێن په‌كه‌كێ دا هاتیه خاپاندن و كه‌س نه‌شێت ئێدی ده‌ستا ژێ به‌رده‌ت، چونكو په‌كه‌كێ رێكێ ناده‌تێ رێزێن وان بێلن و ئه‌گه‌ر ده‌لیڤه هه‌بایه، نوكه هه‌موویان رێزێن په‌كه‌كێ هێلابانه.
ناڤبری گۆت ژی: ئه‌و كه‌سێن ژلایێ په‌كه‌كێ ڤه هاتیه ب سه‌ردابرن، نه‌شێن په‌یوه‌ندیێ ب خێزان و كه‌س و كارێن خوه بكه‌ت و پتریا ئه‌و په‌كه‌كه‌یێن ل شنگالێ خه‌لكێ توركیا و سوریانه و په‌كه‌كێ ب زۆری ئیناینه ده‌ڤه‌رێ.
هادی سفوكا، به‌رپرسێ نڤیسینگه‌ها جڤاكی یا لقێ 17 یا پارتی ل شنگال ئه‌و یه‌ك ژی دیار كر كو هه‌ر كه‌سێ رێزێن په‌كه‌كێ بجه بهێلیا یان دێ هێته كۆشتن یان ژی دێ هێته ره‌ڤاندن و بێسه‌روشینكرن و گۆت: ژ سالا 2014 وه‌ره و هه‌تا نها نێزیكی 40 هزار هاوولاتیێن كوردئێن ئێزدی یێن شنگالێ هاتینه بێسه‌روشینكرن.
نيشاندان
