ئەڤرۆ نیوز:
جەمال کۆچەر ئەندامێ پەرلەمانێ عیراقێ و ئەندامێ سەرکردایەتیا یەکگرتوو بو ئەڤرۆ گوت: ب دیتنا مە گەلەک یا فەرە یەکگرتوویا ئیسلامیا کوردستانێ پرۆژێ خو ھەبیت بو کوردستانێ و ئەم دبینین ھەکە ھاتنا سەلاحەدین بەھائەدین بتنێ بۆ رێکخستنا حزبا یەکگرتوو بیت، ل وی دەمی ناڤبری چو کارێن باش ئەنجام نادەت، لێ ب دیتنا من ماموستا سەلاحەدین دێ پێنگاڤێن باش ھەبن کو ب بنە سەدەما باشبونا ھەر رەوشەکا نوکە ھەبیت، چونکە دڤێت ھندەک گوھۆڕین ھەبن دا ژ ڤێ رەوشا خراب دەرباز ببین.یا ژ ھەموویان گرنگتر ئەو پارتی و گۆڕان ئاریشێن دناڤبەرا خوە دا نەھێلن، نوکە گۆڕانێ ھندەک گوھۆڕین کرینە و وەکی گۆڕانا دەستپێکێ نەمایە.
و گوت: سەلاحەدین بەھائەدین ئەزمونەکا باش ھەیە د ھەر ئاریشەیەکا کوردستانێ دا ھەم ژ ئاریشا شەرێ براکوژیێ و ھەر ئاریشەیەکا دناڤبەرا پارتی و ئێکەتی وگۆڕان و بەرەیێ تورکمانی دا و بزافا ئیسلامی دناڤدا بویە و رولێ خو ھەیە، دیسا ژی سەلاحەدین بەھائەدین چار سالە خو ژ گورەپانا سیاسی ڤەکێشایی، لەورا نوکە رولێ خو ھەیە.
ژئالیەکێ دیڤە جەمال کۆچەری گوت: ئەم وەک سەرکردایەتیا یەکگرتویا ئیسلامیا کوردستانێ ھەر ژ کونگرێ بەری نوکە کو یێ شەشێ بو ل وی کونگرەی مە ھەولدایە کو کوردستانەکا سەربەخو رابگەھینین و مە حەزا سەربەخوەیێ ھەیە لێ ھاتنا چەکدارێن داعش و خرابونا بارێ ھەرێمێ ئەو چەندە ھاتە بێ دەنگ کرن، لێ ئەڤرۆ پێَشمەرگەی ھاریکاریا سەربەخوەیا کوردان دیارکر، ھەر کەسەک و ھەر ئالیەکێ بزاڤێ بکەت، سەربەخوەیا کوردستانێ ئالۆز بکەت، ئەو کەس و لایەن یێ گونەھکارە، دیسان فەرە ژبیرنەکەین کو ھەردەم مە پێدڤیا ب پەیوەندیێن ل گەل وەلاتان دەوربەر ھەیە، چونکە ھەر سامانەکێ مە ھەی بتنێ ب رێیا ئەردی بو وەلاتێن دی ڤە دچیت، لەورا دڤێت ئەم سەربەخوەیا خوە رابگەھینین لێ ئەم ب شێوەکێ دوستانە و ئاشیانە ژ بەغدا جودا ب بین.
ب دیتنا جەمال کوچەری، ئەو پرۆژێن سەلاحەدین بەھائەدین ھەین بۆ کوردستانێ دێ بنە پشکەک ژ وان پرۆژان ئەوێن نوکە بۆ سەربەخوەیا کوردستانێ دھێنە ئەنجامدان، لێ ئەم وەک یەکگرتوو پشکەکین ژ وان ئەرکان و ھەر گازیەکا ھەبیت و ھەر پێنگاڤەکا بھێتە ھاڤێتن بو سەرەبخوەی و راگەھاندنا دەولەتا کوردی یەکگرتویا ئیسلامێ دێ باشترین شێوە کارکەت کو ئەو ھیڤی ببیتە راستی.
جەمال کۆچەری ھەروەسا گۆت: ئالیەک بتنێ نەشێت دەولەتا کوردی ب راگەھینیت، بەلکی دڤێت ھەموو پێکڤە دھاریکاربن و ئەم وەکی یەکگرتوو کارێ دەولەت بوونا کوردستانێ ب ئەرکەکێ نیشتیمانی و شەرعی دزانین، ئەندامێ سەرکرداتیا یەکگرتوو خوەیاکر، یەکگرتوو دشێت رۆلەکێ کاریگەر د پەیوەندیێن خوەدا ل گەل وەلاتێن سعودیێ و تورکیا و ئیرانێ ژی بگێریت، ھەر وەکی بەری نوکە ئەو کار ئەنجامدایە بۆ رێخوشکرنا دناڤبەرا پارتی و حکومەتا تورکیا دا.
ل دووماھیێ ژی گۆت: ئەم ژدل و جان ل گەل ریفراندومێ نە و تاکە حزبا کوردستانێ یەکگرتوویە حەزدگەت ب زووترین دەم سەربەخوەیا ھەرێما کوردستانێ بھێتە راگەھاندن، ھەر بۆ سەربەخوەیێ ژی ئامادەیە ھەر کارەکێ پێ بھێتە راسپاردن بکەت، دەمێ ریفراندوم دھێتە کرن وی دەمی ھەر ئالیەکێ سیاسی و ھەر کەسەک دێ زانیت یەکگرتوو چەند حەزا سەربەخوەیا کوردستانێ ھەیە.

ھەولێر، قائید میرۆ
سەرۆکێ دادگەھا تێھەلچوونا ھەولێرێ ئاشکراکر، کو داخوازکارێ گشتی سکالا لسەر نەوشیروان مستەفای تۆمارکریە و پێدڤیە بھێتە ھەمبەر دادگەھێ لدۆر بەلگەیێن لسەر ھەی، پەیڤدارێ فڕاکسیۆنا پارتی دیموکراتی کوردستان لپەرلەمانێ کوردستانێ دبێژیت: نەوشیروان مستەفا دێ ھێتە دادگەە کرن ب تۆمەتا ئەف ھێرشێن کرییە سەر سیادا ھەرێمێ و لسەر زۆر پرسێن دی ژی مە داخوازکارێ گشتی ئاگەھدارکریە.
گورەی گرتەیەکا دەنگی و ڤیدیۆیی، نەوشیروان مستەفا رێکخەرێ گشتیێ بزاڤا گۆڕان کەفێن کوشتنا کەسێن بیانی ل ھەرێما کوردستانێ و تێکدانا رەوشا ھەرێما کوردستانێ دکەت، و داخوازکارێ گشتی ژی لسەر ئەڤێ بەلگەیێ داخوازکریە دادگەە ڤەکۆلینێ دگەل نەوشیروان مستەفای بکەت.
محەمەد عەلی یاسین، پەیڤدارێ فڕاکسیۆنا پارتی ل پەرلەمانێ کوردستانێ بۆ رۆژناما ئەڤرۆ گۆت” دیارە داخوازکارێ گشتیێ ھەرێمێ بەلگە لبەردەست ھەنە لدۆر گەفێن نەوشیروان مستەفای، لەوڕا دێ داخوازێ ل ناڤبری کەت بەرھەڤی دادگەھێ ببیت، و رێکارێن قانوونی ھەمبەر نەوشیروان مستەفا رێکخەرێ گشتیێ بزاڤا گۆڕان دێ ھێنە رێڤەبەرن، ھەتا ڤەکۆلین دگەل دا بھێتەکرن، مە پەیوەندی ب وان ھەڤالان کریە یێن بەلگە لبەردەست ھەین، و برێیا دادگەھێ دێ لێپرسین ل گەل نەوشیروانی ھێتەکرن، چونکە نەوشیروانی د گرتەیێن ڤیدیۆیی دا دیاربوویە ھێرشی سەر بابەتێن کو بۆ سیادا ھەرێما کوردستانێ زۆر خرابن ئەف گەفێن نەوشیروانی.
محەمەد عەلی گۆتژی” ل سەر زۆر پرسێن دی ژی مە داخوازکارێ گشتی ئاگەھدارکریە، ژوانا ل ھەیڤا ئوکتوبەرا سالا بۆری بزاڤا گۆڕان زارۆک بۆ توندوتیژیێ ب کارئیناینە و بەرۆڤاژی رێککەفتنامێن جارناما جیھانی یا مافێن زارۆیان بزاڤا گۆڕان زارۆیێن ل بن ھەژدە سالیێ دکەتە ئەندامێن خوە و بۆ مەرەمێن سیاسی ب کار دئینیت، لەوڕا مە ب فەرمی داخوازکارێ گشتیێ ھەرێما کوردستانێ ئاگەھدارکریە لدۆر بکار ئینانا زارۆیان بۆ ئارمانجێن سیاسی ڤەکۆلینێ بکەت، ژبەرکو بزاڤا گۆڕان زارۆیێن پازدە ساڵ و ئێک ھەیڤی دکەتە ئەندام و ئەڤە بەرۆڤاژی قانوونێن عێراقی و نێڤدەولی یە، ھەتا دژی قانوونا ھژمارە 17 یا سالا 1993ێ یا پەرلەمانێ کوردستانێ یە کو ب قانوونا پارتێن سیاسی دھێتە ھژمارتن، بەلێ مخابن ھەتا نوکە داخوازکارێ گشتی بەرسڤا مە نەدەیە لدۆر ڤێ پرسێ.

ئەڤرۆ نیوز:
وەزیرێ خواندنا بلند ئاشکرا کر کو سیستەمێ وەرگرتنا قوتابیان ل زانکۆ و پەیمانگەھان دێ گھۆرین ب سەر دا ھێن و پێشبینی دھێتەکرن کو د سالا بھێت دا 60 ھەتا 70 ھزار قوتابی قەستا زانکۆ و پەیمانەھان بکەن.
د. یوسف گۆران وەزیرێ خواندنا بلند و ڤەکۆلینێن زانستی دوھی 31.5.2016 ل زانکۆیا سلێمانیێ دگەل ئەنجوومەنێ وەزارەتێ کۆم بوو و گھۆرینێن سیستەمێ وەرگرتنا قوتابیان ل زانکۆ و پەیمانگەھان شرۆڤە کر و ل گۆر نووترین ئامار کو ژ ئالیێ وەزارەتا پەروەردێ ڤە بۆ سەرۆکایەتیا ئەنجومەنێ وەزیران ھاتیە ئاراستەکرن، ئەڤ سالە نێزیکی 112 ھزار قوتابی دێ پشکداریێ د تاقیکرنێن پۆلا دوازدێ ئامادەیی دا کەن و گۆت “پێشبینی دھێتە کرن کو 60 بۆ 70 ھزار قوتابی دەربچن و قەستا وەزارەتا خواندنا بلند و زانکۆیان بکەن، بێگومان ئەڤ ژمارە دێ گڤاشتنێ ئێخیتە سەر وەزارەت و زانکۆیان”.
د. یوسف گۆران بەحسێ سیستەمێ نوویێ وەرگرتنا قوتابیان ل زانکۆ و پەیمانگەھان کر کو د گھۆرینا وی سیستەمی دا پێدڤیە حەزا قوتابیان بەرچاڤ بھێتە وەرگرتن و گۆت “پێدڤیە کاری بۆ پتر نێزیککرنا کولتورێ باژێران بکەین، ب ئاوایەکی قوتابی پێکڤە ھزر بکەن و گەنگەشێ ل سەر بابەتێن گرنگێن رۆژێ بکەن و ڤەکۆلینێن ھەڤپشک ئەنجام بدەن و پێدڤیە پێنگاڤ پێنگاڤ دەست ب گھۆرینا سیستەمی بکەین، ب تایبەتی ل وان پشک و کۆلیژێن کو گڤاشتن ل سەر نەبیت”.
سەبارەتی بجھئینانا ڤی سیستەمی وەزیرێ خواندنا بلند خویا کر کو پێنگاڤا ئێکێ دێ ب نموونەیەکا بچووک دەست پێ کەن و گۆت “ھەکە ئەم سەرکەتی بووین، دێ سالێن د دووڤ دا پێنگاڤ پێنگاڤ نموونان زێدە کەین، ھەتا دگەھینە وێ ئارمانجێ کو ئارەزوویێن ھەمی قوتابیان بدەستڤە بھێت و نمرە پیڤەرێ دادپەروەریێ بیت”.

ئەڤرۆ نیوز:
ژ بۆ پتر ئاگەھدار بوون ل سەر رەوشا سەقایی و پیڤانا پلێن گەرمێ و رێژا بارانان و ھەروەسا زانینا گھورینکاریێن د سەقایی دا دروست دبن بریارە ل سەرانسەری پارێزگەھا دھوکێ کامیرێن چاڤدێریێ بھێنە دانان.
ل دووڤ نڤیسارەکا رێڤەبەریا کەشناسی و بیڤەلەرزان ل پارێزگەھا دھوکێ کو بۆ دھوکێ ھاتیە ھنارتن تێدا داخاز کریە کو ئاگەھداریا تەڤایا قایمقامی و دەڤەرێن سەر ب پارێزگەھا دھوکێ بھێتە کرن کو ھاریکاربن ل گەل وانا بۆ دانانا کامیرێن چاڤدێریا سەقایی ل جھێن گونجای و پێدڤی ل پارێزگەھا دھوکێ.
ھەردڤێ دەربارێ دا بەھمەن ئەحمەد رێڤەبەرێ ناحیا دێرەلۆک بۆ ئەڤرۆ دیارکر، کو ئەڤ نڤیسارە گەھشتیە دەستێ وانا و نھا ئەڤ کارە ل دێرەلۆکێ ل ژێر بجە ئینانێ دایە و جھەکی گونجای ژی بۆ ھاتیە دیتن.

ئه‌ڤرۆ نيوز:
بۆ ماوی حەفت ھەیڤا پروژێ پرا خانێ ل باژیرێ زاخۆ ھاتیە راوەستان وچ کار تێدا نەھاتیە کرن ونوکە دەست ب خراب کرنا وێ بۆ چارا دویێ ھاتە کرن، نێزیکێ ھەشت ملیون دولارا لێ ھاتیە مەزاختن ژ لایێ کومپانیا زانین ڤە ودێ بۆ ماوی شەش ھەیڤا ئەڤ پرە ب دیزاینەکێ نوو کەفتە دخزمەتا خەلکێ باژیرێ زاخۆ دا
ئەندازیار بژار مونیب سەروکێ شارەوانیا زاخۆ ددیدارەکێ دا بۆ رۆژناما ئەڤرۆ دبێژیت: “ھەر ئەو کومپانیە دێ دوبارە وێ پرێ خراب کەت وئاڤاکەت ژ بەر داکەفتنا وێ بۆ چارا ئێکێ، ئەو پارێ لێ بھێتە مەزاختن دێ کومپانی لێ مەزیخیت ودوسیا وێ ل دادگەھێ یە ھەر گاڤا بەلێندەر ئەگەر بیت دی پارێت خوە خوسارەت بیت وئەگەر ژ دیزاینەری بیت دێ مینت ل دووڤ بریارا دادگەھێ”.
زیدەتر گوت: “ماوێ خراب کرنی 45 رۆژ تا 50 رۆژا یە و ماوێ پرۆژەی شەش ھەیڤن تا نەە ھەیڤان دڤێت ب دووماھی بھێت، ئەڤ پرۆژە ب سەرپەرشتیا رێڤەبەریا رێک وپرا دھێتە بجھە ئێنان”.
ل دووماھیێ ژی داخازکر ھەر پروژەکێ رێک پرا برێیا رێڤەبەریا رێک وپرا بھێتە دروست کرن چۆنکو بسپوریا وانایە وئەگەر دسنورێ مەدا بیت ئەم دێ ھاریکاربن.