ئه‌ڤرۆ:

سه‌رۆك مه‌سعود بارزانی ل سه‌لاحه‌دین پێشوازی ل مارك برایسن ریچاردسۆن، بالیۆزێ بریتانیا ل ئیراقێ و شانده‌كێ دگه‌لدا كر.

د دیداره‌كێ دا، ره‌وشا سیاسی یا ئیراقێ و ب رێڤه‌چوونا هه‌لبژارتنێن جڤاتا نوونه‌رێن ئیراقێ و قۆناغا پشتی هه‌لبژارتنان هاتنه‌ به‌حسكرن.

هه‌ر د وێ كۆمبوونێ دا هه‌ردولا پرۆسا هه‌لبژارتنان ب سه‌ركه‌فتی هژمارت و هیڤیا وێ چه‌ندێ خواستن كو ئه‌نجامێن هه‌لبژارتنان ببیته‌ ده‌ستپێكا قۆناغه‌كا نوو كو تێدا سه‌قامگیریا سیاسی بده‌ستڤه‌ بهێت و به‌رژه‌وه‌ندیا گشتی و خواستێن وه‌لاتیان و ده‌نگده‌ران بهێنه‌ بجهئینان.

د پشكه‌كا دی یا وێ دیداری دا بالیۆزێ بریتانیا ل ئیراقێ پشته‌ڤانیا وه‌لاتێ خوه‌ بۆ هه‌رێما كوردستانێ و چاكسازیێن وه‌زاره‌تا پێشمه‌رگه‌ و هه‌ماهه‌نگی د ناڤبه‌را هێزا پێشمه‌رگێ كوردستانێ و هێزێن ئیراقێ دووپات كر.

ئه‌ڤرۆ:

سه‌رۆكێ هه‌رێما كوردستانێ، نێچیرڤان بارزانی پێشوازی ل مارك برایسن ریچاردسن، بالیۆزێ بریتانیا ل ئیراقێ كر.

د كۆمبوونه‌كێ دا ب به‌رهه‌ڤبوونا كۆنسۆلێ گشتیێ بریتانیا ل هه‌ولێرێ، په‌یوندیێن هه‌رێما كوردستانێ و ئیراقێ ل گه‌ل بریتانیا، دووماهی پێشهاتێن ره‌وشا ئیراقێ، هه‌لبژارتنێن جڤاتا نوونه‌رێن ئیراقێ و ئه‌نجامێن وێ، پێشكه‌فتنا پرۆسێ هه‌مبه‌ركرن ل گه‌ل جارێن پێشتر و گرنگیا ئێكلاكرنا هه‌ر كێشه‌كێ ب رێكارێن قانوونی، په‌یوه‌ندیێن هه‌ولێرێ و به‌غدا، سه‌ردانا هه‌یڤا بۆری یا سه‌رۆكێ هه‌رێمێ بۆ له‌نده‌ن، گاڤێن به‌رهنگاریا په‌تایا كۆڤید – 19، شه‌رێ تیرۆرێ و به‌رهنگاریا داعشێ هاتنه‌ به‌حسكرن.

هه‌ردولا دووپاتی ل پێشڤه‌برنا په‌یوه‌ندیان كر و دهه‌ڤرا بوون كو پێدڤیه‌ حوكمه‌تا داهاتی یا ئیراقێ خواست وداخوازیێن وه‌لاتیان بجه بینیت. بۆ به‌رهنگاریا په‌تایا كۆڤید – 19 وكاریگه‌ریێن وێ ژی ب تایبه‌تی ل بوارێ په‌روه‌ردێ و ئابووری، به‌رفره‌هكرنا پرۆسا ڤاكسیندانانێ دژی په‌تایێ ب پێدڤی و گرنگ زانێن، هه‌روه‌سا خوه‌شحالیا خوه‌ ب پرۆسا هه‌ماهه‌نگیا پێشمه‌رگه‌ی و له‌شكرێ ئیراقێ ب هاریكاریا هه‌ڤپه‌یمانیا نێڤده‌وله‌تی بۆ به‌رهنگاریا داعشێ، نیشان دا.

د پشكه‌كا دی یا كۆمبوونێ دا، نێچیرڤان بارزانی دووپاتی ل گرنگیا ئێكرێزیا لایه‌نێن كوردستانی ل به‌غدا و بزاڤێن سه‌رۆكایه‌تیا هه‌رێما كوردستانێ ژ پێخه‌مه‌ت ڤێ چه‌ندێ كر، هه‌روه‌سا سوپاسیا پشته‌ڤانی و هاریكاریا بریتانیا بۆ ئیراقێ و هه‌رێما كوردستانێ كر و ئاماژه‌ ب به‌رده‌وامیا پێداچوونێ د ئه‌نجامێن سه‌ره‌دانا خوه‌ بۆ له‌نده‌ن و دیدار و كۆمبوونێن خوه‌ ل گه‌ل سه‌رۆك وه‌زیرێن بریتانی و به‌رپرسێن دی یێن بریتان یدا و رۆلێ بالیۆزخانا بریتانی ل به‌غدا و كۆنسۆلخانا بریتانی ل هه‌ولێرێ بلند نرخاند.

دانوستاندن ل دۆر ره‌وشا ده‌ڤه‌رێ ب گشتی و چه‌ند پرسێن جهێ گرنگیا هه‌ڤپشك، ته‌وه‌ره‌كێ دی یێ كۆمبوونێ بوون.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، پێشوازی ل یوناس لۆڤێن بالیۆزێ نوو یێ وه‌لاتێ سوید ل ئیراقێ كر.

د كۆمبوونه‌كێ دا سه‌رۆكێ حوكمه‌تا هه‌رێمێ، سه‌ره‌رای پیرۆزباهیێن ده‌ست بكاربوونێ ل بالیۆزێ نوو یێ سوید، هیڤی خواست د ئه‌ركێن خوه‌ یێ سه‌ركه‌فتی بیت ژ پێخه‌مه‌ت پێشڤه‌برنا زێده‌تر یا په‌یوه‌ندیێن وه‌لاتێ سوید ل گه‌ل ئیراقێ و هه‌رێما كوردستانێ.

ژلایێ خوه‌ڤه‌، بالیۆزێ سوید ل ئیراقێ، سوپاسیا هاریكاری و هه‌ماهه‌نگیا حوكمه‌تا هه‌رێما كوردستانێ ل گه‌ل بالیۆزخانا سوید ل به‌غدا كر و به‌رهه‌ڤگیا وه‌لاتێ خوه‌ بۆ پێشڤه‌برنا هه‌مه‌لایه‌نه‌ یا په‌یوه‌ندیان ل گه‌ل هه‌رێما كوردستانێ ده‌ربری.

ئه‌ڤرۆ، زنار تۆڤی:

پسپۆره‌كێ زانستێن سیاسی  د دیداره‌كێ‌ دا بۆ رۆژناما ئه‌ڤرۆ راگه‌هاند، ئه‌وێن نوكه‌ ئاریشان ل ئیراقێ دروست دكه‌ن، ئه‌و بوون یێن وه‌سا هزر دكر، دێ‌ شێن ب رێیا هێزا چه‌كی و پشته‌ڤانیا ژده‌رڤه‌ گه‌له‌ك ده‌نگان د ڤان هه‌لبژارتنان دا ب ده‌ست خوه‌ڤه‌ ئینن، به‌لێ‌ ده‌نگێن وان د ئاستێ‌ چاڤه‌رێ‌كرنا وان دا نه‌بوون، ئه‌گه‌ر ژی ڤه‌دگه‌رن بۆ خرابیا كارێ‌ وان یێ سیاسی و له‌شكری دده‌مێ‌ بۆری دا، له‌وما خه‌لكێ‌ ئه‌و سزادان، هه‌روه‌سا ئه‌ڤ هه‌لبژارتنه‌ داوی هیڤیا ئه‌مریكا و هه‌ڤپه‌یمانان ژی بوون، ژ به‌ر كو ئه‌و دێ‌ ل 31 ی كانوونا ئێكێ‌ یا ئه‌ڤ ساله‌ ئیراقێ بجه هێلن.

د. بارزان جه‌وهه‌ر مامۆستایێ كۆلیژا زانستێن سیاسی ل زانكۆیا سه‌لاحه‌ددین ل هه‌ولێرێ‌ بۆ رۆژناما (ئه‌ڤرۆ) گۆت”هه‌لبژارتن بۆ هندێ‌ دهێنه‌ ئه‌نجامدان، دا سه‌قامگیریه‌كا سیاسی ل سه‌رانسه‌ری ئیراقێ دروست ببیت،  به‌لێ‌ هنده‌ك جاران مه‌رج نینه‌ هه‌لبژارتن بشێن سه‌قامگیریێ‌ دروست بكه‌ن و به‌رۆڤاژی ل هنده‌ك جهان هه‌لبژارتن دبنه‌ ئه‌گه‌رێ‌ هندێ‌ كو گوهۆرینێن سیاسی دروست ببن و پاشی هێزێن سیاسی ڤێ‌ چه‌ندێ‌ قه‌بوول ناكه‌ن، چونكی ره‌وشه‌نبیریا سیاسی ل ده‌ف وان نینه‌، هه‌روه‌سا د سێ‌ هه‌یڤێن بهێت دا، دێ‌ كۆمه‌كا روودانان ل ئیراقێ رووده‌ن، پشتی بجه هێلانا سه‌ربازێن ئه‌مریكا، ئه‌و گوهۆرینێن سیاسی یێن كو ژ ئه‌نجامێن هه‌لبژارتنان دروست دبن، ئه‌م چاڤه‌رێبوونه‌كا خراب ژێ‌ دكه‌ین، كو ببیته‌ ئه‌گه‌رێ‌ نه‌سه‌قامگیریه‌كا زێده‌تر ل ئیراقێ”.

د. بارزان هێشتا دبێژیت”داخوازیێن خوه‌نیشاده‌رێن ئیراقی ئه‌و بوون، كو نه‌خشێ‌ سیاسی ل ئیراقێ بهێته‌ گوهۆرین و هێز و ده‌ستهه‌لات ل ژێر چه‌نكێ‌ میلیشیان بهێته‌ ده‌ر و ئیراق ببیته‌ وه‌لاته‌كێ‌ دامه‌زراوه‌یی و وه‌لاتیبوونێ‌، لێ‌ كۆمه‌كا هێزان كو پێشتر ده‌ستهه‌لاتداربوون د حوكمه‌تا ئیراقێ دا، ڤێجارێ‌ ژی ب هێزه‌كا زێده‌تر هاتنه‌ د مه‌یدانێ دا،  هه‌روه‌سا وه‌كو دبینین ئه‌و ئالیێن كو ب زه‌حمه‌ت گوهۆرین د عه‌قلێ‌ وان دا بهێته‌ كرن،  هه‌ر ئه‌و دێ‌ هێنه‌ سه‌ر ده‌ستهه‌لاتێ‌ و كابینێن حوكمه‌تێ‌ پێك ئینن، ڤێ‌ چه‌ندێ نه‌ ب تنێ‌ خه‌لكێ‌ ئیراقێ، به‌لكو وه‌لاتێن ئورۆپی ژی بێ‌ هیڤی كرینه‌ یێن كو هاریكاری پێشكێشی ئیراقێ كرین”.

هێشتا دبێژیت” پشتی هه‌موو هه‌لبژارتنان ئه‌ڤ سیناریۆیه‌ ده‌ست پێ دكه‌ن و دبێژن، سه‌ركه‌فتیێن ئێكێ‌ ژ كورد و سوننه‌ و شیعه‌یان دێ‌ حوكمه‌ته‌كا نیشتمانی پێكئینن،  به‌لێ‌ ئه‌زموونا به‌ری نوكه‌ دبێژیته‌ مه‌، ئه‌و ئالیێن دڤێن سه‌ركه‌فتی بن د ده‌ستهه‌لاتێ‌ دا، دێ‌ ئالیێن دیتر راكێشنه‌ ناڤا وێ‌ كابینێ‌، ئه‌ڤه‌ دێ‌ وه‌كه‌ت، كو درێژی ب دانوستاندنان بهێته‌ دان، بۆ هندێ‌ كو ئالیێن دیتر ژی بشێن بهێنه‌ دناڤا وێ‌ كابینێ‌ دا، به‌لێ‌ ڤێجارێ‌ ل دووڤ قانوونا هه‌لبژارتنان،  ئه‌و ئالییێ‌ بوویه‌ سه‌ركه‌فتیێ‌ ئێكێ‌ د هه‌لبژارتنان دا، هه‌كه‌ د ده‌مێ‌ 30 رۆژان دا حوكمه‌تێ‌ پێك نه‌ئینیت، دێ‌ چیته‌ گه‌ره‌كا دیتر یا دانوستاندنان و د وێرێ‌ دا دێ‌ ئاریشه‌ بۆ دروست بن”.

ناڤبری ئه‌و چه‌ند ژی خویاكر:” ژ روویێ‌ قانوونی و دستووری ڤه‌ هه‌رده‌م كۆمبوونێن جڤاتا نوونه‌رێن ئیراقێ ڤه‌كری ماینه‌،  هه‌كه‌ ئالیێ‌ سه‌ركه‌فتی یێ‌ ئێكێ‌ بڤێت كابینا نوو ژی پێك بینیت، وی لایه‌نی ب خوه‌ نه‌ڤێت بێی پشكداریا لایه‌نێن دیتر ڤێ‌ چه‌ندێ‌ بكه‌ت، چونكی پتریا هێزێن چه‌كدارێن بالێ‌ حه‌شدا شه‌عبی دبن كونترۆلا هێزێن ده‌ره‌كی دانه‌ و د بن هه‌یمه‌نه‌تا وی لایه‌نی دایه‌، یێن كو ژ 44 كورسیێن په‌رله‌مانی كرینه‌ 14 كورسی، ئه‌ڤه‌ دێ‌ ئاریشان بۆ وان دروست كه‌ت، له‌وما ئه‌و دێ‌ چاڤه‌رێی هندێ‌ كه‌ن كو ئالیێن دیتر ژی بهێنه‌ دناڤا وێ‌ كابینێ‌ دا، له‌وما پێكئینانا هه‌موو كابینه‌یان دا ل ئیراقێ یا سه‌ربه‌خوه‌ نه‌بوویه‌، به‌لكو رێككه‌فتنێن ناڤده‌وله‌تی و هه‌رێمی هه‌بووینه‌”.

دیاركر ژی”كۆمه‌كا پرسێن سه‌ره‌كی یێن هه‌ین كوی یێن گه‌هشتینه‌ بنبه‌ستێ‌ و ب بۆچوونا من جاره‌كا دی ئالیێن سه‌ركه‌فتی یێن هه‌رێما كوردستانێ‌ ئاخڤتنان ل سه‌ر وان بابه‌تان ب شێوه‌كێ‌ توند وه‌كو به‌ری نوكه‌ ناكه‌ن و بكه‌نه‌ هێلا سۆر بۆ بابه‌تێ‌ دانوستاندنان ل گه‌ل به‌غدا،  به‌لێ‌ كۆمه‌كا پرسێن دیتر یێن هه‌ین و هاتینه‌ پێش و ئه‌وله‌وییه‌ت پێ‌ هاتیه‌ دان،  كو ئه‌و ژی ئه‌و هه‌ماهه‌نگیه‌ د بابه‌تێ‌ فرۆتنا په‌ترۆلێ و بۆدجه‌ی و ئێمناهیا وه‌لاتیه‌، ئه‌ڤه‌ كۆمه‌كا بابه‌تانه‌ و دێ‌ مێزا دانوستاندنێ‌ گوهۆرن و ئالیێن كوردستانی دشێن ب ساناهی بگه‌هنه‌ رێككه‌فتنێ‌ و ئه‌ڤه‌ دێ‌ وه‌كه‌ت كو ل هه‌رێما كوردستانێ‌ ژی هه‌ڤپه‌یمانی دروست ببن”.

د. بارزان هێشتا دبێژیت” ل ئیراقێ هه‌لبژارتن نابن خالا وه‌رچه‌رخانێ‌ بۆ بابه‌تێ سه‌قامگیریا سیاسی، ژ هه‌لبژارتنه‌كێ‌ ل ئیراقێ هه‌تا ئێكا دیتر، جڤاكێ‌ ئیراقی به‌ر ب گه‌رماتیه‌كا دیتر ڤه‌ دچیت، ل دووڤ وان هه‌موو ڤه‌كۆلینێن ناڤخوه‌یی و ناڤده‌وله‌تی یێن هاتینه‌ ئه‌نجامدان، به‌حسێ‌ چو تشتێن گه‌شبین ل ئیراقێ ناكه‌ن و ره‌وشا ئیراقێ به‌ر ب باشترڤه‌ ناچیت”.

ئه‌ڤرۆ:

ب هه‌لكه‌فتا سه‌ركه‌فتنا به‌ربژارێن پارتی دیموكراتی كوردستان ل پارێزگه‌ها نه‌ینه‌وا و ده‌ڤه‌را شنگالێ، سه‌رۆك بارزانی په‌یامه‌كا پیرۆزباهیێ ئاراسته‌ی ئه‌ندام و لایه‌نگر و رێكخستنێن هه‌ردو لقێن 17 و 14 یێن پارتی كر.

ده‌قێ په‌یاما سه‌رۆك بارزانی…

ب هه‌لكه‌فتا سه‌ركه‌فتنا به‌ربژارێن پارتی دیموكراتی كوردستان ل پارێزگه‌ها نه‌ینه‌وا و ده‌ڤه‌را شنگالێ، پیرۆزباهیێ ل ئه‌ندام و لایه‌نگر و رێكخستنێن لقێ 17 و لقێ 14 یێ پارتی دیموكراتی كوردستان دكه‌م. ده‌ستخوه‌شیێ ل وه‌ستیان و پێگیریا وان دكه‌ مكو بوونه‌ ئه‌گه‌رێ سه‌رخستنا پارتی د هه‌لبژارتنێن جڤاتا نوونه‌رێن ئیراقێ دا ل وێ ده‌ڤه‌رێ.

هه‌روه‌سا من سوپاسی و پێزانینێن تایبه‌ت یێن هه‌ین بۆ خۆراگریا جه‌ماوه‌رێ ده‌شتا نه‌ینه‌وا و ده‌ڤه‌را شنگالێ و خوشك و برایێن ئێزدی و پێكهاتێن دی كو به‌رسڤا هه‌لویست و قوربانیدانا پارتی دای و په‌یامه‌كا رۆهن و ئاشكرا ژی دا هه‌موو لایه‌كی كا وان كی دڤێت و چ دڤێت.وان پشتراست ژی دكه‌م كو پارتی ل گه‌ل ب دووماهی ئینانا ئازار و نه‌هامه‌تیا خه‌لكێ وان ده‌ڤه‌ران دایه‌ وه‌كو به‌رده‌وام پشته‌ڤان و پارێزه‌رێ ماف و ژیان و سه‌ربلندیا وان دێ مینیت.

ئه‌ڤرۆ:

دوهی دوشه‌مبی 18/10/2021 شانده‌كێ  پارتی دیموكراتی كوردستان ب سه‌رۆكایه‌تیا فازل میرانی سكرتێرێ مه‌كته‌با سیاسی و ئه‌ندامه‌تیا هه‌ر ئێك ژ مه‌حموود محه‌مه‌د، عارف ته‌یفوور، عه‌لی حسێن، دلشاد شه‌هاب. بۆ كۆمبوونێ ل گه‌ل حزب ولایه‌نێن سیاسی ب مه‌به‌ستا دانوستاندنێ ل دۆر ئه‌نجامێن هه‌لبژارتنێن ڤێ دووماهیێ یێن جڤاتا نوونه‌رێن ئیراقێ و پرسا ئێكده‌نگیا كوردان ل به‌غدا، گه‌هشته‌ پارێزگه‌ها سلێمانیێ و ل ده‌ستپێكێ شاندێ بلند یێ پارتی ل گه‌ل شانده‌كێ بلند یێ ئێكه‌تی نیشتمانی كوردستان ب سه‌رۆكایه‌تیا بافل تاله‌بانی كۆمبوو.

پشتی ب دووماهی هاتنا كۆمبوونا د ناڤبه‌را هه‌ردو شاندێن پارتی دیموكراتی كوردستان و ئێكه‌تی نیشتمانی كوردستان ل سلێمانیێ، د كۆنگره‌كێ رۆژنامه‌ڤانیێ هه‌ڤپشك دا په‌یڤدارێن فه‌رمی یێن هه‌ردو حزبان، ناڤه‌رۆكا كۆمبوونێ به‌رچاڤكر.

ئه‌مین باباشێخ، په‌یڤدارێ فه‌رمیێ ئێكه‌تی نیشتمانی كوردستان راگه‌هاند كو د كۆمبوونا د ناڤبه‌را وان دا دانوستاندن ل دۆر چه‌ندین بابه‌تێن گرنگ هاته‌ كرن، ب تایبه‌تی ئێكرێزیا كوردان ل به‌غدا، دیاركر ژی كو  پشتی ئه‌نجامدانا هه‌لبژارتنێن جڤاتا نوونه‌رێن ئیراقێ، ئه‌ڤ كۆمبوونه‌ ده‌ستپێشخه‌ریه‌كا باش بوو، كو تێدا مه‌ به‌حسێ چه‌ندین بابه‌تان كر ب تایبه‌تی ئێكرێزیا كوردان ل به‌غدا و تنێ مه‌ به‌حسێ هه‌ڤپشكیا راسته‌قینه‌ یا خوه‌ كر و مه‌ به‌حسێ هیچ پله‌ و پۆسته‌كی نه‌كرین و نابیت پۆستان بكه‌ینه‌ گرێ.

مه‌حموود محه‌مه‌د، په‌یڤدارێ فه‌رمیێ پارتی دیموكراتی كوردستان و ئه‌ندامێ شاندێ پارتی، راگه‌هاند كو چوونا وان بۆ سلێمانیێ و سه‌ره‌دانا ئێكه‌تی نیشتمانی كوردستان، پشتی پرۆسا ئه‌نجامدانا هه‌لبژارتنێن جڤاتا نوونه‌رێن ئیراقێ دهێت، كو ب شێوه‌كی ئاشتیانه‌ و دیموكراسیانه‌ ب رێڤه‌چوو و سه‌ركه‌فتنه‌كا باش بده‌ستڤه‌ئینا، سه‌ردان ژی ب سه‌ره‌دانه‌كا دۆستانه‌ ناڤكر كو ل ده‌مێ هه‌وا هه‌لبژارتنان دا هنده‌ك دلته‌نگی د ناڤ بنكێن حزبان دا دروست ببوو، تاكو ئه‌و دلته‌نگیه‌ نه‌مینیت، پێدڤی ب وێ چه‌ندێ بوو كو پێكڤه‌ روونن، هه‌روه‌سا خویاكر هیچ دلته‌نگیه‌ك د ناڤبه‌را پارتی و ئێكه‌تیێ دا نینه‌.

په‌یڤدارێ پارتی دیموكراتی كوردستان دووپات كر كو د كۆمبوونا وان دا ل گه‌ل سه‌رۆك بارزانی، بریار هاتیه‌ دان كو سه‌ره‌دانا هه‌موو لایه‌نێن كوردستانی بكه‌ن، ئه‌و لایه‌ن ژی كو كورسیێن جڤاتا نوونه‌رێن ئیراقێ دا نینن و پێدڤیه‌ هه‌موو پێكڤه‌ بن و ناڤمالا كوردی رێكبێخن، تاكو ب هیچ جۆره‌كی ده‌رز دناڤمالا كوردی دا نه‌بیت كو ببیته‌ ئه‌گه‌رێ دروستبوونا كێشان بۆ هه‌رێما كوردستانێ، ئه‌و چه‌نده‌ ژی ژ پێخه‌مه‌ت كو هێزه‌كێ بده‌نه‌ هه‌موویان، ژبۆ بجهئینان و پاراستنا وان مافێن د دستووری دا ب گه‌لێ كوردستانێ هاتینه‌ دان، هه‌ڤده‌م بده‌ستڤه‌ئینانا بده‌ستڤه‌ئینانا وان مافان ژی ئه‌وێن نه‌هاتینه‌ نڤیسین.

سه‌باره‌ت ره‌وشا كه‌ركووكێ، په‌یڤدارێ پارتی دیموكراتی كوردستان، ئاماژه‌ كر، پتر ژ ساله‌كێ یه‌ لژنه‌ك دناڤبه‌را هه‌رێما كوردستانێ و حوكمه‌تا فیدرالی هاتیه‌ پێكئینان كا چاوان بابه‌تێ ئاساییكرنێ بهێته‌ بجهئینان، ئه‌و لژنه‌ژی یا گه‌هشتیه‌ كۆمه‌كا بریارێن باش، به‌لێ ئاسته‌نگ یا هاتیه‌ به‌رده‌م وێ لژنێ، نموونه‌ ژی ب رێككه‌فتنا ئاساییكرنا ره‌وشا شنگالێ ئینا، هیڤی ژی خواست حوكمه‌تا هه‌رێما كوردستانێ ل گه‌ل به‌غدا چاره‌سه‌ر بكه‌ت.

ئه‌مین باباشێخ، په‌یڤدارێ ئێكه‌تیی، دووپاتی ل وێ چه‌ندێ كر كو دێ هه‌موو بزاڤان بۆ ئێكرێزیێ دناڤبه‌را لایه‌نێن كوردستانێ دا كه‌ن، چ بۆ هه‌رێما كوردستانێ، چ بۆ به‌غدا، وه‌كو وی به‌حس كری، چاڤه‌رێی ئه‌نجامێن دووماهیێ یێن هه‌لبژارتنان بوون و به‌رنامێ خوه‌ وان یێ هه‌ی، بۆ هه‌مان مه‌به‌ست، كو پارتی ل ده‌ستپێكێ گاڤ بۆ هاڤێتین، هه‌ڤدده‌م پێشوازیێ ژی ل هه‌ر لایه‌كی دكه‌ن كو ده‌ستپێشخه‌ریێ بۆ ئێكرێزیێ بكه‌ت.

سه‌باره‌ت پۆستێ سه‌رۆك كۆمارا ئیراقێ، مه‌حموود محه‌مه‌د، ئاماژه‌ كر، كو وان به‌حسێ وی پۆستی نه‌كریه‌ و دیاركر ژی كو راسته‌ پۆستێ سه‌رۆك كۆمارا ئیراقێ به‌هرا كوردایه‌، به‌لێ دشیان دا نینه‌ بهێته‌ گۆتن كو به‌هرا فلان لایه‌نی یه‌ و ئیحتیكارا فلان لایه‌نی یه‌، مه‌رج نینه‌ بریار بۆ هاتبیته‌ دان كو بۆ لایه‌نه‌كێ دیاركری بیت.

په‌یڤدارێ پارتی دیاركر ژی، به‌غدا ئه‌م یێن ب 200 ملیار دیناران مژوول كرین و ژ نوكه‌ و وێڤه‌ ناهێلین ب وی شێوه‌ی بیت، ئه‌و مافێ مه‌یه‌ و به‌غدا خێران ل گه‌ل مه‌ ناكه‌ت.

ئه‌ڤرۆ، عه‌زیز هه‌ورامی

به‌ربژارێ پارتی یێ سه‌ركه‌فتی ل كه‌ركووكێ د هه‌لبژارتنێن جڤاتا نوونه‌رێن ئیراقێ دا، شاخه‌وان عه‌بدوللا، راگه‌هاند، ده‌نگدانا خه‌لكێ كه‌ركووكێ ب پارتی بۆ وێ چه‌ندێ ڤه‌دگه‌ریت كو پارتی به‌رده‌وام یا راستگۆبوو، ب درێژیا دیرۆكێ ده‌ست ژ پرسا كوردستانیبوونا كه‌ركووكێ نه‌به‌ردایه‌ و به‌رده‌وام روحا نیشتمانپه‌روه‌ریێ دایه‌ خه‌لكێ وێ و پارتی ل هه‌موو كێشه‌ و گرفتان دا ل گه‌ل وه‌لاتیێن وی باژێری بوو، پشتی خیانه‌تا 16 ئۆكتۆبه‌رێ ژی، پارتی رۆله‌كێ به‌رچاڤ هه‌بوو د ئاساییكرنا ره‌وشا وی باژێری دا تاكو نوكه‌ ژی یا به‌رده‌وامه‌ و دێ كاركه‌ین بۆ ده‌ربازكرنا خه‌لكێ كه‌ركووكێ ژ وێ نه‌هامه‌تیێ.

شاخه‌وان عه‌بدوللا، به‌ربژارێ پارتی یێ سه‌ركه‌فتی ل كه‌ركووكێ د هه‌لبژارتنان دا بۆ رۆژناما (ئه‌ڤرۆ) گۆت” ل 12 ئیلوونا بۆری تنێ نڤیسینگه‌ها هه‌وا هه‌لبژارتنێن پارتی ل كه‌ركووكێ هاته‌ ڤه‌كرن، خه‌لكی هه‌ناسه‌ك وه‌رگرت كو ئالایێ كوردستانێ ب ئازادی بلند دبیت”.

گۆت ژی” سه‌ركه‌فتنا پارتی و به‌ربژارێن وێ دێ ئه‌ركێن قانوونی و نه‌ته‌وی یێن زێده‌تر ئێخیته‌ ستوویێ مه‌ كو زێده‌تر خزمه‌تا وی خه‌لكی بكه‌ین، ره‌وشا كه‌ركووكێ یا خرابه‌ ژ روویێن ئه‌منی و له‌شكری و خزمه‌وتگوزاری ڤه‌، هێ زیێن ژده‌رڤه‌ی كه‌ركووكێ یێن ئیناین و هه‌موو فه‌رمانده‌ ژی خه‌لكێ كه‌ركووكێ نینن ، داعش یا ل ده‌ڤه‌رێ هه‌ی و ئه‌ركێ مه‌یه‌ دۆسێیا ئه‌منی بهێته‌ دان بۆ ده‌ستێ هێزێن خوه‌جهی”.

زێده‌تر گۆت” كه‌ركووك باژێره‌كێ زه‌نگینه‌، به‌لێ یێ بوویه‌ باژێرێ گلێشی و پرۆژێن ده‌ڤه‌رێن كوردی دهێنه‌ دزین بۆ ده‌ڤه‌رێن ئه‌ره‌ب و توركمانان، كۆمبوونێن مه‌ ژی دێ به‌رده‌وام بن بۆ ئاساییكرنا ره‌وشا كه‌ركووكێ و ئه‌ز ب خوه‌ ئه‌ندامێ لژنا ئاساییكرنا ره‌وشا كه‌ركووكێ مه‌، ل كیرێ كار راوه‌ستابن ژ وێرێ دێ ده‌ست پێكه‌ین، پارتی دێ بزاڤێن خوه‌ زێده‌تر لێكه‌ت ل دۆر پرسا ئاسییكرنا ره‌وشا كه‌ركووكێ تاكو چاره‌سه‌ریا ئێكجاری”.

هه‌روه‌سا گۆت” ب ده‌هان دۆسیێن گه‌نده‌لیێ یێن لبه‌رده‌ستێ مه‌ و بودجا سالانه‌ یا كه‌ركووكێ ب شێوه‌كێ نه‌دادپه‌روه‌رانه‌ هاتیه‌ به‌لاڤكرنو ته‌خه‌ك ژێ هاتیه‌ بێ به‌هركرن كو ئه‌ڤه‌ كاره‌ساته‌كا مه‌زنه‌، دێ كاركه‌ین وه‌كو نوونه‌رێن خه‌لكێ كه‌ركووكێ كو بودجا وی باژێری ب دادپه‌روه‌ری بهێته‌ به‌لاڤكرن”.

سه‌باره‌ت سه‌ركه‌فتنا وی ل رێزا ئێكێ ل كه‌ركووكێ، گۆت” خه‌لكی كارێن مه‌ یێن دیتین ده‌مێ ئه‌ندامێ خۆلا سیێ یا جڤاتا نوونه‌رێن ئیراقێ بووم، ب شه‌ڤ و رۆژ ل گه‌ل خه‌لكێ كه‌ركووكێ بووین و مه‌ خزمه‌تا وان كریه‌، خه‌لكه‌كێ دی ژی تنێ بۆ ئیمتیازاتێن په‌رله‌مانی بوو، د هه‌لبژارتنان دا من 40 هزار ده‌نگ ئینان، هه‌روه‌سا (نه‌جوا كاكه‌یی) به‌ربژارا دی یا پارتی یا سه‌ركه‌فتی ل كه‌ركووكێ  13و هزار ده‌نگێن ئیناین ، ب ڤی چه‌ندێ ژی ناما خه‌لكێ كه‌ركووكێ ئه‌وبوو كو ئه‌و دخوان پارتی حوكمرانیا وان بكه‌ت”.

ئاماژه‌كر” كارێ مه‌ یێ به‌راهیێ دێ ئه‌و بیت كو پارێزگه‌رێ سه‌پاندیێ كه‌ركووكێ نه‌مینیت و پارێزگه‌ره‌كێ كورد بهێته‌ دانان و رۆژا ره‌شا 16 ئۆكتۆبه‌رێ دووباره‌ نه‌بیت” ل دووماهیێ گۆت” خه‌لكێ كه‌ركووكێ خیانه‌تكارێن 16 ئۆكتۆبه‌رێ سزادان و سه‌رانێن وێ روو ره‌ش بوون”.

ئه‌ڤرۆ:

سه‌رۆكێ هه‌رێما كوردستانێ، نێچیرڤان بارزانی ل گه‌ل جینین پلاسخارت نوونه‌را تایبه‌ت یا سكرتێرێ گشتیێ نه‌ته‌وێن ئێكگرتی ل ئیراقێ كۆمبوو.

د كۆمبوونێ دا ب رێڤه‌چوونا پرۆسا ده‌نگدانێ بۆ هه‌لبژارتنێن جڤاتا نوونه‌رێن ئیراقێ و ئه‌نجامێن وان، ره‌وشا ئیراقێ ب گشتی و پێشبینیێن قۆناغا داهاتی یا پرۆسا سیاسی ل ئیراقێ، هاته‌ به‌حسكرن.

هه‌ردو لایه‌نان هیڤی خواستن ئه‌نجامێن هه‌لبژارتنان، دامه‌زراندنا حوكمه‌ته‌كێ بیت كو به‌رسڤا خواست و هیڤیێن هه‌موو پێكهاتان بیت و ئارامیێ و سه‌قامگیریێ و خزمه‌تگوزاریان بۆ ئیراقیان دابین بكه‌ت، هه‌روه‌سا د هه‌ڤرا بوون كو پێدڤیه‌ هه‌ر تانه‌ك و تێبینیه‌ك ل سه‌ر ئه‌نجامێن هه‌لبژارتنان، ب رێیێن قانوونی بهێنه‌ ئێكلاكرن.

ژلایێ خوه‌ڤه‌ نێچیرڤان بارزانی، سوپاسی و ده‌ستخوه‌شی ل پلاسخارت و تیما نه‌ته‌وێن ئێكگرتی ل ئیراقێ (یونامی) كر بۆ رۆلێ وان یێ به‌رچاڤ د چاڤدێریكرنا پرۆسا ده‌نگدانێ و هاریكاری و پشته‌ڤانیكرنا ئیراقێ دا.